Sunday, January 27, 2008

عفوا السيارة فى التليين والسائقة ايضا




يوم الخميس اللى فات وانا نازلة من اكتوبر رايحة البندر


قصدى رايحة الهرم


قاعدة جنب هانى فى العربية


وشريف قاعد على الكنبة اللى ورا


وانا قاعدة وببص من الشباك رميت كلمة لهانى


انا : هانى مش هتخلينى اسوق شوية


هانى : صمت رهيب


ولقيت العربية بتركن على جنب وهانى فتح الباب ونزل


انا : ايه يا هانى فيه ايه ؟


هانى : مش بتقولى عايزة تسوقى يلا سوقى شوية


انا فى عقل بالى: ايه الثقة اللى مش فى محلها دى بقى؟


انا : بجد هتخلينى اسوق ؟


هانى : ايوة يلا روحى


انا رحت رايحة قاعدة مكان هانى وهانى قعد مكانى


انا : هو يا هانى الكرسى ماله نازل تحت اوى كدة ليه


هانى : هبقى اظبطهولك بعد كدة على مقاسك


انا بعد ماسوقت شوية وكله تمام التمام: ها ايه رايك


هانى: حلو بس انتى مش ناوية تجيبى التانى


انا : ليه ماتخلينا على الاول كفاية


هانى: لا انتى كدة هتحرقيلى الموتور


انا فى عقل بالى: ايوة اتلككلى بقى


انا : اصل يا بابى انا لسة مخضوضة


هانى بثقة اوى : لا عادى ماتخافيش ويلا هاتى التانى


انا سبت الدركسيون وببص جنبى على اليمين


هانى فى رعب : بتعملى ايه يانورا


انا : بادور على الفتيس مش شايفاه فى الضلمة


هانى كتر خيره ولعلى لمبة العربية وفضل ماسك الدركسيون


انا بعد ماجبت التانى: ها ايه رايك


هانى: حلو بس فيه حاجة مهمة جدا متسبيش الدركسيون


ومتبصيش جنبك لازم تبقى حافظة علطول ازاى هتغيرى السرعات


انا فى عقل بالى: ايوة ابتدينا النرفزة بقى والتلاكيك


انا : اصل يابابى ماكنتش شايفة فين الفتيس


هانى ضامم شافيفه : افففففففففف


ده بينفخ


هانى: هاتى التالت بقى


انا فى عقل بالى تانى :هو ماله واثق فيا اوى كدة ليه


هو عايز يحرجنى يعنى


انا بعد ماغيرت الفتيس : هو ده التالت؟


هانى: لا ده كدة الخامس


انا : طب هات انت التالت بقى علشان انا هابص على الطريق


هانى : ماقلش حاجة بس حرك راسه يمين وشمال وتقريبا نفخ


بعد شوية انا شوفت مطب من على بعد خمسين متر تقريبا


انا : هانى فيه مطب


هانى: اوك دوسى فرامل


انا فى عقل بالى : فرامل ؟ فرامل ؟ ازاى يعنى فرامل


هانى: دوسى فرامل دوسى فرامل يا نورا نورا دوسى فرامل


والا خيخة تجدر الا تجدددددر الا تجدددددددددددددددددر


وهوووووووووووووووب


طاخ ديش ان طخ


وصوت فرملة قويةده مش انا ده هانى هو اللى شد الهاند بريك


بعد العربية ماوقفت


هانى عينه اتحولت من اللون الاخضر الى اللون الاحمر يعنى استوت وقربت تقع


هانى بصوت متغاظ: انا مش بقولك دوسى فرامل


انا : صمت رهيييييب


هانى بصوت متغاظ اكتر: مادوستيش فرامل ليه؟


انا بصوت سرسعة بحاول ادلع عليه علشان امتص غضبه : اصل انت يا بابى


ماقلتليش ادوس فرامل جامد ولا براحة


هانى: تدوسى فرامل يعنى تخلى العربية تهدى


جامد براحة مش هتفرق بس تخلى العربية تهدى


انا: اصل انا خفت ادوس فرامل جامد اقوم اخد المطب


هانى بغيظ: هو انتى كدة مخدتيش المطب


انا فى استهبال شديد جدا : ايه ده هو انا كدة خدت المطب ؟


هانى : صمت رهيييييييييب


تقريبا اتشل


انا بصوت مسرسع زيادة عن اللزوم : انت زعلان منى يا بابى


هانى: مش زعلان بس انتى لسه قدامك كتير


انا: ماهو علشان كدة انت لازم تنزل معايا كل يوم علشان اسوق العربية


علشان المدرب بتاعى قاللى لازم يكون فيه ممارسة على عربيتك


هانى: ان شاء الله


بعد حوالى عشر دقايق


انا : هانى متخلينى اسوق تانى


هانى: صمت رهييييييييب




وبس خلاص


بت خيخة سواقة كدة وأى كلام




32 comments:

KHALIFA said...

هييييييييييييييييييييييييييييه ..أول تعليق ..هقرأ وابقى ارجعلك

KHALIFA said...

يا خرابي.....انا لو من ا_هاني ده ..كنتتتتتتتتتتتتت.............
بس يالللا
على العموم واحدة واحده وهتتعلمي بالراحة... انا على فكره بسوق ن وانا في الاعدادي ودلوقتي والحمد لله تمام ومعايا رخصتين كمان عربية وموتوسيكل ..شفتي بقى ..انا عارف الحريم وقرفهم في التعليم ..خصوصاً ان رجليهم تقيلة قوي وممكن تحرق الموتور بجد

ربنا يعينك يا عم هاني.........ااااميــــــــــــــــــــــن

KHALIFA said...

بصي على فكره بقى....عارفه هما بيبقوا متضايقين ليه وهما بيعلموكم ..؟
عشان عارفين انكم بعد ماتتعلموا هتقرفوهم (عايزين عربية عايزين عربية.....)

بصي لما تتعلمي بقى

قولي لمستر هاني بقى يجيبلك عربية هيدروماتيك مش مانيوال ...اهي بتبقى أسهل في السواقة قوي

على فكرة (أنا بهدي النفوس وربنا عالم)

ابن حـجـر الـعـسـقـلانـى said...

يا خرابى يا خيخة .. أنا مت من الضحك

"هو دة التالت ؟ لأ دة الخامس" .. دى ضحكتنى مووووووووت

صاحب المضيفة said...

كالعادة


تميز في العرض

وقوة في الاداء

لا تعليق بعد ذلك

دمت بخير

موجة said...

الف سلامة
خبطتيها
شاطرة
خالص تحياتي
وهو اللي قثاعد ورا ده ما عملش اي دور في الحوار ده
ههههههههه
احمد

ghalia said...

هههههههههههههههههههه
والله يا خيخة أنا بحسد هانى على هدوؤء أعصابو
لما تيجى تسوقى المرة الجاية ابقى سيبى شيكو فى البيت
حرام عليكى الواد
ويا ستى بسيطة
تعيشى وتاخدى غيرها
:p

آخر العنقود said...

مش بقولك انتى ماحصلتيش
بس والله كتر خيره الراجل عمل بأصله معاكى
أصل انا شوفت الحالات اللى زيه دى
بتكون عاملة ازاى فى المواقف بتاعت السواقة دى
بصراحة هيه شدة اعصاب مفيش بعد كده
ع العموم حمد الله على السلامة
وواضح انها كانت مغامرة لذيذة
بس لو بتحبى شريف صحيح
ابق خليه فى البيت مع الماما بتاعك
حراااااااااااااااااااااام عليكى الواد

فكرتينى بواحد علم مراته السواقة وبيقول لواحد صاحبه فرد عليه وقاله ابقى خليها تاخد مراتى معاها بس من غير العيال..هههههههههه
:)
ربنا يوفقك وواحدة واحدة
هتيجى ان شاء الله

nonoymm said...

بصي ربنا يستر لحسن لو خالد شاف البوست دة مش هيعلمني السواقة بتاتا
اصلنا جبنا العربية وعمالة اقوله علمني عشان اودي الواد المدرسة الصبح واجيبلي عربية ب3 الاف جنيه كدة اوديه واجيبه واروح السوق واريحك
بيقولي هعلمك بس انا عمري ما سوقت قبل كدة فيا ترى هعرف طب انتي مشيتي بيها طب انا لا افقه شيء
اتعلم ولا اصرف نظر واجيب حركنش بالفلوس احسن

ايه رايك؟؟؟؟
اول زيارة لي بمدونتك وشكلي هداوم لانها فعلا عسولة ودمها خفيف ومحترمة
الى الامام دائما ومنتظرة بوستك الجديد

خمسة فضفضة said...

السلام عليكم ورحمة الله وبركاته

ههههههههههه

احمدي ربنا بقي انه ماتهورش عليكي اكتر من كده

معلش تعيشي وتاخدي ...قصدي وتسوقي غيرها
ههههههههه

ماقلتلناش يانونا شريف كان محله ايه من الاعراب في المشهد ده ، اكيد اترعب من الخضه

الحمد لله ربنا ستر

Ahmed Al-Sabbagh said...

التعليق :


صمت رهييييييييب

Ahmed Al-Sabbagh said...

المشكلة بقى مش فيكى ولا فى السواقة

المشكلة فى الغلابة المشاة


اللى هيشوفو المر معاكى

بس ابقى قوليلى اول ما تبقى تسوقى

عشان اتلم فى بيتنا كام يوم

احسن حظى المنيل يوقعنى فى سكتك

ده انتى ما تعرفيش يعنى ايه فرامل

عاااااااااااااااا

بنوته مصرية said...

ههههههههههههههههههههههه

موتيني من الضحك وخصوصا متخيلة سرسعتك الدلع ابقي وريهالي لما اكلمك
هههههههههههههههه

انا بقي باخد العربية بلوي الدراع يعني مثلا يقولي تعالي نروح لي ماما علشان تشوف البنت
اقوله هتخليني اسوق

كدا يعني هههههههههههه

متقلقيش يا نورا هتسوقي حلو انتي بس في الاول لسه كلنا كنا كدا

الله يكون في عون العربية ههههههههه

صوت من مصر said...

مع انى بكره السواقه ومبعرفش اسوق بس بامانه الله يكون فى عون هانى ؟
لازم تتقنى فن المهاره فى السرعه ابقى اتفرجى عليه وانا سايق الاعجله وطاير بيها

صوت من مصر said...

مع انى بكره السواقه ومبعرفش اسوق بس بامانه الله يكون فى عون هانى ؟
لازم تتقنى فن المهاره فى السرعه ابقى اتفرجى عليه وانا سايق الاعجله وطاير بيها

الطائر الحزين said...

وانا كمان مش بعرف اسوق

بس اللى اعرفة ان توجيهات الراكب جنب السائق خصوصا لو كان بيعرف يسوق بتلخفنه

من نوع
حاسب اوعى المطب فرامل فى عربية نقل على اليمين
القطر هايدوسنا
احنا متنا

الله يرحمنا

تحياتى

الشنكوتي الكبير said...

لنل الله يا اخ هاني

بس تستاهل بقى هي تقولك خليني اسوق تقوم تسيبها تسوق كده
بضهر ايدك وعلى وشها قلم من بتوع الخدامين تسكتها خالص
قال تسوق قال

نعم
هه
بتقولي ايه
من عنيا يا روحي عن اذنك يا خيخه غاده عايزه تتعلم سواقه

-------------
ابويا لما بيلاقي واحده ست سايقه حتى لو بعيد عننا بيتغاظ قوي ويقولك مبيعرفوش يسوقوا جايين يقرفونا ليه
وبحس انه عايز يحدفهم بحاجه
بس بصراحه انا بعذره فعلا انتوا في السواقه بتشلوا
وانا ابويا خلقه ضيق قوي

ربنا يستر ومتقابليهوش في الطريق

سلاااااااااااااااام

appy said...

دا انتى مصيبه والله لو انا اللى قاعده جنبك كنت لزقتك فى الزجاج بتاع العربيه ايه يا امى انتى عاوزة خريطه داخل العربيه ولا انتى تسوقى وحد يفرم لكى وحد تالت ينقل ايه ده ما انتم اللى جبتونا وراء وخليتوا الرجاله تقول بلا ستات بلا نيله فى السواقه حرام عليكى اعمل فيكى ايه يالا هسيبكك علشان خاطر شيرى او اكسب فيكى ثواب واعلم على بطوط عربيتى فى مكان واسع مش ناقصه خبطات فى العربيه وعموما بصى نصيحه حبى السواقه قوى وانت هتتعلميها بسرعه وجمدى قلبك وحسى بالعربيه زيها زى الراجل فهمتى

Doba said...

دوسى فرامل
دوسى فرامل

ازاى مش عارة فين الفرامل

فوق جنب الكلكس
كنتى دوسى عالزمارة هيقوم المطب يلاقيكى انتى اللى بتسوقى يجيله فزعة ويجرى من قدامك

وسايبه العربية ماشية وبتدورى تحت عالفتيس - ياعينى يا شريف يا حبيبى تلاقيه اتلزق فى سقف العربية

نونو نونو
بشويش
حبة حبة

مش طالعة عالخامس مرة واحدة
ربنا يستر

بس عموما احنا اتطمنا ان هانى مش هيكررها وانه اخد قرار بانه ميعبرشى الاولاد الصغيرين فى طلباتهم وانك آخرك شيكولاتة

سلام يا مفجوعة
هبة

حاااااااااااااااااسب
تش

أنا إنسان said...

حملة...أخلاقنا...إسلامنا

إيمانا منا بأن حال العالم ...لم ولن ينصلح... إلا بالاسلام
وإيمانا منا بأن اسلامنا...لم ولن ينصلح ...إلا باأخلاق
اتفقنا...أو وفق الله بيننا ...لتكوين أول حملة للأخلاق...لتحقيقها...والسمو بها...والعمل بها بإذن الله

..............

من نحن
مجموعة من الشباب ...أهمهم حال أمتنا...وعروبتنا...وأوطاننا
فوفق الله بينناعلى الإجتماع على هذه الحملة...ولنطلقها حتى تصل إلى عنان السماء...علها تشفع لنا يوم القيامة
وبإذن الله ... سوف نعلن في البوست القادم عن المدونات والمواقع التي تدعم هذه الحملة
ومن أراد المشاركة...فعليه أن يكتب اسم مدونته أو موقعه...أو حتي إيميله في خانة التعليق...وسنتابعكم بالصور والمقالات القادمة بإذن الله
والله تعالى هو ولي ذلك ومولاه
.............................
مجموعة أخلاقنا البريدية
وقد تم بحمد الله إنشاء مجموعة أخلاقنا إسلامنا البريدية على
yahoo groups
وسننشر بها ان شاء الله ما يتم انزاله من مقالات وفعاليات الحملة
وللاشتراك في الحملة...اضغط على الرابط التالي
http://groups.yahoo.com/group/akhlakona/
أو
مدونة أنا إنسان
http://ana-insan.blogspot.com/
...........................
وقد تم نشر أول مقالة عن الخلق الأول

عابد الرحمن said...

الحمد لله ان العربية معلهاش اقساط
بس نفسي افهم هو هاني سابك تسوقي بثقة حب ولا عايز يخلص
هههههههههههههه
بجد كلامك جميل اوي ويا رب يا رب تتعلمي السواقة عشان ترحمي الغلبان اللي معاكي

أبوشنب said...

ولا يهمك

يعني هتتعلمي فين لو ما اتعلمتيش في جوزك

emos said...

ya lahwek ya 7'e7'a
fada7tena:))))))
ana law menek mat3alemsh aslan
ana kont hamoot w at3alem bs begad el sewa2a deh 7aga te2ref
7'aleeh howa yeso2lek a7san

teta bet2olly (7ekmet el zawkat el kademat) 2ew3y tet3alemy el sewa2aaaaaaaa hay7'aleky te3mely kol el mashaweer w hayo3od ye2anta7' fe bethom 7'aleeh sha3'al 3andek sawaa2 aho lamma te7eby tero7o meshwar shaml el 2osra yetlam
wana masme3tesh kalam teta
w 2ady 2a7'rety kol shewaya 7adsa w tahzee2 men baba w 2a7'oya w 7'ateby welly 2et7'abat fel 7adsa

حل وسط said...

مش كل من ركب الحصان خيال

ولا كل من ركب العربية سواق

ولا يهمك

بكرة تبقي احسن سواقة في الدنيا

ونقوللك انت اشتغلي ايييييييييييييييه؟

MAKSOFA said...

دمك زي العسل يخرب عقلك
وبعدين أزاي تسوقي وأنت موش عارفه أن فيه نقل بصراحه هاني ده راخر مفضي دماغه

وبعدين عايزة أعرف نزلتي من أكتوبر علي نادي الرمايه ،

أصل الدوار اللي هناك ده مالوش حل لازم تقري عديه ياسين وأنت داخله فيه علشان تعرفي تطلعي منه

بت خيخة وأى كلام said...

ناسف على التاخير
وحشتووووووووووونى


خليفة
لو كنت من هانى كنت عملت ايه يعنى
ده المفروض كنت تخاف على نفسك
انا تقريبا يوميها جبتله شلل رباعى
وبعدين والله يا خليفة انا مابقولهوش هاتلى عربية هو اللى قاللى لما ربنا يكرمنا ويبقى معانا فلوس كتير هيجبلى عربية اتوماتيك
وانا طبعا ماعترضتش عايز يجيب براحته خاااالص
انا ماطلبتش منه حاجة
وواضح جدا طبعا مجهودك فى تهدية النفوس
تحياتى يا خليفة
وسلامى لكل الاسرة



ابن حجر العسقلانى
كدة يا ابو العساقيل تضحك على اختك
ده بدل ماتوقف معايا وقفة تضامن
منورنى يا عسقول


صاحب المضيفة
بعض ماعندكم
شكرا ليك



موجة
اللى كان قاعد ورا ده
قعد يقولى
مامى براحة يا مامى ابقى دوسى فرامل علشان منطش تانى كدة
بصراحة هو كان متفهم اوى
تحياتى ليك



غالية
لا من ناحية ان هانى اعصابه هادية
فهى اعصابه هادية جدااااااااا
لدرجة انى ساعات انا اللى بتشل من هدوء اعصابه
بس الحمد الله الموضوع خلص على خير وماكنش فى اى خسائر فى الارواح
تحياتى يا غالية


اخر العنقود
الفكرة انى كنت رايحة عند ماما
علشان كدة شريف كان معايا
ههههههههههههههه
حلوة النكتة
تحياتى يا نانا


نونويم
خالد مين؟
المهم لا طبعا اتعلمى
ما هو انا خلاص رحت كورس السواقة واتعلمت
بس الفكرة ان كورسات السواقة مش بتخليكى سواقة ماهرة
ده لازم ممارسة باستمرار على العربية اللى هتسوقيها بعد كدة اللى هى غالبا بتكون عربية جوزك
علشان كدة روحى اتعلمى مبادئ السواقة
وبعد كدة لازم تاخدى العربية من جوزك
كل يوم تقربا وتسوقى انتى شوية وتروحى بيها مشاوير قريبة وتكون الشوارع مش زحمة اوى
ولما جوزك يلاقيكى متمكنة تروحى بقى تطلعى رخصة وتسوقى لوحدك
هو الموضوع بس محتاج ممارسة وقلب جامد
وربنا معاكى
تحياتى ليكى ومنورانى


خمسة فضفضة
والله شريف كان راجل ووقف وقفة رجالة
يعنى الواد بعد ماراح يمين وشمال وقدام وورا
وقف وقالى مامى براحة يا مامى
ابقى دوسى فرامل علشان منطش تانى كدة
تحياتى ليكى يا فضفضة


احمد الصباغ
لا والله اعرف يعنى ايه فرامل
بس المشكلة ان هانى بيوترنى
يقعد يقولى دوسى فرامل دوسى فرامل
بلهجة متوترة ولهجة أمرة بعض الشئ
يجعل فرائصى ترتعد فلا ادرى اين هى الفرامل او بمعنى ادق لا افهم مايقوله
وجلست افكر وافكر مامعنى كلمة دوسى فرامل
اللى هو عمال يكررها دى
وبس خلاص
هو لو كان قالهالى بمنهى الهدوء
انا كنت هادوس فرامل بكرامتى
بس هو اللى وترنى
تحياتى ليك
الا صحيح حلوة فرائصى ترتعد دى ؟



بنوتة مصرية
ايه يا رودى
بتتضحكى ليه
انتى عايزة تفهمينى انك لما تعملى حاجة غلط مش بتسرسعى فى صوتك
دى حاجة معروفة من ايام ستنا حوا
دى حاجة تقريبا كل الستات بتعملها لزوم الهروب من الموقف
ولا انتى ليكى طريقة تانية
عايزين نبقى نعرفها
وحشتينى يا بت
بوسيلى نور كتييييير



صوت من مصر
سايق العجلة وطاير بيها ؟
ماشاء الله
عقبال ماكون فى نص مهارتك
هههههههههههههههههههه
اهلا بيك


الطائر الحزين
ايوة صح
اخيرا لقيت حد فاهمنى
هو ده اللى حصل بالظبط ان توجيهات هانى وترتنى
شكرا يا طائرى الحزين
هييييييييه
لقيت واحد مقدر موقفى
هيييييه
ابقى تعالى كل يوم
وهاشوفك بربع جنيه
تحياتى ليك



الشنكوتى الكبير
هههههههههههههههههه
ههههههههههههههههههههه
هههههههههههههههههههه
لنا الله يا اخ هانى
ههههههههههههههههههههه
فطستنى يا ايهاب من الضحك

بس صحيح انتوا بتتخنقوا ليه مننا واحنا بنسوق
طب اقولك على حاجة
فى اليوم ده بعد ماخلاص مسكنا شارع الهرم واحنا فى نصه كدة
كان فيه عربية قدامنا عملت حركة غلط انا طبعا معرفتش ايه هى الحركة الغلط ولكن لان هانى متمرس فى السواقة عرف ان فيه حركة غلط
لقيت هانى راح قايلى اراهنك على عشرة جنيه ان العربية دى اللى سايقاها واحدة ست
قلتله ليه يعنى قاللى اصل الغلطة اللى عملتها غلطة متصدرش الا من واحدة ست
قلتله ماشى اراهنك
وطلعت فعلا واحدة ست
قلتله انت عرفت ازاى
قالى اصلها عملت غلطة خنيئة مووووووت
وهما الستات كدة غلطاتهم دايما خنيئة بتبقى بتخلى الواحد عايز ينزل يلبسها فى الدركسيون
طبعا انا تعليقى كان
الصمت الرهييييييييييييب
تحياتى ليك



appy
يا واد انت يا متمكن
واضح انك سواقة بريمو يا بت يا ابى
وحااااضر هاعمل العربية زى ما عامل الراجل بالظبط
ده انتوا هتشوفوا ايام سودا
تحياتى ليكى



دوبا
ليه كدة يا هبهوبة
يابنتى بقولك سرسعت فى صوتى
يعنى هيدينى العربية تانى
هى سرسعة الصوت دى شوية
ده استلزم منى مجهود جبار
وبعدين مش تنبهينى ان الفرامل فوق عند الكلاكس
امال هانى بس عمال يقولى انها تحت ليه
شوفتى اهه عايز يعلمنى غلط
بيتلككلى بسلامته
تحياتى ليكى وبوسيلى يوسف كتيييير



انا انسان
منورنى


عابد الرحمن
لا والله العربية لسه عليها تلات سنين اقساط
امال هو هانى كان هيتشل من شوية
وميرسى على زيارتك
ويارب فعلا بقى اتعلم بسرعة علشان ارحمهم كلهم معايا
هانى وشريف واللى ماشيين فى الشارع
دول غلابة برضه
تحياتى ليك



ابو شنب
ايوة صح
روح قول الكلام ده لهانى
منورنى



emos
فكرتينى بعادل امام
لما قال فى المسرحية
ثم مات المخرج
والمؤلف والممثل
وعندما عرض هذا الفيلم مات المشاهدون جميعا
ايه يا بنتى
ده انتى ماسبتيش حد الا لما هزئك
هههههههههههههههههههههه
بس متخليش حد يأثر عليكى
سوقى تانى
وجمدى قلبك
اما بالنسبة لكلام تيتا
انا ممكن متعلمش السواقة لو واثقة اوى انى لو عايزة حاجةهانى هايجبهالى
الفكرة انى لو عايزة اشترى حاجة وهانى مثللا بيتفرج على ماتش برضه مش هينزل ويجبهالى وهياجل اى شراء طلبات ليوم تانى
علشان كدة انا قلت اخدها من قصيرها واتعلم انا واخليه يحرم يبدى الماتش عليا
تحياتى ليكى يا ايموس


حل وسط
اهلا اهلا اهلا
منورانى
فينك
انتى اشتغلى ايييييييييييه؟
الرد:صمت رهيييييييييب
تحياتى ليكى ومنورانى

مكسوفة
لأ طبعا اناماسوقتش لحد الهرم
ده هو شوية كدة مافيش خمس دقايق وكنت لسة داخل اكتوبر
هانى مش مجنون علشان يخلينى اسوق لحد الهرم
المهم انتى منورانى


شكرا ليكم كلكم على تواصلكم معايا
اختكم خيخة

nada_adly said...

وحشتيني يا نانو اوي

ههههههههههههههههههههههههههه ايه يا بنتي الاحتراف الجامد اوي ده

بس على فكرة انا لو منك لا أيئس ابدا واستمر في المحاولات لتعليم السواقة

بس ابعدي عن عربية جوزك الله يكرمك ويبارك لك يارب

ههههههههههههههههه

- واحلى حاجة انك عبرتي ووصفتي وقلتي انا قلت بصوت (مسرسع ) يعني انتي من رأيك ان الصوت المسرسع طريقة لاظهار الضعف الانثوي في المواقف اللي بيحصل فيها دمار شامل للتأثير على الرجل ؟ هههههههههههههه

لاء بجد فعلا عطتيني امل في الحياة لاني ان شاء الله ناويه اول ما ارجع مصر بالسلامة اني اتعلم السواقة ان شاء الله ان شاء الله وبدون مقاطعة باذن الله

- على فكرة ان شاء الله انا مش ناسيه البوست اللي عوزاني اكتيه ان شاء الله هاكتبه ...وربنا يسهل ان شاء الله بس زي ما قلت لك انا بافكر وباحضر فكرة وطريقة كتابته

- بمناسبة البوست اللي فات بتاعك ..انا شفته وقريته بس ما اقدرتش ارد ...احساس الانسان بانه عاجز ومش قادر يعمل حاجة ...احساس فعلا قهري جدا جدا جدا واحساس مؤلم جدا بدرجة عالية ...كل اللي املكه الدعاء ويارب يتقبل الدعاء مني ومن جميع المسلمين يارب


تقديري ليكي فعلا من القلب كانسانة صاحبة فكر وقلم رائع بجد

- عارفة من كتر حبي لمدونتك حطيت رابط ليها عندي في المدونة وخليتها في المفضلة عندي ...لانها فعلا مفضلة جدا جدا عندي ...ربنا يكرمك يارب يا نانو

بت خيخة وأى كلام said...

ندى عدلى
والله وحشتينى
فينك بقالك فترة مختفية
منورانى جدا
وميرسى على كلامك الحلو
وكويس انك خدتى بالك من حكاية الصوت المسرسع دى
وان شاء الله لما تنزلى مصر تتعلمى انتى كمان السواقة
علشان نورى الرجالة العين الحمرا
وفعلا انا خدت بالى انك عملتيلى لينك عندك فى مدونتك شكرا ليكى جدا يا ندى
ويلا روحى اختاريلك موضوع اكتب عنه المرة الجاية
تحياتى ليكى
اختك خيخة

Ahmed Al-Sabbagh said...

فرائصى ترتعد ؟؟

انتى شكلك بتقرى كتب يا بت اليومين دول والله

انتى بتجيبى الكلام ده منين

واحنا بنوديكو المدارس عشان تيجو تقولولنا الكلام ده

ناقص تقولى ان الأرض قروية ؟؟

(وبعدين اهمدى شوية بقى لله)

أحسن تدوسى حد بالعربية

:)

مهندس مصري said...

السواقة يا ستي كورس 10 ساعات يخليكي أستاذة
أنا بأتعلمها دلوقت بس بعد ما اخدت 7 ساعات مش عارف أضبط مواعيدي مع جاري اللي بيعلمني
علشان آخد ال 3 ساعات الباقيين و اهم حاجة فيهم الحصة الأخيرة بتاعة وسط البلد وسط الزحمة و الخنقة
بس انا الحمد لله كل اللي شافوني بأسوق قالوا عليا شاطر بس ما عنديش عربية
خايف أنسى السواقة بعد ما أتعلمها

ربنا يكون في عون هاني ما انتي اللي عملتيه ده مش شوية
بس محدش يتعلم سواقة بالليل
فعلاً لا حتبقي عارفة الفتيس و لا الفرامل و لا شايفة حاجة

د/اجدع بنوته said...

ياربىىىىىىىىىىى

هتشلى الراجل ياشيخه

وبعد ده كله تقوليله بابىىىىىى

بس عادى .. كله ف الاول كده

ولا لسه لما تركنى لوحدك بقى

ولا تعرفى المرشدير ولا تعرفى تكسرى عجل

ولا تعرفى تحطى منطق حتى

شدى حيلك

وفعلا السواق ممارسه .. ونصيحه بلاش م الاول تطلعى طلعات كده

خليكى ف طريق هادى .. لفيلك كام لفه حوالين بيتكم

استفضى شارع وفحرى فيه

مش تروحى تتعلمى ع الدائرى

فكرتينى بموقف زى كده

اول ماتعلمت .. وجه واحد معدى .. بابا بيقولى دوسى فرامل

روحت دايسه بنزينننننننننننننن

هههههههههههههههههههههههههه

وبرده بكل برائه

هو الفرامل اللى كان ع اليمين

ال يمين ال

ههههههههههههههههههه

وع طول اول محاجه تزنق عليا او اتوتر

اشيلى رجلى م ع الدبريياش هههههههههه

وع بركة الله

والقادم اجمل

وخدى بالك م نفسك

وخفى ع هانى

سلاماتى

A long distance said...

هي العربيه كان نوعها ايه صحيح
وبعدين متعرفيش تسوقي
متسوقيش
ولا عاوزه تودي نفسك في داهيه يا خيخه
شكلك خيخه في كله
هههههههه

users online