Thursday, May 29, 2008

رب صدفة خير من الف جوافة


فى موسم الجوافة اللى فات

كان يوم سبت

وماما كان عندها جوافة

كلتلى انا كام جوافياية

ونزلت اشترى شوية حاجات

من سيتى مول اللى فى اخر الهرم

وانا عمالة ابص على الفترينات

اكتشفت ان فيه بذرة جوافياية

اتحشرت بين اسنانى حاولت اطلعها بلسانى

ونتج عن محاولاتى ان بؤي اتفتح على مصراعيه

ولما بؤى اتفتح على البحرى

خدودى طلعت لفوق شوية فضغطت على عنيا

النتيجة ان اللى يشوفنى يفتكرنى بضحكله

وانا مبضحكش لحد

انا كل الحكاية انى بحاول

اسلك البذرة اللى اتحشرت بين اسنانى


المهم فى محاولاتى البائسة

لقيت واحدة بتجرى من بعييييييد وجاية ناحيتى وبتقول

مش معقووووووووووووووووول

ريتشااااااااااااااااااااااارد

وبتبص ناحيتى

انا افتكرت ان فيه حد ورايا والبت دى بتندهله

لفيت راسى نوع من انواع حب الفضول

علشان اعرف مين ريتشارد ده

لما بصيت ورايا مالقيتش حد

رجعت راسى تانى

كانت البت دى واقفة قدامى

لدرجة ان راسى كانت هتخبط فى راسها

واذ فجأتن

الاقيها واخدانى بالحضن اوى

وهاريانى بوس

وانا فى عقل بالى بقول

مين دى؟


البت: وحشانى يا ريتشارد

انا مذبهلة وصامتة صمت ابو الهول

ولسانى عمال يلعب فى البذرة اللى مش عايزة تطلع

البت: اخبارك ايه يا نورا

انا فى عقل بالى: مين دى؟

انا بصوت مسموع : الحمد الله

انا فى عقل بالى تانى: ريتشارد مين؟

البت: ها اتجوزتى ولا لسه؟

انا فى عقل بالى: مين دى؟

انا بصوت مسموع: اه اتجوزت

البت : اتجوزتى خالد؟

انا فى عقل بالى: هى البت دى تعرف خالد منين؟

انا بصوت مسموع: لا اتجوزت هانى

البت: هانى مين؟

انا فى عقل بالى: مين دى؟

انا بصوت مسموع: كان معايا فى الجامعة

البت: معقول متجوزتيش خالد

ده انتى يا بنتى كنتى بتخافى تقلعى الدبلة تفرجيهالنا

كنت بتقولى ده فال وحش

انا فى عقل بالى: مين البت دى؟

انا بصوت مسموع:كل شئ قسمة ونصيب

البت : ومين اللى فسخ الخطوبة؟

انا: خطوبة ايه؟

البت:خطوبتك انتى وخالد

انا: دى حاجة عدى عليها زمن

وزى ماقلتلك كل شئ قسمة ونصيب

انا فى عقل بالى: مين البت دى؟

البت: بس ياااااه يا ريتشارد ده انتى ليكى وحشة جامدة اوى

انا فى عقل بالى: ريتشارد مين

هى البت دى هبلة ولا ايه؟

انا بصوت مسموع: ريتشارد مين؟

البت: انتى نسيتى ولا ايه؟

انا:نسيت ايه؟

البت: انت ناسية ان احنا كنا ملقبينك فى المدرسة بــــإسم

ريتشارد قلب الاسد

انا بحاول افتكر: ياااااااااااااااااه ايوة صح

انا نسيت خالص الموضوع ده

انا فى عقل بالى: مين البت دى اللى تعرفنى وانا معرفهاش

البت: بتشوفى حد من الشلة؟

انا: شلة مين؟

البت: مروة وامانى والناس دى

انا: اه بشوفهم كل فين وفين

انا فى عقل بالى: يارب البت دى

تقولى ابقى قوليلهم فلانة بتسلم عليكم

علشان اعرف اسمها

البت: ابقى سلميلى عليهم كتيير

انا هتشل لوحدى

انا: ان شاء الله

البت: بقالك اد ايه متجوزة يا نورا؟

انا: حوالى خمس سنين

البت: معلش

انا مستغربة: معلش ايه؟

البت: يعنى متزعليش نفسك

انا مستغربة وبدأت ادى وش اباحة: مزعلش نفسى على ايه؟

البت: انا كان ليا واحدة صاحبتى

قعدت سبع سنين وبعد كدة ربنا كرمها

انا خلاص اديت وش الاباحة: نعمممممممممممممممم؟

البت: قصدى يعنى ان ربنا رزقها بالعيال

انا مبرقة عنيا

و وش الاباحة بقى على اخره: طب وده ايه علاقته بيا؟

البت: انا قصدى اقول يعنى ان ربنا ان شاء الله

هيرزقك بالعيال برضه

واوعى تفتكرى ان خمس سنين دول حاجة كتير

ربنا كرمه واسع

انا تقريبا اتشليت خلاص: وهو حد قالك ان ربنا مرزقنيش بالعيال

انا الحمد الله معايا شريف داخل على اربع سنين دلوقتى

البت مفزوعة: ايه؟ انتى مخلفة؟

انتى مخلفة؟

انتى عندك عيال؟

بجد انتى عندك عيال؟

لا لا لا لا

انتى اكيد بتهرجى

انتى عندك عيال

بقى انتى عندك عيال

انا: ايه فيه ايه يا بنتى ايوة الحمد الله عندى ابنى

فيه ايه

ايه الغاغة اللى انتى عملاها دى؟

البت: لا مش معقول

اصل مش باين عليكى خالص انك حملتى وخلفتى

ده انا اول ما شوفتك افتكرتك لسة متجوزتيش

انا فى عقل بالى: الله اكبر خمسة وخميسة

انا بصوت مسموع : لا بس انا تخنت برضه

البت: تخنتى ايه بس يا نورا

انا اللى ضربت خالص بعد الجواز والخلفة مش كدة؟

انا فى عقل بالى: ما هو انا لو اعرف انتى مين اساسا

كنت يمكن عرفت اذا كنتى ضربتى فعلا ولا لأ

انا بصوت مسموع: مش اوى

البت: اصل انا كمان اتجوزت وعندى عمر وحبيبة

انا: ربنا يخليهوملك

البت: بس انا ماكنتش متخيلة انك هتعرفينى؟

انا فى عقل بالى: احييييييييييييييييييه

ومين قالك انى عارفاكى؟

انا بصوت مسموع: لأ ازاى هو انا معقول معرفكيش

البت: انا اصلى شايفاكى من فترة هنا فى المول

وكنت عايزة اجى اسلم عليكى وخفت تكونى نسيانى

بس لما لاقيتك بتبصيلى وبتبتسمى اوى عرفت انك فكرانى

انا فى عقل بالى: مين دى؟

البت: المهم يا ريتشارد معاكى موبايل ؟

انا: اه

البت: طب خدى سجلى نمرتى عندك

وملتنى رقمها

انا بتخابث عليها: تحبى اسجله باسمك ولا باسم ام عمر

البت: خليها ام عمر

انا فى عقل بالى: احيييييييييييييييييييييييه

يا بتى انطقى قولى اسمك

خلينى اتنيل افتكرك فى اليوم اللى مش فايت ده

البت: انا مبسوطة اوى انى شفتك النهاردة يا نورا

ومتتصوريش انا فرحانة اد ايه انك فاكرانى

انا فى عقل بالى: مين دى ؟

البت: بوسيلى ابنك كتير وخلينا نشوفك

معاكى تليفونى اهه يعنى مالكيش حجة

انا:اكيد طبعا

البت مشيت

انا فى عقل بالى: ميييييييييييييييييين دىىىىىىىى؟


وكل الكلام اللى فوق ده

نطلع منه بحاجة واحدة بس

اللى ياكل جوافة بعد كدة

يبقى يغسل سنانه قبل ما يخرج


انتهى

بت خيخة وأى كلام

74 comments:

Anonymous said...

موش يغسل اسنانه وبس
كمان يغسل الكوباية لو كان عمله عصير
علشان العصير ما يلزقش فى الكوباية
ويجيب العصبى
منذر

ابن حـجـر الـعـسـقـلانـى said...

مش معقول يا خيخة ... أنا مت من الضحك

بجد مش معقول

ضحكتينى و انا ورايا ميت حاجة مكهربانى

shahy said...

ههههههههههه
هههههههههههه
هههههههههههه
تصدقي ان انا اللي بؤي وجعني من كتر الضحك

والله يانوران يابختك انا كتير اوي ببقى نفسي اقابل حد اعرفة والا يعرفني ومابقابلش
بس موقف تحفة وانتي ياعيني اتذليتي ذل هههههههههه

..................
خيخية ياخيخة
ظبطي موضوع يوم الجمعة واوعي تطلعي خيخة فية
اوك

سلام وابقي اشربي الجوافة عصير

الطائر الحزين said...

حتة بذرة سبحان الله؟
اد كدة تى جسم غريب يدخل على الجسم يسبب له كل هذا الضيق

ما اعظم قدرة الله

(كلميها من اى تليفون تانى واستعبطى عليها وقولى لها انا نورا انتى مين؟؟)

يمكن بذرة الجوافة تطلع من سنانك
الا هى طلعت ولا لسه؟

واحدة مفروسة said...

هههههههههههههههههه
ههههههههههههههههههههههه

بصى بقى انا كان مودى زى الزفت من
الصبح
حبه اعيط وحبه ادور على بوست يضحكنى
تقومى انتى تسيبينى اليوم كله حالتى هباب و تيجي على آخر الليل توجعيلى بطنى من كتر الضحك
حموت يا خيخه انتى فظيعه
...
انا بقى بتحصل معايا الموضوع ده و برضه بيمشوا من قدامى مش فاكره اسمهم
بس انتى بصراحه ........لا تعليق بطنى وجعتنى و عنيا وجعتنى
الصبح عياط و بليل ضحك

Sola said...

walahy danty 3asal
ana fe 3a2l baly ba2olek yady el nelah 3aleky
ana:bgad maweteny mn ede7k ya 7'e7'ah
yalla shoufek ba2a inshaa allah lama anzel masr ya om sherief
salamoz

appy said...

هموووووووووت من الضحك يا ريتشارد ههههههههههههههه
بجد طيب انا متغاظه انك مش عرفتى دي مين طيب اعمل ايه انام ازاي دلوقتي
طيب افتكرى مين كان معاكي تاني وقولى ومحدش يمشي فاتح بوقه يا خوخه هههههههههههه

رئـــــيسـة حزب الأحلام said...

هههههههههههههه
ريتشارد مرة واحدة
انا بعد كدة اغسل سنانى قبل ماخرج
تحياتى

فاتيما said...

لااااا
بتهرجى ؟؟
و سيبتيها تمشى كدا من غير ماتعرفى إسمها أنا لو مكانك كنت بقى مستحملش نص دقيقة
كنت هقولها سامحينى على قلة ذوقى بس يا ريت تفكرينى بإسمك عشان أنا ناسية أسمى أصلاً ....
بس واضح إنها موش مهمة قوى فى ماضيكى عشان كدا مفتكرتيهاش ...
و بعدين هيا الجوافة أصلا السبب
و المفروض لا تاكليها و لا تشتريها و لا عصريها
عشان فيه ناس بعد ما بتخلص كوبايتها مبتحطش فيها شوية ميه

رئيس جمهوريه نفسى said...

ايه التصور الفظيع ده من ريتشارد قلب الاسد الى بنت خيخه واى كلام مفيش اى صله اصلا بين الاسمين
المهم انا الحمد لله مش ممكن يحصل معاية الموقف ده لانى ببساطه مش باكل جوافة ليه حوالى 14 سنه ما اكلتش جوافة لانى البذره موقفتش بين سنانى لا وقفت فى المصران الاعور وقعدت يومين من غير اكل علشان اختبار العملية

شهاب الأزهر said...

أضحك الله سنكم..كثيرة هي المواقفالتي يندى فيها جبين الرجل ولا يرضى أن يحرج من أمامه

بنوته مصرية said...

هههههههههههههههههههههههههه

الموقف ده حصل معايا من كم يوم لما كنت في مصر كنت في الكوافير

ووحده خلصت وماشية لقيتها بتسلم عليا ولبسة اسود انا مش فاكراها بس ملامحا مش غريبة
بس انا كنت اشجع منك وسالتها انا مش فكراكي وقالت اسمها واتعرفنا وافتكرتها

يعني خليكي شجاعه كدا واساليها

بس موقفك تحفة

وبعدين ضحكت اكتر كل موضوع تكتبيه بتكتبي تحته الدروس المستفاده ههههههههههههههههه

لست أدرى said...

انا كنت بذاكر ومتنحه للكتاب وبعدين دخلت على مدونتك

فضلت اضحك لغايه بجد ما بقى وجعنى

بس امانه عليكى ياشيخه لما تعرفى ميييييييييييييين دىىىىىىىىىىىىى؟؟؟؟؟

ابقى قوليلنا
عشان انا هموت واعرف بجد

وعلى فكره انا كنت بكون فى الجوافه بس خلاص هسمع نصيحتك
مش ناقصه ام عمر تقابلنى وتقولى ازيك يا هتلر
ولا يا قطز ولا بيبرس

ايه البت دى
هى مين دى اصلا؟؟؟؟؟؟؟

اهو ده عيبه said...

ههههههه والله انتى زى العسل
يعنى كل اللى نطلع بيه غسيل اسنانا بعد الجوافه

الموضوع ده بيتكرر ساعات مع الواحد لكن ساعات بتنح واسال عن الاسم عادى يعنى ولا يهمنى
هو انا عقلى دفتر

بس بجد موت على نفسى من الضحك

nonoymm said...

مين البت دي
عسلللللللللللللللللللل
موتيني من الضحك
اضحك الله سنك يا حبيبتي
اتشجعي وقولي انا مش فاكرة كويس
بس حتما لازما ولا بد انك ما تاكليش جوافة تاني
جوافة ايه دي اللي تخليكي تمشي فاتحة بقك على مصراعيه وتزعلك من ابو شريف بلاها يا اختشي
عسل بجد
بصي موضوع سورة الواقعة اقريه يومي زي الورد كدة ومعاه الاستغفار وصلة الرحم اللي نقطوعة
الحاجات دي اد ايه انا مجرباها وربنا بيكرم وبتدر الرززق وبيتبارك كمان ربنا يفكها علينا كلنا يارب
تحياتي وتقديري وودي

منوفيـــايــة said...

كل ده من حتة بذرايه يا خيخة
ههههههه
لاء فعلا" ازمة
على فكرة ساعات بتحصلى بس انا بتنننننح اوووى وبيبان عليا عته فظيع لدرجه ان اللى قدامى هوا اللى يحس ان هوا اللى غلطان وناسى
بس انا عندى فكرة برضو بطبقا ف موضوع الجوافه دى
انا باكل الجزء اللى حوالين حبة البذور اللى بيبقوا مع بعض دول بس لسبب تانى خااالص
اقولهولك
" اصل البذر ده بعيد عنك بيجيب امساك وما ادراكى "...متقوليش لحد بقى
سلاااااااامى يا جميلة
وسلمى على شيكوووو

دكتور حر said...

أشوف فيكي يوم

فطستينا من الضحك

ربنا كرمك بس كان ممكن تركزي معاها وتشوفي هيا مين

او تتصلي باللي قالت عليهم اصحابك وتسأليهم هي مين بأوصافها واولادها وتليفونها

:))))

اي خدمه

مش دكتور بقى

A.SAMIR said...

بصي يا فندم
انتي تتصلي بيها من رقم غريب على انك شركة المحمول بتاعت تليفونها وتقوليلها انك عايزة تتأكدي من البيانات وتخليها تمليكي اسمها
محلولة
اي خدعة
مع تحيات احمد سمير
مجرم قديم

الجواز و سنينه said...

تخيلى انى مستنه الجوافه تطلع بفارغ الصبر لانى نفسى فيها دلوقت
بس اقولك على فكره حلوه
ابقى حوشى البذر بالمعلقه قبل ما تاكلى
انا بعمل كده ده حتى مالهوش لزمه و كمان مشاكله بانت اهه
تسلم اديكى بجد

BoBo said...

هاهاهاهاهاهاه
ضحكتيني.. لا فطستيني من الضحك.. عمر بيقول عليا ف عقله : امي اتجننت..يخرب عقلك

ِِAdem El-Mahdy said...

بجد قوية جداا

اقولك حاجة علشان تعرفى اسمها

تتصلى بيها و تقوليلها

ايوه مين معايا الرقم ده اتصل بيا قتقولك ايوه يا انورا انا فلانه
و تقول ام عمرو هتقومى عاملة فيها مش واخدة بالك و تقوليلها او عمرو مين هتقولك انا فىنة

و بالطريقة دى اديكى عرفتى هى مين

او حل لذيذ اخر

انك تتصلى بالشلة القديمة و تعرفى منهم مين ام عمرو و حبيبة دول

و كلى جوافة براحتك

و بس
و سلام عليكم

aya said...

انتى بتكلمى جد؟
انتى فعلا معرفتيهاش فى الاخر؟

والله انتى مالكيش حل يا نورا

سكر والله العظيم

وبلاها الجوافة يا ابنتى اللى مخلياكى تنسى صحابك كده

رندا said...

ههههههههههههه

اول زيارة لمدونتك وضحك من قلبى
اسلوبك جميل

كل واحد بقى وشة باين علية الحزن ياكل جوافة هههههههه

وبالذات لو بيشتغل ورايح يقابل مديرة
:)

ماله عصير القصب طيب

دمتى جميلة

رندا

ٍSOU said...

انتى مشكلـــــــــــة
هههههههههههههههههه

زمرده said...

هههههههههههههههه
هههههههههههه
هههههههههههههه

انا الى اتشليت ضحك
ربي يسعدك .. موتيني ضحك
بس جد كان لازم تعرفي هي مين؟؟؟ الفضول قتلني وتمنيت تغلط في الاخر وتقولك حتى متنسيش .... حتى لو كان اسم دلعها او اي شى

بجد تصوير رائع , ربي يسعدك

77math said...

عشان هي تخنت أكيد ما عرفتيها وانت عشان ما اتغيرت كثير اتعرفتِ .. معلش بقى روحي اتخني !

شوفي في معادلة بسيطة تقول لك هي مين

صاحبتك = الشلة - (مروة +أماني) والناس دي !

HERO said...

هههههههه
مين دي صحيح ؟
انا مش قادر ابطل ضحك
وكويس انها مشت وهي فاكرة انك فاكراها والا كان ممكن تصاب باحباط ويجلها انهيار عصبي
وخاصة انك ريتشارد قلب الاسد انتي كنتي بتعملي فيهم ايه صحيح وانتي في المدرسة شكلك كنتي زعيمة ائتلاف

تحياتي

خمسة فضفضة said...

السلام عليكم ورحمة الله وبركاته


ياصبرررررررررك
لو مكانك ماكنتش سكت علي طول كنت هاسالها عن اسمها يمكن افتكراي حاجه

وكمان تسيبيها تمشي من غير ما تعرفي اسمها

ماشاء الله ماشاء الله

:)
طيب وكلمتها ولا مسحتي النمره

د/أبويحيى وادم said...

السلام عليكم
ههههههههههههههههههه
موقف بصراحه مش عارف اقول عنه ايه
بصى
هو انا لدى تفسير علمى
بذرة الجوافه دخلت بين اسنانك
بدات الالم ذاد الالم جدا ضغط على المخ بدات الهلاوس دخلتى فى غيبوبه
ثم
جائك هذا الكبوس
كبووووووووووووووووووس
عاوزه تعرفى مين دى بجد ؟؟
اقولك ؟؟

















هقول ايه زى ماهى قالت لك التلفون معك وملكيش حجه
ههههههههههههههههههه
ربنا يوفقك يارب ويبارك لك فى ابنك

آخر العنقود said...

ههههههههههههه
طبعا هقول زى كل اللى قبلى
على الضحك اللى ضحكته
بس بجد متخيلاك وانتى متنحة ومش عارفاها
ههههههههههههه

تحفة ياخوخة والله
قصدى ياريتشارد
:)

سلامات ياقمر
وسلامى لشيكو

قلوب حائرة said...

بصي انا سمعت عنك كتيرمن امي شاهي ومن البت اختي دوبا وكنت ناوية اروح حفلة توقيع المدونات علشان اشوفك بس مافيش نصيب بقى على العموم الواد رئيس جمهورية نفسه برضه كلمني عنك وخلاني اموت واشوفك ياريت اشوفك قريب مع مامتي شاهي واختي دوبا سلامي لشريف على فكرة انا بجي كتير هنا ومش بعلق بس المرة دي استفزني للتعليق سلامي لخفة دمك

gannah said...

متاكليش جوافة تانى .....دمك عسل يا خيخة

عمرو سلامة said...

هههههههههههههههههههههههههههههههههههههههههههههههههههههههههههههههه
بذرة الجوافيا تخليكى ريتشارد قلب الاسد .. ههههههههههههههههه
موتينى من الضحك ... ههههههههههههههههههههههه
ربنا يخليلك شريف

مـحـمـود فـرج أحمد said...

ريتشارد

ألا انتى عامله ايه دلوقتي

والله فرحت فيكي جدا.. موقف لا تحسدي عليه .. بس طبعا نتج عنه اننا هنموت من الضحك وكل ده بسبب بذرة جوافيايه

تحياتي وبلاش تاكلى جوافه تاني .. ماله المشمش

عبدالله said...

ههههههههههههههههه
دمك زي العسل في البوست ده يا نورا
طبعا مش البوست ده بس يعني من قبل كده بس ده حلو شويتين
:)
المهم نبطل جوافه وخلاص ده اهم ما فالموضوع و مش تنسي تقولي مين دي في الاخر

تحياتي

Anonymous said...

وحشتينى يا نورا

عزيز عيني said...

اوعي تقولي بعد كل ده ولسه ما عرفتيهاش ده انا يااللي م اعرفهاش هاموت عشان اعرف هيه مين
طلعت مين بقي
سلااااااام

همس الاحباب said...

هههههههههههه
ريتشارد مرة واحدة
ومال خيخة ده ايه بعد الجواز ولا ايه
بس بجد اسلوبك رائع وتفطسى من الضحك
واول مرة اعرف انك بتنكسفى
طب اساليها اسمها ايه
حكم الزهايمر منتشر اليومين دول
وخالد خالد مالكم ومال اسم خالد
ينفع كده
تحياتى
خالد

أنونيمس said...

ألا أيه حكاية ريتشارد دي؟؟

أنتي كنتي عامله دور ريتشارد قلب الأسد ف مسرحية ف الجامعه ولا حاجه؟؟

على فكره انا نازل أجيب الجوافة مادام طلعت بقى أصلي بحبها موت

:)

Coca said...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
مين دي
جامده جداا التدوينه دي
بتحصل في احسن العائلات
مين دي

صاحب المضيفة said...

على الرغم من قوة الكلمات اللي قلتيها في سرك



الا انه موقف بايخ بجد والواحد كتير بيتعرض له


لكن انا بقى أصحابي بياخدوا بالهم ويفكروني بالاسم على طول


هو صحيح بيكون احراج لكن يالا مش مهم


سلامي لشيكو بيه

فاتيما said...

بت يا خيخة
أوعى يكون إسم ريتشارد دا له علاقة بمسلسل نوتس لاندنج اللى كان بيتعرض فى الفترة دى فى التليفزيون ؟؟
أصلى كنت بحب الشخصية دى قوى
مجرم خطير بس كله رومناسية متناقضة مع تركيبته المهم إنه كان شخصيتى المفضلة فى المسلسل ....
طب لو مكانش هوه و لا ريتشارد قلب الأسد يا ريت تقولولينا اللقب دا جه منين عشان دماغى بتزن
أما ترجعى بالسلامة بقى
باااى

el_assel said...

والله لو بذر الجوافة بيخلينا نقابل اصدقائنا القدامي
التي مرت السنين علي رؤيتهم
حتي لو ما افتكرنهمش

يقبي كل واحد ياكل جوافة كل يوم
ومحدش يغسل سنانه بقي

وابقوا خزنوا جوافة غلشان تبقوا تاكلوها لما ما يكونش الموسم بتاعها





سلاماتي

سمر الشافعى said...

ههههههههه كالعاده طبعا موتينا من الضحك ربنا يفرح قلبك يارب

بس برررررررررده اكل مش هتحرمى وتبطلى كل البوستات لازم يبقى فيها اكل كدا محرمتيش من اخر غسيل معده تقومى تاكلى كااااااام جوافايه مش واحده بس دى حتى بتجيب امساك ياشيخه

kochia said...

العنوان معبر جدا
بس انا لو منك كنت اكيد في الاخر هسالها
بس الاكيد
ان الغلط علي الجوافة
الحمد لله اني باكلها من غير بذر

تحياتي

mony said...

دمك زي السكر

لا لا لا
دمك سكر فعلا


انا قاعده اضحك و بحاول ماطلعش صوت علشان جوزي مايقولش عليا اني اتهبلت

بس فعلا موقف يجنن

بس انا لو منك ماكنتش سبتها الا لو عرفت اسمها
علشان حاجة زي ديه ماتنيمنيش ابدا الا لما اعرفها

Z_Diva said...

eda
elcomment bta3y ra7 fen :'((((((
kda, yw2a3ony mn elcomments, da wallahy kan comment n2awa, we a3dt anaka7 feh ftra la b2s bha
ylla 7sal 5er, we bma iny tb3n msh fakra mnno walla klma, bas ylla n3lk tany we amry lelah
howa kn elpost mwetny mn eld7k, welbnt eltanya de s3bt 3lya, walwenha zarefa 7bten, bs brdon, y7raam, ew3y tetl3 liha felblogz we t3rf ink 5e5az :D
we b2y e3'sly snank kabl elakl we b3doh :D
salm b2a we slmlna 3alkbtin shikoz

سكــر said...

ههههههههه

انزل من الطياره ع البوست بتاعك

ااقول اشوف الاخبار

طلعت اخبااار مضحكه
هههههههه

ربنا يفرح قلبك

زى ماقالت فاتيما

دى مكنتش حد مهم ف حياتك

بس من الواضع انك كنتى ثورجيه

وكنتى شىء مهم ف حياة اصدقاءك

والله الموقف دا بيحصل كتييير جدا

وخصوصا ان الواحد مرت بحياته محطات طويله اوى

بس اغرب موقف كان ف المطار

من شخص كنت اعرفه من ايام الجيش

هو عرفنى وانا معرفتهوش

شافنى ف المطار وكان معاه مشكله

فى الوزن هههههههه

وكانت طبعا بالنسبه ليه صددفه رائعه

انقذته من 70 كيلو وزن زواده
هههههه


تحياتى

اخيكى احمد سكر

الشنكوتي الكبير said...

ايوه فالحه يا ابله
طيب كنتي اعملي فيها عبده العبيط وخلاص واسأليها عن اسمها يعني هي هتضربك لو سألتيها انا بشوف ناس كتير زمايلي برده بس هم مش بيسلموا عليا بروح انا لو زهقانمن المواصله اديها سلامات واكلمهم فيكلموني ويعرفوني حتى لو مش ضامن يعرفوا اسمي بابتدي بأسمي الأول علشان يفتكرني بس الحمد لله بيطلعوا فاكرني كويس
بيغيظني بقى اللي يسلم عليا ويبقى جاري وكل يوم بقابله وانا لحد دلوقتي معرفش اسمه الواد كل لما يشوفني ياخدني بالحضن ويبوسني وانا مش عارف اسمه وهو محسسني اننا طول عمرنا بناكل في طبق واحد
هاموت واعرف اسمه ايه
عيل غتيت

سلاااااااااااااااااااام
هاتي جوافيه يا بنت
اخوكي ايهاب

son's egypt said...

السلام عليكم
كل ده من الجوافة وبذر الجوافة
لازم الواحد يغسل سنانه كويس جدا خاصة لو فيه حاجة فيها بذر زي الجوافة

Sherif said...

بس بجد بجد يا خوخة .. وبعد يومين من ذلك الحدث

مين دى؟

الشنكوتي الكبير said...

عايز تعليق يا كبير على البوست الجديد

عايز راي يهز الدنيا

سلاااااااااااااااااااااام

mohamed said...

صحيح يا نوران تبقي مين دي؟؟؟
هههههه

شـمو نشـادر said...

ازيك ..
ايه الحلاوة دى ..
و النبى عثل عثثثل ..
اول زياره ليا هنا بس هاجى على طوووووول ان شاء الله ..
تحياتى ..
أسامة أمين

سومه...مجنونه فى بلد عاقل said...

بنت يا خيخه انتى اسكندرانيه؟؟؟
على فكره الموقف دا بيحصل كتير بس انا بكون مكان البنت التنيه مش مكانك عشان انا مبنساش الوشوش بس المصيبه بنسى الاسامى:))
عارفه بقى يا ستى كلمه جوافه فضلو اصحابى ينادونى بيها طول ما كنت فى ثانويه عامه عشان فى ذات المرات عملت للمدرس بتاع الدرس الخصوصى عصير جوافه منغير ما اصفيه والراجل بقى يشرب بق ويطلع البذر ههههههههه فكرتينى بالذى مضى
وابقى علقى خرزه زرقه هههههه ما شاء الله
زى العسل يا خيخه
تحياتى ليكى سومه_87

واحدة مفروسة said...

خيخه ..انا رحعت تانى عارفه ليه و لا اقولك؟
لا حقولك علشان ماتعمليش و ش اباحه و لو انى مش عارفه يعنى ايه؟
من شويه اتفرست جدا لدرجة انى كنت مخنوقة تانى و حعيط...و بدل ما اعيط ...نطت فكرة فى دماغى..بس نطه جامده خلتنى افتكر انى لما كنت مضايقه المره اللى فاتت البوست بتاعك ضحكنى و خرجنى من المود ....بس
حبيت اقولك انا رجعت تانى علشان اخرج من المود الوحش
عرفه تعملى وش اباحه و تقولى كلمه ابيحه ....هههههههه بموت فيكى انتى تجننى

ayman badr said...

فعلا تجربة هايلة لمعرفة اضرار اكل الجوافة بجد ضحكت من قلبى وربنا يكرمك وتعرف اسم صاحبتك
تحياتى

حبيبـــــــة القمـــــر said...

ههههههههههههههههههههههههههههههههههههههههههههههههه
وربنا مش قادره امسك نفسي من اول البوست وانا متخيله المنظر
تجنني والله
حصلتلي قبل كده
بس ماطولتش صراحه دانتي عندك طولة بال
ربنا مايوقعك في بذرة جوافه تاني

نور said...

هههههههه
هههههههههه

تحفة بجد

اللي ياكل جوافة ميطلعش تاني من البيت اصلاُ

دمتي بخير

Baker said...

متحيريش نفسك لما تتصلى تسلمى عليها قوليلها ازيك يا ام عمر

تحياتى

tarek momen said...

اولا احمدي ربنا انها بذرة جوافة مش خوخ مثلا و الا كان هجم عليكي اكثر من كده لأن ابتسامتك كانت ها تبقي اكبر
ثانيا احمدي ربنا ان لسة سنك صغيرة علشان لما توصلي لعمري ها يبقي الزهايمر اتمكن وتلاقي نفسك بتتلخبطي في اسماء اولادك ناهيك عن انك هاتنسي كل اسماء اصحابك

ادم المصرى said...

ههههههههههههههههههههههههههههههههههههههههههههههههههههه

اشطه شكلكو عالم روشه طحن فكها وعصير وجوافا وطبيخ انا وقعت فى مبخ مدونه ابله نظيره

بس بجد مدونه خفيفه جدا وموضيعك كلها لزيزه جدا ياريت تشرفينى مدونتى ونكون اظقاء

Soooo said...

مييييييييييييين ؟؟
سي ريتشارد ؟؟؟
ازيك ياخويا
معلش .. اصل انا عندي جوافه
ساعة تروح .. وساعة تيجي
ساعه تروح .. هااااا
وساعه تيجي
-------
انا بتخابث عليها: تحبى اسجله باسمك ولا باسم ام عمر
البت: خليها ام عمر
انا فى عقل بالى: احيييييييييييييييييييييييه


انا اتقلبت ضحك هنا
يالهوووووووووي

ربنا يسعدك ويبسطك ويرضيكي دنيا وآخره عالضحكه اللي ضحكيتهاني عالصبح

ملحوظه
ايه اللي جاب ريتشارد لخيخه؟؟
ايه اللي جاب القلعه جنب البحر؟؟؟



سلاموووووووووز

محمد عبدالحي السيد يوسف said...

الحكيم كونفوشيوس أتحط في الموقف ده قبل كده فقال :
صحيح يا ولاد
قال تعرف فلان
قال أعرفه
قال كلت معاه جوافة
قال لأ
قال يبقى ما تعرفوش

Nostor Azzuro said...

أنا دلوقتى نفسى آكل جوافة
ومحدش يسلملى على ريتشارد
ـــــــــــــــــــــــ
neo

عاشقه الاقصى said...

هههههههههه

بجد حلوه اووووووووى

اول مره ادخل المدونه بس البوست جامد جدااااا

وفعلا محدش هيأكل جوافه تانى

عاشقه الاقصى

Anonymous said...

أنا فطست من الضحك يا ام شريف
انا لو مكانك لازم اسألها حيحصل ايه يعني :)
مهندس مصري في حائل
و بأعلق من الموبايل

Anonymous said...

أنا فطست من الضحك يا ام شريف
انا لو مكانك لازم اسألها حيحصل ايه يعني :)
مهندس مصري في حائل
و بأعلق من الموبايل

صبرني يارب said...

يخرب عقلك يا خيخه يا بنتى لسانك نعمل فيها البنيه دي يا ولاد

انا لسه متخانقه خناقه رجت انحاء المعموره عشان واحد قال كلمه مش تمام قدام ولادي علىالله تقابلي ولادي صدفه يا خيخه هاغزك على طول

وبعدين ابقى بلاش طفاسه وشيلى بذر الجوافه
على فكره الموقف بتاعك ده بيتكرر معايا كل ما اخرج تقريبا اخر مره فى النادي بعد الخناقه الى حكيت لكم عليها مع الحرس بتاع النادي
واحده برضه لقيتها بتكلمنى بس بقى هي الى كانت لسه ما اتجوزتش وشكلها ماا تغيرش وانا مش فاكراهااااااا خالص بس هى فاكراني وقالتلى برضه انى شكلك ما اتغيرش اوي وقالتلى برضه نتقابل تااااااني وحركات وكده بس انا بقى سألتها اسمك ايه ههههههههههههه
قالتلي انتى العيال توهوكي يا بنتى ولا ايه قولتلها اه يا اختي دخان الطبيخ برضه بيأثر مهما عملنا
خووووووخه هى الجوافه طلعت ؟؟؟

نعكشة said...

ممكن تتصلي بأماني او مش فاكرة مين التانية اللي كانوا صحابك ف يالشلة
و تسأليهم مين صاحبت الرقم دة

او ممكن تتصلي بيها و ترغوا بقة و بعدين تقوليلها والله يا اميرة الاسعار غليت اليومين دول
هتقولك اميرة مين نسيتي اسمي انا سعاد

تقوليلها سوري اصلي مكنتش مركزة و بس :D

او ممكن تتصلي بفودافون او ام نبيل و تسأليهم عن لرقم متسجل بأسم مين

او تقوليلها هوه انتي بتشتغلي لو قالت اة قوليلها طيب ما تجيبي الكرت احطوا معايا

اي بتاع ف يالبتاع

يلا خيررب قوقعة خير من الف صدفة

maha zein said...

دمك شربات اوي اوي
يا ريتني قابلتكم لما اتقابلتوا عشان اعرف انتوا مين
يا ريتني
بجد
بحبك في الله

ايام العمر said...

تقريبا اول مرة اعلق فى مدونتك
بس انا متابعها بقالى فترة طويلة
موضوع جميل
ونتعلم منة اننا نحوش البذر من الجوافة قبل ما نكلها مش نبطل اكل جوافة
بس بصراحة بذراية الجوا فة لما بتدخل فى السنان شئ مؤلم فعلا واسالينى
على فكرة انا حصلى موقف يشبة موقفك دة لدرجة كبيرة اووى
انما هم كانوا مسمينك ريتشارد لية

وبعدين انتى لية مش بتردى ع التعليقات

سلام

Sara said...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

ياسلام بقى لو تتصل عليكي وتعذبك تاني وتالت ورابع


تحياتي

فراشة حزيران said...

أهلا يا خيخة ..
مش عارفة ازاي اشكرك , دنا متت ضحك

مش ممكن كل دا يحصل من جوافة

-------

ابقي نورينا وشرفينا بمدونتي
سلامي اليك

users online