Tuesday, February 05, 2008

الحب هو


الحب ده معانى كتييييير اوى
واحاسيس منعرفش نوصفها
الحب يعنى بجد تسمع دقات قلبك وهى بتدق جامد اوى
اول ما تحس ان الحبيب فى المكان ده او انك تلمحه من بعيد
الحب انك تحس إن فيه حاجة بتاكل فى بطنك
وفى قفصك الصدرى لما تشوف الحبيب مع حد تانى غيرك
الحب هو ابتسامة حلوة بتطلع منك للحبيب او من الحبيب ليك
الحب اغنية مشتركة بتسمعوها سوا ولو حد سمعها لوحده يفتكر نصه التانى
الحب فسحة فى مركب فى وسط النيل
الحب اهتمامات مشتركة بتستمتعوا بيها سوا
او كتاب بتقروه وبتتنقشوا فيه
الحب اغنية عاجباكم كلماتها او اللحن بتاعها
او حتى ممثل دمه تقيل على قلبكم انتوا الاتنين
الحب ممكن يكون فى كيلو طماطم اشتريتوه سوا وانتو مروحين بيتكم مع بعض
ممكن يكون فى كوبيتين عصير قصب وبتضحكوا على بعض
لما عصير القصب يعمل بالفوم بتاعه شنب ابيض على وشوشكم
الحب ممكن يكون حضن صغنن وانتو بتتفرجوا على فيلم السهرة سوا
ممكن يكون نكتة قلتوها لبعضكم قبل ما تروحوا تعملوا واجب عزا لحد من المعارف
وتبقوا وسط معمعة عياط الناس التانية
ماسكين نفسكم بالعافية من الضحك
واول ماتقابلوا بعض بعد العزا مايخلص تقوموا تنفجروا من الضحك
الحب ممكن يكون فى فنجان قهوة معمول بروقان لحبيب القلب
الحب ممكن يكون فى تلات شربات بعشرة جنيه من التحرير
حبيبتك جابتهملك وهى نازلة تقضى مصلحة فى وسط البلد
ممكن يكون فى ايشارب بسبعة جنيه انت اشترتهولها من جنب الراجل بتاع الشربات
الحب ممكن يكون فى شريط كيتوفان الحبيب جابهولك
علشان عارف انك عندك صداع مدمر
الحب ممكن يكون فى شكولاتاية صغنونة
انت جبتهلها علشان هى بتحب الشكولاتة
الحب ممكن يكون حلم مشترك
بشراء ستارة جديدة للصالون
الحب ممكن يكون فى معلقتين رز زيادة فى طبق حبيبك علشان عارفة انه تعبان طول النهار
الحب هو انك رغم مشاغلك الكتيييير اوى بتتصل بحبيبتك الساعة اتناشر الضهر
وتقولها متنسيش تاخدى الانتبيوتك بتاعك
الحب انك لو صحيت بليل من النوم علشان عايز تعمل بى بى
تبقى تشئر على حبيبك وتشوفه ياترى متغطى كويس ولا لأ
الحب انكم تتسابقوا مع بعض مين هيختم المصحف الاول فى شهر رمضان
الحب ممكن يكون كدة
وانتى واقفة فى المطبخ بتغسلى المواعين
هاااااااانىىىىىىى
ايوة يا مامى
انا بحبك
الحب ممكن يكون كدة
وانت رايح تشرب مية من التلاجة
نورا
ايوة يا بابى
هو انا قلتلك انى بحبك؟
الحب ممكن يكون كدة
مامى انا بحبك انتى وبابى اد النملة الكبيرة والنملة الصغنونة
الحب ياجماعة مش بس انكم تحبوا بعض
الحب انكم تزرعوا حب فى قلوب اللى حواليكم كمان
بس خلاص
بت خيخة وأى كلام

42 comments:

appy said...

ايه ده هو انا فين
عارفه يا نوران الحب هو ايه كمان لما تبرمجى نفسك وسعادتك على مود اللى قدامك وتتنازلى عن حاجت كتير بتعمليها فى حياتك علشانه وتعمليها بطيب خاطر وانتى مبسوطه علشان هتلاقى ابتسامته على وشه وهو شايفك غيرتى نفسك علشانه

لماضة said...

خلاص يا حماتي كده
الدمعه هتفر من عينى
الحب هو انك تشوف كل شىء جميل وتخلى الى حواليك يشوفوه معاك ويشاركوك جماله
مش هقدر افيدك قوى فى الرومانسيه دلوقتى
للكن اقدر اقولك ان كلمه بحبك بيني وبين صحبتى بدوب الجليد
وبينى وبين اهلى
بدوب قلوبهم
بس خلاص
مرات ابنك

فضفضاتى said...

نورا
الحب احساس غريب جدا بيجمع كل التناقضات
خوف على اللى بتحبه وأمان بتحسه وهو موجود معاك
كراهيه لأى حاجه بيتضايق منها حبيبك
انانيه فى انك تكونى بس اللى فى قلبه وعطاء فى مشاعرك ليه
ظلام حالك لما بيكون بعيد ونور ينور الكووووون كله لما تحسى انك شايفاه ولو من بعيد
برد قاسى فى عز الصيف لو بعيد عن حضنك ودفا أوى لما يبقى فى حضنك فى عز البرد
الحضن يا بنورتى
الحب ده جميل جدا
ربنا يجمع كل اتنين بيحبوا بعض مع بعض

والسلام ختام
أخوكى
آسر الشاملى

maii bahaa said...

أنا مش لاقية حاجة أكتبها بجد

كل اللي أقدر أقولهولك
إنك حقيقية أوي
وبسيطة وعشان كدة عرفتي تعملي التركيبة القريبة من القلب دي

باعيط
باضحك
سرحت
ياللا أمشي أنا بأه
فوتك بعافية

آخر العنقود said...

وبعدين بقى ياخيخة
انتى خيخة ولا مش خيخة
اللى انتى بتقوليه دى مش ممكن يكون الحب
ده اكيد هوه ده

الحب فعلا هوه ان الواحد يحاول يعمل كل اللى يسعد التانى
هوه انك تظهرى بانك سعيدة ومرحة وقوية ..بس..عشان تسعدى اللى قدامك
حتى لو جواكى حاجات تانية
هوه انك تكونى مبسوطة.. بس.. لما تحسى انك شاركتى فى سعادة اللى حواليك حتى لو على حساب نفسك
لمجرد احساسك بان ده هيرضيهم

يااااااااا الموضوع كبييييييييييير ياخيخة
بس فعلا انا بكون فى قمة سعادتى بمجرد انى احس انى سبب ولو بسيط فى سعادة اللى حواليا

احساس اكثر من رائع بجد
تحياتى ليك يا أم شريف

Soooo said...

مش هقول غير جملتين

الله عليكي
وربنا يخلي حياتك كلها حب وافراح





سلامووووووووز

KHALIFA said...

لا لا لا لا بجد بوست جميل ..... رغم اني ممكن اخمن مين اللي قاللك بس خلاص...ان الله حليم ستار

الحب معانيه جميله قوي عندك يا خيخة رغم ني بتكسف وانا بعلق لاني زي ماقولتلك قبل كده لسه ماوقعتش في الغلط


واحب اقوللك كمان كنت لسه مع ابومالك من يومين والنهارده برضو وقاللي ان تعليقك عنده في الموضوع ده من اجمل واحسن التعليقات
(بس متقوليلهوش اني قولتلك كده)

انا مش هزود في الكلام بقى ...سلام

nada_adly said...

يا نانو النهارده البوست بتاعك ده ياخد امتياز مع مرتبة الشرف

بجد ما فيش اروع ولا اجمل من نعمة الحب

لانها نعمة من ربنا

ربنا يسعدك يارب يا نانو

وربنا يكرمك على كلامك الاكثر من جميل ورائع

تقبلي حبي واحترامي وتحياتي ليكي يا اعز مدوناتيه انا قريت لها

أنونيمس said...

كلام رائع وجميل

كل الكلام الحلو ده شئ من الحب أو
بعض من الحب وليس هو "كل" الحب

as.zaid said...

السلام عليكم
طبعا ده اول تعليق ليا عندك
بس مش أول زيارة
وبيعجبنى اسلوبك فى بساطته
وخصوصا حواراتك الجامدة مع شريف
وبقول الحال من بعضه
:)
على فكرة البوست ده جميل
وانتى اتكلمتى عنه بكل بساطة
ربنا يكرمك يارب
ويخليلك شريف
سلام

KHALIFA said...

يا سلام رقم 10 عندك في التعليق تبع العائلة الكريمة برضو

يا ريت بقى تستمر شوية البوستات اللي انتي قولتيلنا عليها عشان انتي شوقتينا وخلاص
سلام

بت خيخة وأى كلام said...

appy
اضافة حلوة جدا
اهم حاجة ان الحب كمان اخد وعطا
ماينفعش ادى بس ومالقيش تجاوب من الطرف التانى
شكرا ليكى يا ابى


لماضة
مش بس الكلمة يا لماضة لازم كمان شوية افعال صغنونة كدة علشان تأكدى معنى الحب
شكرا ليكى


فضفضاتى
ايوة كدة ورونى الهمة كل اللى عنده اى اضافة جديدة للحب يقولها على طول خلى الناس تعرف تحب بعضها
ربنا يسعدك يا اسر ياااارب
تحياتى ليك


مى بهاء
بدال ضحكتى وعيطتى وسرحتى
اقدر اقول انك بتحبى يا مى
تحياتى ليكى



اخر العنقود
انا الاتنين يا فندم
من ستة لتسعة خيخة
خيخة من ستة لتسعة
واحساسك انتى اللى اروع يا نانا
تحياتى ليكى


سوووو
الله عليك انت يا ابو قلب ابيض زى الفل
تحياتى ليك


خليفة
ماتخافش مش هاقول لابومالك انك قلتلى حاجة
سرك فى بيييييييير
تحياتى ليك


ندى عدلى
اخجلتم تواضعنا يا فندم
شكرا ليكى يا ندى
وفين يا بنتى البوستات اللى قلتلك عليها


انونيمس
اكيد مش كل الحب
انا بتكلم من وجهة نظرى انا
لو عندك جديد ياريت تضيفه
شكرا ليك


as.zaid
لولولولولولولولوى
ايه النور ده
عائلة ابو زيد الكريمة زادت فرد
انا وراكم لحد ماجيب رجليكم عندى هنا واحد ورا التانى
وعلى ما اعتقد ان اسمك اسماء اخت امانى
صح ولا انا غلطانة
شكرا على حضورك عندى ومشرفانى والله
وربنا يكرمك انتى وعيلتك الكريمة كلهم
شكرا ليكى



خليفة
يارب دايما كدة عيلة ابو زيد كلها تبقى منورانى
ومتقلقش يا خليفة البوستات اللى قلتلكم عليها قادمة لا محالة
اصبروا على رزقكم
تحياتى ليك



شكرا ليكم كلكم على تواصلكم معايا
اختكم خيخة

shayma said...

الله
ياسلاااااااااام عليكى بجد
دخلتينى فى مود جمييييييييييييل

انتى بجد صح جدا وكلامك صح جدا جدا
الله عليكى وعلى المود الى دخلتينى فيه

:)))))))))))))))
سلامى يا قمر

فرنسا هانم said...

انا قريت تعليقك ده
وعجبنى كلامك جدا عن الحب
وانهارده عجبتنى التدوينه اكتر من التعليق
تفتكرى هقعد اتغزل فيكى كده كتير ؟
جدعه يا خيخه
وربنا يبسطك كمان وكمان علشان نشوف المواهب

ابن حـجـر الـعـسـقـلانـى said...

الله ينور عليكى يا خيخة ... الله ينور بجد

آخر العنقود said...

كلاكيت تانى مرة
انا جاية ارد على سؤالك عندك عشان لو مارجعتيش عندى تانى
بصى يانوناية تصرفك مع شريف صح طبعا
وما اقدرش اقولك عليه اى حاجة
عين العقل انك ما تعلقيش معاه على حاجة معينة
عشان زى ماقولتى ما يلحظش ده ويبدأيسأل كتير عنها بما انها حاجة مش ولا بد زى مابتقولى

بس اهم حاجة بعد اللى انتى عملتيه ده انك تبلغى المدرسة بتاعته
وتعرفيها اسم الولد اللى شريف عرف منه ده عشان تبدأهي تلاحظ الولد ومدى تأثيره على شريف واصحابه
واحب الفت نظرك ياخوخة لحاجة مهمة اوى انتى فعلا واضح انك عملتيها وبحيكى عليها
وهيه انك نقدى السلوك اللى شريف قام بيه وما نقدتيش شريف نفسه
طبعا لو ماكنتيش واخدة بالك ياريت تتبعى ده معاه
انه لما يعمل اى سلوك انتى مش راضية عنه تحاولى تعرفيه ان السلوك هوه اللى وحش مش هوه اللى وحش
مش عارفة الفكرة وصلتلك ولا لا
لان الموضوع محتاج امثلة للتوضيح
وانا حاسة انى رغيت وطولت
بس بجد اوعى تقولى انك دوشتيى دى تانى
يافندم احنا فى الخدمة
وربنا يخليهولك يارب
وبحييكى على ملاحظتك المستمرة له ولتصرفاته
ولاى استفسار اتصل على الرقم المجانى
0000000
:)

آخر العنقود said...

معلش بس ياخوخة
حبيت اقولك ان لو فى اى حاجة مش واضحة ياريت تعرفينى وانا اوضحهالك بجد

سلام يانونا

بت خيخة وأى كلام said...

شيماء
اهلا بيكى
والحمد الله انى عرفت ادخلك فى مود حلو
تحياتى ليكى


فرنستى الجميلة
انتى الاجدع يا فرنستى
كفاية البوست بتاعك اللى ادمع اعيننا كلنا
تحياتى ليكى



ابن حجر العسقلانى
الله ينور عليك انت يا عسقول
تحياتى ليك


اخر العنقود
امانى روحى يا شيخة الله يطمنك
انا فعلا فهمت قصدك
يعنى مثلا شريف مرة عمل بى بى على نفسه انا قلتله انا زعلانة يا شريف علشان انت عملت بى بى على نفسك
قاللى انتى زعلانة منى يا مامى يعنى انا وحش
قلتله لأ انا مش زعلانة منك انت انا زعلانة علشان عملت بى بى على نفسك
متهيالى انا كدة اديتلك مثل باللى انتى عايزة تقوليه مش كدة
ولا انتى تقصدى حاجة تانية برضه
عموما شكرا ليكى يا امانى ومتحرمش منك


شكرا ليكم كلكم على تواصلكم معايا
اختكم خيخة

Anonymous said...

بوست جميل يا خيخة
لخصتي الحب ببساة في معاني جميلة ممكن تكون قدام الواحد ومش شا يفها
ام عمار

Anonymous said...

نسيت اقولك اني تبع عيلة ابوزيد
بس اول مرة ادخل على مدونتك

بت خيخة وأى كلام said...

ام عمار
لو تشوفى البسمة اللى على وشى وانا بقرا كلمة من عيلة ابو زيد هتفتكرى ان ربنا خلق وشى كله سنان بس
بجد بجد بجد
انا سعيدة جدا
ده شرف كبير ليا ولمدونتى المتواضعة ان افراد عائلة ابو زيد الكريمة يزيدوا فرد يكون بيقرالى ومش بس كدة
وكمان بيتعب نفسه ويسيب تعليق
ربنا يكرمك يارب يا ام عمار
ويكرم عائلة ابو زيد كلهم
شكرا ليكم
وسلامى لكل الافراد اللى انا لسة ماتشرفتش بمعرفتهم
شكرا ليكى
اختك خيخة

mado80 said...

الله الله الله الله عليكي بجد

ومش هاكتب أكتر من كده

لأني معنديش حاجه أقولها

تحياتي ليكي وألف تقدير لشخصك الكريم

Ahmed Mubarak said...

يا سلام يا خلتوا
على فكرة أنا شايف الحب في حاجة غريبه اوي
يوم متكون متخانق وقلبك محروق عايز تكلموة ومش عارف

يمكن غريبه بس انا معترف بيها
تحياتي يا خالتوا
سلااااااااام

بت خيخة وأى كلام said...

مادو 80
ميرسى اوى ليك
ربنا يخليك



احمد مبارك
خلتو من غير الف الجمع اللى فى الاخر
يا واد انت هتشلنى معاك قريب بسبب كتابتك الغلط دى
وبعدين حلوة اضافتك لتعريف الحب
انا كمان معترفة بيها
تحياتى ليك


شكرا ليكم كلكم
اختكم خيخة

Ahmed Al-Sabbagh said...

الصديقة الخيخة
نورااا


تسلم ايدك بوست جميل

بس انا حاسس ان لونك فى الكتابة متغير شوية

من ايام بوست الحريم

وبعدين بوست الرجالة

والنصايح

والحب

وايه هو الحب

والحاجات دى اللى احنا مش متعودين عليها

فين ايام بح

والحاجات دى
--------

يعنى ايه كلمة حب ؟

يعنى واحد كان عايش حياته وحيد

كدة على جنب ..

لا عمل خطيئة ف يوم ولا حب ولا شال ذنب

ويجى عليه اليوم اللى يلاقى جوة القلب كمان قلب

يقومو يدقو سوا مع بعض

--------

تحياتى

خالو احمد التوكتكاوى

مصطفى said...
This comment has been removed by the author.
مصطفى said...

الكلام ده كله حلو ماشي بس ده مش كل حاجة
الحب ده حاجه انسانية راقيةينتج عنها الخير والعمار..... بين البني آدمين مالهاش حدود ضيقةومادية

لا يهم التعريفات كتير الأهم اننا نظهر العمار الناتج عن الحب ده وننميه
وللا ايه؟
على فكرة انا متابع جديد لمدونة حضرتك
تقبليني ؟؟؟!!!!

صوت من مصر said...

عارفه يا خيخه غريبه انك تتكلمى عن الحب بعد البوست بتاع الاسهال
لكن للحب اماكن متعدده ومنها كافتريا الجامعه

A long distance said...

بقى كل الحب ده يطلع منك يا خيخه
هههههههههه
بس انتي فعلا روعه
كلام حلو
فعلا
وبعيد عن التصنع والكلام الصعب ده
على فكره
انا اول مره ازور مدونتك
بس حاسس انها مش هتبقى الاخيره
ان شاء الله
mrgkiller2020

أبوشنب said...

الحب برضه

ولا واحدة من كل دول

دول الحبيبة يا خيخة

صدقيني

الحب ولا مؤاخذة

لما تاخد على قفاك جامد قوي

وعنيكي تبظ لبره

وتيكون نفسك تقولي كاموووون

ههههههههه

ربنا يديم عليكي السعادة

Soul.o0o.Whisper said...

السلام عليكم و رحمة الله

تحياتى لكى من كل قلبى على مدونتك التحفة دى

و ان شاء الله مش هتكون الاخيرة

بجد تعبيراتك و المواقف اللى قلتيها دى فوق الممتازة

بس مين الوقتى اللى بيعمل كدا ؟؟!!..

انا متأكدة ان فى ..بس النسبة اد ايه؟؟؟

ياللا ربنا يرزقنا بواحد كدا
ههههههههههههههههههه

تحياتى لكى و دمتى بخالص الود ،

صاحب المضيفة said...

تسلم الأيادي يا خيخة

كنت عاوز أقولك على نفس الطلب لكن سبحان الله سبقتني بها صاحبتك


نظرة واقعية وجميلة عن الحب بشكل عملي في حياتنا

وكمان تعليق appy في أول تعليق جميل قوي


تحياتي وسلامي للحاج شريف

Ali-7ob said...

اختى الصغننة
ازيك يا بت ياخيخة عاملة ايه
وايه المواضيع الجامدة دى حب وعواطف وام اسماعيل ....
لا بجد بوست جميل وبسيط ومعبر
ربنا يوفقك ويسعدك
على حب

الشنكوتي الكبير said...

بيقولك ايه بقى في الأمثال
الأفترا وحش
اه
يعني لما تبقى انت جامد وبتكتب حاجات تجنن احنا برده كنا بنكتب
اه صحيح انت جيت اكتسحت ماشي
بس متنساش
الدنيا دواره
وبكره زي ما بتكتبي تحف كده تلف الدنيا ونكتب حاجه حلوه زيك

-------------

بجد بجد تسلم ايدك
----------------


الحب ايه
مين قالك انك تقدر توصفه
او تكشفه
الحب حاجه صغننه في قلبنا
الحب زي طير عبيط
عمال يلقط في الزلط
كده بالغلط
فاكر هيكبر لما ياكله كل يوم
اتاريه بيوجع جوه منه قوي قوي
مع صغر حجمه
مع قصر طوله
مع ضعف ايده
لكن بحبه
عارفه زمان قالوا عليه
الحب ايه
عفريت صغنن
جوه قمقم اتحبس
تلعب ايدينا في المشاعر تفتحه
يخرج ويصبح مارد ابن الأيه قوام
يبدأ صغير في القلوب
وبعد ساعه او شهور
تلقى القلوب وياه تدوب
واللي جمالها غرها
واللي شجاعته غرته
يركع امامه وينحني
ويطاطي برده للهوى
اصله خلاص مبقاش صغير
المارد الخلبوص تحرر
وشمال يمين طاح في قلوب العاشقين
هنا كلمه تجرح
هنا نظره تدبح
هنا ايد تطبطب تفرحك

مش هاقول تاني كفايه كده
لحسن البنت غ وحشتني بقى

سلاااااااااااااااااااااااام

Doba said...

احلى ما فى البوست انى شايفة نظرة عينيكى وانتى بتكتبى الكلمات دى وانها بتلمع اد ايه بالحب والفرحة

كل لما تضيق بيكى الدنيا اقرى كلمات حب كتبتيها او زرعتيها مع اى حد هتلاقى نفسك دايبة فى الحب والسعادة

يارب دايما مبسوطة وسعيدة
ويارب دايما فى حالة حب ودفء

تحياتى وبوسة لشوريف افندى
هبة

مروة الزارع said...

كلامك حلو أى يا خيخة

.
.
.

بس على رأى المثل

حب أية اللى انت جاى تقول علية انت عارف قبلة كيلو اللحمة بكام جنية

!!!!!!


حاسة ان الحب خلاااااص بقى ناااااادررر جدااااا

هاني جابر said...

السلام عليكم ورحمة الله
اغيثوا غزة
شارك معنا في القافلة الرابعة لمساعدة إخواننا في غزة
من يريد المشاركة من المدونين عليه الاتصال برقم0105076750
اتحاد الأطباء العرب لجنة الإغاثة والطوارئ

بت خيخة وأى كلام said...

احمد الصباغ
ياااااااااااااااه
اخيرا ظهرت
بقالك كتير مطنشنى

يعنى ايه كلمة حب ؟
يعنى واحد كان عايش حياته وحيد
كدة على جنب ..
لا عمل خطيئة ف يوم ولا حب ولا شال ذنب
ويجى عليه اليوم اللى يلاقى جوة القلب كمان قلب
يقومو يدقو سوا مع بعض

حلو اوى يا احمد تعريفك للحب
تحياتى ليك ومتتاخرش عليا تانى


مصطفى
انا عارفة ان ده مش كل حاجة ولا ده كل الحب
دى مجرد وجهة نظرى البسيطة جدا عن الحب ولو فيه عند اى واحد اضافة ياريت يقولهالنا علشان كلنا نستفيد منها
وياسيدى انا متقبلاك متابع جديد لمدونتى بس انت ابقى تعالى بقى
تحياتى ليك


صوت من مصر
للحب اماكن متعددة؟؟؟؟؟؟؟
مش عارفة ليه دايما بحس ان الحب الحقيقى مالهوش مكان اصلا
يعنى عمرى ما حسيت ان الناس اللى بتقعد فى الكافتريات دول بيحبوا بعض بجد
والله اعلم
تحياتى ليك


a long distance
انا نفسى مستغربة ان كل الحب ده يطلع منى
بس زى ما قولت فى البوست يمكن لان حالتى النفسية كانت رائعة وانا بكتب البوست وعلشان كدة البوست طلع حلو وبسيط وعاجب الكل
تحياتى ليك وياريت تشرفنى دايما بالزيارة


ابو شنب
اقولك على حاجة
انا ساعات بحس ان الحب ده ليه وشين
يعنى وش حلو ومتفائل وجميل وده اللى انا كاتبة عنه
ووش تانى مليان لوع واهات وفراق وجفاء وبلاوى زرقة على رايك يعنى الوحد ياخد على قفاه ويقول كمااااان
بس بصراحة انا ماكنش ليا نفس اكتب عن الوش ده للحب
لان على ما اعتقد ان كل اللى حبوا جربوا الوش ده
تحياتى ليك يا ابو شنب


soul
مين دلوقتى بيعمل كدة؟؟؟؟؟؟؟؟؟؟
كتير اوى بيعملوا كدة
انا متاكدة ان كل اتنين متجوزين لو دوروا فى حياتهم على المواقف الصغيرة دى
هيلاقوا كتير
الحب مش بس كلام رومانسى وشايفة القمر يا ليلى
لا الحب ممكن فى كوباية مية بتقدميها لحبيبك بعد ما يخلص غدا
الحب ممكن جدا فى كيلو برتقان هو جابهولك وهو راجع من الشغل
وانا شايفة ان اغلب الناس بتعمل الحاجات الصغنونة دى
بس واضح انك مش متفائلة
او يمكن انا اللى متفائلة زيادة عن اللزوم
دورى حواليكى هتلاقى حب بس انتى دورى بذمة وبلاش تلاكيك
تحياتى ليكى وابقى تعالى دايما



صاحب المضيفة
انت بس عليك انك تحلم يا ابو مالك وهتلاقى احلامك متحققة عندى هنا فى البلوج
تحياتى ليك


على حب
اخويا الصغنن على
ازيك يا واد يا علوة
انت فين
خلصت امتحانات ولا لسة
ربنا يسعدك يارب
تحياتى ليك


الشنكوتى الكبير
لأ بقى يا شنكوتى انا كدة هاسيبلك البلوج بتاعى وتكتب انت البوستات
ماهو مش كل شوية تكتبلى تعليق يجنن واضطر اعمله بوست لوحده
ده حتى باقى المعلقين يفتكروا انى بأجرلك البلوج بتاعى
وبنشرلك فيه تعليقاتك وباخد منك نسبة
طب يعنى انا ارد على الكلام الحلو ده اقول ايه
بجد تسلم ايدك يا ايهاب
تحياتى ليك



دوبا
هبهوبتى
ايه ده هو انتى مرقبانى ولا ايه يا بت يا هبة
انا بعد كدة هاكتب البوست وانا قافلة الشاشة
ههههههههههههه
ويارب انتى كمان تكونى دايما مبسوطة وسعيدة
تحياتى ليكى وبوسيلى يوسف كتييييير



مروة الزارع
ميرو
لا مش نادر والله يا ميرو
بس انتى دورى فى الطريق الصح
تحياتى ليكى



هانى جابر
اشارك معاكم ازاى
اوك هاتصل علشان افهم اكتر


شكرا ليكم كلكم على تواصلكم معايا
اختكم خيخة

3ala asm masr said...

يا جامد انت يا رايق
والله بتعجبنى تعبيراتك وبوستاتك
ايه بس ده

3ala asm masr said...

شاركونا هنا
http://hnro2masr.blogspot.com/

Soul.o0o.Whisper said...

معلش يا خيخة والله كنت كاتبة تعليق طويل بس النت و عمايله بقى

المهم ..المختصر ان الناس مش بتعمل كدا و هيا حاسة ان دا رمز للحب
لا لان دا واجب و خلاص
لكن لو فعلا نعمله و جوانا الاحاسيس الحلوة دى الحياة هتبقى احلى كتير

و على فكرة انا متفائلة جدا و دايما ببص للنص المليان :)

تحياتى لكى و ننتقل للبوست الجديد

د/اجدع بنوته said...

الحبببببببببببببببب

الحببببببببببببببببببب

الحببببببببببببببببببببببب

الحب ياسوسين .. هو انك تسترخصى روحك مقابل روح اللى بتحبيه

كان معكم .. سمسمه

م امام مركز معلومات الحب

الجمهورى .. بالدقه ميدان الاسعاف

بوست معدىىىىىىىىىىىى

وابدعتى بجد .. تفوقت ع نفسك م الاخر

يمكن علشان عشتى الحب بجد

فعرفتى تتكلمى كده عنه

لكن انا اخر علاقتى بيه

انه كلمه مكونه م حرفين اولهم حاء واخرهم باء

ايه هى الكلمه

اللى اولها ب واخرها كاف
.
.
.
.
بوفتتيك مش محتاجه فكاكه يعنى

users online