Monday, February 18, 2008

أغلى الناس



حط راسه على المخدة وعينه مفنجلة
شوية وعينه قفلت وفتحت تانى
بس مافتحتش اوى بقت نص مفتوحة
شوية وقفلت تانى وفتحت فى تثاقل
قفلت تانى وفتحت فى تثاقل اشد
قفلت تانى ومافتحتش
بوسته ف جبينه
وف شعره وف كفوف ايده
قربت من ودنه وقلتله
شريف انا بحبك اوى
حرك راسه موافقة على اللى بقوله
قلتله انت بتحبنى؟
حرك راسه تانى
سألته تانى انت بتحبنى؟
قالى بصوت واطى جدا
يوووه يا مامى ايوة بحبك
انا عايز انام بقى
بوسته تانى فى خدوده
قربت من ودانه وقلتله
ربنا بيحبك
وانت كمان بتحب ربنا
ولازم تسمع كلامه
وكل الناس بتحبك وانت بتحب كل الناس
ولما تكبر هتحترمهم كلهم
علشان هما كمان يحترموك
ولما تكبر شوية هتساعد الناس
شيكو انت سامعنى
هز راسه
قلتله انا بحبك اوى
بصوت واطى جدا قاللى
وانا كمان بحبك اوى يا مامى
بوسته تانى فى خده
مد بقه وضم شفايفه علشان عايز يبوسنى
حطيت خدى عند بقه وخدت البوسة
مسكت المصحف
وقربت من ودنه وقريت
بسم الله الرحمن الرحيم
طه @ ما أنزلنا عليك القرأن لتشقى
إلا تذكرة لمن يخشى@ تنزيلا ممن خلق الأرض والسموات العلى@
صدق الله العظيم
خلاااااااص شريف راح فى النوم
بوسته تانى فى خده


انتهى

بت خيخة وأى كلام

48 comments:

صاحب المضيفة said...

أول تعليق

أحجز وأرجع

آخر العنقود said...

ايه الحلاوة دى ياخيخة
محسسانى انك بتعملى تنويم مغناطيسى
:)
بجد اسلوبك جميل فى تربية شريف
ربنا يخليهولكي يارب
بس بجد تعرفى ان الكلام ده هيأثر غيه فعلا

ربنا يوفقك ويعينك على تربيته على كل السلوكيات الاسلامية الجميلة يارب ياخيخة

تحياتى ليكى يانونا
يا ام شريف

صاحب المضيفة said...

ربنا يسعدك بيه ويسعده بيه


جميل ان الواحد بيربي ابنه على أساس حياته اللي ربنا هايساله عنها يوم القيامة

وجميل ان الواحد يزرع في ابنه حب الناس والخير لكل الناس

ربنا يوفقك وتعرفي تربيه أحسن تربية في ظل طاعة ربنا وبعيد عن كل شر وانحراف


سلامي للحاج شريف بقى


دمت في سعادة وهنا وطاعة

تــــايه ومش تـــايه said...

يا ريت كل ام زيك .مش تتمنى انو ينام قصدى يتخمد.ربنا يخليهولك ويخليكى ليه

Pink Unicorn said...

:-)
ربنا يخليهولك ويخليكى ليه
وتفضلوا دايما قريبين من قلب بعض
ربنا يقويكى و تكونى ام صالحه و يهديه و يكون ابن بار و انسان عظيم تكونى فخورة بيه

مشمش said...

ربنا يخلهولك ويباركلك فية وتلاقية لما يكبر من حفظة القران يارب

بنوته مصرية said...

ربنا يخلهولك يا رب ويحمية ويطلع ابن صالح

نفسي اشوفة يا نونا

الف بوسة مني ومن نور ليكم

رودي

مهندس مصري said...

ايه ده أنا لسه واخد بالي
أنا زي أخوكي
زي آسر يعني
هيييييييييييييييييييييه
الله يكرمك يا خيخة دا أنا يشرفني و الله


نتكلم في البوست بقى
أم و بتحب ابنها
و ابن و بيحب مامته
ربنا يخليهم لبعض و عقبال ما تجوزيه و عروسته تخطفه منك :)
علشان لما اقول طيبة يبقى كلامي صح مش من فراغ
:)

Nigro said...
This comment has been removed by the author.
خمسة فضفضة said...

السلام عليكم ورحمة الله وبركاته

ماشاءالله الله اكبر

ربنا يخليهولك يا نونا ويطرحلك فيه البركه
وتفرحي بيه وبعياله ان شاء الله

Nigro said...

مش بقولك انت ام روعة
إيه النعومة دي؟
تصدقي بالله
أنا قعدت أتصور المشهد دا قدامي
تحفة
يا بختك يا واد يا شريف بماما نورا
ربنا يخليهولك يا رب يا نوران و تفرحي بيه
و الله أنا هعيّط

Anonymous said...

ربنا يخليهولك يا خيخة
وتفرحي بيه كده وهو في الكوشة يااارب

اهم حاجة فعلا تربية ولادك على اساس من الدين لأن هو ده فعلاً اللي هيفضل فيه بعد ما يكبر ومش ممكن ينسى حاجات هو اتعلمها او انتي غرستيها فيه من صغره

ربنا يكرمك ويفرحك بيه كده لما يختم القرآن ويدخلك معاه الجنه ...آمين

KHALIFa

Soooo said...

يابنتي سيبي الواد ينام
ايه الرخامه دي
قال بتحبني
باحبك
بتحبني
باحبك
خبر ايه
انا لو مكانه كنت قعدت على حيلي وقلتلك
ايه النظام؟؟؟؟




ربنا يخليهولك يارب وتفرحي بيه وبولاده وولاد ولاده
وربنا يطرح فيه البركه يااااارب


سلاموووووووووز

همس الاحباب said...

انااول مرة ادخل مدونتك بصراحة واللى جذبنى اسمها وقرايت البوست بتاع اغلى الناس وعجبنى ساعتها عرفت انك بت خيخة واى كلام بس ام فاضلة وحنونة ربنا يخليكوا لبعض
وانا عندى عروسة تدفعى مهر كام ولا اتعملى حماة من دلوقتى
تحياتى ومزيد من التقدم والرقى
همس الاحباب

القلم السكندري said...

ربنا يرزقك بره

ويجعل لك منه قرة عين

حبة حاجات (ايمان) said...

ابنى نام وغمض عنيك #### وهات خدك يحضن خدى

مفيش اطيب ولا احن منى عليك #### غريزه خلقها ربى بتجرى فى دمى

امام الجيل said...

الله الله الله

ده بوست اعتقد الواحد لو علق عليه
هيقلل منه كتير

بجد ربنا يكرمك
ويخليه ليكى
ويخليكى ليه
وتغرسى فيه الحب
حب ربنا وحب الناس
وحبك وحب والده

جميل اوى لما يبقى عندنا نبتة بنغرسها بنفسنا ونضيف ليها كل جميل
وكل احتياج او خلق عايزين نشوفه حوالينا
داومى على كده كتير
ومتخلهوش يعمل اى حاجة وحشة
او يقول اى حاجة وحشة

عشان يسعدك دنيا واخرة
ربنا يخليكم لبعض

Anonymous said...

ربى أجعله بار بوالديه و أجعله خلف صالح لسلف صالح و بارك له فى عمره و ثبته على دينك و أجعل ذريته صالحة و أجعله ممن يستمعون القول فيتبعون أحسنه،على فكره يانوران أنتى أم صالحه بارك الله لك فى عمرك، و من ناحية آخرى أطعمى فلذة كبدك حب خير البشر رسول الله خاتم النبيين صلى الله عليه وسلم ،ففى هذه الأيام يتطاول السفلة على أعظم الخلق.. واخيرا و ليس اخرا دم مدونتك زى الشربات
أبو خالد

Anonymous said...

ربى أجعله بار بوالديه و أجعله خلف صالح لسلف صالح و بارك له فى عمره و ثبته على دينك و أجعل ذريته صالحة و أجعله ممن يستمعون القول فيتبعون أحسنه،على فكره يانوران أنتى أم صالحه بارك الله لك فى عمرك، و من ناحية آخرى أطعمى فلذة كبدك حب خير البشر رسول الله خاتم النبيين صلى الله عليه وسلم ،ففى هذه الأيام يتطاول السفلة على أعظم الخلق.. واخيرا و ليس اخرا دم مدونتك زى الشربات
أبو خالد

فرنسا هانم said...

سيبى الواد ينام يا خيخه
حرام عليكى
الكلمتين الحلوين دول تقوليهم اول ما يحط راسه على المخده
علشان يكون صاحى ومصحصح
ويدخلوا دماغه عدل
تحياتى لشريف
ولام شريف

Lemonada said...

ربنا يخلي ويحفظه
ولما يكبر ان شاء الله يرفع راسك وتفتخري بي
على فكره اسم شريف اسم جميل خالص وانا لما اتجوز حيكون اسم ابني ان شاء الله شريف وفي ادم كمان
هههههه
انا دي اول زياره لي والمجنونه ناني مجنونة بالمدونه بتاعتك فقلت اشوف المدونه
بس تحفه
زوريني اصلي كاتبه عني وعن ناني
سلام
ليمو
يومك كل منعنش ان شاء الله

Anonymous said...

3naya dm3t ..bo2loz

العنقـــــــاء said...

ما شاء الله الله اكبر ولا حول ولا قوة الا بالله

ربنا يحفظه ويخليه ليكي يارب

وعندي لشيكو عروسه حلوة اوي

بس انتي مهدي له الموضوع الاول وقولي له هي محوشه المهر والشبكة وعندها شقه

حكم على ايامهم الجايه اكيد البنت هي اللي هتقدم الشبكة وهتجيب الشقه

وربنا يسترها

على اللي موجودين حاليا

بنوته بوست روعه ما شاء الله انا كنت هنام مع شيكو بس قلت اكتب التعليق وبعدين انام

تحياتي وتقديري لشخصك الرقيق

wanna b a physician said...

ربنا يخليهولك ويبارك فيه

ابن حـجـر الـعـسـقـلانـى said...

يا سلام يا خيخة .. فكرتينى بابن أختى بقاله اسبوع ماجاش عندنا.. أنا ممكن ادفع نص عمرى .. لأ .. عمرى كله عشان أشوفه بيضحك ضحكة من قلبه .. أو لما أرجع البيت ألاقيه بيجرى عليا فرحان بإنى رجعت

ربنا يخلى لك شريف .. و يكبر و يبقى أحسن واحد فى البلد

بس سيبى الواد ينام شوية .. الواد خلاص تلاقيه كان بيقول فى سره:"هى مش هاتعتقنى بقى و لا إيه .. الواحد مايعرفش ينام له ساعتين فى البيت دة"ا

رئيس جمهوريه نفسى said...

عارفه يا ام شريف
نفسى ربنا لما يدنى ابن او بنت اعامله زى ما بتعاملى شريف
ربنا يخليه ليكى يارب ويحفظو ليكى من كل سوء قادر يا كريم ويخليكى ليه

دكتور حر said...

طبعا
لو اي حد مكانه هيقول اه

هو فاضي يقول لا وتناقشيه
لا ليه

والله العظيم
يا بنتي مش بالعافيه


هههههههههه
ربنا يخليكم لبعض

سكــر said...

ماشاء الله
ربنا يحفظهولك
ههههه
بتفكرنى بموقف لسا حاصل امبارح بس
طبعا الجو كان برد جدا
>>>>>>>>> كان ايه دا لسا برد جدا
المهم يستى الساعه 4 الفجر
وانا نايم جنب الولا محمود ابنى الصغير

لقيته بيصحينى ويقولى با با
با با
انت يا بابا
انا صحيت من النوم وبصيت ف الموبيل لقيت الساعه 4
قلت يمكن بيصحينى عاوز يعمل بىبى ولا حاجه
>>>>>>>> ال بى بى ال الله يرحم ابوه
هههههههه
المهم قلت ليه نعم يا محمود

الواد سكت فقمت من ع السرير وبقومه
لقيته متنح
قلتله فى ايه يا محمود

قالى هات بوثه يا بابا
هههههههه
كان هاين عليا
امممممممم
ولا بلاش علشان ام محمود
هههههه

صدقينى اجمل شىء فى الدنيا

نظرة طفل برىء


اسف انى طولت عليكى

تقبلى مرورى
احمد سكر

fatima said...

يا ست مش خيخة ولا اى كلام
يا جماعة
انتو مش فاهمين
أصلو فى اللحظات الحاسمة دى ممكن تطلع منه الاعتراف دا الى ميطلعش فى اليقظة ..
ماما بحبك
لو كان بالنهار و مصحصح بقى ...
خد عندك
نظام ذل و شحاتة ..وعشان خاطرى قولى ..بتحبنى؟ ..
وف الآخر هيبصلها بصة كدا زى بتاعة سوووو....فيما معناه ..ايه حكايتك يا ست انتى ؟!!!
ربنا يحرسه و يفرح قلبك بيه ..
العيال دى اتخلقت عشان يفكرونا دايما ان ربنا بيحبنا قووووى ..و انه بيدينا هدية بس احنا نقدر قيمتها بس...
فكرتينى بيوسف ..
و النبى بوسلى شيكو بوسة زيادة
...
كأنه يوسف ...
و كأنى أنا الى بوسته
ربنا يخليكوا لبعض
تحياتى و حبى و فرحتى بيكو وليكو

Nigro said...

أنا مش قادر أمسك نفسي و ماأعلّقش تاني
البوست دا جميل قوي يا نوران
جميل بجد
أنا قريته ييجي 10 مرات
و كل مرة بحس أني أول مرة أقراه
إيه ده؟.. إيه كم الرقة و العذوبة و النعومة اللي فيه دي؟
ربنا يسعدكوا يا رب
و يبقى شريف قرة عين ليكي و لهاني
BRAVO

صوت من مصر said...

بجد ربنا يخلوهولك ويكبر ويبقى مدون كبير

لماضة said...

ما شاء الله عليه
طبعا البوسه الاخرانيه دي بتاعتي صح
:D

عمر محمود said...

يا رب احفظه من كل مكروه وسوء
وزى ما سمع سورة طه يسمع كلام والديه
ربنا يخليهولك يا ست الكل

الطائر الحزين said...

شعرت انك تكتبى بقلبك هذه المرة

مزيج من الخوف والحب

عارفة انا خايف من ايه
انه اننا لا نحقق التقوى فيصاب بها أبناءنا

(وليخش الذين لو تركوا من خلفهم ذرية ضعافا خافوا عليهم فليتقوا الله)

تحياتى

الشنكوتي الكبير said...

ياااااااااه
جميل قوي يا خيخه
احساس جميل قوي
احساس طيب قوي

بجد يا خيخه انتي اسنانه قوي
ربنا يحميكي ويبارك في شريف وفي هاني ويحفظهملك ويسعدكم دايما

اتمنى ليكي كل الخير يا اختي الجميله ربنا يسعدك ويباركلك يارب

سلااااااااااااااااام
اخوكي ايهاب

Doba said...

حقيقى حقيقى

من أروع ما كتبتين

وحشنى جدا المجرم ده ووالله انا نفسى اشوفك علشان اشوفه

ربنا يحميه ويحفظه ويقر عيونك بيه ويقدرك تربيه تربية صالحة ويطلع ابن تفتخرى بيه دائما

تحياتى
هبة

Desert cat said...

يا كلاثو على شيكو امانة عليكى تبوسيه لى
ما شاء الله ملاك مغمض عنيه

النجمة الصامدة said...

:)

جعله الله من الذرية الصالحة
وجزاكِ عنه خيرا كثيرا

Dr. Kafy said...

ربنا يبارك لك فيه و ينبته نبات حسن

as.zaid said...

ربنا يخليهولك يارب ويباركلك قيه
على فكرة ان بعمل نفس الموضوع ده مع ولادى محمد وتقى
الحمد لله انى لاقيت حد زيى

ههههههههه
بوست جميل ربنا يكرمك
as.zaid

Ali-7ob said...

بت خيخة واى كلام
انا بصراحة مش عارف اعلق اقول ايه
بس بجد بوست مؤثر
العيال على قد ما هم مقرفين
على قد ما عليهم حاجات بتسعدنا جدا
ربنا يخليهولك
تحياتى ليكى

appy said...

ماشاء الله تبارك الله ربنا يخليه ليكى وتقدرى تربيه كويسه ويطلع راجل قد الدنيا

فضفضاتى said...

اختى نورا
أنا باحب شريف أكتر منك يمكن ماتصدقيش بس عارفه لما اتجوز لو ربنا مش رايد يكون ليا اولاد ده هايبقى ابنى ، أصل ربنا عارف شريف ده ايه ليا
ربنا يحميه ويخليهولنا
سلام
آسر

أنسانة-شوية وشوية said...

الله جميلة جدا طريقة سردك وعرضك للتدوينة ربنا يحميه ويبارك فيه وفي اولاد المسلمين جميعا ويكون ابن بار للك ووالده

MerMaid said...

وحشتيني يا دزمة
:)
ربنا يخليلك شريف يارب يا خيخية قمر المدونين يا اخف دم

تحياتي ليكي يا ام شريف
:)

dina said...

الله
ربنا يخليهولك يا رب و تشوفيه احسن واحد فى الدنيا يا جميلة

بت خيخة وأى كلام said...

شكرا ليكم كلكم على تواصلكم معايا
اختكم خيخة

د/اجدع بنوته said...

ماشاء الله بجددددددد

ونعم التربيه

ربنا يباركلك فييه

وتشوفيه راجل يسندك ف ايامك الصعبه

ويدخلك بيه وبتربيته الجنه يارب

بجد بجد .. عايزه حاجه م الاتنين

ياتدينى دروس ف تربية الاتفال

ياتطلعى كتاب بعنوان كيف تنشئين طفلا

يعنى ف الحالتين

مش هنتنازل عن خبرتك دى ياماما خيخه

users online