Wednesday, October 17, 2007

شريف جالكوا صلحوا حالكوا










اعترف أنا نوران الشاملى


بأني بحب ابني شريف جدا جدا جدا


و علشان كدة أنا بكتب المقالة دى
أنا بعترف إنى أم مهووسة

بحب ابنها بكسر الباء وضم الحاء

بعترف إنى قبل ما ولد شريف

كنت فاكرة الموضوع سهل وبسيط

وانه مجرد بامبينو جميل هيجي للدنيا

علشان ياكل وينام ويعمل بي بي

ولما يكبر شوية هلعب معاه ويلعب معايا
بعترف إنى مكنتش مقدرة إن

مسؤولية تربية طفل حاجة جامدة
لحد ماجه شريف وفهمت كل حاجة فى لحظة واحدة
بقيت عايزاصلح الكون لمجرد إن ابني اتولد
أول حاجة عملتها خليت هاني

يبطل شرب سجاير فى البيت
تصدقوني لو قلتلكوا إنى ماكنتش خايفة على صحة شريف

قد ما أنا عايزاه يتعود على سلوكيات صح
ماكنتش عايزاه يتعود إن شرب السجايرحاجة عادية،


(بالعكس أنا بحاول دلوقتى إن ازرع فى دماغه

إن شرب السجاير حاجة( يع
مش عايزاه يكبر وألاقيه ماسك سيجارة و يقولى بعمل زى بابا
بس لقيت الموضوع اكبر من باباه
لقيت نفسى فى مرة كنت راكبة تاكسي

ودى كانت أول مرة اخرج بشريف بعد ما اتولد
لقيت السواق بيطلع سيجارة وهيولعها

لقيت نفسى بمنتهى الحدة والجراءة والبجاحة والثقة بالنفس

بقوله اطفي السيجارة لو سمحت

علشان ابني معايا وفعلا السواق طفاها
ومن ساعتها وأنا أول ماركب تاكسي أو ميكروباص

بشترط على السواق انه لو كان مدخن

ميدخنش وأنا راكبة معاه علشان إبنى معايا
ساعتها معرفش أنا جبت البجاحة دى منين


واكتشفت إنى جبت البجاحة دى

من ساعة ما عيني ما وقعت على شريف

وشوفته لأول مرة فى حياتي

ساعتها زى ما أكون خدت عهد على نفسى
من غير ما أخد بالى إن خدت العهد ده


إنى هاصلح الكون علشان إبنى اتولد

يبقى لازم يلاقى كل حاجة كويسة وتمام
بعترف يا جماعة إنى لو قدرت أقول لكل الناس


اللى بتشرب سجاير فى الشارع اطفوا السيجارة

علشان ابني ماشى معايا لهعملها و هاقولها
بعترف إنى لو قدرت أقول للناس بطلوا شتايم


علشان إبنى معايا ومش عايزة ودانه

تتجرح بالكلام ده لهعملها وهاقولها
بعترف إنى بحاول على قد ما اقدر

إن إبنى مايتفرجش على أغاني سافلة

ولا على كارتون فيه جرعة عنف

علشان إبنى مايطلعش عدواني

ولا يطلع متربي انه عادى

إن البنات تقلع كدة فيسمح لبناته بكده
بعترف إنى مدخلتش بيتي لعبة سبايدر مان

ولا حتى مسدس لعبة

وان العاب شريف كلها لازم يكون فيها فكرة تعليمية
بعترف إنى من دلوقتى عمالة اشترى فى كتب وقصص لشريف


علشان لما يكبر يلاقى مكتبته الخاصة

فى انتظار بصمات صوابعه النونو

لما ييجى يقلب صفحات كتبه

علشان أعوده على حب المعرفة
بعترف إنى بكون محتارة

يا ترى اشترى لأبنى كل اللى هو عايزه

علشان محرمهوش من حاجة أبدا

ولا ارفض علشان مايطلعش ولد مدلع

واخد على إن كل حاجة عايزها هياخدها أو هيلاقيها
بعترف إنى بتخانق مع أيمن عم شريف

لما ييجى يلعب مع شريف

لعب عنيف من نوعية اضرب جامد

أو لما ييجى يقوله كل كويس

علشان لما تكبر تعرف تضرب العيال

لأني مش عايزة ازرع فى إبنى ثقافة البلطجة

و لأني مقتنعة تماما إن إبنى هيكون إنسان محترم

هيحترم الناس فبالتالي هيجبر الناس على احترامه

ومش هيضطر انه يستخدم الضرب كوسيلة لأخد الحق
بعترف إنى نفسى محدش يهدر حق حد


ولا يظلم حد علشان إبنى لما يكبر

ويبتدى يدخل معترك الحياة

أبقى مطمئنة انه مش هيظلم حد ولا حد هيظلمه
بعترف إنى بقصد أصلى قدام إبنى


وبقرأ القرآن وخليه يقول ورايا

علشان لما يكبر يتعود انه

يواظب على الصلاة وقراءة القرآن
بعترف إنى ساعات بكون قاسية على إبنى

لما احس أن أنانيته فى اللعب هتظهر

وانه عايز ينفرد بلعبة وميخليش ولاد عمته

يلعبوا معاه علشان عايزه اعلمه المشاركة
بعترف إنى كان نفسى بلدنا متتبعش لأى حد


علشان إبنى لما يكبر يعرف يحافظ عليها
بعترف إنى كنت عايزة شوارع نظيفة

وبلد كرامتها متصانة

وحكومة صالحة وحقوق محفوظة

وأخلاق عالية عند كل الناس

وحياه بمبي فى بمبي علشان شريف إبنى اتولد
بعترف إن حبك يا شريف وجع فى القلب بيزيد مابينتهيش
بعترف إنى حاولت وبحاول وهحاول إنى أصلح الكون


علشان مبقتش لوحدى أنا بقى معايا شريف
ويا ريت كل اللى يقرا المقالة دى يصلح من نفسه


علشان الكون يتصلح علشان أنا بقى معايا شريف
بعترف إنى بحب شريف جدا جدا جدا
وبعترف كمان إنى مرعوبة جدا جدا جدا


من انحطاط حال الدنيا وتأثيره على إبنى شريف
علشان كدة بدعوكم إنكم

تصلحوا حالكم علشان شريف إبني جالكم

والسلام ختام

نوران الشاملى
28/ مارس / 2007
الأربعاء الساعة 9,20 صباحا
يعنى شريف كان عنده سنتين وتسع شهور

19 comments:

Ali Abu-Talebِِ said...

انا ومراتي بنعمل كتير من اللي انتي بتعمليه مع بنتنا رقيو اللي تقريباً في عمر شريف
بس هل احنا وااقعيين
يعني هل ممكن فعلاً نجهز له ونورث لهم المدينة الفاضلة عشان يعيشوا فيها؟
زي ما بنعمل كل اللي انتي بتعمليه مع ابنك زي ما باتضايق من بنتي لما تلعب مع بنات او أولاد في قرب سنها وكلهم يضربوها ومتدافعش عن نفسها وتيجي تعيط لنا
نفسي زي ما أجهزها وأدربها للحياة في المدينة الفاضلة اللي كلنا نبحث عنها نربيهم انهم هايعيشوا في غابة لازم ينتبهوا لنفسهم فيها عشان ميبقوش ملطشة

تحياتي ليكي
موضوع اكتر من رائع

بت خيخة وأى كلام said...

العيب مش فينا يا ابو طالب انت ومراتك صح وانا صح احنا بنربى عيالنا صح والمشكلة فى صحاب بنتك اللى بيضربوها العيب فى اهاليهم هما اللى مش عارفين يربوا عيالهم او بمعنى ادق بيربوا عيالهم على ثقافة البلطجة اللى انا رفضاها اساسا لو جيلنا احنا بيربى عياله صح اكيد هنورث لهم المدينة الفاضلة اللى فى دماغك ودماغى ودماغ الناس المحترمين
انا اكيد مش عايزة ابنى ينضرب من اصحابه لكن برضه مش عايزاه يضرب اصحابه الفكرة انه ليه اساسا يضرب او ينضرب ليه منربيش عيالنا على احترام نفسهم واحترام غيرهم
ليه نربيهم انهم ياخدوا حقهم بالضرب والبلطجة
انا عارفة ان كلامى مش منطقى بس ادينى بحاول وبطلب ان كلنا نحاول نحسن من سلوكنا وثقافتنا علشان ولادنا يكونوا احسن مننا
انا لو علمت ابنى انه لو حد ضربك اضربه جامد زى ما ابوه دايما يقوله
ورغم معارضتى الشديدة للفكرة بس لو وافقت ابو شريف على مبدا البلطجة بصراحة هكون مضطرة مش هكون مبسوطة وانا بطلعها من بقى جملة اللى يضربك اضربه هعصر على نفسى فدان لمون وهاقولها لانى فى الاخر مش هاقبل ولا هارضى ان ابنى يجيلى فى يوم مضروب من صحابه وانه يبقى خيخة زى أمه
وربنا يستر على عيالنا
ويخليلك رقية وتكون احسن انسانة فى الدنيا
وشكرا على تواصللك معايا يا ابو طالب ومستنية ارائك دايما
والسلام ختام من بت خيخة وأى كلام

3ala asm masr said...

ربنا يخليهولك يارب يا نورهان
أنا مش عارفه افرح ولا أحزن
بجد أنا فرحانه أنك بتربى شريف كده وياريت كل الامهات تربى ولادها كده
لان أكيد لو أحنا أتغيرنا هنقدر نغير اللى حوالينا
ومش عارفه أحزن على همك اللى شيلاه فى قلبك واللى لو أنا كان عندى ولاد كنت هشيله زيك
همى وحيرتى بين أنى أربى أبنى كويس واخليه حد محترم وبيحب يقرا وألغى من عندى ثقافة البلطجه على رأيك
وبين الواقع اللى أمر من المر لما يطلع ويلاقى حال البلد دى بقى كده
أنا لو كنت مكانك كنت هعمل زيك بالظبط بس بردو كنت هشيل الهم أوى
ربنا يخليلك الشريف وعايزه أقول لكل اسره بجد
ربوا عيالكوا كويس واحده واحده الدنيا ان شاء الله هتتغير لما احنا كمان نتغير
طولت عليكى معلش

بت خيخة وأى كلام said...

على اسم مصر
بصى ياهند
هى التربية صعبة جدا
يعنى انا بسبب موضوع التربية ده خصوصا فى زمنا ده خلانى اخد قرار بعدين هابقى اقولكم عليه
المهم ان زى انتى ماقلتى ان احنا لو اتغيرنا للاحسن اكيد ولادنا هيتغيروا للاحسن وهيطلع جيل جديد متربى على الاخلاق والمبادئ والقيم اللى الواحد مفتقدها الايام دى

وماكنتش عايزة اشيلك الهم يا هند
بس فعلا وجود اطفال بيخلى الواحد غصب عنه بيشيل الهم فجاءة

وربنا يارب يوفقك وتتجوزى ويكون عندك عيال وتعرفى تربيهم كويس ويطلعوا احسن الناس

ودايما كدة منورانى يا هندودة
اختك خيخة

لماضة said...

بجد يا نوران
انا اول مره ادخل مدونتك رغم انى كنت بشوف تعليقاتك عند ناس كتير
بس حقيقى تحيه كبيره منى ليكى
معنديش اى كلام اقدر اقوله بعد كلامك
ربنا يارب يكرمك بيه ويحميهولك
وخلاص اعملى حسابك
انا خطبته
يلا تقلى جيبك بقى
تحياتى ليكى
وكل سنه وانتى يارب فى اتم صحه وحال

ماشي صح said...

الله يصلح شريف ويجعله قرة عين لوالديه
ونشوفه شاب صالح مصلح مثال لكل الشباب
ويارب تصير كل الأمهات مثللك يا أم شريف في حرصها على تربية ابنها
الله يوفقك ويعينك

الطائر الحزين said...

ليس فى ايدينا الا ان نعم الصح او بمعنى ادق ما نراه صح من وجهة نظرنا ومن وجهة نظر ديننا

اما العواقب فليس لنا دخل فيها

بارك الله فيك
و اقر الله به عينك

تحياتى

كل عام انت بخير

ابن حـجـر الـعـسـقـلانـى said...

و أنا اللى كنت ناوى أنحرف خلاص .. لكن عشان خاطر شريف أنا مش هانحرف يا ستى

am.zaid said...

السلام عليكم
انا اول رة اعلق هنا رغم انى متابعة مدونتك من فترة
ربنا يخليلك شريف ياخيخة يااااااااارب ويوفقك فانك تربيه احسن تربية اللى انتى فعلا بتتمنيها
بس تسمحيلى اقولك حاجة بأن فعلا أهم حاجة عند الطفل هيه القدوة والوسط اللى بيتربى فيه ...انا مش بقلل من أهمية تغيرنا احنا لبعض التصرفات الا ان برضه الجانب الاكبر هى التربية الداخلية وتنمية الواعظ والضمير اليقظ داخل الاطفال وبعدين سبيه يخرج للمجتمع مع المراقبة الدقيقة لكل التصرفات وباذن الله تفرحى بانك ربيتى وعلمتى وربنا يجعله ذرية صالحة ليكى باذن الله
...
واحنا فى الخدمة فى اى استشارة طفولية اصله تخصصى
:)
:)
بس على قدى كده

... تحياتى

دكتور حر said...

خيخه
أختنا الكبيره

كل سنه وانتي طيبه
ويا رب شريف يطلع حاجه كبييييييييييييره قوي
فوق ما تتخيله

ويقولوا عليه بعد كده:

"وكان هذا القائد العظيم شريف ابن هاني متميزا وجسورا بالرغم من أن امه خيخه"

وبالنسبه للتاج براحتك خالص معاه زي ما تحبي اتصرفي فيه عاوزه ترجعيه رجعيه
ومش راح أزعل أبدا

كل سنه وانتم طيبين

فرنسا هانم said...

ام شريف يا سكر
تحيه غاليه
مطرقعه
على كل 6 اكتوبر
سنه
كام
اى سنه علشان خاطرك
الله عليكى وانتى بتحاولى تصلحى الكون
عارفه لو كل ام
عملت زيك كده
هيطلع جيل نعتمد عليه
جيل عنده سلوكيات ممتازه
تبقى طبع
وليس تتطبع
كل سنه وانتى وشريف بخير
وعلى فكره يانوران
انا مشربتش حاجه المره اللى فاتت
يعنى
عايزه 2 نسكافيه دوبل
والعيديه

Doba said...

انا حبيت اجى اعيد عليكى واقولك كل سنة وانتى طيبة وخير وبسعادة انتى واسترك الغالية

انتى قلتى اسعى يا عبد وانا اسعى معاك
اعملى اللى عليكى صح فى تربيتك لشريف وعلميه يواجه المجتمع ازاى واعرفى ان ربنا برده هيحطاه حاجات فى طريقه علشان يتألم وللأسف من الحاجات دى برده هيكون فيه حاجات تضايقه وتضايقك بس كل ده علشان نتعلم ونكون أقوى

على فكرة انا عندى يوسف 3 سنوات و3 شهور - يعنى تقريبا قد شريف

بس كل لما بحس انى خايفة بحس انى بضره مش بفيده فبرمى حمولى على الله وبتعامل معاه بحيادية تامة

الاطفال ليهم أسس للتربية واللى احنا اتربينا عليه وزى أحمد ابو فداء مبيحكى فى مدوناته - الكلام ده بقى صعب يكون موجود دلوقتى - المجتمع مش بقى آمن للدرجة دى فلازم نتبع أسس آخرى للتربية

انا عن نفسى بقرأ كتير جدا على الانترنت وكتب وبعدين انتى شخصيا بتستفتى قلبك فايه اللى ينفع مع ابنك وازاى وبتتبعيه

بس دايما خليكى مع ربنا واعرفى ان اى حلو منه كويس جدا واى وحش بنتعلم منه ولازم نتخطاه وبرده شريف لازم يتعلم ده

انا عارفة انك دماغك كبيرة قوى وعارفة كل اللى بقوله لكن انا شخصيا من وقت للتانى بحتاج اللى يقولى تانى ويحصحنى لحاجات انا مش شايفاه دلوقتى

تحياتى يا أقوى خيخة
على فكرة
البوست اللى فات فعلا أحلى بوست كتبتيه - لانه طالع من قلبك بجد

سلامى لشريف ولهانى وكل سنة وانتم بخير وسعادة وفى منتهى الطيبة
هبة

يوميات عيل مصري said...

كل سنة وانت طيبة يا طنط أم شريف
كالعادة من ع القهوة
لغاية ما نحل مشكلة الانترنت ف البيت
تقوليش في جزر الواق وق
هو شريف مواليد يونيو
يبقى زي فداء
يارب تشوفيه زي فداء، ويلاعبني مصارعة،
تصدقي الواد قاعد جنبي بيقولي ايه؟
بيقولي انتم خايفين علينا ليه يا برنس؟
احنا نفوت في الحديد،
قشطة يا برنس
النبي قوليلي أرد عليه أقوله ايه
قشطة يا نوران، ما تخافيش على شريف
هأبقى أقولك لما أفوء إحنا ليه أحيانا بنخاف على عيالنا
بس كل سنة وانت وأبو شريف وشريف بخير
وأرجمينا أوعي تزعلي تاني، أكيد عندنا مليون حاجة، تمنعنا عنك يا حاجة
خللي شريف ياكل فتة، عشان ريحة التوم والتقلية تبقى من مكونات شخصيته،
بدل ما نعيش على الفاست فوود
سلام يا اخت

Omar... خروشات said...

صباح الخير يا ام شريف


عيد سعيد وكل سنة وانتم طيبيين جميعا



شريف قرة عينك لانه اول ابناءك و هيفضل كده حتى لو انجبتى 10 بعده هيفضل هوا الالفة

ربنا يخليه لك ويسعدكم فى حياتكم


شريف بقى اشهر من البلوج بتاعك

هههههههههههههههههههه




و السلام

عمر،

بت خيخة وأى كلام said...

لماضة
عمرك اطول من عمرى يا لماضة
قبل ما تمتبى تعليق عندى انا كنت عندك قبلها بيوم
وقريت كام بوست ليكى
بس للاسف ماكنش عندى وقت انى اعلق عليهم
عموما ماتخافيش الجيب عمران والحمد الله
مستنياكى انتى والوالد والوالدة بعد العيد علشان تخطبيه رسمى
كل سنة وانتى طيبة


ماشى صح
ميرسى اوى على الدعوة الحلوة دى ويارب تكون استجابت
ولك مثلها يا ماشى

الطائر الحزين
كل سنة وانت طيب
وشكرا على دعوتك
ولك مثلها

ابن حجر العسقلانى
طب كويس انى لحقتك بقى
لحسن انت لو كنت انحرفت كنا نقول على الاجيال الجاية يارحمن يا رحيم
كل سنة وانت طيب يا ابو العساقيل

ام زيد
الاول قوليلى انتى اخت دكتور حر
ولا ده تشابه اسماء
ثانيا كلامك صح فعلا
وربنا يقدرنى واربيه احسن تربية
وبالنسبة للاستشارة
انتى تخصص ايه بالضبط
يعنى طب اطفال ولا تخصصك فى طريقة تربية الاطفال
اصلها تفرق كتير
وفى نفس الوقت اى كان تخصصك بدل ليه علاقة بالاطفال يبقى اكيد هحتجللك
ياريت تنورينى دايما
وكل سنة وانتى طيبة


دكتور حر
كل سنة وانت طيب يا محمد
ومش قادرة اقولك انت فطستنى على روحى من الضحك
بالجملة اللى انت كتبها دى

"وكان هذا القائد العظيم شريف ابن هاني متميزا وجسورا بالرغم من أن امه خيخه"

ضحكتنى مووووت

ده هانى لو قراها هيشكرك اوى


اما بالنسبة للتاج
لا طبعا مش هارجعه
بس ده محتاج مجهود جبار
ده مش اى تاج
ده تاج مليان جواهر
ربنا يقدرنى واقدر انى احافظ عليه
ومايتسرقش منى
وكل سنة وانت طيب واسرتك الكريمة بخير

فرنستى الغالية
كل سنة وانتى طيبة يا فرنسا يا حبيبتى
ومن عنيا حالا النسكافيه الدوبل هيكون جاهز ومعاه كمان صنية فتة
ومستنياكى انتى وهبة



دوبا او هبة
كل سنة وانتى طيبة يا هبهوبتى
وكل سنة ويوسف طيب
وابو يوسف كمان طيب
والله يا هبهوبة بحاول اعمل اللى انتى بتقولى عليه ده بالظبط
بس مش قادرة امنع نفسى من الخوف على ابنى
وربنا يستر على عيالنا جميعا
اجمد حتة فى تعليقك كانت

انتى قلتى اسعى يا عبد وانا اسعى معاك
اعملى اللى عليكى صح فى تربيتك لشريف وعلميه يواجه المجتمع ازاى واعرفى ان ربنا برده هيحطاه حاجات فى طريقه علشان يتألم وللأسف من الحاجات دى برده هيكون فيه حاجات تضايقه وتضايقك بس كل ده علشان نتعلم ونكون أقوى

الحتة دى فوقتنى ورعبتنى
رغم ان عارفة ان اكيد شريف لما يكبر هيتحط فى مواقف وعليه انه يختار الطريق الصح او الغلط
وساعتها مش هاكون معاه علشان انا اللى اختارله الطريق
هو لوحده اللى هيختار
وهو وضميره بقى
لما اشوف الواد هتطمر فيه تربيتى ولا هيطلع خيخة زى امه

تحياتى يا هبهوبة
وكل سنة وانتى طيبة
والنسكافيه هنشربه عند فرنسا الليلة
بس هاتى معاكى لب علشان مالحقتش اشترى


احمد عيل مصرى
كل سنة وانت طيب يابرنس
ويارب اشوف شريف زى فداء
ومتخافش انا اكلت شريف فتة مليئة بالتوم
بس ايه بقى مش قادرة اقولك
على الروائح اللى بتصدر منه لحد دلوقتى
انا اتعميت خلاص
كل سنة وانت طيب ووفاء وسلمى وفداء طيبين
وكل العائلة الكريمة بخير

عمر خروشات
كل سنة وانت طيب يا عمووور
ويارب شريف دايما يكون اشهر منى بس فى الخير


كل سنة وانتو كلكم بخير
وعيد سعيد ملئ باللحمة والفتة

اختكم خيخة

شقاوة شعب said...

happy feast
full of meat
friends meet
relatives greet
clothes gdeed
money bel3abeet
afrah w zagharit
w tarabatateeeet

كل سنة وانتى طيبة بمناسبة عيد الاضحى المبارك اعاده الله جميعا باليمن والبركات


وربنا يخليك شريف ويحميهولك من كل سوء
ويجازيكى الجنة على حرصك على حسن تربيته

ودى كانت اول زيارة لمدونتك الرقيقة وان شاءالله ماتكونش الاخيرة


تحياتى
شيماء

د/اجدع بنوته said...

ياااااااه قد ايه حسيت فعلا انى ان شاء الله لما ربنا يرزقنى باطفال هقلب اهيف بنوته فعلا

فعلا عندك حق انك تبقى خيخه والله

قد ايه الواحد يترعب ع اولاده

ربنا يخلهولك يارب ويحميه وتشوفيه ف الصوره اللى انتى بتتمنيبها

باذن الله

مهندس مصري said...

شفت تعليقك عندي تمام كده بس أنا قاعد من ساعة صلاة المغرب لغاية دلوقتي باقرأ المدونة بوست بوست و يارب أعرف أصحى للشغل بكره لأن المدير العام بتاعي مابيتفاهمش في الغياب و أكره حاجة عنده اني أغيب حتى لو كانت أجازة من الرصيد
:)

ويكا said...

اعترف أنا نوران الشاملى



بأني بحب ابني شريف جدا جدا جدا



و علشان كدة أنا بكتب المقالة دى
أنا بعترف إنى أم مهووسة


بحب ابنها
علشان ياكل وينام ويعمل بي بي



بعترف إنى بتخانق مع أيمن عم شريف


لما ييجى يلعب مع شريف


لعب عنيف من نوعية اضرب جامد



أو لما ييجى يقوله كل كويس


علشان لما تكبر تعرف تضرب العيال


لأني مش عايزة ازرع فى إبنى ثقافة البلطجة



و لأني مقتنعة تماما إن إبنى هيكون إنسان محترم



هيحترم الناس فبالتالي هيجبر الناس على احترامه




علشان الكون يتصلح علشان أنا بقى معايا شريف
بعترف إنى بحب شريف جدا جدا جدا
وبعترف كمان إنى مرعوبة جدا جدا جدا



من انحطاط حال الدنيا وتأثيره على إبنى شريف
علشان كدة بدعوكم إنكم


تصلحوا حالكم علشان شريف إبني جالكم

والسلام ختام

نوران الشاملى
28/ مارس / 2007
الأربعاء الساعة 9,20 صباحا
يعنى شريف كان عنده سنتين وتسع شهور

ــــــــــــــــــــــــــــــ

ياترى بقى بعد سنتين وشهرين و6 ايام ؟ ياترى هيبقى كلامك ايه دلوقت ؟؟!!!
ياترى هيبقى هو هو ولا الدنيا اتغيرت؟

users online