Saturday, February 16, 2008

هات معاك عيش وفول


و دينى لا اقطع عنكم المصروف

لا بجد اخص عليكم اخص

بجد زعلتونى منكم

ولا اكنكم قرتولى بوستات

ولا اكنكم ضحكتوا من قلبكم معايا

ولا اكنكم هزئتونى وبهدلتونى

يعنى بعد العشرة دى كلها

وحوالى خمس شهور من الكتابة المتواصلة

وزيارتكم ليا اللى مخلصالى

على كل اخضر ويابس هنا فى البلوج

ده مافيش مرة يا جدع ادخل بلوجى

والا الاقى كل واحد فيكم فاتحلى تلاجة البلوج

وعمال يحش فى بقه اشى ساندوتش لحمة

على علبة بيبسى على شوية طرشى

واكلين شاربين نايمين عاملين بى بى

و كل ده ماطمرش فيكم

مش تخلوا عندكم شوية من الاحمر

وتدونى خبر

مافيش حد فيكم فكر يبعتلى ميل وينبهنى

الا مالقيتش اى كومنت بيقولى

خدى بالك يا خيخة الفلانتين على الابواب

كدة تخلوا رقبتى زى السمسة قدام الراجل

وكمان مش عارفين راجل مين

هو فيه غيره راجل انا اقصده

اللى هو بعلى وسبعى وجملى

يعنى يرضيكم اللى حصللى ده

وكمان مش عارفين اللى حصل

طب خدوا عندكم

********************************

فلاش باك ليوم الأربع بليل

هانى كان فى وسط البلد فى مشاوير شغل

اتصلت بيه الساعة حداشر وتمانية وخمسين دقيقة بليل

وعلى المقيمين خارج الشقة مراعاة فروق التوقيت

المهم لو عملنا موضوع التقريب

اكنى اتصلت بيه الساعة اتناشر بليل

لقيت هانى بيرد عليا وهو منشكح اوى

وكان هذا الحوار

هانى بصوت منشكح اوى

يدل على فرحة شديدة معرفش ايه اسبابها: ايوة يا مامى

انا بصوت اجش واخنف واللى يسمع صوتى ساعتها

كان يتخيلنى بالمنظر الاتى

اكنى رابطة شعرى رابطة فكيهة الشغالة

مع بنطلون بيجامة قديم

عليه بلوفر واسع ومبهدل

ومليان بقع مجهولة المصدر

ده صوتى اللى يديك ايحاء بكدة

لكن طبعا انا كنت عكس كدة خااااااااالص

المهم: ايوة يا هانى هات معاك عيش وفول

هانى بصوت شبه مصدوم : نعممممممممممم

انا بصوت اعلى شوية

فاكراه ماسمعش كويس: بقولك هات معاك عييييش وفوووووول

هانى بصوت فيه نوع من الرجاء

انه يتمنى انه يكون سمع غلط: انتى متصلة بيا علشان تقوليلى كدة

انا فى عقل بالى: اييييييييه ؟ هو العيش والفول بقوا حاجة ابيحة ولا اييييييييه؟

انا بصوت اخنف

مش عارفة ليه لحد دلوقتى صوتى كان مخنف: اه هو فيه حاجة

هانى بصوت يائس: لأ خلاص مافيش حاجة

بس انا تعبان مش هاقدر اجيب حاجة معايا

انا: خلاص ماشى مش مشكلة

وخلاص قفلنا مع بعض


بعد دقيقتان

يعنى الساعة اتناشر بالظبط


موسيقى فيلم العار تنبعث من اوضة النوم

ده النغمة اللى انا حاطاها على موبايلى


ابو شريف كولينج


انا : الو ايوة يا بابى

هانى بصوت مليان فرحة اوى: هابى فلانتين داى يا مامى

انا بصوت لا يقل خنفان عن المكالمة اللى قبلها: وانت طيب يا هانى

هانى : مش عايزة حاجة وانا جاى

انا :هات معاك عيش وفول



بعد حوالى خمس دقايق

لقيت هانى داخل عليا داخلة اللى بيمنى نفسه بالأفراااااح

وانا طبعا كان منظرى كله جرااااااح

اييييييييييييييون

فاكرين المنظر اللى انتوا تخيلتوه وانا بكلمه فى التليفون

اللى هو رابطة الشعر على طريقة فكيهة الشغالة

مع بنطلون البيجامة القديم

اللى عليه بلوفر مقطع وعليه بقع مجهولة المصدر

هو ده كان منظرى بالظبط

لكن يزيد عليه ان ايدى اليمين فيها ليفة المواعين

وايدى الشمال فيها غطا حلة مكرونة كنت لسه هاغسله


المهم هانى داخل عليا وفى ايده تورتة موس بنانا


وكان هذا الحوار

هانى بصوت كله سعادة لحد دلوقتى مش عارفة ليه: هابى فلانتين داى

انا فى عقل بالى: احنا مش هنخلص من ام الاسطوانة دى النهاردة ولا ايه؟

انا بابتسامة عريضة جدا: و انت طيب يا بابى

هانى قرب منى قال ايه عايز يبوسنى فى خدى

انا بصوت عالى وأخنف :عندك اوعى تقرب

هانى: ايه فيه ايه؟

انا : انت جبت معاك عيش وفول ولا لأ

هانى: صمت رهييييييييييييييييييييب

انتهى

بت خيخة وأى كلام

46 comments:

Nigro said...

الأول
أن أن آآآآآآآآآآآن
هات معاك عيش و فول
آه.. جميل
عيش و فول
طيب ما هو الراجل قعد يقولك هابي فلانتين داي
و انت ولا انت هنا
مستنياه يعمل إيه يعني؟
انت مشكلة
لا لا لا بجد مشكلة
الله يكون في عونك ياهاني
لأ لأ لأ
قصدي ربنا يخليلك نوران يا هاني
مش عايزين ضرب
عيش و فول
عيش و فول يا خيخة؟
مشكلة مشكلة يعني
ربنا يخليكوا لبعض

مهندس مصري said...

ههههههههههههههههههههههههه
طيب ما هو قالك في التليفون كنت لحقتي ظبطتي نفسك قبل ما يجيي
عيش و فول ايه من قلة أكل في التلاجة و لا ايه
أنا قلت قبل كده ربنا يكون في عونك يا هاني
الراجل عمل اللي عليه الدور و الباقي عليكي
انت من الأبرار يا هاني ربنا يهدي لك خيخة و تسعدك كمان و كمان
فول و عيش
ههههههههههههههههههههه

الطائر الحزين said...

ان كان هذا هو الحال فى الاعياد فما بالكم بغيرة

وهل نحتاج الى اعياد لكى نتهيأ

اذا نظر اليها سرته فين بقى


المهم

اتعشيتوا ايه بعد ما غاب الفول والعيش


تحياتى

Ahmed Al-Sabbagh said...

ههههههههههههههههه

غريبة !!

ولسه عايشة ؟؟

ولا انتى كاتبتى البوست ده كجزء من الوصية

صراحة هيدخل الجنة حدف الراجل ده

عيش وفول ؟؟

حلو اوى البوست ده

اقرى بقى كتاب غادة برايد هتلاقى فى جزء بيتكلم عن نفسى الموضوع

عن الراجل اللى كان جايب ورد لمراتة

وهى قالت له امشى غيرة مش ده الورد اللى بيتعمل مربى

والراجل اتقمص وهى ما كنتش عارفة هو اتقمص من ايه ؟؟

هههههههههههههه

تحياتى

رئيس جمهوريه نفسى said...

طيب يعنى الراجل كتر خيره اتل وقالك هابى فلانتين داى وانتى مصره على العيش والفول جاب تورته وانتى مصره على العيش والفول وربنا احنا الرجاله لينا الجنه لو كان الراجل الى نسى يبقى مش بيحب الست ولو الست الى نسيت تفتكر العيش والفول
ممكن ساندوتش فول اصلى جعان

shreef said...

مش ممكن انا مبطلتش ضحك البوست فظيع بس بجد سيبك انتي العيش و الفول اهم من ييجي تلاتين فلانتين داي بس ابئوا اعزموني المرة الجاية

د/اجدع بنوته said...

وعهد الله بتهزرى انتى ياخيخه

ده بدل ماكنتى تلبسيله بدلة شريف الحمرا

والكوتشى اميجو اللى بيدى فلاشرات حمرا

وتصبغى شعرك احمر بجارنييه

هيلد تتألق باللون الاحمر الكستنائى

احم احم الا بى سى فتحت ع هنا

المهم منظرك كان قله خالص

وم رااى بقى

واسمعى نصيحة اختك الزوغيره

الخميس الجاى ده

تعمليلوا حفله زوغنتته كده

وتسربى شريف ع جدته

وتعمليله عشا حلو وشموع بقى

اومال ايه بس عامليلى فيها

مؤسس اسس تعامل الازواج والزوجات

ومنزلالى بوستات بقى

وازاى الست تدلع جوزها

وف الاخر طلعتى مش اخده بالك م الفلانتيم

اااااااااااه ياوكستى

son's egypt said...

السلام عليكم
بقي الرجل يقولك هابي فلانيت وانتي تقولي فول
ده كلام بردوا
بوست دمه خفيف بجد

ابن حـجـر الـعـسـقـلانـى said...

يه يا بنتى هذا الإصرار الشديد على الاطمئنان على الفول و كأنه شىء نادر الوجود ؟؟ و كأنك كنتى طالبة منه شوية زئبق أحمر و بتتطمنى على الشحنة وصلت و لا لأ

مش كدة يا حاجة

طب انتى ممكن تتداركى الموضوع و تقوليله إنك ما كنتيش ناسية و لا حاجة .. تقوليله إن غطا الحلة كان الغطا اللى هاتعملى فيها الفول اللى هو شاريه .. و الفول دة أصله نبات .. و النباتات فيه منها أنواع كتيرة .. و من أنواع النباتات نلاقى الزهور .. و الزهور دى بقى هى اللى انت كنتى تقصديه لما قلتى له هات معاك فول .. و فى الآخر تسأليه باستغراب:"سهلة أهى .. انت ما عرفتهاش لوحدك إزاى"ا

و يا ستى ... ربنا يديم الود ما بينكم دايما يا رب و تبقوا أسعد أسرة فى التاريخ

m5m said...

طب والله العيش والفول ليهم معنى عن عيد الفلتان طين ده
.
.
.
بس هو شريف حايتعشى فول؟

فتوح أبو المفاتيح said...

هابي عيش آند فول داي

حرام عليكي أنا كرهت العيش و الفول

هو صحيح الفلانتين داي دا عيد ميلادي عشان كدا أنا فاكره كويس

ومجبتش حاجة لحد السنادي

كلمة في سرك يا خوخة
أنا جبت بس متخفي
بس إياكي تقولي لحد

عشان أجيبلك عيش وفول
بجد بجد بجد
دماغك عاااااالية

مفيش أحلى من العيش و الفول في الفلانتين داي
بس هو فيه حد ياكل عيش و فول الساعة اتناشر ونص بليل ؟
وانت كمنا بتغسلي المواعين في قوضة النوم ليييه ؟
معنكمش مطبخ ؟

خير خير خير
محدش عارف الخيرفين

وسلام يا خوخة

Soletoo said...

tesada2y hany se3eb 3alaya bgad ya om sherief,fol o 3es ya nouran
tab konty 2oly b nosgneh foul o b nos ta3meyah
bgad post fatasny mn el de7k la2 o tasawrt manzarek 7aseet enek za3'lol mesh nouran
3omom2 yafandem happay zalantine dayya gamiel
ya rab tekont valtanty in the end and ate the banana moos
bas heya kanet men feen
law kanet mn saleh sokreh send me a peace\
sa7e7 im gonna send u a brand new red pijama walahy 3alashan 7'ater hany
salamoz ya gamiela

بنوته مصرية said...

ههههههههههههههههههههه

والله حرام عليكي ههههههههههههههه

انا بقي ياختي جبت له هديه وروحت ادهاله لقيته




















نايم زعلان علشان واحد معاه في الشغل مات

ائه ائه ائه

بس جابلي الهدية النهارده وجاب كمان لي نور هدية كمان
ربنا يدوم عليكي السعاده ويخلهولك

فرنسا هانم said...

هو يا بنتى الراجل مش اتصل بيكى وقالك هابى فلانتين داى
معملتيش عمره لنفسك لييييييييييه
انتى الغلطانه مش احنا

عيش وفول ؟؟؟؟؟؟؟
شاطره
هو ليكى اخوات كتير شبهك كده ؟

صوت من مصر said...

طيب مخدتيش بالك ان البلد كلها كانت حمره انا كل ما اروح فى حته الاقى احمر كانى فى معسكر النادى الاهلى او فى الاستاد على فكره انا اهلاوى

wanna b a physician said...

هااااااى اول مرة اشوف البلوج بتاعك شكل كلامك لذيذ
كان فى سؤال انا ليا مدونة جديدة ومش بالاقيها فى البحث اعمل اية بليز

fatima said...

يا عزيزتى الى مش خيخة ولا أى كلام
طبعا انا موش هعيد كلام الحبابيب و أقول هانى دا ليه الجنة ..
بس هقولك الكلمتين الى دايما أقولهم لصاحبتى المتجوزة فى كل مكالمة
: قبل ما أقولها لا اله الا الله علطول ..
طب اسيبك دلوقتى عشان عمرو زمانه على وصول ...و طبعا انتى عارفة بقى .. غلالة رقيقة شفافة . و تبقى تتثنى و تتهادى فى دلال يا ستى . ( أحمد رجب كان دايما يكتب العبارة دى فى المواقف الملحمية دى )..طبعا الهانم بتضحك و تقولى لما انيم العيال ... و هو بس يصمد و مينماش قيلهم ..
طب هيا و معذورة بقى ..
سيادتك بقى كسفتينا قدام المجتمع المدونى جمعااااء ....
و يا ستى الفالنتين الجاى نبقى نبعتلك ايميل مسجل بعلم الوصول
أنا سعيدة بدخولى عالمك وارجو لكى كل خير
و هانى بقى ربنا يتولاه ..هيبقى ربنا وانتى يعنى .. دا حتى يبقى كتير قوى كده على نفسيته الاهتمام دا

شريف طلال said...

عيش و فول
و مقولتلوش هات طعميه لييييييه؟
ههههههههههه
ايه ده يا ريت تعملى جزء تانى لألى حصل بعد كده عشان الفضول ده
هههههههههههه
موضوع جامد و يفطس من الضحك
تحياتى

دكتور حر said...

اللهم ارزق عبدك هاني الصبر والسلوان

اللهم اخلفه في زوجته وابدله خيرا منها

اللهم اهديها يا رب

اللهم حببها في التورته واصرفها عن الفول

آميييييييييييييييييييييييييييييييييييين

منك لله

صاحب المضيفة said...

حرام عليكي اللي عملتيه في الراجل ده

لكن معلشي

فصبر جميل والله المستعان على ما تصفون


نعمل ايه بقى


يارب تسترها علينا بعد كده

سلامي لشريف بيه

فزلوكة said...

دا إنتى مصممة تجيبيله إحباط

يا بنتى " الفلانتين " ده معروف للناس كلهم
طب بلاش
مشفتيش الأحمر إللى كان مالى الشوارع
طب معدتيش على الكورنيش
أنا وبالصدفة البحتة كنت معدية على الكورنيش يوم الأربع ولقيتلك البنى آدمين كلهم لابسين أحمر وماسكين قلوب , استغربت فسألت فى إيه ؟؟
قالولى الفلانتين بكرة
المهم سيبك إنتى
خلصتى المواعين ولا لأ!!!!!؟
زهراء

Anonymous said...

رحماك يا رب
تنصح الناس كيف تعامل أزواجها و هى من تحتاج النصيحه على فكره أنتى تحبين الفول بالزيت الحار و لا بالسمنه؟
أجيبى على سؤالى يرحمك الله و يجعله من الصابرين
أبو خالد

appy said...

الا قوليلى صحيح هو حضرتك كده يعنى مش مسكتينا كام يوم علشان المتجوزين ويخلوا بالهم والست تعمل ايه
انتى بتنصحى وباب النجار مخلع لااااااااااااا دا انتى عاوزة كورس من جديد يا امى يا مفتريه فول وعيش بتقفلى الراجل وبعدين دى غلطتى كان لازم افكرك يا حبيبتى ادينى المواعيد الهامه بينكم وانا ابقى اتصل بحضرتك افكرك لا بجد طلعتى خيخه موووووت

Anonymous said...

هابى فوووووولز داى يا ام شريف
بس ابقى اعملى حتى ريمندر على الموبايل بتاع العار ده وهوا يفكرك لو نسيتى .... ده احنا كده اللى لينا عار بايت عندك
هههههه....بس انتى عسل
سلامى لشريف
مستــ ج ـــدة

بت خيخة وأى كلام said...

نيجرو
انا ماكنتش مستنياه هو يعمل حاجة
انا بس كنت عايزة حد يفكرنى اعهه كنت حوشت من مصروفى وجبتله اى هدية
ولا حتى كنت غسلت المواعين بدرى شوية بدل الموقف الزبالة اللى كنت محطوطة فيه
تحياتى ليك يا نجرو



مهندس مصرى
اصل انت ماتعرفش يا محمد
ده هانى لعب معايا الدنيئة وجه بدرى
انا افتكرت ان لسه قدامه شوية اتاريه كان بيكلمنى وهو خلاص على اول الشارع
يعنى كدة كدة ماكنتش هالحق اعمل اى حاجة
وبعدين هانى عمل اللى عليه
بس انتوا استخيختوا معايا جامد اوى
بقى معقول مالقيش حد يفكرنى بالزلانطين داى
اخص عليكم اخص
تحياتى ليك




الطائر الحزين
يعنى يرضيك يا طائرى الحزين انه يطب عليا كدة
مش كان المفروض برضه انه يقولى انه خلاص قدامه خمس دقايق ويكون عندى
على الاقل كنت دخلت استخبيت فى الحمام بمنظرى العكر ده
لكن انت عايزه يطب عليا وتقولى اذا نظر اليها سرته
طب تسره ازاى اذا كان هو طابب عليها
المفروض ينبهنى برضه
مش كدة ولا ايه؟
تحياتى ليك



احمد الصباغ
ورد بيتعمل مربى
جديدة دى
ااااااااااااااااه
لا سمعت عنها قبل كدة
مربى ورد
ايوة ايوة
انا افتكرت دلوقتى انى سمعت عنها
بس تعرف يا صباغ ايه اللى نرفزنى منه
انه جاب تورتة موس بنانا
انا مابحبش موس البنانا
ماجبهاش موس شكولاتة ليه
يبقى ليا حق ازعل ولا لأ
وليا حق اتمسك بالفول والعيش ولا لأ
تحياتى ليك يا صباغ



رئيس جمهورية نفسى
والله كان نفسى يا محمود احدفلك ساندوتش فول
بس للأسف هانى برضه نسى يجيب معاه فول وعيش
تحياتى ليك يا حودة



شريف
والله انت اللى فاهمنى دون عن كل البشر
انا بحاول ازرع فى قلوبهم حب العيش والفول
وهما عمالين يتريقوا عليا علشان انا اصريت عليهم
تحياتى ليك يا شريف



اجدع بنوتة
هو انا علشان عملتلكوا كام بوست نصايح هتمسكوها عليا ذلة ولا ايه
طب ودينى لاقطع عنك انتى بالذات المصروف يا سمسة
وبعدين يا بت تعالى هنا
ايه اللون الاحمر اللى انتى ضارباه فى التعليق ده
مش عيب كدة
يا كزوفى يا كزوفى
تحياتى ليكى



sons egypy
انا كنت بحاول اهرب من الموقف عن طريق تمسكى بحقوقى فى الفول والعيش
دى سياسة زوجية مايفهمهاش غير الستات اللى متجوزة لما بيتحطوا فى مواقف بايخة
تحياتى ليك



ابن حجر العسقلانى
يخرب بيت عقلك الاجرامى يا واد يا عسقول
ده انت طلعت مصيبة
انا صحيح ازاى ماجتش على دماغى فكرتك الجهنمية دى
يا بن الإييييييييييييييه
لا ومش بس كدة
وفى الاخر كمان احسسه انه هو اللى مابيفهمش لما اقوله بمنتهى الثقة
سهلة اهى انت معرفتهاش لوحدك ازاى
يا بن اللذينا يا عسقول
ده انا هحتاجك كتير اوى فى الفترة المقبلة
ده انت طلعت دماغ يا جدع
ودماغ متكلفة كمان
روح يا عسقول
انت من الاحرار
تحياتى ليك بجد يعنى مش تهريج



m5m
والنبى لا تروح تقوله الكلام ده
ماله العيش والفول
اه شريف كان هيتعشى فول لو كان ابوه جاب فول
بس ابوه ماجابش فول
فانا عشيت الواد بيض مسلوق



فتوح ابو المفاتيح
اولا كل سنة وانت طيب
ثانيا ماكلتش عيش وفول لان هانى ماجبش برضه العيش والفول
وبعدين انا ماكنتش بغسل المواعين فى اوضة النوم ده الموبايل هو اللى كان فى اوضة النوم وانا رحت جبته
ثالثا انت عرفت ازاى ان انا معنديش مطبخ
هو انا متراقبة ولا ايييييييييه؟
تحياتى ليك يا فتوح



soletoo
التورتة كانت من هايبر وان
وانا بصراحة مادوقتهاش لانى مش بحب موس البنانا انا كنت عايزاها موس شكولاتة
تحياتى ليكى



بنوتة مصرية
والله يارودى انا قلت اتدارك الموقف
ولما نزلت يوم الخميس الهرم عند ماما
فكرت اجيب هدية
قمت جبت بيجامة لشريف ابنى
نيهاهاهاهاهاهاع
بصراحة ماكنش معايا فلوس كتير تخلينى اجيب هدية للواد وابوه
فقلت كفاية الواد
تحياتى ليكى




فرنسا هانم
انا يا فرنسا يا ختشى
ماكنتش اعرف ان قدامه خمس دقايق ويكون عندى
انا لو اعرف انا كنت عملت العمرة
انتوا السبب برضه
مش كنتوا اديتونى خبر
ربنا يسامحكم بقى
لكن انا قلبى غضبان عليكم
وبعدين لا الحمد الله مافيش اخوات ليا يشبهونى كدة
انا كنت اخر فرد فى السلالة اللى من النوع ده
حتى هتلاقى على باب شقتى مكتوب الاتى
خيخة اخر فرد فى السلالة الخيخاخية
موطنها الاصلى غابات الخيخون
تعيش على نبات الخيخن
تحياتى ليكى يا فرنستى الغالية




صوت من مصر
يوم الخميس بقى لما نزلت الهرم عند الماما بتاعتى
روحت اشترى شوية حاجات
لقيت البلد كلها حمرة
ولقيت اتنين واقفين على الرصيف وواحد بيقول للتانى
الحق ياض واحدة مش لابسة احمر اهى
قعدت ابص بجنب عينى يمين وشمال
علشان اشوف مين
بنت ال........ ولا بلاش
اللى مش لابسة احمر دى
اتارى الواد كان يقصدنى انا
يعنى مش بس اصريت على الفول والعيش
لا وكمان مالبستش اللبس الرسمى للفلانطين داى
ولذلك انا استحق لقب خيخة عن جدارة
تحياتى ليك

شكرا ليكم كلكم على تواصلكم معايا
اختكم خيخة

nada_adly said...

معلش يا نانو على بال بس زحمة الطريق والناس

هههههههههههههههههههههههههههههه

ايه البوست الجميل ده
فعلا جميل جماااااال مالوش مثال
صدق اللي قال زي الخيال
هههههههههههههههههههههههههه

ممكن تبعتي لي شوية فول ورغيف عيش الله يكرمك لاني وحشني الفول المصري بتاعنا ووحشني العيش بتاع الطابونة بتاعنا

هههههههههههههه

بت خيخة وأى كلام said...

wanna be
اهلا بيك هنا
والله انا ماعرفش اخدمك اوى فى سؤالك
اللى يقدر يخدمك بجد هو احمد الصباغ صاحب مدونة خالو احمد
هو اكتر من خبرة ودراية فى مواضيع المدونات ده
تحياتى ليك




فاتيما
ايوة والنبى يا فاتيما ماتنسيش حكاية الميل المسجل بعلم الوصول ده
علشان ماتحطش فى مواقف بايخة تانى
شكرا ليكى يا فاتيما



شريف طلال
اللى حصل بعد كدة انى كملت غسل المواعين
ده انت فضولى اوى
تحياتى ليك



دكتور حر
اللهم حببها فى التورتة واصرفها عن الفول
هههههههههههههههههه
ههههههههههههههههههههههه
ههههههههههههههههههههههههههه
ههههههههههههههههههههههههههههههههههه
ههههههههههههههههههههههههههه
هههههههههههههههههههههههههه
هههههههههههههههههههههههههههههههههه
ههههههههههههههههههههههه
فطستنى على روحى من الضحك
شريف جاى من الاوضة التانية بيقولى مامى انتى بتضحكى كدة ليه بصوت عالى
ههههههههههههههههههههههههههه
ههههههههههههههههههههههه
والله العظيم انت سكر
تحياتى ليك يا محمد
هى فين امانى وخليفة
هما زعلانين منى؟



صاحب المضيفة
يعنى انا حرام عليا فى اللى عملته فيه
وهو مش حرام عليه يطب عليا كدة
طب يقولى انه جاى كنت على راى فرنسا هانم كنت عملت عمرة لمنظرى
تحياتى ليك يا ابو مالك



فزلوكة
للاسف انا من سكان اكتوبر ومعنديش بلكونة تبص على الكورنيش
ثم ان انا اساسا معنديش اى بلكونات تبص على اى حاجة
انا عندى شباك بيبص على الصحرا
فبالتالى ماشفتش اى حاجات حمرا يوميها
تحياتى



ابو خالد
انا بحب الفول بالسمنة او بالزيت العادى
بس هو ليه السؤال ده



appy
انتوا هتذلونى بقى علشان عملتلكم كام بوست
وبعدين هو كل ده ماكنتوش عرفتوا ان باب النجار مخلع



مستجدة
ههههههههههههههه
حلوة عار بايت دى
شكرا ليكى يا مستجدة


شكرا ليكم كلكم على تواصلكم معايا
اختكم خيخة

بت خيخة وأى كلام said...

ندى عدلى
انتى بس تعالى يا ندى وانا هاعزمك على اكلة فول محصلتش
تحياتى ليكى

خمسة فضفضة said...

السلام عليكم ورحمة الله وبركاته

بقي كده يا خيخه ، تشمتي الرجاله فينا

الله يسامحك

بس قوليلي هو العيش كان فينو ولا بلدي ؟؟؟

Desert cat said...

طيب وياترى بعد الاحداث المريعة الفزيعة دى هانى فضل متماسك
يعنى الراجل قالها فى الموبايل وجايب معاه تورتة
ويجى يلاقى غطا المكرونة فى ايدك
يا شمتاتة ابلة طازة فينا يا معشر الستات
ربنا معاك يا هاااااانى

Omar... [ خروشات ] said...

.....

للمرة الرابعه و العشرون بعد المائة السابعة، اذكرك يا استاذ هانى، انك لازم تشوف حل فى البطاطساية دى

كده مينفعشى ياعم، لالالا انا هاستدعى احسن دكتور نفسانى فى بر مصر.

لالالا متفهمشى غلط، الدكتور موش ليك

الدكتور للبطاطساية طبعا



انا عرفت دلوقتى ليه الرجالة هتخش الجنة

الصبر يارب

...

Anonymous said...

حب إستطلاع يا بنتى يا خيخه لأنه أحيانا طبق الفول بيعمل تأثير على الواحد فلا يستطيع رؤية الاشارات..
أبو خالد

Anonymous said...

يانهار ابيض

والله بجد الله يكون في عون مستر شريف ..والله حرام عليكي اللي انتي بتعمليه فيه ده ..
مش بقوللك انتي بتدعمي فكرتي في عدم الغلط برضو ...
وصدق اللي قال الفول والطعميه دول هما الكباب الشعبي لمصر
جزيتي خيرا على سؤالك

فضفضة said...

ههههههههههههه

يا شيخة حرااااااااام عليك

وال اية عايزة حد ينبهك دالراجل ريقه نشف

هابي فلانتين داي

كنت عايزة احنا نعمل اية نبعت لك قنبلة ملفوفة بورق احمر هههههههههههه
والسؤال اللى هيجننى دلوقتى

انتوا اكلتوا اية يا خيخة

ووالله يا خيخة انا يا حبيبتى من ثلاث سنين وانا اعتزلت الفلانتين

لانى كنت ايشة الدور زى ابو شريف كده

وولعت فى الشقة نار حمرا

وكلت ثلاثة صوابع روج بالفراولة وانتظرت اسم النبي حارسه
وصاينه

وفوجئت الساعة 9 وهو بيرجع 10 انه بيتصل يطلب منى اعمل كشري

كشري اية يا راجل هابي فلانتين
داي

قالى يا ولييييييية عيشي سنك

ههههههههه ومن ساعتها يا حبيبتى مش بقدر

اجيب سيرة اللون الاحمر

ومقضياها طبيخ غامق زى روحية من ساعتها

بوست هلكنى ضحك ربنا يخليكى يا رب

تحياااااتى يا قمر

Ali-7ob said...

ايه يا بت يا خيخة

دايما فاضاحنا كده
عيش ايه وفول ايه بس
ايه الرومانسية الخربة دى
وبعد ما يجيبليك هدية مفيش فايدة برضة
العيش والفول
ايه عندك فقر فول فى الدم
ربنا يعينه ويصبره اهانى
قوليله على بيقولك دورلك على واحدة خيخة تانية قانون جديد
عشان القانون القديم راحت عليه
:)

فضفضة said...

خيخة

نسيت اسجل اعجابي بطبق الفووووووول

اللى انتى حطاه

وعايزة اقولك انى مفتقداه

هنا فى السعودية جداااااااااا

والف هنا على قلبك

الفول

والتورتة كماااااان

Anonymous said...

على فكرة انا انونيمس الاخير ده يا خيخة
لما نشوف اخر اللي انتتو بتعملوه فينا ده
هو عشان يعني مش عندي مدونة ..ماااااااااااااااااشي

KHALIFA

آخر العنقود said...

السلاااااااااااااام عليكم
طبببببببببببببعا طبعا انا عارفة حمد اله على سلامتى
من غير ماتقولى
بجد بجد بجد ليكى وحشة ياخوخة
معلش بقى النت وسنينه

بس يعنى ينفع اللى بتعمليه ده ياخوخة
ارجع الاقى كل ده فايتنى

بس انت دماااااااااغ على البوست ده
ياشيخة ده حتى من غير فلانتين
يالا ربنا يصبره بقى

سلاماتى ليكى يانوناية
وسلميلى على شريف كتيير

mahmoud farag said...

لك الله يا هاني

عيش وفول !!! وقدرتي تكرريها كل ده؟؟


أمانه عليكي يا شيخه قصدي يا خيخه تقولي لهاني محمود فرج بيقول لك عاوزينك معانا تنور بلوجر .. وتعمل مدونة العيش والفول
طبعا هتسأليني ليه يعني العنوان ده؟
هقول لك
هتكون المدونه دي حكايات عمنا هاني .. كان الله في عونه .. مع الفول والعيش وعلب التونه .. والذي منه .. وكم المواقف الهائله اللي حصلت زي موقف الفلانتين

ياعيني عليك يا هاني
ماكنش يومك يا فالانتين

المهم يا خيخه .. متهيألي كده الناس نسيت تسأل عن التورته وشكلها زي ما هيا في التلاجه

حته من التورته حلوه كده وابعتيها لي

بوست زي العسل ... وفقك الله

أبوشنب said...

صدقيني ماحد فاهم غيرك

ده هو الفول ان تاني داي

يعني تجيبي الفول

وتنقعية مع عصير اللمون

وتعمليه ساندوتشات تاني يوم على طول

وبكدة تكون الدروس المستفادة من البوست

ان الفلان طين داي ده عيد للكفار والمشركين والعاطلين والاقطاعيين

اما العيد الشرعي بتاعنا

هو الفول تاني داي

الطائر الحزين said...

ايوة يرضينى طبعا انه يطب

لان مش هيبقى لها معنى ان يتصل بيكى ويقول لك انه جى ويلاقيكى كدة

لكن لو كان طب عليكى ولاقيكى متهيأه له

هيكون احسن بكثير

لك الله يا هانى

تخياتى

ربنا يبارك فيكم

وشكرا على اللفته الطيبة والملاحظة

باقى على الاربعون 5 سنوات

تحياتى

Doba said...

عيش وفول يا مفترية

وعاملة رومانسية والحب ازاى وحركات وازاى تقابلى جوزك لما ييجى

يقوم ييجى يلاقيكى مقابلاه بغطا الحلة
ده اللى علمتهولك

يا خسارة الفاصوليا البيضا
راحت عليكى ياخيخخة

انا هجوز هانى لعروسة تانية
وانتى اغسلى المواعين براحتك

يلا باى

الشنكوتي الكبير said...

عيش وفول

لا تصدقي معاكي حق
قال تورته قال
ونسي العيش والفول
الله يهديك يا هاني ومتنساش العيش والفول تاني

الا صحيح محدش قالك المره دي ان العيش والفول ممكن يكونوا حاجه مسفه وعيب تنشريهم في البوست
لحسن اجي في الرجلين تاني

سلاااااااااااااااااام

بت خيخة وأى كلام said...

خمسة فضفضة
اهئ اهئ اهئ اهئ
عاااااااااااااا
عاااااااااااااا
ولا فينو ولا بلدى
ماكانش فيه عيش خالص
هانى برضه يوميها ماجابش العيش والفول
عااااااااااااااااااااا
تحياتى ليكى



قطة الصحراء
لأ ماتخافيش على هانى
فضل متماسك برضه
اصله هو واخد على كدة
خلاص هو مسلم أمره لله
والراجل بصراحة ساكت وصابر وقانع على مابلاه
لدرجة انى بدأت اصدق فعلا ان له الجنة
تحياتى ليكى




خروشات عمر
هههههههههههههههههههه
هههههههههههههههههههههههه
ههههههههههههههههههههه
هههههههههههههههههههه
انت تعليقاتك بتفطسنى من الضحك
فاكر التعليق اللى انت كتبته يوم عيد ميلادى اللى هو كان عبارة عن رسالة موجهة لهانى
انا خليت هانى قرا التعليق بتاعك
ومن ساعتها وهو كل شوية يقولى ده الغريب حاسس بيا اكتر منك
اهه لا يعرفنى ولا يعرفك ومع ذلك الراجل حاسس ان ليا الجنة من اللى بشوفه منك
اهه دلوقتى لو خليته قرا تعليقك ده كمان
هيطير من الفرح
وعلشان كدة انا مش هاخليه يقرا تعليقك
علشان الموضوع مش ناقص شماتة
خلينا كدة احسن
على فكرة انت ايش عرفك ان اسمى الحركى بطاطساية
تحياتى ليك يا عموووووور



ابو خالد
اااااااااااااه حب استطلاع
انا افتكرتك بتعمل بحث على حالتى
تحياتى ليك


خليفة
اخيرا ظهرت
انت كنت مختفى ليه
وبعدين انت برضه مصمم انك جوازك هيكون غلطة؟
طب يارب يا خليفة تغلط قريب
علشان نفرح فيك
قصدى نفرح بيك
تحياتى ليك ومتتأخرش تانى




فضفضة
احنا ماكلناش يوميها حاجة
وبالنسبة للفلانتين داى
الفكرة ان انا كنت زيك كدة كل سنة اعمل استعداداتى واجيب هدية والاقى الراجل ولا على باله
فانا السنادى قلت خلاص مالهوش لزوم اكلف نفسى وفى الاخر مش هالاقى رد فعل من ناحيته فكبرت دماغى لدرجة انى نسيت اساسا الفلانتين داى
العجيب فى الامر انى لقيته هو اللى فاكر
ولحد دلوقتى هاموت واعرف مين اللى قالله
اصل انا عارفة جوزى نساى
معنى انه يفتكر الفلانتين داى
يبقى اكيد حد نبهه
تفتكرى مين اللى قالله على الفلانتين
لو عرفتى والنبى ادينى فكرة
تحياتى ليكى



على حب
اخويا الصغغن على
ايه النصايح اللى مش ولابد دى
انت بتنصح الراجل انه يتجوز عليا
ماشى يا على لن انسى لك ه1ذا الموقف
وبعدين هو الراجل كان قادر على القانون القديم لما هيقدر على القانون الجديد
تحياتى ليك يا على




فضفضة
انا ملاحظة ان فيه ناس كتير مفتقدة الفول المصرى
طب والله ولا ليكى عليا حلفان
انتى بس انزلى مصر بالسلامة وادينى خبر بعلم وصولك
وانا هاعزمك على اكلة فول هتاكلى صوابعك وراها
وبالنسبة للتورتة بصراحة انا مدقتهاش لانى ماليش فى موس البنانا لو كانت شكولاته كنت التهمتها
تحياتى ليك يا فضفضة


خليفة
طب ما تشد حيلك كدة واعمل مدونة
هما اللى عاملين مدونات احسن منك
ده انا اعرف واحدة خيخة عاملة مدونة
تخيل انت خيخة
وعاملة مدونة
تقوم انت يا راجل يا محترم مش عايز تعمل مدونة
تحياتى ليك




اخر العنقود
هيييييييه نانا جت
نانا جت
ايه يا بنتى كنت مفتقداكى ولما ماجتيش بقالك كتير افتكرتك زعلانة منى
حمدالله على السلامة
ممنورة المدونة
تحياتى ليكى



محمود فرج
هههههههههههههههههه
هانى يعمل مدونة
هههههههههههههههههههههههههههههه
هههههههههههههههههههههههههههه
انت عايز هانى يعمل مدونة
هههههههههههههههههههههههههههههههههه
ههههههههههههههههههههههههههه
هههههههههههههههههههههههههههههه
هانى اساسا مابيقراش مراته بتكتب ايه
عايزه يعمل مدونة
هههههههههههههههههههههههههههه
ههههههههههههههههههههههههههههه
ههههههههههههههههههههههههههههههههه
عموما انا هاقترح عليه اقتراحك ده
بس لو حصلى اى حاجة هتكون انت السبب
وياسيدى انا هابعتلك التورتة كلها
بس والنبى بلاش اقتراحاتك اللى تودى ورا الشمس دى
ههههههههههههههههههههههههههههه
عايز هانى يعمل مدونة
هههههههههههههههههههههههههههه
تحياتى ليك يا محمود





ابو شنب
يابن الايه
والله براوة عليك
انا كان نفسى اعرف اصل العيد ده
اتاريه عبارة عن
الفول تانى داى
تاهت عن بالى ازاى دى
تحياتى ليك يا ابو شنب




الطائر الحزين
يرضيك يا طائرى الحزين؟!!!!! يا نهار ابيض
وكمان جاى تكررها تانى وبعلو صوتك
اه يرضينى
ماشى يا طائرى الحزين
مقطوع عنك المصروف بجد
وكمان مافيش تورتة ليك
وامشى يلا من هنا علشان عايزين نرش مية
ياشماتة هانى و طنط ظاظا فيا
تحياتى ليك يا طائرى الحزين وكل سنة وانت طيب تانى



دوبا
هو ده اللى انا كنت خايفة منه
انت تيجى تبهدلينى وتهزئينى
وعمالة ادعى ربنا ان النت يقطع عندك انتى بالذات
بس تقريبا ربنا ماستجابش لدعائى
وقفشتينى برضه
وبعدين ايه ده
بجد هتخلينى انا اللى اغسل المواعين
هيييه
انا اللى هاغسل المواعين
هيييييييه
انا اللى هاغسل المواعين
شكرا يا دوبا مش عارفة اقولك ايه
جميلك ده مش هانسهولك طول عمرى
هيييييييييييه
انا اللى هاغسل المواعين
تحياتى ليكى يا ام يوسف



شكرا ليكم كلكم على تواصلكم معايا
اختكم خيخة

بت خيخة وأى كلام said...

الشنكوتى الكبير
جرى ايه يا ايهاب
خلى قلبك كبييييير
والنبى كفاية بقى انا اللى باروح فى رجليكم
وعمالين تلاقفونى لبعض
هدى اعصابك كدة وتعالى خدلك حتة تورتة وساندوتش فول
اختك خيخة

wanna b a physician said...

شكرا ليكى بس شكلك بتاكلى فول كتيييييييييييير لدرجة انك مش واخده بالك من الفلانتين والراجل ياعينى عمال يقولك هابى فلانتين وكلام من ده ربنا يكون فى عونه ويقدره على الفووووووووول

users online