Wednesday, March 05, 2008

يلا نعمل بؤجة


اللى جاب ملاية هو بس اللى هيدخل البلوج

واللى ماجابش يقف برة ويرفع ايده لفوق

معلش لو فيها رزالة منى

هاتوا كمان كيس زبالة او كيس كبير

يلا ورايا

كل واحد يجيب الملاية بتاعته

ويفرشها قدام الدولاب بتاعه

يلا افتحوا الدولاب وعيشوا بقى


امممممممممممممممم

اه انتوا اساسا مش عارفين هتعملوا ايه


كل واحد يبص على هدومه اللى فى الدولاب

حد فيكوا تخن والبنطلون ده بقى ضيق عليه

يرميه على الملاية

حد فيكم عمل دايت وبنطلوناته وسعت عليه

يرميها على الملاية

القميص ده الياقة بتاعته قربت تدوب

من كتر الاستعمال يرميه على الملاية

والجاكت اللى متعلق ده

وموجود فيه رقعة وعايزين توده للرفا بقالكم سنتين

هاتوا الجاكت وارموه على الملاية

والجيبات اللى ضاقت بعد الجواز

والخلفة واللذى منه ارموها على الملاية

اشتريتوا قميص جديد الشهر اللى فات

دوروا على قميص غيره وارموه على الملاية

الستات اللى عندها عيال كل واحدة فيكم

تعمل فرز لهدوم المحروس

والحاجة اللى صغرت عليه

وازعرت عليه ترميها على الملاية

جلاليب مش بتتلبس وزاحمين بيها الدولاب على الفاضى

هاتوها وارموها على الملاية

هدوم مدارس قديمة محطوطة فى الدولاب

ومالهاش لزمة ليكوا هاتوها وانتوا عارفين هترموها فين

ايييييون على الملاية برافو عليكم

خلاص عملتوا فرز لهدومكم

وانتوا يا ستات عملتوا فرز لهدومكم

وهدوم الرجالة وهدوم العيال

كويس اوى

يلا بقى بسك على الجزم

هاتوا كيس الزبالة او الكيس الكبير

ها حد فيكم اشترى جزمة جديدة

اللى اشترى جزمة جديدة

يدور على اى جزمة قديمة عنده ويطلعها

خصوصا لو كانت نفس لون الجزمة الجديدة

عندكم جزم ضيقة عليكم أو واسعة

الجزم الضيقة مش هتوسع

وبتلبسوها وبتعملوكم فئافيئ فى رجليكم من ورا

يبقى لزمتها ايه

مستخسرين فيها الفلوس اللى اتدفعت

ومصممين انكم تلبسوها برضه

مافيش الكلام ده

يلا هاتوا الجزم الضيقة لانها مش هتوسع

ولا انتوا رجليكم هتصغر

والجزم الواسعة مش هتصغر

ولا انتوا رجليكم هتكبر

خلاص نموكم وقف عند هذا الحد

خلاص خلصتوا

برافوا عليكم

ماتنسوش تفتحوا درج الشرابات بتاعتكم

وتطلعوا الشربات المخرومة من عند الصباع الكبير

وتطلعوا الشربات السليمة بس عندكم من نفس اللون اكتر من شراب

وحطوا الشربات فى كيس بلاستيك صغنن

بعد ما تعملوها كور طبعا

علشان الشربات ماتهش عن بعضها

الملاية بقى اللى جواها الهدوم اربطوها بؤجة

وانزلوا بقى ودوا الحاجات دى لاقرب جمعية خيرية

وبس خلاص وجزاكم الله خيرا عما فعلتوه

اهم حاجة متنسوش تاخدوا الملاية تانى

بس خلاص

سلام

بت خيخة وأى كلام
ملحوظة هامة
ماتنسوش تخدوا كل يوم معلقة عسل اسود
وتتغذوا كويس علشان فاضل
اقل من شهر على تجمعنا للتبرع بالدم
ولا انتوا نسيتوا الموضوع ده؟

62 comments:

Doba said...

بجد بجد بجد

ربنا يبارك فيكى
ويحفظك
ويجازيكى يا خيخة على مقدار الخير اللى جواكى
========
انا وقعت من الضحك على فئافيئ
========

انا عندى شنطة والله لميت فيها الحاجت دى بقالى فترة بالفعل ونفسى اروح جمعية رسالة اللى فى الطوابق اوديها

بإذن الرحمن احاول النهاردة انزل انا ويحيى نوديها وحطيت يا افندم كل اللى قلتيه بالفعل من كل شكل ولون
========
بالنسبة للتبرع انا صعب لان لسه قدامى شوية عالتبرع الجاى
=======

انا فرحانة بيكى قوى والله
وربنا يعلم اد ايه
=======
سلام يا صاحبتى
هبة

بت خيخة وأى كلام said...

شطورة دوبا
هاجيبلك شكولاتاية كبيرة علشان انتى اول واحدة
وبالنسبة للتبرع بالدم انت سماح المرة دى خليكى انتى فى المرة الجاية
جزاكى الله خيرا يا هبهوبة
وبوسيلى يوسف كتييييير

Doba said...

على فكرة

من المعتاد ان الحبيبة او الأزواج بيقولو لبعض لا إله الا الله والتانى يرد بمحمد رسول الله وما الى ذلك

البت خيخة بقى

كل لما بكلمها بلاقيها بتتعمد مع قفل اى مكالمة معايا او مع غيرى بنفس الحاجة

انا قلت اقولكم على حاجة عنها جديدة محدش يعرفها
===========
وهرجع واقول ربنا يبارك فيكى
ولا اقولك
انا هقولك ربنا يعودلك اللى بتعمليه كله من خير فى شريف ابنك ويكون ابن بار بيكى وبوالده

هبة

بت خيخة وأى كلام said...

ههههههههههههههههههههه
يافضحانى
بس انا ماكنتش اعرف انها بتاعة الحبيبة بس

انا اعرف انها بتاعة المؤمنين كلهم لما يجوا يفترقوا عن بعض بيقولوا كدة علشان يرجعوا لبعض تانى ومافيش حاجة تفرقهم ابدا

appy said...

طيب اقف وارفع ايدى بره ههههههههه
انا مكنتش عارف بقى
لا بجد ربنا يكرمك على الفكرة انا بعملها كل فترة بس مش لجمعيه ايتام لحد تانى ربنا يكرمك يا ام شيرى ويبقى فى ميزان حساناتك

مهندس مصري said...

الحاجات دي بنوزعها على القرايب و الغلابة بدون جمعيات و من زمان يا ستي و من غير بؤجة و لا حاجة
:)

الربان said...

تحياتي

جازاك الله خير...و ليتني كنت في مصر الان
لاساهم بما استطيع...لكن ان شاء الله المرة القادمة...

لو كل منا تبرع ولو بشيء واحد....الدنيا هاتبقي احلي و اجمل للمتبرع و المتلقي.

تحياتي و تقديري.

دكتور حر said...

دعوه عامة

تم افتتاح جمعية خيخه للأعمال الخيريه

اللي عنده اي هدوم خيخه
او جزمه خيخه
او اي شيء خاخ عليه الزمن

يحوله
وينتظر أجر كبير مش خيخه

ربنا يتقبل منك يا خيخه
ويجعله في الميزان
وانا واقف بره ورافع
ايدي

:)

as.zaid said...

جزاكم الله خيرا على التذكرة

shayma said...

طيب انا واقفه بره ورافعه ايدى
منا مكنتش اعرف حكايه الملايه دى
سماح المرادى
ها ادخل بقى
ههههههههه

بجد يا خيخه ربنا يجازيكى خير بجد
ربنا يقدرنا ونفضل نعمل وننشر الخير يمكن فعلا حالنا يتحسن

تسلم ايدك على البوست الحلو ده
سلامى
:))

همس الاحباب said...

برافو بجد
فكرة جميلة ورائعة
واحنا نشهر جمعية خيرية باسم خيخة للاعمال الخيرية
بس بجدالبوست دمه خفيف ولذيذ قوى قوى
بس الحمدلله عندى فى البيت قايمين بالواجب مش مخليين قديم ولا جديد
كله بيتوزع اول باول وانا طبعا ما بقدرش اتكلم بخاف من الحكومة احسن ايديها طرشة
جزاكى الله خيرا
تحياتى خالد

مدحت محمد said...

جزاكى الله خيرا فعلا
بس لازم ملاية

Soooo said...

سبحان الله
انا كنت عمال افكر اقوللك تعملي موضوع على يوم اليتيم اللي بيناسب اول جمعه من كل شهر .. وتقولي للناس يجمعو اي هدوم قديمه ويجيبو اي شيكولاتات وعصاير او فلوس نجيب بيها الحاجات دي واللي عنده لعب اطفال قديمه او يعرف يجيبلنا لعب اطفال بسعر رخيص
ونفرز الحاجات دي ويكون مسئول عن الفرز حد فاضي ومش بيشتغل وفكرت انك ممكن تساعدي في الحوار ده
وبعد الفرز والتنضيف والحاجات اللي تصلح للاطفال والحاجات اللي ماتصلحش نوديها لأي فرع من فروع رساله او اي جمعيه تانيه .. ونتجمع كلنا في يوم اليتيم ده ونروح نزور دار ولا نقسم نفسنا فرقتين ونروح دارين ونضحك مع العيال ونلعب معاهم ونحسسهم بالفرحه

بجد انتي لو توكلتي على الله ونزلتي مجموعة مواضيع في السكه دي ان شاء الله هتلاقي ناس كتير عايزه تكون معاكي


ملحوظه
مين اللي قال انك خيخه؟؟؟؟؟



سلامي لشريف ابن اختي



سلاموووووووووووووووز

Soooo said...

استدراك
-------
يوم اليتيم بيناسب اول جمعه من كل شهر ابريل .. يعني تقريبا فاضل شهر .. بيتهيألي ممكن نلحق نعمل حاجه

الدور والباقي عليكي انتي تسخني الناس وتشجعيهم



سلاموووووووووووز

Nigro said...

أنا بقى ماجبتش الملاية
و مش هاجيب حاجة
ليه بقاااا؟
أصل الحاجة مامتي مقشّطاني أول بأول
لدرجة ان قريب قوي هيتبرعوا ليا
أمهات أول زمن
كويسين يعني
ربنا يبارك فيكي يا نونا
و يباركلك في شريف يا رب

د/اجدع بنوته said...

تصدقى طول اليوم

النهارده ف الكليه

مفيش ع بالى

غير خيخه

هتعمل ايه بملايتنا

افتكرتك هتفرشيهم وتقعدينا

وتلميهم وتحدفيهم ف اقرب بير ميه معدنيه

لكن خالفتى توقعاتنا

ربنا يباركلك

simple girl.. ..simple dream said...

الله عليكى
هو دة الكلام
انت بجد لازم تغيرى خيخة دة
وتخليه

اجدع واحدة فى مصر

المتمردة said...

ربنا يباركلك ويحفظك ويجعله ف ميزان حسناتك.... وياريت فعلا نبقى جادين ف الموضوع دة وجزاكى االله كل خير

آخر العنقود said...

sdasdربنا يجازيكى خير ياخيخة يارب
بس تعرفى اول مرة اعرف ان اللفة بتاعتك الملاية اسمها بؤجة
بجد والله
:)
ألا هوه لازم ملاية؟
يالا زى بعضه
ربنا يكرمك يارب على افكارك
***********
نيجى بقى للمهم
ألا وهو اسئلتك اللى انتى سألتينى عليها
انا كنت مستنياكى تفتحى ايميلك عشان نتناقش فيهم شوية
بس انتى واضح انك مش بتفتحى كتير
فما علينا
انا هجاوب وبراحتى ومش عايزة حد يضايق من انى هطول
لانهم بجد سؤالين حلوين

بصى بقى يانونا سؤالك الاول اللى هوه بتاع الطفل القيادى
فده انا محتاجة ان اعرف الاول منك
ازاى بتحكمى على الطفل انه غير قيادى؟
لان من خلال اللى هتقوليه هناقشك فيه
معلش بس عشان تكون اجابتى محددة
لانى لو فتحت فى النقطة دى من غير تحديد هتبقى هيصة
:)
ولينا عودة للسؤال ده تانى
*********
سؤال التانى بقى يانونا
بصى بقى اولا المشكلة فعلا مش فى الطفل سواء كان وحيد او لا المشكلة بجد بتكون فى تاعمل الوالدين معاه ازااااااااااى؟
يعنى زى المتعارف عليه فى كل اسرة ان الطفل الاول او الوحيد من نوعه
او الاول فى العيلة عموما بيكون متمتع بقدر اكبر من الاهمية وبيكون مدى العناية والرعاية بيه عالية جدا
فمدى الحرص والخوف على الطفل المبالغ فيه بيعرض الطفل الى ان يتسم ببعض السلوكيات السيئة زى الاتكال على الغير وعدم الاعتماد على نفسه وعدم الثقة بذاته

وده طبعا بيتغير تمااااااااااااما فى وجود طفل تانى برده ازااااااااى؟
يعنى فى حالة وجود طفل تانى معاه بيكون الاب والام اكتسبه خبرة فى التربية الى حد ما فتبدأ الثقة فى الزيادة والقلق فى النقصان وبالتالى بيكون الطفل التانى اكثر اعتمادا على نفسه
"مش معنى كده انى اقصد اهمال الطفل التانى طبعا"
فى حين ان الطفل الاول لايستطيع الاعتماد على ذاته
وده طبعا بسبب الحرص الزائد عليه من والديه
عشان كده يانونا لازم يكون فى اعتدال فى المعاملة مع الطفل بمعنى عدم تلبية جميع رغباته بصورة زايدة او حرمانه من شئ وعليى الطفل ان يدرك ذلك

يعنى من الاخر كده ده بيرجع للوالدين اكتر منه للطفل نفسه لان الطفل مش هيكون خجول او انطوائى
او يكون ذو ثقة بذاته الا من خلال ما يقدمه له الاباء من تعاملات معه

انا عارفة ان كلامى كتير بس بجد اسئلتك جميلة يانونا
وعاوزة اتكلم فيها اكتر بجد
بس ردى عليا فى سؤاك الاول تانى عشان اوضحلك اللى انا عاوزاه
ولو فى اى حاجة مش فاهماها من كلامى الملغبط ده عرفينى عشان اوضحها

تحياتى ليك يا ام شريف
ربنا يخليهولك ياقمر

أختك أخر العنقود

Ahmed Al-Sabbagh said...

الصديقة الخيرية الخيخة العزيزة

نشكرك على طريقة عمل البؤجة

بالمناسبة بقى

احنا العيال البلوجرية اتفقنا نروح ملجأ قريب

تيجى معانا ؟؟


مستنى ردك

KING TOOOT said...

تحياتي على البوست ده
بجد فكرة ممتازة
غن كل واحد فينا يحاول يتبرع بإللي مش محتاجه لناس تانية محتاجاه
جزاك الله خيرا
KING TOOOT

Anonymous said...

أختى نوران :
أعتقدت أنك هتلمى الملايات و نروح على البحر ونفرد و نقعد لحد الغروب لأن كان فيه صورة توحى بذلك و عندنا فى بورسعيد زادت القرى السياحية و ابتلعت الشاطئ اللى ربنا أنعم علينا بيه و الناس أهل البلد بيروحو بعيد و يعملوا خيمة و يفرشوا ملاية ياكلوا عليها و يفضلوا قاعدين للمغرب و فجأة و جدتها فكرة طيبة بس أنا لى رأى متخلى كل واحد يشترى طقم واحد جديد أحسن علشان عزة نفس الغلابة
أبو خالد

3ala asm masr said...

كل دى مواضيع نزلت من ورايا؟
ماشى ماشى
جزاك الله خيرا وجعله فى ميزان حسناتك ان شاء الله يا نوران وربنا يباركلك فى شريف

قبلة الحياة said...

ما شاء الله ولاحول ولا قوة الا بالله

ربنا يحفظك ياخيخة ويبارك فيكي يارب

جزاكي الله كل خير على اللفته الطيبه والدعوة الجميله دي منك

ربنا يجزيك خير باذن الله

وان شاء الله جاري التنفيذ بس من زمان ناقص بس الجمعيه الخيريه ودي كانت مهمه اخويا بس هو كسول حبتين

ربنا يبارك فيكي يارب ويحفظك

تحياتي واحترامي

فرنسا هانم said...

جدعه يا خيخه
بس الناس اللى انتى موقفاهم على باب المدونه
هرونى تفتيش
وراسهم والف طبنجه
يشوفوا الملايه قبل ما ادخل
والا هيزنبونى
ابقى قوليلهم خفوا شويه على خالتى فرنسا
ما اجمل ان نذكر بعضنا البعض ان هناك من يحتاج الى مساعدتنا
فرنسا هانم

mabioon said...

لو كل واحد عمل كده مكنش ده بقى حالنا وانا عن نفسي هبتدي اعمل كده انشاء الله

مستــ ج ــــدة said...

ربنا يباركلك ياخيخة ويجعله فى ميزان حسناتك ويقر عينك بشريف ويخليلك ابو شريف
.
.
علم وجارى التنفيذ سيادتك
اى اوامر تانية سيادتك
ألف شكر

fatima said...

نوران الغالية
دايما سباقة بالخير و الحلجات الحلوة
خليتينا نكسف من روحنا و احنا بنقول خيخة جرالها إيه و ملاية أيه يا خواتى اللى عاوزنا نقوم نجيبها
بؤجة الهنا و تتصرى فيها يا رب
بس أحنا بنعمل كدا و خالتى بتودى الحاجات لجميعة رسالة
أما حاية التبرع بالدم ..أنا نفسى أعملها بس عاوزة مكان موثوق فيه ... أضمن ان الدم دا هيروح لحد من غير أستغلال مادى ..و كمان انا ملقطش مرض و أوكس أهلى بيا هما موش ناقصين مشاكل من ناحيتى يعنى ...
قوليللى هتروحى فين و يمكن ينفع أبقى أطب عليكى يوميها أذا الظروف سمحت ..
و بوسة كبيرة لشيكو
تحياتى

عابد الرحمن said...

واللي ناوي يخس يعمل ايه
بجد جزاكي الله الجنة
يا اقوى خيخة خلقها ربنا
على فكرة
مرسي على كلامك بجد رقيق اوي
ومرة تانية جزاكي الله الجنة

صوت من مصر said...

اه خيخه بتجمع عشان تتبرعلى صح
انا عن نفسى موافق جدا

عاشقه الفردوس said...

خيخه ربنا يبارك فيكي
ويخليلك شريف وتخاويه عن قريب


انا معاكو في التبرع ده بس بتروحوا كلكم فين يعني

قوليلي ياخيختي


بحبك ياخيخه

بت خيخة وأى كلام said...

appy
خلاص ممكن تدخلى يا ابى
ومش لازم لدار ايتام
الفكرة فى المبدأ نفسه
تحياتى ليكى



مهندس مصرى
طب وبتشخط ليه يا عم محمد
برضه مش هتدخل بدال مجبتش الملاية
تحياتى ليك



الربان
ممكن توصى اهلك اللى فى مصر انهم يعملوا كدة بالنيابة عنك
ولما تنزل انت بنفسك ابقى اعملها كمان مرة
تحياتى ليك وترجع بلدك بالسلامة ان شاء الله



دكتور حر
احسن خليك كدة متذنب علشان جاى متأخر
تحياتى ليك يا محمد ومنورنى




اسماء ابو زيد
برافو عليكى يا اسماء انك لاحظتى انها تذكرة
لانى متاكدة ان كلكم جواكم خير وكلكم بتعملوا ده من غير ما حد يقولكم
انا كان هدفى انى افكركم بس وكمان بالمرة كلنا ناخد ثواب
تحياتى ليكى



شيماء
امممممممممممممم
اوك ادخلى بس من غير ما حد مايشوفك من المتذنبين علشان مايقولوش ان فيه كوسة فى الموضوع
تحياتى ليكى




همس الاحباب
ايديها طرشة؟؟؟؟؟؟؟
طب والله لاقولها
اصل انا فتانة
بس هى مين اللى ايديها طرشة
تحياتى ليك يا خالد



مدحت محمد
لا مش لازم ملاية
تحياتى ليك




سوووو
انت بس عليك تحلم وهتلاقى احلامك مجابة يا عم سوووو
وبالنسبة لزيارة الايتام انا معنديش مانع اتفقوا وبلغونى هكون تحت امركم
تحياتى ليك يا سووو
وطمنا على والدك



نيجرو
اوك يبقى انت عليك تتغذى كويس علشان هنحتاج نشرب من دمك قريب
قصدى هنحتاجك تتبرع بدمك قريب
متنساش معلقة عسل اسود كل يوم حتى ولو مش بتحبه تعالى على نفسك علشان اللى محتاجين دمك يستاهلوا انك تيجى على نفسك عشانهم
تحياتى ليك وللست الوالدة





اجدع بنوتة
بقى عمالة تفكرى فيا يا هانم ومش مركزة فى محاضراتك
ماشى هنعديها المرة دى
لكن المرة الجاية هتقفى تتذنبى معاهم برة
تحياتى ليكى ياسمسمة




سيمبل جيرل
شاهندة
خلينا فى اسم خيخة اهه اضمن بيه انى لو استخيخت فى يوم محدش يجى يلومنى
خيخة بقى وليس على الخيخة حرج
تحياتى ليكى



المتمردة
ميرسى اوى
تحياتى ليكى ومنورانى



اخر العنقود
هههههههههههه
لا يا نانا مش لازم ملاية
وبالنسبة لتساؤلاتى انا رديت عندك على الماسينجر
انتى بقى اقرى كلامى ومخمخى فيه وقوليلى اعمل ايه
وشكرا ليكى جدا يا نانا على اهتمامك ومعلش بقى تعباكى معايا
ربنا يباركلك يارب
تحياتى ليكى




احمد الصباغ
طبعا جاية
قولولى امتى وانا معاكم ان شاء الله
تحياتى ليك



كينج توت
ميرسى اوى ربنا يكرمك
تحياتى ليك ومنورنى


ابو خالد
والله فكرة رائعة طبعا
واللى يقدر يعمل كدة يبقى جزاه الله خيرا
انا كلامى مش لازم تاخدوا بيه بالحرف انا كنت اقصد التذكرة ليس الا
تحياتى ليك يا ابو خالد وتحياتى لشعب بور سعيد كله




على اسم مصر
هندودة
ربنا يخليكى ويباركلك يارب
تحياتى ليكى




قبلة الحياة
ربنا يباركلك يارب وشجعى انتى اخوكى
تحياتى ليكى



فرنسا هانم
وسع ياض منك لله
فرنسا هانم عندنا وتوقفوها برة وقال ايه بتفتشوها
دى تدخل على طول
مش اهم حاجة انكم سلسلتوا العجلة
يبقى خلاص مافيش منها خوف
تحياتى ليكى يا فرنستى الغالية



mabioon
تكون بداية موفقة ان شاءالله
تحياتى


مستجدة
امممممممممممممم
لأ يا مستجدة مافيش اى اوامر النهاردة تقدر تروحى
تحياتى ليكى



فاتيما
بصى بالنسبة للتبرع بالدم
انا عن نفسى باروح فى مركز تبرع الدم اللى فى الدقى مكان نضيف جدا ورحت اتبرعت فيه اكتر من مرة
بس اخر مرة رحت لما عملولى الهيموجلوبين طلع عندى انيميا فقلولى تعاليلنا كمان شهرين كدة تكون الانيميا راحت
فقلت ماروحش لوحدى المرة الجاية واخدكم معايا
وكنت كتبت قبل كدة ان احنا نتجمع ونروح مثلا فى اول ابريل
بس لحد دلوقتى محددناش امتى بالظبط
اكيد هيبان فى الفترة الجاية وهاعلن ده عندى فى البوست لما كلنا نتفق
ولو جيتى هتنورينا اكيد
تحياتى ليكى




عابد الرحمن
اهلا اهلا منورنى يا عابد
ياسيدى اللى ناوى يخس ممكن يستنى شوية ويطلع شوية فلوس دلوقتى ويخلى حكاية الهدوم دى بعدين
تحياتى ليك وميرسى على الدعوة الجميلة




صوت من مصر
اهه يا جماعة واحد عايز اللى يتبرعله خدوا فيه ثواب جزاكم الله
تحياتى ليك


عاشقة الفردوس
بالنسبة للتبرع بالدم
احنا لسة اول مرة هنتجمع كمان شهر تقريبا وده يديكى فرصة يا عاشقة انك تتغذى كويس وتهتمى بموضوع الاكل اللى فيه نسبة حديد علشان الانيميا
وانا كنت قلتلهم ان احنا نروح المركز القومى للتبرع بالدم اللى هو فى الدقى لان ده انا مجرباه ومكان نضيف بس لو عايزين نروح مكان تانى نتبرع فيه انا معنديش مشاكل اللى انتوا عايزينه
تحياتى ليكى
وبحبك يا عاشقة



شكرا ليكم كلكم على تواصلكم معايا
اختكم خيخة

بنوته مصرية said...

تصدقي بالله انا بعمل كدا فعلا

انا لبس نور بتاع الصيف اللي فات لما جيت اطلع الشتاء طلعته للايتام والغلابه قولت الحمد الله ربنا ميسرها ولما يجي النونو التاني ابقي اشتري له

وكل لبسي ولبس خالد برضه بيجي يتخانق معايا لو لقي بنطلونه مش موجود اقوله جب غيرة صعب عليا واحد واديهوله هههههههه

وبجد جزاكي الله كل خير

بجد اقتراح كويس بتاع سوو نروح نزور الايتام ونلعب معاهم

بصراحه من يوم ما اتجوزت مبقتش بزورهم كنت قبل ما بتجوز بروح دار الرساله اللي في الطوابق في فيصل وبلعب مع الاطفال وباكلهم كمان
والله ده احلي وقت وانتي في وسطهم

ياريت يا نورا انتي اللي هتعرفي تحمسينا

بارك الله لكي
علي فكرة انا فعلا اخذت بالي من الموضوع ده كل ما تقفلي معايا السماعه تقوليلي لا اله الا الله

انتي مش خيخه خالص
حرام عليكي بتظلمي نفسك بالاسم ده

بحبك اووي
رودي

عايز أتعلم said...

اااسف على التأخير والله
بس ياللا بقى .
موضوع جميل بجد يا خيخخة ومكنتش اتوقع انك تقولي كده بس خالفتي كل توقعاتنا...ربنا يجزيكي خير يا رب
ااما بالنسبة لموضوع الدم ده ..فأنا اتبرعت بالدم السنة اللي فاتت في الكلية ووقعت علطول ..فمعلش اعذريني منه لان نسبة الهيموجلوبين عندي قليلة يعني 14 وهي المفروض كده في اقل حد للنورمال ...معلش سماح بقى

عايز أتعلم said...

انا عملت المدونة يا خيخة وباعتلك بقالي يومين
وانتي منفضالي ..
ارجو الزيارة قبل ماتروحي لماما وتعلقي على البوستين ...سلام

nada_adly said...

انتي يا استاذة البؤجه

يا حبيبة قلبي ياللي قلبك كبير اوي

وحشتيني اوي اوي اوي

والدليل

قالوه

http://nadaadly.blogspot.com/

ههههههههههههههههههههههههه


شرفينا وستجدي ما يسرك هونا

على فكرة يا نوران دي فعلا أسألتك

واعذريني على التأخير لاني بس عندي ضغط شغل شوية

بس على فكرة متابعة جدا ومستمتعة جدا بمدونتك

حتى لو ما لحقتش اعلق ...بس بالحق أقرأ ...

لاني باحب اسلم عليكي واطمن عليكي يومياً من كلامك

كل حبي وتقديري ليكي

ربنا يكرمك يارب وربنا يجعل كل خير وكل كلمة حق في ميزان حسناتك يارب

بيسوو said...

ربنا يجازيكي خير عننا ان شاء الله

بت خيخة وأى كلام said...

بنوتة مصرية
شطورة يا رودى
بس بعد كدة ابقى استأذنى خالد فى الهدوم بتاعته علشان الراجل مايحطكيش انتى نفسك فى ملاية ويحط على باب ملجأ
تحياتى ليكى وبوسيلى نور كتير



عايز اتعلم
اممممممممممم
لا برضه هتاخد معلقة عسل اسود
وهتروح تتبرع وكلنا هنكون سوا ولو واحد مننا وقع الباقى هيسنده
يعنى مالكش حجة
هنشرب من دمك يعنى هنشرب من دمك
لا مفر ولا تراجع ولا استسلام
والف الف الف مبروك على المدونة يا خليفة
تحياتى ليك





ندى عدلى
استاذة البؤجة
ههههههههههههههههههههههههههههههه
حلو اوى المسمى ده
ههههههههههههههههههههههههه
انا رحت يا ندى وشوفت البوست الجديد
بجد فكرة عجبتنى جدا
وياسيتى انا عارفة ان مشغولة ومش بزعل منك لانى بحس بيكى برضه لما تزورينى
حتى ولو كنتى مش بتسيبى تعليق
تحياتى ليكى يا ندى



بيسووو
ربنا يخليك
تحياتى ليك ومنورنى



شكرا ليكم كلكم على تواصلكم معايا
اختكم خيخة

مجنون .... مؤقتاَ said...
This comment has been removed by the author.
همس الاحباب said...

فعلا طلعتى خيخة
كده يعنى عايزانى انام على السلم
هههههههه
بقولك ايدها طرشة
عايزة تفتنى عليه علشان انام فى الشارع
عامة ذنبى فى رقبتك
تحياتى خالد

الشنكوتي الكبير said...

جدعه يا نوران
جميله قوي الفكره ياريت كلنا نطبقها من غير كسل

جزاكي الله عنا كل خير

سلاااااااااااااام
اخوكي ايهاب

Omar... [ خروشات ] said...

======================
مشاء الله عليكى يا نوران

احلى ما فيكى انك دايما بتفكرى فى غيرك

مفيش حاجة بتسرقك من احساسك بالمسئولية تجاه الاخرين


ربنا يقدر على فعل الخير

سأفعل............ او فعلتها فعلا

اخوكى عمر
========

ده التعليق اللى شطبته يا نوران

عشان متقوليش بشتمك
هههههههههههههه

الان اعتقد انتى فهمتى الموقف

اخوكى عمر

بت خيخة وأى كلام said...

همس الاحباب
ماتحاولش يا خالد
تنام على السلم تنام على الرصيف
برضه هافتن عليك
وبعدين برضه عايزة اعرف هى مين اللى ايديها طرشة
يعنى فيه احتمالات كتير جدا
تحياتى ليك


الشنكوتى الكبير
شكرا ليك يا ايهاب
تحياتى ليك


خروشات عمر
لا إذا كان عن احلى ما فيا
فيه حاجات كتير اوى
انا لسة متكلمتش عن تواضعى ولا عن كرمى
ولا عن انكار الذات
ولا عن حنيتى
مش بقولكم متواضعة جدااااااااا

هههههههههههههههههههه
شكرا ليك يا عمووور
تحياتى ليك



شكرا ليكم كلكم على تواصلكم معايا
اختكم خيخة

بت خيخة وأى كلام said...

عسقول
والمعلم باحث
على حب
خمسة فضفضة
تعالو انتوا بقى على مهلكم

انا هاروح عند ماما يومين وارجعلكم
تكونوا جيتوا وكتبتوا كلمتين حلوين فى حقى
ودعتولى دعوتين حلوين اوى
عايزة الدعوات تكون متوصيين بيها
انا هامشى بقى ولما ارجع هابقى ارد على الكلام الحلو اللى انتوا هتقوله

سلام
اختكم خيخة

Desert cat said...

برافوا عليكى يا خيخة جازكى الله كل خير
احنا بنعمل كدا فى جمعية رسالة بنجمع من قرايبنا وحبايبنا واى حد عايزي يجيب البؤجة بتاعته وبناخد الملابس دى ننضفها ونكويسها والشباب بينزلوا يعملوا معارض بيها فى الاماكن الفقيرة وبيبعوها بسعر رمزى جدا 3 جنيه للقطعة
والفلوس دى بتكون لصالح اطفال السرطان او مريض مش قادر على العلاج او شنطة مساعدات لاسرة محتاجة
شوفتى بقى الحاجه اللى احنا راميننها بيتعمل بيها كام حاجه
فكرتك جميلة وياريت كل واحد ينفذها
تحياتى

mnoon said...

إنتـــــــــــى
بنت خيخه
وكمان أى كلام
حرام عليكى!!!!!!!!ياشيخه
أنا مبسوطه قوى إنى وصلت للمدونه دى
ياخيخه

almasry said...

موضوع جميل


اتمنى تشوفونا

تحيـــاتى

المصــــــــــرى

خمسة فضفضة said...

السلام عليكم ورحمة الله وبركاته

ماشاء الله علي الافكار
جزاكِ الله خيرا يا نونا

لسه عامله الحكاية دي الاسبوع اللي فات

-------

معلش بقالي شوية مش متابعه كويسه ، مشغوله جدا
خصوصا الخميس والجمعه اللي المفروض الناس بتاخد فيهم الاجازات ، انا باتشغل اكتر
عاااااااااااااا

عموما انا جيته اهه

سلام

حاسوباتيه said...

عندك حق والله جزاك الله خير

إنـســـانـة said...

ربنا يجازيكى كل خير بجد يا نوران

:)

son's egypt said...

السلامعليكم
دعوة جميله للخير

ابن حـجـر الـعـسـقـلانـى said...

يا لهوى .. كأنك شايفة مكونات الدولاب عندنا

أما أروح أقول لأمى على الفكرة دى مع إنها بتسرب حاجات من دى من وقت للتانى

بس جزاكى الله كل خير يا خيخة

همس الاحباب said...

يعنى لا ذوق نافع ولا استعطاف نافع معاكى يا خيخة
واحنا برده ما يهمناش وربنا على المفترى وعلقة تفوووت ولا حد يمووووووووت انا مش بنضرب غير من مراتى بس وده مش عيب
ارتحتى كده
وليعها بقى يا خيخة
تحياتى ولا بلاش تحياتى
خليها يا رميتى على السلم

ست البيت said...

جاكي الله خيرا يا خيخة أفندي
ويا رب نعمل كده فعلا انا عاوزة اقولكم اني عملت كده من كام سنة ولقيت البيت وسع
يعني فيه كمان دفايات اللمبة بتاعتها كانت واقعة وبقالها يجي خماشر تمناشر سنة نفسنا نجيب لها لمبة
انا علطول لميت الحاجات دي
وشوية حاجات من المطبخ زيادة
على شوية كبايات وأدوية
وغسالة بتاعة واحدة جارتنا من العادية
واتصلت ب أحمد بدر من رسالة اسكندرية
ودلوقتي في احلامنا
ودول جمعيتين بتعمل حاجات كويسة قوي في المجتمع وفعالين
وعطيت الحاجات دي ليهم لني عارفة انهم حيفرزوها
ويدوها للناس اللي تستحقها وطبعا كله في ميزان الحسنات بإذن الله
ودي بس نبذة عن الجاحات اللي ممكن نتبرع بيها
ادوية -شنط من كل نوع حتى ولو بتوع الخضار-ملابس قديمة او جديدة وضاقت - أدوية- شرايط كاسيت للي بطلوا يسمعوا أغاني وتاب ربنا عليهم
االشرايط دي بيسجلوا عليها للمكفوفين دروسهم
كتب دراسية من كل نوع
ممكن كمان اللي بعرفوا يكتبوا على الكي بورد
يروحوا جمعيات المكفوفين
وياخدوا كتب ينقلوها على ديسكات
والجمعيات دي بتتطبعها برايل
اللغة اللي يقدر المكفوفين يقروها
ممكن قصص ومجلات قديمة بعملوا بيها مكتبات للاطفال الايتام او الغير قادرين
نشر ثقافة يعني
لو عندك هارد قديم وجبت واحد جديد
اتفق مع 2 3صحابك عرف انهم حيجددوا الكمبيوتر وجمع واحد وادية لواحد محتاج او اي جمعية خيرية

Ali-7ob said...

خيخة يا خيخة
طبعا مش غريب عليكى ان انتى تقترحى اقتراح زى ده طول عمرك قلبك كبير وبتفكرى فى غيرك وده من صفاتك اساسا بجد
.......................
ربنا يباركلك ويقويكى ويعطيكى ولا يأخذ منك ابدا ويديم عليكى نعمه الظاهرة والباطنة ويرزقك من حيث لا تحتسبى
واخيرا ربنا يخلف عليكى عن الحاجات اللى انتى اتبرعتى بيها او خليتى اى حد يتبرع بيها بملابس فى الجنة وطعام فى الجنة وكل النعيم فى الجنة
آآآآآآآآآآمين
........................
تحياتى ودعواتى ليكى
على حب

نوره الخشن said...

انتي عسل ودمك خفيف جداً وعجبتني اوي البؤجة
و ياريت تشرفيني في مدونتك ونبئى صحاب وماتخافيش مس نفس فكرة مدونتك اصل انا عارفة عدوك ابن كارك مدونتي فكرتها بعيدة جداً
http://awga3.blogspot.com/
تحياتي..........نوره الخشن

Sola said...

walahy ya fandem ana kont ba2ol en ana el rayes el kbeer tele3ty enty el rayes ya fandem
bgad rabena yekremek ya rab,o ana 3omoma2 hanazel post very soon awy o lazem tesharkeny feh 3alashan howa bardo 3amal 7'ayery o law nege7 fe nas kteer awy haynobha sawab
salam ya gamiela

مهندس مصري said...

مطنشاني ليه يا خيخة
؟

انين الحزن said...

مساء الفل

اول مره ادخل المدونه بس بجد عجبتني اوي
اسلوبك جامد اوي

ربنا يخليكي ويوفقك .......

ام شريف صح

ربنا يخليهولك


وزة

بت خيخة وأى كلام said...

قطقوطة الصحراء
ايوة انا فعلا اعرف ان فى رسالة بيعملوا كدة
وكمان مش لازم يعنى نودى الحاجات دى لجمعيات خيرية
اكيد كل واحد مننا بيكون يعرف ناس فقراء ومحتاجين ممكن يوديلهم الحاجات دى
اهم حاجة ان احنا دايما نفتكر الناس الغلابة
وكل ما ربنا يرزقنا بحاجة جديدة ماننساش نطلع صصادها حاجة من عندنا ونبعتها للغلابة
تحياتى ليكى يا قطة



mnoon
اه والله انا خيخة
وانا كمان مبسوطة انك وصلتى لحد عندى بدون اى خسائر فى الارواح
حمدالله على سلامتك
منورانى وتحياتى



المصرى
شكرا ليك
وحاضر هازورك



خمسة فضفضة
برافو عليكى يا فضفضة
انا عارفة ان انتو كلكم بتعملوا كدة
انا لا اقصد بالبوست ده
الا التذكرة
واهه بالمرة اخد ثواب على حسكم
نيهاهاهاهاهاهاهاع
لئيمة انا مش كدة؟
ربنا يقويكى فى شغلك
وتحياتى ليكى



حاسوباتية
شكرا ليكى ومنورانى


انسانة
شكرا ليكى يا انسانة
تحياتى


اولاد مصر
اهم حاجة ان احنا نعمل بالدعوة دى
تحياتى ليك




ابن حجر العسقلانى
الا شايفة مكونات الدولاب
انت متراقب يا عسقول
خد بالك بقى وخاف على نفسك
وتحياتى للوالدة اللى بتسرب الحاجات من وقت للتانى
بلغها تحيات خيخية حارة
وتحياتى ليك




همس الاحباب
انت تانى يا خالد
شكلك كدة عايز فعلا يتفتن عليك
بس انا احى فيك شجاعتك واعترافك ان مراتك بس هى اللى بتمد ايدها عليك
وعلشان اعترافك الجرئ ده
خلاص مش هفتن عليك
سماح المرة دى
تحياتى ليك




ست البيت
عليكى نور بجد
الفكرة فعلا اللى انا عايزة اوصلها انتى كملتيها بتعليقك ده
ان الفكرة مش فكرة هدوم وبس
لأ فعلا
الفكرة ان اى حاجة فى البيت مش مستخدمة نتبرع بيها لان فيه غيرنا كتير الحاجات دى هتفرق معاهم
تحياتى ليكى




على حب
ياخبر يا على
انا حسيت انى ممكن ادخل الجنة بدعوتك دى
ربنا يخليك يارب
وعايزة اشكرك لانك قولتيلى على برنامج خدعوك فقالوا
وانا فعلا استمتعت بيه امبارح
شكرا ليك يا علوة
تحياتى ليك


نورة الخشن
انا يشرفنى انى ازورك فى مدونتك
وانتى منورانى فى مدونتى
تحياتى ليكى




سولا
مازالت انتى الريس الكبير يا سولا
ومستنية البوست اللى هينوبنى فيه ثواب
تحياتى ليكى




مهندس مصرى
مطنشاااااك؟
انا اقدر
طب يارب انطس فى قاعدة تواليتى
لأ بلاش قاعدة تواليتى لانى مازالت منطسة فيها لحد دلوقتى ومش عارفة اجيب قاعدة جديدة
طب يارب انطس فى ستارة الحمام الجديدة اذا كنت اقدر اطنشك
انا بس كنت فى الهرم عند ماما ولسة راجعة دلوقتى يا محمد
وحالا هاروح اشوفك جديدك
تحياتى ليك




انين الحزن
منورة المدونة
واه انا ام شريف
بس افضل انك تقوليلى خيخة بدون اى احراج
تحياتى ليك يا وزة




شكرا ليكم كلكم على تواصلكم معايا
اختكم خيخة

مدونه من اجل الحب said...

كنت هاموت واعرف هاتعملى ايه بالمليه
بس بجد بجد
انا بغبطك على الثواب للى هتاخديه ربنا يكرمك

المنسى said...

ربنا يبارك فيكم كوووووووولكم ويزيد من أمثالكم
وتكونوا دائما لدينكم وبلدكم رافعين ولربكم طائعون
بجد بجد نفسى أبقى معاكوا
وبرنا يقدرنى على ده
تحياتى

users online