Tuesday, June 10, 2008

هى وبطنها




بطنها بدأت تكبر
نزلت تشترى اندرويرات جديدة
البنت عرضت عليها موديلات كتيرة واشكال كتيرة
هى اختارت اللى عليها دباديب صغنونة
واختارت كمان اللى عليهم بلالين
روحت البيت خدت دش
وحطت على بطنها كريم يمنع تشققات الحمل
نزلت راسها على اد ما تقدر
علشان تكون فى مستوى بطنها
وقالتله
ده كريم اسمه جونسون اند جونسون
لبست اندر ويرها الجديد
وقالتله لو عايز تلعب مع الدباديب
مد ايدك والعب معاهم
فتحت التلاجة
ومسكت واحدة مكس لبن على شكولاتة
وقبل ما تاخد اول شفطة
طبطبت على بطنها
ونزلت راسها لمستوى بطنها
وقالتله
انا هاشرب دلوقتى لبن على شكولاتة
يعنى اللى هينزلك دلوقتى هو ده اللبن على شكولاتة
شغلت اغنية الاطلال لام كلثوم
ومسكت سماعة من سماعات الكمبيوتر
وقربتها من بطنها وقالتله دى ام كلثوم ودى اغنية الاطلال
بعد شوية عملت شوية فول بالزيت واللمون
وعليهم كمون وشطة وفلفل اسود
نزلت راسها لحد مستوى بطنها
وقالتله اللى هتاكله دلوقتى فول باللمون
مسكت كتاب اسمه
تربية الابناء على الطريقة الاسلامية
فردت جسمها على السرير
رفعت تى شيرت البيجامة شوية
وخلت استك البنطلون يبقى تحت بطنها
حطت الكتاب قدام بطنها وقالتله
هو ده الكتاب اللى هاتعلم منه ازاى اربيك صح
ايه رايك فى الغلاف بتاعه؟
راحت تكلم اختها فى التليفون
حطت السماعة على بطنها وقالتله ده صوت خالتك
قبل ما تنام بليل شغلت سورة يس على الكمبيوتر
ومسكت السماعة وحطتها على بطنها
قالتله
دى سورة يس
ده كلام ربنا
ضمت صوابع ايدها اليمين وباستهم
وحطتهم على بطنها
وقالتله تصبح على خير يا حبيبى
دى بوسة قبل النوم
فردت جسمها على السرير
وجابت البطانية الصغنونةاللى اشترتهاله
وفى انتظار انها تغطيه بيها
وغطت بيها بطنها بس
وقعدت تطبطب عليها
لحد ما ناموا هما الاتنين
هى واللى فى بطنها

انتهى
بت خيخة واى كلام

76 comments:

Ahmed Shokeir said...

Post of the day :)

nigro said...

تصدقي إن أنا بقالي ربع ساعة مش عارف أكتب ولا كلمة
نعومة وهدوء و راحة غريبة في طريقة سردك للحدوتة
يا نهار
اقول إيه؟

ربنا يحرسهلها و يباركلها فيه

اقول إيه؟

الحب معنــاه إيــه ؟ إحساس بجد غريـب!

بدون سبب تلاقيــه خطفك بشكل عجيـب!

الحـب لـو بـالعين .. طيب منين و إزاي

حبيت من قلبي ناس بوشوش في علم الغيب؟

ربنا يريّح قلبك

يلا سلام

واحدة مفروسة said...

جميله ياجميله
صورة حلوه مجسمه
لو كنت انا كنت عملت كده بالمللي
بس انا مش عندي اولاد ...بس بالظبط لو كنت انا فى مكانها كنت عملت كده

واحدة مفروسة said...

خيخه انتي جميلة اوي
و الجمال اللى انا اقصده و اعرفه هو جمال الروح لاني مش شفتك
لكن سمعت صوتك ...و صوتك قالي ديه شقيه بس روحها جميله
ربنا يخليكي لشريف و يخليه ليكى

ِِAdem El-Mahdy said...

سلام عليكم

اولا الف مبروك ان عم نجم زكر اسمك فى مقاله

ثانيا :

اعتقد ان ده احساس طبيعى جداا
ان اى اك تعمل كده و لو كان ده ابها الاول

بكرة التانى تديه بالجزمة و تؤله

هيجى با ابن تووووووووووت (حزفت للرقابة) علشان تأرفنى زى اخوك


ربنا يخلهولها

شهاب الأزهر said...

تدوينة تجسد شعور أم لأول مرة غالبا، فالبنات بالفعل يتميزن بهذه المشاعر وذلك التعلق، تماما كما كانت شقيقتي تناجي عروستها وتعلمها


بوركتم على هذا التشبيه والنقل الجيد لمشاعر أم

بحبك يامصر said...

ام شريف

جميل جدا البوست وفكرته جديده وهايله
بس كان ناقص البوست حوار متبادل من الطرفين الام والجنين يعنى مثلا الجنين يطلب عايز يشرب عايز يلعب وكده
ههههههههههههههه
تحياتى ليكى وللاسره الكريمه

ابن حـجـر الـعـسـقـلانـى said...

يا بنتى أنا ماعرفش انت بتعملى فينا إيه بحكاياتك

انت بتحركى مشاعرنا بمنتهى السهولة .. و بتحركيها بقوة كمان



أنا عملت زى نيجرو ... بقالى حوالى ربع ساعة مش عارف أكتب حاجة

أنا عايز ارسم حاجات بتتحرك جوايا .. مش اكتب كلام

بجد تحياتى ليكى

kochia said...

رقيقة اوي

تحياتي

فاتيما said...

أنا بقى موش زى نيجرو و لا عسقلانى
أنا موش هستنى ربع ساعة
و لا هتحير أقول إيه؟؟
أنا هقولك علطول
يا نونو
أنتى بتعلمينا كلنا
اللى مبقتش أم لسه
تبقى ام إزاى
و اللى أصلاً أم من بدرى
بتحس إنها قد السنتوفة كدا خجلاً و عاوزة تتدارى من جمالك و شفافيتك
ربنا يكرمك
زى ما بتكرمينا
و بوسس كتير لحبيبى

المـــفـــــــقــــــــوعـــــة مــرارتـهــا said...

فين الكراسي اللي هنا
انا صحتي تعبانة وعاوزة اقعد جنب المدونة اشوف اللي داخل واللي خارج عشان اتفرج عليهم
تمانين ربيع عقبال عندك ماتشوفي نفسك قدي
انا كنت باعمل كدة تمام وانا حامل في البكري لكن التاني كسلت لان البكري كان شاغلني

اهو ده عيبه said...

ايه يا نوران الكلام الجميل ده
اظن مفيش احساس اجمل من كده ان الانسان يحس بحياة تانية جواه

ربنا يخليلك شريف يارب وعقبال ما تحسى الاحساس ده تانى

تحياتى

نعكشة said...

:D

سبحان الله
مع انو بياخد منها و بيتعبها و بيمتص دمها و بيأثر علي صحتها
إلا انها بتحبوا
بتحبوا مع ان اول لقاء بينهم بيكون بعد ألم ومعاناة شديدين

سبحان الله

له في ذلك حكم

طريقتك حلوة ماشاء الله

تسلمي
سلامون عليكي

m5m said...

:نوران

انتى ماشبعتيش كلام حريم يوم الجمعة اللى فاتت؟
انتى فاكرة ان المدونة كل اللى بيدخلها ستات؟
أسلوبك حلو بس لازمته ايه الاندروير أبو دباديب ده؟ ماكانش ينفع الموضوع من غيره؟

A.SAMIR said...

تقوم بالسلامة ان شاء الله
تحياتي

(احمد سكر ) said...

وكان حلما ظلت تحلم به

حلما ظلت تنتظره

يوما بعد يوم يكبر الحلم

يوما بعد يوم تتجسد الحقيقه

تجسد داخلها

تحكى حلمها لحلمها

تشكى الم حلمها لحلمها

رغم الامها الا انه حلمها

تجسد الحلم واصبح حقيقه

وكبرت الحقيقه واصبحت سندا

وجائت به تحكيه احلامها

ام شريف

ربنا يباركلك فيه يارب

ويجعله سند وعون ليكى

وتشوفى فيه حلمك يارب

تحياتى لاختى الفاضله

اخيكى احمد سكر

(احمد سكر ) said...

وكان حلما ظلت تحلم به

حلما ظلت تنتظره

يوما بعد يوم يكبر الحلم

يوما بعد يوم تتجسد الحقيقه

تجسد داخلها

تحكى حلمها لحلمها

تشكى الم حلمها لحلمها

رغم الامها الا انه حلمها

تجسد الحلم واصبح حقيقه

وكبرت الحقيقه واصبحت سندا

وجائت به تحكيه احلامها

ام شريف

ربنا يباركلك فيه يارب

ويجعله سند وعون ليكى

وتشوفى فيه حلمك يارب

تحياتى لاختى الفاضله

اخيكى احمد سكر

رئـــــيسـة حزب الأحلام said...

لا بجد قصه بسيطة
وفيها امومة جميلة اوى

ربنا يسعدها
تحياتى لكى

ادم المصرى said...

بجد روعه تسلم ايدك والموس بتاعك طريه سردك متعه وروعه وتنسيق الكلمات تغدى اوسكر عليه ربنا يوفئك ويكرمك

shayma said...

حلوة حلوة اوىىىىىى
اد ايه جميله يا نورا

احساس رااااااااائع

بجد حلوة

على جنب
حلو اوى حكايه بون بيتى
جامده يعنى
:)))))))))))))


سلامى يا جميله
:))

صوت من مصر said...

بامانه الست دى كانت شاربه حشيش والدماغ كانت عاليه موتتتتت
بس الحدوته حلوه جدا

HERO said...

علشان كده الجنة تحت اقدام الامهات
سبحان الله شفتي العلاقة ما بين الام وابنها بتبتدي من امتى وعلى ما اعتقد هو كمان بيبقى حاسس بيها
وصفك جميل بس بلاش تنزل راسها لمستوى بطنها كتير علشان ضهرها مش يوجعها ههههه

تحياتي

صيدلانيه طالعه نازله said...

كلنا عملنا زيها فى الاولانى اما التانى
الاولانى ما كانش مدينى فرصه اطبطب عليه و لا اكلمه لانه كان هارينى و هاريه تنطيط على بطنى و شلاليت و حاجات من اللى قلبك يحبها
عقبال ما نهنى بقدوم المولود السعيد

Eldebug said...

جميلة اوى القصة وطريقة سردها ... بتحسسك انها بتسحبك معاها بهدوء وبتخطفك لعالمها ... تحياااااااتى

سمراء said...

من فترة للتانية بيلح علي الاحساس والحنين للامومة
اشكرك
سمراء

الشنكوتي الكبير said...

يا بنتي ارحميني
كله فزيع كده

اقولك على حاجه انتي تنفعي تكتبي كتب وقصص بس اجنبي علشان عندك كم من الصراحه والواقعيه ولا احسان عبد القدوس
بس بجد الواحد مبيقدرش يقول حاجه غير ربنا يسعد ايامك ويحفظك

ربنا يباركلك في شريف وهاني

---------------------

الغريب ان الست بتعشق طفلها من اول لما تحمل فيه انما الرجل بيعشقه قوي لما يشوفه اول مره وسبحان الله له في ذلك حكم
لو كانت الست زي الرجل برده بتعشق طفلها من اول لما تشوفه بس مكانتش تتحمل الام الحمل والولاده دي كلها بصدر رحب وفرحه كده
سبحان الله
كما قال رسول الله (ص)امك ثم امك ثم امك ثم ابوك
او كما قال


سلاااااااااااااااااااااااااام
اخوكي ايهاب

nonoymm said...

وبعدين بقى
هتكبر في دماغي واعملها خامسا
احلى واجمل واعظم احساس في الدنيا
جربت بىتقف ادم المراية كل يووم تشوف بطنها كرت ولا لا
وش بيغمز]]
ربنا يبارك لها فيه ويكبر ويقى عد صال باذن الله وخاويه بقى كدة قوليلها اتجدعني
تحياتي

appy said...

عارفه يا خوخه ان البيبى بيحس بامه قوى وده نوع من التواصل من البدايه
بس انتى كتبتيها حلو قوى بجد

أبو خالد said...

أنتى قيمة جميلة قوى ياخيخة
هذا البوست الأجمل فيما أبدعتى
ربنا يبارك فى عمرك و عمر شريف و هانى
لمستى فى روحى شئ ما
ربما حنينى الفطرى لنينا
نوران شكرا

ام رقيه said...

ايه الفكره الحلوه اوى دى يا نورا

تصدقى يا نورا انا كنت بعمل كده مع رقيه قبل ما تتولد بس مش عارفه دلوقتى مش بعمل كده مع البيبى اللى جاى الا قليل اوى
تصدقى مظلوم معانا اوى بس اسلوبك حلو اوى وراقى اوى
تسلملى كلامك
بوسيلى عريس بنتى والا انتى عندك مانع ولا حاجه

Z_Diva said...

wow
mayt2alsh aktar mn kda :)

قوس قزح said...

مش عارفة يا خيخة اول مرة اقراك حاجة كده
برغم من ان فى بعض الكلام حسيت فيها بخيخة الشقية
لكن رقة البوست و احساس الحب اللى فيه من انسان لحاجة فى علم الغيب كان لها تاثير قوى على النفس

ما تجربى يا خيخة تكتبى فى الرومانسية بس وقتها تخلى خيخة الشقية تلعب مع شريف و تكتبى انتى بروح نوران

تحياتى على البوست ده و فعلا زى ما احمد قال Post of the day :)

المستنصر بالله said...

ايه الكلام الجميل ده انا اتاثرت بيه جدا لانه رقيق وصادق تحياتى

نور said...

حلوه اوى وبجد طريقتك فى الكتابه ناعمه اوى و حنينه اوى
وخليتنى افكر انى ان شاء الله لما ربنا يكرم هعمل كده بالظبط
بجد بوست رائع تحياتى ليكى
احلى سلام ليكى يا جميل

بنوته مصرية said...

انا بقي مش هستغرب لاني عارفة خيخه الام وحنيتها علي ابنها وخوفها عليه

وكمان لاني حسيت بمشاعرك دي لما كنت حامل في نور

ربنا يخليهم لنا يارب

هي دي الام
علي فكرة انا سمعت كتير من برامج بيقول اني ده اكبر علاقه مابين الام وطفلها والطفل بيحس بكل شئ وبيسمع صوت مامته وبيعرفة من الشهر الخامس

علشان كدا لما بيجي بيسكت علي صوتها

انتي جميلة ورقيقة اووي يا خوخا

لكي تحياتي وبوسه كبيرة لشيكو

سومه...مجنونه فى بلد عاقل said...

جميل قوى يا خيخه ولافته خيخيه منك هايله
تحياتى ليكى سومه_87

صاحب المضيفة said...

انا لما قريت الكلام مش بقيت عارف اكتب ايه

قلت اخل عل الردود برضو ابص كده


لاقيت الناس زيي


كنت كتبت على المدونة وقلت ان هناك من المشاعر ملا يسعها الكلمات ولا الحروف


لكن انتي المرة دي كسرتي القاعدة بجميل عرضك

تسلم الايادي وسلامي لشريف باشا

عبحي .. فخور بأني مش بني آدم said...

أختي كات بتعمل حاجات شبه كدة .. طبعا مش للدرجادي بس وحياتك بعدما ولدت بشهر كانت بتديله من دوا البرد كل يوم يالليل علشان كان بينيم

الواد صحته كانت كويسة لأنه كان بياكل و هوة نايم

بس دلوقت و هوة لسة ماكملش تلات سنين .. دماغه أوسخ من اللي بيشربوا حشيش

نوره الخشن said...

ايه الامومة المفرطة دي من قبل متشوف وشو حتى

دوول صحااااااااب اوي

صبرني يارب said...

لا بصي هو انا كنت باعمل حاجات زي كده فى مريم بس طبعا بعد كده كنت باسمعهم صوتي قداماخواتهم

لكن مش لدرجة انى اقولهم هي هتاكل ايه اساسا انا كنت بارجع اكتر ما باكل لمدة 9 شهور فى مريم ورحمه
انما خالد كانوا 5 شهور بس مواصله والباقي تخاطيف

وبعدين انا فى مريم اتوحمت على جبنه مش مش معقول كنت اقولها نى هاكل جبنة مش عشان كانت هايغمن عليها .

اها وبالمناسبه مره كلت ملوحه وفسيخ ورنجه وسردين وكنت هاموت تاني يوم من الضغط العالي
اقولها ايه بقى هتاكل ايه ههههههههههههههه

أسير الجراح said...

انا مش عارف اعلق اقول اية بردو مش عارف

بس بجد سعدت بمرورى على مدونتك

تقبلى تحياتى

اسير الجراح

همس الاحباب said...

ابداع ثم ابداع
ثم ابداع
تسلم ايديكى يا مبدعة
بجد رائع جدا اسلوبك وسردك للقصة
تحياتى وتقديرى

محمد الكومي said...

نش عارف اعلق اقول ايه بس حقيقي حاجة حلوة اوي و نقل احاسيس جميل احنا فعلا مش بنحس بالاحاسيس دي - كرجالة يعني - بس انا حسيت بابتسامة كبيرة احتلت وشي لما قريت البوست

تمااااااااااااااام

كاميليا said...

أنا عرفت ازاى

آكون أم

واتمنيت مع كل سطر
وكل كلمة
إنى اكون أم

وماما وحشتنى
الله يرحمها يارب


احترامى وتقديرى

الطائر الحزين said...

وهو حاسس بكل اللى بتعمله ومقدرة

د/أبويحيى وادم said...

السلام عليكم ورحمه الله وبركاته
آختى الكريمة
لما أراك لم تشاركي معنا في حملتك إلى الآن ؟
أختى الكريمة : هي حملتك هي لغتك ولغتي أذا لم نحافظ عليها نحن ونعمل على نشرها فمن يفعل ذلك ؟؟
أنا لا ادعوا إلى المثالية فى استخدام اللغة والأمر مفصل بالموضوع بالمدونة
وهى ليست دعوا لفرض قيود على كيفية التعبير عن الرأي فلك مطلق الحرية في هذا
أختي الفاضلة أن مشاركتك في هذه الحملة سوف يكون احد أسباب نجاحها ونشر لغتك
ندعوا إلى الاعتزاز بلغتنا ..أعلم انك تعتز بها ولكنى أدعوك الآن إلى نشر الأمر بين كل من تعرف وكل زوار مدونتك التي تدون بها وكل المنتديات التي تشارك بها
إلا أذا كنت غير مقتنع بالفكرة والحملة فلك مطلق الحرية في هذا واعتذر أذا كنت أطالت عليك
والسلام عليكم

الباحث عن الحقيقة said...

ههههههه
ما شاء الله
ايه الجمال والرقة والرومانسية والعذوبة والامومة والحنان ده كله
بوست جميل اوى اوى يا خيخه
عبقري
ممتع
ساحر
بجد شئ رائع جداااا

زهرة الياسمين said...

بجد إحساس رائع
ربنا يرزقنا جميعا الذرية الصالحة

خواطر رئيس شاب said...

والله يا ستى الموضوع جميل والاحساس بالامومة فيه عالى جدا بس موضوع الاندروير كان المفروض يفضل سر بين الاتنين وبس مش للنشر

تحياتى

شــــمـس الديـن said...

السلام عليكم

ربما اقول كلام لا علاقة له ظاهريا بالموضوع

انت امراة و انمثي بكل ما تحملة الكلمة من معاني

تتجلين علينا برسم صور ساحرة لمشاعر جميلة و باسلوب و طريقة لم اعهدها فلم اري تلك الفكرة تحلق من قبل

انت رائعة و جمال روحك يسبقك :)

خالص التحية

إيمان العزب said...

فعلا روعة
الامومة ارقى المشاعر الانسانية
الاروع انك تقدرى تنقلى حتى للرجال احساسك
لان دائما اسأل هل مشاعر الاب هى نفس مشاعر الام
اكيد الابوة لها طعم تانى
بس هم لا يملكون اسلوبك فى توصيل مشاعرهم
اضم صوتى لنوران يا نوران

إيمان العزب said...

اتضامن مع إم5 إم

ahmed_k_73 said...

ولا هو سامع اللي بيتقالو ده كله ولا واخد لباله من الأكل والشرب واتحداكي لو افتكر بعد كده كلمه من اللي قالتهوله وبعدين فين جوزها من الأحداث دي كلها مبيكلمش ابنه خالص مش الواجب تعرفهم ببعض ههههههههه بصراحه بوست جميييييل وهادي وكله شيزوفرينيا مخلوطه بالقيم العربيه المتحده في التربيه الحديثه الصحيحه مجمله ببعض السجع والكنايات الشعريه (فهمتي ايه من الحوار ده)

Desert cat said...

انا فعلا سمعت ان الاطفال وهما لسه فى بطن امهاتهم بيكونوا حاسين وبيسمعوا اى حاجه من العالم الخارجى
مش عارفه الكلام ده صح ولا ايه
ربنا يجيب لها اللى فى بطنها بالسلامه

Nour eldin said...
This comment has been removed by the author.
حاسوباتيه said...

ماعرفش انتي الي حامل ولا بس عموما وصف فعلا رائع وجميل وربنا يقومك بالسلامه يارب

ayman badr said...

ده الحب فى اجمل وانقى معانيه ابقى سلميلى على النونو وقولى له انكل ايمن والسمانة والعضلة الخلفية بيسلموا عليك
تحياتى

يوميات فنانه مفروسه جداا said...

خيخه يا جميله

انا فنانه مفروسه اللي قابلتك علي البورصه
والله انا حبيتك من اول ما شوفتك
بس انا اسفه موضوعك بتاع الجوافه معلق معايا اوي والبنت اللي كانت بتسألك علي خطيبك الاولاني روحتي قولتلها انا اتجوزت هاني
فعشان كده اول ما شوفتك قولتيلك مراط هاني
معلش بقي انا كنت عايزه اسأل علي شريف والله بس انا لخمه بتلخم في الزحمه
يا ريت اشوفك بقي تاني وتالت لاني رغم الثواني اللي وقفت معاكي فيهم بس والله حبيتك كده لله في لله
يا رب نبقي اصحاب وطبعا مدونتك هايله
ربنا يكرمك يا خيخه يالي مش خيخه ابدا والله كده باين عليكي
سلام يا قمر

هيثم الدهشان said...

تصدقى لو قلتلك انى مش عارف اعلق بجد فى حاجة غريبة بتربط الام بأولادها حتى وهما لسه صغيرين متولدوش
اسلوب رائع هادئ

تقبلى تحياتى

حنين.. said...

يااااااااا الله, غايه فى الجمال والاحساس, بجد ان كنت كل ما بشوف واحده حامل بتتالم قدامى. كنت بقعد ايام كتير شايله الهم لما اتجوز واحمل انشا ء الله. بس دلوقتى غيرتى جوايا الخوف من ألم الحمل الى ان اتأمل فيه وأحاكيه وأشاركه........ بجد جميله اوووووووووووى. ويا بخت النونو. وعلى رأى المثل بقى( قلب الأم)

رئيس جمهوريه نفسى said...

روعه بجد يا خوخه اول مره حد بيتكلم عن علاقة الام بالجنين الى فى بطنها وبتتعامل معاه ازاى ووصفك واسلوبك روعه بجد
-----------------------
فلحوسه على جنب ايه الى خلاكى تقولى انى زعلان منك ياستى لو كان صدر منى ما يعنى او يوصل ليكى احساس انى زعلان منك انا اسف بس بجد مفيش حد بيزعل من اخواته

حنين القلب said...

بجد يا خيخه احساس جميل اوى احساس الام بطفلها وهو فى بطنها يا بخت كل ام حست بالاحساس ده
بس ليه يا خيخه بتوجعى قلبى هو انا ناقصه يا ريتنى ما دخلت ولا قريت البوست ده
بس تسلم ايدك حسستينى باحساس جميل بجد ربنا يكرمك
سلام

مـحـمـود فـرج أحمد said...

يا سلام لو الكل يبقوا كده

هبقى ساعتها النسا والولاده أسهل ماده في طب لأن الأم هتبقى حابه اللي هيا بتعمله ومش هتبقى متضرره
ألا يعني ايه متضرره دي؟؟

المهم .. مش عارف ليه كنت متوقع إن البيبي يرد عليها في الآخر بس شكله كان نايم طوووووول البوست
منتظرين الرد بقه البوست الجاي

سلام يا خوخه

mohra said...

جمييييييييييله قوي
اوعدنى يا رب

dodda said...

مش عارفه ليه البوست تأثيره على غريب!!!

مبتسمه اوى ى ى
وعنيه بتدمع...

الامومه دى احساس ملوش وصف...
ربنا يخلى كل البيبهات..ويرزق كل البنات والستات..
والتعلب فات فات...لازم اعمل دايت

Geo Amr said...

بجد ربنا معاكى لحد لما تولدى ويارب ربنا يرزقك بابن او بنت صالح او صالحة

شفقة هانم واحسان بك said...

جميل اوى البوست اوى....الواحد مش عارف يضحك ولا يعيط....بس بردوا انتى وحشه ما زورتناش ولا مره على العموم هستناكى

أسير حبيبتي said...

السلام عليكم
اولا انا شرفت بلقائك
و ثانيا البوست رقيق جدا
لكن انا عندي سؤال
ابو الولد كان فين ساعتها ؟؟
لا بجد البوست جميل
سلمت يدلكِ

تحياتي
عدنان

عمرو النوبى said...

جميلة اوى القصة يا خيخة
بجد كلماتها خفيفة جدا تتقرى كلها وتشد الى بيقراها
بس على الفكره البنت الى بتحكى عنها دى فتانة اوى كل حاجه تقولو عليها حتى الفول
يالهوووووووووووى

My Hope$ said...

هههههههههه
بجد عجبتني جدا
عارفة كان في قناة ام بي سي
جايببن مراحل تكونين الجنين
وقال ان الطفل لية اكتر حد بيحس بالامان معاه
وبيرتاح لصوتة هو صوت امة
علشان هو دة الصوت اللي كان متعود
يسمعة دايما طولت الفترة بتاعت الحمل
فا لو طلع علي صوت رقيق حنين
بيطلع انسان رقيق والعكس طبعا
وبيتاثر كمان بريحة الاكل لو مثلا فية شطة مناخيرة تحمر
هههههههههه بجد احساس جميل انك تبقي ماشية وجواكي انسان تاني
يااااااااا
يارب ماتحرم حد منة
وطرقتك جميلة جدا
ودقيقة
مدونتك جميلة يا خيخة
وان شا الله هاجي تاني كتير
لو ليا عمر
سلام
مني

maha miho said...

حاسة اني عايزة اعمل كده
حححححححححححححححح
دي تنهيدة حارة :)

EmY said...

بوست جميل اوي اوي اوي فعلآ الطفل بيحس بأمه و بيتأثر بكل همسه منها و هو لسه جنين ولازم الام تهتم بده

بس مش تعمل كده و لما تخلف تجري وراه بالشبشب

تحياتي يا خيخه

عاشقه الفردوس said...

هههههههههههههههههههه

مش عارفه بضحك ليه


بس حلو البوست

تصدقي بدمع

هو انا بضحك ولا بعيط


هههههههههههههههههههه


سلام خيخه

Sherif said...

بوست فعلا فاق الوصف فى جماله

من أجمل ماقرأت من حوار بين أم حنونة وطفل لم يرى النور بعد .. لكنه خرج الى الدنيا مبكرا بعينى أمه .. وأذنها .. وكل حواسها ..

هل كانت تنتظر منه ردا وهو قطعة منها ؟

ابدعتى

Baker said...

روعه بجد
بس انتى فيكى سنه جراءه كده
تحياتى

Dr.Hammood said...

قصه رقيقه وزي العسل

users online