Wednesday, February 06, 2008

وااااا عشرينتااااه



كان يوم جمعة من حوالى سبع سنين
ساعتها كنت انا وهانى متجوزين بس مع ايقاف التنفيذ
يعنى مكتوب كتابنا فقط
المهم يوم الجمعة ده يوم التجمع العائلى عند اهل هانى
كنت رايحة علشان اتغدا عندهم زى كل اسبوع
ركبت تاكسى من قدام بيتنا فى الهرم لحد بيت هانى فى السيدة
انا بقعد على الكنبة اللى ورا ناحية الكرسى اللى جنب السواق
واول ما بركب واقول السلام
بفضل ساكتة سكوت ابو الهول
واقعد ابص من الشباك على العربيات والناس والعمارات وهكذا
مش بتكلم الا لو السواق سألنى عن حاجة فى الطريق
المهم فضلت بصة من الشباك
بس وانا بصة من الشباك
وعينى ضاربة فى اليمين حاسة ان السواق بيعمل حاجة بإيده
بس طبعا مش عارفة بالظبط بيعمل ايه
لكن متاكدة ان ايده بتتحرك
المهم ماحطتش فى دماغى اوى
وقلت يا بت طنشى خااااااااااااالص
المهم وصلنا عند بيت هانى
والمشوار وقتها من بيت اهلى لبيت هانى
كان بيتكلف خمسة جنيه على اعلى تقدير يعنى ممكن ادفع اربعة جنيه
المهم ساعتها ماكنش معايا فكة
وكل اللى معايا عشرين جنيه
طلعتهم للسواق وبمد ايدى بالفلوس وباقول اتفضل
لقيت السواق بيقولى ايييييييييييه؟
لقيته بيقولى لأ مش عايز
انا استغربت من الكلمة أوى وحسيت ان انا ماسمعتش كويس
قلتله ايه؟
وعينى فيها كمية استغراب كتييييييييييرة
فلقيته بيقولى بصى
فانا افتكرته هيكمل كلامه
يعنى مثلا هيقول بصى انا مش معايا فكة
لكن بصى كدة ويسكت
خلتنى استغرب اوى
فقلتله ايه؟
قاللى بصى بصى
وايده اليمين بتعمل حركة كدة معناها انها بتحثنى انى ابص عليها
فأنا بسلامة نية جدااااااااا
بقوله ابص على ايه وفى نفس الوقت حركة ايده خلتنى ابص عليها
ويارتنى مابصيت
لقيت السواق ماسك البوبو بتاعه وبيحركه بإيده

اتارينى لما حسيت ان السواق بيعمل حاجة بايده
ساعتها كان بيفك سوستة البنطلون وبيقلع البنطلون والاندروير
المهم انا طبعا تنحت واتصدمت وتنحت تانى
وعنيا برقت وطلعت لبرة وبقى اتفتح على مصراعيه وتفكيرى اتشل
تخيلوا معايا المنظر
انا قاعدة ورا
وايدى اليمين ممدودة بالعشرين جنيه
وعنيا مبرقة
وبقى مفتوح
وكل ده وانا شبه متخشبة أو متجمدة
واعصابى مفكوكة ووشى احمررررررررررر
انا مش عارفة اتكلم
انا عايزة اديله فلوسه وامشى
عايزة اصرخ وصوتى مش طالع
عايزة اقفل بقى ومش عارفة
عايزة افتح الباب ومش قادرة
عايزة اعلق شنطتى على كتفى ومش عارفة
عايزة اخلى عينى مش مبرقة ومش قادرة
بس اللى حصل الاتى
سبت العشرين جنيه من ايدى
فتحت الباب معرفش ازاى
مسكت شنطتى وخرجت من التاكسى
ماقدرتش اقفل الباب ورايا
بعدى الشارع من غير ما بص يمين وشمال
وفيه منزل كوبرى اتوبيس نازل من على الكوبرى
عمال يزمر اوى انا مش سامعاه
ميكروباص جاى من الناحية التانية
بيزمر هو كمان
انا مش فاهمة بيزمروا ليه
انا وقفت فى مكانى
الاتوبيس عدى من ورايا والميكروباص عدى من قدامى
واتشتمت من الاتنين
انا لفيت راسى وبصيت على التاكسى
السواق كان شكله مشغول بحاجة
ااااااااااااااااااااه
ده كان بيلبس الاندر وير والبنطلون
علشان ينزل يقفل الباب اللى انا سبته مفتوح
انا بصيت قدامى تانى ودخلت عمارة هانى
بقى لسه مفتوح
عنيا لسة مبرقة
قلبى بيدق جامد
عندى احساس ان حد اغتصبنى
هانى ساكن فى اخر دور
مافيش اسانسير
انا باطلع السلالم جرى
تعبت اوى
بخبط على الجرس
مش فاكرة مين فاتحلى
ماسلمتش على حد
فيه ايه يا بنتى مالك
نورا مالك
مالك يا بنتى
هانى عايزاك جوة فى الاوضة
دخلنا الاوضة

واقعدت اعيط اعيط اعيط
هانى جابلى مية
قلتله اللى حصل
مش فاكرة قالى ايه خلانى اهدى
بس قالى وهو متنرفز
ماتركبيش تاكسيات لوحدك تاني
وانا بعد كدة هافوت عليكى يوم الجمعة اجيبك من البيت
فضلت اعيط تانى
قالى خلاص بقى اهدى
قلتله انا مش بعيط دلوقتى علشان اللى حصل
قالى امال بتعيطى ليه ؟
قلتله انا بعيط على العشرين جنيه

عااااااااااااااااااااااااااااااا

53 comments:

bo2loz said...

heeeeeeeeeeeee...ana awel 7d y3l2..

bosi..ana sh7`syan b7`af arkb taxi lw7di aw 7ata m3 omi..w 3ndi ar7m eni arkb mwaslat 3adya..7ata elmowaslat bt7`wfni tsd2i...yanhaar..ana bd3i rbna yhdena klna w y7fzna..w elmwkf s3b w rbna y3enk..w enti a3`la mn milliooon millioooon gneeh enti w kol nfs bshrya aw ka2n 7y.rbna y7fzna w rbna ystrha 3lina w m3ana

Sola said...

ya 7'osarah kan nefsy akkon awel comment 3andek ya noura:
im sorry for not visiting yu lately is just i was so bust and depressed a little bet
3arfa ya nora same situation happedn 2 me 2 years ago
ana sakna fe nasr city ad my sisiter also lives there but in diffrent area so i took taxi 2 go 2 my sisiter so the driver 2a3ad yebosely o ye2oly danty 7elwa awy ya ba7't elly hayetgawezek danty gesmek gesm mozah o kalam mn dah o ana b2olo mercy rabena ye7'alek gaya 2adfa3lo el 7esab la2eto metala3 el bolbolah o bey2oly mesh nefsek feha ana taba3a2 ana7t o haza2to o 2a3at bardo 2a3at io da7'alt el beet 3an my sisiter and i told her and i tol her husband o gozaha kan nazel yedraboh bas el 7ayawan dah kan meshy
bgad masr ba2et te2ref o mafesh 2a7'akla2 wala 2e7teram 7'alas
rabena ye3enko o enty ya nouran mamno3 ta7'dy taxy tany l wa7dek fahma wala la2
tyalla bvosely sherief o 2olelo 7'
altac betsalem 3alek o ba3atetlak masasah
hatlo masasah 3ala 7esab law sama7ty
salamoz

مثلية تبحث عن ذاتها said...

للأسف السفالة والانحرفات دي مبتخلصش مش عارفة امتى الناس دي هتتلم طبعا كلنا اتعرضنا لمثل هذه القذرات لكن معتقدش ان فينا حد ساب العشرين جنيه و نزل ههههه
بوست حلو

Ahmed Al-Sabbagh said...

اممممممممم

اممممممممم

اممممممممم

؟؟؟؟؟؟؟؟

A long distance said...

انسان سافل وقذر
كان المفروض تشتميه
ومتدلوش فلوس
وتمشي علطول
خلاص يا خيخه
حصل خير بقى
بلاش الدموع دي
المدونه غرقت

دكتور حر said...

طب والله انت رايقه

بس ايه ده كله

اجي اعلق الاقي كل بالانجليزي كده
والله وبقيتي دوليه يا خيخه

بس سواق نتن صحيح والله كنت خدت بعضك والفلوس ونزلت بس يلا بقى

ربنا يسهله ويهديه
والحمد لله على كده

KHALIFA said...

ياأم دماغ فاضية

والله العظيم انتي اصلاً .(هقول حاجة بقى)
يا انا كنت بسمع عن الحاجات ..بس ايه ده .. بقى الحال وصل في مصر للدرجة دي

مهو ده نتاج سياسة حكومتنا الغبية ..نسال الله الخلاص
وفعلاً كنت خدت الفلوس ومشيتي وتسيبك من السواق المعفن .. والحمد لله انك لحقتي تنزلي وكنت في مكان معماري
والصح فعلا ان اي بنت متركبش تاكسي لوحدها

الطائر الحزين said...

اذا الايمان ضاع فلا أمان
ولا دنيا لمن لم يحيى دينه

بس من رأيي ليس له لزوم نشر هذه التدوينة

تحياتى

صاحب المضيفة said...

ياسلام عليكي يا هانم

على ان الموقف بايخ ورزل

لكن ليكي حق تعيطي على العشرين جنيه فعلا


هانقول ايه على انعدام الأمانة والذوق من الناس


كان الله لنا جميعا

آخر العنقود said...

بجد
بجد
يعنى
لا صحيح

لالالالالالالالالالالالالالالالاتعليق

ده موقف لا تحسدى عليه

Omar... [ خروشات ] said...

.

كنت عايز اكتب تعليق كبير، بس للاسف الموضوع شائك شوية

لاحظت ان حصل لك اسبهلال و فصلتى

نصيحتى؟ متركبيش تاكسى تانى وانتى معاكى عشرين جنيه
...................


صباحك سكر مؤقتاً، حتى وصول شحنة العسل قريبا

اخوكى عمر،

Desert cat said...

م بقولك مجتمع ذكورى
كل واحد فاكر اى واحدة قدامه موزة ومن حقه يعمل اللى هو عايزه
مفيش اى معانى للذوق ولا الاخلاق
ولا بيفكروا ان اللى بيعمله فى بنات الناس هيترد له فى اغلى الناس عنده وتناسى كما تدين تدان
والله الاشكال دى كتير ربنا يخلصنا منهم على خير

موجة said...

اختي العزيزة
طبعا الموقف وارد حدوثه جدا واكيد موقف بايخ عارف انك ذهلتي لكن كان ممكن ببساطة تتمالكي نفسك و تاخدي العشرين جنيه بتاعتك و مش تديهاله و كمان تاخدي رقم العربية التاكسي وتعمليله محضر فحش في الطريق العام
دا الاتجاه القانوني
لكن مش عارف ليه رأيتي اهمية انك تكتبي موقف زي ده هو جارح وصادم كتير ومؤذي للمشاعر الانسانية كان ممكن تفاديه او التعبير عنه من غير ما تكتبي لفظة ز اللي قلتيه انه ماسك ........ ( حذف من الرقابة )
وجهة نظر ارجو انك تضعيها في مكانها الصحيح

خالص تحياتي
اخوكي
احمد

بت خيخة وأى كلام said...

بئلوظ
والله
يا بقلوظ
انا قعدت فترة ماركبش تاكسى خالص
بس بعد كدة بقى عادى رجعت تانى اركب تاكسى لوحدى اصل انا من النوع اللى مش بتعقد والحركات دى
ممكن اخدلى فترة كدة مش عايزة اركب تاكسيات
لكن بعد كدة عادى الحياة بتستمر
بس بينى وبينك انا بعشق عربية الستات بتاعة المترو
الواحد بيكون على راحته وعلى الاقل مش خايف ان حد يتحرش بيه اى نوع من التحرشات
تحياتى ليك



سولا
واحشتينى خالص جدا
مش عارفة ارد عليكى اقولك ايه
انتى حصل معاكى نفس الموقف يعنى اكيد حسيتى باللى انا حسيت بيه
ربنا على الظالم والمفترى وابن الحرام والقليل الادب


مثلية تبحث عن ذاتها
والله انا ماسبتش العشرين جنيه بارادتى
انا سبتها غصب عنى
ده نتيجة المفاصل السايبة اللى نتجت من صدمة الموقف



احمد الصباغ
امممممممممممم


a long distance
اشتم مين يا با
هو انا كان فيا نفس اشتم حد
بقولكم اتخشبت ساعتها
انا عندى مشكلة انا لما بتصدم تفكيرى بيتشل
معرفش اخد رد فعل سريع
ده الحمد الله انا انا نزلت من التاكسى
وبعدين بصراحة انا زعلت على العشرين جنيه اوى
دول كانوا اخر فلوس معايا
تحياتى ليك



دكتور حر
فلوس ايه اللى اخدها
هو انا كنت عارفة اتلم على بعضى
يلا حار ونار فى جتته
منه لله


خليفة
الحال بقى انيل من كدة
طب اقولك على حاجة انا اتعرضت للموقف ده مرتين تانين
بس بشكل غير مباشر
يعنى مش انا اللى كنت مقصودة
لكن والله مرة قبل ما اتجوز كنت واقفة فى البلكونة بتاعتنا
ولقيت راجل ماشى فاتح سوستة البنطلون ومبين المسائل بتاعته
وماشى فى الشارع كدة عادى
انا اللى غاظنى ان مافيش راجل هزئه
بقت الناس عمالة تبص عليه وعادى جدا زى ما يكون مش عامل حاجة غلط
ومرة تانية انا وواحدة صاحبتى ماشيين فى الشارع ولقينا على الناحية التانية راجل عامل نفس المنظر
وكان فيه بنت ماشية فى وشه
ومش واخدة بالها
احنا قعدنا نراقب الموقف
لقينا البنت لما خدت بالها اذبهلت ومشيت بعيد عنه
وبعد كدة ركنت على عربية مش قادرة تمشى
روحنلها انا وصاحبتى
بنقولها معلش
لقنيها بتبصلنا زى ما نكون ناجدة وجاتلها من السما
راحت انفجرت فى العياط
فضلنا ماشيين معاها شوية لحد ما وصلت عماراتها بالسلامة
يعنى كان فيه فنرة كدة الظاهرة دى كانت منتشرة اوى ساعتها
بصراحة انا من ساعة ما تجوزت وعشت فى اكتوبر ماشوفتش حاجة زى دى لانى اساسا مابقتش انزل مصر كتير
الله اعلم بقى اذا كانت الظاهرة دى اختفت ولا لسه موجودة


الطائر الحزين
مالهوش لزوم ليه
بالعكس انا شايفة انى انشرها علشان البنات تاخد بالها ومتركبش تاكسى لوحدها او على الاقل تبقى تاخد رقم التاكسى قبل ماتركب



صاحب المضيفة
اه طبعا اعيط على العشرين جنيه
لدرجة ان انا شكيت ان الراجل عمل كدة مخصوص علشان يلهف العشرين جنيه كلها
منه لله



اخر العنقود
اه بصراحة موقف لا احسد عليه
بس بينى وبينك موقف زبااااااااااالة


خروشات عمر
هتوصل امتى شحنة العسل


قطقوطة الصحراء
عندك حق
ربنا يحرقهم بجاز وسخ


موجة
وارد حدوثه؟؟؟؟؟؟؟؟؟
لا طبعا مش وارد حدوثه
مين اللى هيجى فى دماغه ان سواق التاكسى اللى راكب معاه هيقلع هدومه
لو كان شئ وارد حدوثه انا كنت خدتها من قصيرها وروحت مشوارى مشى على رجلى وخلاص
مين هيفكر ان فيه ناس عندها كم البجاحة دى وقلة الادب والسفالة وانها تعمل كدة
دى تبقى مصيبة سودا لو موقف زى ده وارد حدوثه
انت عارف يعنى وارد حدوثه يعنى بقى شئ عادى جدا ولازم الناس تتوقعه
وده طبعا مش صحيح
لانى مازلت مصرة ان اللى بيعملوا كدة دول قلة ومش كل سواقين التاكسى عندهم كم السفالة دى
انا مازلت مصرة ان الناس الكويسة اكتر بكتييييييير من الناس الوحشة
ومش هاسمح لحد انه يغير نظرتى دى للدنيا
ومازلت هادى للناس الامان
مش ناوية ابدا ابدى سوء النية فى اللى قدامى

اما بالنسبة انى اتمالك اعصابى وكدة
للاسف ماقدرتش اتمالك اعصابى وانا بطبعتى لما بتصدم تفكيرى بيقف وباخد فترة علشان اعرف افكر هاتصرف ازاى

وانا مش شايفة انى قلت لفظ عيب
انا كنت ناوية اقول لفظ تانى
بس قلت علشان قرائى مايزعلوش منى قلت اقول اللفظ اللى بستخدمه مع ابنى الصغير
انا علمت ابنى ان المنطقة دى اسمها كدة
علشان من كتر ما بسمع عن حوادث اغتصاب الاطفال
فهمته ان ماينفعش حد يشوف البوبو والاظؤظة
وقلتله ماتخليش حد فى الحضانة يدخل معاك الحمام
وربنا يستر على عيالنا
وعموما وجهة نظر هبقى احطها فى الاعتبار
بس انت كمان حط فى اعتبارك
انك داخل مدونة جريئة وبجحة حبتين
يعنى ممكن تلاقى كلمة كدة ولا كدة ماتجيش على هواك
فياريت ماتزعلش منى ساعتها
تحياتى ليك


شكرا ليكم كلكم على تواصلكم معايا
اختكم خيخة

بحبك يامصر said...

مش عارف اعلق واقول ايه بس هو موقف سخيف وطبعا الواحد ما يتمناش انه يحصل ولا لحد قريبه ولا لحد مش قريبه

الشنكوتي الكبير said...

هي دي القصه اللي حيرت العلماء طويلا

ونزل اربع كتب عنها
سر العشرين جنيه
انا طبعا كنت عارف وفاهم القصه من الأول انا خبير قوي

بس مش عارف اقولك ايه
واحد عايز قطع رقبته على اقل تقدير
ممكن يكون مبرشم او حاجه انما يعني هنعمل ايه بس هو انتي طلعتي منحوسه ببساطه بس كده كل اللي عليكي انك تحمدي ربنا انك نجيتي من الموقف ده
انا لو مكانك كنت اتكسفت خالص
بس غالبا كنت هاعمله ذكرى حلوه
ما علينا ربنا يسترها على المسلمين

اتوقع انه هو غالبا دلوقتي في العباسيه او في القسم بيغتصبوه
في الخارج سواقين التاكسي بيبقوا مجانين ورغايين
احنا طلعنا متطورين عنهم اهو

حاجه اخيره بس ياريت بقى محدش يتفلسف عليا ويقولي متشتمش الشعب المصري الطيب
دي بلد تستاهل اللي بيجرى فيهم
لا يغير الله ما بقوم حتى يغيروا ما بأنفسهم

حمد الله على سلامتك وفداكي 24 جنيه كمان

سلااااااااااااااااااااام
اخوكي ايهاب

(green eyes) said...

مش عارفة اعلق اقول ايه
بس بجد ربنا يكون في عونك

مروة الزارع said...

مش عارفة اقول اية يا خيخة

صحيح هو موقف زبالة جداااااااااا

وسخيييييييف وممكن حصل لاى حد

بس انا مضايقة من البوست دة

ميصحش تقولية كدة وش

انا اتكسفت جداااا

متزعليش منى

بس دة رأيى

خمسة فضفضة said...

السلام عليكم ورحمة الله وبركاته

معلش يابنتي
دي عالم زباله وعاوزه قطع رقابتها

عوضك علي الله في العشرين جنيه

Ali-7ob said...

صحيح بت خيخة واى كلام
ترمى العشرين جنيه كده وتجرى
يعنى السواق لو عمل الحركة القذرة دى مرتين تلاتة فى اليوم يكسب قد كده
:)
على العموم بعد كده ابقى بصى فى وش السواق قبل ما تركبى سيماهم على وجوهوهم برده
او اركبى ميكروباص ارخص وفيه ناس كتيره
وبعدين يا بت يا خيخة هى مواضيعك كلها تحت كده ما تطلعى لفوق
عندك الراس والدراعات يعنى وطى فولت الجرأة شوية
نحياتى ليكى
على حب

ابن حـجـر الـعـسـقـلانـى said...

يخرب بيت أم دة سواق

Anonymous said...

حقيقى إذ لم تستحى فقول ما شئت

ياريت حضرتك بقى يامدام يامحترمة تفهمينا اية الهدف من البوست العظيم دة وما المعلومة والتدوينة التى تصليها للقراء من خلالة حضرتك وما الداعى من خدش الحياء .. وياريت تخليكى شجاعة ومتحذفيش التعليق دة

بدون سلام

Sola said...

hey
i changed the link of my blog,this is the new link,

http://egyptiangirl-1981.blogspot.com

chao

m5m said...

خسارة

Nigro said...

دي مش قلة و بس دي قلة أدب خالص
اللي زي دول لازم يتعدموا في ميدان عام
الصراحة.. انا قعدت أقرا السطر بتاع الموقف بالتحديد
بتاع 5 مرات ولا حاجة
مش مصدق ان حد ممكن يكتب عن حاجة زي دي
بس لأ عندك حق.. لازم نوعّي البنات
اللي غايظني بقى انه ممكن يكون حط ال20 جنيه في بنك استثماري ولا حاجة و في ال7 سنين دول زمانهم عملوا بلاوي
حار و نار في معدته

Ahmed Al-Sabbagh said...

الحقيقة

رغم انى ليبرالى جدا

وأؤمن بحرية الكلمة بصورة مطلقة

لكن

العشم والصداقة اللى بيننا تخلينى اقول رأيى بصراحة

انا مش فاهم فايدة البوست ده

؟؟؟

mahmoud farag said...

بوست بلا داعي

ممكن تقولي إن هدفك توعي البنات
بس اعذريني ... يخدش حياء الشباب ... فما بالك بالبنات

Anonymous said...

ازيك يا نوران
انا متابعة البلوج بتاعتك من فترة وفي موضوعات كتييير جداا بتعجبني فيها وبيعجبني أسلوبك الساخر في الكتابة

بس معلش اعذريني أنا ليا رأي بخصوص البوست دة بالذااات وهو اني بأيد فعلا أراء العديد من اللي علقوا وسألوكي عن جدوى كتابة البوست دة...فعلا انا كمان باسألك ايه أهمية البوست دة وسامحيني اذا قلتلك انه بصراحة فيه خدش للحياء وفيه كلمات ميصحش انها تتقال
تقبلي مروري وأرجو انك متزعليش مني على اختلافي في الرأي معاكي

Soul.o0o.Whisper said...

الصراحة يا خيخة انا اتصدمت بالبوست بتاعك دا

يعنى حتى لو للتوعية
بس مش كدا بردوا

معلش سامحينى ،

TheLonelyKing said...

بت خيخة وأي كلام فعلا..
بقى علشان حتة عشرين جنيه لا طلعت ولا نزلت تعملي كل ده.. وبوست وبتاع.

إذا كانت المشكلة في العشرين جنيه يبقى بسيطة واتحلت..

اديني بس رقم العشرين جنيه دي وانا إن شاء الله أول ماتقع في ايدي هابعتهالك على طول.

بالنسبة للأندروير بتاع السواق.. مش فاكرة كان جيل واللا قطونيل؟ هههههههههه

شوية جد بقى.. بوست ظريف.. وسواق سافل وسخيف.

المفتكس said...

بجد .. أنا زعلت قوي على الـ 20 جنيه

بس الموقف ده يعملك انك مرتكبيش تاكسي تاني

غير وانتي معاكي فكة ..... ههههههههه

لأ .. بس خدعة حلوة

دمك شربات يا مضروبة

Ahmed Mubarak said...

هوا انا تقريبا من اوائل الناس إلي شافوا البوست يا خلتو
بس معلقتش..معرفتش اقول ايه
ومكدبش عليكي في كذا نقطة سلبيه
هو يعني..بصراحة بجد ومتزعليش مني بس البوست دة خارج شويه..
مقصدش ازعلك بس لو مقلتش ليكي كدة هكون بنافق وأنا مش كدة..
كان مكن اصفق بأيدي وأقول حلو بس مقدرتش
وانا اتمنى على الاقل تصلحي بعض الكلمات واسلوبه شويه..
ارجوا ما تزعليش

د/اجدع بنوته said...

فقريه حتى فى معاناتك

فقريه ف مأساواتك

ههههههههههههههههههه

انا لو مكانك

هو مجراليش الحمدلله

بس وعهد الله

مجرد مهيقول بصى

الصراحه انا مش هبص لانى هفهم لوحدى

وهنزل م التاكسى وهسحبه م شعره

ف الشارع بمنظره ده

وباللى ف رجلى

وعهد الله لافرج عليه

القاهره الكبرى وضواحيها

وع هانى والمقيمين بخارجها مراعاة فروق التوقيت

سنة اللى خلفوه سودا اللى يوقع ف ايدى

ده انا مره واحد عاكسنى

مد ايده وخبطنى ع دماغى

نتشته م ايده اللى مكنش لسه شالها

ونزلتاه ع الارض

وحطيت رجلى ع رقبته

تانى مره لما حد يضايقك

استجمعى قواكى واديله اللى يستحقه

او متتعبيش نفسك ابقى رنى عليا

وانا اجى الحقك

ال بصى ال

عما ف عينننه ابن ابو سحلول ده

MerMaid said...

العزيزة جدا خيخة
-----------------
ازيك الاول ..واحشاني ايه اخبار شريف ؟؟ ابقي شوفي تعليقي ونصيحتي ليكي علشان ممكن تفيدك..

--------------------------------
ثانيا يا خيخة انا مش هاعلق ع البوست لاني مريت بكتير جدا من المواقف القذرة دي والله اكتر من مثلا عشر ولا خمستاشر مرة مواقف زي دي وحاسة بيكي كويس قوي
وانا فاهمة المغزي بتاعك من البوست
لكن انا عاوزة اعلق علي الانونيمس واللي معترضين علي البوست بتاعك

يعني يا جماعة انا مش شايفة ان الموضوع يستحق المعارضة او انه يخدش الحياء في حاجة ...يمكن لان اللي بيعترضوا رجالة مش حاسين بالموقف اللي البنت بتبقي فيه لما حد بيجرحها او بيستهزأ بيها او بيتخذ نظرها وسيلة لاشباع رغبة مريضة معقدة مكبوتة جواه
ذنبي ايه انا ولا ذنب نوران ولا ذنب اي بنت انها تشوف منظر مقزز زي ده من واحد مريض مكبوت جنسيا؟؟
ذنبي ايه ان انا احس ان انا مهانة وان انا مستباحة وماليش احترام في اي وسيلة مواصلات
يمكن لان البنات مش بتتحرش بالرجالة فانتم مش حاسين بالماساة او المعاناة
بس انا متاكدة ان لو كانت البنات هي اللي بتتحرش بالرجالة كنتم عملتوا اكتر من انكم تكتبوا مجرد بوست تطلعوا فيه حزن وزعل جواكم من سنين
هو علشان هي ختمت البوست بكلمة هزار يبقي هي فعلا متاثرتش باللي حصل واللي شافته؟؟؟
ده يبقي منطق سطحي جدا لو فهمتوا كدة
ايه فايدة البوست؟؟؟
فايدة البوست لما حضرتك تبقي تشوف او تسمع واحدة بتصوت او بتصرخ في الشارع من سواق تاكسي ولا واحد كان راكب جنبها بيحسس عليها...تبقي تروح تجري تشوفها بتصوت ليه ؟؟ و تعمل اللازم مع الراجل ولا السواق اللي تحرش بيها
مش كل حاجة نبص لها نظرة سطحية و نخاف نتكلم عليها اصل عيـــــــب
ومش عيب ان انت تسكت و انت عارف ان فيه تحرش في المجتمع؟؟
ده اللي بس قادر عليه؟؟ انك تعترض علي شوية كلام من واحدة مرت بتجربة صعبة؟؟؟لكن متعرفش تقول لازم الناس اللي زي ده تبقي ليها جهة معينة نعرف نشتكي فيها و نحاسبهم علي افعالهم القذرة؟؟
متعرفش تقول لها خدي رقم التاكسي وبلغي فيه؟؟؟
ولا تعرف تقولها كلمة مواساة وانك ضد الافعال اللي زي دي
لكن بس قلت لها انها خدشت حياءك؟؟
الف سلامة علي حياء سيادتك
يا تري كان هيبقي نفس رد الفعل لو جت اختك ولا بنتك ولا مراتك تقولك انا تعرضت للتحرش ؟؟
هتقولها خدشتي حيائي ؟؟و لا هتقولها ايه الفايدة اللي حصل حصل والمرة الجاية ابقي شيلي معاكي دبوس دافعي بيه عن نفسك
عيب قوي مجتمع فيه رجالة فرحانين بنفسهم قوي زي حضراتكم كدة والست تدافع عن نفسها بدبوس
----------------------------
معلش يا خيخة متزعليش مني بس بجد استغربت قوي من الكلام اللي شفته

تحياتي ليكي

Anonymous said...

اكيد في ناس معترضة على البوست وانا نفسي صدمت لما قريته وكنت هكتب (لا تعليق) بس لقيت ان ساعات التجارب ده بتبقى نصايح وخبرة للناس يستفيدوا منها ويعرفوا ازاي يتصرفوا لو اتعرضوا للمواقف ده ربنا يعافينا
وكمان يا خدوا بالهم
وربنا يحفظك
ام عمار

3ala asm masr said...

أنا مع ميراميد جدا بجد
أحنا فى مجتمع ذكورى مؤرف ومحدش حاسس باللى بنحسه لما بنتعرض للمعاكسه فى الشارع أو التحرش أنا وصلت معايا على فكره أنى أدعى على كل الرجاله اللى فى البلد
أنا بنخاف نمشى فى الشارع والله أنا بمشى أتلفت حواليا زى اللى عامله عمله ولما بركب تاكسى بفضل أقول يارب أوصل بالسلامه
واحده زى معندهاش أخوات صبيان تتعتمد عليهم يودوها ويجبوها المفروض نقعد فى البيت يعنى وحتى لو عندى المفروض اسحب راجل معايا فى كل حته أروحها
بتعترضوا على أيه أنتوا المفروض تتكسفوا من نفسكم
ونوران بجد مش أنتى اللى المفروض تتكسفى ولا انتى اللى خدشتى حياء حد أحنا اللى فى مجتمع بيبص للراجل مهما عمل على أنه ملاك
حاجه تفقع المراره

صوت من مصر said...

تصديقى ان السواق ده مش محترم وده طبعا كلنا عرفينه بس اى يا خيخه ده الب
كده مينفعش ولا اه انا حر بس فى ناس بتقرا الكلام ده
الكلام ده مش اسهال

ض/خالد said...

المشكلة انو لما حد يجي يقول يا اخواننا ركوب البنات او الستات مع سواق التاكسي لوحدهم ده من الخلوة المحرمة...
يرد البعض ويقول :
وهو يعني هياكلني
...........
عموما واضحا من الموقف ان اسم المدونة على مسمى :)

وإن كانت ردة الفعل تنم عن حياءك...
وفقك الله

مجهول said...

للحلوة ميراميد ياترى الناس هتبطل تركب تاكسيات بعد البوست دة .. ههه بجد صاححبة البوست واحدة فاضية مش لاقية حاجة تكتبها وناس افضى بتسمع لها ومفيش اى حياء خالص سبحان الله بوست ملهوش قيمة ولا حياء وبيدل على دماغ فاضية وتافه ومعدومة الحياء

رئيس جمهوريه نفسى said...

حسبى الله ونعمه الوكيل ليه الناس متفتكرش انك كما تدين تدان وازى ما بيتقال بالبلدى كله سلف ودين الى بتعمله فى الناس بيطلع عليك وعلى اهلك ربنا يستر لانى الانحلال بتاع الشعب بقى اوفر خالص

mermaid said...

مجهول said...
للحلوة ميراميد ياترى الناس هتبطل تركب تاكسيات بعد البوست دة .. ههه بجد صاححبة البوست واحدة فاضية مش لاقية حاجة تكتبها وناس افضى بتسمع لها ومفيش اى حياء خالص سبحان الله بوست ملهوش قيمة ولا حياء وبيدل على دماغ فاضية وتافه ومعدومة الحياء
---------------------------------
لا تعليق عليك و كفاية انك بتكتب تحت اسم مجهول حتي معرفتش تسمي نفسك اسم ولو خرافي و ده بيدل علي مدي جبنك وخوفك ...ربما سكوتي و عدم تعليقي عليك انت واللي زيك يدل علي انكم لا تستحقوا عناء الجدال
و لما انت عندك حياء قوي كدة جاي هنا تشوف التعليقات ليه؟؟؟
يا شيخ روح اتلهي في خيبتك جتك قرف مليتو البلد ووسختوها
ماهو اللي زيك هو السبب في انتشار التحرش و اعتراضك الفظيع و عدم مبالاتك باللي بيحصل مع البنات والستات ان دل علي شيء فانما يدل علي انك من مشجعي التحسيس و التحرش في المواصلات العامة
--------------------------------
الاخ التاني اللي خيخة تعرفه بس مش هاتقول اسمك ؟؟؟
خير يعني ؟؟ مش بتقول اسمك ليه؟؟؟ خايف ولا منطقك ضعيف ؟؟ ولا معندكش حجة مثلا تدافع بيها عن سواق التاكسي؟؟
فين قلة الحياء في البوست؟؟
و قلة الحياء لما بتحصل في التاكسيات والمواصلات؟؟ مش بنشوفكم تدافعوا ليه عن الستات؟؟؟ ولا عن البنات؟؟؟
مش عارفة انت خايف تقول اسمك ليه؟؟

----------------------------------
خيخة بجد اعذريني و سامحيني و متزعليش مني ولا تحذفي تعليقاتي
لاني بجد الموضوع يهني جدا و يهمني جدا انك تسيبي التعليقات كدليل ان المجتمع ده مجتمع عنده لا مبالاة و عدم احساس متناهي
مجتمع ذكوري صرف
تحياتي ليكي يا خيخة و استحمللي

Desert cat said...

Anonymous
وانت فرحان بنفسك اوى كدا وعمال تكرر فى الكلام ليه
هو انت سواق التاكسى ولا حاجه
ولا انت من اللى بيربكوا مواصلات عامة مخصوص علشان يتحرشوا بالبنات
والله حاجه تقرف وتكسف
يعنى بدل ما تتكسفوا على دمكو وتعملوا حملة لمواجهة الاشكال الوسخة دى بتدخلوا تدافعوا عنها وبرضه البنت هى اللى غلطانة
تعرف البنت غلطانة امتا لو سكتت لامثالك ومش قلعت اللى فى رجلها ونزلته على دماغك اصل خلاص مبقاش فى اخلاق ... وعقبال مامتك او اختك لما السواق او اللى بيتحرش يجيبهم عليها علشان تبقى تقدر الموقف اللى البنت بتكون فيه كويس
جتكو خيبة على خيبتكو مجتمع ذكورى نجس عا يز ابادة

أنونيمس said...

الصدمة الظاهر كانت جامده
بس كان لازم تاخدي رقم التاكسي
عشان تقدمي بلاغ

أو حتي تتصرفي تصرف أهوج مثلاً تكسري المرايه أو تجرحي العربيه

بدل ما تعملي كده جريتي والمصيبه سيبتي العشرين جنيه حار ونار ف جتت أهله

لازم بقى يبقى فيه أماكن زي بره تعلم البنات والستات يتصرفوا ازاي ف المواقف دي

ابن مرّ said...

أحيانا القتل لايبدو فكرة سيئة على الاطلاق

MerMaid said...

والله واضح جدا ان الاخ الانونيمس ده مفيش فايدة من الكلام معاه

مش عارفة انت تاعب نفسك ومرمي هنا في المدونة ليه؟؟؟
قاعد للسقطة واللقطة ليه؟؟؟
مش فاهمة يعني انت فاهم التدوين ده ايه؟؟؟
اصلا التدوين ده اسمه بالانجليزي

share your personal life

اترجمها لان سيادتك تقريبا من رواد المواصلات العامة و التحرش بالنساء
يعني شارك الناس حياتك الشخصية

اصلا ده هدف التدوين
كتابة المذكرات
احنا اللي عملناه مناقشة قضايا و مساحة ااحوار والفضفضة ودي ميزة فيه
و كل واحد يستغله زي ماهو عاوز

واحد يحكي مشاكله
واحد يقول اللي مزعله
واحد يناقش قضية
واحد يشتم في واحد

انت ماااااااالك؟؟؟
هتحجر ع الناس ؟؟
و افكارها؟؟
كل واحد يكتب اللي عاوزه

---------------------------
الاتنين الواطييين السفلة الكلاب المعفنة

بذمتك؟؟؟ مش مكسوف من ربنا ؟؟
مش مكسوف يا مكبوت جنسيا يا مريض العقل والبدن؟؟؟
جتك قرف يا مريض يا زبالة يا متحرش منك ليه
روح لمامي احسن

mohand said...

السلام عليكم

مستوي الحوار تدني

وفي ناس دخلت تهبل وخلاص

يا ريت يتحذف تعليقاتهم لان دي مش من حريات الراي اساسا


---------------------
اعتقد ان كان الافضل انك تاخدي رقم التاكسي حتي لو كان ازبهلالك في قمتة عشان تقدري تبلغي عنه مش لازم الشرطة في الحاله دي الضرب والخناق مباح

بس باللي عملتيه انتي كمان سلبية

وعموما كويس انك بطلتي تركبي مع سواقين تاكسي

--------------------
من رأي ان كان ممكن البوست يتكتب بدون بعض الالفاظ اللي كان ممكن تستبدليها بالفاظ اقل جرئه

-------------------
بالنسبة لموضوع الثقافة الذكورية

هو كل حاجه في البلد دي تبقي ثقافة ذكورية

مش لازم كل حاجه تنحشر فيها الثقافة الذكورية يا معلقين

تحياتي
--------------
انا بؤيد كتابة البوست اللي زي كده بس مع مراعاة الالفاظ

Omar... [ خروشات ] said...

******************


ربنا يهـــــدى الجميــــــــــع

لان اللى قراءناه اليـــــــــوم شىء لا يصـــــــدق


******************

الصراحــــة؟ صدمة كبيرة



ربنا يهـــــدى الجميــــــــــع

******************

رئيس جمهوريه نفسى said...

العزيزه بنت خيخه واى كلام
انا علقت وكنت جاى متوقع بوست جديد بس ملقتش جيت لقيت الكومنتان من الانيموس شغال خبط ورزع وبيقول الفاظ فى البوست رجعت قريت التدوينه تانى ملقتش حاجه اساسا تجرح حد ولا كلام خارج فى البوست فمتخديش فى بالك
------------------------------
الاخ انيموس
المقصود من البوست الى انت بتنتقده مش انى البنات متركبش تاكسى تانى ولا رئيس الجمهوريه يصدر قرار بالغاء التاكسى بس كفايه انى البنات الى تقرى التدوينه تعمل حسابها وتاخد حرصها وهى راكبه التاكس
-----------------------------
موضوع الثقافه الذكوريه ايوه المجتمع المصرى مليان ثقافه ذكوريا فى التاعامل بتاعه والدليل على كده لحد فتره قريبه كان ابن المصرى بيحصل على الجنسيه وابن المصريه لا يحصل عليها حال جوازه من اجنبى رغم انى الدستور الى هو اعلى تشريع مصرى بيساوى بين الاتنين
ثانيا فى قانون العقوبات من حق الزوج انه يقتل زوجته وشريكها فى جريمه الزنا ويطلع براءه او على الاقل بياخد حكم مخفف ولو عملتها الست بتاخد حكم عادى ده مش مجتمع ذكورى الى بيفرق بين الاتنين
جريمه الزنا تقع من الزوجه فى مسكن الزوجيه او خارجها انما من الزوج لازم تقع فى مسكن الزوجيه مش ده قانون ذكورى
انى فى جريمه الدعاره تحاسب المراه ولا يجاسب الزوج رغم كونها جريمه مشتركه وبيطلع الرجل كشاهد من القسم مش ده برضه مجتمع ذكورى
المجتمع الى اتجمع الشباب بتاعه بشكل كامل فى ليله عيد وهتكوا عرض البنات الى ماشيه فى الشارع لفرض القوى مش ده مجتمع ذكورى
كلمه اخيره لو معجبتكش التدوينه اطلع من غير ما تعلق انما تستهزاء بصاحب التدوينه وتتخفى من وراء انيموس دى مش مرجله يا راجل

NIDAAL PAL said...

بنت خيخة
كيفك ؟
اسلوبك جميل جداً و مشوق
و طبعاً دى سفالة من سواق التاكسى
كنتى ادتيه بالشنطة تبعك فى وشه
المهم
فى نقطة صغيرة ارجو ان يتسع صدرك لها
بصراحة فيه فى الكلام شوية كلام ما ينفعش يتقالوا نهائياً
كل شىء وله حدود الحرية _الديموقراطية_حرية التعبير عن الراى
كله له ظوابط و حدود
بلاش الكلام الجارح لو سمحت لسمع او لعين اى واحدة ممكن تقرأه ... انا قراته و انا مكسوف و الله العظيم
راعى مشاعر الى ممكن يقرئوا الموضوع هذا ويتأذوا بسبب كلمة
..........
ياريت ما تكونى زعلتى او اشى من ها الكلام .. انا بكبمك كاخت لى ..اصغر او اكبر مش هتفرق كتير ... وسواء اخذتى بالكلام ده ولا لا برده براحتك بس اتمنى يكون مغزى كلامى واضح ليكى
تحياتى .. كل احترامى
نضال

Ahmed Mubarak said...

معلش مش عايز ارد على حد
بس على الاقل نحترم بعض ونتكلم كويس ..الحوار اصبح سيء للغايه..

لو إختلفنا في الرأي لازم نحترم بعض ..
مش عايزين احترمنا لبعض كمدونين يقل مهما كانت الاسباب ..

ياريت كل واحد قدر ويقول رأيه من غير ألفاظ خارجة أو تجريح لأي شخص أخر

بنوته مصرية said...

الصراحه الله يكون في عونك

ده سواق سافل ومريض

ربنا ياخد اللي امثاله

ويطهر المجتمع منهم

انتي علي فكرة بت جدعه اوي ومش اي كلام


رودي

aya said...

السلام عليكم

متاخرة جدا جدا انا عارفة
والحمدلله انى رجعت بعد المعمعة ديه

بصى يا نور

جايز بالنسبة زى ما بيقولوا للعين المجردة محدش هيفهم انتى قصدك ايه
هلتاقيهم بيقولوا
يعنى وبعدين ؟
هيا عايزة توصل لاية

بس الفكرة مش اننا نوصل لايه

الفكرة زى ما محمود قال
انه نشوف قد ايه المجتمع بتاعنا بقى مجتمع ذكورى

ومش بس ذكورى

وارتفعت فيه نسب اللامبالاة والاستهتار والانحلال لدرجات مش ينفع الواحد يتخيلها

كان زمان كفاية انك تقولى لواحد
ترضى لاختك او مامتك يحصلها كده
وانتى تلاقيه فاق وصحى وعرف غلطه

دلوقتى لو قلتى كده يقولك مالكيش دعوة

بجد والله والله
ماحدش هيحس باللى انتى بتحكيه ده غير الناس اللى ركبت مواصلات
ومش اى ناس البنات بالاخص
لكن الولاد هما خسرانين ايه يعنى
اهو هيصفرله صفرتين على كلمتين بايخين يورى فيهم صحابه انه متقدم عنهم فى فنون عدم الاحترام

وخلاص

لكن لو دراسنا الموضوع من اى ناحية حضرية هتلاقى انه بجد
لازم يتعدموا فى ميدان عام


عارفة انى متاخرة
بس انا بضم صوتى لميرميد ولرئيس جمهورية نفسى
واى انسان عنده دم وبيحس
وفاهم قد ايه احنا بنعانى من ماساة فى الاخلاق

تحياتى ليكى يا نوران
وبجد ربنا يعفو عنا

بت خيخة وأى كلام said...

شكرا ليكم كلكم على تواصلكم معايا
وشكر خاص لكل من ميراميد وقطة الصحراء ورئيس جمهورية نفسى والشنكوتى
شكرا علشان رديتوا غبتى
وشكرا لرودى علشان نبهتنى للتعليقات السافلة
وشكرا لكل المعترضين معايا ووضحوا وجهة نظرهم بشكل محترم
وشكرا
اختكم خيخة

users online