Saturday, December 27, 2008

عذراً غزة... فعائلتي مراكزها حساسة


انا مش هتكلم في السياسة
لأني مش بفهم فيها
ولأن عمر إبن خالتي بعد معرفته بوجود مدونة ليا
أقنعنى فى أخر زيارة له بمصر
إن السياسيين ليهم حسابات تانية خااااااااااالص
غيرنا إحنا كمواطنين عاديين
ولأن مختار جوز بنت خالي
أقنع ماما
إن فيه حاجة عندهم اسمها
علم ولم يبلغ
ولو رؤسائه شموا خبر
انه كان عارف ان قريبته البت خيخة
كتبت حاجة فى السياسة
وهو مابلغهومش
فده كدة خطر جدا على مركزه الحساس
ونظرا لان عيلتى كلها مراكزها حساسة اوى اوى
ونظراً لأني خيخة
وبسمع كلام بابا وماما
وبسمع كلام عمر إبن خالتي
وكل عائلتي المبجلة المحترمة بنت الاصول
واصحاب المراكز الحساسة
واللي خايفين على مراكزهم الحساسة أوى
انها تروح فى الرجلين
لو واحدة خيخة زيى اتكلمت فى السياسة
فأنا مش هاتكلم فى السياسة
أنا هاحط إيدى في جيوبي من البرد
وهاشرب مج الشاي بلبن
وهاقعد أتفرج على الاخبار
وهاضم حواجبي على بعض من شدة التأثر
ومع كل مشهد فيه قتيل فلسطيني
هاقعد هاقول ياحراااااااام
ومع مشهد للحصار
ومنع عبور قوافل محملة بالطعام
هاروح انا أتاكد إن فيه فى التلاجة
لبن علشان بكرة الصبح
شريف يشرب لبن بالعسل قبل ما ينزل
وهتأكد ان فيه لانشون حلواني
لان ابنى بيحب اللانشون جداااااااااا
وهتأكد ان مخزوني من الشكولاتة لم ينفد بعد
ومع اذاعة خبر ازدياد عدد القتلى الفلسطنيين
هاكون انا ساعتها بعمل بنصيحة أفراد عائلتى
اصحاب المراكز الحساسة
وهاشجب واندد وادين العدوان الاسرائلي
وهاعترض على سلبية الرؤساء العرب
فى عقل بالى طبعا
وطبعا مش هانسى وانا بشجب وادين
انى احط على وشي ماسك الفراولة لتقوية البشرة
وبعد نص ساعة وانا بزيل اثار الماسك من على وشى
بمية ورد
هيكون فيه خبر بإزالة جثث القتلى ودفنهم بمقبرة جماعية
ومع مشهد الفلسطنيين وهما بردانيين
ومش لاقيين بطانية تقيهم برد الشتا
هكون انا بتغطى بالبطانية
ام وشين التقيلة اللي بتدفي جامد
وبعد كدة هاصحى من النوم
وانا بربي فى ابنى
كيف تكون جبانا
وكيف تكون سلبيا
وكيف تكون متفرجا خيخيا
علشان افراد عائلتك
مراكزهم حساسة



إنتهى
بت خيخة وأى كلام

Thursday, December 04, 2008

الحياة بقى لونها بمبي


بقلب جامد
وثقة متناهية فى قدرتى
على غسل الغسيل
بدون اى خسائر فى الارواح او الشرابات

وهو الغسيل إيه غير ان الواحدة
تفصل الهدوم الملونة عن الهدوم البيضا
عن الهدوم اللى بتبهت
الموضوع مش محتاج عالمة ذرة يعنى
لو جبنا أى عيل صغير هيعرف يغسل الغسيل

بس تقولوا ايه فى واحدة خيخة

فاصل اعلانى وننزل بالبوست

رايحة فين يا خيخة
رايحة اجيب إيريال
راجعة منين يا خيخة
راجعة من عند بتاع الإيريال
**********

قررت انى اغسل
جاكت شريف الاحمر بتاع المدرسة
أظن مافيهاش حاجة دى
أم وقررت إنها تغسل جاكت إبنها
مافيهاش اى مشاكل او أى حاجة مريبة
ولكن تبقى المشكلة
الا وهى اللون الاحمر

انا بصراحة مش بفصل الهدوم البيضا
عن الهدوم الملونة
بغسلهم كلهم مع بعض
اهم حاجة عندى ان ماحطش حاجة بتبهت وسطهم

جاكت شريف لونه احمر يعنى ملون
ودى كانت اول مرة اغسل فيها جاكت شريف

ونظرا لانى معرفش ازاى الواحد
يعرف القماشة اللى بتبهت
من القماشة اللى مش بتبهت
فانا مسكت الجاكت وفحصته
بين صوابع ايدى الإبهام والسبابة والوسطى
وقلت فى عقل بالى لأ مش بيبهت
ومحدش يقولى ايه الأسباب والقرائن
اللى خلتنى اقرر ان الجاكت مش بيبهت
لأنى هاقولكم معرفش
فبلاش تحرجونى بالسؤال ده

المهم انى قررت إنى أحط الجاكت
اللى مش بيبهت من وجهة نظرى
مع الهدوم البيضا فى غسلة واحدة علشان اخلص

وبعد ساعة ونصف مدة دورة الغسيل
بفتح الغسالة بقلب جامد
وبدلق الغسيل فى الطشت
استعدادا لنشره
لاقيتلكم اييييييييييييييييييييييييه؟
لاقتلكم تى شيرت بتاعى لونه بمبى فاتح
مسكته وقولت اللاااااااااااه
حلو اوى التى شيرت ده
واستغربت اوى
لانى فاكرة ان معنديش حاجة باللون ده
فقلت فى عقل بالى هو التى شيرت ده جه منين
ولسة بكمل دلق الهدوم فى الطشت
لاقيت بنطلون لشريف شبه بنطلونه البيج
بس لونه بمبى مقلم فى بيج
فانا استغربت اوى بصراحة
وقلت فى عقل بالى
مش معقول اكون وصلت لمرحلة
ان الهنا مزغلل عنيا
ومش بشوف غير بمبى بمبىىىىىى
فدلقت الغسيل كله بسرعة
واذا فجأتن الاقى الغسيل اتحول بقدرة قادر
اللى اللون البينك بدرجاته
فشهقت شهقة عالية
تدل على مدى خضتى
مشوبة بقدر قليل من حالة استنكار لغبائي
لأن اكتشفت ان الجاكت الاحمر بيبهت
وشرابى الابيض اللى مرسوم عليه
دبدوب بياكل عسل
بقى لونه بينك والدبدوب بقى لونه احمر
وتحس انه لغمط وشه بالعسل اللى بياكله
اما فانلات شريف وكلوتاته فحدث ولا حرج
بقوا كلهم لونهم بينك
يعنى هاقسمهم نصين
نص لملك بنت شاهى
ونص تانى لرقية بنت دعاء
وبيجامتى اللى عليها خرفان بيضا
بقى فيها خرفان بمبى كتيير
يعنى أبى هانم هتصادر منى البيجامة
وهتسيب خرفانى البمبى عليا

وانا من هذا المزنق
بكتبلكم البوست ده وانا بغنى
بمبى بمبى بمبى
بمبىىىىىىىىىى
والهدوم بقى لونها بمبى
وانا بلطم وشيكو جنبى
والشراب بقى لونه بمبى
حتى بيجامتى بقى لونها بمبى
بمبى بمبى بمبى
بمبىىىىىىىىىىىى



وكل الكلام اللى فوق ده نطلع منه بتلات حاجات

ان مش كفاية ابدا انكم
تفحصوا الهدوم بصوابعكم
الإبهام والسبابة والوسطى
علشان تقرروا اذا كانت الهدوم بتبهت ولا لأ


وإن الحمد لله الحمد لله الحمد لله
جاكت شريف فضل ثابت على لونه الاحمر
ومتحولش للون البمبى هو كمان


وإن الهنا هيزغلل عنيا لفترة طويلة من الوقت
وهاشوف كل حاجة بمبي فى الأيام الجاية دى


انتهى
بت خيخة وأى كلام

Monday, October 20, 2008

شريف ... بحبك


شريف بحبك
واحب اعضك
فى احمر خدودك
والعب معاك
واحب ايدك
تطبطب عليا
وتقول يا مامى
بحبك كمان

شريف بحبك
واخاف عليك
محبكش تغلط
ولو غلطت
كفاية مرة
بلاش تكرر
غلطة مرتين
ساعتها هازعق
وابرق عنيا
وخصامي يكبر
ويبقى ثانيتين

شريف بحبك
بحب ضحكك
تضحكلى يعنى
ربي عنى راضى
ولو يجيلك
حرارة فى جبينك
يزيد عذابي
واكون حزينة

شريف بحبك
لما تبقى صاحى
الشقاوة تصحى
ومن شقاوتك
تطلع عنيا
ويزيد جنانى
واقول ياربى
خليه ينام
ولما تنام
تبقى ملاك
وتوحشنى جدا
واقول ياربى
خليه يقوم
والعب معاه

شريف بحبك
بحب كونك ابنى
ولما تكبر
هتبقى صاحبى
وهتبقى راجل
هتصلى فرضك
ومتخافش ابدا
غير من اللى خلقك

شريف بحبك
دعاء بقوله
ربي يصونك
ويحفظك ليا
ويباركلى فيك
يا نور عنيا
شريف بحبك
من غيرك انت
انا خيخة جدا
ومعاك قوية

شريف ... بحبك

Thursday, October 16, 2008

إن فاتك الألماني مش هيرجع تاني



من منطلق إني عايزة أكون لشريف الماما السوبر
وإلا ماما تجدر
إلا ماما تجدررررررر
إلا تجدرررررررررررررررررر


قررت إنى أخد كورس ألماني علشان أقدر أتابع شريف
لأنه بياخد فى المدرسة اللغة التانية ألمانى

و أنا كل علاقتى بالألماني ومعرفتي بيه
مأخوذة من فيلم النمر الاسود
لما وفاء سالم تدخل على أحمد زكى
وهى لابسة الشورت ومسحللة شعرها وبتقوله
صباه الهير يا مهمد

ونظرا لأنى برضه عارفة ومتأكدة إن الألمانى مش بس
صباه الهير يا مهمد
وإن اكيد فيه كلام تانى
زي مساه الهير يا مهمد

فقررت إنى معتمدش على طريقة فيلم النمر الاسود
فى تعلم اللغة الالمانية
اللى هى الدراسة فى البيت
واعتمد على معهد جوتة
وأتمشور وامرى لله
من أكتوبر للدقي ومن الدقى لاكتوبر
وكل حاجة تهون علشان خاطر عيون شريف
وخصوصا كمان انه ينقصنى للتعلم فى البيت
الشورت بتاع وفاء سالم

المهم إني إشتركت فى الكورس
ومن هنا كانت بدايتى مع طريق الاجرام
قصدى التعليم

الدرس الاول
الفراو يعنى المدام: جوتن تاج
انا فى عقلى بالى: احنا هنستهبل
هى مش كانت جوتن مورجن
مش وفاء سالم قالت لأحمد زكي
جوتن مورجن يا مهمد يعنى صباه الهير يا مهمد

الفراو: جوتن تاج أز جود افتر نون
انا فى عقل بالى: وانا اللى كنتى ظالماكى ياحبة عينى

الفراو موجهة كلامها ليا: شبرخن زي دويتش
انا رافعة راسى وببصلها بإذبهلال
وبؤي اتفتح حبة صغنانين: ها
الفراو مكررة كلامها: شبرخن زي دويتش
انا فاتحة بؤي وعلامات الغباء
تقطر قطاطير من على وشي : ها
وبعدين تداركت الموقف
وقلت اكيد بتسالنى عن إسمي
فاستدركت ورديت وقلت فجأة: نوران
الفراو: ناين , ناين. شبرخن زي دويتش
أز دو يو سبيك جيرمن؟
انا : وهو أنا لو كنت بتكلم ألماني إيه اللى يجيبنى هنا؟
الفراو هزت راسها وابتسمت
وسابتها منى وراحت على طالب تانى
وعدى باقى اليوم من غير اى حوادث

الدرس التانى
انا بسبق بالكلام وعاملة فيها البت العريفة وبقولها
جوتن تاج
الفراو: جوتن تاج
في جيت إس إينن؟
أنا نفس نظرة الاذبهلال والغباء
والقطاطير اللى بتقطر مني
ونفس فتحة البؤ البلهاء: ها
الفراو المرة دى تداركت هى الموقف
وعرفت إنها لو قعدت تكرر كلامها عشرين مرة
مش هتلاقى رد فعل مني غير: ها
فتلافيا لأى شلل ممكن يصيبها قالت
فى جيت إس إينن أز هاو ار يو؟
انا: فاين ثانك يو
هى: ناين, دانكي ..جوت
انا هزيت راسى وكلي ثقة
ما انا فهمت بقى يبقى أهز راسى براحتي
المهم هزيت راسى بثقة وقلت : دانكي ....جوت
و الحمد الله عدى اليوم
بدون ان أتسبب في اي حوادث شلل للفراو

والبقية تأتي


وكل الكلام اللى فوق ده نطلع منه بحاجة واحدة بس
إنى اتعلمت الأرقام من واحد لحد عشرة بالألمانى
هيييييييييييييييه


إنتهى
بت خيخة وأى كلام

Tuesday, July 08, 2008

خيخة والكلب


أنا إتهوهو عليا يا رجالة
أييييييييييييييييييون
انا إتهوهو عليا
انا خيخة بجلالة قدرها يتهوهو عليها
ومن مين؟
من حتة كلب مايسواش فى سوق الكلاب تعريفة


اللى حصل من فترة كدة
كنت رايحة الشغل فى امان الله
وفى اليوم ده
اتهبلت فى دماغى
وشربت شاى بلبن الصبح قبل ما انزل
ونتيجة هبلى ده
انى اتزنقت وعايزة اعمل بى بى
فقلت فى عقل بالى لما اروح الشركة
ابقى افك حصر هناك
علشان متأخرش على الشغل
المهم انى رحت الشغل قبل ما اعمل بى بى
وطالعة السلالم يا مشاالله عليا
وإذ فجاتن ألاقى
هوهوهوهوهوهوهوهوهوهو
الهوهوة اللى فوق دى معناها انى لاقيت كلب
وكان رد فعلى هو
عااااااااااااااااااااااا عااااااااااااااااااااااااااااا عاااااااااااااا
الــــ عااااااااااااااا اللى فوق دى
معناها انى بصرخ


ماهو انا لما لاقيت الكلب بيهوهو عليا
قمت انا صرخت
وانا لما صرخت
الكلب ابن الكلب راح جرى ورايا
رحت انا جريت انا كمان
والجرى فى الحالات اللى زى دى
مش بيكون نص الجدعنة
لااااااااااااااااااا يا بابا لاااااااااااااااااااااااااااا
ده بيكون الجدعنة كلها


وكان هذا المشهد
انا بجرى على السلالم
على طريقة الرملة سخنة الرملة سخنة
وطريقة الرملة سخنة دى بتكون كالأتى
ان رجليك الاتنين يكونوا مخاصمين بعضهم زى رجلين الضفادع
وتحس وانت بتجرى انك بتنط مش بتجرى
زى ماتكون ماشى حافى وتحت رجلك رملة سخنة
المهم جريت انا على طريقة الرملة سخنة
وبصرخ كالأتى
عاااااااااااااااااااااا
عم نااااااااااااااااااااصيييير
عااااااااااااااااااااااا
عم نااااااااااااااااصيييييييييييير
عاااااااااااااااااااااااا
عم ناااااااااااااصيييييييييييير

عم ناصر ده بواب المجمع
اللى فيه الشركة اللى بشتغل فيها
وطبعا كلمة عم ناصر دى
ماكنتش بتطلع عم ناصر كدة وخلاص
لاااااااااااااااااااا
ده نتيجة الجرى والخضة والصريخ والزنقة
عم ناصر دى كانت بتطلع منى بصوت اشبه بالسرسعة
وكل ده وانا بدى اشارات لمخى
علشان هو كمان بدوره يدى اشارات للمثانة عندى
انها متتهبلش فى مخها وتفتح على البحرى
طبعا كل الاشارات دى
كانت بتاخد منى مجهود جبار فى الموقف اللى انا فيه
ولكم ان تتخيلوا شكلى
واحدة محترمة شحطة
بتجرى على طريقة الرملة سخنة
وبتصرخ وبتنده على عم ناصربصوت اشبه بالسرسعة
وبتدى اشارات لمخها
علشان يدى اشارات للمثانة انها تمسك نفسها شوية

المهم
ان عم ناصر جه والحمد الله فى اللحظة
اللى كنت خلاص بفكر افقد فيها السيطرة على مثانتى
واللى يحصل يحصل بقى
وراح قايل للكلب كلمة كدة مخدتش بالى منها
خلى الكل يقف فى مكانه
رحت انا كمان وقفت فى مكانى
وخدت نفس عميق
وبصيت لعم ناصر
وعم ناصر بصللى وضحك
وقاللى ماتخافيش ده مابيعملش حاجة
رحت انا اييييييييييييييه بقى؟
ايييييييييييون شطاطير
رحت انا بقى قعدت على السلم
ورحت قعدت اعيط
راح عم ناصر نده على واحد كدة
وقال له هات كوباية مية للأبلة علشان مخضوضة
انا مسكت كوباية المية وايديا بتترعش
وشربت بؤين كدة وتمالكت نفسى وطلعت على الشركة

وبس خلاص


وكل الكلام اللى فوق ده
نطلع منه بحاجة واحدة بس
الى يجى يروح مشوار بعد كدة
مايبقاش يشرب شاى بلبن قبل ما ينزل


انتهى

بت خيخة وأى كلام

Friday, June 20, 2008

شرف البنت فى بوز الترابيزة


تقريبا كنت فى ثانوى
لما عرفت ان البنات عندهم حاجة اسمها غشاء البكارة
عرفت منين مش فاكرة
يمكن عن طريق كتاب دينى او مجلة طبيبك الخاص
او عن طريق واحدة صاحبتى او مدرسة الدين والعربى
بس فاكرة كويس اوى
انى اعترضت على اللى عرفته عن غشاء البكارة
ووقتها كان لسة لسانى مش طويل اوى
علشان اعتراضى ياخد شكل الالفاظ الاعتراضية الابيحة بتاعتى الأيام دى
كان اقصى وجه اعتراض ممكن اظهره هو انى اقول
كلمة نعم مع التشديد على حرف الميم
وحواجبى يلزقوا فى بعض وأدى وش واحدة ممتعضة
محدش يسألنى يعنى ايه ممتعضة
وبعد ماخلص كلمة نعم اكمل الجملة واقول
ايه الهبل ده؟
وفضلت متغاظة اوى يوميها من اللى عرفته
واللى عرفته الاتى
ان غشاء البكارة ده عبارة عن جلد رقيق
موجود داخل اعضاء المرأة التناسلية
لحد هنا وكويس جدا وماكنتش معترضة
لانى عرفت معلومة أول مرة اعرفها
لكن اللى عرفته بعد كدة
هو اللى نرفزنى
قال اييييييييييييييه؟
إن الغشاء ده علشان الراجل يعرف فى ليلة دخلته
إذا كانت مراته شريفة ولا مش شريفة؟
وهل البنت دى عملت سيكو سيكو قبل كدة ولا معملتش
فى الحتة دى بقى انا اعترضت
اعتراض مؤدب وقتها مش ابيح زى الايام دى
اعترضت لانى رفضت إن اى حد يسمح لنفسه
انه يقيس حفاظى على نفسى وعلى شرفى
بمدى حفاظى على الغشاء ده
اعترضت لأن مفهوم الشرف عندى
كان اكبر بكتير من مجرد غشاء بكارة
وكنت رافضة تماما ان اى حد يجى يغير مفهومى عن الشرف
وإن مش معقول ابدا إن الراجل يحدد قيمة الشرف
فى حتة جلدة اياكان اهميتها عنده
فهى راحت ولا جت هى هتفضل حتة جلدة من وجهة نظرى
وساعتها كنت عرفت برضه ان ممكن جدا
الغشاء ده يتعرض لتمزق نتيجة اى حوادث خارجية
وقعدت اقول طب لو واحدة اغتصبت هل معنى كدة انها مش شريفة
طب لو واحدة اتعرضت لحادثة مثلا
وعربية خبطتها ونتج عن الخبطة دى ان غشائها تمزق
هل معنى كدة انها مش شريفة
طب لو واحدة وهى ماشية جوة بيتها
واتخبطت فى بوز ترابيزة السفرة
يقوم يحصل تمزق فى غشاء البكارة
هتعمل ايه يوم ماتتجوز
هل يا ترى هاتشمع بوز الترابيزة بشمع احمر
وهتعلق ورقة على بوز الترابيزة
مكتوب عليها ممنوع الاقتراب او التصوير
ولو جوزها يوم الدخلة سألها فين غشائك
هتقوم تنزله على ملا وشه
وتروح بيت ابوها وامها
وتروح تشاورله على بوز الترابيزة
وتقوله انا شرفى فى الحتة دى؟
ويا عالم بقى هيصدقها ولا مش هيصدقها
وساعتها فكرت بطريقة مختلفة خااااااااااااااالص
طب نفترض واحدة على علاقة بواحد وبيبوسوا بعض
وبيحضنوا بعض
طب ولو اتخنقوا مع بعض ومتجوزوش والبت اتجوزت واحد تانى
هل البت دى كدة شريفة رغم احتفاظها بغشاء بكارتها
طب لو واحدة اتنيلت بستين نيلة واتهبلت فى دماغها
وعملت سيكو سيكو كامل وصريح مع واحد مش جوزها
وغشاء بكارتها راح
والبت دى اتنيلت على عينها وعملت عملية اعادة غشاء بكارة
واتجوزت واحد تانى
هل كدة البنت دى شريفة
طب وفى ظل انتشار عمليات اعادة غشاء البكارة
وإن الراجل مش هيعرف يفرق
إذا كانت مراته شريفة فعلا ولا عملت عملية ترقيع
هل بعد كدة الراجل من دوول
هنلاقيه يوم دخلته جايب معاه خبير فى الطب الشرعى
علشان يقوله اذا كان غشاء بكارة مراته طبيعى ولا مزيف؟؟؟؟؟؟
طب بلاش كل الافكار الهدامة بتاعتى دى
تعالوا نشوفها من منظور تانى خااااااااااااااالص
نفترض ان ربنا خلقنا من غير غشاء بكارة
هل معنى كدة ان احنا الستات مانحافظش على عفتنا
بحجة اننا معندناش حاجة نخاف عليها
زى بعض الرجالة اللى بيسمحوا لنفسهم
انهم يعملوا سيكو سيكو قبل الجواز
باعتبار ان مافيش حاجة تعيبهم
طب هو المفروض إن الاهالى يربوا فى بناتهم
ان شرفهم مجرد غشاء بكارة فقط
يعنى الواحدة من دول تبوس ده وتحضن ده
وطول ما هى محتفظة بغشائها يبقى خلاص البت دى شريفة
ها ماتجاوبوا
ساكتين ليه
قولولى ايه هو الشرف بقى؟
انا كنت ومازلت مقتنعة ان الشرف ده مبدأ
كنت ومازلت مقتنعة ان الشرف قيمة كبيرة
الشرف من وجهة نظرى عامل زى قوسين مقفولين
وبين القوسين دول صفات تانية كتييييييير اوى
مش معقول يكون الشرف مجرد حتة جلدة
كنت ومازالت مقتنعة ان شرف البنت
موجود فى عقلها وطريقة تفكيرها
وعلشان كدة انا وقتها اعترضت
لانى ارفض تماما انى اى حد يسمح لنفسه
انه يقيس شرفى بمدى حفاظى على غشاء بكارتى
الشرف مبدأ يا سادة
الشرف قيمة
الشرف طريقة تفكير
الشرف عدم خداع
و لكل بنت عايزة اوجه كلمة
ايوة انا بقول ان الشرف مبدأ
لكن مش معنى كدة
انك تسلمى نفسك لواحد باسم الحب
وتقولى كنت فاكرة انه هيتجوزنى
لاااااااااااااا يا ماما لاااااااااا
مافيش الكلام ده
اتجوزى الاول وبعد كدة اتهببوا مع بعض فى الحلال
وبلاش قلة ادب بقى
وفى النهاية احب أن أوجه سؤال للرجل
إذا كنت سمحت لنفسك أن تقيس شرف المرأة
بمدى حفاظها على غشاء بكارتها
فاسمح لي بما انى انسانة مثلك
ولي عقل أفكر به
أن أقيس مدى كونك رجل شريف ولكن قل لي كيف؟



انتهى
بت خيخة وأى كلام

Tuesday, June 10, 2008

هى وبطنها




بطنها بدأت تكبر
نزلت تشترى اندرويرات جديدة
البنت عرضت عليها موديلات كتيرة واشكال كتيرة
هى اختارت اللى عليها دباديب صغنونة
واختارت كمان اللى عليهم بلالين
روحت البيت خدت دش
وحطت على بطنها كريم يمنع تشققات الحمل
نزلت راسها على اد ما تقدر
علشان تكون فى مستوى بطنها
وقالتله
ده كريم اسمه جونسون اند جونسون
لبست اندر ويرها الجديد
وقالتله لو عايز تلعب مع الدباديب
مد ايدك والعب معاهم
فتحت التلاجة
ومسكت واحدة مكس لبن على شكولاتة
وقبل ما تاخد اول شفطة
طبطبت على بطنها
ونزلت راسها لمستوى بطنها
وقالتله
انا هاشرب دلوقتى لبن على شكولاتة
يعنى اللى هينزلك دلوقتى هو ده اللبن على شكولاتة
شغلت اغنية الاطلال لام كلثوم
ومسكت سماعة من سماعات الكمبيوتر
وقربتها من بطنها وقالتله دى ام كلثوم ودى اغنية الاطلال
بعد شوية عملت شوية فول بالزيت واللمون
وعليهم كمون وشطة وفلفل اسود
نزلت راسها لحد مستوى بطنها
وقالتله اللى هتاكله دلوقتى فول باللمون
مسكت كتاب اسمه
تربية الابناء على الطريقة الاسلامية
فردت جسمها على السرير
رفعت تى شيرت البيجامة شوية
وخلت استك البنطلون يبقى تحت بطنها
حطت الكتاب قدام بطنها وقالتله
هو ده الكتاب اللى هاتعلم منه ازاى اربيك صح
ايه رايك فى الغلاف بتاعه؟
راحت تكلم اختها فى التليفون
حطت السماعة على بطنها وقالتله ده صوت خالتك
قبل ما تنام بليل شغلت سورة يس على الكمبيوتر
ومسكت السماعة وحطتها على بطنها
قالتله
دى سورة يس
ده كلام ربنا
ضمت صوابع ايدها اليمين وباستهم
وحطتهم على بطنها
وقالتله تصبح على خير يا حبيبى
دى بوسة قبل النوم
فردت جسمها على السرير
وجابت البطانية الصغنونةاللى اشترتهاله
وفى انتظار انها تغطيه بيها
وغطت بيها بطنها بس
وقعدت تطبطب عليها
لحد ما ناموا هما الاتنين
هى واللى فى بطنها

انتهى
بت خيخة واى كلام

Thursday, May 29, 2008

رب صدفة خير من الف جوافة


فى موسم الجوافة اللى فات

كان يوم سبت

وماما كان عندها جوافة

كلتلى انا كام جوافياية

ونزلت اشترى شوية حاجات

من سيتى مول اللى فى اخر الهرم

وانا عمالة ابص على الفترينات

اكتشفت ان فيه بذرة جوافياية

اتحشرت بين اسنانى حاولت اطلعها بلسانى

ونتج عن محاولاتى ان بؤي اتفتح على مصراعيه

ولما بؤى اتفتح على البحرى

خدودى طلعت لفوق شوية فضغطت على عنيا

النتيجة ان اللى يشوفنى يفتكرنى بضحكله

وانا مبضحكش لحد

انا كل الحكاية انى بحاول

اسلك البذرة اللى اتحشرت بين اسنانى


المهم فى محاولاتى البائسة

لقيت واحدة بتجرى من بعييييييد وجاية ناحيتى وبتقول

مش معقووووووووووووووووول

ريتشااااااااااااااااااااااارد

وبتبص ناحيتى

انا افتكرت ان فيه حد ورايا والبت دى بتندهله

لفيت راسى نوع من انواع حب الفضول

علشان اعرف مين ريتشارد ده

لما بصيت ورايا مالقيتش حد

رجعت راسى تانى

كانت البت دى واقفة قدامى

لدرجة ان راسى كانت هتخبط فى راسها

واذ فجأتن

الاقيها واخدانى بالحضن اوى

وهاريانى بوس

وانا فى عقل بالى بقول

مين دى؟


البت: وحشانى يا ريتشارد

انا مذبهلة وصامتة صمت ابو الهول

ولسانى عمال يلعب فى البذرة اللى مش عايزة تطلع

البت: اخبارك ايه يا نورا

انا فى عقل بالى: مين دى؟

انا بصوت مسموع : الحمد الله

انا فى عقل بالى تانى: ريتشارد مين؟

البت: ها اتجوزتى ولا لسه؟

انا فى عقل بالى: مين دى؟

انا بصوت مسموع: اه اتجوزت

البت : اتجوزتى خالد؟

انا فى عقل بالى: هى البت دى تعرف خالد منين؟

انا بصوت مسموع: لا اتجوزت هانى

البت: هانى مين؟

انا فى عقل بالى: مين دى؟

انا بصوت مسموع: كان معايا فى الجامعة

البت: معقول متجوزتيش خالد

ده انتى يا بنتى كنتى بتخافى تقلعى الدبلة تفرجيهالنا

كنت بتقولى ده فال وحش

انا فى عقل بالى: مين البت دى؟

انا بصوت مسموع:كل شئ قسمة ونصيب

البت : ومين اللى فسخ الخطوبة؟

انا: خطوبة ايه؟

البت:خطوبتك انتى وخالد

انا: دى حاجة عدى عليها زمن

وزى ماقلتلك كل شئ قسمة ونصيب

انا فى عقل بالى: مين البت دى؟

البت: بس ياااااه يا ريتشارد ده انتى ليكى وحشة جامدة اوى

انا فى عقل بالى: ريتشارد مين

هى البت دى هبلة ولا ايه؟

انا بصوت مسموع: ريتشارد مين؟

البت: انتى نسيتى ولا ايه؟

انا:نسيت ايه؟

البت: انت ناسية ان احنا كنا ملقبينك فى المدرسة بــــإسم

ريتشارد قلب الاسد

انا بحاول افتكر: ياااااااااااااااااه ايوة صح

انا نسيت خالص الموضوع ده

انا فى عقل بالى: مين البت دى اللى تعرفنى وانا معرفهاش

البت: بتشوفى حد من الشلة؟

انا: شلة مين؟

البت: مروة وامانى والناس دى

انا: اه بشوفهم كل فين وفين

انا فى عقل بالى: يارب البت دى

تقولى ابقى قوليلهم فلانة بتسلم عليكم

علشان اعرف اسمها

البت: ابقى سلميلى عليهم كتيير

انا هتشل لوحدى

انا: ان شاء الله

البت: بقالك اد ايه متجوزة يا نورا؟

انا: حوالى خمس سنين

البت: معلش

انا مستغربة: معلش ايه؟

البت: يعنى متزعليش نفسك

انا مستغربة وبدأت ادى وش اباحة: مزعلش نفسى على ايه؟

البت: انا كان ليا واحدة صاحبتى

قعدت سبع سنين وبعد كدة ربنا كرمها

انا خلاص اديت وش الاباحة: نعمممممممممممممممم؟

البت: قصدى يعنى ان ربنا رزقها بالعيال

انا مبرقة عنيا

و وش الاباحة بقى على اخره: طب وده ايه علاقته بيا؟

البت: انا قصدى اقول يعنى ان ربنا ان شاء الله

هيرزقك بالعيال برضه

واوعى تفتكرى ان خمس سنين دول حاجة كتير

ربنا كرمه واسع

انا تقريبا اتشليت خلاص: وهو حد قالك ان ربنا مرزقنيش بالعيال

انا الحمد الله معايا شريف داخل على اربع سنين دلوقتى

البت مفزوعة: ايه؟ انتى مخلفة؟

انتى مخلفة؟

انتى عندك عيال؟

بجد انتى عندك عيال؟

لا لا لا لا

انتى اكيد بتهرجى

انتى عندك عيال

بقى انتى عندك عيال

انا: ايه فيه ايه يا بنتى ايوة الحمد الله عندى ابنى

فيه ايه

ايه الغاغة اللى انتى عملاها دى؟

البت: لا مش معقول

اصل مش باين عليكى خالص انك حملتى وخلفتى

ده انا اول ما شوفتك افتكرتك لسة متجوزتيش

انا فى عقل بالى: الله اكبر خمسة وخميسة

انا بصوت مسموع : لا بس انا تخنت برضه

البت: تخنتى ايه بس يا نورا

انا اللى ضربت خالص بعد الجواز والخلفة مش كدة؟

انا فى عقل بالى: ما هو انا لو اعرف انتى مين اساسا

كنت يمكن عرفت اذا كنتى ضربتى فعلا ولا لأ

انا بصوت مسموع: مش اوى

البت: اصل انا كمان اتجوزت وعندى عمر وحبيبة

انا: ربنا يخليهوملك

البت: بس انا ماكنتش متخيلة انك هتعرفينى؟

انا فى عقل بالى: احييييييييييييييييييه

ومين قالك انى عارفاكى؟

انا بصوت مسموع: لأ ازاى هو انا معقول معرفكيش

البت: انا اصلى شايفاكى من فترة هنا فى المول

وكنت عايزة اجى اسلم عليكى وخفت تكونى نسيانى

بس لما لاقيتك بتبصيلى وبتبتسمى اوى عرفت انك فكرانى

انا فى عقل بالى: مين دى؟

البت: المهم يا ريتشارد معاكى موبايل ؟

انا: اه

البت: طب خدى سجلى نمرتى عندك

وملتنى رقمها

انا بتخابث عليها: تحبى اسجله باسمك ولا باسم ام عمر

البت: خليها ام عمر

انا فى عقل بالى: احيييييييييييييييييييييييه

يا بتى انطقى قولى اسمك

خلينى اتنيل افتكرك فى اليوم اللى مش فايت ده

البت: انا مبسوطة اوى انى شفتك النهاردة يا نورا

ومتتصوريش انا فرحانة اد ايه انك فاكرانى

انا فى عقل بالى: مين دى ؟

البت: بوسيلى ابنك كتير وخلينا نشوفك

معاكى تليفونى اهه يعنى مالكيش حجة

انا:اكيد طبعا

البت مشيت

انا فى عقل بالى: ميييييييييييييييييين دىىىىىىىى؟


وكل الكلام اللى فوق ده

نطلع منه بحاجة واحدة بس

اللى ياكل جوافة بعد كدة

يبقى يغسل سنانه قبل ما يخرج


انتهى

بت خيخة وأى كلام

Monday, April 07, 2008

هى حتة قطنة مافيش غيرها


بابا العزيز
قررت انى اكتبلك الجواب ده

علشان انا عارفة انك علطول مشغول
وتقريبا انا مبعرفش اشوفك وجها لوجه واقعد اتكلم معاك
قررت انى اكتبلك بطريقة محترمة
على عكس بعض اخواتى
اللى من كتر ما انت مش عايز تسمعلهم

أو مش فاضى انك تسمعلهم
قرروا انهم يقلوا ادبهم عليك
ومانكرش يا بابا انى ساعات كنت بقل ادبى انا كمان معاهم
بس اكتشفت ان حضرتك
ماشى بسياسة ودن من طين و ودن من عجين
بابا العزيز
بصراحة ومن غير اى مقدمات
انا زعلانة من حضرتك
حاجات كتير اوى حضرتك بتعملها مزعلانى انا واخواتى
زى مثلا ان حضرتك بتاكل كويس وبتلبس كويس
وسايب أغلب اولادك جعانين ومعندهمش لبس كفاية
ومش بس كدة يا بابا
ده فيه كمان ولاد لحضرتك بيناموا فى الشارع على الرصيف
يرضيك كدة يا بابا
طب افرض حد جه من برة وشافنا كدة
ماهو كدة هيفتكرك انك اب ظالم
وانت طبعا مش كدة خالص
ده غير كمان بقى يا بابا ان حضرتك

عامل تفرقة عنصرية بين ولادك
يعنى ابيه جمال بياخد مصروف اكتر مننا كلنا
وحضرتك جوزته وجبتله شقة وفرشتهاله

وعملتله فرح وجبت فيه عمرو دياب
طيب يا بابا ما فيه ولاد كتير لحضرتك وعايزين يتجوزوا برضه
هما مش عايزينك تجبلهم شقة وتفرشهالهم
هما بس عايزين المصروف الشهرى يزيد شوية
وهما هيحوشوا منه ويجيبوا الشقة من مصروفهم
يابابا حضرتك بتصرف فلوسك

على اصحابك اللى معاهم فلوس فعلا
يعنى حضرتك بتعالج ناس من جيبك

و هما معاهم فلوس العلاج دى
لكن فيه اخوات ليا كتير معندهمش فلوس يتعالجوا بيها خالص
يا بابا حضرتك عمال تاكل وتشرب وتلبس
واخواتى جعانين والله
اخواتى عريانين يا بابا
اخواتى عايزين يتعالجوا
يا بابا حضرتك مطنشنا خالص
حضرتك خايف تبحبحها علينا شوية نقوم نتنمرد عليك
بس صدقنى يا بابا احنا مش وحشين اوى كدة
احنا بالعكس هنحبك اكتر ونحترمك اكتر
يا بابا ده انا سمعت من فترة صغيرة
ان واحد من اولادك قتل ولاده بالسم
علشان مش معاه فلوس يجبلهم اكل يكفيهم
يرضيك كدة يا بابا
الناس بقت تقتل بعضها علشان رغيف العيش
الناس بقت بتقتل عيالها علشان مش عارفين يصرفوا عليهم ازاى
معتقدش ابدا ان ده اللى حضرتك عايزه
حضرتك قلبك كبير
انا شوفتك فى التليفزيون من كام سنة
لما ملست على شعر ولد صغير
ووطيت علشان تسمع بيقولك كلمة فى ودنك
يعنى قلبك كبير اهه وماينفعش تقول لأ انا قلبى مش كبير
حاجة تانية بقى يا بابا مزعلانى منك جدا
واخواتى كلهم زعلانين منك اوى
اسرائيل يا بابا ؟؟؟؟؟؟؟؟؟؟؟؟
بقى بعد العمر ده كله والحروب الى بينا
تقوم تحط ايدك فى ايدها وتعمل اتفاقية الكويز
يا بابا مش اسرائيل دى اللى قتلت جنود مصريين
على حدود رفح من فترة
مش دى اللى بتقتل فى باقى اهلنا اللى فى فلسطين ولبنان
ده حتى المثل الشعبى بيقولك
انا واخويا على ابن عمى وانا وابن عمى على الغريب
ودول هيفضلوا طول عمرهم اغراب يا بابا
وعمرهم ماهيبقوا حبايب ولا قرايب
اسرائيل دى يا بابا اللى اغتصبت ارضنا زمان
اسرائيل دى اللى قتلت اطفال مدرسة بحر البقر
اسرائيل دى اللى يتمت اولاد كتير ورملت ستات كتير
يا بابا اسرائيل دى هتفضل طول عمرها تعلبة قذرة مالهاش امان
لازم تخاف على نفسك منها وتخاف علينا منها ومندهاش الامان
ماينفعش يكون فيه بينا علاقات من اى نوع
انكل السادات الله يرحمه لما عمل معاهدة سلام
متهيالى ان الغرض منها
زى المثل الشعبى اللى بيقول
صباح الخير يا جارى انت فى حالك وانا فى حالى
لكن ماينفعش جارى ده يجيلى البيت ولا انا اروحله
ولا عياله تلعب مع عيالى
تقوم انت يا بابا
تعمل معاهم علاقات اقتصادية
وسمعت كمان ان حضرتك بتديهم غاز طبيعى
معقول ده يا بابا؟
ازاى ده
مش حضرتك برضه حاربت ضدهم
ازاى دلوقتى تحط ايدك فى ايدهم
مهما كان التمن غالى يا بابا
اكيد مش اغلى من كرامتنا
وانت يا بابا لما تحط ايديك فى ايدهم
انت كدة بتحط كرامتنا كلنا فى الطين
انت يا بابا لما تقبل تعازيهم بصدر رحب فى قتل الجنود
ولما تقبل تعازى انكل بوش

فى قتل واحد من اخواتى فى قناة السويس
هما كدة كأنهم قدمولك كاس وقالولك اتفضل اشرب
ومخدتش بالك ان اللى بتشربه ده هو دم شهدائنا
يرضيك يا بابا انك تشرب من دم اولادك اللى ماتوا
طب ليه ؟
هو دمنا مش مكفيك
كمان عايز تشرب دم الشهدا
بابا حسنى
ارجوك

كفاية حرام
محدش واخد منها حاجة

غير هى حتة قطنة فى الأظؤظة
والكفن مالهوش جيوب يا بابا

انتهى

بنتك
بت خيخة وأى كلام

Sunday, March 16, 2008

هو يعنى لازم نحرقها



ايه بقى
جرى ايه يا حسنى
ياراجل مش كدة
ده كدة افترا بقى
الناس هتاكل ايه بعد كدة
ياراجل حرام عليك
ارحم من فى الارض يرحمك من فى السماء
ولا انت واثق من نفسك اوى
ومش محتاج رحمته
ياراجل ده انت ريسنا
يعنى راعينا
وكل راعى مسؤل عن رعيته
ياراجل ازاى عارف تاكل وغيرك مش لاقى اللقمة
عمال ترفع فى اسعار السلع الغذائية
لما خلاص علمت الناس الصيام مجبرين
انت مش فاكر من 31 سنة
لما السادات رفع الاسعار شوية حصل ايه
الناس حرقت البلد
والسادات تراجع فى قراره
تكونش مستنى يا منيل على عينك
ان احنا نحرق البلد علشان ترتجع عن قرارك
اى والله شكلك كدة مستنى

طب صحيح يا بشر
هو احنا مستنيين ايه
هو احنا ساكتين ليه
انا مابقولش نقوم نحرق بلدنا
بس ماتيجوا نعمل حاجة
بدل ما احنا قاعدين زى خيبتها كدة
تعالوا كلنا نتلم ونتجمع ونعمل زى ما عادل امام
عمل فى فيلم النوم فى العسل
جمع الشعب وخداهم وراه
على مجلس الشعب وقعدوا يقولوا
ااااااااااااااااااه
ااااااااااااااااااه
ااااااااااااااااااه
هما كانوا بيقولوا اااااااااااااه

علشان عايزين سيكو سيكو
تعالو احنا نتجمع ونقول
اااااااااااااااااااه جعانين
اااااااااااااااااااااااااه تعبانين
اااااااااااااااااااه عايزين نتعلم
ااااااااااااااااااااااااه عايزين نتعالج
اااااااااااااااااااااااااااااه عايزين نتجوز
ااااااااااااااااااااااااااااه عايزين نعيش مستورين

اااااااااااااااه عايزين مرتبات تفتح بيوت
اااااااااااااااااااااااه عايزين رغيف عيش يتاكل
ااااااااااه عايزين رحمتك يارب

تعالوا نقول اااااااااااااااه بعلو صوتنا
بدل ما نصحى فى يوم نلقى البلد محروقة


وإلى كل الذين نسوا ذكرى 18 و 19 يناير 1977

إن أول الغيث مظاهرة


انتهى

بت خيخة وأى كلام

Tuesday, March 11, 2008

معنديش برستيج


كنت قاعدة على الشباك

قاعدة الفارس اللى راكب حصانه
كنت بنفضه
ونص جسمى برة والنص التانى جوة
بنضف بقى
ووقت التنضيف الواحد بيكون مندمج اوى

المهم وانا بنضف الشباك
اذ فجأتن التليفون يرن
تررررن تررررن
انا: ده مين الرخم ابن الرخم اللى بيتصل دلوقتى
نفسى: عيب يا بت افرضى انها امك ولا حاجة
انا: وهى ماما ايه اللى هيخليها تتصل بيا دلوقتى بس
المهم نطيت من على الشباك

ورحت ناحية التليفون
وبصيت على النمرة لقيتها نمرة مروة صاحبتى
انا:ايوة يا رخمة
مروة: هههههههههههههههههههههه
ليه كدة بس يا ام لسان طويل
انا: علشان جبتينى من على الشباك وانا لسه مخلصتش تنضيفه
مروة: ايه ده هو انتى اللى بتنفضى بنفسك
انا: امال هاجيب امى تنضفلى
مروة: هههههههههههههههههههه
يا نونو مش قصدى
انا قصدى يعنى انتى معندكيش حد ينضفلك الشقة
انا: واجيب حد ينضفلى الشقة ليه مش الحمد الله لسة بصحتى
مروة: معقول يا نونو بتنضفى الشقة بنفسك بجد
انا بصوت مستغرب: ودى فيها ايه يا بت

هى حاجة ابيحة دلوقتى ان الواحد ينضف شقته بنفسه
مروة : هههههههههههههههههههههههههههههههههههههه
انا: بتضحكى على ايه يا هبلة
مروة: يا بت بلاش طولة لسان
اصل انا بجيب واحدة تنضفلى الشقة
انا : تييييييييييييييييييييييييت

لفظة اعتراض ابيحة صدرت منى بعفوية شديدة تليق مع الموقف
هو انتى علشان بتجيبى واحدة تنضفلك

يبقى انا كمان لازم اجيب واحدة تنضفلى
مروة: هههههههههههههههههههههههههههههههههه
يخرب عقلك انتى لسة لسانك متبرى منك

اكيد شريف مش موجود وعلشان كدة واخدة راحتك
انا: يا بت لخصى عايزة اخلص اللى ورايا

انتى متصلة ليه
مروة: بسأل عليكى
انا : سألت عليكى العافية

غورى بقى علشان عايزة اكمل تنضيف
مروة: لأ استنى هو انتى يعنى اللى عايزة تنضفى الشقة بنفسك

ولا جوزك هو اللى مش عايز يجبلك حد ينضفلك
انا بدأت اتخنق : انا اللى عايزة انضف الشقة بنفسى

لانها صغنونة ومحندقة
ومش مستاهلة انى اجيب حد يساعدنى
وجوزى بيتحايل عليا انه يجيب حد ينضفلى
علشان عايز راحتى وانا بقوله لأ
علشان انا وش فقر و غاوية تعب
ارتحتى يا مروة غورى بقى

مروة: بجد يا نونو
انا: هو ايه اللى بجد يا بت؟
مروة : ان انتى اللى مش عايزة حد ينضفلك الشقة
انا : اه ودى فيها ايه يعنى

مش الحمد الله لسة بصحتى
وبعرف اتحرك يبقى اجيب حد يساعدنى ليه
مروة : انا ما بقولش حد يساعدك

انا قصدى انك متعمليش حاجة خالص
وتجيبى حد هو اللى ينضفلك كل حاجة
انا : ليه برضه ؟ مش فاهمة وجهة نظرك ؟
بدل انا قادرة انى انضف شقتى بنفسى اجيب حد ليه ؟

مروة: يعنى نوع من انواع البرستيج
انا : برس ايه؟ تيييييييييييييييييييييييييييييييييييييييييييت

نفس لفظة الاعتراض الابيحة اللى اصدرتها فوق دى
برستيج ؟؟؟؟؟؟؟؟؟؟؟؟؟؟؟
هى دى كمان بقى فيها برستيج
جرى ايه يا ست مروة الله يرحم ايام زمان
لما كنت اجيلك بيت ابوكى الاقيكى رابطة شعرك انتى واخواتك
وماسكين المقشات وحتت التنضيف والممسحة
كان فين البرستيج ده وقتها

مروة : ههههههههههههههههههههههههههههههههههه
يا بت ارحمينى من طولة لسانك دى
وبعدين فيها ايه يعنى لما تجيبى حد ينضفلك

وانتى تقعدى تحطى رجل على رجل
وتقعدى تتأمرى وتشخطى وتنطرى
انا: كمان؟ يعنى مش بس عايزانى اجيب واحدة تنضفلى
انتى كمان عايزانى اطلع عليها عقدى النفسية
وأتأمر على اللى جابوها واذل اللى خلفوها
مروة:مش قصدى كدة

بس قصدى انك تعيشى شوية احساس انك هانم
ده انا فيه واحدة بتجيلى مرتين فى الاسبوع
وبتخانق مع جوزى علشان عايزاها تجيلى كل يوم
أو يشوفلى خدامة مقيمة علطول
اصل احساس حلو اوى انك تلاقى اللى يخدمك
انا : والله احساس احلى انى اقدر اخدم نفسى
مروة : انتى غريبة اوى
انا: ليه يعنى؟
مروة : الناس كلها بتتغير ونفسهم يعيشوا فى مستوى اعلى
اول مرة اشوف حد مش عايز يعيش مرتاح
انا: اولا مش علشان اعيش فى مستوى اعلى

يبقى لازم اجيب شغالة
وبعدين مين قالك انى تعبانة هو انا اشتكيتلك

مروة: انتى عارفة دى رحاب عندها واحدة قاعدة معاها علطول
وعايزة تجيب واحدة تانية
انا: يا حول الله يارب .... يابت وانا مالى برحاب

كل واحد حر فى حياته
مروة: لأ انا بس بقولك علشان تعرفى انك مش عايشة فى الدنيا
بقى جوزك يتحايل عليكى علشان تجيبى حد ينضفلك

و انتى اللى ترفضى والله انتى هبلة
ده انا هاموت علشان جوزى يوافق

اجيب واحدة مقيمة علطول وهو مش راضى
وعمالة اقوله اشمعنى رحاب عندها واحدة
ما هو بينى وبينك يا نونو

رحاب يعنى مش احسن منى
علشان يبقى عندها شغالة مقيمة
وانا الشغالة تجيلى يومين بس فى الاسبوع
انا: ولا انتى احسن منى علشان يجيلك شغالة مرتين فى الاسبوع
ومع ذلك انا مش بيجيلى شغالات خالص
مروة: هههههههههههههههه
انتى يا نونو حاجة شاذة
انتى فقرية يا حبيبتى
انا : طب والنبى يا مروة اقفلى بقى

علشان انتى خنقتنينى وانا ورايا تنضيف
مروة :هههههههههههه
طب هاشوفك قريب؟
انا : ربنا يسهل
مروة: سلام يا نونو وبوسيلى شريف
انا : سلام
وقفلت السكة وركبت تانى الحصان بتاعى
قصدى اتشعلقت على الشباك تانى
وبدأت امارس هوايتى فى التنضيف
وقعدت افكر فى كلام مروة
و اسأل نفسى
هى مروة اتغيرت ولا انا اللى فقرية بجد
وهوووووب وفردة الشبشب بتاعى

وقعت منى تحت فى الشارع
حطيت اسدالى عليا ولبست شبشب هانى

أو بمعنى اصح ركبت شبشب هانى
ونزلت اجيب فردة شبشبى
وبس خلاص
وكل الكلام اللى فوق ده نطلع منه بحاجة واحدة بس
الا وهى
اللى يجى ينضف الشباك يبقى يقلع الشبشب قبل التنضيف
انتهى
بت خيخة وأى كلام

Wednesday, March 05, 2008

يلا نعمل بؤجة


اللى جاب ملاية هو بس اللى هيدخل البلوج

واللى ماجابش يقف برة ويرفع ايده لفوق

معلش لو فيها رزالة منى

هاتوا كمان كيس زبالة او كيس كبير

يلا ورايا

كل واحد يجيب الملاية بتاعته

ويفرشها قدام الدولاب بتاعه

يلا افتحوا الدولاب وعيشوا بقى


امممممممممممممممم

اه انتوا اساسا مش عارفين هتعملوا ايه


كل واحد يبص على هدومه اللى فى الدولاب

حد فيكوا تخن والبنطلون ده بقى ضيق عليه

يرميه على الملاية

حد فيكم عمل دايت وبنطلوناته وسعت عليه

يرميها على الملاية

القميص ده الياقة بتاعته قربت تدوب

من كتر الاستعمال يرميه على الملاية

والجاكت اللى متعلق ده

وموجود فيه رقعة وعايزين توده للرفا بقالكم سنتين

هاتوا الجاكت وارموه على الملاية

والجيبات اللى ضاقت بعد الجواز

والخلفة واللذى منه ارموها على الملاية

اشتريتوا قميص جديد الشهر اللى فات

دوروا على قميص غيره وارموه على الملاية

الستات اللى عندها عيال كل واحدة فيكم

تعمل فرز لهدوم المحروس

والحاجة اللى صغرت عليه

وازعرت عليه ترميها على الملاية

جلاليب مش بتتلبس وزاحمين بيها الدولاب على الفاضى

هاتوها وارموها على الملاية

هدوم مدارس قديمة محطوطة فى الدولاب

ومالهاش لزمة ليكوا هاتوها وانتوا عارفين هترموها فين

ايييييون على الملاية برافو عليكم

خلاص عملتوا فرز لهدومكم

وانتوا يا ستات عملتوا فرز لهدومكم

وهدوم الرجالة وهدوم العيال

كويس اوى

يلا بقى بسك على الجزم

هاتوا كيس الزبالة او الكيس الكبير

ها حد فيكم اشترى جزمة جديدة

اللى اشترى جزمة جديدة

يدور على اى جزمة قديمة عنده ويطلعها

خصوصا لو كانت نفس لون الجزمة الجديدة

عندكم جزم ضيقة عليكم أو واسعة

الجزم الضيقة مش هتوسع

وبتلبسوها وبتعملوكم فئافيئ فى رجليكم من ورا

يبقى لزمتها ايه

مستخسرين فيها الفلوس اللى اتدفعت

ومصممين انكم تلبسوها برضه

مافيش الكلام ده

يلا هاتوا الجزم الضيقة لانها مش هتوسع

ولا انتوا رجليكم هتصغر

والجزم الواسعة مش هتصغر

ولا انتوا رجليكم هتكبر

خلاص نموكم وقف عند هذا الحد

خلاص خلصتوا

برافوا عليكم

ماتنسوش تفتحوا درج الشرابات بتاعتكم

وتطلعوا الشربات المخرومة من عند الصباع الكبير

وتطلعوا الشربات السليمة بس عندكم من نفس اللون اكتر من شراب

وحطوا الشربات فى كيس بلاستيك صغنن

بعد ما تعملوها كور طبعا

علشان الشربات ماتهش عن بعضها

الملاية بقى اللى جواها الهدوم اربطوها بؤجة

وانزلوا بقى ودوا الحاجات دى لاقرب جمعية خيرية

وبس خلاص وجزاكم الله خيرا عما فعلتوه

اهم حاجة متنسوش تاخدوا الملاية تانى

بس خلاص

سلام

بت خيخة وأى كلام
ملحوظة هامة
ماتنسوش تخدوا كل يوم معلقة عسل اسود
وتتغذوا كويس علشان فاضل
اقل من شهر على تجمعنا للتبرع بالدم
ولا انتوا نسيتوا الموضوع ده؟

Tuesday, March 04, 2008

هاتوا ملاية


كل واحد فيكم يروح يجيب ملاية سرير

مالكم بتبصوا لبعض كدة ليه

ايوة بقولكوا ملاية سرير

لا حول ولا قوة الا بالله

مالكم بتضحكوا اوى كدة ليه

ماتتحركوا وتقوموا تجيبوا الملاية خلى الليلة تعدى

يادى المصيبة شوف قاعدين ازى؟

ماتتحركوا ماتفضلوش قاعدين زى خيبتها كدة

يالهوى عليكم

ايه مستنينى اجى لحد كل واحد فيكم واجيب انا الملاية بنفسى

ماتتحرك منك له ليها

انا هاروح اعمل بى بى وارجع تكونوا جبتوا الملاية
ادينى جيت
يعنى مالقيتش حد اتحرك من مكانه

ياخرابى عليكم

انتوا لسة عمالين تضحكوا وماجبتوش الملاية

طب ودينى ما انا مكملة البوست الا لما تجيبوا الملاية بس بقى ها


سلام

بت خيخة وأى كلام

Monday, March 03, 2008

الكورة اجواااان


نابليون بونابرت ساب الانجليز والمماليك

وقعد يمضى على شوية اطباق؟

وانا اقول اتهزم فى ابو قير ليييييييييه؟

مشهد لعادل امام فى مسرحية الواد سيد الشغال

هو ده كل اللى جه فى دماغى

اول ما سمعت الخبر ده على قناة الجزيرة الرياضية

الرئيس المصرى حسنى مبارك

اصدر قرار بتمكين اللاعب عصام الحضرى بالاحتراف فى سويسرا

صحيح يا جدعان الكورة دى اجوااااان

لعبتها صح يا حضرى

ولا تعليق
بت خيخة وأى كلام

Sunday, March 02, 2008

ورينى كدة خدت ايه؟


قبل ما اتجوز

كنت كتير اوى اسمع عن اغتصاب البنات الصغنونة

مرة اسمع عن واحد خطف بنت واغتصبها

او بنت المدرس بتاعها اغتصابها

وابشع جريمة سمعت عنها ان اب يغتصب بنته


المهم انى اتجوزت ودعيت ربنا من كل قلبى
انه لو رزقنى بعيال يكونوا ولاد

علشان بس الدور اللى ماشى فى البلد ده مايصبش ابنى

والحمد الله ربنا استجاب لدعائى

قوووووم ايييييه؟

قوم الاقيلكم بعد ماخلفت شريف علطول

الاقى مدرس بيتحرش جنسيا باطفال الحضانة

والاطفال دول من الذكور

نعممممممممممممم

ذكور؟؟؟؟

احنا هنهرج بقى

مش الدور ده كان ماشى على البنات بس

هما غيروا ليه

انا بقى قلقت من جوايا وجالى اكتئاب

وبعدين الاكتئاب مشى لما قررت

انى ادخل ابنى حضانة اسلامية

قلت خلاص مافيش غير كدة هو ده الحل

قووووووووم ايييييه؟

قوم سمعت خبر بيقولك ان مدرس قرأن

فى مدرسة ازهرية فى اسوان

اغتصب طفل عنده سبع سنين

تيييييييييييييييت
دى لفظة اعتراض حذفت من الرقابة

قوم ايه تانى

قوم انا جالى اكتئاب تانى اشد من الاكتئاب اللى قبليه

وقعدت اعيط بقى ومناخير تبربر

المهم قلت انا اهم حاجة عندى ان المدرسة

اللى ابنى هيدخلها يكون كل اللى فيها مدرسات ستات

قووووووووووووووم ايييييييييييه؟

قوم قريت مشكلة فى جرنان الاخبار
من كام شهر كدة فى باب اريد حلا

ان اب اغتصب ابنه

تييييييييييييييييييييييييييييييييييييييييييييت

دى لفظة احتجاج طويلة شوية

يا نهار مالهوش ملامح

اب اغتصب ابنه؟؟؟؟؟؟؟؟؟؟؟؟؟؟

طب دى لما اكتئب فيها الحل بتاعها ايه؟

اطلب الطلاق من هانى يعنى علشان خايفة على الواد

ولا اعمل ايه

يا نهار مش فايت ايه اللى انا بقوله ده

انا ازاى اخاف على شريف من هانى

يا نهار مالهوش ملامح بجد

هو انا خلاص اتعقدت بجد ولا ايه

ايه اللى انا بهببه ده

هو انا مالى كدة عمالة اراقب تصرفات هانى مع شريف
انا اتهبلت ولا ايه؟

وصل بيا الهبل والغباء

انى اشك فى هانى

الله بقى

طب ما الست اللى ابنها اغتصب من ابوه دى

ماهى اكيد ما كنتش تصدق ابدا

ان جوزها ابو ابنها هو اللى يعرض ابنه لموقف زى ده

ايه بقى ؟؟؟؟؟؟

هو انا مش هاعرف اعيش مرتاحة يومين على بعض

هو انا هافضل قلقانة على طول كدة

ايوة باينلها كدة يا بت خيخة

خلاص مافيش اطمئنان ولا راحة بال هتيجى بعد كدة خالص

ايوة خلاص هاحط عينى على شريف دايما

خلاص الرعب بقى ملينى على الاخر

خلاص بقى تفكيرى كله ازاى احمى ابنى من غدر الدنيا

هو خلاص كدة بقى مافيش امان للدرجادى ؟

يعنى خلاص المفروض ان اقرب الناس للعيل

ممكن يكون عدو ليه ومحدش واخد باله

مش عايزة حد يقولى سلمى امرك لله

انا الحمد الله مسلمة امرى لله و بعمل اللى عليا

وخلاص قمت بتحذير شريف

وتم تحفيظه ان محدش يلمسه فى مناطق من جسمه

بس غصب عنى مرعوبة

غصب عنى خايفة عليه

غصب عنى اعصابى بتنهار
لما بسمع اى حكاية اغتصاب جديدة

غصب عنى يا جماعة مش قادرة ما اخافش عليه

غصب عنى معنديش نفس انى اخلف تانى

واتعب قلبى تانى من الرعب على حد تانى

يكفينى رعب واحد على انسان واحد

لا قلبى ولا اعصابى مستحملين رعب جديد على انسان جديد

محدش يجى يقولى هتخاوى المحروس امتى

لان للاسف فيه ناس فى بلدنا سرقوا منى الامان

سرقوا منى امنية ان يكون عندى عيال كتير

سرقوا منى راحة البال

ويا خوفى يا خوفى يا خوفى من يوم هيجى

الام بدل ما تفتح شنطة ابنها وتقوله ورينى خدت ايه

هتلاقوها بتقلعه البنطلون وبتقوله ورينى كدة خدت ايه؟


انتهى

بت خيخة مرعوبة وأى كلام
تحديث مهم جدا
لما ذكرت خوفى على شريف من هانى
ده كان مجازا يعنى
لزوم كتابة البوست
لكن طبعا مش حقيقة
لحسن تفهمونى غلط
وتصدقوا فعلا انى بشك فى هانى
اه والنبى صحصحوا معايا كدة
ومتاخدوش كل كلمة هاكتبها على صدركوا

Sunday, February 24, 2008

طنط أم هانى


لأ مش حماتى

طنط أم هانى اللى هاحكى عنها النهاردة

دى كانت جارة ماما

طنط ام هانى بكريتها اسمها غادة

بس جرى العرف ان الست تلقب باسم اول ولد خلفته

حتى ولو كان بعد عشرين بنت

طنط ام هانى وجوزها عمو حسين زقوت فلسطنيين

ولادهم كانوا صحابى انا واخواتى

غادة الكبيرة كانت شبه ليلى مراد

وهانى ده كان فى سنى

وسها كانت اصغر منى بسنتين تقريبا

ورامى كان اد اختى الصغيرة

ومحمد ده كان اخر العنقود

طنط ام هانى وماما كانوا جيران

زى اللى بنسمع عنهم فى الحواديت

وبنشوفهم فى التلفزيون

كانوا دايما كويسين مع بعض

مش فاكرة ان حصل بينهم اى خلاف

افتكر مرة الانبوبة عندهم فضيت

قبل الغاز ما يركب

طنط ام هانى راحت عند ماما

وكملت باقى الطبيخ على البوتجاز بتاعنا

افتكر ان طنط ام هانى مرة بعتتلنا

كسكسى على الطريقة الفلسطينية

وده بيبقى عبارة عن كسكسى

وعليه حمص الشام ومليان لحمة

افتكر مرة ضيوف جم لطنط ام هانى

وماكنوش موجودين فى البيت

بابا وماما استضافوهم عندنا

وباتوا معانا ليلة لانهم كانوا جايين من سفر

وساعتها كانت طنط ام هانى هى واسرتها مسافرين

فاكرة ايام اجازة الصيف

كنت انا وغادة وسها نجيب كراسى صغيرة

ونجيب عرايسنا ولعبة المطبخ بتاعتنا

ونقعد قدام باب الشقة ونلعب سوا

فاكرة ايام الدراسة لما كنت باروح عندهم

علشان اذاكر مع هانى

او هانى يجيلنا علشان ماما

تذاكرلنا انا وهو درس علوم

فاكرة لما كنا كلنا

بنلعب سوا فى مدخل العمارة

فاكرة لما كنا نستنى سوا باص المدرسة

كانت مدرستى قصاد مدرستهم

وكان باصات مدارسنا بتيجى تقريبا فى وقت واحد

الساعة سبعة وربع

فاكرة لما كانوا بيجوا اعياد ميلادنا

واحنا بنروح اعياد ميلادهم

فاكرة ناهض ابن عمهم

كان اكبر مننا كلنا وكان شاب حليوة

وكنت بحب اوى اروح عندهم وناهض ده موجود

واقعد اتفرج عليه زى نجوم السينما

فاكرة لغتهم

بيقولوا على جدهم سيدى وعلى جدتهم ستى

افتكر مرة لما كانت غادة وسها عندنا فى البيت

بنلعب سوا

وكان عندنا برتقال قلتلهم افصصلكم برتقال

قعدوا يضحكوا اوى

قلتلهم فيه ايه؟

قالولى اصل احنا عندنا فى فلسطين افصص دى

معناها يعنى يعمل ريحة وحشة

فاكرة ان جه يوم من حوالى خمستاشر سنة

لقينا شقة طنط ام هانى وعمو حسين زقوت مقفولة

ومحدش موجود

فاكرة لما مر اكتر من شهر على الشقة

وهى لسة مقفولة

فاكرة عم جمال البواب الله يرحمه

لما قاللنا دول رجعوا فلسطين

أأأأأأأأأأأأأأأأأأأأأأأأأه

وحشونى أوى

قلبى متوغوش عليهم

نفسى اطمن عليهم

أنا ماليش فى السياسة

لكن فلسطين بالنسبالى

هى طنط ام هانى


انتهى

بت خيخة وأى كلام

Monday, February 18, 2008

أغلى الناس



حط راسه على المخدة وعينه مفنجلة
شوية وعينه قفلت وفتحت تانى
بس مافتحتش اوى بقت نص مفتوحة
شوية وقفلت تانى وفتحت فى تثاقل
قفلت تانى وفتحت فى تثاقل اشد
قفلت تانى ومافتحتش
بوسته ف جبينه
وف شعره وف كفوف ايده
قربت من ودنه وقلتله
شريف انا بحبك اوى
حرك راسه موافقة على اللى بقوله
قلتله انت بتحبنى؟
حرك راسه تانى
سألته تانى انت بتحبنى؟
قالى بصوت واطى جدا
يوووه يا مامى ايوة بحبك
انا عايز انام بقى
بوسته تانى فى خدوده
قربت من ودانه وقلتله
ربنا بيحبك
وانت كمان بتحب ربنا
ولازم تسمع كلامه
وكل الناس بتحبك وانت بتحب كل الناس
ولما تكبر هتحترمهم كلهم
علشان هما كمان يحترموك
ولما تكبر شوية هتساعد الناس
شيكو انت سامعنى
هز راسه
قلتله انا بحبك اوى
بصوت واطى جدا قاللى
وانا كمان بحبك اوى يا مامى
بوسته تانى فى خده
مد بقه وضم شفايفه علشان عايز يبوسنى
حطيت خدى عند بقه وخدت البوسة
مسكت المصحف
وقربت من ودنه وقريت
بسم الله الرحمن الرحيم
طه @ ما أنزلنا عليك القرأن لتشقى
إلا تذكرة لمن يخشى@ تنزيلا ممن خلق الأرض والسموات العلى@
صدق الله العظيم
خلاااااااص شريف راح فى النوم
بوسته تانى فى خده


انتهى

بت خيخة وأى كلام

users online