Tuesday, March 11, 2008

معنديش برستيج


كنت قاعدة على الشباك

قاعدة الفارس اللى راكب حصانه
كنت بنفضه
ونص جسمى برة والنص التانى جوة
بنضف بقى
ووقت التنضيف الواحد بيكون مندمج اوى

المهم وانا بنضف الشباك
اذ فجأتن التليفون يرن
تررررن تررررن
انا: ده مين الرخم ابن الرخم اللى بيتصل دلوقتى
نفسى: عيب يا بت افرضى انها امك ولا حاجة
انا: وهى ماما ايه اللى هيخليها تتصل بيا دلوقتى بس
المهم نطيت من على الشباك

ورحت ناحية التليفون
وبصيت على النمرة لقيتها نمرة مروة صاحبتى
انا:ايوة يا رخمة
مروة: هههههههههههههههههههههه
ليه كدة بس يا ام لسان طويل
انا: علشان جبتينى من على الشباك وانا لسه مخلصتش تنضيفه
مروة: ايه ده هو انتى اللى بتنفضى بنفسك
انا: امال هاجيب امى تنضفلى
مروة: هههههههههههههههههههه
يا نونو مش قصدى
انا قصدى يعنى انتى معندكيش حد ينضفلك الشقة
انا: واجيب حد ينضفلى الشقة ليه مش الحمد الله لسة بصحتى
مروة: معقول يا نونو بتنضفى الشقة بنفسك بجد
انا بصوت مستغرب: ودى فيها ايه يا بت

هى حاجة ابيحة دلوقتى ان الواحد ينضف شقته بنفسه
مروة : هههههههههههههههههههههههههههههههههههههه
انا: بتضحكى على ايه يا هبلة
مروة: يا بت بلاش طولة لسان
اصل انا بجيب واحدة تنضفلى الشقة
انا : تييييييييييييييييييييييييت

لفظة اعتراض ابيحة صدرت منى بعفوية شديدة تليق مع الموقف
هو انتى علشان بتجيبى واحدة تنضفلك

يبقى انا كمان لازم اجيب واحدة تنضفلى
مروة: هههههههههههههههههههههههههههههههههه
يخرب عقلك انتى لسة لسانك متبرى منك

اكيد شريف مش موجود وعلشان كدة واخدة راحتك
انا: يا بت لخصى عايزة اخلص اللى ورايا

انتى متصلة ليه
مروة: بسأل عليكى
انا : سألت عليكى العافية

غورى بقى علشان عايزة اكمل تنضيف
مروة: لأ استنى هو انتى يعنى اللى عايزة تنضفى الشقة بنفسك

ولا جوزك هو اللى مش عايز يجبلك حد ينضفلك
انا بدأت اتخنق : انا اللى عايزة انضف الشقة بنفسى

لانها صغنونة ومحندقة
ومش مستاهلة انى اجيب حد يساعدنى
وجوزى بيتحايل عليا انه يجيب حد ينضفلى
علشان عايز راحتى وانا بقوله لأ
علشان انا وش فقر و غاوية تعب
ارتحتى يا مروة غورى بقى

مروة: بجد يا نونو
انا: هو ايه اللى بجد يا بت؟
مروة : ان انتى اللى مش عايزة حد ينضفلك الشقة
انا : اه ودى فيها ايه يعنى

مش الحمد الله لسة بصحتى
وبعرف اتحرك يبقى اجيب حد يساعدنى ليه
مروة : انا ما بقولش حد يساعدك

انا قصدى انك متعمليش حاجة خالص
وتجيبى حد هو اللى ينضفلك كل حاجة
انا : ليه برضه ؟ مش فاهمة وجهة نظرك ؟
بدل انا قادرة انى انضف شقتى بنفسى اجيب حد ليه ؟

مروة: يعنى نوع من انواع البرستيج
انا : برس ايه؟ تيييييييييييييييييييييييييييييييييييييييييييت

نفس لفظة الاعتراض الابيحة اللى اصدرتها فوق دى
برستيج ؟؟؟؟؟؟؟؟؟؟؟؟؟؟؟
هى دى كمان بقى فيها برستيج
جرى ايه يا ست مروة الله يرحم ايام زمان
لما كنت اجيلك بيت ابوكى الاقيكى رابطة شعرك انتى واخواتك
وماسكين المقشات وحتت التنضيف والممسحة
كان فين البرستيج ده وقتها

مروة : ههههههههههههههههههههههههههههههههههه
يا بت ارحمينى من طولة لسانك دى
وبعدين فيها ايه يعنى لما تجيبى حد ينضفلك

وانتى تقعدى تحطى رجل على رجل
وتقعدى تتأمرى وتشخطى وتنطرى
انا: كمان؟ يعنى مش بس عايزانى اجيب واحدة تنضفلى
انتى كمان عايزانى اطلع عليها عقدى النفسية
وأتأمر على اللى جابوها واذل اللى خلفوها
مروة:مش قصدى كدة

بس قصدى انك تعيشى شوية احساس انك هانم
ده انا فيه واحدة بتجيلى مرتين فى الاسبوع
وبتخانق مع جوزى علشان عايزاها تجيلى كل يوم
أو يشوفلى خدامة مقيمة علطول
اصل احساس حلو اوى انك تلاقى اللى يخدمك
انا : والله احساس احلى انى اقدر اخدم نفسى
مروة : انتى غريبة اوى
انا: ليه يعنى؟
مروة : الناس كلها بتتغير ونفسهم يعيشوا فى مستوى اعلى
اول مرة اشوف حد مش عايز يعيش مرتاح
انا: اولا مش علشان اعيش فى مستوى اعلى

يبقى لازم اجيب شغالة
وبعدين مين قالك انى تعبانة هو انا اشتكيتلك

مروة: انتى عارفة دى رحاب عندها واحدة قاعدة معاها علطول
وعايزة تجيب واحدة تانية
انا: يا حول الله يارب .... يابت وانا مالى برحاب

كل واحد حر فى حياته
مروة: لأ انا بس بقولك علشان تعرفى انك مش عايشة فى الدنيا
بقى جوزك يتحايل عليكى علشان تجيبى حد ينضفلك

و انتى اللى ترفضى والله انتى هبلة
ده انا هاموت علشان جوزى يوافق

اجيب واحدة مقيمة علطول وهو مش راضى
وعمالة اقوله اشمعنى رحاب عندها واحدة
ما هو بينى وبينك يا نونو

رحاب يعنى مش احسن منى
علشان يبقى عندها شغالة مقيمة
وانا الشغالة تجيلى يومين بس فى الاسبوع
انا: ولا انتى احسن منى علشان يجيلك شغالة مرتين فى الاسبوع
ومع ذلك انا مش بيجيلى شغالات خالص
مروة: هههههههههههههههه
انتى يا نونو حاجة شاذة
انتى فقرية يا حبيبتى
انا : طب والنبى يا مروة اقفلى بقى

علشان انتى خنقتنينى وانا ورايا تنضيف
مروة :هههههههههههه
طب هاشوفك قريب؟
انا : ربنا يسهل
مروة: سلام يا نونو وبوسيلى شريف
انا : سلام
وقفلت السكة وركبت تانى الحصان بتاعى
قصدى اتشعلقت على الشباك تانى
وبدأت امارس هوايتى فى التنضيف
وقعدت افكر فى كلام مروة
و اسأل نفسى
هى مروة اتغيرت ولا انا اللى فقرية بجد
وهوووووب وفردة الشبشب بتاعى

وقعت منى تحت فى الشارع
حطيت اسدالى عليا ولبست شبشب هانى

أو بمعنى اصح ركبت شبشب هانى
ونزلت اجيب فردة شبشبى
وبس خلاص
وكل الكلام اللى فوق ده نطلع منه بحاجة واحدة بس
الا وهى
اللى يجى ينضف الشباك يبقى يقلع الشبشب قبل التنضيف
انتهى
بت خيخة وأى كلام

63 comments:

الساحرة said...

برستيج ايه احلي حاجه انك تعملي
كل حاجه بنفسك

انا جربت مرة اجيب واحدةتنظف بس وانا حامل كانت بتصعب عليه وانظف انا
دي ستات بتدلع
وبعدين حد يركب الحصان قصدي الشباك وهو لابس شبشب

الساحرة said...

ايه دة انا اول كومنت ههههههه

سكينة said...

ممكن نطلع بحاجات ثانية
ركز في عملك ولا تلفت لأي مقاطعة لأنها قد تفقدك حماسك قصدي شبشبك
:)
وممكن كمان لو كانت حياتك مليانة مقاطعات تنضفي الشباك من جوه حرصا على شباشب الأسرة
:)
ربنا يحفظ عليك نور عينك

د/اجدع بنوته said...

تسلم ايدك

اولا ع المعلومه الجامده دى

انا اصلا مبلبسش شباشب ف الشقه

تانى بوينت

الصراحه راحه

والراحه حلو

واللى يلاقى الراحه وميستريحش يبقى اهبل

لكن ان بنت غريبه تدخل البيت

وتدهوس فيه

مضمنش نفسيتها فيها ايه

اخلاقها ايه

لا لا الصراحه

مش مستوعبه خالص حاجه زى كده

برافو عليكى ياخيخه

هاتى بقى مروه دى هنا

نغسلها كلنا

ال رحاب عندها واحده بالكهربا

وهى عندها واحده خميس وجمعه

ال

fatima said...

نوران الغالية
بصى يا نونو الحكاية دى بتختلف من حد للتانى
مثلا عندك مامتى ... طول عمرها ست بيت و كان أهلها ناس على قدهم و هيا خريجة إقتصاد منزلى و بابا يا ما إتحايل عليها لما رجعنا من الخليج يجيبلها شغالة هيا اللى موافقتش
سألتها ليه؟؟
ردت نفس ردك يا نونو..زمانا بصحتى أهو بعد سنين سألتها تانى ... جاوبت بقى بتفاصيل زيادة انها متحبش تدخل واحدة غريبة بيتها تتطلع على أسرارنا و لو وحشة تسرقنا كدا ...
و عادى كدا
لحد ما بابا فى يوم جابلنا بنت صغيرة عشان يشغلها عندنا ... ماما إتجننت و صممت انها تمشى ... بابا خدته الكرامة و قالها تقعد شهر مقابل المبلغ اللى خدوه اهلها و عشان منظرى ميبقاش أن المدام بتمشى كلامها عليا
موش عاوزة أقولك يا نوران أنا وماما عملنا معاها إيه؟؟؟
كانت ساعتها من سن أخويا ماجد يعنى مانو الاتنين 8 سنين و كن بنعاملها أحسن منه وكنت بحبها قوى و لولا المشاكل المتوقعة مستقبلا كنت قعدتهامعايا لأن أمها بصراحة عاوزة الحرق
بقى تشغلها خدامة و تسيبها فى بيوت الناس عشان جوزها ربنا يخده موش عاوز عيال يفكروه بجوزها الولانى!!!
خفت عليها من المصايب ... طب إحنا راعينا ربنا فيها لكن موش كل بيت هتدخله هيكون كدا
دا الواحدة تمسح فى البيوت و متبهدش عيالها كده
الخلاصة
لو لم يكن هناك ناس بنشجع التجارة دى
مكنش فيه ناس إتبهدلت كدا
و ربنا يديكى الصحة دايما
و الواحد يلجأ للمساعدات دى وقت الحاجة فقط ..دى القاعدة ..الإستنثاء حاليا بقى هو القاعدة
تحياتى و الشبشب هو اللى عليه العتب فى الموضوع دا

عايز أتعلم said...

الله يخرم جيبك يا خيخة ..ايه الحاجات الجامدة دي بس

انا الحمد لله اني مش بنظف حاجة ..وبعدين هو لازم اللي ينظف شباك يتشعلق فيه....هههههههههههههه

اهي دي فايدة البنات اخواتي الوحيدة...فعلا الواحد بكده بيحس انهم بيعملوا حاجة....

سلام

بطوط حبوب said...

بس بجد بجد
عقلك مزقزقش انك تجيبى واحده

عايز أتعلم said...

لا والله ياخيخة صحيح

انا وقعت والله يوم التبرع ..والعيال جابولي عصير بقى ..وشوية دواء وجابو الراجل اللي كنت بتبرع عنده ..يقيسلي الضغط

على فكرة انا مش بكذب ...مش عارف ليه مش داخله دماغك

سلام

عايز أتعلم said...

كان ضاغطي واطي قوي يومها

خمسة فضفضة said...

السلام عليكم ورحمة الله وبركاته
شوفي يا نونا الموضوع ده بيختلف من حد للتاني
عندك انا مثلا قبل ما افتح الصيدليه لما كنت باشتغل في المستشفي كنت دايما بزوغ الخميس او اخده اجازه ولو مانفعش يبقي الجمعه واهد الشقه وارجع ابنيها تاني وماباجيبش حد الا مره كل شهرين او 3 شهور

بعد ما فتحت الصيدليه وخصوصا اول سنتين كنت مطحونه باخرج من الساعه 8 مارجعش البيت الا ساعتين الضهر وانزل تاني ومارجعش الا الساعه واحده بليل فاماكنتش بلاقي وقت للتنضيف وكمان ماينفعش ازوغ وبالتالي اضطريت اني اجيب الست دي مره كل اسبوع

لما الصيدليه احوالها بدأت تستقر ورجعت افضي شويه تاني رجعت انضف بنفسي بس برضو باجيب الست دي كل شهر

يعني موضوع انك تجيبي شغاله ده موضوع نسبي مش موضوع برستيج ، واللي بيعتبره برستيج يبقي واحد هايف ودماغه فاضيه

تحياتي يا قمر وباقي خدي بالك من الشبشب وانت بتنضفي

بنوته مصرية said...

هههههههههههههه


بجد انتي بتستهبلي افرضي وقعتي يلهوي عليكي يا خيخه

يابنتي خدي بالك

انا بخلع الشباك واغسلة واخي خالد يركبه تاني هههههه
مش تقولي اركب الشباك

بنسبة لصحبتك دي هتتعب اووي في حياتها طول ما هي بتبص علي غيرها

انا ماما عندها شغاله طول عمرها بحكم انها في الكويت وبتشتغل واخواتي صبيان وكمان 4 يعني متعبين اووي

بس مش معني اني امي عندها شغاله يبقي لازم جوزي يجبلي شغاله


ام عبدالله بتيجي بساعدها لانها بتربي ايتام وممكن تغسل سجاده وتجبلي جبنه ولبن علشان هي بتيجي من قرية وانا بحب الجبنه القريش وكدا يعني

اتصدقي بالله انا جوزي كان عاوز يجبلي وحده تقعد معايا علطول علشان مش بعرف اعمل اي حاجة من نور بس انا برفض واقوله لاء علشان انا بحس اني برتكب ذمب لو حد ساعدني وانا قاعده مش بعمل حاجه وكمان البيت اولا من ال400 جنية اللي هتاخدهم يعني بلاش افتري
طالما بصحتي خلاص ثم محدش هيخاف علي شقتك وحاجتك غيرك انتي

مش متخيلة اني فيه ناس بتفكر بلشكل ده
بس ربنا يكملك بعقلك وبلاش مروة تزن عليكي كتير
هههههههههه

تحياتي
رودي
بوسيلي شريف
اموووووووووووه ليكي انتي دي

آخر العنقود said...

هههههههههههههههههههههه
والله انتى عسل
ايه يانونا ما مروة قالتلك ماتقصدش
واضح انها ماتقصدش اى حاجة

احنا ممكن نخرج بحاجة كمااان بقى

ان الواحد ياخد باله اوى وما يكلمكيش وقت التنضيف
هههههههههههه

بس والله عندك حق يانونو
الواحد ما بيستمتعش بالحاجة غير لما بيعملها بايده

وتحسى كده بعدها انك عايشة احلى عيشة

عجبتنى اوى الحتة بتاعت ركبت شبشب شريف
ههههههههههه
وبعدين هوه انتى كنت متشعلقة للدرجة ان الشبشب يقع منك
يالهوووووى ياخيخة
لا ياختى خدى بالك فى ناس هنا كتير بتحبك وخايفة عليكى
:)

بلا برستيج بلا بتاع
حاجة تغييييييييييظ

nigro said...

عمرك أطول من عمري
سبقتيني انت بخلاصة الموضوع اللي في الآخر دي
ههههههههه
انت ملكيش حل
يا واد يا جامد انت ياللي من الشعب
على فكرة صاحبتك طوّلت معاكي في المكالمة علشان فاضية و مش وراها حاجة مش شطورة زيك كده من اللي بينضّفوا شققهم بعرق جبينهم
جدعة يا نونا
بس ده طبعا ما يمنعش انك لما تحسي انك تعبتي سنّه انك تجيبي حد يساعدك
ألا صحيح هو إيه البرستيج ده؟
زي طقم الكاكاو كده؟

anwer said...

مبدايا انا مبحبش البس شبب الا و انا بسوق عربيت بابا علشان للأكسلتير و الدبرياش و الفرامل مقايس خاصة لازم تحسها بنفسك
و الثاني بجد انا بموت من الكسوف لما حد يفتحلي باب عربية ولا حاجة سايس يعني مش بتشقط
و لا لما حد يخدم عليا بذمة في كافيه
مع الأعتذار في فرق من البرستيج و الأحداث
طول مبعرف اعمل الحاجة من حقي اني اتمتع بعميلها

Medo said...

السلام عليكم
قريت البوست بتاعك وفعلا عجبنى وانا مش مدمن تدوين بس كل فين وفين بدخل والنهارده شوفت البلوج بتاعك وعجبنى وربنا يكرم ويحمى شريف ابنك وزوجك ان شاء الله بس فيه جمله انتى قلتيها المفروض مش تصدر منك لأنها بتنفى الحوليه عن الرب
*********
روة: انتى عارفة دى رحاب عندها واحدة قاعدة معاها علطول
وعايزة تجيب واحدة تانية
انا: لا حول الله يارب .... يابت وانا مالى برحاب
كل واحد حر فى حياته
*********
المفروض تقولى يا حول الله زى اللى بيقول يا الله
او تقولى لا حول الا بالله
*******
ارجو انك مش تزعلى منى
سلامى ليكى ولكل الاسره

مستــ ج ــــدة said...

برستيج ايه بس يانونو اللى يخليكى تتنازلى عن متعةركوب الحصان....والنبى ابنك مشافكيش وانتى عاملة فيها ابو الفوارس كده
بس انتى شرباااااات والله ياخيخة
الا الاستنتاج الأخير بتاع الشبشب ده....هههههه....سكر

Soooo said...

هههههههههههههههههههه
هههههههههههههههههههههههههههه
يعني شردتي لصاحبتك وسيحتيلها وفكرتيها بايام زمان
ونضفتي البيت كللو واتبهدلتي وحالتك مرار
وفي الاخر .. فردة الشبشب تقع
----------
شفتي بقى لو كنتي جايبه شغاله
كانت ابسط حاجه ابسط حاجه .. هتنزل تجبلك فردة الشبشب بتاعتك لما تقع



سلامووووووووووووووز

nigro said...

قوليلي صحيح يا نونا
انت بتجيبي الصور اللي في مواضيعك دي منين
مفيش صورة لحد دلوقت نشرتيها مع موضوع و ماكنتش بتعبر عنه
كلها صور في الجووووون

صبرني يارب said...

هههههههههههههههههههههههههههههههه بجد انتى دمك خفيف اوي يا خيخه وموضوعك كمان حلو اوي اوى ومن وجهة نظري فى اكتر من نقطه مهمين جدا.

هو صحيح انا باجيب واحده مره كل اسبوع او اثنين بس عشان انا بالفعل ما باقدرش انضف شقتي لوحدي لانهامش صغنونه وانا عندي 3 عيال بيعملوا اعاجيب فيها ولان انا دلتاويه من المدينه وساكنه فىشارع كله عربيات وتراب شنيع جدا .
تنضيف الشقه عايز موال جامد اوي ده ما يمنعش انى بانضف اصلا من فوق الوش يوم بعد يوم .

لكن لا يتضمن وجود الشغاله انى اذلها واتأمر عليها او حتى اجهز عليها فى الشغل وافتري بقى عشان هى شغاله لا طبعا مع الرحمه والرأفه والعون كمان لانى باساعدها ىف حاجات مش ممكن حد يعملها الا صاحبة البيت .

الى مش عارفه بصراحه بقى عايشين ازاي الى بيسلموا العيال والاكل وكل حاجه لايد غريبه مهما كانت واثقه فيها.
تعرفوا انا مره واحده قريبتى كانت مسافره وسابتلى الشغاله بتاعتها عندي شهرين لانها اثيوبيه ( كنا فى الامارات) البنت كانت حاسه انها فى رحله مثلا او فى اجازه لانى ما كانش معايا غير مريم عمرها سنه ومافيش شغل فى البيت ومافيش حاجه اسمها تحط ايدها فى اكل ولا تأكل البنت ولا تغيرلها ولا تحميها ولا طبعا لها دعوه بجوزي خالص تقريبا ما بيشوفهاش مش غيره مني لا لكن لما يعوز حاجه انا اجيبها مش يطلبها من الشغاله مواقف عجيبه .

مش عارفه ازاي ممكن اخلي اي حد فى الدنيا مثلا يغير لابنى ولا يحميه ايه ده ؟؟؟ والله ولا ماما حتى الا لو حكمتنى الظروف.

النقطه التانيه المهمه اوي : هى صاحبتك المصونه الى مش بتسكت بلسانها حال كل الستات الحلوين مالهاهي جوزك الى مش عايز ولا انتى الى عايزه ما دام لا اشتكيتى ولا عيطى مالهاش دعوه ناس غريبه . لو كنتى انتى حد عقله طاقق كانت حدفت شبشب جوزها من الشباك ولما جه قالتله يا تجيب خدامه يا هانيمك مع الشبشب تحت .

ثالثا بقى وده برضه مهم اوي : هو ان فعلا اغلب الناس بتجيب الحاجه اي حاجه مش الشغاله بس لمجرد ان فلان او فلانه جابها مش عشان هحتاج لها او لا او فعلا عايزها اولا . الناس دي تفضل طول عمرها مش مستريحه ومش راضيه ابدا

برافوا عليكى يا خيخه وفعلاااااااااا سرنى التعرف على شخصك من خلال كلامك الجميل

وأسفه على الرغي بتاعي بس هى عاده باين
اختك مريم

وبليييييييييييييز زوري المدونه عندي
http://raghy-emraao-gheer-mathona.blogspot.com/

رغي امرأه غير مطحونه


هايهمنى اسمع رايك فى كلامي خصوصا ان انا مبتدأه وشكراااااااااااا لكم جميعا

صوت من مصر said...

مش برستيج ده اسم كوافير ولا ايه ؟

3abdo me7tas said...

السلام عليكم

انا مش عارف اقول ايه
وانا قاعد أقرى فى البوست قاعد اتخيل منظرك وطريقة كلامك وطريق كلام صحبتك معلشى الغلسة
آسف لفظ
وكمان ايه
حتى التييييييييييت بتخسلها ومنفتجل عنيا وةباصص فى الشاشه وخلاص البطل هيدخل والكاميرا بتلف ومرة واحده
ضحكت ضحكة تقريبا أبويا جاى دلوقتى يطردنى برة البيت من صوت الضحكة
انتى عارفه انا ضحكت على ايه
بس مش تقولى عليا هايف
ضحكت على دى
أو بمعنى اصح ركبت شبشب هانى

بس كفاية بقى لان أبويا بيخبط على الباب
سلام لمده 3 أيام

Anonymous said...

السلام عليكم يا نونا
ماشاء الله عليكي و علي المدونة بتاعتك عجباني خاااااااااالص و لازم ادخلها كل يوم

عندس تعليق بسيط علي البوست ده متمثل في الجملة دي

انا: لا حول الله يارب .... يابت وانا مالى برحاب

جملة لا حول الله دي غلط المفروض ماتتكتبش كده عشان بالصيغة دي بننفي الحول و القوة عن الله عز و جل و كلنا بنقع في الخطا ده
المفروض تتقال : لا حول و لا قوة إلا يالله او يا حول الله في الجملة الاولي نفيتي الحول و القوة عن كل الخلق ماعدا الله عز و جل و في التانية النداء بيثبته علي ربنا بس

اوعي اكون صدعتكوا حقك عليا انا بس حبيت اوضح الفرق في الصيغة

بوسيلي شريف ماشاء الله عليه زي السكر ربنا يباركلك فيه و يحميه

اه علي فكرة انا كمان بانضف شقتي بنفسي و باكون مبسوطة بكده و مش بافكر زي صاحبتك ربنا يشفيها من البريستيج ده حاكم ساعات بيطول مع الواحد و بتكون اعراضه مش ولابد

سلام

أم محمد و عمر

Sola said...

ya nono:
3arf ana kont 3alatoul barkab el 7osan dah bardo 3and mamy fel sha2ah aslaha 3andaha olemetal o ana kont dayman banadafoh,bas after my sisiter married gebna wa7da tenadaf 3alasha ana kont busy o mamy mesh hayenfa3 tenadaf ma3a enaha mesh kberah wala 7agah she is 46 ,anyway ya nono ana 3andy nase7ah tanya o heya law hatnafado el segad balash telbeso el nadarah 3alashan ana nadarty we23et
yalla sebek mn marwa re7ab o 2a3mely elly yebsetec ya gamiela o rabena yekremek
o yareet law tegy el blog 3andy feh mawdoo3 henak 3ayza mosa3detec feh
salam ya nono
bosely sherief
sa7ee7 belmonasbah i called my nephew yesterdat so he called me sola anyway my mam asked him kalemt 7'altac ya mody embaray 2alaha la2 so sa2aleto kalemt siola 2alaha 2ah
shofy el donia el 3eyal batalet el 2alkab 7'alas 3ala allah sherief howa kaman ye2oly sola :)

الطائر الحزين said...

يا صبرك

صبرتى عليها فى المناقشة ازاى

انا مكلتش مناقشة جيت لحد ما قالت كلمة برستيج بقى وحاجات كدة وضغطى على قلت على ايه ما كانت خيخة مدت ايدها من سلك التليفون وخنقتها يمكن ترتجع ولا حاجة


ناسة فى ساكتة وناس فى هرية وناكتة


تحياتى

zordeak said...

هههههههههههه

دمك خفيف جدااااااا

والله مروة دى بتدلع

قال شغالة مقيمة قاااااااال

عالم عايزة ترسم نفسها وخلاص

انتى عندك برستيج وكل حاجة ومش عيب ابدا انك تنضفى شقتك بنفسك

العيب انك تطونى قادرة تعملى ده وتدلعى ومتعمليهوش

Anonymous said...

الفاضلة /نوران.
إذا يسر الله لى فى وقتى سأكون معك فى يوم التبرع بالدم .. أما تعليقى فسيكون قصة ستنا فاطمة الزهراء ريحانة رسول الله صلى الله عليه و سلم حين قال لها على أطلبى من أبيك خادمة تعينك على قضاء أعمالك قى البيت وحين عرض الأمر على رسول الله صلى الله عليه و سلم قال"ألا أدلك على خير من ذلك قولى دبر كل صلاةسبحان الله ثلاث و ثلاثين والحمد لله ثلاث و ثلاثين و الله أكبر ثلاث و ثلاثين .. الحديث" أو كما قال
فنصيحة لك أختى نوران أفعليها دوما تعينك على أعمالك المنزلية و الله المستعان من قبل و من بعد..
أبو خالد

بت خيخة وأى كلام said...

الساحرة
انا ولا مرة جبت شغالة بعد الجواز
بس بصراحة يعنى قبل ما اتجوز كان فيه واحدة بتيجى عند ماما كنت انا وهى بنضف الشقة علشان ماما كانت بتشتغل بس بعد كدة ماما مشتها لما لقيتها مش بتعمل حاجة تقريبا وانا اللى بعمل كل حاجة
حتى لما كنت حامل كنت بنفض الشقة والحاجات التقيلة عليا زى النيش بتاع السفرة كنت بزقها ببطنى
يعنى الحمل عندى كان مساعدنى على التنضيف بشكل اكبر
طب اقولك على حاجة
اليوم اللى ولدت فيه شريف انا ساعتها كنت عند ماما ونضفت الشقة كلها وشقة ماما بسم الله ماشاء الله قد شقتى مرتين
تحياتى ليكى



سكينة
اصل انا الشباك اللى عندى الوميتال يعنى لازم يتنضف بطريقة ركوب الحصان
وانا خلاص اتعلمت ومش هالبس شباشب تانى وقت التنضيف
تحياتى ليكى يا سكينة



اجدع بنوتة
معاكى حق والله فى وجهة نظرك
بس تعالى هنا انتى بتمشى حافية يا ينوتة
مش عيب كدة
اهه انا مابحبش حد يمشى حافى اطلاقا
وبالنسبة لمروة انا بنفسى هابقى اروحلها واغسلها فى بيتها
دى هتغسل غسيل بس لما اشوفها
تحياتى ليكى




فاتيما
والله يا فاتيما
انا مش ضد ان حد يجيب شغالة
بس الاهم انه يكون محتاجها بجد يكون مثلا قاعد فى شقة واسعة جدا او فيلا والبيت كبير عليه او عنده عيال كتير
والاهم انه يعاملها معاملة ادمية
مش يجيبها ويهينها
تحياتى ليكى يا فاتيما



خليفة
هههههههههههههههههههههه
الله يخرم جيبى
ههههههههههههههههههههههههههههه
جبتها منين الجملة دى
هههههههههههههههههههههههههه
وبعدين انا كان لازم اتشعلق فى الشباك لانه الوميتال يعنى معرفش انضفه من جوة
وبالنسبة للتبرع بالدم انا رديت عندك فى مدونتك
وهتيجى يعنى هتيجى مش عايزين تلاكيك
تحياتى ليك يا خليفة



بطوط حبوب
بصراحة يعنى يا بطوط
اللى نفسى اجيبها بجد
هى الطباخة
يعنى انا مستنية بس ان هانى ربنا يرزقه من وسع اوى ويكون غنى جدا
ونجيب طباخة او ناكل كل يوم برة البيت او نجيب اكل جاهز
اصل محسوبتك بتكره حاجة اسمها الطبيخ
وادعيلنا ان احنا نبقى اغنيا اوى وليك عليا اعزمك على الغدا كل يوم
تحياتى ليك




خمسة فضفضة
انا معاكى طبعا يا فضفضة
انا يا جماعة مش ضد ان حد يجيب شغالة
بس انا ظروفى مش محتاجة ان اجيب شغالة اولا لان شقتى فعلا صغنونة واقدر انضفها بنفسى
ثانيا انا مش بشتغل يعنى عندى وقت انى انضف الشقة
فيبقى ايه لزمته بقى وجود شغالة
ومعاكى حق لو الواحد بيفكر انه يجيبها علشان برستيج ده بيكون دماغه فاضية جدا
تحياتى ليكى يا فضفضة



بنوتة مصرية
يا سيتى ما يقع الا الشاطر
اى نعم انا لو وقعت هاروح فيها لانى فى الدور الرابع
بس عادى يعنى انا زى القطط بسبع ارواح
ووالله يا رودى انا مش بعرف افك الشباك انا بنضفه واغسله وانا متشعلقة عليه
وربك هو اللى بيسترها معايا
بس لو فعلا انتى محتاجة حد يساعدك عادى يارودى مش لدرجة انك تحسى بالذنب
اولا موضوع وجود الشغالة ده بيعتمد على قدرة الست وبيختلف من واحدة للتانية
انا الحمد الله بقدر انضف شقتى وبحب التنضيف جدا
يعنى لما بنضف بكون مستمتعة مش بنضف الشقة وانا زهقانة مثلا او حاسة ان عليا واجب تقيل
بالعكس بكون فرحانة جدا
لكن لو انتى فعلا بتتعبى من تنضيف الشقة مافيهاش حاجة ابدا انك تجيبى حد يساعدك والاهم انك تعامليها كويس
تحياتى ليكى يا رودى وبوسيلى نور كتييير



اخر العنقود
ههههههههههههههههههههههههههه
ايوة صحيح محدش يكلمنى وقت التنضيف علشان مشتمهوش فى عقل بالى
وانتوا عارفين بقى انا لسانى طويل والله اعلم ممكن تطوله شتيمة معتبرة وقتها
وبعدين انتى وصفتى حالتى بالظيط يا نانا
بتحسى وقتها انك عايشة احلى عيشة
ده بجد اللى بيحصلى لما اخلص تنضيف واخد الدش واقعد زى الملكة فى بيتى
وبعدين ايوة والله كنت متاشعلقة
بقولك كنت راكبة زى الحصان يعنى رجل هنا ورجل هنا
والرجل الى ناحية الشارع الشبشب وقع منها
بس الحمدالله محدش خد باله منها كان لهف فردة الشبشب
والشبشب غالى اوى بصراحة
على ما اتذكر كنت جايباه بتسعة جنيه ونص تقريبا
تحياتى ليكى يا نانا



نيجرو
انا امبارح قريت تعليقك وقعدت اضحك على
هو البرستيج ده زى طقم الكاكاو كدة؟
الحتة دى فطستنى على روحى من الضحك
هههههههههههههههههههههههههههه
هههههههههههههههههههههههههههههههههتحياتى ليك يا نيجرو



انور
هو ايه الاكسليتر ده؟
تحياتى ليك





ميدو
انا صلحت الكلمة ومعلش اعذرونى
دى غلطة مطبعية غير مقصودة
وطبعا مش زعلانة منك انك نبهتنى
ربنا يكرمك يارب
شكرا ليك يا ميدو




مستجدة
مرة عملتها قدامه وركبت الشباك
بس بعد كدة ماكررتهاش قدامه خفت فى مرة يقلدنى ولا حاجة تبقى مصيبة
تحياتى ليكى





سوووو
لا انا بعد كدة بفكر انى ابق اربط الشبشب بحبل واربطه فى بنطلون البيجامة علشان لو فلت من رجلى بعد كدة مايقعش خالص
تحياتى ليك




نيجرو
والله مش هاعرف اوصف بالظبط طريقة البحث عن الصور
ده سر المهنة
لو انت عايز صورة
قولى بس الموضوع بيتكلم عن ايه وانا هادعبسلك وابقى ابعتلك كل الصور الممكنة اللى تمشى مع الموضوع
تحياتى ليك
اه على فكرة
انا باخد فى الموضوع ده اربعتاشر جنيه
تحياتى ليك يا نيجرو




صبرنى يارب
تصدقى يا ام مريم
معاكى حق فعلا
ازاى واحدة يجيلها قلب تخلى حد غريب يحمى عيالها ولا يأكلهم
مافيش مانع انها تساعد فى التنضيف لكن بلاش حكاية العيال دى
ربنا يستر علي عيالنا جميعا
تحياتى ليكى وحاضر هازورك والله




صوت من مصر
هههههههههههههههههههههههههههه
لا ده تقريبا زى طقم الكاكاو كدة على رأى نيجرو
تحياتى ليك





عبد محتاس
عبدووووووووووووو
عبدوووووووووووووووو
عبده اطرد يا رجالة
معلش يا عبده بقى
المرة الجاية ابقى اضحك بصوت واطى
هاستناك بعد التلات ايام مايعدوا
تحياتى ليك يا محتاس




ام محمد وعمر
انا صلحت الكلمة ومعلش اعذرونى دى كانت غلطة مطبعية غير مقصودة وكويس انك نبهتينى
ومافيش اجمل من ان الواحدة تعمل حجتها بنفسها بدل عندها صحة ووقت لكدة
تحياتى ليكى يا ام محمد وعمر




سولا
انا كمان الشباك عندى الوميتال علشان كدة طريقة تنضيفه الوحيدة هى الركوب عليه كالحصان
وبالنسبة للسجاد بصراحة بصراحة انا بكنسها بالمكنسة
وكل كام شهر كدة ببعتها الدراى كلين تتغسل
لانى مش هاعرف اغسلها عندى فى البيت لانى مش عندى بانيو اغسلها فيه واساسا يعنى الحمام عندى صغنن يعنى يا اما السجادة اللى تدخل الحمام يا اما انا اللى ادخل الحمام ماينفعش احنا الاتنين مع بعض
ممكن نتخانق ونبهدل بعض
هههههههههههههههههههه
وحاضر هاجيلك علشان اعرف ايه الموضوع
وبالنسبة لشريف متخافيش انا معلماه انه ينده الناس بالالقاب
تحياتى ليكى يا سولا



الطائر الحزين
ايه ده يا طائرى الحزين
لا والنبى ايه ده
انا مش مصدقة نفسى
انا شايفاك بتضحك اهه
لو لو لو لو لو لوى
عموما متقلقش ما انا فقعتها واحدة تييييييييييييييييييييييت
قوية خلتها ترتجع على طول
تحياتى ليك يا طائرى الحزين



زوردياك
بس انا برستيجى كان هيضيع خالص لو كان حد لهف فردة شبشبى
الحمد الله قدر ولطف
تحياتى ليك



ابو خالد
طب ما انا بعمل كدة من زمان
انا فاكرة من وانا صغيرة لما كنت لسة بتعلم الصلاة
ماما وبابا علمونى انا واخواتى ان احنا نسبح بعد الصلاة
ونقول الحمد الله والله اكبر وسبحان الله كل واحدة تلاتة وتلاتين مرة
والواحد لما كبر اتعلم حاجات تانية يقولها
زى استغفر الله وسبحان الله وبحمد سبحان الله العظيم وحاجات تانية كتير اتعلمتها من كتاب الاذكار

شكرا ليك يا ابو خالد
وياريت فعلا تيجى يوم التبرع بالدم
هنتشرف بوجودك معانا
تحياتى ليك



شكرا ليكم كلكم على تواصلكم معايا
اختكم خيخة

Doba said...

بصى بقى
انا مش هقولك اجة على بوستك لانى عاملة زيك بالظبط فى رأيى وتفكيرى على الرغم انى بشتغل وطلعان عينى لكن لازم انا اللى انضف بايدى دى مسؤولية كل ست
============

انا عاوزة اعمل نداء تانى من هنا وبعد قراية تعليق ابو خالد

انت يا راجل يا طيب
لو سمحت
من فضلك
من كرمك

انشىء مدونة
فانت تستطيع بكلمات بسيطة ان تهذب السلوك وتؤثر بمن أمامك

وعلى فكرة
انا بعمل زى انت مقلت
بس لما جوزى حكالى النقطة دى قالى اننا نقولها سوا فبقينا بنقولها قبل منام اوقات اه واوقات لا بس كتير بنقولها سوا لما بحس ان الدنيا بتضيق علينا من حوالينا

اشكرك لتعليقك
وربنا يهدى

هبة

رئيس جمهوريه نفسى said...

عارفه يا ام شريف لما تنضفى شقتك بنفسك اعتقد انى ده بيخلق الفه بينك وبين المكان وعلى الاقل حتبقى عارفه كل حاجه فين مش بعد ما تمشى الى بتضف ليكى تحتاسى على الحاجه
يبقى اربطى الشبشب يا ام شريف

Anonymous said...

أستأذن أختى العزيزة نوران فى الرد على أطيب قلب أختى العزيزة هبةلى عظيم الشرف أن يكون رأى حضرتك فى انا أقل من هذا بكثير أنت إنسانة عظيمة و أدعوا الله أن يديم سعادتك أنتى و الأستاذ يحيى .. و صدقينى أختى العزيزة أنا فى سبيلى لعمل هذة المدونةلأننى أكتشفت عالم التدوين و الناس الجميلة المدونين .. و نصيحة من أخ كبير فى السن و التجربة الأستاذ يحيى يحبك من كل قلبه و أدعوا الله أن يديم هذا الحب بينكم فأنتما روحان
من الأرواح الجميلة الطيبة .
أخيك أبو خالد

appy said...

ههههههههههههههههه
بقولك يا خيختى الجميله
عندى حمله صعيديه على الشقه بتاعتى النهارده حد هيتبرع ويساعد ولا اتكل على الله لوحدى ههههههههههههههههه
وبعدين حد يلبس شبشب وهو راكب الحصان يا بنتى يالا كل مرة وانتى منظفه معلش

as.zaid said...

السلام عليكم
اولا احب اقولك ان البرستيج مالهوش دعوة خالص بانك تجيبى حد ينضفلك او لا
ولكنها تعبيرات خايبة لامواخذة يعنى
لانى مش عشان بنضف بيتى اللى هو مملكتى بكون معنديش برستيج بالعكس انا شايفة انها قمة البرستيج لما تحسى ان جوزك فرحان بيكى وانتى واخدة بالك من بيتك


تحياتى لك
وسلامى لشريف

nada_adly said...

ايوة فعلا انتي ما عندكيش برستيج علشان ما عندكيش شبب خاص بيكي وبتاخدي شبشب جوزك هاني

المفروض يكون ليكي شبشك المستقل الخاص بيكي


- نتكلم بجد شوية
ممكن تسمحي لي ااقول رأيي في موضوع الخدمات ده
بصراحة يا نوران انا اعتقد اذا احتاجت لخادمة فا ممكن يكون مثلا في حالة ان ربنا كرمني واتجوزت وكنت مثلا لسه مخلفة جديد ومحتاجة مثلا واحدة تنضف الشقة ...

- ضيفي على ده كمان اني فعلا باحب اعمل حاجاتي بإيدي ...عارفة مرة كنت باتكلم مع واحدة عن الموضوع ده وقلت لها بصراحة ( بيني وبينك وحشة في حقي ك ست بيت ان شاء الله في المستقبل ...)

- وبعدين انا ما احبش خدامة تغسل مثلا ملابسي او ملابس ان شاء الله في المستقبل زوجي ...ممكن تغسل ملابس العيال ...لكن ابوهم قصدي ملابس امهم او ملابس ابوهم لاء

- وكمان طبعا ولااااااااا تطبخ طبعا لاني احب اني اعمل الاكل بنفسي بالاضافة لموضوع النضافة ونضافة الاكل نفسه

موضوع جميل ولذيذ اوي اوي اوي ودمه خفيف جدا زيك يا نوران

صبرني يارب said...

خيييييخه انا جيت تاني عشان اشوف ردك عليا باحب اتابع البوستات الى اعلق عليها انا ممله.
بس لطشت فى حكاية انك مش بتحبي الطبيخ ده .
حد يحب ينضف الشقه ويركب الشباك حصان وما يحبش يطبخ حرام عليكى ياخيخه ده الطبيخ ده جميل اوي وظريف مش احسن من التراب والبهدله يااختي .

لا انا كده هافكر اعملكم مدونه عن الطبيخ خصوصا ان انا ايدى وجعتنى من كتر كتابة الوصفات لصحباتي على الاميل والشات نعملها مدونه بقى كل الى يسألنى أديله رابط .
أو اقولك تعالى اسكني جمبى وانا كل يوم اطبخلك وانتى روفي ليا الشقه هههههههههههههههههههههه

مهندس مصري said...

بصي بسرعة علشان أنا مستعجل دلوقتي
أنا رايي من راي صبرني يارب بالمللي
:)
ربنا يديكي الصحة يا أم شريف

dina said...

ههههههههههه
دمك زى العسل يقمر
انتى لاخيخه ولا اى كلام انتى بنت جدعه جدا ربنا يكرمك يقمر
دى اول زياره ليا بس مش الاخيره
ولازلت اتابع

بحبك يامصر said...

حلو الكلام وان جت عالشبشب فسهله
والله تفكير تمام ليه المظاهر الكدابه دى
دماغك تمام ويارب يكملك بعلك على طول كده

همس الاحباب said...

ربنا يديكى الصحة يا ام شريف
بس الفلبنية حلوة برده اتساعد
انا على فكرة يوم التنظيف باسيب الشقة وامشى لانه بيبقى عندى مهرجان المدام بتجيب اخواتهاوبتجيب الشقة عاليها واطيها وبتغرق الشارع ميه حتى لو جبت واحدة تساعدها برده تعمل هى كل حاجة
علشان كده بهرب من البيت
تحياتى ليكى وربنا يكون فى عون شريف

تحياتى خالد

قلب الأسد said...

لأ هو واضح انك فقرية .. قصدي حضرتك فقرية :) ... شبشب !!حرام عليكي يا شيخة

دكتور حر said...

الله يكرمك يا خيخه

على فكره بقى انتي لوك لامك ده مظبوط يبقى انتفت بعض خيختك منك

بارك الله فيك

لكن انتي اوحتيلي بما كنت اتوقعه من بعض المستويات النسائيه

فعلا
اذا اجتمع المال مع عقل امرأة كأصحابك

يبقى العوض على الله

لكن عادتكوا ولا هتشتروها يا معشر الخوائخ

ههههههه

الحاجه التانيه ان كانت الواحده متحسش انها باشا في بيتها وتعمل فيه للي هي عاوزاه
تبقى تلاقي كده فين
وان كان الواحدد مراته متظبتش البيت وتطبخله وتراعي عياله

يبقى هو متجوزها ليه

عشان حاجات وحاجات ولا عشان تمنحه الاستقرار والجمال والكمال والراحه

ربنا يكملك بعقلك دايما كده يا خيخه

ويباركلك انت وهاني وشريف
ويجعل حياتكم في طاعة ربنا
ونهايتكم في الجنه ان شاء الله
وهناك الراحه بقى

:)

***********
بالنسبة للآنسة الفاضله
اللؤلؤة
دي أولا خطيبتي
ثانيا
هي في المدينه طول الاسبوع فمش بتابع كتير
فسامحيها
وتواصلي معاها
وهي عارفاكي كويس وبتتابعك على طول وبنتكلم عنك كمان
يعني بتطلعي في التليفيزيون
أي خدمه
وهوصيها عليكي كمان
(:

بت خيخة وأى كلام said...

دوبا
جدعة يا دوبا
بس لو احتجتى مساعدة انا تحت امرك يا جميل
وخدى راحتك المدونة مدونتك اعملى نداء لابو خالد براحتك وانا بضم صوتى لصوتك فى النداء ده
تحياتى ليكى يا دوبا




رئيس جمهورية نفسه
كلامك مظبوط يا حودة
فى حكاية الالفة دى
وحاضر هابقى اربط الشبشب
تحياتى ليك




appy
انا تحت امرك يا ابى
ادينى العنوان وهتلاقينى جايالك بالمقشة
تحياتى ليكى



اسماء ابو زيد
والنبى يا اسماء تعالى قولى الكلام ده لصاحبتى الهايفة
هو انا كنت هاتشل من شوية
دى خنقتنى يوميها
يلا قدر ولطف
تحياتى ليكى يا اسماء



ندى عدلى
والله يا ندى
انا حتى ايام ما كنت لسة والدة شريف ما كنش حد بيساعدنى كنت بعمل كل حاجة لوحدى
يااااااااااااه
كانت ايام
بصراحة انصحك انك لما تتجوزى وتخلفى ان شاء الله ابقى فعلا هاتى حد يساعدك وقتها
انا كل ما افتكر الايام دى والانهيار العصبى اللى كان بيجيلى من التعب
اقول الحمد الله انها عدت وخلصت
تحياتى ليكى




صبرنى يارب
اهه انا يا ام مريم احب التنضيف جدا واعشق غسيل المواعين
اى حاجة فى شغل البيت من غسيل ونشر وكوى الهدوم والكنس والمسح وكل حاجة احبها جدا واعملها بصدر رحب
خلى حد يجى يقولى اطبخى
عاااااااااااااااااا
عااااااااااااااااااا
بطبخ وانا متأزمة اوى
وعلى عينى وانا بعمل الأكل
مش بطيق وقفة المطبخ
ووالله عرض مغرى اوى حكاية انك تطبخى وانا انضف دى
هافكر فيها وهحاول اقنع هانى ان احنا نعزل ونسكن جنبكم
تحياتى ليكى يا ام مريم



مهندس مصرى
تعالى هنا
انت هتاخدنى فى دوكة
ايه مستعجل دى
وتقوم راميلى كلمتين وماشى
طب لو جدع تقولى ايه هو رأى صبرنى يارب
لما اشوف بقى انت مذاكر التعليقات كويس ولا بتكتب اى حاجة وخلاص
ابقى تعالى تانى وسيب تعليق فيه حماس اكتر من كدة
تحياتى ليك يا محمد




دينا
اهلا بيكى يا دينا وتابعى براحتك وقوليلى رأيك ايه
تحياتى ليكى



بحبك يا مصر
ميرسى على الكلام الجميل
ربنا يخليك يارب
تحياتى ليك




همس الاحباب
مش فاهمة انا ايه حكاية الرجالة دول اللى بيهربوا من البيت يوم التنضيف
وبعدين انا اول مرة اشوف واحدة تجمع اخواتها علشان تنضف البيت
جديدة دى بصراحة
ربنا يكون فى عونك وعونها
تحياتى ليك يا خالد



قلب الاسد
ماله الشبشب
ده غالى والله
ده بتسعة جنيه ونص
تحياتى ليكى



دكتور حر
الله الله الله
ايه كم الدعوات الجميلة دى يا محمد
ربنا يكرمك يارب
وبالنسبة ل اللؤلؤة المكنونة
انا عارفة انها خطيبتك يعنى تعتبر من العائلة الكريمة
وعلشان كدة كنت عايزاك تتوسطلى عندها علشان ترد على اسئلتى
بس انت مقلتليش
انتوا بتتكلموا عليا بتقولوا ايه؟
اكيد طبعا بتشكروا فى اخلاقى وتواضعى الشديد
وانكارى لذاتى
وخفة دمى
والله يا محمد لو اتكلمتوا من هنا لحد السنة الجاية
الكلام عنى مش هيخلص ابدا
اصل الحاجات دى كلها
اقل حاجة عندى
مش بقولكم متواضعة جدا
نيهاهاهاهاهاهاهاهاع
دى ضحكتى الشيطانية
تحياتى ليك يا محد



شكرا ليكم كلكم على تواصلكم معايا
اختكم خيخة

Desert cat said...

ده انا طلعت يوم الجمعة نا كمان معنديش برستيج
اصل يوم الجمعة ببقى فليبينة فى البيت

اللؤلؤة المكنونة said...

اللى يجى ينضف الشباك يبقى يقلع الشبشب قبل التنضيف

نصيحة مقبولة من واحدة
ما طلعتش خيخة خالص

على فكرة أنا كمان كنت متابعة مدونتك وما كنتش معلق معلش بقى أصل أنا خيخة فى الموضوع ده بالذات

موضوع ايه؟؟
موضوع التعليق طبعا

لا أنا ولله الحمد بنضف حلو قوى بس المشكلة ان عددنا كبير حبتين فى البيت وكل ما نضف أحس انى ما نضفتش
وده بيجبلى اكتئاب وبيمنعنى من تكرار العملة ده تانى
عملة ايه ؟
التنضيف طبعا

عجبنى موقفك قوى واثبت على كده
وما تخليش كلام اصحابك الخيخة يأثر عليكى


تم الرد على تعليقك فى مدونتى
أعتذر للتأخير
أرجو قبول خالص أسفى

ممكن أقولك حاجة
أرجو أن تتقبلى كلامى وما تزعليش منى
بلاش تقولى والنبى
عشان رسولنا قال
من حلف بغير الله فقد أشرك

ماشى
تقبلى خالص تحياتى

nada_adly said...

-عارفة يا نوران بجد انا فعلا بافكر اني ما اكتبش تاني في المدونة بتاعتي

وكنت بافكر جديا اني احذفها والله بجد

بس رجع وصعب عليا حاجتين :

1. الموضوع اللي وعدتك بيه
2. ازاي ادخل واعلق عندك في المدونة


بجد احيانا الواحد بتقفل معاه قفلة جامدة اوي

الحمد لله على كل حال

بجد باحب اطمن عليكي واقرأ لك كل يوم او كل ما بافتح النت

ربنا يكرمك يا نوران

دكتور حر said...

أي خدمه ؟


********
س:
هو انتي كملتي تنضيف عالمدونه كمان
شكلها واخده كلور من امبارح

ابيضت كده ليه

بطلي لعب الله يكرمك يا خيخه

آخر العنقود said...

ازيك ياخيخة

والله انا جاية اقولك نفس اللى الحر قاله هيا المدونة عملت كده ليه ياخوخة

شكلك قاصداها ولا ايه؟
يالا زى بعضه مع ان التانى كان مميز بيكى اوى

وبعدين اما انتى خيخة صحيح
انتى رايحة توصى مين على مين
والله انتى عسل ياخوخة وبنحبك خااااااااااااااالص

وبستنى تعليقك اوى جدا خالص موت على الاخر
هههههههههه
شفتى اد ايه بقى
يعنى ما تبقيش تتاخرى عليا تانى

وبستنى موضوعاتك برده
انتى مش محتاجة توصية ياخوخة
ياختى
ايو اختى عند سيادتك مانع ؟؟؟؟؟؟؟؟


وبعدين ياخيييييييييييييييخة
هوه يعنى لو كنت قولتلك مش هاجى التبرع كنت قولتيلى لا تعالى وحاولى

ولا هوه يعنى عشان قولت انى هحاول اجى تقوليلى انتى محافظات وما تتعبيش نفسك
ههههههههههههههههه

ياخييييييييييييييخة
مش عاوزة تشوفينى
عاااااااااااااااااااااااااااا
برده باذن الله ربنا ييسر لى الحال واعرف اجى
بس رخامة بقى
عااااااااااااااااا


انا بهزر طبعا ياخوختى
برخم معاكى بس شوية
ومبروك ياقمر على شو ية التعديلات الجديدة دى

بت خيخة وأى كلام said...

قطقوطة الصحراء
يااااااااااااه
فكرتينى بيوم الجمعة
ده كان اليوم المخصص للتنضيف عند ماما قبل ما اتجوز
بعد الجواز بقى كل الايام عندى مخصصة للتنضيف
يعنى ممكن تلاقينى فى اى وقت بقيت فلبينية
تحياتى ليك يا قطة


اللؤلؤة المكنونة
يادى النهار النادى
ايه ده اللؤلؤة المكنونة عندنا
يادى الهنا
يادى السرور
بجد انتى منورانى النهاردة يا مى
وانا خلاص رحت عندك وقريت ردك ربنا يكرمك يارب
تحياتى ليكى
وشكرا على مرورك




ندى عدلى
ايه يا ندى مالك يا حبيبتى
شكلك زهقانة او مضايقة
لو فيه حاجة اقدر اعملهالك ابعتيلى على الميل بتاعى
تحياتى ليكى



دكتور حر
اصل يا محمد قاعدة زهقانة فقلت اقعد العب شوية فى البلوج
لقيت النتيجة زى ما انت شايف كدة
بقت كل حاجة بيضا
والمصيبة انى مش عارفة ارجعها تانى
اصلى كنت بلعب فيها بشكل عشوائى بحت
ومعرفش انا عملت ايه علشان اخليها كدة
عموما اهه تغيير لحد ما اعرف ايه اللى انا هببته ده
تحياتى ليك




اخر العنقود
والله يا نانا مش عارفة هى عملت كدة ليه
انا لسة بقول لمحمد انى زهقانة فقلت العب فى البلوج شوية
وكانت هذه النتيجة البيضاء
بس هى شكلها وحش اوى ولا ايه؟
وحياتكم حتى لو وحشة
قدمكم سنة بقى على بال ما افهم ايه الى انا عملته ده وبيتصلح تانى ازاى

ووالله انا لا اقصد انى اتأخر عليكى فى التعليقات
وانا كمان والله بستنى تعليقاتك عندى يا نانا

وبالنسبة للتبرع
انا طبعا عايزاكى تيجى بس خايفة اكون لحوحة اوى والناس تقول عليا انى غتيتى
وعايزة منك خدمة يا نانا
لما تيجى هاتى معاكى خليفة علشان انا حاسة انه بيتلكك وعايز يتهرب من موضوع التبرع ده
وطبعا مش هاوصيكى هاتى اللى تقدر عليه من العائلة الكريمة
اجروا ميكروباص وتعالوا كلكم مع بعض

بس بجد التعديلات دى كويسة ولا اروح العب فيها تانى ؟
تحياتى ليكى يا نانا



شكرا ليكم كلكم على تواصلكم معايا
اختكم خيخة

فرنسا هانم said...

برستيج ايه صلى على النبى
هو احنا لاقين العيش الحاف لما هنجيب شغاله
وبعدين مفيش غير نضافه ست البيت
نضفى يا ختى نضفى
ربنا يعينك
بس اوعى تسيبى اللجام وانت بتنضفى الشباك

بنوته مصرية said...

لا والله يا نونا انا في بيت بابا كنت انا اللي بنظف الشقه وكنت بخليها زي الفل انا عندي انظف ومعملش اكل هههههههه

لاني بحب التنظيف جداا

كانو دائما يقولولي لو تتعلمي بقي الاكل اقولها اي حد ممكن يتعلم الطبيخ لكن مستحيل يتعلم النظافه
بس دلوقتي بقيت بعرف بحكم اني متزوجه

هو بس اني مبعرفش انظف من نور بتلعب بلمية وبتتبهدل بس بعرف اتصرف

ربنا يقويكي وخدي بالك من نفسك

Anonymous said...

السلام عليكم

اول زيارة لمدونتك يا خيخة وبصراحة مدونة جميلة ودمها خفيف
أما بالنسبة لصحبتك معلش أنا اتفرست منها ، وانا بقرأ البوست إتنرفزت من كلامها الغريب وقولت الله يكون في عونك ، يعني تنضيف وكلام صحبتك اللي يفرس والشبشب اللي وقع ، يعني اللي بتنضف مش زعلانة وصحبتها زعلانة حاجة غريبة ههههههههه

لو فيه سبب لوجود شغالة مفيش مانع إنما مَجبش شغالة عشان الفشخرة او البرستيج ، وبعدين هو كمان البرستيج دخل في التنضيف
ــــــــ
معلش كان ليا سؤال صغير إنتي ليه مش بتجيبي واحدة تنضفلك الشقة ؟هههههههههههه

ربنا يقويكي ويوفقك لما فيه الخير

sherif

خبيب said...

ههههههههههههههههههههههههه
هههههههههههه

---

أنا للأسف مبنضفش

لأن معنديش شباشب

عبدالرحمن ياسين said...

السلام عليكم
دا أول تعليق لي هنا ...
وآخد المقلب ده ...
ههههههه
فكرت هتتكلمي على حاجة مهمة ...طلعت نكتة
ههههه
بس على فكرة ...في ناس كدة ..[يحبوا ينضفوا بنفسهم ...وهم مجوزين ..وهم برده مش متجوزين...
تحيات لكي..
أدعوك لزيارة مدونتي ..بإذن لله هتنال إعجاب حضرتك...
ودمتم دائما بخير

صاحب المضيفة said...

قال برستيج قال

وده اللي كان ناقص

ان الواحده تسيب بيتها للغريب يدخله ويعرف أسراره

اوعي يانوران تدخلي حد البيت الا في الشديد القوي وخلي بالك من مملكتك

اعملي الحاجه بايديك أحسن وساعتها هاتحسي بطعمها


سلامي لشريف بقى

ikhwangeeee said...

مكالمة حلوة أوى أوى ...


بس متفكرى تخلى جوزك يجبلك واحدة تنضفلكوا ..أهى فكرة

أحسن يقولوا المدونين مش عاوزين يحلوا مشكلة البطالة

أتى كدا هتوفرى لقمة عيش لواحدة هتيجى تنضفلك

ولا إيه ؟؟؟؟؟؟؟؟؟؟؟؟


أخوكم إخوانى حتى النخاع
http://ikhwangeeee.blogspot.com

3ala asm masr said...

لاء طبعا أحلى حاجه أ،ك تعملى حاجتك بنفسك وكمان تقلعى الشبشب قبل ما تنضفى الشباك

MerMaid said...

هههههههههههههههههههههههههههههه

مش عارفة والله اقولك ايه يا خيخة ياأختي العزيزة

بس والله بجداحنا من واحنا صغيرين انا واخواتي البنات الاتنين بننضف الشقة كلها لوحدنا ولو حصل ان ماما جابت حد تاني غيرنا برضه بنساعد الست اللي بتيجي
وفعلا طالما الواحد قادر انه ينضف بيته لوحده ليه يجيب حد تاني؟؟
وهو التاني ده اصح منه ولا اقوي منه؟؟
انا مش فاهمة ...ثقافة الخدم في مصر ثقافة عنصرية و استبدادية
مش شايفة صحبتك اللي عاوزة تتأمر علي الشغالة اللي طالعة تجري علي اكل عيشها؟
ده بدل ما تبقي معاها عطوفة وكويسة وتمد لها ايد المساعدة ف
فعلا فيه حاجات في ثقافتنا محتاجة تتنسف كلها
الصورة بتاعاتك بقي دي بتدل علي ان المرأة ملهاش اي حقوق الا لما هي تأدي الحقوق اللي عيلها الاول
وانا معاها جدا
لان برضه الشغالة دي مرأة مش راجل

مجتمع ملئ بالتناقضات
---------------------
سيبك من كل ده بقي
بجد ابقي خللي بالك من نفسك وانتي ع الشباك
يعني متدلقيش نفسك برة قوي اوك؟؟؟
تحياتي ليكي يا خيخة يا حبيبتي

سلام

بت خيخة وأى كلام said...

فرنسا هانم
على رايك هو احنا فعلا ناقصين مصاريف زيادة
كفاية الاكل اللى اسعاره بقت فى العلالى
ربنا يكون فى عون الغلابة والله
تحياتى ليكى



بنوتة مصرية
عاملة زى انا انضف ومااطبخش
بس حكم القوى على الضعيف
الجواز هيخليكى تعملى كل حاجة
خلاص ايام الدلع راحت وولت
تحياتى ليكى يا رودى




شريف
منورنى فى مدونتى المتواضعة
والله انا بفكر اجيب واحدة علشان تبقى تجيبلى الشبشب اللى بيقع منى




خبيب
طب ماتشتريلك شبشب



عبد الرحمن ياسين
ابقى خد بالك بقى المرة الجاية لان كل بوستاتى هتلاقيها فى الاخر مقلب
تحياتى ليك




صاحب المضيفة
ولا حتى فى الشديد القوى
كدة رضا والحمد الله
تحياتى ليك



اخوانجى
واحدة زى صاحبتى دى معتقدش انها هتساعد على تفشى مشكلة البطالة
هى اذا كان عليها عايزة تشغل كل الخادمات عندها علشان بريستجها يكبر ويكبر
بس يا خوفى لا يجى يوم والبرسايج ده يفرقع فى وشها
تحياتى ليك



على اسم مصر
واهم حاجة حكاية الشبشب دى
لحسن انا كنت هافقده خالص
بس ربك قدر ولطف والحمد الله
تحياتى ليكى يا هندودة



ميراميد
جدعة يا هاجر علشان بتنضفوا بنفسكم
ومعاكى حق
فى حكاية ان ثقافة الخدم بقت ثقافة عنصرية واستبدادية
ده انا شفت ناس بيعاملوا الخدمات بتوعهم اسوء معاملة
والله ساعات بحس انهم ممكن يدخلوا النار علشان معاملتهم الزفت للخادمات
ربنا يسامحهم بقى
تحياتى ليكى يا هاجر



شكرا ليكم كلكم على تواصلكم معايا
اختكم خيخة

حمامة said...

هههههههه

الله الوكيل انا اتخنقتلك سلف
هى حاجة كويسة ايه لما تلاقى حد ينضفلك
بس ده لما تكونى تعبانة يعنى او صحتك على قدك اما على اساس المظاهر
تبقى حاجة لا مؤاخده مقرفة

يلا ربنا يهدى مروة وخلى بالك المرة الجاية من الشبشب بقى

مهندس مصري said...

مع اني مذاكرهم كويس بس مش قايل
:P
و ده مش مقياس يا أختي
الكوبي و البست مفيش أسهل منه
خدي كلامي ثقة
:)

أبوشنب said...

هههههههههههه

افتكرت حد عزيز عليا

واحدة عزيزة عليا

فعلا حصل معاها الموقف

كانت ساحبة السجاجيد بتاعة البيت وشغالة تخبيط في البلكونة

وبعد ما خلصت

قاعدة بتشرب الشاي

لقيت جارتها اللي تحتها طالعة تسلم عليها

وطلبت منها تعرفها على الشغالة اللي بتنضف لها السجاجيد

علشان عايزة واحدة تنضف

ردت عليها قالتلها للاسف مش هتقدر تدفعي لها

علشان دي غالية قوي

اخدتها عزة النفس وقالت لها ولو الف جنيه انا هدفع لها

صاحبتي ردت عليها قالت لها انا اللي بنضف بيتي بنفسي لجوزي واولادي

ولا يمكن ادخل واحدة البيت عندي

koukawy said...

هههههههههههههههههههههه
مةتيني من الضحك
انا متفقه معاكي جدا في وجهة نظرك...طبعا مش بتاعة الشبشب ...ههه..قصدي التنضيف
حقيقي مفيش حد بيبقي قلبه عاي البيت زي ست ابيت
بس ساعات الواحد بيبقي مش قادر خالص
فممكن يجيب واحده تساعده
بس هي القضيه انك لازم تفضلي علي ايدها في كل حاجه لأنهم بيطلسئوا
فنستخلص من الحدوته ان في النهايه عمرك ما هترتاحي
لأن لا امان للشغالات من حتت كتيييييييييييير اوي
و بعد كده البس شبشب بيتربط عشان البهدله دي

سارورة said...

ههههههههههههه والله انتى عسل يا خيخة ههههههههههههه
على فكرة انا ممكن اجيب واحدة تنضف لو مش قادرة بس اجيب واحدة ليه ما جوزى هيبقى موجود .. يعنى حتى لو اقدر اعمل انا هحاول قدر الامكان اخليه ينضف معايا غلاسة تباتة ماتعرفيش ليه بس اهو نوع من المشاركة الوجدانية هههههههههه بس فعلا انا احب اعمل شقتى لنفسى لأنى مش هثق ان حد يعملهالى زى ما انا عايزة الا انا ... اما الاخت مروة والاخت رحاب فشكلهم كده مفتريين وربنا هيطلعه على عينهم ان شاء الله ..

Anonymous said...

العزيزه صاحبة المدونه
تحيه طيبه وبعد
مدونتك موضوع حلقه فى برنامجنا الكمبيوتر يجيب على اذاعة البرنامج العام اى المحطه الرئيسيه لأذاعات ماسبيرو على الموجه الف ام 107 وسته من عشره
يوم الأثنين 7-4-2008 الساعه التاسعه وعشر دقائق صباحا
وكافة التفاصيل فى موقعنا
http://dear.to/cairo
e-mail netonradio@yahoo.com

users online