Sunday, December 30, 2007

اصنع بنفسك



استعنا على الشقا بالله


نبتدى البوست


ها كلكم جيتوا ولا فيه حد غايب


انا هانده الاسامى فى اخر البوست


واللى مش هايرد عليا هاعتبره غياب وهاياخد صفر




نبتدى مع بعض اول مرحلة


كل واحد يفتح مكعب الصلصال الابيض اللى جايبه


لو حد جايب لون تانى يتكل على الله من غير مطرود


ها شيلتوا الورقة السوليفان من على مكعب الصلصال


كل واحد يمسك المكعب فى ايده ويقعد يفعص فيه


حاولوا تعملوا منه كورة كبيرة


ايوة كويس كدة


هاتوا النشابة وابتدوا افردوا الصلصال


تماااااااااااام كدة برافو عليكم والله


يلا كل واحد يعمل الشكل اللى هو عايزه


قدامكم ربع ساعة تعملوا اللى انتوا عايزينه


انا هاروح اشرب كوباية الشاى وهارجعلكم


ها عملتوا ايه


انا شايفة ناس بتعمل فى الفينش الاخير للشكل اللى فى ايديها


انا شايفة ان ابن حجر العسقلانى عمل بالمكعب بتاعه شكل شيشة


هايل يا ابن حجر


وايه اللى فرنسا عملته ده


اااااااااااااه ده شكل عجلة


وشاهى عملت تلات بغبغانات وكتبت بخلة السنان


كلمة الشنيور على اول بغبغان واسم الرايقة على التانى واسم الجبارة على التالت


حلو اوى يا شاهى


ربنا يخليلك بغبغاناتك


وايه اللى انا شايفاه ده


الطائر الحزين عمل ديك مكسور الجناح


ودكتور حر عمل من الصلصال شكل حامل المصحف


والله فكرة هايلة برافو يادكتور


ورينى يا سووووووو عملت ايه


ده شكل حصان وكاتب عليه رشا


اااااااااااااااااه


ده علشان يفكرك بالفرسة اللى وقعتك فى الترعة


بس ايه ده


ايه اللمة اللى ورا دى


الصباغ وعيل مصرى وعمر خروشات وشاور ميرور


قاعدين ورا بيتفرجوا عليا وماعملوش حاجة


براحتكم بس بجد اللى مش هايعمل حاجة هاياخد صفر


ها خلصتوا يا شباب


طب كويس


تانى مرحلة بقى


كل واحد فيكم ياخد الشكل اللى عمله ويحاول يرجعه تانى مكعب زى الاول بالظبط


طبعا مش عارفين


لان المكعب لازم يكون الست اسطح بتوعه متساويين مش كدة


انا شايفة ان فيه منكم بيحاول وتقريبا عمل المكعب بس مش متساوى اوى


يعنى منبعج من بعض الاطراف ومش متساوى


بس عموما اهى محاولة كويسة


ها كلكم حاولتوا ترجعوه تانى مكعب ابيض متساوى ولا فيه حد ماعرفش


طب اسهلهالكم شوية


هاتوا السكينة واقطعوا من كل جنب شريحة من الصلصال


ها


اظن كدة بقى رجع مكعب متساوى الاسطح مش كدة


بس بصوا عليه كويس كدة


هل هو نفسه المكعب اللى ابتديتوا تلعبوا بيه فى اول البوست


أتحدى أى واحد يقولى أه


بصوا كويس كدة


هتلاقوا ان المكعب مابقاش ابيض


بقى تقريبا لونه رمادى او على الاقل اكيد هتلاقوا فيه شوائب


يعنى مش ابيض صافى صح ولا أنا غلطانة


وبعدين لو حد فيكم رجع المكعب لأصله من غير مايستخدم السكينة


لازم هيلاقى بصمات ايده عليه مش كدة برضه ولا أنا غلطانة


وبعدين اساسا اساسا اللى رجع الصلصال على شكل مكعب باستخدام السكينة


هو برضه مارجعهوش لاصله لانه قطع منه ست شرائح على الاقل


باعتبار انه خد من كل ناحية شريحة


يعنى المكعب هتلاقوه بقى لونه رمادى مقطوع منه او منبعج وعليه بصماتكم


وحتى لو كان مقطوع وبصماتكم مش باينة عليه لو فتحتوه هتلاقوا بصماتكم محفورة جواه


******************************


هى كانت مثل مكعب الصلصال الابيض فى ورقة سوليفان


هو اول من حل ورقة السوليفان وبدأ يعبث فى مكعب الصلصال


اخذه بين يديه وشكل منه اشكال عديدة


هذا شكل لإمرأة عبث به و هذا شكل لكتاب قرأ فيه


وهذا على شكل كلبة ذليلة واخر لوردة ذابلة


أشكال وأشكال


صنع منها مايشاء


علمها أشياء


علمها الحب


علمها الكره


علمها القسوة وعلمها الضعف


اهداها اشعار نزار القبانى


اسمعها بين الاطلال لثومة


شكلها وشكل شخصيتها


علمها حبه اشياء لم تكن ابدا فى الحسبان


كان حبها له مقياس لحب الاخرين


عندما قالت لها صديقتها لتثبت لها مدى حبها لخطيبها


انا بحب فلان اد ما انتى بتحبى فلان بالَظبط


ردت عليها وقالت لن تصلى ابدا لنفس درجة حبى له


قالت لها صديقتها عندك حق اصل مفيش حد بيحب بطريقتك دلوقتى


انتى مجنونة بفلان


هى فعلا كانت مجنونة به


ولكن هما افترقا


لا يهم ذكر الاسباب


ولكنهما افترقا وهى كانت عبارة عن بعض من الاشكال


لم يحاول حتى ان يتعب نفسه ويرجعها كما كانت مكعب صلصال


هى وهى فقط بدونه لملمت اشكالها


هذه المرأة وهذه الكلبة الذليلة وهذا الكتاب وهذه الوردة وهذه العصفورة


تضامنت اشكالها معا


وكونوا شبه مكعب


حاولت هى ان تجعله مكعب متساوى الوجوه


اخذت السكينة وقطعت من نفسها شرائح وشرائح حتى تكون شبه مكعب


ولكن هى لم تعد مكعب ابيض اصبحت رمادية


لو شطرتها نصفين ستجد بصماته عليها


هى لم تعد مكعب كامل فرغم الشرائح التى قطعتها فهناك ايضا بقايا منها


هناك تحت اظافره كان يوجد بقاياها


***************************


مرت سنون


تحجر مكعب الصلصال


جاء اخر يريد ان يصنع مايشاء


هى حذرته قالت له لو حاولت تشكيلى سأنكسر سأتفتت


لا تحاول تشكيلى فانا غير قابلة لأى شكل


تقبلها على هذا الشكل


ولكن من أن لأخر يحاول أن يشكلها


وهى لأنها تم التشكيل بها من قبل


أصبحت تعرف خطوات التشكيل تتشممها تشعر بها قريبة


ترتعب إذا ما حاول تشكيلها


تهرب تفر


وتقول له


انا غير قابلة للتشكيل


إذا حاولت تشكيلى سأنكسر وأتفتت


****************************


ها فهمتوا حاجة يا بشر


طب اوضح اكتر


خدوا بالكم من اى اثار ممكن تسيبوها على اى حد قريب منكم


لان الاثار دى مش بتتمسح ولا حتى بمية النار


فخدوا بالكم انكم تحاولوا تخلوا اثاركم على غيركم تكون اثار حلوة


مش بتجرح ولا بتوجع ولا بتدبح


لان مافيش اثار بتتمحى خاااااااااااااالص






يلا تصبحوا على خير


جبتولى صداااااااع فظيييييع


هاروح اناااام


اختكم خيخة وأى كلام




ملحوظة مكعبة


نظرا لسوء حالتى الصحية( عندى ترجيع وصداع وشوية برد وجعانة ) بس ماتقلقوش عليا


اعتذر عن الرد على تعليقاتكم على البوست اللى فات


بس عموما اعتبروا ان البوست ده رد عليكم وماتزعلوش


تصبحوا على خير


بت خيخة وأى كلام




47 comments:

Ali said...

صباح الخير يا نوران
البوست معناه جميل اوى ومن الواضح انه ناتج عن تجرية شخصية ومن الواضح كمان ان اسم خيخة ده مش جاى من فراغ الواضح ان الايام لعبت بيكى الكورة ودخلت كذا جون
وبالرغم من السخرية فى كلامك الا انى حاسس بطعم المرار فى كلامك
مرارة شديدة علقم زى ما بيقولوا
بس انا ليا ملاحظتين
اولا مين فينا محصلوش بهدلة فى حياته ومش بقى عامل زى الصلصال المستخدم بقى عامل زى اى واحد ممكن تشوفيه راجع من الشغل الساعة 3 عصرا وراكب الاتوبيس ابو ربع جنيه بس هو الواحد بيشوف مشكلته اكبر مشكلة فى الدنيا
ثانيا اوعى تندمى انك حبيتى من قلبك لان اللى بيزرع حب اكيد بيحصد حب حتى لو مش من نفس الشخص اكيد من حد تانى وممكن يكون من حد اهم

ثالثا وده الاهم انتى غاوية يا شيخة توجعى قلبى كده كله دراما درما مفيش فيلم كوميدى ,مسرحية ان شالله حتى فيلم رعب
تحياتى :)

Ali said...

اه معلش نسيت الف سلامه عليكى وان شاء الله ربنا يشفيك بسرعة قولى آمين

خمسة فضفضة said...

السلام عليكم ورحمة الله وبركاته

الف سلامه عليكي من البرد والصداع والترجيع ان شاء الله العدوين

بس ايه الكلام الرائع ده يا نوران

بجد بجد روعه ولمستيني اوي اوي من جوا

حسيت ان فيه حزن كده بين السطور مش عارفه ليه
كمان حسيت ان الكلام نتاج تجربة شخصيه ، وعاوزه اقولك حاجه ان المفروض البني آدم يحاول بكافة الطرق انه يتجاوز الماضي ويعيش حياته اللحظه بلحظتها وحتي ان كان مر بتجربه اليمه لا يحاول ان يفرض هذا الحزن والالم علي من حوله او شريك حياته الجديد ، بل يحاول ان يتجاوزه ويعيش حياته ويسعد بما تبقي له منها ويسعد من حوله

عارفه كلامك فكرني بكلام واحد زميلي في الكليه ، مره قالي ان لما يكون فيه اتنين بيحبوا بعض وواحد فيهم عمل حاجه زعلت التاني
بيبقي الموضوع عامل زي نقطة الحبر اللي نزلت في كوباية ميه ، اول مابتنزل بتبقي مركزه وتقيله وباينه لاي حد يبص في الميه وبعد شويه بتبدأ انها تنتشر في الكوبايه لحد ما تختفي ، بس بتفضل موجوده جوا الميه ما خرجتش

فهمتي حاجه
:-D


بس بجد جميله جدا جدا

Ahmed Al-Sabbagh said...

صديقتى الخيخة خيخة

هل تعلمين اننا نصنع من حولنا

نصنع شخصياتهم التى نحسها

تعرفى

احيانا يكون فى شخص معروف انه كئيب او حزين دايما وبعدين الاقى الناس بتقولى ده فولان ده اول ما بيشوفك بيضحك وبيغير خالص مش بيبقى فلان اللى عارفينه

وهكذا نؤثر فى الشخصيات كتأثيرنا فى الصلصال

نرجع تانى للبوست

بقى انا بقى بليد وفى اخر الصف

ماشى ماشى

لن انسى لكى هذا الموفق بوتاتا

ولن انسى لكى البوستات السرية اللى بتنزل من وريا

ماشى ماشى


وايه موضوع حالتك الصحية ده ..وجعانة ازاى يعنى ده جزء من حالتك الصحية المتدهورة الجوع ده ؟

وسلمى لى على شكشوك

وكل سنة وانتم طيبين

وهابى نيو يير

و

تحياتى

دكتور حر said...

لا إله الا الله

خيخه بقت تقول حكم يا جدعان

أولا
ألف سلامه ليكي وان شاء الله عدوينك واللي يكرهوكي

ثانيا
أنا خايف يكون المرض ده هو اللي أثر عليكي وخلاكي تكتبي الكلام الكبير ده
ههههه

ثالثا

اللي انتي عملتيه ده
شيء رائع في وصف الحياه

احنا واحنا أطفال بنكون في ورق السلوفان
لما بنعي ونفهم بعد كده بتبدأ تتشكل ملامحنا
ولما بنقرا ونكتب
ولما نحب ونكره
ولما نحزن ونفرح
ولما نقابل الناس حد يفيدنا وحد يضرنا
وحد نحبه وحد نكره

كل دي عمليات لا عكسيه بنتكعبل فيها في حياتنا
لو خلينا قلبنا أبيض ودماغنا متفتحه مش هنوصل لمرحلة التحجر والتخشب ونكون أناس متطورين بسيطين لينيين

حقيقي تشبيهات جامده يا خيخه والله
ربنا يكرمك يا رب
***
اختيارك لحامل المصحف معايا ده وقفني مع نفسي كتييير


ربنا يتم شفاكي على خير

دكتور حر said...

معلش يا خيخه
مش عارف الحديث ده جه على بالي وانا اقرأ تدوينتك دي
مش عارف ليه

هحطه هنا بعد اذنك

***********
ينكت نكتة سوداء فى القلب، لأن الفتن تعرض على القلوب لا على الأبصار والآذان فحسب.

يقول الحبيب محمد كما فى حديث حذيفة بن اليمان:" تعرض الفتن على القلوب كعرض الحصير عوداً عوداً،
فأى قلب أشربها نكتت فيه نكتة سوداء، وأى قلب أنكرها نكتت فيه نكتة بيضاء،

حتى تعود القلوب على قلبين. قلب أسود مرباد كالكوز مجخيا لا يعرف معروفا ولا ينكر منكراً إلا ما اشرب من هواه

وقلب أبيض لا تضره فتنة ما دامت السموات والأرض.."

"فإن تاب ونزع واستغفر صقل قلبه

Ahmed Al-Sabbagh said...

____0000000000______0000000000_____
__000________000__000________000___
_000___________0000___________000__
000_____________00_____________000_
000________Happy New Year______000_
000_____________FOR____________000_
_000____________ALL___________000__
__000________________________000___
___000___Ahmed Al-Sabbagh___000____
_____000__________________000______
_______000______________000________
_________000__________000__________
____________000____000_____________
______________00__00_______________
________________00_________________
________________ 0 ________________

صاحب المضيفة said...

لا لالالالالالالا

انتي بعد كده تشتغلي خبيرة نفسية

مش خيخة خالص

الف سلامة على لستة المرض اللي انتي قلتيه ده ... كل ده ؟

بوست رائع وجميل وفركته هايلة

سلامي للحاج شريف

يوميات عيل مصري said...

طيب أولا اله يسامحك
عشان أنا جبت الصلصال، والحاجة كلها، وحبيت أعمل زي ما انت قلتي على طول، واتهمتيني أنا وصباغ إننا هنكبر دماغنا
على فكرة، أنا على طول في التدريب باستخدم الصلصال
وجعتني اوي يا نوران
بس لولا إني عندي برنامج تدريبي اسمه صخرة ونعديها كنت زماني اكتئبت، والبرنامج أصلاً معمول للناس عشان تعدي مرحلة الاكتئاب لما يتعمل فيهم زي الصلصال

صاحبتك اللي كانت بتحب أوي دي، واتشكلت محتاجة تعرف، إن تشبيهك الصلصال ده في محله تماماااا
لأن إحنا مخلوقين من الصلصال (من صلصال كالفخار)
وبالتالي يجري علينا ما جرى على الصلصال
بس اللي لازم تعرفه وتعرفه كويس، إنها لو عادت كما كانت مكعب، يبقى لم تمر بالحياة، ولم ترى تجاربها وبالتالي لم تتعلم منها أي حكمة
الحكمة يا أم شريف بتيجي لينا، لما نمر بتجارب مؤثرة في حياتنا، تقوم تزرع فينا الخبرة، وتترك أثارها، الأثر السئ نستفيد منه في التجربة إننا ما نكررهاش تاني، وإلا تتقلب الحكمة لسفاهة
والأثر الحلو، نستفيد منه، إننا نكرره ونطوره

مين من الناس لم يمر بتجربة الصلصال، أومال الشخصيات بتاعت الناس تتشكل ازاي؟

بس عاوز اقولك كمان، إن إحنا حسب ما نقول على نفسنا، يعني لو قلنا احنا قلالات بخت، هنشوف كل حاجة قليلة البخت
ولو قلنا قلالات حظ هنشوف كل حاجة قليلة الحظ

طبعا انت تسمعي عن البنات اللي انتحروا لما عبد الحليم مات، أحد مشاكلنا يا نوران حاجة اسمها
التوحد مع الحلم
يعني ايه
يعني لما بيكون فيه شخص، ولا أي كيان، ساعات حتى بيكون بيت، ولا شركة، ولا واحدة بنحبها، وبتمثل لينا كل الدنيا
الشخص يمكن يكون هو اللي فتح عينينا على الدنيا
ساعتها بيكون هو الحلم وهو الأمل، ويصبح هو قطب الحياة اللي بندور حواليه
الهمسة هو
فنجان الشاي هو
التنفس هو
الهوا هو
النجم اللي في السما هو
التراب في الأرض هو
الفيلم في الشاشة هو
ريحة الورد هو

ساعتها بنكون حطينا نفسنا في دايرة كبيرة اسمها التوحد مع شئ
ودي أكبر غلطة ممكن إنسان يعملها، بس الخروج منها اسهل بكتير، بس كل حاجة وليها ألمها

نفس البنات اللي انتحروا بعد عبد الحليم ما مات، كان عنده هذا التوحد، إذا اختفى الحلم، نختفي معاه
عشان كده بنقول، عش حلمك، بس أوعى تتوحد معاه

ربنا خلقنا فرداً
وهنرجعلوا يوم القيامة فرداً
وبالتالي الارتباط بشئ لازم يظل ارتباط احتكاك مش توحد

الناس بتترك أثر علينا
طبعا زي ما احنا بنترك أثر على الناس، وده اللي اسمه الاحتكاك والتدافع
نحب ونكره، نعرف ونخاصم، هي دي حياتنا
نتأثر ونؤثر، بس المهم إننا نفضل مستقلين

واحد عالم نفس اسمه بافلوف عنده نطرية اسمها المثير والاستجابة، وبالتأكيد حضرتك مرت عليكي التجربة دي وأنت بتدرسي نظريات الاتصال في الإعلام

والحكاية ببساطة إنه حط كلب في أودة بيطلع عندها بسلم خشب بيزيق ، يعني بيعمل صوت، وكل ما ييجي يطلع الأكل للكلب السلم يزيق وبالتالي لعاب الكلب يسيل

بعد شوية ما بقاش يطلع أكل، بس يهز السلم والسلم يزيق وبمجرد ما السلم يزيق لعاب الكلب يسيل على طول

وده المثير والاستجابة، لما بنربط نفسنا بشخص ما، بيبقى عندنا حاجة زي المثير والاستجابة، زي ما عاوز يشكلنا يشكلنا
بس إحنا ربنا كرمنا على الحيوان، بإن لينا حرية الاختيار وبالتالي نقدر ندرب نفسنا على الإمساك بالماضي، ودفنه، أدام عينيا، والحكاية مش صعبة، بس نكون أحنا فعلا عاوزين ندفن الماضي ده، مش مستريحين للعفريت اللي بيطلع لنا في حياتنا كل شوية

فلسفتك عالية أوي يا أم شريف
ربنا يحفظ عليكي شريف وأبو شريف، ويقر عينك بيهم، والسنة الجاية تكونوا انتم التلاتة راجعين من الحج لابسين ابيض في ابيض
قولي آمين عشان مفيش حاجة بعيد عن ربنا

ابن حـجـر الـعـسـقـلانـى said...
This comment has been removed by the author.
ابن حـجـر الـعـسـقـلانـى said...

يا أخت خيخة .. انت اديتينى درس طلع من نافوخى

و ألف سلامة عليكى أختنا خيخة

appy said...

لااااااااااااااااااا بجد انا اول مرة اتنح كده وعنيه تبقى بروبورؤ كده لاااااااااااااا انت عبرتى بشكل هايل مش ممكن ايه العبقريه دى انحننى لكى تحيه انتى مش ممكن تكونى خيخه واى كلام لان ده واقع حياتنا بجد
عارفه لو واحده متجوزة واطلقت هينطبق عليها الكلام ده لو واحده سابت حبيبها لو اى حاجه خسرناها او اى علاقه ده اول وصف فى حياتى بجد الاقيه صح للحاله دى ويعبر عنها كده
انا بجد مش عارفه اقولك ايه

الطائر الحزين said...

عملت موضوع لتلملمى فيه اسماء المدونين واتجاهاتهم وحالتهم يا اروبة

وبعدين ايه مكعب الصلصال اللى بتقولى عليه ده


احنا عاوزين عربية صلصال وبعدين ايه اللى انتم طالعين فيه جديد ده

ماله الطين لما بينشف


بس عارفة فكرة هايلة

ولا انا فاهم غلط
هذا الجزء الأول

**********************
الجزء الثانى

لابد ان نتأثر دوما بمن يقرب او يحاول القرب منا
ونكون امام امرين

ان يزيل من قرب منا اصال الصلصال التى لطخنا بها انفسنا بل ويحاول أن يأتى لنا بثياب نظيفة لانه يؤثرنا على نفسة

والامر الثانى

ان يمسح من يحاول القرب منا ملابسة وصلصالة فى ملابسنا ويلطخ بها وجوهنا حتى ملابسنا يطمع بها مع انها لن تنفعه


لكن هناك فريق يقف من بعيد يتأثر بالموقف ويحاول المساعده لكن قدر استطاعته وكلما يحاول ازالة أثر الصلصال يزيد الملابس اتساخا لانه ليس لدية الخبرة ولم يختر الوقت المناسب


لكن فى النهاية

سيزال أثر الصلصال

اما بالغسيل

او عندما ينشف يكون سهل الازالة


او الحل الأخير ان يتم تغير الهدوم بكاملها


تحياتى

الطائر الحزين said...

نسيت اقول شفاك الله وعفاك

ســمـــر احمد said...

تحية من حته صلصال عليها بصمات كتير متداخلة و عميقة لكن باكد لك لسه لونها من جوه ابيض زى ما كان بس مش ناوية تتشكل تانى

على فكرة مدونتك عجبتنى

لماضة said...

الف سلامة عليكى يا حماتى
يعنى انا جايه اقولك كل سنه وانتى طيبه الاقيكى تعبانه كده
بس والله حكيمه فعلا
فكرتينى ببيت الشعر
وما من كاتب الا سيفني..ويبقي الدهر ما كتبت يداه فلا تكتب بكفك غير شيء..يسرك في القيامة ان تراه

اجيب العده واجيلك يا حماتى والله
الف سلامة عليكى بجد
وسلامى لخطيبى وبوسيه لحد ما ينفع انا ابوسه
:D

بنوته مصرية said...

بجد بجد انتي هايلة جدااا

كلامك عبر عن احساس وجروح كل واحد هنا

تحياتي لكي

والف سلامه عليكي يا قمر

Happy New Year

رودي

am.zaid said...

خيخة ايه بس ..انتى المفروض تغيرى اسمك بقى
..
ألف ألف سلامة عليكى وربنا يشفيكى
..
البوست بجد معناها جميل قوى ومضمونه رائع ..عارفة انا عمالة أقرأ من أول الموضوع بس ما تخيلتش انه هينتهى كده بجد الكلمات الأخيرة جامدة جداااااااااااااا

وزى ما قال دكتور حر احنا فعلا لو اتعودنا اننا نكون مرنيين فى تعاملاتنا فلانصل الى مرحلة التحجر والتفتت
...
وهكذا الحياة..
تجربة وحيدة قصيرة
وهكذا الانسان..
لا يتعلم الحكمة الا بعد درس الآلم

shayma said...

اولا سلامتك الف سلامه
ثانيا يا دماغك العاليه بجد

اسلوب البوست حلو اوى
والفكرة طبعا معاليهاش جدال
المشكله ان الواحد ساعات بيتصرف عادى ومبيخدش باله من الخسائر الى ممكن تحصل
بجد لازم الواحد ياخد باله كويس جداااااا من كلامه وافعاله

بجد احييكى
و
happy new year
:))))))))))

الشنكوتي الكبير said...

مكعب
وصلصال
وحصة فنون
فاهمين
سامعين
شايفين
طب فاهمين ايه
فاهمين ان العمر بيجري واحنا بنجري معاه
عارفين ان الكلمه بترسم جوه قلوب الناس احسن من مشرط دكتور
واخدين بالكم ان كلامكم ممكن يقتل
سامعين صوتها وهي بتصرخ تحت المشرط
فوق المذبح
والدم بيجري من الشرايين
وبحيرة دم
غرقانه لحد كعوب رجليها في بحيرة الدم
حاولت تتغسل وتلم الدم وتسد الجرح
بتقول ايه يا عم
صلصال ايه اللي بيخر دم

مين قال صلصال دي لحم ودم
مش قلت رمادي
مش قلت مكعب متساوي الضلع

ايوه انا قلت
ما هو اصل البني ادمين
في الصل مهماش لحم ودم
دول طين اسواني بلون الأرض
صلصال معجون اشكال والوان

لكن الصلصال مش بيجيب دم
بس التشابه ان الجرح في الأتنين بيعلم ومش بيتلم









مش عارف ايه اللي انا كتبته ده
بس البوست عجبني قوي
وخلاني عايز اقول حاجه مش عارف ايه هي

المهم اني اتفكيت بكلمتين
هاستجمع افكاري واركز وبعدين ابقى اعلق بما يليق مع البوست الرائع ده

سلااااااااااااااااااااااام

MerMaid said...

ميس ميس
يا ميـــــــــــــــس

عاااااااااااااااااااااااااااااا

اخدوا مني الصلصال بتــــــــــــاعي

اهئ اهئ اهئ اهئ

------------------------------
عزيزتي خوخة

بلاش خيخية دي لانك مش خيخة خالص خالص
اولا بوستك جميل وانا اصلا فكرت بجد انتم متفقين تعملوا حاجات دي بالصلصال
بس في الاخر لقيت الحكمة الجميلة دي

بجد تحفة
والله صح صحيح صحصوح مية المية

كل سنة وانتي طيبة
انتي و عيلتك كلها

:)))

عجبني قوي الشكل اللي رسمه أحمد الصباغ

بجد جميل يا خاااااااااال

كل سنة وانتم كلكم طيبين

:)))

أبوخالد said...

أختى ألفاضلة /
رائع تعبيرك و فلسفتك راجيا من الله العلى القدير أن يعينك على تطبيق تلك المعانى الكبيرة مع أبنك الحبيب شريف حتى ينشأ خالى من العقد ليكون من الجيل الذى سوف يحرر القدس الشريف بأذن الله العلى القدير مع أطيب أمنياتى لك بسرعة الشفاء ، شفاك الله وعفاك شفاء لا يغادر سقما يارب
أخيك أبو خالد..

فرنسا هانم said...

نونايه يا عسلايه
يا حته شيكولاتايه
انا هكسب البريمو
انا عايزه الجايزه
هوانتى قالتى فى جايزه ولا مفيش ؟؟؟؟
انا عملت العجله
وعملت الفرامل
وعملت الكاوتش
كله تمام التمام
ورجعت المكعب تانى زى ماهو
سليم
ابيض
ناصع
مش رمادى
وجوه الورق السلوفان كمان
اتحداكى
واتحداكى
واتحداكى
واتحدى اى حد يقول ان المكعب ده اتلمس
هاتى الجايزه
وحطيها هنا فى الشنطه
ايه ده ؟؟؟؟؟؟؟
دوبه خبطتنى
دوبه وقعت شنطتى
اللى فيها وقع
وقع منها الشكل اللى انا عملته
وقع منها المكعب الاصلى اللى انا خبيته
اصلى كنت جايبه مكعبين
واحد احطياطى
وحاولت اغش
معلش يا نونايه
انا حاولت الغش ومعرفتش
اتكشفت


على فكره
على فكره
انا مش غشاشه
ولكن حبيت اقولك بدرس عملى
ان المكعب عمره ما هيرجع تانى ابدا لحالته
وان اللى يغش عمره ما ينجح

وفعلا
محدش يقدر يشكل حد على مزاجه
وحتى لو قدر شويه
مش هيقدر يرجعه
سلام يا خيخه

وبرضه فين الجايزه
وفين النسكافيه

Sola said...

salmtec ya 7'e7'ah:
2eh ya benty el posst el gamed dah walahy bravo 3aleky,bas tesada2y ana el nas kolaha gara7etny 7ata 2ahly o ana mesam7a el kol,ya3ny fe nas mn tebetha momken tefdal beda mn gowa like me
salam ya gamiel o alf salama 3aleky,2ah 2ah haaaatsooo,shakly keda 2et3adeet menek
salam ba2a

MerMaid said...

سلميلي علي شريف بيه

ايه اخبار الأظئوظة؟؟

ههههههههههههههههههههههههه

سلااااااااااااااااااااااااااام

د/اجدع بنوته said...

شوفتى ياماما روحت عملى الكليه الصبح وجيت نمت

ولسه صاحيه دخلت ع العملى بتاعك ع طول ..

ااقولك ايه يعنى

اااقولك ان بوست م اكثر البوستات روعه اللى قريتها ف حياتى

بل ممكن يكون اروعهم ع الاطلاق

اسلوب وفكره وتنفيذ وكلام .. واحساس

مش ممكن .. ياربى ع كده بجد ..

وال رايحه تشتغل سكرتيره .. حرام عليكى بجد موهبتك دى ..

مايخص الكلام بقى ..

الكلام طالع م واحده خبرررررررره عدى عليها كتير ومرت بتجارب كتير

واتفعصت ف تجارب اكتر ورجعت اقوى تانى

مجروحه وضعيفه وف نفس الوقت اقوى ما يكون ..

رسالتك وصلت .. وان شاء الله دايما بصماتى ف اللى حواليا هتبقى كويسه

ويوم مااصوابعى تحب تشد وتعلم فيهم بعنف .. هيفتكروكى ع طول وهيخفوا لوحدهم

ربنا يخليكى لينا ولو كل العملى بالشكل ده انا عايزه م ده كتير والنبى ياماما

صحيح انتى عارفه انا عملت ايه بالصلصال دلوقت

عملت مركب .. اللى بنجا فيها بطموحاتى وهاخدك معايا انتى وشريف

سلميلى عليها وبوسهولى اوىىىىىى وبوسيلى نفسك كمان

اموااااااااه سلااام

أبو أمك said...

غير قابلة للتشكيل إزاي ؟
مش اتشكلت قبل كده؟
يبقى المفروض إنها متعووودة
دايمـــــــاً
صحيح على رأيك دي عاملة زي الصلصالة
لو ماكانتش اتشكلت..يبقى أكيد اتفك السوليفان من عليها

Ahmed Al-Sabbagh said...

السلام عليكم

كلاكيت تانى مرة

هو بس انا لفت نظرى حاجة غريبة

تعليق الزميل ..أبو أمك

؟؟؟؟؟؟

مش قادر افهمة خالص

ياريت لو صديقنا يوضحة

لأنى حاسس انه مالوش علاقة بالموضوع

او انه كان يقصد يكتبة فى موضوع تانى

ربما

وشكرا

إنـســـانـة said...

ربنا يكرمك بجد تشبيهك صح جدااااااااا

ربنا يسامحك بقا كبرتى حكاية الصلصال دى فى دماغ الواد كاميكاز وقعد يشكل معاكى وبوظلى المدونة عندى خاااااااااااالص

بس على مين بكرة الصبح الزقه فى الصلصال واخليهم هما الاتنين شكل واحد هههههههه

سلام ياجميلة

سها said...

خدوا بالكم من اى اثار ممكن تسيبوها على اى حد قريب منكم

لان الاثار دى مش بتتمسح ولا حتى بمية النار

فخدوا بالكم انكم تحاولوا تخلوا اثاركم على غيركم تكون اثار حلوة

مش بتجرح ولا بتوجع ولا بتدبح

لان مافيش اثار بتتمحى خاااااااااااااالص

مش هاقدر اقول حاجة بعد كلامك
والف سلامة عليكي

Doba said...

حقيقى حقيقى بوست فى الجون وفكرة ممتازة وطلعتى بنتايج ومعلومات وافكار كتير متشعبة

برافو عليكى حقيقى

بسقفلك والله عليه
شطورة

تحياتى
هبة

بت خيخة وأى كلام said...

على
اولا شكرا على كلامك
وفعلا الايام لعبت بيا الكورة بس عادى انا مش ندمانة على اى حاجة انا اكيد استفدت برضه
وبعدين انا مقدرش اوجع قلبك
وعموما انا المرة الجاية هابقى اجبلكم معايا فيلم كوميدى
تحياتى ليك
وعلى فكرة انا امبارح رحت عندك وكنت عايزة اعلق على الموضوع بتاع المترو بس انا مالقيتش عندك كومنتات يعنى معرفتش انت مخبى فين كلمة بوست كومنت علشان اعمل عليها كليك واسيب كومنت
تحياتى ليك يا على



خمسة فضفضة
فهمت حاجات كتير طبعا
حلو اوى التشبيه بتاعة نقطة الحبر ده فعلا تشبيه مقارب للحياة الواقعية بصورة كبيرة
حلو اوى كلامك كمان لما بتقولى ان الواحد مش المفروض يفرض الحزن بتاعه على اللى حواليه وانه يحاول يتجاوزه
شكرا ليكى يافضفضة




احمد الصباغ
ما هو علشان احنا بنصنع اللى حوالينا يبقى لازم ناخد بالنا كويس اوى من اللى احنا بنعمله فيهم
وبالنسبة لموضوع الجوع ده فانا لما يحصلى حالة فجع كل اللى حواليا بيعرفوا ان انا تعبانة لان مش ده الطبيعى بتاعى
وعلشان كدة انا الجوع عندى يعتبر نوع من انواع تدهور الحالة الصحية
شكرا ليك ياصباغ


دكتور حر
اسمحلى ارد على تعليقك التانى قبل تعليقك الاولانى
الحديث اول مرة اسمعه او اقراه
بس فظيع جدا ومؤثر جدا وانا يشرفنى انك تكتب الحديث ده عندى هنا
بجد الله يكرمك
اما بالنسبة لتعليقك الاولانى
فعجبنى اوى
لو خلينا قلبنا أبيض ودماغنا متفتحه مش هنوصل لمرحلة التحجر والتخشب ونكون أناس متطورين بسيطين لينيين

اما اختيارى ليك انك ممكن تعمل من الصلصال حامل مصحف
لانى حسيت ان المصحف بالنسبالك هو منهج انت بتمشى عليه
وده المفروض ان كل المسلمين يعملوه
لكن معاك انت بالذات من خلال قرأتى لمدونتك بحس دايما انى داخلة مسجد
او حصة تحفيظ قرآن
شكرا ليك يا دكتور

احمد الصباغ
كل سنة وانت طيب وميرسى على الشكل الجميل ده


صاحب المضيفة
ههههههههههه
طب والله انا كنت ناوية اعملكم بوست واحللكم فيه نفسيا
والبوست ده هيكون قريب جدا
شكرا ليك ياصاحب المضيفة



يوميات عيل مصرى
كلامك كله جامد
بس اكتر حاجة شدتنى ان صاحبتى دى اللى حبت اوى هى فعلا كانت متوحدة مع حبيبها لدرجة الخيخنة
بس لما جت فى يوم وقالت ل خلاص كفاية خيخنة لحد كدة
طلعت برة دايرة التوحد دى
والحمد الله سمعت انها بقت احسن دلوقتى
بس اكيد طبعا مابقتش زى الاول
بس عادى كله بيعدى
وزى التشبيه اللى خمسة فضفضة قالته ان نقطة الحبر اللى وقعت فى المية مابقتش باينة اوى لانها انتشرت جوة المية
شكرا ليك يا احمد


ابن حجر العسقلانى
انا ماكنتش اعرف والله يابو العساقيل ان الدرس هايطلع من نافوخك
انا كنت معتقدة انه كان طالع من نافوخى انا لوحدى بس واضح جدا ان فى ناس كتير هنا الدرس ده طلع من نافوخها
تحياتى ليك يا ابوالعساقيل
وانا الحمد الله بقيت تمام دلوقتى
شكرا ليك


appy
ماتقوليش حاجة
ده انتى منورانى
الاهم يا ابى
انك تاخدى بالك اوى من اى تاثير ممكن تسبيه على اللى حواليكى
وخدى بالك اوى من اى حد هيسيب عليكى اثره
تحياتى ليكى



الطائر الحزين
الجزء التانى من تعليقك مليان حكم مابين السطور
شكرا ليك يا طائرى الحزين


سمر احمد
لو كنتى حتة صلصال فعلا زينا كلنا هتلاقى برضه انك مابقتيش بيضا
لازم هتلاقى بصمات حد تانى جواكى والبصمات دى علشان تسيب اثر يبقى اكيد هتعلم بلون تانى غير الابيض
تحياتى ليكى وشكرا على زيارتك ليا ويارب تزورينى دايما


لماضة
والنبى مانتى تاعبة نفسك يالماضة انا خلاص بقيت زى القرد
خليكى انتى مرتاحة بعدتك
انا اصلى فاهمة شغل الدكاترة ده
وخصوصا اللى لسة ورار زى سيادتك هتقعدى تجربى عليا عدتك وتشوفيها شغالة ولا لأ وتكون النتيجة انى ارجع انسانة عادية ومابقاش خيخة تانى
لا ياستى انا مرتاحة كدة
حلو اوى بيت الشعر بتاعك يا لماضة
شكرا ليكى يا حبيبتى



بنوتة مصرية
رودى حبيبتى
انا كلامى مايجيش حاجة جنب كلامك الكبير اللى بشوفع عندك
انتى اللى هايلة والله
وكل سنة وانتى طيبة ونور دايما بخير



امانى ابو زيد
اه منكم ياعيلة ابو زيد انتوا
عليكوا كلام يخش فى النافوخ عدل
ايه يا امانى الحكم بتاعتك دى
وهكذا الحياة..
تجربة وحيدة قصيرة
وهكذا الانسان..
لا يتعلم الحكمة الا بعد درس الآلم
بس انا كان نفسى ان الناس تتعلم
قبل درس الالم ده
علشان بيوجع اوى
تحياتى ليكى يا امانى
وزيارتك ليا بقيت بستناها والله
شكرا ليكى يا حبيبتى


شيماء
شطورة يا بنت فهمتى الدرس بسرعة هتاخدى عشرة على عشرة
شكرا ليكى ومنورانى


الشنكوتى الكبير
انت بالذات مش هارد عليك هنا
هارد عليك فى البوست الجديد


mermaid
يا نهار اسود
مين ده اللى خد منك الصلصال
هو اكيد ابن حجر هو كدة دايما تاعبنى وعاملى بالو فى الفصل
عموما انا هابقى اجيبلك صلصال تانى وورينى بقى هتعملى فيه ايه
وبالنسبة لأظؤظة شريف
كله تمام والحمد الله وبتسلم عليكى
شكرا ليكى


ابو خالد
الله
يارب ابنى يكون من الناس اللى هتححر القدس
حلو اوى الدعاء ده
وفاكرة ان ابن حجر برضه مرة دعهولى
ربنا يخليكم يارب
شكرا ليك يا ابو خالد واتمنى انك تكون زائر مستديم


فرنسا هانم
يا بنت الايه
كنتى عايزة تغشى يا فرنسا
بس دوبا حبيبتى كشفتك
انا فعلا معاكى ان اللى بيغش عمره مابينجح واللى المكعب عمره ماهيرجع زى الاول
اما الجايزة فاللاسف ماعملتش جوايز
لكن النسكافيه روحى اشربيه من عند دوبا
بنت الذينا مش ايزة تفك الكهربا من عليه
تحياتى ليكى




سولا
سولا حبيبتى واختى الصغنونة
لو الناس جرحوكى زى مابتقولى وحتى لو انتى مسمحاهم اكيد برضه سابوا اثارهم على قلبك وعلى عقلك
يعنى مش معقول هتكونى بيضا خالص
اكيد اتعلمتى حاجة من جرحهم ليكى
لو اتعلمتى يبقى مابقتيش بيضا
لو ماتعلمتيش تبقى بيضا
تحياتى ليكى يا سولا
وشريف بيسلم عليكى


اجدع بنوتة
ايه ده
ايه الفضايح دى بقى
هو باين اوى كدة موضوع الخبرة ده
وانا اللى فاكرة انى مش مبينة حاجة خالص اتارى الناس كلها فهمانى وانا اللى مش واخدة بالى
كلامك حلو يا اجدع بنوتة
حلوة اوى مركبتك
وخدى ايدى علشان اعرف انط عليها واروح معاكى الحتت الحلوة اللى بتروحيها
شكرا ليكى يا اجدع بنوتة
وشريف بيسلم عليكى
اموااااااه


ابو امك
بص انا قريت تعليقك واستغربت اوى
اولا لانى حسيت انك فهمت كلمة التشكيل بطريقة وحشة
ثانيا انا لما رحت مدونتك لقيتك كاتب كلام جامد
يعنى كلام بيدل انك واحد دماغه حلوة
فاستغربت اوى من تعليقك
ومافهمتش هو انت تقصد بجد كلامك ده ولا كنت مجرد انك بتهرج بس تهريج طلع تقيل حبتين
بجد مش قادرة افهم انت ليه سبت تعليق سخيف كدة
بس عموما شكرا على زيارتك
وكفاية اوى تعبك انك جيت لحد هنا
وسبت تعليق
ماهما كان تعليق مفيد ولا مالهوش دعوة باللى انا عايزة اوصله للناس
فزيارتك على عينى وعلى راسى


احمد الصباغ
كويس انك قريته لان انا اعتقدت ان انا لوحدى اللى فهمت تعليقه غلط
شكرا ليك


انسانة
ربنا يكرمك انتى
وامبارح دخلت عندك علشان اعرف مين كاميكاز ده
وفهمت بقى انه البواب والسكرتير بتاع المدونة بتاعتك
حلوة اوى مدونتك على فكرة انا بصيت عليها بصة سريعة كدة ولسة هابقى امخمخ فيها
تحياتى ليكى


شكرا ليكم كلكم
اختكم خيخة

بت خيخة وأى كلام said...

سها
ياااااااااااااه
انتى فين يا سهسوهة
والله قلقت عليكى
منورانى جدا
والله يسلمك
بس واضح انك انتى كمان اتوجعتى اوى
عموما كلنا فى الهوا سوا
شكرا ليكى
ومتتاخريش عليا تانى

اختك خيخة

بت خيخة وأى كلام said...

دوبا
لحقتى نفسك
كنت لسه حالا هاتصل بيكى واقولك فين النعليق
ولا ده كمان مكهرباه
بس قوليلى شطورة بجد ولا نص نص
شكرا ليكى يا دوبا
وبوسيلى يوسف كتير
اختك خيخة

صاحب البوابــة said...

بوست جميل

ومدونة أول مرة أدخلها

لكنها ليست الاخيرة بإذن الله

تحياتي

emos said...

beravooooooooooooooo
walahi sa2fa kebera geddan
post gaqme 2a7'er 7aga
bs ana law ha3taber nafsy selsal
dana mesh hab2a romady ana hab2a soda be3eed 3annek:)))
bs fe nafs el wa2t el wa7ed el mafrood ye7awel ye7'aly nafso 7agar mayetshakelsh abadan
w law 7ad yetshakel 3ashan 7ad yetkeser?
yeb2a 7agar mayenfa3sh
w law selsal hayetbahdel 3ala ra2yek
fe 7aga been el beneen?

مروة الزارع said...

خيخة حبيبتى
وحشتينى

عارفة لما قريت البوست دة حسيت كأنك بتتكلمى عنى انا

اد اية معناة جميل اوى بجد

اد اية حسيت بية اوىىىىىىىىىىىى

فكرتينى بقصة كنت سمعتها زمان

.............................

كانت القصة بتحكى ان فية ولد كتير بيجرح فى الناس
راح جدة طلب منة انة كل ما يضايق بدل ما يجرح حد يروح يدق مسمار فى سور الحديقة الخشبى
الولد فعلا عمل كدة وكل ما يضايق يدق مسمار فى السور لحد ما بقوا مئات المسامير

وجة جدة طلب من ان يخلع كل المسامير لما السور اتشوة خالص
راح الولد قعد يخلع المسامير كلها وتعب جدا
وبص بعد كدة للمنظر لقى ان السور مرجعش زى الاول ومليان خروم كتير مكان المسامير وبقى شكلة وحش

جدة قالة دة اللى انت بتعملة فى الناس
جرحك ليهم بيسيب اثر
ومش ممكن الاثر دة يروح بسهولة خالص

وكمان الجرح بيكون اسهل من الاصلاح

انك تجرح حد سهل

لكن ان تمحو الجرح صعب جدا ويكاد يكون مستحيل

ولازم يسيب اثر


.....................

كلامك جامد النهاردة اوى

...................

وحشتينى يا عسل

ابقى اتصلى بيا بقى فى الشغل

الف سلامة عليكى ويارب تكون دى اعراض لخيخة صغننة

ياااااااااااااارب

فى رعاية الله

رئيس جمهوريه نفسى said...

اولا سنه سعيده جديده عليكى يارب
ثانيا الف سلامه عليكى وتقومى بالف سلامه
ثالثا البوست فكره ومضمون رائع ولكونه واضح تجربه شخصيه ربنا يعين صحبتها بس برضه تحاولى تسيب نفسها شويه ممكن يكون الشكل الجديد يعجبها

بت خيخة وأى كلام said...

صاحب البوابة
اهلا بيك عندى ومنورنى وياريت تشرفنى تانى


emos
اهلا بيكى
وحكاية اسود او رمادى مش هتفرق
الفكرة ان اكيد مكعب الصلصال مابيرجعش على اصله وخلاص
وكله ماغيرك بيسيب اثر عليكى انتى بتتغيرى ممكن للاسوء وممكن للاحسن مش لازم كل التغيرات بتبقى وحشة ممكن نتغير لحاجة حلوة
منورانى وابقى تعالى دايما



مروة الزارع
اختى الصغيرة اللى مرعوبة عليها
ياسيتى لو حسة ان البوست ده بيتكلم عنك يبقى خلاص اعتبريه مهدى اليكى
القصة اللى انتى كتبتيها فى تعليقك بتوضح اكتر فكرة البوست بتاعى وكنت فعلا بفكر اكتبها هى كمان
كويس اوى انك كتبتيها فى تعليقك
منورانى يا ميرو
وبالنسبة لموضوع الاعراض الصحية ده
احب اطمنك ان مافيش خيخة صغيرة جاية فى السكة
ده بس شوية برد


رئيس جمهورية نفسك
انت فين ياراجل ده انا كنت جايبة سيرتك عندى نا فى بوست من بوستاتى
منورنى دايما والله
وانا عن نفسى هاوصل رسالتك دى لصاحبة التجربة وهاقولها تسيب نفسها يمكن فعلا الشكل الجديد يكون احلى

شكرا ليكم كلكم
اختكم خيخة

الشنكوتي الكبير said...

انا جيت اشوف ردك على الكومنت لقيتك بتقولي انت بالذات تستنى
فكرتيني ايام المدرسه المدرس يوزع الشهادات كلها ويجي لحد عندي ويقولي استنى انت شويه عايزك
انا اعصابي خفيفه
نزلي البوست بسرعه علشان افهم

تحياتي
سلاااااااااااااااااااام

مروة الزارع said...

نسيت كنت عاوزة استأذنك أنى هحط اللينك بتاعك فى المفضلات عندى

أبو أمك said...

تسلم عينك وراسك
يمكن ماوصلنيش اللي عايزة تقوليه...يمكن أنا اللي ماعرفتش أوصل اللي عايز أقوله..يمكن التهريج طلع تقيل..أو سخيف حبتين
وفي النهاية..لا أملك إلا أن أنسحب معتذراً
سبحانك اللهم وبحمدك..أشهد أن لا إله إلا أنت..أستغفرك وأتوب إليك

mahmoud farag said...

السلام عليكم ورحمة الله وبركاته

قرأت أخر موضوع عندك باع الشنكوتي الكبير وخلاني أقول هو ايه الموضوع اللي قبله اللي لمس كل المدونين ده

رجعت بالبوستات لورا

ووقفت
لاقيت درس كامل في العلاقات

بغض النظر انك عبرتي فيها عن موقف معين حصل فيه ان مكعب الصلصال نقص ومرجعش زي الأول

لكن يخلينا نفكر ونقول
ليه ده بيحصل من الأساس ؟؟
هو فينا حد كده تشكيله بمنتهي السهوله ؟
وليه فيه ناس بتحب وتعشق تشكيل الناس الانيه وبعد كده مش بتعرف تسيبها زي ما كانت وبترحل في الأخر

يمكن عشان اللي فينا كده معرفش يشكل نفسه أصلا
ومعرفش يخلي له شخصيه ثابته زي الهرم من يوم ما اتبني مااتغيرش .. يمكن حاجات بسيطه حصلت له لكنها في الأخر مقارنة بالزمن لا تذكر

بس قلت لنفسي
فيه علاقات تانيه الواحد بيخرج منها وأقوي من الأول واكتسب حاجات جديده من تجاربه دي ... يعني بصمات الناس ضافت ليه مش أخدت منه

مش كل البصمات بتعيب اللون
ومش كل الشرايح بتقلل من الحجم

لأن ممكن البصمات تحوله الي لون اجمل
وممكن الشرايح تشيل منه صفات مكنتش كويسه فيه

تجاربنا بمرورو الأيام ياما بتدينا وبتاخد منا وعلاقاتنا فيهاالحلو والوحش وعشان كده بقول لك

احنا أكبر من مجرد صلصال

بت خيخة وأى كلام said...

محمود فرج
اولا اهلا بيكعندى اول مرة وياريت تتكرر زيارتك تانى

اولا تعليقك عاجبنى ولو كنت قريت ردى على التعليقات اللى جاتلى على البوست بتاع شنكوتى
كنت هاتعرف انى قلت حاجة شبه كلامك كدة
قلت ان التجربة دى مش كل اثارها كانت اثار وحشة
لا كان فيه برضه اثار حلوة
واكيد انا اتعلمت حاجات كتير
وبعدين تعليق ده بيقول نفس اللى انا عايزة اقوله
ان حتى لو كان فيه ناس اضافولنا حاجات كويسة وبصماتهم فينا خلت لون الصلصال اجمل فده بيدل على انه ساب بصمة برضه وان الصلصال مارجعش زى الاول حتى ولو كان لونه اجمل فاهو مارجعش زى الاول
يعنى اكيد انت لو معاك مكعب صلصال وعملت بيه وردة شكل الوردة احلى من المكعب
ولو انت معاك مكعب صلصال وعملت بيه شكل نجمة داوود مثلا يبقى اكيد المكعب كان شكله احلى
بس فى الحالتين المكعب مارجعش لحالته
فى الحالة الاولى المكعب اتغير للاحسن
والحالة التانية المكعب اتغير للاسوء
واحنا كدة احنا عاملين زى مكعب الصلصال
كلنا كنا مكعبات صلصال بيضا
جزء منما اتحول لوردة ودى الاثار الحلوة اللى الناس سبتها علينا او بصماتهم الحلوة
وجزء منا اتحول لاى شكل احنا مش بنحبه وده تاثير بصماتهم الوحشة علينا لكن عمرنا مارجعنا بعد اى تجربة بتمر بينا لمكعب صلصال ابيض
لازم هنكون لون تانى وحد تانى وشخصية تانية واحاسيس تانية
وبتفضل دايما اول تجربة لينا فى اى شئ مش لازم تكون تجربة حب ممكن تكون تجربة عمل او دراسة او اى حاجة فى الدنيا دايما اول تجربة بتسيب اثار جامدة اوى وغويطة واثارها مش بتروح ابدا
علشان كدة انا حاسة ان احنا مش اكبر من الصلصال احنا زيه تقريبا
عموما اشكرك على تعليقك
واشكرك على زيارتك وياريت تتكرر
وشكرا لتواصلك معايا

اختك خيخة

mahmoud farag said...

جميل اننا اتفقنا

والأجمل هو أنني زرت مدونتك ثانية

مدونه جميله خفيفه هادئه وأعجبتني الصوره المرفقه للتدوينه الأخيره بتاع شنكوتي

صوره رائعه جدا ... اعذريني لأني في كلية الطب وهذه الصور ساعات بتعجبني


أرجو منك زيارة قصائدي المبعثره وإبداء رأيك

شكرا لك كثيرا

NAGWA said...

تحت أظافره بقاياها

الحقيقة البوست دا رائع تقديمة حلوة وختام أحلى

اتقبلي مرورى
وبتمنى تزورى مدونتي البسيطة انتى وأصدقائك
انا متابعاكى من زمان بس مكنتش بعلق

عمرو فكرى said...

تحفة

users online