Saturday, January 12, 2008

بح نجلا وبح شريف






الشبه بين " بح " نجلا و" بح " شريف


الشبه إن الاثنين مش بح ولا حاجة و إن الاثنين مليانين حاجات

فـــ ( بح ) نجلا دعوة صريحة انك لازم تقوم تعمل حاجة ومتفضلش قاعد زي خيبتها كدة
يا إما تقوم تبوسها او تقرصها او تاخدها قلمين او اضعف الإيمان انك تقوم تشد معاها الأستك بتاعها
فهي رغم انا تردد (بح خلاص شطبنا معدش عندي اللى ادهوللك ).

إلا انها عندها كل حاجة ومشطبتش ومقفلتش ولا حاجة


بل بالعكس كل حاجة متاحة بس انت ادخل بقلب جامد ومتخافش


, دى كمان منزلة عرض إن الثلاثة بسعر اثنين على اى حاجة
(أما انك صحيح قارئ نيتك وحشة , انت فهمت ايه ؟!! انا قصدي على الصابون).

ومش عارفة ليه لما بتشد أستك الأندر وير


يحضرني مشهد من مسرحية شاهد ماشافش حاجة


عندما يقول عادل إمام لحاجب المحكمة


( سايبين الشقة كلها وقاعدين فى اوضة فيرد عليه الحاجب ويقول هي الشقة كلها عبارة عن اوضة يا حضرة)
وهنا يسألني القارئ اللئيم اللى ماشافش (بح) نجلا, ويقول يعنى هي سايبة الأندر وير كله وجاية تشد الأستك؟
أرد عليه و أقول هو الأندر وير كله عبارة عن أستك يا حضرة .


أما ( بح ) شريف وما أدراك ما (بح ) شريف


فعندما يطبق شفتيه ليطلق بح تشعر انه يطلق قبلات لك وللدنيا كلها
تشعر انه يقول بحبك يا مامى بحبك يا بابي بحبك يا تيتا و أخيرا بحبك يا جدو يا صاحبي الكبير.
لا تشعر انها بح و إنما هي دعوة صريحة لكي تعتصره فى أحضانك ليتوغل بداخلك.
دعوة لان تنظر إليه( وتبحلق فيه) لعل وعسى أن تبتلعه عينيك ليستقر فى مقلتيك.
عندما يقول بح فهي لها اكثر من إيحاء , فعندما يأتي إلى محمولا من تيتا ويقول لي
( ماما انلة بح) يعنى( ماما نملة بح) وعينيه تملؤها الأسى


لا تملك أمامه إلا أن تذهب معه إلي المطبخ وتبحث له عن اى( انلة)
حتى يذهب الآسى من عينيه,و تملأ عينيه الفرحة ويقول (انلة هيييييه) ويبعث إليها بقبلات وبيبيات(جمع باى) .
أما الإيحاء الثاني فهو عندما يأكل وينظر إلى الطبق


فيجده مازال مليئا بالطعام فيقول لي بمنتهى الجدية والصرامة (بح)


ويرفع يديه الصغيرة الكلبوظة بحركة ناهية مانعة لأي محاولات منى أن أطعمه المزيد
( فهو خلاص شبع ,يعنى أشيل الأكل من قدامه بدل ما يقلب الطبق عليا)


فاضطر مرغمة أن ارفع الطبق مكتفية بما أكله।
أما البح التالية فهي بح متسألة وذلك عندما يجد أن ورقة الشيكولاتة لم يعد بها اى شيكولاتة


وان أمه الشريرة ( اللى هو انا ) قد التهمت كل ما بها ولم تعطه سوى مكعب او مكعبين على اكثر تقدير


ويجد الورقة مكرمشة فى يد أمه وهى تقول له فى منتهى القسوة ( ارمي الورقة دى فى الزبالة يا شريف)


فيمسك بالورقة ويفردها


وينظر إليها ثم إلى أمه وينظر إلى الورقة مرة أخرى ثم إلى أمه


هكذا عدة مرات فى آسى واضح
ثم يطبق شفتيه ويطلق ( بح )متسألة معناها هو بجد خلاص مافيش شيكولاتة تانى؟


بح يهتز لها قلبي وترتج لها الجدران


و لا املك أمام هذه البح إلا أن أقوم متجهة إلى درج الشيكولاتة السري


واحضر قطعة شيكولاتة أخرى أناوله إياها كلها(خالصة مخلصة)


لا آكل منها شيء حتى لا آري هذا الكم الهائل من الآسى فى عينيه الملونتين الجميلتين


خمسة وخميسة على اللى ما يصلى على النبي) هذا هو الشبه بين بح نجلا وبح شريف)
ان الاتنين بح مليانة مش بح فاضية
بس بذمتك انت تفضل بح نجلا ولا بح شريف؟
انا عن نفسى افضل بح نجلا اصلها اكسكلوسيف


مش موجودة على القنوات الأرضية وحتى الفضائيات
بنشوفها كل فين وفين
أما بح شريف فهي افيلبل فى اى وقت




انتهى


بت خيخة وأى كلام


نوران الشاملى



فبراير 2006

27 comments:

King A.S.R said...

ههههههههههههههههههههههههههههه

بجد توضيح جامد للبحين
بس للأسف انا شوفت منهم واحدة بس وحي بح نجلاء لكن بح شريف معرفهاش بصراحة

عموما يعني اكيد هأيدك في الرئي واختار بح نجلاء :)

Ahmed Al-Sabbagh said...

ياختى يا عسل يا سكر

وشايلة كل ده فى قلبك

ده انا هموت خلاص من الضحك والعياط

يارب يخلى شريف ده عسولة اوى
أما الإيحاء الثاني فهو عندما يأكل وينظر إلى الطبق فيجده مازال مليئا بالطعام فيقول لي بمنتهى الجدية والصرامة (بح) ويرفع يديه الصغيرة الكلبوظة بحركة ناهية مانعة لأي محاولات منى أن أطعمه المزيد"

ههههههههههههه
حلوة اوى اوى اوى

جامد اوى البوست ده بجد

ايه الجمال ده

لالالا طبعا بح شريف احلى واجمل ماشاء الله يارب يحفظها ويحميها وما يحرمنا منها ابدا

اما بقى بح نجلا
فيارب ياخدها
هى والحصان بتاعها كمان
آآآ قصدى نجلا مين انا معرفهاش ولا عمرى شوفت كليبها ولا بصيت عليها ولا مققت عينى فيها
ههههههههههه
شكلى مفقوس اصلا


تحياتى

شمعى أسعد said...

مقارنة رائعة

بين عهر نجلا

وبراءة شريف

بين بح الأصلية

التى للأطفال فقط حق الأداء العلنى لها

وبح نجلا

التى رددتها

فافسدت الارتباط الشرطى

بين بح

وبراءة الاطفال

3ala asm masr said...

لاء طبعا بح شريف احلى كتير
ربنا يخليهولك

بنوته مصرية said...

ههههههههههههههههه

ربنا يخليه يارب

ايش جاب بح شريف لي بح نجلا

بس بح شريف احلي واطعم طبعا بنسبالي

بوسهولي اووي

رودي

مستجدة said...

بسم الله ماشاء الله ولا قوة إلا بالله ربنا يخليهولك هوا وبحاته
وسيبك من البحات المستفزة التانية دى....دى هتخش النار وبكرة شريف لما يوعى يقوللك...ربنا يبارك فيه

مصعب said...

ربنا يباركلك في شريف
وياخد نجلا
وكل سنة وانتى طيبة
وبح

DR.HAMAS said...

الأخت نوران

أخيرا عرفت لك اسم غير خيخة و اى كلام

ههههههههههه

ربنا يبارك لك فى شريف

بصراحة لما بشوف الاسفاف و قلة الادب من النجمات العربيات العالميات

اللاتى يحصلن على النجومية و الشهرة بالأستك
و الأندروير

بصراحة انا مكسوف و انا بكتب كدة

لكن للأسف ده واقعهم

بصراحة بح شريف و إن كانت أفيلابل
فهى أحسن بكتييييير من اكسكلوسف نجلا

لأنها فيها براءة و طيبة و حب
إنما بح نجلا إغراء و قلة قيمة و هوان


ربنا يصلح مجتمعنا يا رب

و يطهره من نجوم الأندروير



شكرا ليكى أخت نوران على البوست القديم ليكى الجديد بالنسبة لى

مبسوط اوى انى لقيت لك اسم عدل لا مؤاخذة

هههههههههههه


د.حمــــــاس

مهندس مصري said...

بح شريف أحلى طبعاً ربنا يخليهولك و يبارك لك فيه
:)
بلا نجلا بلا حصان بلا قلة أدب
:(

فرنسا هانم said...

تملى احنا كده نفهم الناس غلط
ليه تكون نيتنا سوده ومطينه بطين
مش يمكن
بح نجلا
برضه
من الطبق الفاضى
مش طبق شريف المليان
وبعدين انتى من امتى بتسيبى طبق الولد مليان
مانتى نازله على اكله والشيكولاته بتاعته هم الهم
اقولك
الف هنا وشفا
وبح الكلام

من القلب said...

طيب شريف و يا حبيب مامته مفرداته اللغوية نونو زيه و مش عارف يقول اكتر من بح
لكن نجلا اللى عاملة فيها انها بنص لسان دى ؟؟

مفيش مقارنة طبعا
بح شريف تكسب
ربنا يبارك فيه
و يارب لما يكبر ميختارش هو بح نجلا :)

د/اجدع بنوته said...

ياربى ع السكر رررررررررررررر

لا طبعا انا افضل بح شريف

ع اساس انى مع بح نجلا مش هعرف اخد اى تصرف

ولا التلاته بجنيه ولا واحده بنص جنيه حتى

لكن بح شرررريف هتملى الدنيا حوالينا لعب وحب وضحك وحنييه

ربنا يخلهولك يااارب

وخلاص انا فاضلى بوست واحد عنه واجى اخطفه

وبكركر اهو وانتى حررره

بوست كمان عن شريف

ومش هتلاقيه خالص

بح شيكوو

appy said...

لاااااااااااااااااااااا
لااااااااااااااااا
بح شريف احلى
با نجلا بلا فجله
حرام عليك ربنا يخليه لكى

ghalia said...

ما شاء الله على القمر
ربنا يخليهولك يا نوران
طبعا بح شيكو تكسب
نجلة مين وبتاع مين يا شيخة

Omar... [ خروشات ] said...

انا ااقدر اتفهم واحس و اتخيل و استمتع بــ بح بتاعت شريف


ام نجلا؟

نجلا؟

نجلا؟

نجلا؟


الاسم ده شوفته فين قبل كده؟؟؟

شوفته فين؟ شوفته فين؟ شوفته فين؟؟

ايوا ايو ايوا افتكرت


موش دى الست اللى خلت الحصان لا مؤخذة.... يتف علينا؟

صح؟


الله يخرب بيت اللى ... ما يصللى على النبى الزين


......

m5m said...

العزيزة خيخة :-
أنا جاى عشان أشكرك على ردك اللى سبتيه عندى ألاقى البوست (المغرى) ده؟

واشمعنى يعنى الصابون؟ الظاهر انتى اللى نيتك وحشة:-))

تخيلى بقى ان نجلاء بح دى كانت وهى قد شريف ليها بح زى بتاعته برضه؟
أمال ايه
ماهى بح من يومها
بس دلوقتى نجلا راحت عليها وبقى فيه باسمة و دانا و جاد شويرى

ياللا بقى..بح

Doba said...

قريته انا قبل كده
قال بح قل
مش عيب كده

عيب ولا مش عيب

ثم صور شريف اللى بتحطيها هو أحلى منها - مش تختارى صورة حلوة شوية تحطيها للواد

بوسيهولى بوسة انتقام
وحضن بفعصة كبيرة

سلام يا بت يا خيخة
هبة

رئيس جمهوريه نفسى said...

تصدقى يا خيخه انا عندى ولاد اخواتى لو بيقول بح بتاعت شريف بالدنيا وما فيها بجد على الاقل بح لا تغضب ربنا
والنبى حتته شيكولاته
وربنا يخلى ليكى شريف يارب
محمود

الشنكوتي الكبير said...

بح خلاص مفيش

هي بصراحه تفقع
ما علينا صدقيني بح شح شريف اجدع ميت مره

بح شريف ليها مليون معنى حلو
انما بح نجلا ليها معنى واحد سافل

ما علينا
ربنا يتوب علينا من نجلا وامثلها بوظتو اعصابنا وتعبتوا الشباب
سلااااااااااااااااام يا خيخه

Ahmed Al-Sabbagh said...

تانى وتالت ورابع

برافو عليكى يا نور

وبرافو على شريف بح

وبرافو لكل التعليقات الجميلة

وللاستاذ عمر - خروشات اللى كان على وشك يقول كلام كنت عايز اقولة بس سكت

وربنا ما يحرمنا منك

ومنتظرين جديدك

خالو أحمد

m5m said...

مدام نوران (خيخة سابقا)..
بمناسبة شريف والأطفال اللى فى سنه..فيه بوست جديد عندى بيتكلم عن موضوع عايزك تشوفيه وتقولى رأيك

مستنيكى

دكتور حر said...

ايه ده يا خيخه
انا اضيقت جدا لما شفت الصور بس

حرام عليكي
هو احنا ناقصين

الله يسامحك

3ala asm masr said...

ربنا يخليلك شريف يارب يا خيخه وتفضلى تنشرى عنه بوستات كده لحد ما يكبر

تخاريف خاصه! said...

مااحلى "بح "شريف...

وما احلى صورةشريف...
بوست جمييييل جدا...

لولا صورة "نجلا"...

:)

بت خيخة وأى كلام said...

اولا احب اعتذر اذا كان استخدامى صورة نجلا ضايقتكم منى
وعلشان كدة انا حذفتها
علشان محدش يزعل منى ولا حد يقول عليا فى سره دى بت سافلة

شكرا ليكم اختكم خيخة

بت خيخة وأى كلام said...

كنت ناوية ارد عليكم كلكم
بس لما قريت تعليقاتكم
ماقتش اى كلام ارد بيه غير انى اشكركم
على دعواتكم لشريف بان ربنا يخلهولى
شكرا ليكم كلكم
واخص بالشكر
الكينج
احمد الصباغ
شمعى اسعد
على اسم مصر
بنوتة مصرية
مستجدة
مصعب
دكتور حماس
مهندس مصرى
فرنسا هانم
من القلب
اجدع بنوتة
appy
غالية
عمر خروشات
m5m
دوبا
رئيس جمهورية نفسه
الشنكوتى الكبير
احمد الصباغ تانى
دكتور حر
على اسم مصر تانى
شيمو تخاريف خاصة
شكرا ليكم كلكم
ومعلش اذا كنت مارديتش على كل واحد فيكم
بس بصراحة كمان ايدى بتوجعنى ومش قادرة اكتب كتيير

مش عايزاكم تزعلوا منى علشان صورة نجلا
انا خلاص حذفتها

معلش طلب اخير
اللى فيكم يعرف ابن حجر العسقلانى شخصيا
او على الاقل فيه بينه وبين اى حد فيكم اى نوع من انواع الاتصال
ياريت يطمنى عليه
هل هو بخير
ولا زعلان منى
ولا ماله بالظبط


شكرا ليكم كلكم
على تواصلكم معايا
اختكم خيخة

shayma said...

بح شريف ايه دول بحات كتيير اوى مش بح واحده

بس خلااااااااصى خالص
انا شوفته وهو فى اسى فى عنيه .. ربنا يخليهولك يا جميل ويباركلك فيه
بسمالله ماشاءالله
:)))))))))

انما بح نجلا دى ديتها جركن بنزين وعود كبريت وتبقى عشرة على عشرة
سلامى يا قمر

users online