Tuesday, February 12, 2008

حدث فى التلفزيون


بعد ما سربت الرجالة هانى وشريف
عملتلى مج شاى بلبن اسوانى
يعنى شاى تقيل سكر زيادة لبن قليل جدا
ورحت عملت الدنيئة
وولعت التلفزيون
ان ان ان أأأأأأأأأأأأأأأأأأأأأأأأن
اصل انا اساسا ماليش فى التلفزيون
بس كانت طالبة معايا اشوف احوال الدنيا
مسكت ريموت الريسيفر
وقعدت اقلب فى القنوات بدون اى هدف واضح
اول قناة كان فيها كارتون مدبلج
الى اين تذهب يا باسل
ساذهب الى البيت
امى تنتظرنى على الغذاء
تانى قناة
كان فيها اعلان عن عسل السدر الجبلى
وواحد بيسئل وازاى اعرف عسل السدر
يرد الخبير ويقوله هتلقاه لون شجر السدر بالظبط
يقوم واحد تانى يسأله وايه هو لون شجر السدر
يرد الخبير ويقوله هتلقاه لون عسل السدر بالظبط
تقوم انا بقى مرارتى تتفقع واقلب على قناة تانية
الاقى واحد جايب مسمار من علبة زرقا
وبيدقه فى الحيطة بالشاكوش
يقوم المسمار يتنى
يجيب مسمار تانى من نفس العلبة والمسمار يتنى
يقوم جايب العلبة البمبى ويجيب منها مسمار ويدقه وايه ده
ده ولا سحر ولا شعوذة
المسمار بسم الله ماشاء الله ماتناش وفضل ثابت على موقفه
يقوم الراجل يعلق صورته هو ومراته على المسمار
وبعد كدة يجيبوا لقطة للراجل وهومعلق
يجى عشرين سورة على عشرين مسمار
ماشاء الله عشرين صورة بحالهم
كان ناقص يكتبوا فى اخر الاعلان
كرامتك فى العلبة دى
اقلب على قناة تانية
الاقى حسين فهمى بشنبه المقرف فى فيلم العار
وبيقول لنور الشريف
فيييين الفلووووووووس يا كمااااااااال
اجيب قناة تانية
الاقى واحدة بتقول هتحنطر بالحانطور
واحد يجى يسئلنى هى هتحنطر دى من فعل ايه
ارد عليه واقوله هتلاقيها فى فعل حنطرة
و لو دورت عليها فى مختار الصحاح
هلاقيها تحنطر يتحنطر فهو متحنطر
اجيب قناة تانية
الاقى واحدة ماشية وبيجروا وراها يجى خمسين وردة بيضا
والست المعلقة بتقول
والان بعطر الورد
فاقول فى عقل بالى ده تلاقيه اعلان عن صابون للمواعين او للهدوم
يطلع فى الاخر اعلان عن بامبرز للسيدات
اقوم انا بقى اروح اصلى ركعتين شكر لربنا
وابوس ايدى وش وضهر
علشان حطوا فى البامبرز بتاعنا عطر الورد
لحسن الستات كانوا هيروحوا النار
لو ماكنش البامبرز بتاعهم من غير ريحة الورد
اقلب على قناة تانية
الاقى واحد بيتصل بالشيخ سيد حمدى
ويقوله انا حلمت انى باكل سمك
يقوم الشيخ يسأله
وياترى كان سمك مشوى ولا مقلى
يعنى الراجل بيتصل مخصوص من دولة عربية
علشان عايز يعرف تفسير الحلم
ما هو طبعا اصل الاحلام دى مش عاوزة اللى يهمهلها
لحسن تتطور بعد كدة
ونضطر نعمل عملية بتر
يبقى لازم نلحقها علطول
قلبت على قناة تانية
لقيت فيلم اجنبى
البطلة بتقول للبطل
لقد اصبت بالحازوقة
البطل بيرد عليها ويقولها
لقد تحزوقت من قبل
ولحد هنا بقى كان مج الشاي بلبن خلص
طفيت التلفزيون ورحت غسلت المواعين
انتهى
بت خيخة وأى كلام

37 comments:

bota said...

السلام عليكم

اول مره اعلق عندك
يارب يكون اول تعليق
بجد دمك خفيف جدا لما بجي هنا بقعد اضحك والناس في البيت بتفتكر اني اتجننت
وبعدين انتي المفروض تعملي رسوم للمدونه
مش كله يدخل يضحك كده وخلاص
اه على فكره انا تقريبا قريت اغلب المواضيع بجد اسلوبك حلو اوي حتى لما بتبقى بتتكلمي في حاجه بجد بس اسلوبك الساخر فيها بيبقى تحفه

معلش اصلي رغايه طولت اوي

ربنا يوفقك

بحبك يامصر said...

اه كده ارجعى لتدوينك الجميل
ممكن يكون اسمى جديد عليكى بس انا متابع من فتره اسلوبك فعلا لذيذ
بس لو يومك بيمشى كده هتكون حياه ممله اوى

بت خيخة وأى كلام said...

بوتا
اهلا بيكى عندى وياريت تشرفينى دايما



بحبك يا مصر
اهلا بيك
بس طبعا انا يومى مش دايما كدة
انا يومى باقضيه فى القراءة ثم القراءة ثم القراءة
دى اكتر حاجة بعملها فى حياتى
لكن اليوم بتاع التلفزيون ده كان مرة كدة من نفسى قلت اشوف اخر الاخبار وياريتنى ماشوفت
تحياتى ليك


شكرا ليكمعلى تواصلكم معايا
اختكم خيخة

صوت من مصر said...

خيخه والله عندك حق متبقيش تتفرجى على الدش تانى فى اختراع اسمه القنوات الارضيه هتتشلى كلها حنى مبارك حسنى مبارك فعل حسنى مبارك زار
قنوات مخصوصه لحسنى مبارك وعائلاته
موضوع جميل جدا

nada_adly said...

اوعي تقولي لي (شكرا لتواصلكم معايا) هاقتلك بجد

هههههههههههههههههههههههههههههههههه

بتحسسيني اننا في قناة وانتي بتردي على تليفونات الاهداءات فيها

حلوة اللفة اللي انتي لفيتيها دي على القنوات في التليفزيون

هههههههههههههههههههههههه

على فكرة يا نوران يؤسفني اني ااقولك اني اختلف معاكي

ولاول مرة في التاريخ انا بقى اللي هاقف لك المره دي يا مدوناتيه انتي يا مدوناتيه ...

بقى يا استاذه الشاي باللبن يتعمل كده ؟؟؟؟

الشاي باللبن بيتعمل باننا بنجيب ماج لبن ونحط فيه 3 او 4 ملاعق سكر ونجيب كيس شاي ليبتون ونضعه في اللبن وبعدين نطلع الكيس ونرميه

شفتي الجمال ...ها ايه رأيك مش حريفة شاي بلبن زيي بردو !
هههههههههههههههههههههههههههههه

Ahmed Al-Sabbagh said...

اولا اعتذر عن تأخرى عده ايام عن مدونتك

هروح اقرا البوستات واجى تانى

احمد

Ahmed Al-Sabbagh said...

هههههههههه

نهاية البوست ده بتفكرنى بمرة كنت حبيت اغازل فيها واحدة زميلتى

وكانت من نوعية الناس اللى بتسمع اركب الحنطور كدة

انا : تعرفى يا توتو انا بحب وجهك اوى لأنه وجه فرعونى

توتو سرحت شوية وقالت : انا لو قلت لأمى انا وجهى فرعونى ياما هتقولى امشى يا بت اغسلى المواعين

ههههههههههه

انا زيك مش من هواة التليفيزيون اوى

لكن ساعات فى حاجات بتجذبنى

بس غاليا على القنوات الفضائية المحترمة

تحياتى

احمد

أنونيمس said...

ليه ما جبتيش النشرة؟؟
كنتي ها تتبسطي اوي ياخيخة
:))

ghalia said...

ههههههههههههههههههههه
ليكى حق تطفيه وتقومي تغسلي المواعين
صراحة فى شوية إعلانات تنقط بجد
اكتر إعلان بكرهو الإعلان السخيف بتاع كوكا كولا بتاع المصريين كلهم بيشجعوا
بعدين تعالى هنا
اذاى تتفرجي على إعلان المسمار هههههههههههههه
مش عيب كدة يا خوخة
وكمان بتحكي عنو عادي كدة
خدشتى حيائي

بوست لذيذ أوي :D

Ali-7ob said...

خيخة يا خيخة
بتتريقى على فيلم العار انتى عارف الفيلم ده كنز ثروة قومية
والتلفزيون زى ما له مميزات له عيوب
انت عارفه فى ناس كتيره بتعمل زيك
بتعمل حاجة تشربها وتقعد قدام التلفزيون بس هما مش بيبقوا قاعدين مخنوقين زيك انما فى قمة السعادة
بيحسوا ان هو ده الوقت الوحيد اللى بيختلوا فيه بنفسهم بعيد عن مشاكلهم
واذا اتكلمتى معاهم هيقولوليك ان دى هى متعتهم الوحيدة
حظك انك بتحبى القراية
تحياتى ليكى
وملكيش دعوة بفيلم العار تانى
ماشى

ابن حـجـر الـعـسـقـلانـى said...

هاهاهاهاااااىىىى

بصراحة تدوينة عالية

و الحتة بتاعة لون عسل النحل دى خلتنى انفجرت فى الضحك .. أمى (اللى هى أم أبو العساقيل) قعدت تضحك على ضحكى

بس حقها تضحك بصراحة .. حقها و لا مش حقها ؟؟ حقها يا ابو كماااااال

بت خيخة وأى كلام said...

صوت من مصر
والله نظرا لانى من سكان اكتوبر فالارسال عندنا زى الزفت
فالقنوات الارضية مش بتوصل عندنا
ولذلك انا محرومة من انى اتفرج على مسلسل عائلة الحاج حسنى
والحمد الله على كدة
رب ضارة نافعة
تحياتى ليك



ندر عدلى
ايه ده
هو الشاى بلبن بيتعمل كدة
يعنى انا بقالى تلاتين سنة باشرب الشاى بلبن غلط
يا نهار ابيض
طب انا اتعالج فين ولا اعمل ايه ولا اروح فين دلوقتى
وانا بقول برضه ايه اسباب اللوثة العقلية اللى جاتلى على كبر دى
اتارينى بشرب الشاى بلبن بالشقلوب وماكنتش واخدة بالى
كويس انك نبهتينى يا ندى
ده انا كنت هاضيع خالص
تحياتى ليكى


احمد الصباغ
منورنى يا صباغ
بس ماقلتليش ياترى الدروس المستفادة من البوست ده واضحة
ولا مالهوش لزوم كتابة البوست ده
تحياتى ليك



انونيمس
اصل الشاى بلبن خلص بسرعة
لو ماكنش خلص كنت اكيد هلاقى وقت واشوف النشرة
تحياتى ليك


غالية
اه انا شوفت اعلان المسمار
نيهاهاهاهاهاع
بلاش قلة ادب بقى يا بت يا غالية
هو انتى كمان شوفتيه ولا إيه
عالم معندهاش دم
تحياتى ليكى





على حب
والله يا على انا بحب فيلم العار جدا
لدرجة انى حاطة موسيقى فيلم العار عندى على الموبايل
بس انا مابحبش شنب حسين فهمى فى الفيلم ده
والحمد الله فعلا انى بحب القراية لانى لو كنت مابلاقيش حاجة اضيع فيها وقتى غير التلفزيون كان ممكن اموت مشلولة
تحياتى ليك




شكرا ليكم
اختكم خيخة

بت خيخة وأى كلام said...

ابن حجر العسقلانى
طب كويس يا ابو العساقيل ان الست الوالدة ضحكت
انا كنت خايفة اوى الاخوة المعترضين لما يقروا البوست ده يقيموا الحد عليا
ولا ايه يا ابو كماااااااال

تحياتى ليك يا عسقول
اختك خيخة

Nigro said...

فاتك نص عمرك إنك ما شوفتيش إعلانات ميلودي تريكس ولا روتانا سينما مش هتقدر تغمّض عنيك
و كل دا كوم و شريط الرسايل في قنوات الأغاني كوم تاني
و مش هتكلّم عن قنوات المسابقات.. من نوعية سترايك
أكيد يا خوخة لو كنتِ شوفتيهم
كنتِ أخدتيها من قصيرها و كبّيتي مج الشاي باللبن الأسواني دا في الحوض و قومتي غسلتي المواعين بدري بدري

Nigro said...

آه .. معلش يا خوخة
هو الشاي اللي كان أسواني ولا اللبن اللي كان أسواني؟
علشان أبقى تمكنت من فهم و استيعاب و ادراك البوست كويس
ههههههههه

سارة بندارى said...

هههههههههههههههههههههههههههههههههههه

كويس انك بعد ده كله قدرتى تغسلى المواعين

اول مرة ادخل مدونتك بس جااااامدة

تحياتى يا ثكرة

يا ريت تشرفينى

جزيتى خيرا

m5m said...

هههههههههههههههههههههههههههههههههههههههههههههههههه

حلوة قوى حتة الحازوقة دى
جبتيها منين دى يا أم شريف؟
....................
....................

حمدالله على سلامتك

Anonymous said...

ياستي الحياء شعبة من شعب الايمان
حراااااااااااااام عليكي والله خدشتي حياء البنات ، خفي شوية

aya said...

هههههههه
وليه يا خيخة من بدايته تفتحى التلفزيون

بجد ده بقى ماساة متنقلة


بس بوست لذيذ يا خيخة

تحياتى

خمسة فضفضة said...

السلام عليكم ورحمة الله وبركاته

شفتي بقي آخرتها ايه ؟.....غسيل مواعين

وادي جزاة اللي يفكر يعمل الدنيئة و يتفرج علي التليفيزيون


هههههههههههههه

لماضة said...

نفس السيناريو بالظبط
بس صراحه مش وانا بشرب الشاي بلبن لا كده هيعكروا مزاجي
لا بعملهاوانا بتغدي
عشان اكل وانسى
:)

مهندس مصري said...

كنتي اتفرجتي على قناة الجزيرة أحسن من الإشتغالات دي

و بالنسبة للدروس المستفادة
نستفيد إن أخرة الفرجة على الحاجات العجيبة دي هيا غسيل المواعين
:)

و بعدين لما تشوفي فيلم أجنبي تشوفي الحازوقة
ههههههههههههه
مالها ال
mbc2
و لا الأكشن
كلها أفلام ترجمتها تتفهم و مفيهاش حوازيق
:)
العقل زينة يا بنتي و اشربي من عسل سدر الإسود علشان الهيموجلوبين
هههههههههه

Soletoo said...

2eeh ya 7'e7ahelly enty 3ala dah bas
galy 7oma el de7k ma3a el habal men elly ety katbah dah
bas 3arfa ana ba2aly kteer mashouftes el 3atah elly fel arabian tv dah bgad mecry 7'ales 3ashn 3aeshteny fel 7aga el gaiela deh tany
yalla ro7y b2a 3ashan 2atfarag 3ala mazengar
2efta7 ya mazengar,ana maher
2ayn anty ya faten f 2en aba el 3'adab sof yodarna
tatatat
yalla saoam ya noura ya7'ty
bosah l shery

بنوته مصرية said...

ههههههههههههههههههههههه

كويس اني المج خلص بدري قبل ما تشوفي باقي الاعلانات اللي تجيب شلل رباعي ونصفي

كويس انك مشوفتيش اعلانات ميلودي تريكس حاجه بتطير في السماء ايه حماااامه وحاجه ماشية في الشارع عربية زباله ههههههههههههههههه ولا البيض اللي بيتكسر ولا بوبي دي لوحدها كوم تاني نور بتحبها اووي والصراحه مش نور لوحدها وابوها كمان (^_^)

والله حاجه تعل وتجيب شلل فعلا

سلام يا قمر
رودي

بنوته مصرية said...

والله يا اخ Anonymous

اذا مكسوف اوي كدا متبقاش تدخل هنا وتحرج نفسك كل واحد حر في البلوج بتاعه
مش عارفة انت تاعب نفسك ليه

خفي انت تشويا وسيبها في حالها

سكــر said...

اممممممممم
تعقيبا على الشاى ابو لبن
انتى مغلطيش ولا حاجه
دى فعلا طريقه عمال الشاى ابو لبن
اما صديقتنا ندى
الطريقه اللى انتى وصفتيها
طريقة اللبن بالشاى
ايون فى فرق بين الشااااى بلبن
واللبن بشااى
ولا تعليق على الاعلانات
هههههههههههه
لانك علقتى بما فيه الكفايه
بنت خيخه

اوعى تقعدى قدام التلفزيون لوحدك تانى

تقبلى مرورى
احمد سكر

الطائر الحزين said...

دى فايدة انك يكون عندك قناة اولى وثانية بس


بدل ما تتوهى وسط الهم ده



والف هنا على الشاى بلبن

انا بشرب كل حاجة لوحدها محبش لغبطة دى

الشاى لوحد
واللبن لوحدة
والسكر لو نفع يبقى لوحدة هو كمان

تحياتى

الشنكوتي الكبير said...

هههههههههههههههههه

يا نهارك ابيض تصدقي انا بقالي كتير مش بشوف التليفزيون الا نادرا
حتى لما برجع من الشغل وبنقعد نتغدى او نتعشى بقى
حظي ان انا اللي بقعد وقفايا للتلفزيون فمش بشوف حاجه خالص
بس تصدقي التلفزيون بتاعنا اتطور برده
والتلفزيون اصلا عباره عن مرأه للواقع بتاعنا

ولأن بلدنا بقى كل تفكيرها بينحصر في اعلانات الأكل
والحاجات المرتبطه بالسيكو سيكو
والنصب المقنع
والهبل
فطبيعي ده يكون حال التلفزيون
زمان ايام عبد الناصر برغم حبي ليه وتقديري لأنجازاته لكن الكبت للحريات ساعتها كان على ودنه وبالتالي كان مسموح للتلفزيون والسيما تعمل اي قذاره وسفاله تحت مسمى الفن مادامت مش هتتدخل في السياسه
علشان كده كان فيه ساعتها افلام لممثلين مصريين وعرب وفيها مشاهد جنسيه اقوى من افلام الجنس العاديه
وده كان عادي خالص في زمن كانت الفتاه المحترمه عادي انها تنزل الشارع لابسه حمالات قميص النوم
وفستان مش مداري حتى الأندر وير

والحمد لله دلوقتي برده حكومتنا الرشيده فهمت النظام ده وبقت سايبه الناس دلوقتي برده تعك في المحرمات زي ما هي عايزه
مادموا بيلعبوا بعيد عن دماغهم

معلش يا خيخه اصل مخنوق من العك اللي حوالينا وبالذات التلفزيون

بس سيبك انتي وحشتينا يا شيخه جدا جدا
وخضتيني لما حسبتك هتقفليها
وكنت عايز اكسر دماغك ساعتها
بس طلعتي عند حسن ظني

بنت جدعه واحلى كلام

سلاااااااااااااام
اخوكي ايهاب

بت خيخة وأى كلام said...

نيجرو
طب كويس انى ماشوفتش حاجة
علشان مادلقش الشاى بلبن
وبالنسبة للشاى هو اللى كان اسوانى ولا اللبن
انا كان قصدى الاتنين على بعض اسمهم كدةعلشان هتلاقيه لونه غامق اوى
ده بيسموه شاى بلبن اسوانى
لانه بيكون عبارة عن شاى تقيل اوى وعليه لبن قليل جدا
تحياتى ليك يا نيجرو




سارة بندارى
انتى اللى مشرفانى
وانا فعلا زورتك امبارح ولقيت قدامى مدونة لبنت هايلة
اتبسطت اوى لما عرفت انك رحتى غزة
والله برافو عليكى انتى واروى صاحبتك
تحياتى ليكى



m5m
انا ماجبتهاش انا لقيتها فى وشى
بس مش فاكرة على انهى قناة
تحياتى ليك



الاخ المجهول
انا اللى خدشت حياء البنات ؟؟؟؟؟؟؟؟؟
ده على اعتبار ان البنات اللى حضرتك بتتكلم عنهم ماشافوش الاعلانات دى ولا سمعوا عنها غير عندى هنا فى المدونة
وان الاعلانات دى مش بيشوفوها كل يوم على شاشة التلفزيون
اكيد حضرتك بتتكلم عن بنات ماعندهمش تلفزيون من اساسه
واذا كان معندهمش تلفزيون يبقى اكيد معندهمش كمبيوتر وانترنت يبقى اكيد مش هيقروا البوست ده
فبالتالى اكيد مش انا اللى هاخدش حيائهم
تحياتى ليك



ايه
بس انا ماكنتش اعرف ان المأساة وصلت للدرجادى
يلا قدر الله وماشاء فعل
الحمد الله انى ماشوفتش اعلانات ميلودى
وانها جت على اد كدة
تحياتى ليكى




خمسة فضفضة
انا كنت واخدة عهد على نفسى انى مش هاعمل الدنيئة تانى
لكن تقولى ايه فى الشيطان ابن الكلب اللى وزنى على عمل الدنيئة
تحياتى ليكى




لماضة
تنسى ايه؟
مش فاكرة
تحياتى ليكى




مهندس مصرى
كويس انك كتبت ايه هى الدروس المستفادة
علشان انا كنت نسيت اكتبها فى اخر البوست
تحياتى ليك يا محمد


soletoo
يارب انطس فى قاعدة تواليتى تانى
اذا كنت فهمت كلمة واحدة من اللى انتى كاتباها
والنبى يا شيخة يا تكتبى عربى يا تكتبى انجليزى عادى وانا والله هافهم
انا مش حمارة اوى كدة فى الانجليزى
بس والنبى بلاش الانجليزى اللى بيتقرى عربى ده
لحسن
انا بقعد افك الشفرات الاول وبعد كدة اقرا وبعد كدة بفهم
وبصراحة انا ماعرفتش افك اغلب الشفرات
يعنى عندك مثلا
7'e7ahelly
دى والنبى تتقرى ايه
خيحاهيللى
يعنى ايه خيحاهيللى
خاصيمك النبى يا شيخة
ماتعملى فيا الدنيئة تانى وتكتبيلى
شفرات تانى
بس تقريبا كدة اللى انا فهمته انك جبتى سيرة مازنجر فى الموضوع هو وماهر وفاتن
فاكرة الروبوت الحريمى اخو مازنجر اللى كانت فاتن بتركبه
فاكرة الصواريخ اللى موجودة فى المقدمة
يااااااااااااااه
الواحد نسى الحاجات دى
تحياتى ليكى




بنوتة مصرية
يا خبر يا رودى
البت وابوها بيتفرجوا على اعلانات ميلودى
انا سمعت ان البت بتاعة الاعلان دى هى السبب فى زيادة نسبة الطلاق الايام دى
لأ خافى على نفسك بقى
اول ما الاعلانات دى تيجى شيلى الفيشة على طول



سكر
اهلا بيك يا احمد
يعنى انا طلعت بعمل الشاى بلبن صح
ولا غلط
اتفقوا انت وندى على انهى طريقة اصح
وانا خلاص مش هاتفرج على تلفزيون تانى ابدا
ادى اخرة اللى يعمل الدنيئة ويفكر انه يتفرج على التلفزيون
تحياتى ليك يا احمد




الطائر الحزين
بتشرب كل حاجة لوحدها؟؟؟؟؟
فكرتنى بنكتة
واحد دخل مطعم فول
طلب فول سادة
وبعد كدة طلب شوية زيت
وبعد كدة خدله شوية ملح
وبعد كدة عصر لمونة فى بقه
وبعد كدة كل رغيفين عيش
وبعد كدة نام على الارض وقعد يدألج نفسه
الراجل بيقوله بتعمل كدة ليه
قاله بقلب الاكل على بعضه

اوعى تكون بتعمل زيه كده يا طائرى الحزين
لحسن هدومك تتوسخ من الارض
تحياتى ليك




الشنكوتى الكبير
تخيل فعلا
انا ساعات بحس ان اللى بيحصل من هبل فى اعلامنا
ان ده عن خطة مدروسة
الحكومة عايزة الناس تتلهى فى حاجات هبلة
علشان محدش ينخور وراها
الحكومة عايزة تلهى الناس فى مشكلة حنان ترك وياترى حجابها سبب طلاقها ولا سبب الطلاق وجود كلاب فى البيت
ومايوه داليا البحيرى اللى ظهرت بيه فى فيلم معرفش ايه كانت جايباه من المهندسين ولا من مصر الجديدة
انا قلت من الاول بلاش اعمل الدنيئة
اهى جت فوق دماغى
انا الى استاهل
تحياتى ليك يا ايهاب



شكرا ليكم كلكم على تواصلكم معايا
اختكم خيخة

فرنسا هانم said...

الاعلانات شويه شويه هيبقى كلامها على المفتشر
مفيش حياء
مفيش دم
فى بيزنس
فى مانى
فى ابيج
الله يخرب بيت ام العولمه

Desert cat said...

انا كنت زمان زيك كدا باصاب بضغط الدم المرتفع بسبب تلك الجهاز الصغر اللى عنده استعداد يفرقع اجدع شرايين ... علشان كدا ريحت نفسى ومبقتش بقلب عن قناة الحكايات ... مالها المسلسلات المكررة فى اليوم سبعتلاف مرة ... ده حتى التكرار بيعلم الشطار ...

دكتور حر said...

جمييل يا خيخه جدا

بس تعرفي هو ده مستوانا فعلا

يعني احنا مش هنصبح ونبات نلاقي التليفيزيون بتاعنا نافع واحنا خايبيبن

هيجيبوا منين


:)

صاحب المضيفة said...

على فكرة

أنا حطيت عليق من بدري لكن شكله مش نزل لحد دلوقتي

على العموم


انتي والله العظيم فاضية لكن بجد عندك اسلوب رايق في العرض

الواحد لازم يقرا البوست لأخره كل مرة

تسلم الأيادي

تحياتي لشريف بيه

nada_adly said...

ايوة ...ههههههههههههههههه
هي دي الطريقة الجديدة لصنع اللبن بالشاي ولا يمكن انتي بتعمليه شاي باللبن انا باعمله لبن بالشاي ههههههههههههه تفرق

العلاج تكتبي لنا 2 بوست في المدونة بتاعتك كل يوم هههههههههههههههههههههه


- الاخ المجهول (بعد اذنك يا نانو ) هاستلمه شوية في الرد عليه :

1. خدشت حياء مين حضرتك ؟ بانها بتككلم عن اعلانات ماليه التليفزيون بطريقة اصبحت عادية تماما لا يخجل منها حتى الاطفال !!!!

2. امال لو قلنا حضرتك ان في منهج (ثقافة جنسية) سيتم تدريسه بالمدارس في اخر المرحلة الابتدائية ايه رأيك ؟

3. على فكرة يا استاذ (نورا) كتبت هنا في المدونة بتاعتها بوست ( = موضوع عن الحياء) واعتقد انك لازم تتطلع عليه لانها وصفت لنا الفرق ما بين الحياء والخجل وفي مدونين رجال وشباب اعجبوا جدا جدا بطريقة تناولها للموضوع


4. اسمح لي بقى ااقولك رأيي بصراحة (من يلقي بكلمة ويخرج يجري بسرعة من المدونة بدون مناقشة الكاتب .. الشخص ده تقدر توصفه بإيه ؟؟؟)قولي انت من فضلك ...لمجرد ان (نورا) تناولت بسخرية تاااااامة كثرة اعلانات المنتجات النسائية بسخرية تااااامة ...يا استاذي اكبر جرم في العالم انك تشوف وجهة نظرك انت وبس والمشكلة الاكبر انك بتدخل مدونة وبتتعب نفسك في قراءتها ...وبعد ده كله ما عندكش اي استعداد انك تشوف ( ماوراء الكلمات ابدا ولا عندك استعداد انك تتفهم موقف الكاتبه انها ببساطة بتنتقد اللي شافته واللي احنا كلنا بنشوفه في التليفزيون كل يوم وكل دقيقة )

5. الكلمة الطيبة صدقة والكلمة الخبيثة صدقة ...والكلمة امانة ...قال تعالى ( ولو كنت فظاً غليظ القلب لإنفضوا من حولك )
تخيل ان الايه دي ربنا خاطب بيها رسولنا الكريم (محمد " صلى الله عليه وسلم " هو مش خطاب موجه لسيدنا (محمد" صلى الله عليه وسلم " لاء يا فندم لان ربنا لما وصف سيدنا محمد (ص) قال تعالى ( وإنك لعلى خلق عظيم)
ربنا بيكلم وبيرشد في الايه السابقة كل انسان مؤمن فعلا بالطريقة الصحيحة اللي يخاطب بيها الناس والطريقة اللي ما تخليش الناس تنفر منه


6. في سمة او صفة حالية اتمنى ان ارى كل انسان بيدخل يكتب اي كلمة انه يتمتع بيها ( الذكاء الاجتماعي ) اني حتى لما اختلف مع الطرف الاخر اختلف باحترام وبلباقة ...حتى اكسب احترام الطرف الاخر ...واحترام الاخرين ...مش يمكن يا اخي نقتنع بوجهة نظرك ان كان اسلوبك فيه ( شياكة ولباقه وابداء للاسباب اكتر من كده ) انت للاسف ...اسمح لي ااقولك انت كده كل اللي كسبته (كلمة قلتها وجريت ) ورد فعلنا كقراء هنا ...( الاستياء)...اسفة اني ااقولك ...بس دي الصراحة ...ولو عندك وصف افضل لطريقتك ياريت لو تقولي

- على فكرة احمد رجب وكتاب كتير اوي ساخرين بينتقدوا الواقع والناس ...ودخلوا الى قلوب القراء بكلمات بسيطة وبنقد وسخرية مماثلة تماما ...المهم ( ان كلامهم صادق تماما ) لا يخالف الواقع ...

- معذرة اتمنى ان كل انسان يقرأ الكلام اللي مكتوب حتى في ورقة مرمية في الشارع ...انه يكون عنده استعداد ل( تفهم وجهة نظر الكاتب ) ...وهي دي (حنكة) و(ذكاء القارئ) اما ( مناقشة الكاتب باسلوب مقبول وبطريقة لبقة ) درجة اعلى ...لانك بتحاول توصل لمستوى فكر الشخص اللي كتب ...(واعتقد برأيي الشخصي ...ان هذا (قمة الذكاء والرقي ايضا من القارئ )

تقبل تحياتي ...وارجو انك قبل ما ترد على كلامي ...تتمعن في وجهة نطري يا استاذنا العزيز

بت خيخة وأى كلام said...

فرنسا هانم
ااااميييييييين
تحياتى ليكى


قطقوطة الصحراء
اساس مالها القراية ما انا كنت كافية خيرى شرى وبضيع وقتى فى القراية يعنى هى حبكت ان اتفرج على التلفزيون ومرارتى تتفقع
تحياتى ليكى


دكتور حر
لو هو ده مستوانا فعلا نبقى نقول على نفسنا يارحمن يا رحيم
دى تبقى مصيبة لو اغلب البشر بقوا مستواهم كدة
انا مازلت عندى امل برضه ان الكويس اكتر من الوحش
بدليل ان فيه ناس محترمين زيك
تحياتى ليك
وسلامى لكل العائلة الكريمة


صاحب المضيفة
انا فاضية؟؟؟؟؟؟؟؟
شتومة دى
اوعى تكون شتومة
والله باين عليها شتومة
عموما كويس انك بتقرا البوست لحد الأخر
ده شئ يشرفنى
شكرا ليك يا ابو مالك



ندى عدلى
طب والنعمة ماعارفة ارد عليكى اقولك ايه
ده انتى عندك من الحجة والمنطق اكتر منى انا شخصيا
خلاص انا عينتك المحامية بتاعتى
اللى هيقولى كلمة كدة ولا كدة
هاحول اوراقه عليكى علطول وانتى تتصرفى معاه
شكرا ليكى جدا


شكرا ليكم كلكم على تواصلكم معايا
اختكم خيخة

3ala asm masr said...

ايه المعلومات القيمه اللى عن شجرة السدر وعسل السدر ده
فظيع الخبير ده
بليز ماهى الحازوقه؟

l0vElYGh0sT14 said...

مع قناة نورا انت الرابح دائماً

users online