Sunday, February 24, 2008

طنط أم هانى


لأ مش حماتى

طنط أم هانى اللى هاحكى عنها النهاردة

دى كانت جارة ماما

طنط ام هانى بكريتها اسمها غادة

بس جرى العرف ان الست تلقب باسم اول ولد خلفته

حتى ولو كان بعد عشرين بنت

طنط ام هانى وجوزها عمو حسين زقوت فلسطنيين

ولادهم كانوا صحابى انا واخواتى

غادة الكبيرة كانت شبه ليلى مراد

وهانى ده كان فى سنى

وسها كانت اصغر منى بسنتين تقريبا

ورامى كان اد اختى الصغيرة

ومحمد ده كان اخر العنقود

طنط ام هانى وماما كانوا جيران

زى اللى بنسمع عنهم فى الحواديت

وبنشوفهم فى التلفزيون

كانوا دايما كويسين مع بعض

مش فاكرة ان حصل بينهم اى خلاف

افتكر مرة الانبوبة عندهم فضيت

قبل الغاز ما يركب

طنط ام هانى راحت عند ماما

وكملت باقى الطبيخ على البوتجاز بتاعنا

افتكر ان طنط ام هانى مرة بعتتلنا

كسكسى على الطريقة الفلسطينية

وده بيبقى عبارة عن كسكسى

وعليه حمص الشام ومليان لحمة

افتكر مرة ضيوف جم لطنط ام هانى

وماكنوش موجودين فى البيت

بابا وماما استضافوهم عندنا

وباتوا معانا ليلة لانهم كانوا جايين من سفر

وساعتها كانت طنط ام هانى هى واسرتها مسافرين

فاكرة ايام اجازة الصيف

كنت انا وغادة وسها نجيب كراسى صغيرة

ونجيب عرايسنا ولعبة المطبخ بتاعتنا

ونقعد قدام باب الشقة ونلعب سوا

فاكرة ايام الدراسة لما كنت باروح عندهم

علشان اذاكر مع هانى

او هانى يجيلنا علشان ماما

تذاكرلنا انا وهو درس علوم

فاكرة لما كنا كلنا

بنلعب سوا فى مدخل العمارة

فاكرة لما كنا نستنى سوا باص المدرسة

كانت مدرستى قصاد مدرستهم

وكان باصات مدارسنا بتيجى تقريبا فى وقت واحد

الساعة سبعة وربع

فاكرة لما كانوا بيجوا اعياد ميلادنا

واحنا بنروح اعياد ميلادهم

فاكرة ناهض ابن عمهم

كان اكبر مننا كلنا وكان شاب حليوة

وكنت بحب اوى اروح عندهم وناهض ده موجود

واقعد اتفرج عليه زى نجوم السينما

فاكرة لغتهم

بيقولوا على جدهم سيدى وعلى جدتهم ستى

افتكر مرة لما كانت غادة وسها عندنا فى البيت

بنلعب سوا

وكان عندنا برتقال قلتلهم افصصلكم برتقال

قعدوا يضحكوا اوى

قلتلهم فيه ايه؟

قالولى اصل احنا عندنا فى فلسطين افصص دى

معناها يعنى يعمل ريحة وحشة

فاكرة ان جه يوم من حوالى خمستاشر سنة

لقينا شقة طنط ام هانى وعمو حسين زقوت مقفولة

ومحدش موجود

فاكرة لما مر اكتر من شهر على الشقة

وهى لسة مقفولة

فاكرة عم جمال البواب الله يرحمه

لما قاللنا دول رجعوا فلسطين

أأأأأأأأأأأأأأأأأأأأأأأأأه

وحشونى أوى

قلبى متوغوش عليهم

نفسى اطمن عليهم

أنا ماليش فى السياسة

لكن فلسطين بالنسبالى

هى طنط ام هانى


انتهى

بت خيخة وأى كلام

45 comments:

خمسة فضفضة said...

السلام عليكم ورحمة الله وبركاته

هيييييييييييييييييه اول تعليق

fatima said...

يا حبيبتى يا نوران
حاسة بيكى و عارفة يعنى ايه قلبك ياكلك مرة واحدة على حد و تفتقديه قوى ...
و خصوصا الظروف الصعبة الى عايشنها أهلنا و احبابنا فى غزة ...
انا كمان ليا أصحاب من فلسطين ..كانوا معايا فى ثانوى بس الايام بعدتنا
يا ترى هما فين و جرالهم ايه؟؟
و من العراق كمان.. يوووه .... احنا لينا فى كل أرض جرح نازف ...
و مفيش آخر و الا ايه ؟؟؟
تحياتى و الف بوسة لشيكو حبيبى

خمسة فضفضة said...

اخيرااول تعليق عند خيخه مش مصدقع نفسي يا جدعان
ههههههههه


---------


ربنا يطمنك علي طنط ام هاني ويطمنا جميعا علي فلسطين كلها


الحكايه اللي انت بتحكي عليها والجيران اللي كانوا اكتر من الاهل والناس اللي كانت قلبها علي قلب بعض خلاص ماعدتش موجوده الا مارحم ربي

بس عارفه عندنا في بلدي فيه الشكل ده من العلاقات لسه موجود بين الجيران خصوصا بس برضو بدأ في الانقراض

Soooo said...

يالهوي عليكي يا خيخه
بجد يا بنتي بوست بسيط وهايل قوي
وبجد انا باعزك قوي قوي قوي وكتاب الله


------
بسم الله ما شاء الله
انا شايف نضوج فكري وفلسفي هايل في البوست ده





سلامووووووووووز

صوت من مصر said...

بجد كلنا بنحب فلسطين مع اننا ملناش فى السياسه لكن العشره والحب اهم من اى شىء فى البوست

Nigro said...

أنا ماليش في السياسة
لكن فلسطين بالنسبالي
هي طنط أم هاني
--------------
معنديش أي كلام أقوله
انت قولتي كل حاجة في الكلمة دي
برافو برافو برافو يا نوران

3ala asm masr said...

بوست جامد أخر حاجه بجد
كل المشاعر اللى فيه حلوه بشكل يخلى الواحد يعيط
كان نفسى يبقالى من كل بلد صاحبه
تحياتى ليكى يا قمر
على فكره
وحشتينى

عايز أتعلم said...

ياااااااه يا خيخة
حاسس والله باحساسك ده خصوصا لما تكوني مرتبطين ببعض كده وفجأه تفترقوا

ربنا يعوضك عنهم كل خير وتقدري تسمعي عنهم او يجيلك اي خبر عنهم خير
سلام

الطائر الحزين said...

ما تحدثتى به بين جيرانك هذا

شاهدته بعينى رأسى واكثر من هذا


ربنا يطمنك عليهم

وعلى فلسطين كلها

تحياتى

الشنكوتي الكبير said...

بصي يا خيخه
كتير قوي الواحد بيفكر الناس دي عايشه ازاي في ظل الفزع والرعب ده كله وفي ظل خيانة كل الناس ليهم

اقولك على حاجه انا جت عليا فتره والناس اقنعتني ان الفلسطينين دول كلهم ناس زباله وان هم اللي باعوا الأرض اصلا بالفلوس وان وان وان
وحاجات كتير خلتني جت عليا فتره حاسس ان هم السبب في اللي حصلهم
لكن رجعت فكرت لقيت ان مفيش حد اكيد ممكن يبيع نفسه بالطريقه دي
وان ده غرض البعض اننا نبيع القضيه علشان نبطل زن
عموما ربنا يفرج كربهم
وياريت دايما كلنا نفتكر زيك كل اخ فلسطيني وكل اسره فلسطينيه
وندعيلهم على الأقل

وبلاش نسمع كلام البعض اللي بيستغل بعض الأخطاء ويحولها لتبرير لكل الظلم اللي بيحصلهم
ربنا يطمنك على طنطك ام هاني
ويخليلك هاني جوزك واولادك
سلااااااااااااااام

Baker said...

سلامات لكل اهل فلسطين اللى مينفعش يبقوا خيخا امال مين اللى بيحفظ مية الوجة العربية

as.zaid said...

الله عليكى وغلى مشاعرك يا خيخة
ربنا يطمنك عليهم ويطمنا على كل الفلسطينين يارب
تحياتى لك


اسماء

صاحب المضيفة said...

ربنا يطمنك عليهم ويردهم بالسلامة تاني

جميل ان الوحد يكون بينه وبين جيرانه علاقات حميمية قوي كده


ربنا يزيد المحبة والألفة بين الناس



سلامي لشريف بيه

Desert cat said...

طيب مفيش اى وسيلة اتصال تطمنك عليهم
ولا هما راحوا واخبارهم انقطعت خالص ولا ايه
حاولى تسالى عليهم وان شاء الله يكونو بخير

حل وسط said...

وانا كمان
انا كان عندي طنط ام محمد
مامة صاحبتي ايمان
وطنط ام محمد كمان
مامة صاحبتي امال
وطنط ام محمد برضه
مامة صاحبتي مها
وطنط مش عارفة ام مين
مامة صاحبتي منال
ومامة صاحبتي ريم
والتلاته الاخرانيين ما اعرفش عنهم حاجة
اخر مرة شفتهم كنت في ثانوي
ربنا يكون معاهم وينصفهم
اما الاولانية
ايمان
فهيا عايشة في السعودية
وعندها عيال كتير
وامال عايشة في الاردن
وهيا كمان عندها عيال كتير
ربنا يباركلهم ويعينهم

ويطمنك على كل حببايبك

بس ازاي كنتو قريبين من بعض كده
ومشيو فجاه منغير ما يقولولكو؟

مهندس مصري said...

ربنا يطمنك عليهم يا خيخة
و ينصر الفلسطنيين كلهم

بت خيخة وأى كلام said...

فاتيما
احنا لينا فى كل أرض جرح نازف
جامد اوى تشبيهك وبيوجع اوى يا فاتيما
يارب طمنا على كل حبايبنا
تحياتى ليكى



خمسة فضفضة
ايوة فعلا نادر اوى دلوقتى لو لقيتى جيران بالشكل ده
ولو لقيتهم مقربين جدا من بعض
تعالى اتفرجى عليهم لو اتخنقوا مع بعض بيبقوا فضيحة
وبيقعدوا ينقلوا فى اسرار بعض ويكشفوا المستور
بصراحة الواحد بقى بيخاف وكل واحد قافل على نفسه مش عايز حد يعرف عنه حاجة
تحياتى ليكى يا فضفضة




سووو
امممممم
ولا يا سوووو
انت بتتريق عليا ولا بتتكلم جد
اصل البقين دول

بسم الله ما شاء الله
انا شايف نضوج فكري وفلسفي هايل في البوست ده

شميت فيهم ريحة تريقة
اوعى يا واد تكون بتتريق
والله شكلك كدة بتتريق
ايه النظااااااااااام؟
هههههههههههههههه
تحياتى ليك




صوت من مصر
معاك حق



نيجرو
شكرا ليك يا محمد


على اسم مصر
شكرا ليكى يا هندودة
وانتى كمان وحشتينى
تحياتى ليكى



عايز اتعلم
شكرا ليك يا خليفة
ويارب فعلا اسمع عنهم اخبار كويسة



الطائر الحزين
يارب ياطائرى الحزين
يسمع منك ربنا
تحياتى ليك



الشنكوتى الكبير
عارف يا ايهاب
اهه انا عاكسك بقى
انا كنمت دايما اسمع ان الفلسطنيين بيكرهونا
وبيتهمونا احنا بالخيانة
علشان لما السادات راح اسرائيل وعرض السلام
ساعاتها الفلسطنيين رفضوا يقعدوا على المائدة المستديرة مع اسرائيل واتهموا السادات بالخيانة واى مصرى بقى خاين من وجهة نظرهم
لكن بمرور الوقت سمعت بعد كدة انهم ندمانين على انهم ماوفقوش على اللى كان السادات عايز يعملهولهم
لكن فى الاخر انا متفقة معاك
بحس انى دى كلها اشاعات
ناس بتحاول تروجها علشان العرب يبيعوا القضية ومايشغلوش بالهم بيها
ونسيب الفلسطنيين لوحدها تعانى من الاحتلال ومنمدش ليهم اى مساعدات
يارب نفسى يجى اليوم بقى اللى نبقى فيه كلنا ايد وحدة بجد
نفسى حالة الجيرة الجميلة اللى كنت عايشاها مع جيرانى الفلسطنيين
تتنقل للبلدين
نفسى بجد الاقى مصر بتسمح لفلسطين انها تطبخ عندها علشان انبوبتها فضيت
وتلاقى فلسطين جايبة معاها حلة كسكسى باللحمة لمصر
ونروح نعمل افراحنا هناك
ويجوا يعملوا افراحهم هنا
نفسى نكون جيران بجد
ونخاف على بعض
مش جيران اسما وخلاص
يارب انت قادر على كل شئ
تحياتى ليك يا ايهاب


بكر
مش بس الفلسطنين ماينفعش يبقوا خيخة
المفروض ان العرب كلهم ماينفعش يبقوا خيخة
علشان مية الوجه العربية تكون محفوظة بجد
تحياتى ليك




اسماء ابو زيد
شكرا ليكى يا اسماء



صاحب المضيفة
يارب يا ابو مالك
نطمن على كل حبايبنا
تحياتى ليك



قطؤطة الصحراء
للاسف يا قطوطة
مافيش اى اتصال
لانهم سافروا ماكنش لسة كان عندنا تليفون مثلا علشان يتصلوا بيه
واحنا ماكوناش نعرف عنوانهم فى فلسطين
ربنا يطمنا عليهم
تحياتى ليكى



حل وسط
لحد دلوقتى ماعرفش ايه سبب سفرهم المفاجئ
ومعرفش ليه ماسابوش خبر
ربنا يطمنا عليهم
تحياتى ليكى



شكرا ليكم كلكم على تواصلكم معايا
اختكم خيخة

بت خيخة وأى كلام said...

مهندس مصرى
شكرا ليك يا محمد

همس الاحباب said...

بجد مع انى زعلان منك
لانك مش عايزة تزورينى فى مدونتى
بس بصراحةالدموع كانت فى عينى وكنت حاسس بحزن من كلام البوست بس بصراحة انبهرت بالاسلوب وسرد الاحداث بسلاسة وتلقائية نادرة الحدوث
قلبى متوغوش عليهم
نفسى اطمن عليهم
أنا ماليش فى السياسة
لكن فلسطين بالنسبالى
هى طنط ام هانى
بجد روعة بوست محتاج بوست للتعليق عليه
وربنا يطمنك عليهم
تحياتى خالد

Soooo said...

شكلي كده هاجي اعض شريف
يابنتي وهو انا لما اقولك اني بجد شايف نضوج فكري وفلسفي دي تبقى شتيمه؟؟؟
لا بقولك ايه .. صحصحي معايا كده
وايه النظام؟؟؟؟




سلاموووووووووز

آخر العنقود said...

ماشاء الله
ربنا يطمنكوا عليهم ياخيخة
وحشتينى يا ام شريف بجد

تحياتى ليكى على مشاعرك الجميلة دى
سلميلى على شيكو

Anonymous said...

أختى العزيزة نوران
أرجو من حضرتك كتابة بوست لنصرة رسول الله صلى الله عليه و سلم " يَا أَيُّهَا الَّذِينَ آَمَنُوا مَا لَكُمْ إِذَا قِيلَ لَكُمُ انْفِرُوا فِي سَبِيلِ اللَّهِ اثَّاقَلْتُمْ إِلَى الْأَرْضِ أَرَضِيتُمْ بِالْحَيَاةِ الدُّنْيَا مِنَ الْآَخِرَةِ فَمَا مَتَاعُ الْحَيَاةِ الدُّنْيَا فِي الْآَخِرَةِ إِلَّا قَلِيلٌ (38) إِلَّا تَنْفِرُوا يُعَذِّبْكُمْ عَذَابًا أَلِيمًا وَيَسْتَبْدِلْ قَوْمًا غَيْرَكُمْ وَلَا تَضُرُّوهُ شَيْئًا وَاللَّهُ عَلَى كُلِّ شَيْءٍ قَدِيرٌ (39) إِلَّا تَنْصُرُوهُ فَقَدْ نَصَرَهُ اللَّهُ إِذْ أَخْرَجَهُ الَّذِينَ كَفَرُوا ثَانِيَ اثْنَيْنِ إِذْ هُمَا فِي الْغَارِ إِذْ يَقُولُ لِصَاحِبِهِ لَا تَحْزَنْ إِنَّ اللَّهَ مَعَنَا فَأَنْزَلَ اللَّهُ سَكِينَتَهُ عَلَيْهِ وَأَيَّدَهُ بِجُنُودٍ لَمْ تَرَوْهَا وَجَعَلَ كَلِمَةَ الَّذِينَ كَفَرُوا السُّفْلَى وَكَلِمَةُ اللَّهِ هِيَ الْعُلْيَا وَاللَّهُ عَزِيزٌ حَكِيمٌ (40)سورة التوبة
أختى الفاضلة نصرة رسول الله نصرة لفلسطين و لكل بلاد المسلمين المدنسة بأقدام حثالة البشر
أبو خالد

الباحث عن الحقيقة said...

الدمعه هتفر من عينى
ثوانى اجيب منديل من عسقول واجى
روحى يا شيخة قطعتى قلبى
.........
جمال البوست ده انه بيفكرنا ان الناس المحاصرين فى غزة بشر زينا
هم كمان جيرانا لنا تاريخ مشترك ياما سافرنا عندهم وياما جم عندنا
وحقهم علينا كمصريين اننا نطمن عليهم لان الجار للجار
انا كمان وحشتنى طنط ام هانى
يا ترى سها اتجوزت ولا لسه
ههههههه

فدا said...

السلام عليكم

مش عارفة اقولك ايه
انا بقالي فترة بشوف مواضيعك
بس النهاردة حسيت اني عايزة ارد
كان نفسي اطمنك عليهم
بس ممكن احاول لو قلتيلي الاسم الكامل للأب

:)



على فكرة قريت رد عندك
مش فاكرة لمين
بيقول انه كان فاكرة انو احنا بعنا ارضنا
مش عارفة الكلام دا ازاي حد يقتنع فيه
و العجيب انه في ناس خليجين كتير بيعتقدو كدة
ولا هم فعلا مش عايزين يوجعو دماغهم بينا .. فبيقولو الحق علينا
للناس دي .. ومعلش يا يا ام شكشوكة
للناس دي عايز اقول بجد انتو اللي بعتو الارض مش احنا واحنا مش عايزين منكو حاجة اصلا

و انتي و شريف زي العسل والله ربنا يحميكووو


فدا

Anonymous said...

ربنا يطمنك عليهم ويطمنا جميعا على كل الفلسطينيين والعراقيين وكل المسلمين فى الأرض وينصرنا
... بوست جميل ياخيخة بجد
تعيشى وتفتكرى يا أم شريف
مستــ ج ــدة

Anonymous said...

أختى نوران أهديك هذة القصيدة
" للشاعر فاروق جويدة

ماذا تبقى من أرض الأنبياء؟




ماذا تبقى من بلاد الأنبياء..


لا شيء غير النجمة السوداء


ترتع في السماء..


لا شيء غير مواكب القتلى


وأنات النساء


لا شيء غير سيوف داحس التي


غرست سهام الموت في الغبراء


لا شيء غير دماء آل البيت


مازالت تحاصر كربلاء


فالكون تابوت..


وعين الشمس مشنقةُ


وتاريخ العروبة


سيف بطش أو دماء..


ماذا تبقى من بلاد الأنبياء


خمسون عاماً


والحناجر تملأ الدنيا ضجيجاً


ثم تبتلع الهواء..


خمسون عاماً


والفوارس تحت أقدام الخيول


تئن في كمد.. وتصرخ في استياء


خمسون عاماً في المزاد


وكل جلاد يحدق في الغنيمة


ثم ينهب ما يشاء


خمسون عاماً


والزمان يدور في سأم بنا


فإذا تعثرت الخطى


عدنا نهرول كالقطيع إلى الوراء..


خمسون عاماً


نشرب الأنخاب من زمن الهزائم


نغرق الدنيا دموعاً بالتعازي والرثاء


حتى السماء الآن تغلق بابها


سئمت دعاء العاجزين وهل تُرى


يجدي مع السفه الدعاء..


ماذا تبقى من بلاد الأنبياء؟


أترى رأيتم كيف بدلت الخيول صهيلها


في مهرجان العجز…


واختنقت بنوبات البكاء..


أترى رأيتم


كيف تحترف الشعوب الموت


كيف تذوب عشقاً في الفناء


أطفالنا في كل صبح


يرسمون على جدار العمر


خيلاً لا تجيء..


وطيف قنديل تناثر في الفضاء..


والنجمة السوداء


ترتع فوق أشلاء الصليب


تغوص في دم المآذن


تسرق الضحكات من عين الصغار


الأبرياء


ماذا تبقى من بلاد الأنبياء؟


ما بين أوسلو


والولائم.. والموائد والتهاني.. والغناء


ماتت فلسطين الحزينة


فاجمعوا الأبناء حول رفاتها


وابكوا كما تبكي النساء


خلعوا ثياب القدس


ألقوا سرها المكنون في قلب العراء


قاموا عليها كالقطيع..


ترنح الجسد الهزيل


تلوثت بالدم أرض الجنة العذراء..


كانت تحدق في الموائد والسكارى حولها


يتمايلون بنشوة


ويقبلون النجمة السوداء


نشروا على الشاشات نعياً دامياً


وعلى الرفات تعانق الأبناء والأعداء


وتقبلوا فيها العزاء..


وأمامها اختلطت وجوه النساء


صاروا في ملامحهم سواء


ماتت بأيدي العابثين مدينة الشهداء


ماذا تبقى من بلاد الأنبياء؟


في حانة التطبيع


يسكر ألف دجال وبين كؤوسهم


تنهار أوطان.. ويسقط كبرياء


لم يتركوا السمسار يعبث في الخفاء


حملوه بين الناس


في البارات.. في الطرقات.. في الشاشات


في الأوكار.. في دور العبادة


في قبور الأولياء


يتسللون على دروب العار


ينكفئون في صخب المزاد


ويرفعون الراية البيضاء..


ماذا سيبقى من سيوف القهر


والزمن المدنس بالخطايا


غير ألوان البلاء


ماذا سيبقى من شعوب


لم تعد أبداً تفرق


بين بيت الصلاة.. وبين وكر للبغاء


النجمة السوداء


ألقت نارها فوق النخيل


فغاب ضوء الشمس.. جف العشب


واختفت عيون الماء


ماذا تبقى من بلاد الأنبياء؟


ماتت من الصمت الطويل خيولنا الخرساء


وعلى بقايا مجدها المصلوب ترتع نجمة سوداء


فالعجز يحصد بالردى أشجارنا الخضراء


لا شيء يبدو الآن بين ربوعنا


غير الشتات.. وفرقة الأبناء


والدهر يرسم صورة العجز المهين لأمة


خرجت من التاريخ


واندفعت تهرول كالقطيع إلى حمى الأعداء..


في عينها اختلطت


دماء الناس والأيام والأشياء


سكنت كهوف الضعف


واسترخت على الأوهام


ما عادت ترى الموتى من الأحياء


كُهّانها يترنحون على دروب العجز


ينتفضون بين اليأس والإعياء


ماذا تبقى من بلاد الأنبياء؟


من أي تاريخ سنبدأ


بعد أن ضاقت بنا الأيام


وانطفأ الرجاء


يا ليلة الإسراء عودي بالضياء


يتسلل الضوء العنيد من البقيع


إلى روابي القدس


تنطلق المآذن بالنداء


ويطل وجه محمد


يسري به الرحمن نوراً في السماء..


الله أكبر من زمان العجز..


من وهن القلوب.. وسكرة الضعفاء


الله أكبر من سيوف خانها


غدر الرفاق.. وخِسة الأبناء


جلباب مريم


لم يزل فوق الخليل يضيء في الظلماء


في المهد يسري صوت عيسى


في ربوع القدس نهراً من نقاء


يا ليلة الإسراء عودي بالضياء


هزي بجذع النخلة العذراء


يتساقط الأمل الوليد


على ربوع القدس


تنتفض المآذن يبعث الشهداء


تتدفق الأنهار.. تشتعل الحرائق


تستغيث الأرض


تهدر ثورة الشرفاء


يا ليلة الإسراء عودي بالضياء


هزي بجذع النخلة العذراء


رغم اختناق الضوء في عيني


ورغم الموت.. والأشلاء


مازلت أحلم أن أرى قبل الرحيل


رماد طاغية تناثر في الفضاء


مازلت أحلم أن أرى فوق المشانق


وجه جلاد قبيح الوجه تصفعه السماء


مازلت أحلم أن أرى الأطفال


يقتسمون قرص الشمس


يختبئون كالأزهار في دفء الشتاء


مازلت أحلم…


أن أرى وطناً يعانق صرختي


ويثور في شمم.. ويرفض في إباء


مازلت أحلم


أن أرى في القدس يوماً


صوت قداس يعانق ليلة الإسراء..


ويطل وجه الله بين ربوعنا





وتعود.. أرض الأنبياء

أخوك أبو خالد

بطوط حبوب said...

ملكيش فى الشياسيه دا انتى كلامك قاسى اوى اوى اوى
واقوى من اى حد اتكلم فى السياسيه
دى اول مره اعلق هنا
بس بجد البوست ده راااااااااائع
يارب يكونوا بخير

بت خيخة وأى كلام said...

همس الاحباب
اعتذر عن نقصيرى مع الكتير منكم
ماتزعلش



سوووو
والله يا سووو افتكرتك بتتريق
اصل انا متعودتش ان حد يجاملنى كدة
شكرا ليك



اخر العنقود
شكرا ليكى يا نانا



ابو خالد
انا اكتب بوست
عن نصرة الرسول؟؟؟؟؟؟؟؟
للاسف يا ابو خالد
انا ماقدرش اعمل ده
انا اقل بكتير انى اكتب بوست عن سيدنا محمد رسول الله صلى الله عليه وسلم
الحاجة التانية بقى انى اساسا مش مقتنعة ان سيدنا محمد رسول الله حد يقدر يهينه
واساسا ازاى نقتنع ان فيه حد يقدر يهين الرسول وعلينا ان احنا نكتب بوستات ونعمل مظاهرات لنصرة رسولنا الكريم
انا بالنسبالى سيدنا محمد ده حاجة كبيرة اوى وفوق اوى
محدش يقدر يطولها بشوية كلام لا هيودى ولا هيجيب
سيدنا محمد مش محتاج مننا ان احنا نكتب بوستات علشان ننصره
لانه اساسا محدش يقدر يهينه
فيه مثل بيقولك الكلاب تعوى والقافلة تسير
دول شوية كلاب بتهوهو
معقول انا انزل من مستوايا لمستوى شوية كلاب واهوهو معاهم علشان اوضحلهم وجهة نظرى
مايغوروا فى داهية
انا لو كتبت بوست عن سيدنا محمد
معنى كدة انى صدقت بجد ان سيدنا محمد اتهان
وعلشان كدة لازم ادافع عنه
وانا من جوايا مش مصدقة يبقى ليه التفت لكلامهم
من وجهة نظرى البسيطة جدا
ان سيدنا محمد اكبر بكتير من ان اى حد يقدر يهينه
واكبر بكتير ان واحدة خيخة تكتب عنه بوست
سيدنا محمد عليه الصلاة والسلام
هيفضل هو رسولنا الكريم
كلامنا عنه بالايجاب مش هيزوده
وكلام بعض المغرضين عنه بالسلب مش هينقصه
هيفضل دايما هو سيدنا محمد رسول الله وخاتم الانبياء
اسفة يا ابو خالد
اذا ماقدرتش البى طلبك
لكن لو مصمم ان حد يكتب بوست عن رسول الله فانا متهيالى ان فيه ناس احق منى بالشرف ده
عندك دكتور حر وابو العساقيل والباحث عن الحقيقة
والطائر الحزين
على ما اعتقد من معرفتى بمدونتهم
انهم قادرين على كتابة مثل هذا البوست
لكن انا ماقدرش
انا خيخة
تحياتى ليك

فدا said...

او معلش حد مدون يقول كدة

إبعت الرسالة دي
*************************
تحديث
عاوز تموت جعاااااااااااااااااان؟
عيش فى سيناء او العريش اليومين دول
عشان الفلسطينين ياكلو اكلك
والحكومة متجبلكش اكل بداله بالعند فى الفلسطينين

بت خيخة وأى كلام said...

الباحث عن الحقيقة
مش عارفة بصراحة اذا كانت سها اتجوزت ولا لسة
لكن اللى عايزة اعرفه هو ناهض اتجوز ولا لسة؟


فدا
مين اللى باع الارض
قصدك المصريين؟
وبتتكلمى على انهه ارض
فلسطين ولا مصر
عموما انا كل اللى اعرفه ان جوز طنط ام هانى اسمه عمو حسين زقوت
غير كدة انا معرفش
لو عرفتى حاجة ابقى طمنينى



مستجدة
شكرا ليكى



ابو خالد
احسنت اختيار القصيدة
شكرا ليك


شكرا ليكم كلكم على تواصلكم معايا
اختكم خيخة

بت خيخة وأى كلام said...

فدا
مش فاهمة حاجة
يعنى ايه الفلسطنيين ياكلوا اكلك

يعنى ايه بالعند فى الفلسطنيين

يا جماعة بطلوا بقى خلافات
احنا ليه عاملين زى القط والفار كدة
مانبطل شغل العيال الصغيرة ده ونكبر بقى ونعرف مين عدونا بجد
ياجماعة ده احنا عرب
عربببببببببببببب
افهموها بقى
عدونا واحد معروف للكل
بلاش نسيب القضية الاساسية ونمسك فى حاجات تافهة


طبعا يا فدا
الكلام ده مش موجه ليكى انتى بعينك
ده كلام موجه لينا كلنا


شكرا ليكى

يوميات عيل مصري said...

ايه ده؟
حرام عليكي الكلام ده يتدفن جوة البلوج وبس
دي احسن مقال قريته عن فلسطين في الفترة اللي فاتت
ومع ذلك
انا شيخ جامع يا خيخة؟
ماشي
المقال مأثر في ومش عايز اضحك
عاوز اقولك برافو عليكي .. احسنتي
تعرفي أحسن حاجة في المقال إيه

الأنسنة
إنه تعامل بإنسانية مع حاجة الناس كلهم بيتعاملوا فيها بتشنج

ربنا يسمعك سمع خير عن طنط أم هاني
انا لسة متكلم مع واحد ساحبي فلسطيني ما اعرفش عنه حاجة من 25 سنة
احمد

بت خيخة وأى كلام said...

يوميات عيل مصرى
انت منورنى النهاردة يا احمد
عجبنى اوى تعبير انسنة
شكرا ليك يا احمد
وشكرا على زيارتك دى
ويارب مانتحرم منها ابدا

بنوته مصرية said...

الله الله يا خيخه

مشاعر حلوة وذكريات حرام تموت

انا برضه عندنا جيران في بيت بابا بناتهم صحابي لحد دلوقتي مش متصورة فاجئا مكلمهمش

الله يكون في عونك

ويارب معاهم ومع كل الناس في فلسطين والعراق

ربنا يحفظهم ويخليهم يارب

تحياتي يا احلي خيخة

norahaty said...

السلام عليكم ورحمة الله وبركاته.مقدرش اقول الا..الله000الله 000الله.موضوع حلو اوى اوى او الاصح معروض ومكتوب بسلاسه غريبه لانه اكيد صادق وطالع من القلب.وبرضه زى ماكتبت فى المدونة اللىقبل دى(دكتور حر) ان دى اول زيارة لى للمدونة دى لكن لن تكون الاخيرة.وانا بدأت مدونتى من اول شهلر فبراير لكن ادينا بنتعلم
وشكرآجزيلا

mahmoud farag said...

ايه الاحساس ده؟؟؟

بجد أحسست بكم العمق في كلماتك والتي أراها عملا فنيا بالغ الروعه وليس مجرد تدوينه من تدوينات خيخه

التدوينه دي وما فيها من أحساسيس يتعمل لها كتاب عشان بيفسر معانيها الخفيه اللي انتي قصدتيها

عارفه دي احلي حاجه قريتها انهارده .. وده مش مجامله

اسلوبك دائما يجذب الانتباه ويضع القارئ في قلب الحدث فأحسست كأنني أنتي وأحببتهم كحبك وافتقدتهم بشده لما رحلوا وتمنيت لو أنني أراهم لدقائق قليله أو استمع لصوتهم عل هذا يطفئ لهيب الشوق في قلبي

كلامي ده مش تعليق وخلاص ولا مجامله انما بجد حسيت ده من كلماتك

شكرا لك أختي خيخه ويارب نلتقيهم بيوم جديد

سكــر said...

ماشاء الله عليكى يا ام خالد

عذرا انا مش هتكلم عن البوست

لانى بيتهيأليا الاصدقاء اتكلمو كتير

انا هتكلم عن ردك على ابو خالد
اللى طالب بوست لنصرة الرسول عليه افضل صلاه وسلام

عجبنى جدا ردك المنطقى

ردك الشافى

الرسول فعلا اكبر مليون مره

من اننا نرد عليهم ببوست او موضوع او او او او مظاهره

او

الشيخ محمد سالم اميارح على قناة الناس
قال اكتر من 50 طريقه لنصرة الرسول عليه الصلاة والسلام


معلشى ام شريف

انا رديت على ردك

ومردتشى على البوست

تحياتى الحاره ليكى

وبوثه للاستاذ شريف

اخيكى احمد سكر

سكــر said...

انا اسف جدا

غلطت وقلت ام خالد

اممممممم

يا ام شريف

تقبلى اعتذارى

واعتذار خاص للاستاذ شريف

احمد

بت خيخة وأى كلام said...

بنوتة مصرية
يارب ماتتحرميش من اصحابك ابدا يا رودى
ومايحرمش حد ابدا من اهله وجيرانه وعشرته وناسه
تحياتى ليكى




norahaty
اهلا بيكى يا نورا
ومنورانى دايما
تحياتى ليكى



محمود فرج
ربنا يخليك يا محمود
بعض ما عندكم يا سيدى
تحياتى ليك




سكر
شكرا ليك يا احمد
ولحقت نفسك لما صلحت حكاية ام خالد دى
كنت خلاص هاسن سنانى واروح اعضعض فى مدونتك اخليك تصحى مش هتلاقى فيها فتفوتة
منورنى دايما يا احمد
شكرا ليك





شكرا ليكم كلكم
اختكم خيخة

قبلة الحياة said...

ما شاء الله ولا حول ولاقوة الا بالله

بجد انت مشاعرك رقيقه اوي واسلوبك جميل انا حست اني كنت معاكي لحظة بلحظة .. كان ليا بردو صديقه وجيراننا وعزلوا وتقريبا نفس القصه بس دوول كانوا مصريين

واللي نفسي ربنا يكرمها وتروح فلطسين جارتنا اللي فوقينا مطلعه عيني كل لما الغسيل اللي على الحبل ينشف الاقيه مبلول
ولما ااقول لبابا معلشي اصل الدنيا شتيت عليه
افتكر
احمد حلمي
هي الدنيا مش بتشتي الا على بدلتي انا بس

بجد ربنا يجمعك بيهم على خير ويطمن قلبك عليهم امين يارب

تحية خالصه لفكرك الجميل

فرنسا هانم said...

ماشاء الله يا خيخه
ايه ده يا عسوله
جميل قوى انك توصلى احساسك بالبساطه دى
انا بحييكى
وادعوا من الله ان ينصر اهل غزه
اختك
فرنسا

مدونه من اجل الحب said...

احلى مافى الدنيا لما الواحد يكون ليه ذكريات جميله مع ناس بيحبهم ولما يعد مع نفسو يفتكرهم ويفتكر ذكرياتهم تلاقيه بيبتسم ويمكن يضحك
احساس رائع
ربنا يارب يطمنك على طنط ام هانى
وعلى كل اللى زيهم
اللهم امين

بت خيخة وأى كلام said...

قبلة الحياة
شكرا ليكى
واهلا بيكى فى مدونتى المتواضعة
والا صحيح هى الدنيا مابتمطرش الا على بدلتك بس
هههههههههه
تحياتى ليكى


فرنستى الغالية
امين يارب
شكرا ليكى يا فرنستى الجميلة


مدونة من اجل الحب
شكرا ليكى ويارب فعلا اطمن عليهم
تحياتى ليكى

شكرا ليكم كلكم على تواصلكم معايا
اختكم خيخة

hani said...

مساء الخير خيخه ما عندي كلام اقوله لانه فعلان مش قادر ارد ولا اقول اي حاجه بس هقلك كلمتين (خاتم المرسلين
ياسر وعمر - جدي ولا سيدو مدينه نصر
بوقع ممكن توصل لرساله مع خالص تحياتي

hani said...

من 2008 ولحمد لله سبحان والله
ايام ومن احلا الايام وبنا يعلم قدر الله ما شاء فعل تحياتي

users online