Wednesday, February 13, 2008

كنت مستنياه يجيب النجار


كنت فى تالتة كلية
يوميها كنت تعبانة جدا
كان بيحصلى ساعات ان ضربات قلبى تدق جامد اوى
لمدة ثوانى ماقدرش ساعتها اخد نفسى
بس يوميها الموضوع طول شوية وحسيت انى مش قادرة حتى اتحرك
فقلت اغيب النهاردة وبلاش اروح الجامعة
المهم
بابا وماما راحوا شغلهم واختى ساعتها راحت مدرستها
واخويا ساعتها كان لسة فى اوضته بيلبس هدومه ورايح على شغله
وانا قاعدة فى سريرى فى اوضتى
حد رن على جرس الباب
انا سمعت الجرس بس اخويا ماسمعش الجرس
باعتبار ان اوضة اخويا جوة اوضتنا انا واختى
يعنى بلكونة الاوضة بتاعتى انا واختى

اتقفلت وبقت عبارة عن اوضة لاخويا
وعلشان كدة اوضة اخويا تعتبر ابعد مكان فى الشقة
لو حد قعد فيها مايسمعش جرس الباب
المهم انى ماقدرتش حتى انده على اخويا علشان يفتح الباب
واساسا لقيته هو لوحده خرج من اوضته وخلاص نازل على شغله
فلما خرج قلتله على فكرة يا اسر الباب كان بيخبط
قالى طيب هاشوف مين وهانزل
عايزة حاجة
لا شكرا
سلام
سلام
كل اللى سمعته ان اسر فتح الباب والباب اتقفل وخلاص
بعديها بفترة بحوالى ربع ساعة كدة لقيت الجرس بيخبط تانى
قلت لا مش هافتح لحد
لو حد من اهل البيت الكل معاه مفتاح
ده اكيد حد تانى
كبرت دماغى وماقومتش شوفت مين بيخبط
بس اللى كان على الباب كان حد رزل اوى
لانه عمال يدوس على الجرس كتير جدا
ومصمم ان حد يفتحله
وانا دماغى جزمة قديمة وقلت والنعمة ما انا قايمة فاتحة الباب
شوية واسمع صوت دقدقة على الباب
وانا اقول فى عقل بالى شوف الرزالة بتاعة اللى خلفوه
ده مش مكفيه انه يخبط على الجرس
وكمان عمال يدق على الباب بالدقاقة اللى احنا حاطينها
وطب وحياة امى ما انا فاتحة الباب
خليه كدة يقعد يخبط لحد بكرة الصبح
شوية ويرن الجرس
وانا على كلمة واحدة مافتحلهوش يا بابا مافتحلهوش يا بابا
شوية ويدق بالدقاقة
المهم تمالكت نفسى ورحت لحد الباب

وبصيت من العين السحرية
لقيت واحد شكله محترم
قلت ده يمكن مدرس كان عند ماما وعايزها فى موضوع
باعتبار يعنى ان ماما فى وقت سابق

كانت مديرة احدى المدارس
وساعات كانوا يجوا المدرسين عندنا

عايزين منها خدمة او بيشتكولها من حاجة
بس برضه مش هافتحله
ورحت داخلة على اوضتى
كل ده وانا اساسا تعبانة ومش قادرة اتحرك كتير
والراجل المدرس
باعتبار انى خلاص حطيت فى دماغى انه مدرس
مصمم انه يرن على الجرس شوية ويدق بالدقاقة شوية
وانا مصممة اكتر منه انى مافتحلهوش
شوية كدة وسمعت صوت زى انفجار بسيط
زى مثلا ماتكون شاشة التلفزيون فرقعت
أو التلفزيون وقع على الارض وادشدش
صوت غريب كدة
ومش سامعة اى صوات تانية
المهم
خرجت برة الاوضة ومشيت فى الطرقة وانا متوجسة خيفة
حلوة متوجسة خيفة دى ولا كلمة ابيحة؟
المهم طلعت من الطرقة

و ببص على الريسبشن مش لاقية اى حاجة واقعة
دخلت المطبخ مالقيتش حاجة
دخلت اوضة السفرة مش لاقية حاجة
وانا بضرب عينى على الباب كدة
لقيت الباب مفتوح
بس مش باين انه مفتوح
يعنى مفتوح فتحة بسيطة جدا
قربت من الباب
وبصيت من العين السحرية
مالقيتش الراجل اللى كان عمال يخبط على الباب

فتحت الباب وقعدت اقول
مييييين ميييين
محدش رد عليا
جيت اقفل الباب لقيت اللسان بتاع الكالون سايب
رحت قفلت الباب بالترباس
وفضلت قاعدة عمالة افكر فى اللى حصل
قعدت اقول مش معقول حرامى اللى كسر الباب
اصله لو كان حرامى كان هيكسر الباب ويدخل
لاااااااا حرام اشك فى الراجل

إن بعض الشك إثم
ده اكيد حد كان عايزنا

ومن كتر خبطه على الباب الباب اتكسر منه
والراجل اتكسف من نفسه

وهيروح يجيب النجار علشان يصلح الباب
وفضلت مستنية يجى ربع ساعة كدة
مالقيتش الراجل رجع ولا جاب معاه نجار
رحت انا بقى قلقت عليه

ايوة والنبى قلقت عليه ليكون حصله حاجة فى الطريق
ولا يكون تاه ومعرفش يجيب نجار
ورحت اتصلت بأخويا على الموبايل
وقلتله على حصل
اخويا قاللى طب انا جايلك دلوقتى حالا
المهم اخويا جه
وحكتله اللى حصل
راح قاللى الراجل اللى انتى شوفتيه ده كان شكله كذا
وراح قايلى اوصاف الراجل اللى انا شوفته من العين السحرية
قلتله ايوة انت ايش عرفك
قالى اصل الراجل ده وانا نازل الصبح كان هو اللى على الباب
وسالنى على المحامى اللى جانبنا وبيفتح المكتب امتى
قلتله والله معنديش فكرة
راح قايلى طب حضرتك ادخل اسال حد كدة
من الوالد أو الوالدة يمكن يكون عندهم فكرة
فانا قلتله لا معندهمش فكرة
راح قايلى بس حضرتك بس ادخل كدة واسالهم
رحت انا قلتله معنهدمش فكرة
واساسا مافيش حد فى البيت علشان اساله
ورحت قفلت الباب
فنزل معايا وهو بيقولى طب ما فيش بواب هنا اساله
اخويا قاله هتلاقى البواب بيشترى حاجات لباقى السكان
واخويا مشى وسابه
واخويا وهو واقف على ناصية الشارع مستنى حاجة يركبها
بيقولى انه لقى الراجل ده
رجع تانى ناحية العمارة بس اخويا ماحطش فى دماغه
اتارى ايه بقى اللى حصل
ان الراجل كان بيسال اخويا كل الاسئلة دى

علشان يتاكد ان الشقة فاضية
وطبعا اخويا مش مطالب انه يقوله اختى جوة فى الشقة
فاخويا قاله محدش موجود علشان اعرفلك منه المحامى بيفتح امتى
فالراجل اعتقد ان الشقة فاضية خالص
ولما سال اخويا عن البواب
اخويا برضه فهمه ان مافيش بواب دلوقتى
ولما اخويا قفل باب الشقة قدامه
قفله من غير مفتاح
فالراجل عرف ان الشقة دى

هتكون هدف سهل بالنسباله علشان يكسر الباب
شقة فاضية مقفولة من غير مفتاح
مافيش بواب فى العمارة
فالراجل اتوكل على الله وبدا فى تكسير الباب
وأتارى صوت الدقدقة

اللى انا كنت فاكراه ان الراجل بيخبط بالدقاقة
اتاريه كان بيكسر الباب بحاجة معاه
طبعا هتسالونى امال الحرامى مادخلش الشقة ليه

بعد ماخلاص كسر الباب
اللى حصل ان العناية الالهية تدخلت فى اللحظة الاخيرة
الراجل خلاص بعد ما كسر باب الشقة
كان البواب نازل من فوق

وتقريبا كان فى حد طالع من تحت فى نفس ذات الوقت
فالراجل خاف يدخل الشقة لحسن حد يشوفه

فراح نزل علطول على تحت
لاننا لما سالنا البواب بعد كدة انت شفت حد
فراح قال ايوة لقيت واحد تقريبا كان بيخبط عليكم
وسالنى و قالى هو مافيش حد هنا ولا ايه
فقلتله لا كلهم نزلوا
وبعد شوية كنت نازل من فوق لقيته هو راح نزل على تحت
وبس خلاص الموضوع انتهى على كدة
وفى تجمع عائلى كبير بعد اليوم الموعود
وبعد ماخلاص كانت ماما فضحتنى فى الوسط العائلى كله
وقالتلهم ان فيه حرامى كسر عليا باب الشقة
جه خالو حسين وقاللى وانتى ازاى

ماتطلعيش برة فى البلكونة وتصرخى
كان ألف واحد مسكوه
راحت ماما اتطوعت وقالتله

تصرخ إيه؟
دى كانت مستنياه يجيب النجار
نيهاهاهاهاهاهاهاهاع
انتهى
بت خيخة واى كلام

53 comments:

aya said...

÷ههههههههههههههههههههههههههههههههههههههههه



لا والله مش ممكن
انتى شربات

يا نهارك ابيض
يعنى مش بعيد كنتى عملتيله كباية شاى عقبال ما ياخد اللى عايزه من الشقة

هههههههههههههه
يا قلبك يا نوران
انا لو منك مقعدش فى الشقة لوحدى تانى ابدا

هههههههههههههههههههه
تحياتى عزيزتى

والمرة الجاية ابقى سيبو عنوان النجار على الباب ولا حاجة

سلام

appy said...

ههههههههههه
خليك استنى النجار يا هانم لغايه لما يجيب منشار ويخلص عليكى بصى يا حبيبى فىالحالات اللى زى دى برد من ورا الباب ولو الطرف التانى مردش عليا ببقى فهمته ان فيه حد جوا ولو رد طالما مش اعرفه مش بفتح الباب اصلا وكل نجار وانتى منشار يا خيخه

Soooo said...

خساره مالحقتش اول تعليق
لكن مش مهم .. انا وايه واحد
بس على الله مايكونش تعليقي ده التالت ولا الرابع .. حاكم في ناس بسم الله ماشاء الله ايدها ولعه عالكيبورد


المهم
انتي واضح انك بجد انبه اخواتك
دي حقيقي مش مجامله

يعني رحتي لحاد الباب .. بمنتهى البساطه زعقي من ورا الباب وانتي باصه في العين السحريه
لو ارتبك كنتي تلمي عليه امة لا اله الا الله
ولو ما ارتبكش كان هيحاول يجر كلام في اي موضوع تروحي ساكاه في الحوار وخلصنا
انما تسيبيه عالباب وترجعي تكملي انتخه
يالهوي عليكي


ملحوظه
البواب بتاع عمارتكم .. بواب انتساب موجه ولا ايه؟؟؟؟



سلاموووووووووووووز

خمسة فضفضة said...

السلام عليكم ورحمة الله وبركاته

ههههههههههههه
يا نهااااااااااااااااااار ابيييييييييييض ، ايه ده يابنتي هوه فيه كده

الحمد لله انها جت سليمه
بس اعملي حسااااااابك المره الجايه








.....تجي سليمه برضو ان شاء الله
:-D

Ali-7ob said...

ايه يا واد الذكاوة دى كلها
وكمان قلقتى عليه
طب مش كنتى تبصى عليه من البلكونة تشوفيه راح فين

الظاهر ان زيادة سرعة ضربات القلب اثرت على عملية نقل الدم للمخ

اصله باين اوى انه حرامى
عمال يدقدق ويخبط عايزاه يعمل
ايه يصرخ ويقول انا حرامى
فكرتينى بفيلم مش فاكر اسمه
لما اب بيسأل ابنه مين ده
فقاله ابدا ده حرامى جاى يسرقنا وماشى علطول
:)
مفيش تحيات
على حب

Nigro said...

إنت بجد مشكلة
نجار إيه اللي راح يجيبه
لا واضح إنك لما بتتصدمي تفكيرك بيقف
و كمان مع توتر في ضربات القلب
مع شوية كسل بناتي
دي العملية كانت ماشية عنب مع عمو الحرامي
بس الحمد لله البواب الأمور بتاعكم دخل في الوقت المناسب
أنا حاسس كده أنها لو كانت مشيت معاه و دخل الشقة عليكي
كنت هتسيبيه يقضّي مصلحته و يتوكل على الله بعدها
المهم.. مين بقى اللي جاب النجار؟
ييييييييييي.. خيخة أوي

دكتور حر said...

ههههههههههههه

بسم الله ما شاء الله عليكي

فعلا الحكاء فن
وعلى فكره الحكاء ده مش حاجه قبيحه ولا حاجه

لكن لما يكون لابسه شخصيه ظريفه

بيطلع منتج رائع زي البوست ده

لك تحياتي

ماشي صح said...

هههههههههههههههههههههههههه
بس ولايهمك
بإذن الله كم يوم أو كم شهر أو كم سنة
راح يجيب النجار
وماراح يخذلك مدرسنا الحرامي

الساحرة said...

ايه الشطارة دي وقلقتي عليه كمان والله
فيكي الخير هو لو يعرف كان رجع طمنك
ههههههههه

بنوته مصرية said...

ههههههههههههههههههههههه


انتي مشكلة طيبة اووي مستنياه يجيب النجار ويصلح غلطتته يعني هههههههههههههه













هموت من الضحك بجد شربات يا مضروبة




بس قوليلي بقي ايه الدروس المستفاده هههههههههههههههههههههههههههههههه


والهي هموت من الضحك يا نورا

nada_adly said...

هههههههههههههههههههههههه

الصورة جميلة جدااااااااا

بس ايه الجمال ده ...الحرامي رايح يجيب نجار ههههههههههههههههههههههه

100 100 يا نوران

ههههههههههههههههههههههههههههههههههه

أنونيمس said...

هههههههههههههههههه

يا خيخة يمكن الراجل راح فعلاً يجيب النجار
بس لقاه قافل ولا حاجه

:)))

فرنسا هانم said...

جدعه يا خيخه
جدعه قوى
ابخرك من عين الحسود ومن عين اللى شافوكى ولا صلوش على النبى

يمكن صاحبنا راح يجيب النجار واتأخر زى شويكار لما راحت تجيب ورقه بوسته
تحياتى يا فكيكه
حلو فكيكه دى
برضه مش قبيحه

Nani said...

السلام عليكم
بصراحة انا كنت بقراء وانا منغاظة
افرضي مثلا حد من العيلة كان برة وناسي المفتاح زي ما حصل معايا مرة
وعاوز يروح الحمام ضروري

وانت جوه ولا على بالك
زي اختي المفعوصة
:)

Ahmed Al-Sabbagh said...

تعليق عام على مجموعة بوستات سابقة
----------------------------


هحكى الموضوع من البداية

عشان يبقى كلامى واضح ومحدش يزايد على كلامى

انا مبدأى فى التدوين عدم الاساءه لأى شخص

وعدم رد الاساءة مطلقا

فبرجاء السادة اللى هيذكرو فى الموضوع ما يعتبروش الموضوع اساءة بس توضيح

اولا
صديقتى خيخة كتبت بوست ما وانا اعترضت وبعض الاصدقاء التانين اعترضوا على اسلوب كتابته وليس على حرية التدوين

بعض الناس الغير منتمين للعائلة التدوينية تطاول بجمل وكلمات مسيئة لنوران

قام بقى بعض المتطوعين من الاصدقاء المدونين بمهمة الدفاع عن خيخة

وده شئ جميل

انما الاخوة الافاضل ما حبوش يدافعو عن خيخة ضد الناس اللى تطاولو بس

لأ

وضد اى حد اعترض

يعنى اعملو حسابكو اللى يدخل هنا

يوقع قبل ما يدخل على اتفاقية عدم الاعتراض

يا أما هيتهزق

الصديقة العزيزة هاجر كتبت تعليق شديد اللهجة واللهم لا اعتراض عليه

لكن فى شخص مش هحب اذكر اسمه استخدم تعليق هاجر وقال

"حطى تعليق هاجر فى عين اللى يعترض"

ثم تطوعت الصديقة العزيزة هند - على اسم مصر وكتبت
"بتعترضوا على أيه أنتوا المفروض تتكسفوا من نفسكم"

ثم ختمت خيخة التعليقات بشكر الناس اللى تضامنو معاها ضد المعترضين



ثم تحولت ساحة التعليقات لنوع من الحوار يسمى بإسم غير راقى مش هقولو

بصو ا

" و كفاية انك بتكتب تحت اسم مجهول حتي معرفتش تسمي نفسك اسم ولو خرافي و ده بيدل علي مدي جبنك وخوفك ...ربما سكوتي و عدم تعليقي عليك انت واللي زيك يدل علي انكم لا تستحقوا عناء الجدال
و لما انت عندك حياء قوي كدة جاي هنا تشوف التعليقات ليه؟؟؟
يا شيخ روح اتلهي في خيبتك جتك قرف مليتو البلد ووسختوها
ماهو اللي زيك هو السبب في انتشار التحرش و اعتراضك الفظيع و عدم مبالاتك باللي بيحصل مع البنات والستات ان دل علي شيء فانما يدل علي انك من مشجعي التحسيس و التحرش في المواصلات العامة
"

دى هاجر

يعنى بدل ما تتكسفوا على دمكو وتعملوا حملة لمواجهة الاشكال الوسخة دى بتدخلوا تدافعوا عنها وبرضه البنت هى اللى غلطانة

دى قطة الصحراء

وطبعا انا كان ليا نصيب من الاساءة ودخلت شمال فى بعض الناس اللى تطاولو على المعترضين - ده لما لقيت خيخة مش بترد عليه

وبصراحة مهند قال كلمتين يعبرو فعلا عن الحالة

"السلام عليكم

مستوي الحوار تدني

وفي ناس دخلت تهبل وخلاص

يا ريت يتحذف تعليقاتهم لان دي مش من حريات الراي اساسا
"

واحسن تعليق لكل الحوار اللى اتقال فى المدونة ده

هو تعليق عمر خروشات

"الصراحــــة صدمة كبيرة"

وقال احمد مبارك

معلش مش عايز ارد على حد
بس على الاقل نحترم بعض ونتكلم كويس ..الحوار اصبح سيء للغايه..

لو إختلفنا في الرأي لازم نحترم بعض ..
مش عايزين احترمنا لبعض كمدونين يقل مهما كانت الاسباب ..

وانا متفق معاه

لو مفيش احترام لبعض كمدونين

انا بأعلن انسحابى

اما لو فى خطاب شديد اللهجة من نوران - صاحبة المدونة

للناس اللى تطاولو

وفى احترام لكل الاراء اللى بتعترض واللى بتوافق

يبقى كويس وهو ده اللى عهدناه من مدونة بت خيخة واى كلام

وشكرا

احمد الصباغ

رئيس جمهوريه نفسى said...

وحياه امى منا فاتحه وبما انى من القلب للقلب رسول الراجل اتطوع وعرف انك مش حتفتحى الباب قام فتح الباب بنفسه يا ختى جميله ياختى

3ala asm masr said...

هههههههههههههههههه
بس حرامى قليل الاصل والله
كده ميجبش النجار؟
ولا حتى يطمن عليكى وانتى تعبانه؟
لاء معندوش حق خالص

متربية آه ,, معقدة لا said...

احلى مساء على احلى مدونه و تعتبر الثانية اللي اتصفحها
انا جديدة في التدوين و شرفني بالحضور اخي احمد الصباغ و دعاني لزيارة مدونته فدخلتها و قرات تعليقك على احد مدوناته لقيت نفسي بضحك جدا و بضغط على اسمك ( بعد الشر عنك ) و دخلت منه على مدونتك الحلوة

اتفاجئت اني من نفس سنك تقريبا و الاكيد اني من نفس برجك

فاحييك و ان شاء الله اكون زائرة دائما لك

اختك متربية آه ,, معقده لا

بت خيخة وأى كلام said...

معلش يا جماعة هارد على احمد الصباغ الاول وبعد كدة هابقى ارد عليكم


احمد الصباغ
اولا
وحياة ابنى شريف انا كتبت فى بوست الدروس المستفادة انى بشكر كل اللى دخل وعلق على بوست وااااعشرينتااااه
اذا كانوا معايا او معترضين باسلوب محترم ومعروفين الهوية
ووالله العظيم انا مش بزعل لما حد يعترض معايا
لما يكون فى حدود الادب ومافيش اى اهانة ليا او لافارد اسرتى
و واذا كنت انت مضايق من هاجر او الشنكوتى الكبير او قطة الصحراء
انا شايفة انهم قالوا رايهم زى اى حد ما قال رايه
واذا كانت هاجر تطوعت وردت على الناس اللى مش محترمة اللى دخلوا قالوا كلام مش ولابد وخرجوا من غير مايقولوا هما مين
فانا شايفة ان دى نقطة تحسب ليها مش عليها
واذا كان اللفظ اللى قالوا الشنكوتى الكبير
اللى هو حطى تعليق هاجر فى عين المعترضين
وزعل ناس كتير اوى من اللى اعترضوا
اولا احب اوضح واكرر ان انا كنت ومازالت بعتبر رد الشنكوتى ده يقصد بيه الناس اللى مش محترمة
اما لو كان يقصد المعترضين بشكل عام
فانا اعتقد برضه ان ايها او الشنكوتى اللفظ خانه
وهو لا يقصد انه يهين اى حد من الاخوة المدونين
لانى على ما اعتقد من معرفتى بيه خلال مدونته انه انسان محترم
ولا يقصد اى اهانة لاى حد منكم
وعموما انا بعتذر بالنيابة عنه اذا كان اللفظ زعل الاخوة المعترضين
وانا فعلا البوست بتاع واااعشرينتاااه لما رجعت من الهرم ولقيت كم تعليقات جالى عليه اذا كانت تعليقات محترمة او مش محترمة
قمت بحذف التعليقات الغير لائقة وبتتضمن اهانات بالغة ليل ولافراد اسرتى
وبصراحة مارديتش على اى تعليقات
وكتبت تعليق بشكر فيه الجميع
وده لاسباب عديدة لانى كنت بجد مضايقة ومش عايزة ارد على اى تعليقات
وتقريبا عدم ردى على التعليقات انت افتكرته انى موافقة على التعليق اللى انت اعتبرته اهانة فى حق المعترضين
وده طبعا مش صحيح
انا بعتبركم كلكم اخواتى واصحابى
وقولت اكتر من مرة يا جماعة انا مش زعلانة من اللى اعترضوا
ياجماعة انا زعلانة من اللى اهانونى
وعلشان خاطر الناس اللى اعترضت انا عدلت الكلمة اللى ضايقتكم اوى لما لقيت ان الكلمة دى لو حذفتها الكل هيستريح
لكن وحياة شريف انا مازعلتش ومش بازعل لما حد يعترض معايا
وماكنش له لزوم ابدا
انك تكتب الاتى

يعنى اعملو حسابكو اللى يدخل هنا

يوقع قبل ما يدخل على اتفاقية عدم الاعتراض

يا أما هيتهزق


انا يا احمد ماسمحش ان اى حد يهزء اى حد هنا فى مدونتى
واذا كانت التعليقات المشار عليها فى تعليقك هنا هى دى اللى ضايقتك
انا بعتذرلك تانى بالنيابة عنهم
بس يعنى ليه ماتلتمسش العذر لاصحاب التعليقات
على ما اعتقد انهم كتبوا التعليقات دى لانهم بجد كانوا محروقين علشانى علشان اللى دخلوا كتبوا اهانات
يعنى ناس محروقة علشان اختها
طلعت منهم كلمة كدة ولا كدة فى وقت هما متغاظين فيه مانمسكلهمش على الواحدة

وبعدين فيه مثل بيقولك انا واخويا على ابن عمى وانا وابن عمى على الغريب
لو انا فرضت ان اللى كانوا بيواسونى فى تعليقاتهم على بوست وااااعشرينتااه هما اخواتى
وان اللى اعترضوا معايا هما ولاد عمى
كنت اتمنى ان ولاد عمى يكونوا معايا على الغريب اللى هما المجاهيل اللى دخلوا اساؤا ليا
لكن مايصحش ان ولاد عمى يزعلوا من اخواتى
لاننا فى الاخر عيلة واحدة
ومايصحش نشمت فينا الغريب

وياسيدى اذا كنت زعلان منى علشان ردى عليك فى البوست اللى فات
معلش اعذرنى
اصل انا كمان كنت متغاظة منك من تعليقك على بوست واااعشرينتاااه
مش علشان معترض
بس علشان خاطر كلمة الدروس المستفادة
اصل متهيالى يعنى ان مش كل المدونين بيكتبوا بوستات بيكون فيها دروس مستفادة
اشمعنى جت عليا انا
ومع ذلك انا وضحت ايه هى الدروس المستفادة فى بوست يحمل نفس الاسم
واذا كنت زعلان منى
انا بعتذرلك على الملأ اهه
وبقولك اسفة يا احمد
وبعتذر لكل الاخوة اللى كانوا معترضين معايا اذا كان عدم ردى على التعليقات اداكم ايحاء انى موافقة على اى تعليق فى كلمة تزعلكم

ماتزعلوش بقى
وياريت ننسى الموضوع ده
لانى كل ما بفتكره بفتكر التعليقات اللى مش ولابد
ودى حاجة بتحرق دمى

انا اسفة
اختكم خيخة

ابن حـجـر الـعـسـقـلانـى said...

حالة الأمان اللى تمتع بيها الحرامى و هو بيحاول يسرق حالة غريبة بصراحة

الراجل اتصرف بمنتهى هدوء الأعصاب و التمكن

لكن إيه .. فى نفس اللحظة اللى الحرامى نجح إنه يفتح الباب.. راح البواب جاى على طول .... ربك بيسترها و الله

بت خيخة وأى كلام said...

احمد الصباغ
معلش توضيح تانى يا احمد
انا ماشكرتش الناس اللى تضامنوا معى ضد المعترضين
انا شكرت الناس اللى تضامنوا معى ضد المجهولين اللى قالوا كلام مهين وسافل

شكرا ليك
اختك خيخة

Rivendell** said...

هههههههههه
هههههههههههههههههه
هههههههههههههه
هههههههههههههههه
ههههههههههه
ههههههههههههههه
ههههههههههههههههه
هههههههههه
هههههههههههههه
هههههههههههه
ههههههههههههههههه
ههههههههههه
هههههههههههههههه
ههههههههههههههههههه
هههههههه
هههههههههههههههههههههه
هههههههههههههههه
و
ههههههههههههههههههههههههههههههههههه

Soletoo said...

2eh ya niuran da bas:
nagar ya nouran
oh i forgot im gonna write in engliush,so what is that and what u did u shoudnt ac that way seriously,
and i dont know what are the comments they said on ur post wa3eshrenah so plz let mekow what happed
and by the way i can stop my self loughtin after what happned from the thief and the way u act
bravo ya noura

A.SAMIR said...

لا لا لا لا لا لا
مش ممكن؟
هو في حد كدة؟
لا بجد
حد لسة ممكن يعمل اللي انتي عملتيه دة؟
يا لهوي
بكل امانة ومن غير اي زعل
لو انا مكان اخوكي وانتي اختي كان قدامي حل من تلاتة
يا اما انتحر يا اما اقتلك يا اما انتحر وقتلك
مش ممكن

maii bahaa said...

يا خيخة وحشاني

وفاتني بوستات كتير ايه اللي انا فيه ده؟
بس هاعلق على كل واحد انشاء الله ياريت ترجعيلهم

وابتديت فعلا بموضوع الدم ومعاكي جدا

وانتي دماغ جامدة أوي تسيبي الراجل يكسر الباب كده؟ طب كنتي تشخطي فيه يطلع يجري ولا حاجة
ربنا ستر
:)

أنا وهي said...

حتة موقف انما ايه
بس بجد خوفتيني انا بخاف من الحرامية مووووت

أبوشنب said...

الواطي قليل الاصل

وتلاقيه ما جبش النجار يصلح الباب برضه

sa7afia_rwsha said...

اقولك ومتزعليش انتى بت خيخة
هههههه
عارفة انك عارفة
بس انتى طيبة اوى
واللى زيك بقو عمله نادرة
البنات دلوقت تندب فى عنيها ار بى جى مش رصاصة
ابقى زورينى بقة وانا كمان عاوزة كوباية شاى محبش حد يزورنى وايده فاضيه
يلا سلام

Casper said...

ههههههههههههههههههههههههههههه

والنبى لا تقوليلى عنوان شقتكم دى فين عشان فيه جماعة أعرفهم بقالهم كتير أوى مش بياكلو

وماتقلقيش

هييجو معاهم نجار

:)

صاحب المضيفة said...

ولحد اليوم النجار لسه مش جه


لا حول ولا قوة الا بالله


احمدي ربنا على نعمته العظيمة دي

سلامي لشريف

nonoymm said...

اخص عليه البعيد كدة يكسر الباب
هههههههههههههههههههههههههه
انتي بقى اتكتبلك عمر جديد والله
بس على فكرة انا من الناس اللي لو مين على الباب ما بفتحش
بكلمه من ورا الباب
بتاع ا لغاز الوحيد اللي بقراله القراءة واقولها من ورا الباب والباقي بياخدوها من برة
اياك تكوني اتعلمتي
على فكرة عاوزة منك حاجة خدمة
ما تخافيش مش هتغرمي حاجة دي خدمة معنوية
ضيفيني على الماسنجر اعرفيها وبعدها يا تخليني يا تحذفيني براحتك بقى
منتظر ة

محمد عادل جمعة said...

دمك سكر يا خيخة.. انا اول مرة آجي المدونة دي.. وصلتها من رد ليكي في مدونة آبي اللي اول مرة ادخلها.. و اللي وصلتلها من رد ليها في مدونة أحمد عبد الفتاح اللي اول مرة أدخلها برضه.. و في الحالات التلاتة اتبسطت من اللي شفته..

ربنا يوفقك..
سلام عليكم..

Desert cat said...

كنتاى مستنياه يجيب النجار يا ام شريف وقلقتى عليه لما اتاخر طب كنتى رنى له ولا ابعتى له كلمنى شكرا
هههههه
الا هو انتى بتكونى لوحدك فى البيت الساعه كام
؟؟؟؟
لا اوعى تفهمى غلط مش انا اللى هروح اجيب النجار
النجار بنفسه هو اللى هيجى

3ala asm masr said...

احمد الصباغ
لما قلت انتوا بتعترضوا على ايه انتوا المفروض تتكسفوا من نفسكم
مكنتش انت المقصود ابدا ولا اى حد من المدونين اللى اعترضوا بشكل محترم
لان الاختلاف فى الراى لا يفسد للود قضيه دى قناعتى اللى بتعامل بيها مع الاراء
لكن اللى يعترض بشكل سافل لاء سورى ده مش اسمه اعتراض ولا اختلاف فى وجهات النظر ده اسمه قلة ذوق وقلة ادب
لو كان كلامى زعلك انا بعتذر وبقولك مكنش موجه ليك ولا لاى مدون محترم
وانا عمرى ما اهنت حد ولا عندى ولا عند اى مدون تانى

شكرا
تحياتى

مهندس مصري said...

بقى مستنية النجار
دا إنتي كسولة بشكل
:)
السؤال من وراء الباب مش حيتعبك
الحمد لله قدر و لطف

بالنسبة للصباغ أنا اميل يا أحمد لأن قصد تعليق الشنكوتي الكبير كان يقصد بيه الناس الغير محترمة و ليس المعترضين عموماً
ياما اتفقنا و اختلفنا عادي
و دايماً بنحتفظ باحترامنا لبعضنا
:)
افرض النية الكويسة دايماً
خصوصاً مع اخواتك المدونين يا خالو
و متبقاش حساس قوي كده و ما تأولش الكلام على نفسك دا انت مقامك عالي في وسط المدونين
:)

الدرويش المرووش said...

أنا مش فاهم الناس دى بتضحك على إيه
!!!!!!!!!

غريبه فعلا

أنا فعلا نزلت أجيب النجار
بس يوميها كان الحد و الدكان كان قافل
و تانى يوم لما رجعت بيه كان الباب إتصلح

ممكن أفهم بقى بتضحكوا على إيه
؟؟؟؟؟؟

الطائر الحزين said...

بعد هذه الواقعه؟

ركبتك ترباس فى الشقة ولا لأ


وياريت يكون ترباس فوق وترباس تحت


فعلا نجار ونجار طبالى كمان


تحياتى

صوت من مصر said...

اكيد الراجل ده كان مكنش عايز يسرق وتلاقيه هو نجار فخرب الباب عشان يصلحه ومنه يطلع بمصلحه

قلوب بتغنى said...

والنبى انتى ظلمتى نفسك ببنت خيخه دى
ده انتى بنت عسل خالص
بس عارفه
طبعا بغض النظر على ان البوست بتاعك دمه خفيف جدا
فى ملاحظه بلاحظها حتى عندنا فى البيت
اخوتنا الشباب بقوا مخبلين خالص يعنى كل ده
واخوكى مش فاهم

قلوب بتغنى said...

ابقى زورينى يا جميل

موجة said...

كل البراءة دي في ثالثة كلية
مش ممكن
ههههههههههه
حقيقي دمك خفيفي قوي
احييكي على البوست الجميل ده
خالص تحياتي
احمد

حل وسط said...

ازيك
وحشتيني
معلش
النت كان بايظ
رجع عند الناس كلها وانا لا
هاصلحة واجي تاني
انا بس بطمنك عليا
ربنا يخليكي ليا

الشنكوتي الكبير said...

هههههههههههههههههههههه
ههههههههههههههههههه
هههههههههههههههه
ههههههههههههه
ههههههههه

انتي يا بنت مش هتبطلي تفطسيني من الضحك
بجد يخرب عقلك بقى هو راح يجيب النجار وانتي خايفه يكون تاه
لا وقال ايه من كتر الخبط الباب اتكسر في ايده ليه يعني عمك الحاج هركليز ولا عمك الحاج هركليز يعني
ما علينا المهم ربنا نجاكي
ولو ان يا سلام لو كان دخل وخطفك وبقيتي من اطفال الشوارع وتلفي تشحتي بقى وهو ياخد منك الأيراد اخر اليوم
ههههههههههه

عموما الف سلامه عليكي من موضوع كرشة النفس ودقات القلب دي
المهم انك عديتي على خير
بيقولك عمر الشقي بقي
ماشي يا اختي الشقيه
سلاااااااااااااااااااااام

الشنكوتي الكبير said...

ايه ده انا لقيت اسمي في الحوار الجامد اللي تحت ده

طبعا زي العبيط فرحت قوي لما لمحت اسمي وقلت اكيد جايبن سيرتي شكروا فيا طبعا
بس لقيت اختي اللي زي السكر واقفه بتشكر في اخلاقي فعلا وكأنها من دمي فعلا ولقيتها فعلا اعتبرتني اخوها وبتتكلم بأسمي
عموما انا مش هاتكلم عن معزة خيخه عندي مش وقته لكن هاتكلم عن حاجه تانيه خالص

اولا عن اسلوبي في الرد على الكلام
حكاية اني قلت حطي تعليق هاجر في عينهم
من البديهي يعني ان انا اقصد اللي رد عليها يقولها ان كلامك اسفاف مالوش لازمه بدون تلميح على حد يعني
انا قصدت عامة لأني بكره قوي فكرة ان حد يحجر على حرية حد في مدونته حتى لو بحجة انه حبيبه وخايف على قيمته ومكانته
كل واحد عارف عايز يقول ايه ومش عايز يقول ايه
واصلا الفكره من التدوين اني اتكلم بصراحه بدون خوف
اصلا الناس بتخفي شخصيتها الحقيقيه عن الناس علشان يكون عندهم مساحه اكبر من الحريه
يعني الخلاصه انها لما تكتب عن موقف حصلها فعلا مش نوع من التشويق والأثاره ولا حاجه يبقى نفهم المعنى ونقدر كلامها او منعلقش او نرد باسلوب محترم عندك اعتراض قوله ونناقشك مش ناس تشتم وناس تستخف بالكلام

انا عايز بس حد منكم يتعرض هو او زوجته او بنته او امه او اخته
لموقف زي ده ويقولي درجة حراره كلامه هتوصل لأيه
محدش يقولي هاتكلم بالعقل واناقش الموضوع لأنه يبقى بيضحك على نفسه

انا اتضايقت لأني كنت متوقع تعليقات من نوع معلش يا خيخه او كلام يناقش القضيه لكن ان الناس تعترض ايه اللي بتقوليه ده يا خيخه
هو ده اللي خرق دمي ولقيت البنت هاجر لسانها عامل زي المبرد قولت حلو هو ده اللي ينفع مع المدعين والناس اللي قلت ادبها
مش معنى كده ان اي اعتراض يبقى اخط صباعي في عينه
والدليل اني مبزعلش من تعليقات ناس بتعترض على اسلوبي
لأنهم بيعترضوا باسلوب جميل
وبكون خاسس انهم فعلا مهتمين ينصحوني


حاجه اخيره بقى
عفوا يعني انا لو حد مش عاجبه اسلوبي يبقى شكرا ليه جدا وممكن يقاطعني ويدعوا اصحابه انهم يقاطعوني كمان
لكن انا هافضل اقول براحتي

يا ناس بقى المثليين والملحدين بتكلموا بعلو صوتهم ومحدش بيقولهم حاجه ونيجي احنا يتقالنا عيب متعليش صوتك

فلقتونا
معلش يا خيخه اني عليت صوتي عندك بس من عشمي

تحياتي ليكي
وربنا يوفقك

سلااااااااااااااااااااام

l0vElYGh0sT14 said...

أنتي مجنونة
بوست جامد جامد جامد اخر حاجة
تحياتي لكي بالعطور الفرنسية

بحبك يامصر said...

اخص عليه الحرامى الوحش ده بقه يسيبك تستنيه وميجيش بالنجار لاء بد كنتى لازم ترفعى عليه قضيه عشان مرجعش بالنجار

وعجبنى تعليق ان البواب بتعكم انتساب موجه
حلوه

فضفضة said...

هههههههههه

انتى رهيبة

ويا عينك يا جبايرك
تلاقى الباب مكسور تتربسيه وترجعى

المهم النجار

جه ولا مجاش

بوست جميل وفطسنى ضحك
تحياتى خيخة

القلم السكندري said...

بسم الله ما شاء الله

ملكيش حل بصراحة يعني

أضحك الله سنك

وربنا يحفظك

بس بعد كدة ابقي خدي اجراءات امنية مناسبة

ساطور مثلا

يد هون اي حاجة تدافعي بيها عن ارضك



تحياتي

Omar... [ خروشات ] said...

السلام عليكم

خيخة و الصباغ و الشنكوتى و هاجر؟


عايز ااقول لكم جملة مهمة جدا وهى:



انا كتبت يومها تعليق بالانجلش ما معناه : ان فى اى مجادلة او نقاش بين الناس هناك ثلاثة وجهات نظر

وجهى نظرى

و

وجهة نظرك

و

وجهة النظر الصحيحة

خلونا نتفق اننا ممكن جميعا نعتقد لوقت بسيطة ان وجهة النظر الصحيحة هى رقم 3 و احنا جميعا وجهة نظرنا اما رقم 2 او رقم واحد، وقتها؟ محدش هيزعل من حد


صباح زى الفل جميعاً


عمر،

واصطنعتك لنفسي said...

ده أول زيارة لي لمدونتك
وصممت إني أعلق لإني فعلا ضحكت من البوست برغم إني بمر بظروف مؤلمة اليومين دول وبقالي كثير مضحكتش

فبجد ميرسي علي البوست الجميل

وجاري تفقد البلوج يا فندم

بت خيخة وأى كلام said...

نظرا لكثرة عدد التعليقات
ونظرا لانى معنديش خلق انى ارد على كل هذا التعليقات
اييييييييييييييييييييييييييه
دنياااااااااااااااااا
فين ايام ماكنت بتنشق على تعليق يجيلى
دلقوتى خمسين تعليق وقال ايه مش عايزة ارد عليكم علشان التعليقات كتيرة
الله اكبر الله اكبر
مايحسد المال الا اصحابه

لا بجد اعذرونى بس لسه واصلة من الهرم وورايا حاجات اد كدة عايزة اوضبها
شكرا ليكم كلكم على تواصلكم معايا
وربنا يديم المعروف
اختكم خيخة

د/اجدع بنوته said...

هههههههههههههههههههههههه

حبيبة قلببببببببببببى

وجاب النجار ولا لسه

ههههههههههههههههههههههه

د/اجدع بنوته said...

البطلة بتقول للبطل
لقد اصبت بالحازوقة
البطل بيرد عليها ويقولها
لقد تحزوقت من قبل

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

users online