Sunday, March 02, 2008

ورينى كدة خدت ايه؟


قبل ما اتجوز

كنت كتير اوى اسمع عن اغتصاب البنات الصغنونة

مرة اسمع عن واحد خطف بنت واغتصبها

او بنت المدرس بتاعها اغتصابها

وابشع جريمة سمعت عنها ان اب يغتصب بنته


المهم انى اتجوزت ودعيت ربنا من كل قلبى
انه لو رزقنى بعيال يكونوا ولاد

علشان بس الدور اللى ماشى فى البلد ده مايصبش ابنى

والحمد الله ربنا استجاب لدعائى

قوووووم ايييييه؟

قوم الاقيلكم بعد ماخلفت شريف علطول

الاقى مدرس بيتحرش جنسيا باطفال الحضانة

والاطفال دول من الذكور

نعممممممممممممم

ذكور؟؟؟؟

احنا هنهرج بقى

مش الدور ده كان ماشى على البنات بس

هما غيروا ليه

انا بقى قلقت من جوايا وجالى اكتئاب

وبعدين الاكتئاب مشى لما قررت

انى ادخل ابنى حضانة اسلامية

قلت خلاص مافيش غير كدة هو ده الحل

قووووووووم ايييييه؟

قوم سمعت خبر بيقولك ان مدرس قرأن

فى مدرسة ازهرية فى اسوان

اغتصب طفل عنده سبع سنين

تيييييييييييييييت
دى لفظة اعتراض حذفت من الرقابة

قوم ايه تانى

قوم انا جالى اكتئاب تانى اشد من الاكتئاب اللى قبليه

وقعدت اعيط بقى ومناخير تبربر

المهم قلت انا اهم حاجة عندى ان المدرسة

اللى ابنى هيدخلها يكون كل اللى فيها مدرسات ستات

قووووووووووووووم ايييييييييييه؟

قوم قريت مشكلة فى جرنان الاخبار
من كام شهر كدة فى باب اريد حلا

ان اب اغتصب ابنه

تييييييييييييييييييييييييييييييييييييييييييييت

دى لفظة احتجاج طويلة شوية

يا نهار مالهوش ملامح

اب اغتصب ابنه؟؟؟؟؟؟؟؟؟؟؟؟؟؟

طب دى لما اكتئب فيها الحل بتاعها ايه؟

اطلب الطلاق من هانى يعنى علشان خايفة على الواد

ولا اعمل ايه

يا نهار مش فايت ايه اللى انا بقوله ده

انا ازاى اخاف على شريف من هانى

يا نهار مالهوش ملامح بجد

هو انا خلاص اتعقدت بجد ولا ايه

ايه اللى انا بهببه ده

هو انا مالى كدة عمالة اراقب تصرفات هانى مع شريف
انا اتهبلت ولا ايه؟

وصل بيا الهبل والغباء

انى اشك فى هانى

الله بقى

طب ما الست اللى ابنها اغتصب من ابوه دى

ماهى اكيد ما كنتش تصدق ابدا

ان جوزها ابو ابنها هو اللى يعرض ابنه لموقف زى ده

ايه بقى ؟؟؟؟؟؟

هو انا مش هاعرف اعيش مرتاحة يومين على بعض

هو انا هافضل قلقانة على طول كدة

ايوة باينلها كدة يا بت خيخة

خلاص مافيش اطمئنان ولا راحة بال هتيجى بعد كدة خالص

ايوة خلاص هاحط عينى على شريف دايما

خلاص الرعب بقى ملينى على الاخر

خلاص بقى تفكيرى كله ازاى احمى ابنى من غدر الدنيا

هو خلاص كدة بقى مافيش امان للدرجادى ؟

يعنى خلاص المفروض ان اقرب الناس للعيل

ممكن يكون عدو ليه ومحدش واخد باله

مش عايزة حد يقولى سلمى امرك لله

انا الحمد الله مسلمة امرى لله و بعمل اللى عليا

وخلاص قمت بتحذير شريف

وتم تحفيظه ان محدش يلمسه فى مناطق من جسمه

بس غصب عنى مرعوبة

غصب عنى خايفة عليه

غصب عنى اعصابى بتنهار
لما بسمع اى حكاية اغتصاب جديدة

غصب عنى يا جماعة مش قادرة ما اخافش عليه

غصب عنى معنديش نفس انى اخلف تانى

واتعب قلبى تانى من الرعب على حد تانى

يكفينى رعب واحد على انسان واحد

لا قلبى ولا اعصابى مستحملين رعب جديد على انسان جديد

محدش يجى يقولى هتخاوى المحروس امتى

لان للاسف فيه ناس فى بلدنا سرقوا منى الامان

سرقوا منى امنية ان يكون عندى عيال كتير

سرقوا منى راحة البال

ويا خوفى يا خوفى يا خوفى من يوم هيجى

الام بدل ما تفتح شنطة ابنها وتقوله ورينى خدت ايه

هتلاقوها بتقلعه البنطلون وبتقوله ورينى كدة خدت ايه؟


انتهى

بت خيخة مرعوبة وأى كلام
تحديث مهم جدا
لما ذكرت خوفى على شريف من هانى
ده كان مجازا يعنى
لزوم كتابة البوست
لكن طبعا مش حقيقة
لحسن تفهمونى غلط
وتصدقوا فعلا انى بشك فى هانى
اه والنبى صحصحوا معايا كدة
ومتاخدوش كل كلمة هاكتبها على صدركوا

51 comments:

حمامة said...

هههههههههههههههههه

يا نهار ابيض

مش للدرجة دى يعنى

حرام عليكى تعيشى ف رعب كده

إن شاء الله خير متقلقيش

المهم التربية الاسلامية وان شاء الله

ربنا يحفظهولك :)

مهندس مصري said...

ايه شغل الجنان ده
انتي بتتكلمي بجد و لا بتهزري؟
أصل لو بجد يبقى لازم تتتعالجي من فرط الرعب اللي عندك ده
الله خير حافظاً و هو أرحم الراحمين
و طول ما بنعمل اللي علينا و مسلمين أمرنا لله عمر ما ربنا حيخذلنا أبداً

fatima said...

نوران الغالية
انتى يا بنتى حكايتك ايه؟؟
مخاوية و الله
انا طول الوقت كنت بحذر يوسف من الموضوع دا ...و الولد يا حبيبى يبصلى باستغراب و انا بحاول افهمه ان فيه ناس مريضة نفسيا بتعمل الحاجات البشعة دى لأنهم موش طبعيين .ز.. الولد طبعا مندهش و موش عارف ابعاد المصيبة
لكن وجودنا و ملازمته ليا فى البيت السنين اللى فاتت كان مهون الموضوع دا
بس قبل ما يورح لباباه قعدت أحذره ... و طلبت منه مينماش جنب حد غريب .. و لا اعمامه ... و ميروحش عند الجيران و يدخل حد معاه الحمام ..و ..زو ...
بس دلوقتى .. بطرد الفكرة لأنى لو استسلمتلها زيك ... هتجنن .. لأنه موش قصاد عينى و لا حتى يبنفع يشتكيلى
بس ربنا يسلم
و بعدين يا نوران ...
الاباء دول بيبقوا منحرفين و مرضى و السلوك المنحرف بيبقى فى كل حاجة يعنى هيبان و انتى عارفة اهل بيتك كويس و الخوف الحقيقى بييجى من الغرب فعلا
استعيذى بالله كده ...
و ربنا يحرسهم كلهم
تحياتى و تضامنى .

wanna b a physician said...

مش للدرجة دى يا خيخة هؤلاء قله قليلة مريضة من المجتمع

صاحب المضيفة said...

خيخه هانم


زي ما في في الدنيا وحش
زي ما في حلو


هو صحيح الوحش اكتر من الحلو اليومين دول


لكن مش معنى كده نا الدنيا كلها باظت


كده يبقى احنا وصلنا للنهاية اللي بعدها القيامة


الموضوع مش وحش كده على بشاعته صحيح


لكن المهم اننا ندعي ربنا ان يفك عنا البلاء


على فكرة اسمي انس


سلامي لشريف بقى

تحياتي

د/اجدع بنوته said...

طب مافيه خبر

ان ام اغتصبت ابنها

يبقى احنا مفروض نحط عنينا ع شريف

ومنسبهوش معاكى لوحدى

..........

حبيبة قلبى الواحد وهو ماشى

مبيبقاش عارف الضربه جياله م فين

ممكن وانا سايقه اعمل حادثه واموت

وممكن انزل م العربيه سليمه وتيجى عربيه م ورا تشيلنى تموتنى

وممكن انزل وامشى ف الشارع يقع عليا
طوبه م عماره بيبنوا فيها واموت

وممكن امشى واوصل بيتنا سليمه

وافتح الباب وادوس اللمبه اتكهرب اموت

ممكن افتح اللمبه عادى وادخل افتح البوتجاز الانبوبه تفرقع فيا اموت

يعنى لو خدت ف بالى كل ده

اذن مش هقوم م ع السرير ولا اتحرك سم

الواحد بيعمل اللى عليه وبيسلمها لربنا

وطالما انتى مراعيه ربنا ف كل حاجه

ومربيه شريف صح

واخده بالك منه

فده شىء كويس

لكن انك تترعبى عليه وتوصل انك شويه وهتحرميه م انه يلعب

مع اولاد اكبر منه علشان خايفه عليه

وكمان هيحس انه علاقته بباه او جده فيها شىء غلط

حتى لو انتى مش هتاخدى اى رأكشن

وهو معاهم

بس والله هيحس

ولا قدر الله هيتأثر سلوكه

وهيبدأ يبقى بيميل للبنات اكتر وميحبش الجنس الذكورى

ويبقى ابن مامته وهكذا

فانتى ادعمى فيه انه يدافع عن نفسه

لو حد قرب منه وحب يلمسه يصوت

يعضه يعمل اى فعل معاكس

وانه يحكيلك كل حاجه

وتفهميه ان ده غلط حد يعمله فيه

بس ...

وتتعاملى عادى جدا مع الموضوع

وتخاويه باذن الله

عن قريب يارب

ويبعد عنه وعنك وعن كل اهلك اى شر

تحياتى

بت خيخة وأى كلام said...

حمامة
والله يا حمامة غصب عنى مش برضايا
وربنا يقدرنى انى اربيه كويس
ويحفظهولى يارب
تحياتى ليك



مهندس مصرى
لا مش بهرج
بس انا ام
لما تبقى اب يا محمد هتعرف يعنى ايه رعب على عيالك
شكرا ليك



فاتيما
عارفة طبعا ان اللى بيعمل كدة بيكون اساس مريض نفسيا وبيبان عليه فى تصرفات تانية
وطبعا عارفة اخلاق اهل بيتى كويس وعارفة اخلاق هانى
انا بتكلم عن الفكرة نفسها
ازاى حد يجيله فلب ويعمل كدة فى طفل
ده بيدمره خالص
بيضيع هويته
بيطلع انسان مهزوز ولما يكبر ممكن جدا يبقى هو نفسه مدمر لغيره
انا مرعوبة على اطفال الناس كلها
مش بس على ابنى
عايزة عيالنا يطلعوا مش خايفين
عايزةالعيال تكبر وتشرح القلب الحزين
يارب احفظهم كلهم يارب
احفظ احبابك يارب
شكرا ليكى يا فاتيما



wanna
عارفة انهم قلة
لكن معرفش فين مكانهم بالظبط علشان اخلص منهم
او اضعف الايمان ابعد عنهم
تحياتى ليك


صاحب المضيفة
اولا انا عارفة ان اسمك انس
وكنت فاكراك مش عايز تقول
ويارب يسمع منك
ويفك عنا البلاء
ويبعد عن اطفالنا كل حاجة وحشة
تحياتى ليك

شكرا ليكم على تواصلكم معايا
اختكم خيخة

بت خيخة وأى كلام said...

اجدع بنوتة
معاكى حق طبعا يا سمسمة
انا بالبوست بتاعى ده
بخرج رعبى اللى جوايا
علشان اقدر اربى ابنى بصورة طبيعية
برمى عليكم بلايا علشان تطمنونى وتقولولى لأ لسه الدنيا بخير
وتقولولى انى مزوداها حبتين
عايزة اطمن يا جماعة
محتاجة انى اطمن
ومتقلقيش على شريف
انا برضه مش اوفر كدة
الولد الحمد الله بيتعمال بصورة طبيعية مع الكل ومع اهله
وياريته يلعب مع البنات
بس هو طالع بيحب اللعب اكتر مع الولاد
تحياتى ليكى يا سمسة

آخر العنقود said...

ازيك ياخوخة
ايه الكلام الكبير ده بس
انا معاكى ان اللى انتى قولتيه ده واقع وموجود
بس زى ماقبلى قال ان لسه فى خير
طيب انتى عرفتى ايه ظروف البيئة اللى حصل فيها كل ده
ايه طبيعة الشخص اللى عمل كده؟
انتى ماعليكى غير انك تعلمى ابنك ان يخاف ربنا فى كل حاجة
وتكونى انتى مثل له فى كده
لان اكتر حاجة الاطفال عاملين زى السفنجة واسهل طريقة انك تعلميهم بيها هى انك تعملى اللى انتى عاوزاهم يتعلموه قدامهم
هما بيموتوا فى حاجة اسمها تقليد
واوعى توصلى لشريف احساسك بالخوف اللى باين فى البوست ده يانونا
او يعنى يكون تحذيريك له باسلوب غير مباشر
هتقولى لى ليه؟
هقولك عشان شريف يحس بالامان شوية
وما يبقاش عنده وسوسة من اى حد يتعامل معاه
كده ممكن يكون شخص انطوائى لانه مش قادر يأمن لحد
مش قادر ينسى كلام ماما اللى قالته
مش قادر ياخد اى خطوة غير لما يشوف ماما هتقوله ايه
انا طبعا مش بقلل من قيمة كل ده
بس يعمل كده من باب الاستشارة بس مش من باب الخوف والرعب

معلش بقى انا حاسة انى وسعت الموضوع حبتين تلاتة
لكن اعذرينى بقى يانونا
وفى الاخر بقى ربنا يحفظهم من كل سوء يارب
وبالنسبة لسؤالك التانى هجاوبك عليه
بس فى تعليق تانى كمان شوية يانونا
تحياتى ليك

soska said...

أعتقد انك مهوله الموضوع حبتين هي الحاجات دي طبعا موجودة محدش ينكر لكن انتي كل اللي عليكي تواعيه زي ما عملتي و ربنا يحرسه هو و كل اطفالنا يارب لكن انتي موتيني من الضحك على موضوع بكرة نقلعه بنطلونه دي بصراحة فقر جدا و مسخرة ربنا يحميه و يحافظ عليه بس على فكرة بلدنا ملهاش ذنب الموضوع ده نتيجة مرض موجود فالعالم كله واحنا و حظنا

همس الاحباب said...

الله عليكى انتى طلعتى دماغ
ايه يا اختى ده حرام مش للدرجة دى
ايه مصر كلها بقت التوربينى ولا ايه
من حقك تخافى وتقلقى بس مش بالشكل ده
انتى معاكى ولد ومال لو بنت كنتى عملتى ايه
ربنا كريم ورزقك بشريف ومال لو بنت
كنتى اتحطيها فى جمجم
قل لن يصيبنا الا ما كتب الله لنا
والحذر عمره ما يمنع قدر
المهم احنا ما نعملش حاجة غلط علشان ما تقعدش فى اولادنا وربنا المستعان على كل حال
تحياتى وهدى من روعك يا اختى

عبدالله said...

السلام عليكم ورحمه الله وبركاته

فى البدايه بشكرك ع فكرة البوست اللى انتى بعتيه
بدعيلك من قلبى ان ربنا يحفظلك ابنك شريف ويرضية ويرضى عنه
(رايى).
هو انك تخافى ع بنك وكل حاجة وتحميه بس عن طريق الدين وهو انك تعيشيه حياه أسلامية طيبه ومتخافيش علية من أى حاجة بعد كدة,(أحفظ الله تجده أمامك),يعنى لما يكون دايما مع ربنا ف كل تصرفاته يبقى أكيد ربنا هيحفظهولك.
صحيح احنا مش مسأولين عن تصرفات الاخرين لكن مسئولين عن نفسنا أمام الله عز وجل.
(رفض صغير).
أخر كام كلمه انتى كتبتيهم فى البوست,أظن مكنش لهم لازمة وهما((الام بدل ما تفتح شنطة ابنها وتقوله ورينى خدت ايه)) وما بعدها.
كلامنا واضح ومفسر نفسه بنفسة من غير التلميح بمثل هذه الكلمات.
بدعيلك ربنا يكرمك ويحفظلك أبنك من كل سوء..اللهم أمييييييين

محمود الدوح said...

انا اسف لما هقول
ان الشعب المصرى بقى شعب حقير
ناس شاذه
تخيل واحد عارف نفسة ان هو شاذ
شاذ
يعنى مش طبيعى
ويبقى عادى وهو بيتكلم معاك

وناس تانية ترفع الحديد بطريقة استغلالية

انا بتكلم عن الشعب اللى اتحول لغول

ابن حـجـر الـعـسـقـلانـى said...

و الله يا خيخة أنا مش عايز أثير مخاوفك .. لكن أنا واحدة قريبتى بنتها اتخطفت من قدام مدرستها فى عز الضهر .. بس البنت رجعت سليمة الحمد لله لأن العصابة دى كانت بتاعة فلوس و دهب و كدة .. فلما مالقوش معاها حاجة سابوها .. بس كانوا سافروا بيها بنى سويف و أولاد الحلال رجعوها من بنى سويف بعد يومين .. و شوفنا يومين ما يعلم بيهم إلا ربنا

ربنا يحفظنا جميعا يا خيخة

Anonymous said...

لا يا نوران لا تخافى
ألم تقرأى فى كتاب الله الآية الكريمة" وَأَمَّا الْجِدَارُ فَكَانَ لِغُلَامَيْنِ يَتِيمَيْنِ فِي الْمَدِينَةِ وَكَانَ تَحْتَهُ كَنْزٌ لَهُمَا وَكَانَ أَبُوهُمَا صَالِحًا فَأَرَادَ رَبُّكَ أَنْ يَبْلُغَا أَشُدَّهُمَا وَيَسْتَخْرِجَا كَنْزَهُمَا رَحْمَةً مِنْ رَبِّكَ وَمَا فَعَلْتُهُ عَنْ أَمْرِي ذَلِكَ تَأْوِيلُ مَا لَمْ تَسْطِعْ عَلَيْهِ صَبْرًا (82)"
فى بعض التفاسير أبوهم الجد السابع ،أذن طالما نحن مع الله و لا نجعله أهون الناظرين فسوف يحفظ الله أولادنا بأذن الله
أطمئنى يا نوران و لا تخشين على شريف شئ.
أبو خالد

أنونيمس said...

صلي ع النبي كده وقومي صلي ركعتين
وادعي ربنا انه يحفظ شريف
ويبعد عنك الوساوس

بطوط حبوب said...

فكره البوست حلوه اوى
ومش هعرف اعلق

صوت من مصر said...

انا هخلف ولد او بنت اول حاجه هقولهالوا انه يتعلم ازاى يمسك مطواه او موس
لا طبعا اول حاجه انه يبعد عن التشويش الفكرى ويركز هو عايز ايه مش الناس عايزه ايه

Nigro said...

مبدئياً كده انت تبطّلي تقري جرايد أو تتفرجي على نشرات أخبار
آه ماشي خافي على شيري زي ما انت عايزة
بس تخافي مش تترعبي
طيب أنا قريت في مجلة زُحلية(أصلها كانت بتصدر في كوكب زحل) إن فيه ام كانت خايفة جدا جدا جدا على ابنها من ان حد يتحرش بيه
فقوم إيه؟
مالاقتش حد تحرش بيه
فقوم إيه؟
اتحرشت بيه هي
انت ما قريتيش الخبر ده ولا إيه؟
استهدي بالله كده و ما تخافيش
الدنيا لسه بخير
يخرب عقلك

سكــر said...

لا يا ام شريف

مش للدرجه دى

كل الرعب دا

صدقينى البوست بتاعك دا خلى الدم يغلى فى عروقى

للدرجه شايفا كل الناس دراكولا

للدرجه شايفا كل الناس ذئاب

للدرجه شايفا كل الناس مغتصبون

اااااااااااااايه

ايه ياام شريف

فى ناس مؤمنه كتير

وكون انك قرأتى بعض الاخبار

عن بعض حوادث الاغتصاب

مش معناه ان كل الناس مغتصبون

احنا 75 مليون

وطبيعى انك تلاقى الحوادث دى

تحياتى

احمد سكر

ابو محمد ومحمود
هه

kojo - alter said...

ايه يا خيخة الرعب الى انتى عايشة فيه ده
فكك و خليها على الله
مافيش احسن من التوكل على الله
بس خلاص

الباحث عن الحقيقة said...

سيبى البنطلون بتاع الواد
ما تخليش الواد يخاف من الناس
انتى كده هتعقديه اكتر
بقولك ايه
احنا نقدملك معاه فى الحضانه تروحى معاه
بعد الحضانه خليه يدرس منازل
هههههههه
بهزر طبعا
لالالا بجد الاقتراح الوحيد
انتى ..تروحى ..تشوفى ..دكتووور
مش دكتور امراض نفسيه
اقصد دكتور انف واذن وحنجره علشان مناخيرك الى بتـ... اف بقى يا شيخه اوعى كده
ههههههه
مع تحياتى الباحث عن ابن حجر

بت خيخة وأى كلام said...

اخر العنقود
والله يا نانا بعلمه يخاف من ربنا
وبحاول على اد مااقدر دايما انى اعمل قدامه كل حاجة كويسة علشان يقلدنى فى الصح وبمسك قدامه لسانى الطويل اللى عايز قطعه من لغلوغه
علشان مايسمعش منى غير كلام كويسة
ووالله انا مش بنقله رعبى عليه ده
انا رعبى ده نقلتهولكم انتوا علشان خلاص كنت هانفجر من كتر الرعب
لانى كاتماه جوايا
فقلت مافيش غيركم تستحملوا رعبى وتطمنونى شوية وتضحكوا عليا وتقولولى لأ يا خيخة ماتخافيش الدنيا لسة بخير

اما بالنسبة للسؤال اللى انا سالتهولك على المدونة بتاعك
انا اضفت ليه كمان سؤال وعايزاك تاخدى وقتك براحتك اوى وتبقى تردى عليا
وشكرا ليكى يا نانا على تعبك معايا


سوسكا
ربنا يحفظلنا ولادنا جميعا يارب من كل سوء وشر
تحياتى ليكى


همس الاحباي
والله يا خالد
اللى انا شايفاه دلوقتى بقى مافيش فرق خلاص بين الولد والبنت
العيال كلها قلق
ربنا يحفظهوملنا يارب
تحياتى ليك





عبدالله
رأيك انا متفقة معاك عليه
وربنا يقدرنى واربيه تربية كويسة
وبالنسبة لرفضك الصغير جارى التفكير فيه ولكن دون وعد منى بتغيير الجملة المشار اليها
شكرا ليك يا عبدالله




محمود الدوح
مش كل الشعب بقى حقير
فيه ناس مازالت كويسة ومتمسكة باخلاقها ودينها
انت واحد من الناس دى
يبقى متعممش وتقول ان الشعب كله حقير
تحياتى ليك يا حودة




ابن حجر العسقلانى
اهه يا جدعان
اهه واحد مننا اهه
واحدة قريبته اتعرضت للخطف
طب تصدق يا عسقول يا اخويا انا لما قريت تعليقك خفت اكتر
حسيت ان موضوع الخطف
والحوادث اللى مش ولابد
قريبة جدا من الواحد
لانى بحس ان كلكم اخواتى فلما واحد منكم يقول انه حد قريبه اتعرض لمشكلة بحس ان المشكلة دى تخصنى انا
بجد الحمد الله ان ربنا رجعلكم البنوتة بالسلامة
وربنا يكون فى عون مامتها دى تلاقيها ماتت فى اليوم ملايين المرات من الرعب على بنتها
وتلاقيها دلوقتى من جواها مرعوبة اكتر من الاول
ربنا يحفظلنا عيالنا يارب
تحياتى ليك يا عسقول




ابو خالد
غصب عنى بخاف مش برضايا والله يا ابو خالد
تحياتى ليك


انونيمس
حاضر
علم وسينفذ يا فندم
تحياتى ليك يا انونيمس



بطوط حبوب
كفاية زيارتك ليا
عندى بمليون تعليق
شكرا ليك




صوت من مصر
ربنا يكرمك يارب وتتجوز وتخلف وتعرف تربى ولادك صح بالطريقة الصح
تحياتى ليك




نيجرو
انا بقول كدة برضه
ان نشرات االاخبار والجرايد بتجبلى هسهس
اما بالنسبة للخبر اللى بتقول عليه
بصراحة اول مرة اسمع عنه
بس لسه برضه اجدع بنوتة كانت اشارت اليه فى تعليقها
وشكرا ليك يا نيجرو
علشان بتقولى ان الدنيا لسة بخير
اتمنى فعلا انها تكون لسة بخير
على الاقل الدنيا بتاعة شريف واللى زيه تكون لسة بخير ونضيفة ومتلوثتش مننا احنا الكبار
تحياتى ليك




سكر
اولا بعد الشر على دمك اللى غلى فى عروقك
وبعدين انا مش شايفة حاجة برضايا
انا لابفتح عنيا على جرايد هى اللى بتقول ان الناس كلها دراكولا ومغتصبون
يعنى الكلام ده انا ماجبتهوش من دماغى ولا مرعوبة كدة على الفاضى
الكلام ده انا سمعته وقريته وشوفته فى التلفزيون
واكيد كلكم شفتوه زى بالظبط
بس الفكرة بقى ان مش كل الناس هتتعامل مع اللى بتشوفه زى بعضها
يعنى مثلا انالما شفت الحوادث دى اترعبت
غيرى لو شافها ولا هتأثر فيه لانه مثلا معندهوش اطفال يخاف عليهم
غيرى ممكن يكون بيبكى بدال الدموع دم لانه كان واحد من ضحايا الحوادث دى او حد من عياله كان ضحية من الحوادث دى
مش لازم اللى اترعب منه انا
تترعب منه انت
ومش لازم اللى يهمك يهمنى
كل واحد حسب تفكيره وتربيته وارائه وظروفه
وكل واحد حسب قوته الداخلية فى تقبل امور صعبة
وانا بعترف انى فى النقطة دى
خيخة اوى
خيخة على الاخر
خيخة خالص
انا لا اتقبل اى امر سئ بطريقة عقلانية
انا بترعب من جوايا وانهار
بس خلاص
تحياتى ليك وربنا يخليلك محمد ومحمود



كوجو
ونعم بالله
تحياتى ليك


شكرا ليكم كلكم على تواصلكم معايا
اختكم خيخة

بت خيخة وأى كلام said...

الباحث عن الحقيقة
هههههههههههههههههههههه
متقلقش يا معلمى
انا خلاص خدتلى قرصين فلورست
والرشح توقف خلاص
تحياتى ليك

MerMaid said...

بلاش الرعب ده

تحياتي

فرنسا هانم said...

يابنتى هدى روحك
وصلى على النبى
هى الاشياء دى موجوده
لكن
بنسبه ضئيله جدا جدا
لكن الفاكهه البايظه بتفوح ريحتها بسرعه
وبتغطى على بقيه القفص
ودول ناس شواذ

سهر الليالى said...

أقولك حاجة

بطلى تقرى جرايد أحسن
:)

وبجد نصيحتى ليكى حاولى تسيطرى على رعبك دة عشان متأذيش أبنك أكتر وتخليه هو يبقى مرعوب ولا تقلب معاه بعقدة ولا يقول امى اصلها عندها هسس وهتجننى

مدام انتى عملتى اللى ليكى وسلمتى امرك لله حاولى تسيطرى

ربنا يحميلك ابنك وتشوفيه احسن راجل فى الدنيا

اه وعلى فكرة طلعى الااوهام دى من دماغك وهاتيلو اخوات وسيبك
يا بنتى مهما كان العيال عزوة

تحياتى
سهر الليالى

خمسة فضفضة said...

السلام عليكم ورحمة الله وبركاته

ماتقلقيش يا نوران ربنا هايستر ان شاء الله ويعديها علي خير
لو كل الناس عملت زيك كده عمر ماحد هايخرج من بيته اصلا

خمسة فضفضة said...

السلام عليكم

نونا ليا عندك طلب صغنون
يا ريت تخلي الصفحه الرئيسيه فيها موضوعين او تلاته ، دايما ببقي عاوزه اتابع الردود بتاع الموضوع اللي قبله بس ساعات كتير باكسل اروح لصفحه تانيه ، كمان مرات باكتشف فجأه ان كان فيه بوست لا قريته ولا علقت عليه ، مثلا اكتشفت بالصدفه وانا بقلب في الريدر انهارده البوست بتاع استاذ رضوان اللي من فلسطين

يارب ما يكونش طلب تقيل عليكِ



تحياتي

قلوب بتغنى said...

شوفى يا قمر ليكى حق تقلقى على ابنك طبعا فبلد بقيت مليانه زباله
بس انتى مؤمنه وكل الى عليكى تاخدى بالك وترمى تكالك على الله
وباذن الله ربنا ميضوركيش ابدا
ابقى زورينى

Soooo said...

ده مين اللي يفكر ولا يستجرى ولا يحط في عقل باله انه يلمس شعره واحده من ابن اختي
طب والله العظيم كنت كلته بسناني اكل


ربنا يحمي شريف ويحمي كل الاطفال اللي زيه
وربنا يهدي العالم المرضى اللي ممكن يفكرو في حاجه زي كده
وربنا ياخد اي حد عمل كده


سلامووووووووووز

بنوته مصرية said...

ربنا يستر علي بنتي

تصدقي يا نورا ليا جارتي بتحب نور اووي ونور بتقولها يا تيتا ليها ابن يعني في 2 ثانوي تتصوري انا من لما نور بقيت تمشي مش بسيبها خالص
ولو دخلت عندها لازم اكون معاها بخاف عليها اقول ده سن مراهقة ولما بنكون متجمعين عند حماتي مش بخليها تلعب مع الاطفال الولاد الاكبر منها

ربنا يستر بجد انا ان شاء الله ناوية مش اسيبها تخرج لوحدها لما تكبر واني اكون صحبتها وكل مكان معاها

ربنا يحفظ ولادنا يارب

تحياتي

عايز أتعلم said...

يا ستي ..مش كده

ادعي بس ربنا يحفظ شريف من أي خطر خارجي ..ههههههههه
واقري عليه الاذكار بس قبل ما يخرج وربنا هيحفظه ان شا ء الله

as.zaid said...

مش هقدر اقولك غير اللى الرسول ص قاله )احفظ الله يحفظك احفظ الله تجده تجاهك اذا سالت فاسال الله واذا استعنت فاستعن بالله......................الى اخر الحديث )
اهم حاجة ان احنا نربى اولادنا صح بتربية اسلامية
وبعدين بقى الحافظ هو الله


اللهم احفظ اولادنا واولاد المسلمين جميعا يارب العالمين..................
تحياتى لك ولشريف

appy said...

تعبتينى من كتر قوم واقعد كل ما تقولى قوم ايه اقوم اقف ايه يا بنتى انت خسيت اتنين كيلو حلوة اللعبه دى يالا تانى
طبعا انا فاهمه القضيه وعاوزة اقولك انى خايفه على ابن اختى وحتى على اختى اللى عندها 21 سنه بس يا خيخه ربنا موجود واحنا لازم نأخد بالنا بس
بقولك طالبين ناس فى العباسيه احجز لك هههههههههههههههه

Doba said...

انا مكنتش هعلق لانى اتكلمت معاكى فى الموضوع ده قبل كده بس عندى كلمتين كمان وهقولهم والسلام

عجبتنى جدا الايات اللى ذكرها فى التعليق أبو خالد جدا

اعتمدى على الله وهو لن يخلف رجائك
=====

تانى حاجة

ذكرلى دكتور حر حاجة حلوة قوى بقيت حطاها فى بالى قوى ووصيت جوزى عليها واللى حواليا قوى

اللى هيه ايه بقى

الدعاء لابناءك
حسن الدعاء ليهم

ادعى لشريف دعوات كتير دائمة وتكون صادقة قوى وطالعة من قلبك وهيه دى اللى هتحفظ ابنك فعلا

ثم حاجة اخيرة بقى شعبية بيقولك اللى تعمله يا فقى فى ابنك تلتقى

انا مش هقولك اللى انتى بتعمليه
انا هقولك اللى بتزرعيه

احسنى زرعك
يصلح نبتك

تحياتى
هبة

الشنكوتي الكبير said...

ولما توصل بينا الأمور للدرجه دي
للأسف يا خيخه مش بس في موضوع التحرش

كل حاجه مبقاش فيها امان
بنخاف من كل اللي حوالينا بنخاف من اقرب الناس لينا
بنخاف من اصحابنا من جيرانا من اخواتنا من اهالينا من حبايبنا -وطبعا مش غ علشان محدش يقول اني بخاف منها- بنخاف من كل حاجه وحاسين اننا طول الوقت لازم نحط عيونا في وسط راسنا
وللأسف مش هاقدر اقولك لا تخافي واتوكلي على الله وجمدي قلبك لسه الدنيا بخير
لأن الدنيا مش بخير ولا حاجه دي بقت زفت
كل اللي اقدر اقوله خلي عينك في وسط راسك
حرصي قوي
علمي ابنك ياخد باله
علميه ان محدش عارف الضربه هتجيله منين وازاي
علشان ميجيش في يوم بعد ما يكبر كده ويبقى راجل بيشتغل يروح يعيطلك ويقولك يا ماما تصدقي اقرب زمايلي غدر بيا وضيعني
علميه يعمل حسابه ان مفيش حاجه اسمها ده زي اخويا وعمره ما هيبعيني
اه يصاحب ويحب الناس لكن اوعى تدي ضهرك لحد
اوعى تعتمد على حد غير نفسك
ما حك جلدك مثل ظفرك فتول انت جميع امرك
لأن ممكن بدل ما يحك لك جلدك يا اما يتحرش بيك يا اما يغتصبك

وختاما سامحيني على الفاظي بس هاعمل ايه الموضوع صعب قوي

سلااااااااااااااام
اخوكي ايهاب

بت خيخة وأى كلام said...

ميراميد
حاضر
تحياتى ليكى



فرنسا هانم
تشبيه بليغ فعلا يا فرنستى
تحياتى ليكى



سهر اليالى
والله باعمل اللى عليا ورعبى ده انا مش بطلعه قدامه
ده قدامكم انتوا بس
وانا طلعتوا لما حسيت خلاص انى مش قادرة اشيله لوحدى فقلت مين يا بت يا خيخة ترمى عليه بلاكى ورعبك
مالقيتش غيركم بصراحة
استحملوا بقى
تحياتى ليكى يا سهر



خمسة فضفضة
ربنا يسمع منك يا فضفضة
وبالنسبة للطلب بتاع اكتر من بوست
حاضر يا حبيبتى انتى تامرينى انا بس معرفش اوى الواحد بيغير ازاى فى الحاجات دى بس هادعبس وهالبيلك طلبك
تحياتى ليكى



قلوب بتغنى
ونعم بالله
تحياتى ليكى وهازورك حاضر


سووووو
طول ما انت موجود يا سووو انا مطمنة
لو حصل حاجة هاندهلك انت وسونيا جرهام
تيجوا تخلصوا الموضوع على طول
تحياتى ليك




بنوتة مصرية
ايوة يا رودى خدى بالك منها
ولما تكبر صاحبيها علشان سرها يكون معاكى
وربنا يحفظهالك يارب هى وكل اللى زيها
تحياتى ليكى



عايز اتعلم
طب ما تعمل فيا معروف يا خليفة وتقولى الاذكار دى ايه
لان انا كل اللى بقوله لما شريف يخرج من البيت
يارب احفظهولى من كل سوء ومن كل شر ومن كل عين
هو ده اللى انا بقوله
مش حافظة اى اذكار علشان اقولها
ربنا يكرمك يارب
تحياتى ليك




اسماء ابو زيد
والله يا اسماء
انا باخد بالى اوى من تصرفاتى
وبحاول ارضى ربنا واراعى ربنا فى كل تعاملاتى مع الناس
علشان ربنا يردهولى فى ابنى ويحفظهولى
ويارب يقدرنى واربيه كويس وماكونش بربيه غلط وانا مش واخدة بالى
تحياتى ليكى


appy
طب اتصليلى بيهم واحجزيلى مكان هناك
تحياتى ليكى يا سكرة



دوبا
متأخرة ليه يا هانم
انا مستنية ردك عليا من صباحية ربنا
وعمالة اقول لما اشوف البت دوبا هتكتب تقول ايه
وكنت ناوية اجيب سيرتك فى البوست واشردك وقلت لأ بلاش لما اشوفها هى هتكتب ايه من غير اى تأثيرات خارجية

بصى يا دوبا
انا مش ملاك ماشى على الارض
انا انسانة مليانة عيوب كتيرة جدا
لكن بحاول بقدر الامكان ان عيوبى دى ماتظهرش قدام ابنى
بالعكس انا بقصد انى اعمل قدامه كل حاجة كويسة وحلوة ودينية علشان اكون بالنسباله قدوة انا وابوه
لما بصلى باندهله يصلى معايا
انا شايفة انى بزرع فيه حاجات كويسة والحمد الله
وده بشهادة كل اللى بيقعد مع شريف فترة كبيرة وياخد باله من تصرفات شريف
اقولك على حاجة مرة كنت بكلم اختى فى التليفون
وفى وسط الكلام بقولها يا بت اسمعى
شريف ده راح بصصلى اوى وبصوته وهو بيزعق وعينه مبرقه ومكشر وراح قايلى مامى
محدش يقول بت
الكلمة دى وحشة وربنا يزعل منك كدة
وقيسى كدة على حاجات تانية كتير
شريف بقى هو اللى بيصلحلى حاجة لو عملتها غلط قدامه
يعنى مرة قاعدة غصب عنى على الكنبة وتنية رجلى تحتى وكنت لبسة الشبشب شريف قالى مامى غلط حد يحط الشبشب على الكنبة
انا الحمد لله راضية على طريقة تربيتى لشريف
وشريف اجتماعى جدا وبيحب الناس

بقى دلوقتى لما يسمع الادان يقولى مامى يلا علشان نصلى بقى

بفرح اوى انى ربت فيه الحاجات دى

بس ارجع واقولك
ان شريف قدام عينى بقدر اشكله زى ما انا عايزة
لكن انا معرفش الناس اللى برة اهلهم شكلوهم ازاى
الولد اللى مدرس القرأن اغتصبه ده
ما هو الولد ده اهله علشان حرصهم انهم يربوه على الطريقة الاسلامية ويزرعوا جواه نبته سليمة ودوه مدرسة ازهرية
والنتيجة كانت ايه ان مدرس القرأن اغتصب الولد
الولد ده ذنبه ايه
ما اهله اهم واضح انهم عايزين يربوا ابنهم كويس ويزرعوا فيه زرعة كويسة
هما ذنبهم ايه ان ابنهم نفسيته تتدمر
ابنهم ذنبه ايه يا دوبا

يبقى المشكلة هنا مش بس فى طريقة تربيتك لابنك او تربيتى لابنى
المشكلة هنا فى المجتمع اللى ابنك هيخرجله
الناس دى ربت ابنها صح وجه واحد من برة دمر كل شئ
عايزانى لما اسمع كدة
ماترعبش
يعنى انا ممكن ازرع فى ابنى كل ما هو جميل وخير ويجى حد من برة يضيعلى تعبى ده فى كلمة ممكن تتقال غلط قدام ابنى او تصرف شاذ يحصل من واحد مريض
المشكلة مش فى تربية الاهل لعيالهم
المشكلة فى الناس اللى ماتربوش اصلا ولا عندهم وازع دينى ولا اى اخلاق تردعهم عن انهم يفكروا فى اذى طفل صغير

انا معاكى فى اللى انتى قلتيه
احسنى زرعك يصلح نبتك

بس مش هو ده اللى انا خايفة منه
انا خايفة فى الناس اللى ما احسنوش زرعهم
لحد ما زرعهم ده كبر اوى وممكن يضر النبتة بتاعتى انا اللى انا تعبت فيها واحسنت تربيتها

ايه الرغى الكتير ده
طولت عليكى معلش
تحياتى ليكى يا دوبا

شكرا ليكم كلكم على تواصلكم معايا
اختكم خيخة

بت خيخة وأى كلام said...

الشنكوتى الكبير
عارف يا ايهاب رغم ان كلامك رعبنى اكتر
ورغم ان كلامك هو ده تقريبا اللى بيفسر حالتى وبيشرح فعلا احساسى ناحية الدنيا
لكن انا كان نفسى جدا تقولى لا يا خيخة الدنيا بخير
لكن هتخلينى كدة اقول للناس كلها اللى جت علقت هنا
اهه يا جماعة
واحد حاسس بيا وفاهم انا بتكلم عن ايه
الدنيا اهى مش بخير ولا حاجة وانى فعلا لازم اخاف واقلق واترعب
اهه يا جماعة محدش يجى يقولى انى مزوداها
لان واضح ان مش انا بس اللى خايفة من غدر الدنيا
تقريبا كلنا كدة بس بنأوح وعاملين نفسنا سبع رجالة فى بعض
ربنا يسترها علينا وعلى عيالنا
تحياتى ليك يا ايهاب
وكلامك فى محله

Desert cat said...

الدنيا فيها الخير والشر وفيها الكويس والوحش
يعنى اطمنى يا جميل مش تترعبى كدا
لان الوحش والشر اقل من الناس الطيبين الكويسة
وان شاء الله خير
ربنا يحمى الجميع

3ala asm masr said...

مش انتى لوحدك والله اللى اتعقدتى يا خيخه انا بقيت اخاف امشى فى الشارع انا باخد ابن اختى الكبير معايا فى كل حته عشان هو ماشاء الله طول بعرض وانا قصر برفع فمحدش بيشوفنى وانا ماشيه معاه

inksarat said...

الافعال الفردية من اشخاص مرضى لا تستوجب التعميم ولكنها تستوجب الحرص والتوكل على الله
فمثلا لو كل انسان قرأ عن حوادث الطرق والقطارات والطائرات تعدى خوفه مرحلة الحرص ووصل الى الرعب يبقى محدش هيتحرك من بيته ولا ايه ؟
ـــــــ
اما مجمل مدونتك فانها تحمل روح ونكهه تجعل القارىء كما لو كان يسمع كلاما وليس يقرأه
ــــ
دمت بخير

Ahmed Al-Sabbagh said...

هههههههههههه

انا سمعت ان واحدة مرة اغتصبت ابنها

تيييييييييييت

ايه رأيك بقى

هاتى شريف نربيهولك بقى

هههههههههههههههه

تسلم ايديك

وبجد دايما كتاباتك رائعة

تسلم ايديكى

أحمد

alter said...

هههههههههههههه
تصدقى انى سيبت البوست كله و ركزت فى الحتة بتاعت جوزك دى
هههههههههه
ودى الواد الملجأ علشان يبقى بعيد عنه
ههههه
على فكرة لو فضلتى على كدة هتتجننى
و على الخانكة وش هنوديكى
بصى انا فى الموضوع ده ما عنديش غير كلمة واحدة
خليها على الله
توكلى على الله ...
واوعى تخلى شريف يقعد مع ابوه
انا مش خايف على الواد من ابوه
انا خايف على جوزك من الواد
يا ماما ده دلوقتى الاطفال متفتحين بسم الله ماشاء الله
فى المجال ده خاصة
خافى على جوزك مش على الواد
ربنا يخليهوملك الاتنين يارب
و يحفظهم من كل شر
ويسلمهم من كل سؤ

kojo

الطائر الحزين said...

وليخش الذين لو تركوا من خلفهم ذرية ضعافا خافوا عليهم فليتقوا الله

بت خيخة وأى كلام said...

قطقوطة الصحراء
ربنا يسمع منك ياقطة
تحياتى



على اسم مصر
عارفة خوفك على نفسك ده يا هندودة مش هيجى حاجة جنب خوفك على ولادك لما تتجوزى وتخلفى انشاء الله
ربنا يستر علينا وعلى ولادنا ويحفظهم من كل سوء
تحياتى ليكى



انكسرت
عارفة انى مش المفروض اعمم
وانا مش بعمم برضه
انا كل اللى اقصده فى البوست ده
انى مرعوبة على ابنى
وغصب عنى بخاف مش بايدى
تحياتى ليك



احمد الصباغ
عليك غرامة تأخير وصلت لحد سبعة جنيه وخمسة وستين قرش
ادفعهم قبل ما تكتب التعليق
تحياتى ليك والبلوج منور بزيارتك



alter
اوك انا مستعدة اروح الخانكة بس ابنى يبقى معايا برضه
تحياتى ليك


الطائر الحزين
معلش يا طائرى الحزين ممكن تفهمنى تقصد ايه بالاية الكريمة
هستنى توضيحك




كلمة اخيرة لكل اللى علق هنا على البوست ده
واللى كان ردهم فيما معناه انى اهم حاجة اربى ابنى كويس وازرع جواهم بذرة طيبة


يا جماعة
حطوا نفسكم فى الموقف ده
دلوقتى مثلا واحدة منكم ماشية فى الشارع لنفترض انك انتى يا دوبا اللى ماشية فى الشارع
ولانى اتشرفت بمعرفتك شخصيا وشوفتك على الحقيقة
اقدر اخد انطباع عنك انك انسانة ملتزمة دينيا واخلاقيا ومظهرط يدل على جوهرك يعنى مش متبرجة فى لبسك خالص
وانتى ماشية فى الشارع كدة
راح واحد ابن ناس مش كويسين اتحرش بيكى ولو حتى بكلمة مش كويسة مش للازم يعنى يمد ايده
هل تربيتك والتزامك ومظهرك منع واحد حيوان انه يقولك كلمة مش كويسة
لأ طبعا
يبقى المشكلة يا جماعة مش انى اربى ابنى كويس وخلاص اكتفى عند هذا الحد
لان التربية الكويسة مش هتمنع الاذى من الغريب
الام اللى ابنها تم اغتصابه من مدرس قران
هى ربت ابنها كويس
ومع ذلك تربيتها ليه ممنعتش ان بنى ادم حقير يعرض ابنها لموقف صعب
يبقى محدش يجى يقولى اهم حاجة التربية
تربيتى لابنى جزء من حاجات كتير وليس كل
تربيتى لابنى تمنعه هو انه يعمل حاجة وحشة
لكن مش هتمنع واحد من برة يعمل حاجة وحشة
يارب اكون قدرت انى اوصل وجهة نظرى

وشكرا ليكم كلكم على تواصلكم معايا
اختكم خيخة

الطائر الحزين said...

اولا انا قصدت من تعليقى ان التربية الصحيحة لأبناءنا بتقوانا نحن لله

عارفة الأية الكريمة اللى بتقول وكان ابوهما صالحا

هذا كان من الجدود وليس الاب الفعلى ورغم ذلك نفع صلاحة احفادة


وعندما تتحدثى حضرتك عن تربية الابناء والمحافظة عليهم فهذا المفترض ان يطبقة كل الناس فى أبناءها

نحن نفعل ما علينا وليقض الله أمرا كان مفعولا

ومثال حضرتك ان الالتزام لم يمنع واحد ان يلقى بكلمة بذيئة نعم

ولو أن كل الناس مظهرها دل على الالتزام هذا لن يمنع وجود التجاوزات

لكن ممكن نقول المثل بالعكس

لو انها كانت مبتذله هل هذا يعطى الحق لمن يعاكسها؟؟؟؟


تحياتى

ام رقيه said...

السلام عليكم ورحمه الله
انا من المعجبيبن اوى بالمدونه بتاعتك يا ام شريف ومن الناس اللى بقراه لها دايما بس بصراحه مكنش عندى الجراه للتعليق ولان ماشاء الله كل اللى بيعلق عندك تعليقتهم احلى من بعض ثم انهم بيقولوا كل حاجه
بس الموضوع ده بصراحه زى ما هو قلقك قللقنى وشويتين كمان ولانى عندى رقيه 2 سنه و10 شهور وبخاف عليها من الهوا الطاير ولان البنت غير الولد برضه بتبقى مشكله كبيره اوى ومن دلوقتى بحزر فى الحضانه واقولها محدش يغير لروكو هدوها . روكو متقلعش قدام حد اينعم هى بتبقى مبرقه لى بس بحاول اوصل لها المعلومه باى طريقه
وربنا يحفظ اولادنا يا رب
ويحميهم ويخليهم

بت خيخة وأى كلام said...

الطائر الحزين
شكرا لتوضيحك يا طائرى الحزين
تحياتى ليك


ام رقية
هو انتى دعاء مرات على ابو طالب
لو انتى انا حصلى الشرف النهاردة
بصى يا ام رقية
انا معاكى طبعا انك تنبهى على روكو من دلوقتى
علشان تعرف ان مافيش حد ينفع يشوف جسمها ابدا غير مامتها بس لانك انتى اللى بتحميها وبتلبسيها وكدة
وعوديها من دلوقتى انها تدخل الحمام لوحدها وازاى لو راحت الحضانة وعملت بى بى فى الحضانة ازاى تقدر تلبس هدومها لوحدها من غير مساعدات خارجية
وربنا يارب يبعد عن ولادنا كل شر
وادعيلها كتير اوى يا ام رقية
دعائك ليها هيحفظها من كل حاجة وحشة
تحياتى ليكى ومنورانى
وياريت تقوليلى هو انتى
دعاء ولا لأ



شكرا ليكم كلكم على تواصلكم معايا

ام رقيه said...

السلام علبكم يا ام شريف
ايوه انا دعاء مرات على ابو طالب وانا يا ام شريف اللى اتشرفت بمعرفتك جدا جدا
على فكره يا نوران واسمحى لى انى اناديكى كده مش بلقب . احنا جيرانك فى اكتوبر العزيزه وانا بجد بجد مبسوطه اوى اوى انى عرفتك وزى ما انتى بتقولى يا نوران انا معوده روكو انها تروح الحمام لوحدها بس طبعا مش بتعرف تلبس هدومها لوحده والله انا على طول بدعلها وادعى لكل اللى زيها ان ربنا يحفظهم ويبعد عنهم ولاد الحرام اصلهم بقوا كتير قوى قوى
تحيانى للك ولشريف
دعاء

بت خيخة وأى كلام said...

ام رقية
بجد انا مبسوطة جدا
وبعدين يا دعاء انا دخلت على البلوج بتاعك بس انتى وعلى قافلين التعليقات وانا مش بعرف اسيب اى تعليق
لو تحبى يكون بينا تواصل اكتر من كدة باعتبار اننا من سكان اكتوبر وعندنا عيال عايزين نربيهم صح
ممكن تبعتيلى ايميلك
وهابعتلك عليه رقم تليفونى ووممكن نبقى نتقابل ونروح انا وانتى والعيال النادى
زى ما تحبى طبعا
وسلامى لعلى كتير وبوسيلى روكو كتير اوى وخدى بالك من البامبينو اللى لسة جوة
هاستنى ردك يا دعاء او ايميلك
تحياتى ليكى

users online