Sunday, December 30, 2007

اصنع بنفسك



استعنا على الشقا بالله


نبتدى البوست


ها كلكم جيتوا ولا فيه حد غايب


انا هانده الاسامى فى اخر البوست


واللى مش هايرد عليا هاعتبره غياب وهاياخد صفر




نبتدى مع بعض اول مرحلة


كل واحد يفتح مكعب الصلصال الابيض اللى جايبه


لو حد جايب لون تانى يتكل على الله من غير مطرود


ها شيلتوا الورقة السوليفان من على مكعب الصلصال


كل واحد يمسك المكعب فى ايده ويقعد يفعص فيه


حاولوا تعملوا منه كورة كبيرة


ايوة كويس كدة


هاتوا النشابة وابتدوا افردوا الصلصال


تماااااااااااام كدة برافو عليكم والله


يلا كل واحد يعمل الشكل اللى هو عايزه


قدامكم ربع ساعة تعملوا اللى انتوا عايزينه


انا هاروح اشرب كوباية الشاى وهارجعلكم


ها عملتوا ايه


انا شايفة ناس بتعمل فى الفينش الاخير للشكل اللى فى ايديها


انا شايفة ان ابن حجر العسقلانى عمل بالمكعب بتاعه شكل شيشة


هايل يا ابن حجر


وايه اللى فرنسا عملته ده


اااااااااااااه ده شكل عجلة


وشاهى عملت تلات بغبغانات وكتبت بخلة السنان


كلمة الشنيور على اول بغبغان واسم الرايقة على التانى واسم الجبارة على التالت


حلو اوى يا شاهى


ربنا يخليلك بغبغاناتك


وايه اللى انا شايفاه ده


الطائر الحزين عمل ديك مكسور الجناح


ودكتور حر عمل من الصلصال شكل حامل المصحف


والله فكرة هايلة برافو يادكتور


ورينى يا سووووووو عملت ايه


ده شكل حصان وكاتب عليه رشا


اااااااااااااااااه


ده علشان يفكرك بالفرسة اللى وقعتك فى الترعة


بس ايه ده


ايه اللمة اللى ورا دى


الصباغ وعيل مصرى وعمر خروشات وشاور ميرور


قاعدين ورا بيتفرجوا عليا وماعملوش حاجة


براحتكم بس بجد اللى مش هايعمل حاجة هاياخد صفر


ها خلصتوا يا شباب


طب كويس


تانى مرحلة بقى


كل واحد فيكم ياخد الشكل اللى عمله ويحاول يرجعه تانى مكعب زى الاول بالظبط


طبعا مش عارفين


لان المكعب لازم يكون الست اسطح بتوعه متساويين مش كدة


انا شايفة ان فيه منكم بيحاول وتقريبا عمل المكعب بس مش متساوى اوى


يعنى منبعج من بعض الاطراف ومش متساوى


بس عموما اهى محاولة كويسة


ها كلكم حاولتوا ترجعوه تانى مكعب ابيض متساوى ولا فيه حد ماعرفش


طب اسهلهالكم شوية


هاتوا السكينة واقطعوا من كل جنب شريحة من الصلصال


ها


اظن كدة بقى رجع مكعب متساوى الاسطح مش كدة


بس بصوا عليه كويس كدة


هل هو نفسه المكعب اللى ابتديتوا تلعبوا بيه فى اول البوست


أتحدى أى واحد يقولى أه


بصوا كويس كدة


هتلاقوا ان المكعب مابقاش ابيض


بقى تقريبا لونه رمادى او على الاقل اكيد هتلاقوا فيه شوائب


يعنى مش ابيض صافى صح ولا أنا غلطانة


وبعدين لو حد فيكم رجع المكعب لأصله من غير مايستخدم السكينة


لازم هيلاقى بصمات ايده عليه مش كدة برضه ولا أنا غلطانة


وبعدين اساسا اساسا اللى رجع الصلصال على شكل مكعب باستخدام السكينة


هو برضه مارجعهوش لاصله لانه قطع منه ست شرائح على الاقل


باعتبار انه خد من كل ناحية شريحة


يعنى المكعب هتلاقوه بقى لونه رمادى مقطوع منه او منبعج وعليه بصماتكم


وحتى لو كان مقطوع وبصماتكم مش باينة عليه لو فتحتوه هتلاقوا بصماتكم محفورة جواه


******************************


هى كانت مثل مكعب الصلصال الابيض فى ورقة سوليفان


هو اول من حل ورقة السوليفان وبدأ يعبث فى مكعب الصلصال


اخذه بين يديه وشكل منه اشكال عديدة


هذا شكل لإمرأة عبث به و هذا شكل لكتاب قرأ فيه


وهذا على شكل كلبة ذليلة واخر لوردة ذابلة


أشكال وأشكال


صنع منها مايشاء


علمها أشياء


علمها الحب


علمها الكره


علمها القسوة وعلمها الضعف


اهداها اشعار نزار القبانى


اسمعها بين الاطلال لثومة


شكلها وشكل شخصيتها


علمها حبه اشياء لم تكن ابدا فى الحسبان


كان حبها له مقياس لحب الاخرين


عندما قالت لها صديقتها لتثبت لها مدى حبها لخطيبها


انا بحب فلان اد ما انتى بتحبى فلان بالَظبط


ردت عليها وقالت لن تصلى ابدا لنفس درجة حبى له


قالت لها صديقتها عندك حق اصل مفيش حد بيحب بطريقتك دلوقتى


انتى مجنونة بفلان


هى فعلا كانت مجنونة به


ولكن هما افترقا


لا يهم ذكر الاسباب


ولكنهما افترقا وهى كانت عبارة عن بعض من الاشكال


لم يحاول حتى ان يتعب نفسه ويرجعها كما كانت مكعب صلصال


هى وهى فقط بدونه لملمت اشكالها


هذه المرأة وهذه الكلبة الذليلة وهذا الكتاب وهذه الوردة وهذه العصفورة


تضامنت اشكالها معا


وكونوا شبه مكعب


حاولت هى ان تجعله مكعب متساوى الوجوه


اخذت السكينة وقطعت من نفسها شرائح وشرائح حتى تكون شبه مكعب


ولكن هى لم تعد مكعب ابيض اصبحت رمادية


لو شطرتها نصفين ستجد بصماته عليها


هى لم تعد مكعب كامل فرغم الشرائح التى قطعتها فهناك ايضا بقايا منها


هناك تحت اظافره كان يوجد بقاياها


***************************


مرت سنون


تحجر مكعب الصلصال


جاء اخر يريد ان يصنع مايشاء


هى حذرته قالت له لو حاولت تشكيلى سأنكسر سأتفتت


لا تحاول تشكيلى فانا غير قابلة لأى شكل


تقبلها على هذا الشكل


ولكن من أن لأخر يحاول أن يشكلها


وهى لأنها تم التشكيل بها من قبل


أصبحت تعرف خطوات التشكيل تتشممها تشعر بها قريبة


ترتعب إذا ما حاول تشكيلها


تهرب تفر


وتقول له


انا غير قابلة للتشكيل


إذا حاولت تشكيلى سأنكسر وأتفتت


****************************


ها فهمتوا حاجة يا بشر


طب اوضح اكتر


خدوا بالكم من اى اثار ممكن تسيبوها على اى حد قريب منكم


لان الاثار دى مش بتتمسح ولا حتى بمية النار


فخدوا بالكم انكم تحاولوا تخلوا اثاركم على غيركم تكون اثار حلوة


مش بتجرح ولا بتوجع ولا بتدبح


لان مافيش اثار بتتمحى خاااااااااااااالص






يلا تصبحوا على خير


جبتولى صداااااااع فظيييييع


هاروح اناااام


اختكم خيخة وأى كلام




ملحوظة مكعبة


نظرا لسوء حالتى الصحية( عندى ترجيع وصداع وشوية برد وجعانة ) بس ماتقلقوش عليا


اعتذر عن الرد على تعليقاتكم على البوست اللى فات


بس عموما اعتبروا ان البوست ده رد عليكم وماتزعلوش


تصبحوا على خير


بت خيخة وأى كلام




Thursday, December 27, 2007

تنويه


مش هاكتب حاجة

انا بس كنت عايزة اوضح ان البوست الجاى

هيكون بوست عملى

وده هيستلزم منكم انكم تجيبوا معاكم بعض الادوات وانتوا جايين

لان مش هينفع حد يسلف حد الادوات بتاعته وكل واحد يجى وهو معاه ادواته كاملة

البوست هيكون موجود يوم الاحد ان شاء الله

وده لانى زى ما كلكم عارفين بنزل الهرم عند البابا والماما يوم الخميس

وبارجع يوم السبت بليل ولما اجى ان شاءالله

هاكتب البوست يعنى كلكم كدة تصحوا يوم الاحد هتلاوقوه موجود ان شاء الله

هاتوا ورقة واكتبوا ورايا اللى هاقول عليه

اول حاجة مكعب صلصال ابيض نضيف يعنى يكون لسه فى سلفانه

ويكون ابيض مش هينفع اى لون تانى

سكينة

خلة اسنان

نشابة

قوالب اى شكل انتوا عايزينه اللى بتعمل فيها الكيك هتلاقوها فى درج من ادراج المطبخ

كل الستات تقريبا عندها القوالب دى

ولو مش موجودة ابقوا اشتروا من عند الراجل اللى بيبيع ادوات منزلية

لو حد عايز يجيب معاه اى حاجة زى غطيان الازوزة يجيب

كل واحد عنده مطلق الحرية انه يجيب معاه اى حاجة يحس انها هتنفعه فى اللى هانعمله مع بعض يوم الاحد

طبعا انتوا مش عارفين هانعمل ايه

وانا طبعا اكيد مش هاقولكم هانعمل ايه

يبقى متتاخروش يوم الحد

وعلى فكرة هيكون فيه درجات على العملى يعنى ماينفعش حد يغيب

اللى هايغيب مش هاياخد اى درجات والبوست غير قابل للاعادة


يلا سلام

بت خيخة وأى كلام
ملحوظة هامة جدا
اغسلوا ايديكم كويس اوى قبل ما تيجوا
ده شرط اساسى لعمل البوست
نضافة الايد مطلوبة جدااااااااااا


Wednesday, October 17, 2007

شريف جالكوا صلحوا حالكوا










اعترف أنا نوران الشاملى


بأني بحب ابني شريف جدا جدا جدا


و علشان كدة أنا بكتب المقالة دى
أنا بعترف إنى أم مهووسة

بحب ابنها بكسر الباء وضم الحاء

بعترف إنى قبل ما ولد شريف

كنت فاكرة الموضوع سهل وبسيط

وانه مجرد بامبينو جميل هيجي للدنيا

علشان ياكل وينام ويعمل بي بي

ولما يكبر شوية هلعب معاه ويلعب معايا
بعترف إنى مكنتش مقدرة إن

مسؤولية تربية طفل حاجة جامدة
لحد ماجه شريف وفهمت كل حاجة فى لحظة واحدة
بقيت عايزاصلح الكون لمجرد إن ابني اتولد
أول حاجة عملتها خليت هاني

يبطل شرب سجاير فى البيت
تصدقوني لو قلتلكوا إنى ماكنتش خايفة على صحة شريف

قد ما أنا عايزاه يتعود على سلوكيات صح
ماكنتش عايزاه يتعود إن شرب السجايرحاجة عادية،


(بالعكس أنا بحاول دلوقتى إن ازرع فى دماغه

إن شرب السجاير حاجة( يع
مش عايزاه يكبر وألاقيه ماسك سيجارة و يقولى بعمل زى بابا
بس لقيت الموضوع اكبر من باباه
لقيت نفسى فى مرة كنت راكبة تاكسي

ودى كانت أول مرة اخرج بشريف بعد ما اتولد
لقيت السواق بيطلع سيجارة وهيولعها

لقيت نفسى بمنتهى الحدة والجراءة والبجاحة والثقة بالنفس

بقوله اطفي السيجارة لو سمحت

علشان ابني معايا وفعلا السواق طفاها
ومن ساعتها وأنا أول ماركب تاكسي أو ميكروباص

بشترط على السواق انه لو كان مدخن

ميدخنش وأنا راكبة معاه علشان إبنى معايا
ساعتها معرفش أنا جبت البجاحة دى منين


واكتشفت إنى جبت البجاحة دى

من ساعة ما عيني ما وقعت على شريف

وشوفته لأول مرة فى حياتي

ساعتها زى ما أكون خدت عهد على نفسى
من غير ما أخد بالى إن خدت العهد ده


إنى هاصلح الكون علشان إبنى اتولد

يبقى لازم يلاقى كل حاجة كويسة وتمام
بعترف يا جماعة إنى لو قدرت أقول لكل الناس


اللى بتشرب سجاير فى الشارع اطفوا السيجارة

علشان ابني ماشى معايا لهعملها و هاقولها
بعترف إنى لو قدرت أقول للناس بطلوا شتايم


علشان إبنى معايا ومش عايزة ودانه

تتجرح بالكلام ده لهعملها وهاقولها
بعترف إنى بحاول على قد ما اقدر

إن إبنى مايتفرجش على أغاني سافلة

ولا على كارتون فيه جرعة عنف

علشان إبنى مايطلعش عدواني

ولا يطلع متربي انه عادى

إن البنات تقلع كدة فيسمح لبناته بكده
بعترف إنى مدخلتش بيتي لعبة سبايدر مان

ولا حتى مسدس لعبة

وان العاب شريف كلها لازم يكون فيها فكرة تعليمية
بعترف إنى من دلوقتى عمالة اشترى فى كتب وقصص لشريف


علشان لما يكبر يلاقى مكتبته الخاصة

فى انتظار بصمات صوابعه النونو

لما ييجى يقلب صفحات كتبه

علشان أعوده على حب المعرفة
بعترف إنى بكون محتارة

يا ترى اشترى لأبنى كل اللى هو عايزه

علشان محرمهوش من حاجة أبدا

ولا ارفض علشان مايطلعش ولد مدلع

واخد على إن كل حاجة عايزها هياخدها أو هيلاقيها
بعترف إنى بتخانق مع أيمن عم شريف

لما ييجى يلعب مع شريف

لعب عنيف من نوعية اضرب جامد

أو لما ييجى يقوله كل كويس

علشان لما تكبر تعرف تضرب العيال

لأني مش عايزة ازرع فى إبنى ثقافة البلطجة

و لأني مقتنعة تماما إن إبنى هيكون إنسان محترم

هيحترم الناس فبالتالي هيجبر الناس على احترامه

ومش هيضطر انه يستخدم الضرب كوسيلة لأخد الحق
بعترف إنى نفسى محدش يهدر حق حد


ولا يظلم حد علشان إبنى لما يكبر

ويبتدى يدخل معترك الحياة

أبقى مطمئنة انه مش هيظلم حد ولا حد هيظلمه
بعترف إنى بقصد أصلى قدام إبنى


وبقرأ القرآن وخليه يقول ورايا

علشان لما يكبر يتعود انه

يواظب على الصلاة وقراءة القرآن
بعترف إنى ساعات بكون قاسية على إبنى

لما احس أن أنانيته فى اللعب هتظهر

وانه عايز ينفرد بلعبة وميخليش ولاد عمته

يلعبوا معاه علشان عايزه اعلمه المشاركة
بعترف إنى كان نفسى بلدنا متتبعش لأى حد


علشان إبنى لما يكبر يعرف يحافظ عليها
بعترف إنى كنت عايزة شوارع نظيفة

وبلد كرامتها متصانة

وحكومة صالحة وحقوق محفوظة

وأخلاق عالية عند كل الناس

وحياه بمبي فى بمبي علشان شريف إبنى اتولد
بعترف إن حبك يا شريف وجع فى القلب بيزيد مابينتهيش
بعترف إنى حاولت وبحاول وهحاول إنى أصلح الكون


علشان مبقتش لوحدى أنا بقى معايا شريف
ويا ريت كل اللى يقرا المقالة دى يصلح من نفسه


علشان الكون يتصلح علشان أنا بقى معايا شريف
بعترف إنى بحب شريف جدا جدا جدا
وبعترف كمان إنى مرعوبة جدا جدا جدا


من انحطاط حال الدنيا وتأثيره على إبنى شريف
علشان كدة بدعوكم إنكم

تصلحوا حالكم علشان شريف إبني جالكم

والسلام ختام

نوران الشاملى
28/ مارس / 2007
الأربعاء الساعة 9,20 صباحا
يعنى شريف كان عنده سنتين وتسع شهور

users online