Monday, April 07, 2008

هى حتة قطنة مافيش غيرها


بابا العزيز
قررت انى اكتبلك الجواب ده

علشان انا عارفة انك علطول مشغول
وتقريبا انا مبعرفش اشوفك وجها لوجه واقعد اتكلم معاك
قررت انى اكتبلك بطريقة محترمة
على عكس بعض اخواتى
اللى من كتر ما انت مش عايز تسمعلهم

أو مش فاضى انك تسمعلهم
قرروا انهم يقلوا ادبهم عليك
ومانكرش يا بابا انى ساعات كنت بقل ادبى انا كمان معاهم
بس اكتشفت ان حضرتك
ماشى بسياسة ودن من طين و ودن من عجين
بابا العزيز
بصراحة ومن غير اى مقدمات
انا زعلانة من حضرتك
حاجات كتير اوى حضرتك بتعملها مزعلانى انا واخواتى
زى مثلا ان حضرتك بتاكل كويس وبتلبس كويس
وسايب أغلب اولادك جعانين ومعندهمش لبس كفاية
ومش بس كدة يا بابا
ده فيه كمان ولاد لحضرتك بيناموا فى الشارع على الرصيف
يرضيك كدة يا بابا
طب افرض حد جه من برة وشافنا كدة
ماهو كدة هيفتكرك انك اب ظالم
وانت طبعا مش كدة خالص
ده غير كمان بقى يا بابا ان حضرتك

عامل تفرقة عنصرية بين ولادك
يعنى ابيه جمال بياخد مصروف اكتر مننا كلنا
وحضرتك جوزته وجبتله شقة وفرشتهاله

وعملتله فرح وجبت فيه عمرو دياب
طيب يا بابا ما فيه ولاد كتير لحضرتك وعايزين يتجوزوا برضه
هما مش عايزينك تجبلهم شقة وتفرشهالهم
هما بس عايزين المصروف الشهرى يزيد شوية
وهما هيحوشوا منه ويجيبوا الشقة من مصروفهم
يابابا حضرتك بتصرف فلوسك

على اصحابك اللى معاهم فلوس فعلا
يعنى حضرتك بتعالج ناس من جيبك

و هما معاهم فلوس العلاج دى
لكن فيه اخوات ليا كتير معندهمش فلوس يتعالجوا بيها خالص
يا بابا حضرتك عمال تاكل وتشرب وتلبس
واخواتى جعانين والله
اخواتى عريانين يا بابا
اخواتى عايزين يتعالجوا
يا بابا حضرتك مطنشنا خالص
حضرتك خايف تبحبحها علينا شوية نقوم نتنمرد عليك
بس صدقنى يا بابا احنا مش وحشين اوى كدة
احنا بالعكس هنحبك اكتر ونحترمك اكتر
يا بابا ده انا سمعت من فترة صغيرة
ان واحد من اولادك قتل ولاده بالسم
علشان مش معاه فلوس يجبلهم اكل يكفيهم
يرضيك كدة يا بابا
الناس بقت تقتل بعضها علشان رغيف العيش
الناس بقت بتقتل عيالها علشان مش عارفين يصرفوا عليهم ازاى
معتقدش ابدا ان ده اللى حضرتك عايزه
حضرتك قلبك كبير
انا شوفتك فى التليفزيون من كام سنة
لما ملست على شعر ولد صغير
ووطيت علشان تسمع بيقولك كلمة فى ودنك
يعنى قلبك كبير اهه وماينفعش تقول لأ انا قلبى مش كبير
حاجة تانية بقى يا بابا مزعلانى منك جدا
واخواتى كلهم زعلانين منك اوى
اسرائيل يا بابا ؟؟؟؟؟؟؟؟؟؟؟؟
بقى بعد العمر ده كله والحروب الى بينا
تقوم تحط ايدك فى ايدها وتعمل اتفاقية الكويز
يا بابا مش اسرائيل دى اللى قتلت جنود مصريين
على حدود رفح من فترة
مش دى اللى بتقتل فى باقى اهلنا اللى فى فلسطين ولبنان
ده حتى المثل الشعبى بيقولك
انا واخويا على ابن عمى وانا وابن عمى على الغريب
ودول هيفضلوا طول عمرهم اغراب يا بابا
وعمرهم ماهيبقوا حبايب ولا قرايب
اسرائيل دى يا بابا اللى اغتصبت ارضنا زمان
اسرائيل دى اللى قتلت اطفال مدرسة بحر البقر
اسرائيل دى اللى يتمت اولاد كتير ورملت ستات كتير
يا بابا اسرائيل دى هتفضل طول عمرها تعلبة قذرة مالهاش امان
لازم تخاف على نفسك منها وتخاف علينا منها ومندهاش الامان
ماينفعش يكون فيه بينا علاقات من اى نوع
انكل السادات الله يرحمه لما عمل معاهدة سلام
متهيالى ان الغرض منها
زى المثل الشعبى اللى بيقول
صباح الخير يا جارى انت فى حالك وانا فى حالى
لكن ماينفعش جارى ده يجيلى البيت ولا انا اروحله
ولا عياله تلعب مع عيالى
تقوم انت يا بابا
تعمل معاهم علاقات اقتصادية
وسمعت كمان ان حضرتك بتديهم غاز طبيعى
معقول ده يا بابا؟
ازاى ده
مش حضرتك برضه حاربت ضدهم
ازاى دلوقتى تحط ايدك فى ايدهم
مهما كان التمن غالى يا بابا
اكيد مش اغلى من كرامتنا
وانت يا بابا لما تحط ايديك فى ايدهم
انت كدة بتحط كرامتنا كلنا فى الطين
انت يا بابا لما تقبل تعازيهم بصدر رحب فى قتل الجنود
ولما تقبل تعازى انكل بوش

فى قتل واحد من اخواتى فى قناة السويس
هما كدة كأنهم قدمولك كاس وقالولك اتفضل اشرب
ومخدتش بالك ان اللى بتشربه ده هو دم شهدائنا
يرضيك يا بابا انك تشرب من دم اولادك اللى ماتوا
طب ليه ؟
هو دمنا مش مكفيك
كمان عايز تشرب دم الشهدا
بابا حسنى
ارجوك

كفاية حرام
محدش واخد منها حاجة

غير هى حتة قطنة فى الأظؤظة
والكفن مالهوش جيوب يا بابا

انتهى

بنتك
بت خيخة وأى كلام

53 comments:

همس الاحباب said...

ممكن احجز اول تعليق عند خيخة

دكتور حر said...

ربنا يكرمك يا خيخة

بس هو بابا أساسا عايش؟

ولا يسمع عننا

بابا اتجوز واحدة تانية
ومش فاضيلنا خالص

ابداع جديد من الخيخه
طلع اللى في نفسنا من غير حقن ولا قطن خالص

تحياتي

همس الاحباب said...

برافو قوى قوى قوى قوى
يا خيخة بجد رائع جدا
اسلوبك وكلامك
ابداع من نوع فريد
بس يا ريت الرسالة فعلا توصل
ويحسوا باللى فيها وفى المعانى الجميلة اللى بتحويها
بس فعلا هى ودن من طين والتانية من عجين
تحياتى يا ام شيكو
خالد

fatima said...

نونو الغالية
يعنى انتى غيرتى اللهجة لعل و عسى مثلا؟
لا أظن
بس الكلام كله فى الصميم يا نونو
و خصوصا ىخر سطرين دول
فيهم كل الخلاصة
لو الواحد يفتكرهم طول الوقت مكنش دا الحال
بس هنقول إيه
قولليلى وصلتى الحضونة الكبيرة بتاعتى لشيكو و لا لأ؟؟

Omar... [ خروشات ] said...

اول مرة فى حياتى اشوف حوار بين بنت وبين والدها حوار مليان تحفزن و تحسس للاسلحة و سن السف من الغمد قبل مد اليد للسلام


حقيقى اول مرة

اول مرة اشوف ان الاب لازم يطلب السماح و الرأفة و الرحمة من بنته لو قابلها فعلا


ابقى تعالى فورا الان ااقرى اخر بوست ليا... كتبته لبابا ده بس بشكل اخر


اخوكى عمر

إبراهيم عبد الغني said...

علي صوتك يا بنتى مش سامعك

حزيــــــــــــــــــن said...

هى دى فكرة احمد البوهى اللى كان بيقول عليها فى اجتماع المدونين
نقله نوعية فى طبيعة المعارضه

inksarat said...

طيب هقول ايه
اولا ...انا اسف جدا لان متابعاتى القليلة فى الفترة الماضية افقدتى واجبا كان لابد وان اكون سباقا فيه ... رحم الله موتى المسلمين جميعا
ـــــــ
ثانيا كان نفسى فعلا اكون معاكو يوم السبت ولكن الظروف كانت اقوى منى لكن ان شاء الله تتعوض.. ملحوقه
ــــــــ
بما انى بتابع البوستات بالجملة كان نفسى يبقى لى تعليق بردو بالجملة كده على البوستات من قول الطاقية لحد دلوقت
ــــــــ
اما بقى البوست اللى بين ادينا ده
فاسلوبك متميز كالعادةبس المرة دى مختلف فى الرساله ومختلف فى الروح
المرة دى له بريق خاص وصدى يتردد فى ارجاء المدونة فاتمنى ان يزيد مساحة الصدى وان يقرأ كلماتك كل من استصعب عليه ان يسمع صداها
ــــ
سبقتينى على فكرة انا كنت هكتب رسالة لرئيس الوزراء
ــ
دمت بخير
تحياتى

m5m said...

بابا ؟؟؟

الطائر الحزين said...

ولا حياة لمن تنادى


فانك لا تسمع الموتى ولا تسمع الصم الدعاء اذا ولوا مدبرين


وما أنت بهادي العمى عن ضلالتهم إن تسمع إلا من يؤمن بآياتنا فهم مسلمون


ختم الله على قلوبهم وعلى سمعهم وعلى أبصارهم غشاوة


وجعلنا على قلوبهم اكنة أن يفقهوه وفى أذانهم وقرا


أولئك الذين طبع الله على قلوبهم



ياريت يقرأ هذا


لأنه بابا وعلشان خايفين عليه من رب البابا


تحياتى

خمسة فضفضة said...

السلام عليكم ورحمة الله وبركاته

تعتقدي يا خوخه الرساله دي ممكن توصل

ولا هايفضل الحاج بابانا ده مصدرلنا الطرشه ؟؟؟؟

امام الجيل said...

جميل

ربنا يكرمك
والله بابا لو سمعك بعد الكلام ده ومتاثرش يبقى مش بابا

سبحان الله
هو ممكن الجاه والسلطان والمال يغرى ويبعد الواحد
بس مش بيجيلوا ساعات قصدى الواحد يعنى ويفكر فى حاله كده

صحيح والله كلها حتة ارض متر فى متر مش اكتر محدش هياخد معاه حاجة
فمابالك ان بابا كبر كمان
يعنى مش هيعيش اكتر مما فاته
سبحان الله

اللؤلؤة المكنونة said...

هو لسه فاكر انه بابا

ما دام مش عارف يبقى بابا ..ايه اللى خلاه يبقى بابا ؟

هو مش عارف ان الأبوة ده مسئولية وواجبات لازم تتعمل وعيال لازم ياخد باله منهم

أكيد هو متعقد من البابا بتاعه وبيطلع عقده علينا ؟؟

بوست جميل يا أم شريف وكلام فى الصميم
طلع اللى جوانا ..بس وبعدين .؟؟؟
احنا هنقعد نطلع كده لغاية امتى وما حدش يسمعنا

ربنا يصلح حال بابا وياخد باله ويفوق ويعرف ان فيه رب للبابا ما يرضاش بكده خالص

تقبلى مرورى وبسيلى شريف بوسة كبيرة خالص قوليلو من خالتو مى
مش احنا أخوات برضه ولا ايه ..

؟؟؟؟؟

مهندس مصري said...

سبقني الطائر الحزين و قال اللي كنت نفسي فيه
بس قولي جدو مش بابا
ده حيكمل 80 سنة الشهر الجاي
و لو انه خسارة فيه القرابة

appy said...

يا ريت يا بابا تسمع صوت اختنا واحنا علشان كده حرررررام ربنا هيحاسبك

بس

simple girl.. ..simple dream said...

تحفة يا خيخة
بجد البوست دة يجنن
برافو عليكى بجد
انا فرحانة اوى من الكلمتين دوول

Z_Diva said...

walweny mab7bsh a3lk felsyasa, we krrart a3esh felinkar -we m7desh y7wel ys7ny a7snlo- bas elpost da 3amly 7ga serialya,m3rafsh leh eftkrt o3'nya bta3t wa7d tefl kda zmaaaaaaaaaaaaaaaaaaaaaaaan kn bygy e3lanha abl mosalsal elknah eltanya -wanes 3'aliban- we elo3'nya de knt bt2oul:
ygy el3eed ya baba... mlbstesh gdeede
we e5waty we mama... mesh 7asen
bas msh fakra b2tha, we b2tha mesh hyrkab 3la elmowkef asln, bas walahy tol mn b2ra elpost 3amla a3'nyha :D

Anonymous said...

نوران العزيزة
لن أقول له أكثر مما قال الشيخ الشعراوى إذا كان هو قدرنا ربنا يعنا عليه و إن كان أحنا قدره
ربنا يعينه علينا
أبو خالد

بطوط حبوب said...

this number is not available at this moment plz don't try again later
هذه الرقم غير متاح حاليا من فضلك حاول الاتصال فى وقت اخر هذه رساله مسجله

soska said...

انشاء الله يابابا حتى القطنة اللي فالأظؤظ ميلقوهالكش والكفن كمان يكون اتحرق والمحلات تكون قفلة فاضراب زي بتاع امبارح الله يحرقك بجاز وسخ يابابا

ابن حـجـر الـعـسـقـلانـى said...

بصراحة يا خيخة .. دى عبقرية فى زاوية التناول .. و بصى .. اسمحى لى أتخلى عن بعض من وقارى و ماقولش أكتر من رباعية قالها الفنان الأديب العبقرى نجيب سرور .. كان بيتخيل فيها نفسه بعد ما يموت و إزاى هو عاش طول عمره شريف و مخلص لمبادئه .. و بعد ما مات خلاص بقى لا حول له و لا قوة

أنا هاعدل بعض الكلمات من الرباعية عشان ما أخدش حياء الزملاء .. بيقول إيه ؟؟

ماشى ف جنازتى المعفن يروى أشعاري

وفى الصوان معفن تانى بيدَّعى الفِطنة

والقُطنه حاطينها لسَّـه فى أظئوظتى ويا نارى

لو كنت عايش ما كنت لبست دى القطنة

نوره الخشن said...

ياخرابي ياخيخة حتى لما نويتي تبئي مؤدبه معاه بهدلتيه برضو مفيش فايدة
بس هو يستاهل

شوفي ياختي الراجل عاملي ودن من عجين قال احنا مش لائيين العجين نعملو عيش نطفحه وهو عاملي ودن من عجين
ايه الفشخره دي
شااااااااااااااااافط هو العجين كلو لوحده وسايبلنا احنا الطين والوحل نغرق فيه
طب مايمشيها الاتنين من طين عشان احنا نلائي ناكل

يالهوووووووي الراجل ده بيصعب عليا والله
هيقف قصاد ربنا ازاي يتحاسب
ده كلكم راع
تخيلي هو عايش فالبزخ ده واحنا مش لائيين اللؤمه وفي ناس بتموت من الجوع
ربنا هيعمل ايه فيه

لا إله الا الله

بس يعني هتبئى دنيا واخره ماحدش بياخد كل حاجة
ربنا عادل برضو هو عايش في قصر فالدنيا مش معقول هيعيش في قصر فالاخره

طولت عليكي ورغيت انا ياخيخة بس كنت وحشاني

تحياتي ياعسل
وسلامي لبابا حسني واخونا جيمي

الساحرة said...

كلمات رائعه احيكي عليها
جايه في الصميم
بابا في وادي واحنا في وادي تاتي اتبري مننا خلاص
يا ترى هو

فاكرنا ولا احنا خلاص منسيين

بحبك يامصر said...

ايه الجمال ده؟
ايه الابداع ده؟
بجد تحفه
بص بقه يابابا دى اختنا واحاسه بينا كلنا اسمعلها وكفايه كده انت مش واخد بالك يابابا انك هتقف قدام ربنا وهيحاسبك .هتقوله ايه بجد فكرت هتقوله ايه؟
تسلم ايدك يا نوران

dr_modymodak said...

الاسلوب اكتر من روعه والله

ربنا يكون في عونك يا بابا ما هو بيني وبينك برده اللي مش قد الجواز والخلفه ميفكرش


هنقول ايه لنا الله يتولانا برحمته

بنوته مصرية said...

الله يكون في عونه يا بنتي ده اللي عنده اتنين بيتجنن
امال هو بقي عنده 70 مليون نسمه ههههههه

كويس انه فاكر اسمه (*_^)

حسبي الله ونعم الوكيل

بنوته مصرية said...

نسيت اقول اسلوبك تحفة

جديد وكلة سخرية جميلة

تحياتي يا استاذه

ربنا يستر علينا وميخدوناش معتقل

كيلو الحلاوه بي 18 جنية قولي لينا ياكلونا ايه بقي

A.SAMIR said...

غلطانة غلطانة غلطانة
علشان توصلي لقلب بابا....لازم تسلطي عليه ماما هي اللي تكلمه
هي ليها برضة دلال عليه
هستنى منك الجواب الجاي لماما
ربنا ما يحرمنا من ماما ومكتبات ماما ومستشفيات ماما وهلال احمر ماما
تحياتي

only spot said...

سلام عليكم
والله انتى بت جامده وجدعه
فعلا كفايانا تهور وعجرفه فارغه فى الكلام بس يا ترى هيسمعك ولا هو عشان السن السمع عنده تقل بس سيبك اهو برضه عشان يعرف اننا بجد ولا عايزين عنف ولا بنحبه احنا محتاجين بجد انه يرجع انسان مش عشانا علشان نفسه
وانا كمان يا بابا هفكرك بحديث الرسول صلى الله عليه وسلم
كلكم راع وكلكم مسئول عن رعيته واوصيك انك ترجع تانى تقرى قصه سيدنا عمر بن الخطاب
اعدل يا بابا وكفايه ظلم
ارحم من فى الارض حتى يرحمك من فى السماء
اللهم اهدنا واهدى ولينا فانت تولى علينا كما نكون فاهدنا واصلح لنا الحال
خالص تحياتى
ملحوظه على جنب
خيخه لو قدرتى تفكرنا فى فوكيره نساعد بيها اهل المحله يبقى يا ريت وانا معاكى وربنا يصلح ليكى الحال ويبارك ليكى فى شريف

مواطن مصرى نايم said...

الله الله الله الله
عليكى
اتمزكت و انا بقرأ
ايه الجمال ده
لا مش قصدى على ابيه جمال
لا بجد ابدعتى
بس انتى عارفة
الغاز اللى بيتصدر لإسرائيل
مش جايب همه
يعتبروا بيخدوه ببلاش
لاننا لو بعناه لدوله تانية حنيب اضعاف الاضعاف

بجد تحياتى ليكى
و مفيش مرة تغلطى وتزورينى فى مدونتى المتواضعة
على العموم مش مشكلة
المهم انى انا بزورك

صمت الجروح said...

بسم الله ما شاء الله عليكي ياخيخة إتكلمتي من جانب حساس يثير العطف والحنان عند أي بني آدم يقرأ كلامك بقلبه وعقله
انا كنت عاوز اعرف فين العدل هو مينفعش يكون زي سيدنا عمر بن الخطاب جمع بين القوة والحق والعدل كان بيأكل رعيته أفضل أكل وهو يأكل خبز وزيت

ليه مش بيحسوا بينا ؟ وليه بيبهدلونا ؟
هما نسوا يوم الحساب ؟ حيقولوا أيه لربنا لما يسألهم عن اللي عملوا ؟

والله اللي يفكر في اليوم ده تهون عليه الدنيا بمافيها من عز وفلوس وقصور وعربيات لان الحاجات دي مش حتنفعه ساعتها

إتقي الله فينا واحكم بالعدل واحنا وقتها حنفرح إنك رئيسنا ومش حنفرط فيك

جزاك الله خيراً يا نوران وربنا يوفقك للخير

خايف من الحقيقة said...

خيخه رغم السخريه
بس الهدف من البوست واضح وضوح الشمس

لكن
هل سيسمع هل سيرى
هل يتحرك

الف هل وهل

واخرها هل يستحق اللقب الكريم... بابا؟؟؟؟؟
دي انا شايف انه ميستحقهاش

pusssssy said...

على فكرة انا مش بحط تعليقى غير عند الناس اللى تستاهل.

وبصراحه انتى نولتى الشرف ده عن جدارة واستحقاق.

بس فى حاجه احب الفت انتباهك ليها

لاحياة لمن تنادى.

فراشة said...

انا عاوزة اقلك احنا ايتاااااااااااااااااااااام
خلاص اقولك انتى بابا وانتى ماما وانتى انور وجدى كمان
فتحت عنيه على الدنيا ملقتش غير بابا ده اي اي سيبوا شعري شعري

ههههههههههههه

Doba said...

حوارك جميل قوى يا نورا
عجبنى جدا

وبيعجبنى قوى حواره مع الشيخ الشعراوى بصراحه جابله المفيد

وزى مقلتى فى النهاية
بمجرد وفاته الكل هياكل فى سيرته
ومفيش جيوب للكفن بس الشيطان مخليه لا يرى ولا يسمع وان تكلم فحدث ولا حرج

Rainbow said...

واووو
انتى جبارة
اسلوبك و صراحتك فى المدونة كلها عجبنى جدا

تحياتى و مودتى


اه كمان احب اعزيكى فى عمو محمد
البقاء لله

أبو مروان said...

باب هنا هنا اهوة اقولة مين بيكلمة
واللهى انا شايف ان فى ناس متستحقش الابوة لان معناها كبير جدا

MKSARAT SAYED SAAD said...

خير الكلام
حتة قطنة فى الأظؤظة
هجزلك العيش والحلاوه
ربنا معاكي
سيد سعد

آخر العنقود said...

الله ينور عليكى ياخوخة

اسلوب جديد ورائع بجد

بابا واصحاب بابا ولا هما هنا ياخوخة
بابا تعب مننا ومن كتر كلامنا عشان كده راح يتبنى اولاد غيرنا
ماهوه بردو ياخوخة احنا تعبناه اوووووووى
بنتكلم كتير وخلاص

عايزين نعمل حاجة بقى نثبتله اننا موجودين عشان ياخد باله

عشان اولاده التانين اللى عاوز يجيبهم اكيد مش هيفرقوا كتير عن نفس العينة ده ن ماكانتش انيل

حاجةصغنونة بس
ربنا يخليكى ليا ياااارب على سؤالك
وانا اتاخرت فى الرد غصب عنى ياخوخة معلش

بس بجد بجد انا سعيدة جدااااااااا انىشوفتكوا واتعرفت عليكوا ووالله حاسة انى اعرفكوا من زمان اوى
وماتقلقيش ياقمر الحمد لله انا كويسة
سلامى لشريف
ويااااااااارب دايما متجمعين فى الخير والطاعة

الشنكوتي الكبير said...

يعني اعمل فيكي ايه بس

انتي هتفطسيني

ربنا يحفظك يا بنتي ويعفو عنا جميعا من الذل اللي احنا بقينا فيه ده

وبعدين تفتكري بابا حس حس
ولا ماما جيجي
هيهمهم اللي بتقوليه ده
عادي كل ده هم عارفينه وشايفينه ومبسوطين بيه
جايز مش هم الوحوش الوحيده والعمليه مش امبراطور طاغيه ولا حاجه لكن هم بس قمة جبل الفساد
الطرطور المحطوط على قمة كوم الوساخه
انا مبقتش عارف اقولك ايه
اللي حصل في الأعتصام هيخلينا محتارين نكمل ولا نحط راسنا في الرمل ونخرس بقى
ياترى فيه فايده ولا نتلم احسن ونخلي بالنا من لقمة العيش بتاعتنا
اقول ايه بس
مبقتش عارف حاجه خالص

ربنا يسترها علينا جميعا
الا قوليلي هو انتي بتشتغلي حانوتي
قطنه وأظؤظه

روحي الله يسعدك
سلااااااااااااااااااااااام

اهو ده عيبه said...

يا حبيبتى هى الناس دى برضه بتستعمل القطن زى حالاتنا
او عاملة حسابها ان فى موت من اصله
استغفر الله العظيم

وبعدين ده ميتقالش عليه بابا
ده جوز ماما اللى بيذلنا علشان اللقمة والهدمة

حل وسط said...

فيه حاجات كده
مبعرفش اتكلم فيها
وعلى راي اللي قال
خلص مني الكلام
مع اني اساسا ماتكلمتش
عموما انت قلت كل حاجة
بس عايزة اقوللك
هو قلة الادب كانت نفعت لما الادب هينفع
لينا رب اسمه الكريم

==========
انا كنت عزيتك في وفاة خالك
الله يرحمه
وكنت اتمنى اجي يوم التبرع واشوفك
لكن بابايا تعبان وماكنتش اقدر اسيبه
ياللا ملحوقة المرات الجاية
وربنا يجعله في ميزان حسناتك

===========

متشكرة قوي على تعليقك عند عمر خروشات وعلى فشخرتك اني صاحبتك الغالية وانك سمعتي صوتي المسرسع في التليفون
الفشخرة ليا يا فندم
ربنا يخليكي ليا

Desert cat said...

هو ياريته هيبيع لهم الغاز بتمن غالى الا بيبعه ليهم بتراب الفلوس ويغليه علينا احنا هنا
ياريته يسمع الجواب او حتى يشوف او حد يقرا له .. بس يقرا له بامانة واخلاص
تحياتى

Desert cat said...
This comment has been removed by the author.
nonoymm said...

قوليله كمان يا بابا ان موضوع المشروع اللي في السودان دة اريت يتم وبسرعة لانه دة خطوة في منتهى الصحة والاولى اللي هتخلينا نتحرر لما يبقى اكلنا بيدينا وما حدش يتحكم في قمحنا واكلنا
المشروع هو مشروع لزراعةمحاصيل وعلى راسها القمح في اراضي السودان باستثمارات مصرية وسعودية على مساحة تكفي لاطعام الوطن العربي كله لان الارض هناك تساوي الارض المزروعة فيه
تحاتي لفضفضة كنت عاوزة افضفضها مع بابا العزيز

محمود المصرى said...

بسم الله الرحمن الرحيم

بصراحة رسالة فى منتهى الروعة , واشتملت على امور كتير جدا الشعب بيعانى منها , لكن لو عاوزة تقولى لبابا اننا عاوزين ننتخب بابا غيره هاتقوليله ايه حضرتك؟

عموما تحياتى لأسلوبك الرائع

nigro said...

أيوه ايوه
الطيابة و السهننة هنا .. و بابا و بتاع
و عندي نشتم و حركات
ماااااشي
بس على فكرة يا نونا
اللي متأكد منه و عايش على أساسه
إن بابا مات

بت خيخة وأى كلام said...

معلش اعذرونى هابقى ارد عليكم بعدين

شكرا ليكم كلكم
اختكم خيخة

somaa mahaba said...

دلوقتى بس اكتشفت انتى حتغيبى ليه فعلا اتقفشتى
خيخااااااااااااااااااااااااااااااااا
اهىء اهىء اهىء
سومه_87

واحدة مفروسة said...

خيخه و الله كنت خا يفه عليكى لتروحى ورا الشمس
و اديكى اهه اعتزرتى عن الرد يبقى يا حبة عينى بيحققوا معاكى....بصى معلش (الجبن يصنع من اللبن) انا حعلق لما ترجعى ياختى
ربنا يرجعك بالسلامه و مايكونش بابا ... ملصلك ودانك..

أحمد سعيد said...

أسلوبك جميل فعلا

ومش عارف مبارك لو قرا الكلااام ده

هل هيبكى

ولا عادى


أتمنالك دوام التوفيق


أخوكِ نيجــر

ojg said...

هو ليه كل اليوستات اللي بعلق عليها انهارده عند معظم الناس بتفكرني بحاجات شخصية ؟؟
اولا البوست متميز وياريت فعلا زي ما همس الاحباب بتقول الكلام ده يوصل بس هيهات هيهات
كان زمانه سمع من بدري داحنا صوتنا اتنبح

الذكرى الشخصية بقي
هي اني وانا صغيرة كنت بجد فاهماه بابا حسني وكتير حلمت بيه هو وماما سوزان (اللي اصلا اسمي علي اسمها)وكمان ايه بقى شوفوا تخريفي
كنت عارفه اني هشوفه هو وجمال وعلاء اخواتي
اه والله
وكذا مرة بابا حسني يطبطب عليا في الحلم عشان علاء او جمال مزعليني
بس يا خسااااااااااااارة يقولك الأحلام بتتفسر بعكسها
ههههههههههههههههههههه
وانا احلامي ما بتقعش الارض ابداااا
واللي حلمته وانا صغيره بيتحقق علي دمااااغي وانا كبيرة

وهشان مش نتاخد كلنا امن دولة
سلام مربع للعيله المالكة ;)
وفوترني يا جدع

مـحـمـود فـرج أحمد said...

أبدعتي يا خيخه في إدارة الموضوع ده بشكل جديد

تحياتي ليكي

users online