Friday, June 20, 2008

شرف البنت فى بوز الترابيزة


تقريبا كنت فى ثانوى
لما عرفت ان البنات عندهم حاجة اسمها غشاء البكارة
عرفت منين مش فاكرة
يمكن عن طريق كتاب دينى او مجلة طبيبك الخاص
او عن طريق واحدة صاحبتى او مدرسة الدين والعربى
بس فاكرة كويس اوى
انى اعترضت على اللى عرفته عن غشاء البكارة
ووقتها كان لسة لسانى مش طويل اوى
علشان اعتراضى ياخد شكل الالفاظ الاعتراضية الابيحة بتاعتى الأيام دى
كان اقصى وجه اعتراض ممكن اظهره هو انى اقول
كلمة نعم مع التشديد على حرف الميم
وحواجبى يلزقوا فى بعض وأدى وش واحدة ممتعضة
محدش يسألنى يعنى ايه ممتعضة
وبعد ماخلص كلمة نعم اكمل الجملة واقول
ايه الهبل ده؟
وفضلت متغاظة اوى يوميها من اللى عرفته
واللى عرفته الاتى
ان غشاء البكارة ده عبارة عن جلد رقيق
موجود داخل اعضاء المرأة التناسلية
لحد هنا وكويس جدا وماكنتش معترضة
لانى عرفت معلومة أول مرة اعرفها
لكن اللى عرفته بعد كدة
هو اللى نرفزنى
قال اييييييييييييييه؟
إن الغشاء ده علشان الراجل يعرف فى ليلة دخلته
إذا كانت مراته شريفة ولا مش شريفة؟
وهل البنت دى عملت سيكو سيكو قبل كدة ولا معملتش
فى الحتة دى بقى انا اعترضت
اعتراض مؤدب وقتها مش ابيح زى الايام دى
اعترضت لانى رفضت إن اى حد يسمح لنفسه
انه يقيس حفاظى على نفسى وعلى شرفى
بمدى حفاظى على الغشاء ده
اعترضت لأن مفهوم الشرف عندى
كان اكبر بكتير من مجرد غشاء بكارة
وكنت رافضة تماما ان اى حد يجى يغير مفهومى عن الشرف
وإن مش معقول ابدا إن الراجل يحدد قيمة الشرف
فى حتة جلدة اياكان اهميتها عنده
فهى راحت ولا جت هى هتفضل حتة جلدة من وجهة نظرى
وساعتها كنت عرفت برضه ان ممكن جدا
الغشاء ده يتعرض لتمزق نتيجة اى حوادث خارجية
وقعدت اقول طب لو واحدة اغتصبت هل معنى كدة انها مش شريفة
طب لو واحدة اتعرضت لحادثة مثلا
وعربية خبطتها ونتج عن الخبطة دى ان غشائها تمزق
هل معنى كدة انها مش شريفة
طب لو واحدة وهى ماشية جوة بيتها
واتخبطت فى بوز ترابيزة السفرة
يقوم يحصل تمزق فى غشاء البكارة
هتعمل ايه يوم ماتتجوز
هل يا ترى هاتشمع بوز الترابيزة بشمع احمر
وهتعلق ورقة على بوز الترابيزة
مكتوب عليها ممنوع الاقتراب او التصوير
ولو جوزها يوم الدخلة سألها فين غشائك
هتقوم تنزله على ملا وشه
وتروح بيت ابوها وامها
وتروح تشاورله على بوز الترابيزة
وتقوله انا شرفى فى الحتة دى؟
ويا عالم بقى هيصدقها ولا مش هيصدقها
وساعتها فكرت بطريقة مختلفة خااااااااااااااالص
طب نفترض واحدة على علاقة بواحد وبيبوسوا بعض
وبيحضنوا بعض
طب ولو اتخنقوا مع بعض ومتجوزوش والبت اتجوزت واحد تانى
هل البت دى كدة شريفة رغم احتفاظها بغشاء بكارتها
طب لو واحدة اتنيلت بستين نيلة واتهبلت فى دماغها
وعملت سيكو سيكو كامل وصريح مع واحد مش جوزها
وغشاء بكارتها راح
والبت دى اتنيلت على عينها وعملت عملية اعادة غشاء بكارة
واتجوزت واحد تانى
هل كدة البنت دى شريفة
طب وفى ظل انتشار عمليات اعادة غشاء البكارة
وإن الراجل مش هيعرف يفرق
إذا كانت مراته شريفة فعلا ولا عملت عملية ترقيع
هل بعد كدة الراجل من دوول
هنلاقيه يوم دخلته جايب معاه خبير فى الطب الشرعى
علشان يقوله اذا كان غشاء بكارة مراته طبيعى ولا مزيف؟؟؟؟؟؟
طب بلاش كل الافكار الهدامة بتاعتى دى
تعالوا نشوفها من منظور تانى خااااااااااااااالص
نفترض ان ربنا خلقنا من غير غشاء بكارة
هل معنى كدة ان احنا الستات مانحافظش على عفتنا
بحجة اننا معندناش حاجة نخاف عليها
زى بعض الرجالة اللى بيسمحوا لنفسهم
انهم يعملوا سيكو سيكو قبل الجواز
باعتبار ان مافيش حاجة تعيبهم
طب هو المفروض إن الاهالى يربوا فى بناتهم
ان شرفهم مجرد غشاء بكارة فقط
يعنى الواحدة من دول تبوس ده وتحضن ده
وطول ما هى محتفظة بغشائها يبقى خلاص البت دى شريفة
ها ماتجاوبوا
ساكتين ليه
قولولى ايه هو الشرف بقى؟
انا كنت ومازلت مقتنعة ان الشرف ده مبدأ
كنت ومازلت مقتنعة ان الشرف قيمة كبيرة
الشرف من وجهة نظرى عامل زى قوسين مقفولين
وبين القوسين دول صفات تانية كتييييييير اوى
مش معقول يكون الشرف مجرد حتة جلدة
كنت ومازالت مقتنعة ان شرف البنت
موجود فى عقلها وطريقة تفكيرها
وعلشان كدة انا وقتها اعترضت
لانى ارفض تماما انى اى حد يسمح لنفسه
انه يقيس شرفى بمدى حفاظى على غشاء بكارتى
الشرف مبدأ يا سادة
الشرف قيمة
الشرف طريقة تفكير
الشرف عدم خداع
و لكل بنت عايزة اوجه كلمة
ايوة انا بقول ان الشرف مبدأ
لكن مش معنى كدة
انك تسلمى نفسك لواحد باسم الحب
وتقولى كنت فاكرة انه هيتجوزنى
لاااااااااااااا يا ماما لاااااااااا
مافيش الكلام ده
اتجوزى الاول وبعد كدة اتهببوا مع بعض فى الحلال
وبلاش قلة ادب بقى
وفى النهاية احب أن أوجه سؤال للرجل
إذا كنت سمحت لنفسك أن تقيس شرف المرأة
بمدى حفاظها على غشاء بكارتها
فاسمح لي بما انى انسانة مثلك
ولي عقل أفكر به
أن أقيس مدى كونك رجل شريف ولكن قل لي كيف؟



انتهى
بت خيخة وأى كلام

54 comments:

الشنكوتي الكبير said...

تقيسي شرفي بايه

مفيش وهي دي الخدعه

الفكره مش اننا نقيس ونشوف مين اللي طلع ناصح وضحك على التاني
هي لما يعني هتفقد شرفها هتفقده لوحدها ما هو في واحد فقده معاها برده بس هو معندهوش جلده

يعني ببساطه كده الراجل بيعتمد على ان مفيش عليه دليل
طبعا المصايب كتير ممكن تحصل بدون ما يبان على البنت دليل ولا حاجه علشان كده محدش يتجوز واحده الا لما يعرفها صح
وطبعا الفكره بتاعة زمان ان اللي بيمشي مع بنت مش هيتجوزها وان الراجل لو شافها حبوبه وبحبوحه كده هيلعب بيها شويه ويسيبها يعني مش قادر اقولها لكن هاعمل ايه خلاص الدم اتمحى الرجاله بقت عادي عندها انه يتجوز واحده خاربه الدنيا وعارف انها عملت بلاوي يمكن علشان هو حاسس انها بقت زيه زباله هم الأتنين

موضوع منيل بنيله يا خيخه ومش عارف اتكلم بصراحه انتي يا بنت انتي فزيعه ولسانك ده عايز يتحط جوه بقك وشريف يبوسك ويقفلك بقك علشان تسكتي


سلاااااااااااااااااااااااااام
اخوكي ايهاب

نعكشة said...

أذكر إن واحدة صاحبتي طبيبة في نسا قالتلي إن في يوم
جالهم واحد
شادد مراتوا من شعرها
ومجرجرها من بيتهم
وعليها اثار كدمات في كل حتة في جسمها
لحد باب المستشفي
وهيا مسحوبه علي الارض
و بيقول لصاحبتي إنها مش شريفة ولا بتاع
والبنت متبهدلة اصلا

المهم بعد ما كشفوا عليها

طلع ولا اتقطع نتيجة حادثة
ولا اصلا حد لمسو ولا اي بطيخ

و إن غشائي من النوع ال إلاستك elastic
معرفش يعني اية بالعربي بس هوه مبيتأثرش وبيتمط من غير ما يحصلوا حاجة

و طلعت البنت شريفة

طيب تفتكري دية تعمل لجوزها إيه
بعد ما فضحها
و نزلها بالهدوم اللي عليها
و ضربها
و بهدلها في يوم المفروض انو احسن ايام
حياتها

مش مفروض انو عمل تحرياتو و سأل عليها قبل ما يتجوزها

و استخار ربنا و خلاص

تعليقي <<<<< دة غباء

دمتي سالمة

سلامون عليكي

واحدة مفروسة said...

انتي قافله تليفونك ليه يا قليلة الادب
....لايق عليكي العياط اكتر من اللسان الطويل
هههههههههههههه

نونو said...

ارائك ووجهة نظرك تمام
بس العرض با اختاه
تحياتي

جبهة التهييس الشعبية said...

اه
طب وح نعرف ازاي
بصي انا موضوع غشاء البكارة ده بالنسبة لي حاجة مقرفة جدا واحسن حاجة في الجوازة الوسخة اللي اتجوزتها اني خلصت منه

بس احنا ح نعرف ازاي الراجل شريف وللا مش شريف؟

اهي دي حاجة مالهاش حل يا خيخة....يعني خلقة ربنا هي اللي عملت كده
نحلها ازاي

فيه بنات كتير بتعمل البدع وبتعمل ترقيع؟
طب فيه ولاد كتير بيعملوا البدع ومش بيعملوا ترقيع مش بس كده دول بيفتخروا انهم لفوا وداروا على بنات الناس وبهدلوهم وفي الاخر يدوروا على بنت مؤدبة ومالهاش ماضي عشان يتجوزوها

الاغبى ان البنات بتحب الراجل الوسخ
طب ايه بقى؟ نعمل ايه؟

عيله مفتريه سابقا said...

والله يا خيخه لو قدامى اقوم ابوسك على البوقين دول
مهو لو الرجاله فاهمه معنى الشرف زى مانتى قولتيه كده مكنش حصل الموقف اللى حكته نعكشه
ربنا لما خلق المرأة كده خلقها بحكمه وممكن تكون متعلقه بحاجه تحميها
مش حاجه تثبت مدى الشرف من عدمه
طب انا بردو تفكيرى راح
لو هى عملت بلاوى الدنيا والاخره
وعملة ترقيع تبقى شريفه
اة كما تدين تدان
واه هيجى يوم وتتفضح
بس بردو
زنبها ايه اللى خدتلها شلوطين وبونيتين فى عينها علشان معرفش

المشكلة زى مقالت نوارة
ان البنات بيحبوا الراجل الصايع اللى لف ودار ومسمى نفسه نسوانجى

بس هرجع واقولك يا خيخه فى الوقت المنيل اللى احنا فيه ده معتش فيه حد عدل
كله بدون شرف
وبقى عود الكبريت ولاعه
ومش بنقول الكلام ده تحريج على سيبان الحبل على الغارب

بس عايزين الناس دى تفهم بجد ايه معنى الشرف
افهموه
واعرفوه صح
ومش عيب ان ده يكون رمز ليها
ومش عيب ان الواحده تحافظ على مبادئها فى صورة الرمز ده

موضوع جممممميل وتابوه رائع ياريت بجد نتكلم فيه اكتر بكتيررررر من كده

سلامى

رئيس جمهوريه نفسى said...

يا سلام يا خوخه
سيبك انتى دماغ بجد عارفه اهو ده القصور فى المنظور وتابوهات العصرى الحجرى الى عايشه فيها مصر وبتحصل بلاوى كتير من تحت موضوع غشاء البكارة وربطه بالشرف
اولا غشاء البكارة انواع منها المطاطى وده لا يمكن فضة الا بعملية جراحيه او تدخل طبى وفى بعض الحالات النادرة بتكون البنت مولوده من غير غشاء بكارة وقياس البكارة بالشرف غلط لانى مع رقة الغشاء ممكن يحصل هتك لية فى حال وقوع على الظهر او ممارسة رياضه عنيفة
ثانيا: المشكلات دى بتحصل للاسف بسبب القصور فى المعلومات الجنسية فلو فى ثقافه جنسيه حتنتهى مشكلات كتير جدا وعلشان محدش يفتكر انى المثقافه الجنسيه اباحه انا بقصد معلومات تتعلق بالجسد وحجات من هذا القبيل

مـحـمـود فـرج أحمد said...

السلام عليكم ورحمة الله

ازيك يا خيخه .. كيف أحوالك وكيف أحوال شريف؟

والله يا نوران انتي متعرفيش أهمية الغشاء ده في الطب الشرعي .. ده بيتقال فيه مواويل وحكايات

وبصراحه تعليق نعكشه جمييييييل ونقدر نقول ... حدث بالفعل
وكتير بيحصل من ده ومن وجهة نظري
لو فكرنا ان الهدف عشان الراجل يقيش شرف اللي اتجوزها ... يبقى ملهوش لازمه
ربنا معملش حاجه هباء .. وعشان كده لازم له هدف أعمق وأكبر كتير من مجرد حفاظ البنت علي شرفها ولو إن حفاظ البنت علي شرفها يتضمن حفاظها علي الغشاء ده وحاجات تانيه .. يعني الشرف حاج كبيره تشمل حاجات تانيه كتير

بجد كلامك زي الفل وبيعجبني جرأتك قوي في طرح الحاجات اللي حواليها جدال دي

وبالنسبه للراجل
فمتهيألي الواحده ممكن تقيس شرفه بكيفية تعامله معاها وهو هو بيتقى ربنا فيها ولا لأ .. وحتى لو غلط وتاب قبل الجواز .. فمجرد إنه بيعاملها بما يرضي الله فده أقوي دليل علي انه راجل شريف

وأخيرا

تحياتي لشريف وأم شريف

مـحـمـود فـرج أحمد said...

صحيح حته طبيه بقه

لغشاء البكاره انواع

فيه معلومات حصلت منها من مصدر حريمي .. وبالبلدي كده
نوع بيسموه عنبه .. وده اللي بيتفض بسهوله جدا
ونوع بيسموه كِلوَه .. وده فضه صعب جدا
ونوع بيسموه المطاطي وده يمكمن أن يسمح بحدوث العلاقه دون ان يتم فضه

وطبيا بقه .. فيه كل الحاجت دي وفيه غير كده كمان زي مثلا ان البنت يكون عندها غشاء بكاره غير مثقوب
imperforated hymen
وطبعا البنت اللي زي دي الازم في سن عشر سنين كده وقبل البلوغ .. يتعمل لها عمليه جراحيه ويتم ثقبه .. ومتقلقيش عليها يا نوران

لازم يتكتب لها تقرير طبي بذلك

لو فتحت في الشرعي مش هاخلص

أروح بقه أشوف الأطفال والباطنه .. ربنا يستر

ادعي لي يا نوران

فاتيما said...

نوراااان
يا مواضيعك يا بنتى !!!
الكلام دا مؤلم قوى لأى إنسانة
بقول إنسانة
عشان الواحدة دايما تحس
إنها عشان ست بقت مواطنة
من الدرجة التانية
فيه حد تانى له حقوق
مش ليها
و بيفرض شروطه هوه الأول
و بعدين هيا تيجى بعدين
لو حب هوه و سمحلها
عشان بيحبها مثلاً ....
أنا بقى من إعدادى و أنا عارفة الموضوع دا لأن والدى صحفى
و عنده مكتبة كبيييرة
و كنت بلاقى فيها كتب متعلقة بكدا و كمان مجلة طبيبك الخاص
( ضحكت قوى لما سمعت فتحى عبدالوهاب بيجيب سيرتها فى فيلم ثقافى )
لأن ثقافتنا وقتها كانت فعلاً
من المصادر دى
المهم
رأيى متفق تماما مع رأيك
الشرف الحقيقى
فى الدماغ و التصرفات
بس مش مهم رأيى و رأيك
المهم رأى الأخوةالرجال
اللى منهم كتير بيعتنق مبادءى جميلة
و وقت التنفيذ بيلبس طربوش
و يكتم بيه الهوا عن عقله
و يقولك
لااااااااا
و أنا أضمن منين ؟؟؟
دى الضمانة الوحيدة المتاحة
أما بقى عن تصرفات الرجل و علاقاته
فمعرفته بواحدة قبل الجواز
دا حق مكتسب لأى راجل
و لو معملشى كدا
تسمعى مهازل
أقولك مهزلة منهم
و صراحة بصراحة بقى عشان إنتى بتستفزى شجاعتى
طليقى بقى
الله يمسيه بالخيييييييييير
من أول ما عرفنى
و يفترض إنه حبنى
و خطبنى
و اتجوزنى
ولحد آخر مرة شوفت فيها خلقته
كان بيعايرنى
بإيه بقى ؟؟
بأن حضرة جناب سعادته كان
راجل مؤدب و محترم
و عمره ما عرف واحدة فى الحرام
و إنه إدخر نفسه عشان زوجة المستقبل
فيعنى المفروض يعنى يعنى
أبوس إيدى وش و ضهر
إنى واخدة واحد من عى وش القفص كدا
شوفتى و النبى الخيبة
اللى بالويبة
- و محدش يسألنى يعنى إيه ويبة -
اللى الحال بقى فيه ؟؟
طبعاًالحالة دى مش مقياس
أنا عارفة إنها إستثناء
بس أنا بحاول اوصلك حالة التفكير عند غالبية الرجالة
بقى شكلها ملتوى و مش طبيعى إزاى
أرجع و أقولك
أنتى و أنا
و دوبا
و شاهى
و أم البنين
و كل واحدة عندها ولد
لازم تربيه من دلوقتى على
إن مفيش فرق بين ولد و بنت
و حافظ على بنات الناس عشان ربنا يحافظلك على بناتك
و أخلاقيات العدل بقى يا ناس
أنا طولت عليكى
بس مواضيعك و أسلوب طرحك ليها
بقى عامل زى
النداهة

الباحث عن الحقيقة said...

يا نورااان
صدقيني لسه فيه ناس بتتكسف من الكلام بالشكل ده
الفكرة اللى عايزه تقوليها كويسه
بس للاسف اسلوب العرض زى ما قالت الاخت نونو
وه هيخلينا نسمع تعليقات فجه شوية
زى تعليق الاخمحمود فرج
انا مش قصدى اقول انك غلط ولا حاجه
بس عايز اقولك ان من بين جمهورك اللى بيحب يقرالك ناس بتخجل من طريقة العرض مش اكتر
انما انا شخصيا بحب صراحتك في مناقشة الموضوعات
بس برضه يا نوران طريقة العرض المره دى ..لى تحفظ عليها
وتقبلي احترامى وتحياتي
اخوكم اللى مغطى نص وشه يا دوب علشان يشوف حروف الكيبورد
حتى انى مش عارف اعلق على الموضوع اقول ايه
السلام عليكم

بت خيخة وأى كلام said...

مالها طريقة العرض يا جماعة

بصراحة مش قادرة افهم ايه اللى فى طريقة عرضى مضايقكم


وبعدين لحد دلوقتى انا مش لاقية حد فيكم كتب تعليق فج
بالعكس انا شايفة لحد دلوقتى انكم مقتنعين بالفكرة اللى انا عايزة اوصلها


نونو والباحث عن الحقيقة
شاورولى على الحتة اللى مش عاجباكم فى طريقة العرض علشان اعيد النظر فيها اذا كانت تستحق اعادة نظر


وشكرا على متابعتكم كلكم
اختكم خيخة

nigro said...

بصي يا نوران اللي شائك شوية في طريقة العرض بالنسبة ليا هو الكلام عن الأحضان و البوس و التحسيس و السيكو سيكو الصريح
مش هاكدب عليكي و أقولك إيه الكلام ده ؟ ده أيّا خالص
كلنا عارفين الكلام ده بس التصريح بيه علانية كده يعتبر جرأة لسه ماوصلتش عندنا
مش هأكدب عليكي برده و أقولك عشاء بكارة إيه اللي يعتبر مقياس شرف ؟ أهم حاجة التربية و العقل و التفاهم
آه الحاجات دي في غاية الأهمية بس برده عشاء البكارة الي يعتبر دليل صريح على شرف البنت لا يقل أهمية عن التربية و طريقة تفكير
الكلام ده برده ما بيبعدش عن اللي انت عاوزة تقوليه
أنا عارف إن قصدك إن الشرف مش بيتلخص في غشاء البكارة
بس الرجالة أو أغلب الرجالة بياخدوه دليل على حسن سلوك البنت بنسبة 99% ... و أنا منهم
صحيح البنت ممكن تعك زي ماهي عاوزة و في الآخر ترقّع و تعمل نفسها الشريفة العفيفة اللي محدش حتى طبطب عليها قبل كده و الراجل يتقرطس
بس أحياناً برده القرطسة بتبقى أرحم
و لو القرطسة دي بداية حياة جديدة تبقى افضل 1000 مرة
الواحد مننا برده مش ملاك .. اكيد هتيجي عليه لحظة و يتمنى لو انه كان هو أول و آخر نزيل وإنه صاحب شرف فتح عكا
مش غلط برده يا نوران إن الواحد يعتد بغشاء البكارة كدليل على شرف البنت
و الا ماكنش ربنا خلقه من أصله
ولا إيه؟
طبعاً كلامي ده كله خارج نطاق إن غشاء البكارة يكون انفض في حادثة
لأن في الحالة دي الواحد لازم يعذر البنت لأن ده خارج عن ارادتها .. و دي مفيش فيها كلام
و ماتسألنيش ازاي الواحدة تقيس شرف الراجل اللي هيجوزها لأن السؤال ده خارج المنهج و أنا هأهرب من اجابته

يلا سلام

بت خيخة وأى كلام said...

اوك
اهه انا دلوقتى فهمت انهى حتة مش عجباكوا فى طريقة العرض
هاروح اعيد الصياغة

شكرا يا نيجرو

بنت مصريه said...

خلاص يا خيخه المواضيع خلصت
والقضايا ف مصر كلها اتحلت ومبقاش غير الموضوع ده
اطمنى معدش فيه جواز اصلا
هههههههههههههههه
الموضوع دا يا خيخه مينفعش يتقال بالاسلوب الكوميدى بتاعنا ده والا هيدخل تحت سياق قله الادب
فلازم الللى يناقشه ناس متخصصين
يعنى علماء دين
او اطباء
عشان يناقشوه باسلوب علمى بحت
احييكى

نوره الخشن ــ آي و كفاية said...

فعلاً ياخيخة كل ما اقرالك بوست طريقة عرضك بتخليني ببئى عيزة ادخل جوه هدومي وبعدين انزل تحت الكرسي اللي قاعدة عليه وبعدين انزل تحت سيراميك الشقة وبعدين مش عارفة انزل فين تاني

همس الاحباب said...

خيخة
ايه اللى بتعمليه يا خيخة ده
طبعا انتى جريئة ومحترمة جدا
بس بتحسسينى بمدرس الابتدائى اللى بيشرح لتلامذة لسه بيتعلمو الف باء
انتى بتخاطبى ناس فاهمة كل حاجة ما تخافيش يعنى خليها بالاشارة واحنا انفهم
وكل لبيب بالاشارة يفهموا
واللى مش فاهم بكرة يكبر ويفهم
ههههههه
بس طبعا انتى بتناقشى موضوع جامد جدا وليه اهميته
بس مع الاسف احنا بتنقصنا الثقافة الجنسية فى اطار من تعاليم الدين
وده عيبنا وعيب من سبقونا
انه كل حاجة عيب
وده غلط وده مش صح وهكذا
ما فيش حوار ونقاش مفيش دراية من الاب والام
ولا المدرسة ولا اجهزة الاعلام
اما عن مقياس البنت شريفة بغشاء البكارة
وانه مقياس لشرف الرجل
فاحب اقولك انه لا يوجد غير مقياس واحد فقط للبنت والولد
الا وهو تقوى الله عز وجل
ولا توجد اى مقاييس اخر تنفع نقيس بها
تحياتى وتقديرى

ayman badr said...

والله يا نوران الموضو ده موضوع مهم جدا والتفرقة بين الشريف وغير الشريف بقت صعبة قوى بتخلى الواحد دماغه تتلحس بس انا متفق معاكى فى ان الشرف كلمة كبيرة قوى وقوسين يحملوا فى داخلهما معان اكبر وأسمى من مجرد حتة جلدة
ربنا يستر علينا
تحياتى

كاتب مصري said...

تحيتي
بصفتي راجل أقدر أقلك وهتكلم عن نفسي
أنا يوم لما أتجوز مهما كان فمستحيل أفرط في مراتي لو ايه حتى لو لا قدر الله يعني.. لإن ربما يكون زي ما انت قلتي حصلت ظروف مش تمام وبعيدين حتى لو كان فلانة مشيها بطال وبعدين ربنا هداها نرميها في الشارع ونقول خلاص دي كذا وكذا لا والله ما أعملها أبدا
على فكرة أنا أحترم جدا جدا جدا الجراءة بتاعتك دي عشان كده بقدم لك دعوة خاصة جدا معاها شوية ورد وفل وياسمين عشان تشرفيني في مدونتي المتواضعة
يارب تقبلي الدعوة وعلى فكرة انت كده مش خيخة ولا حاجة..
مدونتي هنا
http://kanyatklam.blogspot.com/
أنتظرك صديقتي

funckydoctor said...

عندك حق فى كل كلمة
أنا كنت كتبت بوست زى ده قبل كده ولأنى خيخة منشرتهوش
فعلا كلام فاضى أهم حاجة السلوك
واللى يقولك ان الراجل بيعرف ليلة الزفاف ان زوجته الغشاء ما زال موجود ده كداب
فى أستاذ قالنا لو حتى دكتور نسا ليلة الزفاف مش هيقدر يعرف
تحياتى العميقة

عبحي .. فخور بأني مش بني آدم said...

أولا يا صديقتي الفكرة في الشرف أن مالوش ضامن غير الشخص الشريف نفسه

سواء راجل أو ست

كنت لسه أمبارح بأسمع قصة الصحابي أبو هريرة لما ضمن واحد قاتل لحد ما يروح يبلغ عياله أنه هيتعدم زز بس علشان الناس ما تقولش أن الشهامة اتعدمت
و أن الراجل رغم أنه غاب يومين فأنه رجع عشان يتعدم علشان الناس ما تفتكرش أن الوفاء و كلمة الشرف أتعدموا
و أن أهل القتيل عفوا عن الراجل علشان ما يتقالش أن أهل السماح أنعدموا

هية دي الفكرة البسيطة و الواضحة للشرف

أن الواحد يبقى صادق مع نفسه أولا ثم اللي حواليه

أما مسألة البكارة فدي حاجة تانية
و حتى الرسول صلى الله عليه و سلم لما أتكلم عنها ما جابش سيرة الغشاء خالص .. الفكرة عنده كانت أن الولد البكر يتجوز واحدة بكر "تلاعبها و تلاعبك" يعني الموضوع كله عن المشاعر
و أن الاتنين يبقى عندهم نفس الفضول أنهم يتعرفوا على بعض و يحسوا ببعض لأول مرة
مش هوة متكحرت و هي بت خبرة و من أول يوم جواز مافيش جديد و زهقانين من الحب و مش بعيد مش عاوزين يحبوا تاني

معلش طولت .. اصل قصيدتي الأخرانية كانت عن بكورة المشاعر
فالموضوع كان واكلي دماغي

Dr.m said...

السلام عليكم
كان نفسي الصراحه أول زياره ليه عندك تكون في موضوع غير ده..
أي نعم الكلام مش غلط لكن زي ما قال اللي علقوا قبلي طريقه العرض مش بتاعتنا كمسلمسن عرب شرقيين..
مش هقولك المواضيع دي منكلمش فيها خالص بس على الأقل في أضيق الحدود وكلام خاص مش عام للناس كلها
عالعموم أرجو تقبل النصيحه بروح رياضيه
تقبلي مروري الأول
سلام

مدحت محمد said...

انا بتفق معاكى جدا

كان فى بنت جارتنا حصل معاها الموقف ده بس مش بوز ترابيزة ده كان عجلة وده حصل فعلا
وهى صغيرة

الشرف طبعا كلمة اوسع بكتير سواء عند الرجل او الست

وبتمتد لاوسع من الشرف فى الحفاظ على نظافة الانسان نفسه

موجة said...

عزيزيتي نوران
♥ ♥ ♥ ♥ ♥ ♥ ♥
اسلوبك الساخر رائع كالعادة
ولكن موضعاتك أيضا كالعادة صادمة وفيها الكثير من الحساسية و ليس الأمر كما تظنين فغشاء البكارة لا يفض إلا بممارسة جنسية والحوادث الفردية لا تعدو شيئا وان حدثت فينبغي المصارحة قبل الزفاف وليس في هذا انتقاص من المرأة في شيء

خالص تحياتي
مجرد موجة

مـحـمـود فـرج أحمد said...

تعليقات فجه

لم أتصور أن يرى أحد تعليقي بالتعليق الفج

في تعليقي الأول أنا ناقشت الفكره زيي زي أي حد فيكم

والتعليق الثاني بدأته بتوضيح ان كلامي عن معلومات طبيه

يمكن أنا اتكلمت بالبلدي شويه ولكن عشان المفهوم يوصل لأني لو اتكلمت من الوجهه الطبيه البحته محدش هيفهم حاجه .. أومال فين بقه لا حياء في العلم

ليس مهمة الطبيب أن يعالج المرض فقط ولكن مهمته الأولي أن يمنع حدوثه .. والتوعيه أحد هذه السبل

لو سمحت يا نوران ...لو شايفه تعليقي تعليق فج .. امسحيه وأنا والله العظيم مش هاكون زعلان أبدا

شكرا لكم

Z_Diva said...

ايه ده, هو انا اغيب اغيب وسال عليه, عايش ازاي و بيعمل ايه, بيقولوا ده بيكتب لسه, و ذي ديفا نايمة و مش حاسة

بقى انا اروح و ارجع القي اربع بوستز مراتون واحدة, ده انا كنت في غيبوبة على كده :)))))))))

وحشتني مدوناتكم والله يا شوباب, بس حلوة البوستات والله :)) الاغنية مسخرة, ده ولا شعبولاز في زماكانه :)))

و البوست اللي بعديه كان انهي, يادي التوهان اللي انا فيه ده :(, اه بتاع مفروسة ده, بجد دي عسل قوي, جتلك الورك و بتاع :)), بس انا مش قولت مفيش لقائات تانية من غيري, بس بما اني شكلي هطول هنا و مش نازلة مصر قريب, فهسمح لكم تعملوا مييتنج حريمي تاني بس بشرط اكون معاكو فيديو كونفرانس -انا كنت بهنزر بس طئت كده في ماخوخي و قلت واي نوت, نبقى ندرسها دس-

اما بقى بالنسبة للبوست ده, فانا اتفق معاكي تومامااااااا و مفيش كلام بعد اللي اتقال يا متقال

سلميلي على شيكو كتير و سي يو نكست وييك اند ان شاء الله في كومنت كوليكشن زي ده على البوستات اللي هتتحوش عليا :))))

الباحث عن الحقيقة said...

هو زي ما الاخوة ذكروا لحضرتك كده
ده غير بوز الترابيزه نفسه
البوست ده بيخلي خيال الواحد يروح في مناطق حساسه يا خيخه

انا كنت جاي اقولك انى جاوبت على سؤالك بتاع المواريث
وبالمرة فوتي على الاستراحة انا مفوتلك تاج هناك تعالي خديه

Daian said...

اولا صباح الخير حسب توقيت الكومنت بقا معلش بما انى كائن ليلى
ثانيا انا سعيدة بالبوست بتاعتك و اسمحيلى يكون ده اول كومنت ليا هنا ف بيتك
ثالثا انا مختلفة فى الرأى مع بعض الكومنتات المحترمة اللى بتنتقد اسلوب عرضك انا شايفة انه هايل لانه طالع من قلبك و عن قناعة علشان كدة مباشر جدا
رابعا و ده الاهم وهو اجابة على سؤالك عن شرف الولد او الرجل فللاسف ملوش اى مكان او علامة يتقاس بيها شرفه منها لكن هدعى انه عن تجربة فى معركة الحيته اقدر اقولك تقيسى ده من عقله و كلامه مقصدش تحاسبيه عن فكره لكن كلامه وسيلة تعبير عن قناعاته ومنها هتقدرى تقسى اللى بتبحثى عنه بس فى ملحوظة صغيرة ان التمثيل و الخداع بينجحوا فى تجهيل الكثير من الحقائق
تحياتى

مع اصرارى said...

مكبرة الموضوع قوى.
مع إنه بسيييط خالص يا ست أم شريف.
وبصراحة كدة مافهمتش إنتى ‘اوزة ايه يعنى بالظبط.
ما علينا.
طب إنتى عرفتى الموضوع من من مجلة كتاب دينى أو مجلة محترمة أو مدرسة الدين أو العربى أو صاحبتك. يعنى كلها مصادر محترمة.وإعترضت على إيه بقى؟ على خلقة ربنا؟
طب يا ستى وأنا مالى ما تعترضى.
الإعتراض فى حد ذاته مشكلة فردية أو زوبعة فى فنجان شاى مع سجارتين ما بين العصر والمغرب.لكن أنصحك تخلى الإعتراض جواكى لحد ما تقدمى أفكار إيجابية علشان الناس تعمل بيها أو تطرحى أسئلة منطقية علشان الناس تتأمل وتفكر فيه.
لكن ما تسيبينيش حيران كدة و مش عارف إنتى عاوزة ايه!
طب غشاء البكارة انتى عرفتيه وقت ما عرفتيه مممموش مشكلة لكن هو خلقة ربنا يعنى مش قانون دستورى ولا إدارى يعنى مش هانقدر على الغاؤه. بس ممكن بمشيئة اى حد غير اللى خلقه نغيره واى حد غير ربنا يوفقنا.يعنى العيلة من دول بدل ما نطاهرها ونإذيها نفض لها غشاء البكارة وما نإذيهاش.
كدة أنا برده لسة ما فهمتش قصدك لأنى عارف أفكارك وظنى بيكى إن هدفك مش تغيير خلق ربنا.
حيرتينى معاكى خااالص.انت متعبة فى موضوعاتك اللى مش محددة الهدف اللى انتى عاوزاه فيها. على كل تانى برده
ما نغيرش خلقة ربنا إنما نغير أفكارنا الهباب.طيب ما هى أفكارنا جاية من منظومة ربنا هو اللى خلقها لينا برده.يعنى الناس كلها بتربى ولادها وبناتها بس البنات فيها عدد اتنين أمانة زيادة فى التربية أولا البنت مش جريئة ودى خلقة ربنا وسهلة الانصياع ودى برده خلقة ربنا يعنى ممكن اى حد يضحك عليها علشان يأكلها أو ينيمها.يعنى ما ينفعش تعيش لوحدها من غير ما حد ياخد باله منها بالذات لما تكون ضايعة ومش متربية كويس. لكن الواد لو اترمى فى الشارع مش هايتسبب فى مصايب لافى حد عاوز منه حاجة ولا حد حتى هايفكر يأكله ولا ينيمه.فعلشان كدة ربنا حط فى البنت أمانتين علشان نحافظ كلنا عليهم وعليها.الاولى ودى مسئولية الأسرة قبل الجواز.هى غشاء البكارة حاجة كدة بتخلينا نخاف ع البت ونتابعها حاجة عامللنا هاجس من الحرص على البنات.لو نعرف مين اللى عملها وخلانا قلقانين كدة كنا قلنا منه لله.لكن ده اللى عاملها هو الله نفسه فمافيش فى ايدنا غير اننا نرضى بحكمه ونعرف انه خير لينا.طب وهاييجى منين الخير. اقول لكم .ما هى الأنسان بطبعه مغرور وبيصدق نفسه فطرة يعنى حاجة كدة زى الكسل.ما تخافش ع البت سيبها تروح الرحلة مع زمايلها ده أنا مربياها أحسن تربية.فعلشان الكسل اللى جوانا والثقة الزايدة بالنفس دى ربنا خلق الغشاء ده علشان يخوف ابوها وامها ويخوفها هى كمان لو أبوها وأمها ما خافوش لأ وكمان يخوف حبيب القلب عشيقها لو هى وصلت لا قدر الله لسن الضياع 60 سنة وانت طالع.فإسمحيلى أطرح سؤال هنا للتأمل وأرجو أن تنقليه الى راس الموضوع ماذا يحدث لو لم يخلق الله غشاء البكارة؟

المسئولية التانية اللى ربنا حطها فى الست بإختصار هى الإنجاب يعنى ممكن لو حد لمسها تخلف من نسله هو وده طبعا كلام فى الخلقة بعيد عن الشرف والأخلاق والتربية والدين.
يعنى خط الدفاع الاجتماعى الأخير اللى ربنا خلقه هو غشاء البكارة والرحم.
ثم تعالى هنا طيب أنا اتجوزت ولا مؤاخذة ما لاقيتش عشاء علشان أبقى راجل كويس وزى الفل وبتاع ربنا أقولها فداكى يا حبيبتى دى كماليات فارغة؟
لا مؤاخذة بقى فى الكلمة ده لو واحد فى الطبيعى من متوسطى الثقافة بل من أكثر المثقفين دراية لقى جرح قديم غائر وفيه تلات غرز فى مكان بعيد عن أعين الناس لزمن دماغه تودى وتجيب ويسأل الجرح ده سببه ايه.حتى لو ماسألش بصوت عالى هايكون السبب تجميل ذاته وحفاظه على مبادئ يدعيها نظام لا أكذب ولمنى أتجمل.فالمفروض ما دام الموضوع بسيط ويتحكى .مراته تفهمه ايه دهوامتى وازاى وليه علشان دماغه ما تفضلش تودى وتجيب ويكره عيشته معاها.
أنا طولت كتيير وبجد مش عاوز أخلص
موضوووع جميل بس الصياغة عليها كومنتات من ناس بيحبوكى فيا ريت تبقى تكتبى ليهم وانت بتكتبى وتحطيهم قدام عنيكى.
انما انتى ما بتجيش ليه؟
ده انتى حتى ليكى وحشة كبيرة.
والمدونة مستنية تعليقاتك
سلمى على شريف وأبوه

سبهللة عالاخر said...

كلامك كله صح
الشرف دة كلمة كبييييييرة اوى وقيمة كبييييييييييرة اوى اوى
لا يمكن قياسها بوجود الغشاء من عدمه
بس ياريت الناس تفهم

فى حديث عن الرسول صلى الله عليه و سلم قال فيه
تنكح المراة لاربع لمالها وجمالها ونسبها ودينها فاظفر بذات الدين تربت يداك
اهو الرسول نفسه ما جابش سيرة الغشاء وعلاقته بالجواز
لانه الواحدة لو عندها دين خلاص اكيد هايكون عندها شرف هو دة المقياس اللى نقيس بيه البنت والولد كمان
لان فيه حديث تانى بيقول
ان جاءكم من ترضون دينه وخلقه فزوجوه ان لم تفعلوا تكن فتنة فى الارض وفساد كبير
وهو دة المقياس اللى نقيس
عليه شرف الراجل دينه وخلقه
بس خلاص
انا قلت كل اللى عندى
تحياتى ليكى وبالتوفيق ان شاء الله

بت خيخة وأى كلام said...

مع اصرارى

بقى الواد لو رميناه فى الشارع مش هيحصلوا اى مصايب
امال المدمنين وقطاعين الطرق والبلطجية والتوربينى دول يبقوا ايه
مش ولاد برضه واترموا فى الشارع


وبعدين مش كل البنات محتاجة حد يأكلها وينيمها
دح حسب طريقة تربية الاهل للبنت
لو الاهل خلوا البنت تعتمد على نفسها مش هتحتاج ان حد يضحك عليها علشان يأكلها وينيمها

بالعكس انا ساعات بحس ان الست يعتمد عليها اكتر من الراجل
ومتزعلش من كلامى ده

بس تعالى نشوف فى اى بيت مصرى
هتلاقى الست بتطبخ وتمسح وتنيم العيال وتنيم الراجل وتكوى الهدوم وتغسلها واحتمال تكون بتشتغل فى وظيفة الصبح
وهى اللى بتنزل تشترى طلبات البيت
وبتدفع فواتير التليفون وتقدم للعيال فى المدارس

وجوزها قاعد مأنتخ فى البيت مش عارف حتى يعمل لنفسه كوباية شاى

لان الراجل الشرقى اتربى انه مايعملش حاجة خالص وان امه اللى تعمله او اخته
ولما اتجوز طبعا بقى مستنى زوجته هى اللى تخدمه


بالنسبة لكلامك ان فكرتى مش محددة وانت معرفتش انا عايزة اقول ايه

انا عايزة اقول
ليس غشاء البكارة هو كل الشرف
هو ممكن يكون رمز للشرف لكن اكيد هو مش كل الشرف
وخصوصا كمان بعد انتشار عمليات الترقيع
اقدر اقول انه مبقاش مضمون انه يكون طبيعى
وممكن جدا يكون مزيف


بالنسبة لسؤالك اللى انت بتطرحه لو ربنا مخلقش غشاء بكارة
انا السؤال ده انا طرحته فعلا فى البوست
يمكن انت مخدتش بالك منه
وانا رديت وقلت
هل ساعتها ان احنا كبنات مش هنحافظ على عفتنا علشان مبقاش عندنا الغشاء ده
علشان كدة قلت ان الشرف لا يمكن يكون محدود فى حتة جلدة
الشرف قيمة ومبدأ وطريقة تفكير

وسؤالى ازاى هاعرف اذا كان الراجل شريف ولا لأ ده مش معناه انى بعترض على خلقة ربنا
ان ربنا خلق البنات بغشاء وخلق الولاد من غير غشاء
انا كنت عايزة ارد الضربة للراجل اللى بقيس شرف البنت بوجود غشاء بكارة
فقلت اسأل الراجل ازاى انا كمان اعرف إذا كنت شريف ولا لأ

اصل انا بعيد عنك عندى داء واحدة بواحدة
اللى يسألنى سؤال أسأله نفس السؤال
يعنى لو حد قالى ربنا خلق الغشاء علشان الراجل يعرف مراته شريفة ولا لأ
اقوم انا اتحفه واقول
طب انا كمان عايزة دليل علشان اعرف اذا كان جوزى شريف ولا لأ
واظن زى ما من حق الراجل ان يتأكد من شرف مراته
من حق الزوجة انها تتأكد من شرف جوزها
ولا ايييييييه؟
وشكرا على متابعتك
ولو كلامى فيه اى حاجة مش مفهومة هاستنى ردك عليا




محمود فرج احمد
من وجهة نظرى انا مش شايفة ان تعليقك فج
بس عادى دى وجهات نظر ممكن انا اتفق معاك
غيرى يختلف معاك


الباحث عن الحقيقة
اممممممممممممم
انا مش عايزة يا معلمى احذف الحتة بتاعة بوز الترابيزة دى
معلش اعذرنى
بس الحتة دى كل ما اقراها من وجهة نظر قارئ مش كاتب اقعد اضحك اوى
يعنى لو ماكنتش انا اللى كتبت الحتة دى وقريتها عند اى حد تانى
كنت سخسخت على روحى من الضحك
وانا لا اقصد بيها
ان تكون طريقة عرضى فجة او مخجلة
ولكن كنت اقصد بيها التريقة وانى اخفف من صدمة الموضوع
يعنى بذمتك انت مضحكتش على حكاية ان بوز الترابيزة يتشمع
ده انا ضحكت ضحك على الحتة دى
معلش بقى يا معلمى مش هاقدر احذفها
تحياتى ليك وهاروح حالا اخد التاج



بنت مصرية
والله هى دى المواضيع اللى عندى
لو انتى عندك مواضيع تانية
اكتبى عنها عندك واهه كلنا نستفيد
اما بالنسبة ان الموضوع ده
وان اللى يتناقش فيه علماء دين او اطباء
الحتة دى انا مش مقتنعة معاكى فيها
لان انا بتكلم عن الشرف كمبدأ
وبتكلم عن مفهوم الشرف من وجهة نظرى انا كأنسانة
اتربت ان الشرف قيمة وطريقة تفكير
واعتقد ان لو جبنا علماء فى الدين او فى الطب
مش هيفدونى بحاجة
لانى مش عايزة رأى دينى او رأى طبى
لانى مازلت مقتنعة ان الشرف مبدأ

والمبادئ
ليست حكر على علماء الدين والاطباء
المبادئ المفروض تكون عند كل الناس وكل الفئات
وشكرا ليكى



نورة الخشن
يعنى تاعبة نفسك ومكلفة نفسك تاكسى رايح وتاكسى جاى وحبر للكيبورد علشان تقولى انك مش عارفة هتروحى فين تانى
من كسوفك من طريقة عرضى
ياسيتى سيبك من طريقة عرضى وقولى رايك فى الفكرة نفسها
قوليلى وجهة نظرك لمفهوم الشرف
شكرا ليكى



نيجرو
طبعا كل واحد حر فى رأيه
بس فكرتك ان ساعات القرطسة ارحم الف مرة
انا مش معاك فى النقطة دى
انا عندى ان البنت لو غلطت وجت تجوز واحد تانى
انا عندى انها تصارح جوزها او خطيبها بدل ماتقرطسه
زى ما قلت ان الشرف عدم خداع
وهى القرطسة ايه غير نوع من انواع الخداع
وانا عن نفسى مابحبش اتقرطس
فبالتالى مش بحب انى اقرطس حد
وانا بتكلم عموما

بس انا لاحظت حاجة ان اغلب الرجالة علشان الستات تعيش معاهم فى سلام لازم نقرطسهم بشكل او بأخر
يعنى هاديلك مثل صغنن
واحدة صاحبتى طبخت صنية بطاطس واستخدمت السمنة
جوزها قالها الله حلوة اوى انتى عملاها بالزيت ولا السمنة قالتله بالسمنة
قلب وشه وساب الاكل وقالها انتى عارفة ان انا مش بحب السمنة

المهم دارت ايام ومرت ايام
والبنت عملت صنية بطاطس بالسمنة برضه
وقالت لجوزها انها استخدمت الزيت
جوزها قعد ياكل وقالها اهى المرة دى طعمها احلى واخف من المرة الى فاتت
يعنى قرطست جوزها وعاشت فى سلام

انا بقى مرة اتطلقت من جوزى علشان رفضت انى اقرطسه واقوله ان الفول بالزيت
وقلتله ان الفول بالسمنة

وعلشان كدة بستغرب اوى
الاقى الراجل من دوول مش عايز مراته تكدب عليه
ولو قالت الصراحة يزعل منها ويقلب وشه
ولو قرطسته او كدبت عليه تعيش فى سلام
انتوا يا رجالة جننتونى
مش عارفة انتوا عايزين ايه
نقرطسكم ولا نصارحكم
هو ماينفعش نصارحكم ونعيش فى سلام برضه

المهم ماعلينا يا نيجرو
انت حر طبعا فى وجهة نظرك
بس انا مازالت عند راى
ان لو فيه قرطسة يبقى مافيش شرف
لأن القرطسة خداع
والخداع عكس الشرف
وشكرا ليك


مازلت فى انتظار اى اراء جديدة
ومتركزوش اوى فى طريقة العرض ركزوا فى الفكرة نفسها

اختكم خيخة

بت خيخة وأى كلام said...

بنت مصرية
معلش وانا بقرا ردى عليكى
حسيت انه كان هجومى
مش عارفة ليه
رغم وانا بكتبه كنت بنطقه وماكنش هجومى كدة
بس بما انك مش هتسمعينى وانا بقوله وهتقريه بس فاممكن جدا يوصلك احساس انه رد هجومى
وانا لا اقصد كدة خالص
فارجوكى ماتزعليش
معرفش الصياغة طلعت ازاى هجومية كدة
اوعى تزعلى انا اسفة

اختك خيخة

واحدة مفروسة said...

ليوه يعني انا مش فاهمه
انتي رديتي على الناس كلها و ما ردتيش عليا انتى قافله تليفونك ليه
...
يكونش البوست اللي قبل ده كان عن حد تاني غيري قابلك
لأ ده انتي خيخه بصحيح

wanna b a physician said...

الاخت نعكشة
كانت بتتكلم عن النوع المطاطى يعنى مش بيتقطع حضرتك وهو ال elastic
ده حقيقة بتحصل كتير ان الراجل يجيب مراته لدكتور او دكتوره يكشفوا عليها بس الحقيقة ان الموضوع لا يقاس بهذة الطريقة لان هو لما اتجوزها اكيد كان عرفها كويس والا يبقى غلط من الاساس
سواء كان كويسه او وحشة
بس هى الناس بتقيس ان دى الاساس يعنى ممكن هو عملت حاجات مع ناس تانية بس ماوصلش للدرجة دى فيقبل ان مراته تكون عملت ده بس مش تقوله ان ماضيها كذا
فى ناس كدا

قوس قزح said...

بصى يا ستى

اولا بالنسبة لعرضك الموضوع بالطريقة دى .. هو ممكن يكون اسلوب جرىء شوية للبنوتات اللى لسه انسات و غالبا هتلاقيهم يهربوا و ميردوش عليكى :)

ثانيا بالنسبة للشرف

لازم نفرق بين الشرف بتاع الاخلاق و المبادىء ، و شرف الجسد بتاع غشاءة البكارة
و الشرفين فى زمننا ده صعب اثبتهم ،
و ان كان بالنسبة لشرف الجسد مش بس غشاء البكارة هو المقياس للرجل فى حاجات تانية يقدر الرجل منها يعرف زوجته شريفة ولا لا

و هنا لازم نرجع لقول الله تعالى الطيبين للطيبات ، يعنى لو انا انسان متقى لربنا و مستقيم و شريف و متوكل على الله يبقى لازم اكون متاكد ان ربنا هيدينى الخير و يرزقنى بالزوجة الصالحة

بالنسبة للقرطسة بقى .. لو واحدة غلطت مرة و ندمت و تابت و عملت العملية تصارح جوزها ولا لا ؟؟ طبعا لا لييييه لان ربنا سترها و ممكن يكون قبل توبتها و ربنا لا يحب المجاهرين ..فهى ليه تفضح نفسها ده الرسول عليه افضل الصلاة قال : من ستر مسلم فى الدنيا ستره الله يوم القيامة ، يبقى مش هى اولى انها تستر على نفسها ؟؟
اما عن صينية البطاطس و الفول ده يدخل تحت بند الكدب ، يعنى لو الزوج سأل لازم وقتها تقول الحق لكن لو ربنا عماه و ستر عليها تسكت

و احب اقول لك واحد بيدور على شرف الجسد و مش مهم له شرف الاخلاق .. ان اللى بيتنازل عن شرف اخلاقه سهل اوى تحت اى ضغوط يتنازل عن شرف جسده


سؤال بقى يا خيخة .. ازاى بوز ترابيزة السفرة !! هى بتنط حواجز ولا ايه ؟؟ :)

سلام

Wael said...

السلام عليكم

بوست معناه مفهوم جدا وكويس
انما الغاية لا تبرر الوسيلة

وكان ممكن جدا المعنى يوصل بالفاظ اقل اباحية
بشكل عام , لا احب ان تكون السخرية - فضلا عن الالفاظ الغير لائقة - هى الطريقة الوحيده للتعبير عن الاراء الجاده .

واخيرا : غشاء البكارة شئ ضرورى لاثبات عفة البنت , واى حادثة تؤدى الى فض هذا الغشاء ببساطة يمكن عمل تقرير طبى لها بواسطة طبيب ثقة .

وهذا لا يعترض ابدا مع ان الشرف هو مسالة مبادئ ومثل عليا نؤمن بها وليس مجرد غشاء . فقط هى نظرة فلسفيه شخصيه ,انما لا يجب ان تفرضها المرأة على العريس .

مجرد خواطر said...
This comment has been removed by the author.
بت خيخة وأى كلام said...

قوس قزح

بوز الترابيزة ده مثل مجازى
تقدر تعتبريها حتة تريقة من عندى

بالنسبة للكدب والقرطسة والخيانة بأنواعها
انا شايفة ان كل الحاجات دى
كلها تدخل تحت بند الخداع

زى ما الشرف عندى عبارة عن مجموعة مفاهيم
زى الامانة والصراحة والاخلاص

الخداع كمان له اشكال كتير اوى

وجهة نظرك ان البنت لو غلطت وعملت عملية
تحت بند ان الله لا يحب المجاهرين
وجهة نظر تدعو للتفكير فعلا

وتفتح مجال تانى للنقاش
وياريت الكل يقولى رأيه فى النقطة دى

هل البنت لو غلطت تصارح خطيبها علشان متقرطسهوش
ولا تعمل عملية وتستر نفسها تحت بند ان الله لا يحب المجاهرين
ياريت بجد اسمع وجهة نظركم فى النقطة دى

والف شكر ليكى يا دودو

اختكم خيخة

بت خيخة وأى كلام said...

وائل
فين الالفاظ الاباحية اللى فى البوست ده؟

بت خيخة وأى كلام said...

وائل
لو جيت خطبت واحدة وقدمتلك تقرير طبى انها فقدت عذريتها علشان عربية خبطتها
هل هتاخد بالتقرير ده وتصدقه وتثق فيه وهتكمل الجوازة؟

enjy said...

اساسا اساسا مش من حق حد ايا كان يقيس شرف حد تانى ايا كان بعيدا عن التدين و كلام ربنا مش من حق اى كائن حى يحكم على اى كائن حى غيره عشان ما ندخلش فى الحتةبتاعة طب وانت؟؟؟؟
وللا اييييييييييييييييه

Wael said...

الالفاظ الغير لائقة : ليس معناها سبابة او شتيمة , مجرد التعريض بالالفاظ الخاصة مثل " الغشاء " والفرقعة وما الى ذلك بشكل مبالغ فيه ومكرر على الملأ هكذا , كل ذلك يجعل الالفاظ غير لائقة , هذا ما كنت اقصده .

ستندهشين عندما تعلمين ان معظم الكلمات الجنسية هى فى الحقيقة الفاظ عربية فصحى , وموجودة بجميع المعاجم اللغوية , لكنها مع ذلك لا تستخدم , فقط للياقة وعدم افساد الذوق العام

--------

ايوة طبعا هاوافق على التقرير

صبرني يارب said...

خيخه هو ده املي فيكى تصدقى يا بت انت اجدع مني

مع انك خيخه واي كلام بس اجدع مني والله لحد الان فى مواضيع كتيره انا عايزه اتكلم فيها من هذا الجانب المظلم من الحياه الانسانيه بس متوجسه خيفه من هذا الامر .

المهم

بالنسبه للموضوعا لى انتى اتكلمتى فيه

اعترض اعتراض صارخ على تفسير غشاء البكاره والحكمه من وجوده على انه لمجرد قياس شرف المرأه .

اطلاااااااااقا والا يبقى المرأه الثيب (التى سبق لهاالزواج ) لا شرف لها بقى
لا طبعا اعترض

انا شايفه انه له اكيد حكمه من خلقه يمكن احنا ما نعرفهاش تحديدا .

لكن اقولك لما فكرت فى الموضوع قلت ممكن يكون ليه .

اولا لان البنت وهى صغيره بتكون ضعيفه وده بيكون مثابة حمايه للمكان ده بحيث انه مش بسهوله انه ينفض ويحصل جماع كامل .
والى خلانى افكر كده انه بيبدأ فى التكوين فى عمر 3 سنين تقريبا وبيكون رقيق جدا جدا وكل ما تتقدم فى السن (تبقى بنت يعنى بصحيح) الغشاء ده بيكون اقوى .

وكمان فىحاجه مهمه احنا عندنا مثلا فى الشرع حاجات كتير بتتوقف على كون المرأه بكر ولا ثيب .
زي حد الزنا مثلا او شروط صحة الزواج عند بعض الائمه .

ده غير انه سلاح براءه اكيد فى صالح البنت المحترمه اذا ما الصقت بها التهم مثلاااا ولو انه مش مقياس برضه

وبرضه يا خيخه لازم نفرق بين مقدمات الجماع والجماع نفسه

الفرق كبير . صحيح الاثنين حرام .
لكن الجماع الكامل هو بس الى يعد زنا ويوجب الحد .

مش معناه انها تمشي ولا يمشي يبوس ويحضن على كيفه لا طبعا


اما بقى حكاية مقياس الشرف دي انا مش مقتنعه ابدا به ولا هو ده حكمة المولى من وجود غشاء البكاره .


ودائما وابدا هاقول لو كان مصرح للرجل بالخطيئه ولو كان ما يعبوش حاجه .
كان يبقى حد الزنا يقام على الست بسسسسسسسسس او يكون فى تفاوت

الجريمه دي مشتركه متساوية الاطراف فى قدر الجرم


وانا ضد عمليات الترقيع تماما حتى لو كانت بسبب اغتصاب او حادثه

لان انتشاره خلى في قلق فى نفس الشباب اكتر من اللازم .
طبعا الشباب ا لاهبل بس
انما الشباب العاقل لسه بعقله الحمد لله .
ولازم المغتصبه والىحصل لها حادثه المجتمع المريض ده يتعلم انه يرحمها

ومش عشان المجتمع عقله تعبان وبيشك فى صوابع اديه يبقى احنا نخلق روح من التدليس تسود باقي الناس وتضرب نفسية البشر .

واخيرا يا ست خيخه مش ممكن بوز ترابيزه يفض غشاء البكاره الحكايه مش مولد .

لكن طبعا فضه فى حوادث خصوصا للاعبي الرياضه وارد جدا .

وشكرا يا خوخه على البوست الجميل اوي

مع اصرارى said...

ايش حال انى رغاى اصلا وانتى فتحالى موضوع كله رغى
وعلى كل
نرجع للتعليق بتاعى صفحة خمسة وعشرين السطر السبعين هتلاقينى بأقول "بالذات لما تكون ضايعة ومش متربية كويس"
ونتمشى لغاية صفحة إربعين على هتلاقينى بأقول بالنص كدة "وده طبعا كلام فى الخلقة بعيد عن الشرف والأخلاق والتربية والدين.
يعنى خط الدفاع الاجتماعى الأخير اللىربنا خلقه هو غشاء البكارة والرحم" ولو وصلتى صفحة اتنين وتمانين هتلاقى الكلام " وكمان يخوف حبيب القلب عشيقها لو هى وصلت لا قدر الله لسن الضياع 60 سنة وانت طالع"
طيب أنا متعود أتباسط فى المدونة بتاعتك والواحد بياخد راحته فى بيت اخته أكتر من بيت أخوه.
تقومى تاخدى الكلام بحزازية.
ده احنا حتى بنشكر فى خفة دمك وظرفك وبنحب نهزر معاكى تقومى تتقمصى وتقرى الموضوع وكأنه هجوم عليكى طب إيه زمب البنت المصرية الغلبانة.يا ريت يا خوخ تقري التعليق تانى وتحطى فى إعتبارك لغة الدعابة مش نبرة التحدى هتلاقينى بأقول كلام كويس وهتلاقى أفكار ممكن تاخدى وتدى معاها مش مجرد هجووووووووووم.
أنا كل قصدى إننا لو جنبنا كل الأخلاق والدين والأنثروبولجى وبقينا همل هنلاقى اننا بنتصرف بالفطرة يعنى لو الواد خرج هايشم طب مايشم ولا يغور فى داهية وأنا مالى مدام قادر يشيل هم نفسه هو حر آخرته رصاصة بقرش لكن البت وقعة طين هاتخرج مع الواد وما تنسيش إن احنا همل الواد هايشيلها على كفوف الراحة ويجيبلها كلتها لغاية عندها وتشم زى ما هى عاوزة.وهايبقوا عاملين زى كلاب الحوارى آخر الليل اللى يقدر على بت ياخدها وهايخلفوا عيال ولاد حرام مأصلين وبكدة هاتبقى فيه قبائل الهوهو اللى خارجة من البنى آدمين الفرز. لكن حكمة ربنا إنه خلق غشاء البكارة وكرم بيه المرأة تكريم خاص فطرى علشان أبوها يخاف عليها مهما كان ضلاله وأمها تشمشم حواليها.والبت نفسها تخاف على نفسها حتى لو عرفت تلعب بديلها. لكن مش معنى كدة ان مافيش بعد كدة كلام لأ بوز الترابيزة والعجلة فيه بلاء من ربك عظيم ربنا يعافينا.لأنه اصابة خطيرة فى الفطرة والفطرة اكتر حاجة توجع.ربنا يحفظ بناتنا.المجتمع محتاج غشاء البكارة فعلا علشان عامل جوة الناس هاجس مخلينا نخاف ع البت اكتر من الواد لو ما خفناش ع البت اكتر من الواد هايبقوا الاتنين برة مع بعض ودى مصيبة سودة هاتهد المجتمع كله وربنا اللى يعلم

مع اصرارى said...

خووووخ ان جيت تانى نيهاهاهاها"ضحكة عسقلانية مقتبسة"
ممكن لو سمحتى أجاوب ع السؤال ببساطة كدة.لو ربنا ما خلقشى غشاء البكارة كانت هاتبقى البنت زى الولد ماهيش كمالة عدد وكنا هانسيبهم يلعبو مع بعض ويسهروا فى الحارة للساعة اتنين بالليل.والنتيجة انهم كانوا لا مؤاخذة هايجربوا بعض فى خبرات تانية.يعنى ما كناش هانفكر نبعدهم عن بعض ولا نربيهم الولاد يلعبوا سوا والبنات يلعبوا سوا.فيه حاجز خوف كبيير اتزال مابقاش فى تفكيرنا أصلا لأنه ما إتخلقش من أساسه.مش موجود فى هذا الوجود متخيلة معايا. وطبعا فى الحالة دى كنتى هتلاقى بنات بتجاهر بالمعصية وفرحانة بأنها لعبت الدنيئة مع فلان وفلان . وأبوها لو عرف كان هايضربها زى أخوها مش أكتر لأن الحكاية مش فارقة معاه ده لأنه راجل غير كامل القيم وماحدش كامل القيم أصلا بس فيه نسبة وتناسب وكان البنات المؤدبين مش هايصاحبوها ودول كانوا هايبقوا قليلين فى الزمن اللى فات وفى الزمن ده عددهم زى عدد الولاد اللى متربيين ويمكن أقل كمان.لكن كنا هانبتدى نخاف على غفلة ع البت فى سن الإنجاب لحسن نتفاجئ بيها فى الشهر التالت ولا الرابع فبرده كان هايبقى فيه خوف.أما الغشاء الصناعى وحبوب الإجهاض ففتن كقطع الليل المظلم. أما حوادث فض الغشاء عفويا ففى ذلك بلاء من ربك عظيم وربنا يعين أهالى المصابين ويرزقهم باللى يشيل معاهم البلوى.يا رب يا خوخ تونى فهمتى قصدى ولو ظلمتينى تانى هاقول عليكى ظالمة وهاقلبها ضلمة.
ماشى يا نور
باى باى

بت خيخة وأى كلام said...

مع اصرارى

بص ياسيدى
تعالى نفند كلامك واحدة واحدة علشان انا كدة تهت منك
اولا
الواد لو شم هو حر اخرته رصاصة بقرش

اوك انا متفقة معاك فى كدة

لكن البنت وقعة طين
ليه يا مصطفى واقعة طين؟
ماهو احنا لو خلصنا عليها برصاصة بقرش برضه
يبقى مافيش واقعة طين ولا حاجة

يعنى اشمعنى الواد اللى هنخلص عليه برصاصة والبت اللى هنقعد نتعذب بوجودها
انا من رأى ان احنا نخلص عليهم هما الاتنين برصاصة واحدة ونوفر قرش

باقى الكلام اللى فى التعليق الاول
تمام التمام ويعدى ومعنديش اى اعتراض عليه
نيجى للتعليق التانى
اولا انا اعترض اساسا ان الاهالى يربوا فى عيالهم العنصرية
وهى ان الولد عادى يسهر على القهاوى لحد وش الفجر والبنت اخرها الساعة تمانية المغرب
لو الاهالى تمنع خروج اولادها بعد صلاة العشا مثلا
كنت هتلاقى حاجات كتير اتغيرت فى المجتمع
فبالتالى نقطة اننا هنلاقى البنات سهرانة مع الولاد لحد الساعة اتنين
دى بتعود على تربية الاهالى
وعلى فكرة فيه دلوقتى اساسا بنات بتسهر لحد الساعة اتنين وتلاتة وخمسة الفجر
ابقى انزل شارع الهرم واقف قدام اى ديسكوتيك
وهتلاقى البنات اللى انا بقولك عليهم
يعنى موضوع السهر ده مالهوش دعوة بوجود غشاء من عدمه
زى ماقلتلك الرك على تربية الاهل

حتة ان لو ماكنش فيه غشاء ماكناش هنربيهم على ان البنات تلعب لوحدها والولاد تلعب لوحدها
وان حاجز الخوف هيتشال

برضه مش معاك فيها
والرك على التربية
بص يا مصطفى
انا معرفش بوجود غشاء البكارة ده الا وانا فى ثانوى يعنى كنت شحطة مش عيلة بضفاير
ومع ذلك افتكر وانا صغيرة وكنا بنلعب مع ولاد الجيران
كان فيه حاجة كدة بتخلينى ملعبش لوحدى مع الولاد لوحدهم لازم نكون كلنا مع بعض
ولاد وبنات
وماينفعش واحد وواحدة يستخبوا مع بعض مثلا فى مكان واحد وقت لعب الاستغماية
وساعتها ولا كنت اعرف حكاية الغشاء دى ولا اى حاجة
ومننا لنفسنا كدة احنا بنات العمارة لما عدينا مرحلة الابتدائى تقريبا حسينا ان احنا كبرنا ومايصحش نلعب مع الولاد
مش علشان عيب
لااااااااا ساعتها ماكناش بنحسبها كدة
بس الفكرة ان احنا كان لعبنا اختلف عن لعبهم
احنا بقينا عايزين نلعب بالعرايس ولعبة المطبخ ونروح نشترى شكولاتة وايس كريم ونقعد نتكلم مع بعض ونفرج بعض الفستان الجديد والحلق الجديد والحركات بتاعة البنات دى
والولاد ساعتها عايزين يلعبوا كورة ويروحوا سينما ومابقوش بياكلوا حاجات حلوة وشايفين ان دى حاجات عيالى وبتاعة بنات
وبالتالى كل فريق بقى لوحده فريق البنات ليهم اهتمامات تانية وفريق الولاد ليهم اهتمامات تانية
وقتها منفصلناش عن بعض علشان خايفين على غشائنا لاننا تقريبا كلنا ماكناش نعرف حاجة اسمها كدة
وبالتالى منفصلناش علشان عندنا حاجز الخوف اللى انت بتقول عليه
احنا انفصلنا بسبب اننا وقتها حسينا ان احنا كبرنا على لعب الاستغماية والقطة العامية
وقتها انفصلنا لاننا حسينا من منطلق غرور بناتى بحت ان الاولاد دول حاجة يع واحنا حاجة فلة
هما ريحتهم عرق والتراب مبهدلهم بسبب لعبهم الكورة
واحنا مستحميين وريحتنا شامبو وشعرنا متسرح وهدومنا نضيفة
يبقى مايصحش ننزل من مستوانا لمستواهم ونلعب معاهم
يعنى مش خوفا منهم علينا
هو ده اللى خلانا نبعد عنهم
يمكن اهالينا ربوا كدة واحنا مش واخدين بالنا
يمكن ربوا فينا المبادئ دى ان مايصحش الولاد والبنات يكونوا مع بعضهم فى سن معين وانهم خلاص كبروا
بس زرعوها فينا بشويش و واحدة واحدة من غير ما نحس انهم فجاءة
بيمنعونا عن اللعب مع جيراننا
يمكن زى ما انت بتقول كانوا اهلينا عندهم الهاجس ده والخوف على عذريتنا بس من غير ما ينقلوا خوفهم ده لينا
ويمكن كانوا مش خايفين خالص لان الاخلاق وقتها كانت موجودة
وبنت جارتى زى بنتى اخاف عليها

يمكن الهاجس ده بقى موجود الايام دى بس بعد انتشار حوادث الاغتصاب وزنا المحارم واب يغتصب بناته وولاده

معرفش انا حاسة انى رغيت كتير واحتمال اكون خرجت برة الموضوع

المهم ربنا يستر على عيالنا وعلى ولايانا
امممممممممممممممم
تقريبا باقى كلامك
معنديش عليه رد
هاروح بقى اشوف تعليقك على البوست التانى
وافصصه وارد عليك

خيخة

محمد الهادى غانم said...

متؤليش عليا رجعي وتخلف وبتاع وكده وإخيييييييي
علي فكرة فعلا موضوع غشاء البكارة علي ايامنا وبمكن لسة اليومين دول بيخلي البنت بتاخ علي نفسها فعلا اي نعم ان اوروبا البنت اللي عندها غشاء بكارة بيقولوا عليها متخلفه ازاي مكنلهاش تجارب سيكو سيكو قبل كده
بس فعلا احنا في الشرق الموضوع ده عندنا مهم حتي من الناحية النفسية للراجل انه ماأكلش علي قفاه يضحك عليه ماشي انما غير كده لاااااااا
واديكي شايفة اليومين دول الستات الهبله بتروح في عيد جوازها للدكتور وتقولوا خليني بنت عشان ارجع انا وجوزي نفتكر ايام زمان
وانتي تحمدي ربنا ان احنا متعلمين وعندنا مخ شوية
غيرك في الصعيد بيخدوا معاهم العيلة عشان يشوفوا ترطشة الدم والدبيحه بتدبح يوم دخلتها عيني عينك والراجل بيسن السكينه وبسم الله والله اكبر ويقوم دابح الغشاء اقدام الناس كلها
وربنا يستر علينا ويجعله عامر
ده اسم مدونه ليه لسه بادئة ياريت تقريها سلام

Zika said...

امممممم
بصي انا اول مره ادخل المدونه
وعمال ادعبس في المواضيع القديمه كعادتي لما بدخل مدونه جديده
بس انا قلت ده اجمد موضوع اسيب بصمتي فيه
:)
المهم
الحقيقه
انا مش عراف اقول ايه
فعلا كل حاجه كتبتيها عندك حق فيها
وكمان السؤال الاخراني ده مالوش اجابه
ومدام مفيش حاجه جديده اقولها وانا مش بحب الفتي
الموضوع كله كامل
تحياتي للمدونة الرائعه
وليكي
سلام

أبو البنات said...

يخيل إلى إن حل هذه المواضيع لا يكون بهذه الطريقه

بنت مصريه said...

متتاسفيش يا قمر انا مش زعلانه

Dr.Hammood said...

اظن انك قلتي كل اللي ممكن يتقال

حقيقي الشرف مش بجلده ابدا

لان دا يدي للراجل امتياز عن المرأه

وانا عن نفسي ما دمت على ما انا عليه

ف اكيد الطيبون للطيبات

والخبيثون للخبيثات

محمد رضا

Diyaa' said...

أظن إن الأنثي كمان بتحب اللي يقرطسها بس كل واحد بيشوف الموضوع من الركن اللي قاعد فيه أو من الكرسي بتاعه في قطر الحياة..مش بكل الزوايا..يعني مثلاً لو الزوجة مش حلوة وهو حسسها إنها حلوة هتصدق وهتتبسط..لو كان صريح هتزعل وتبدأ تشك فيه

بالنسبة لموضوع متفق مع مقصدك بس السخرية المبالغ فيها دي صادمة شوية
يعني الموضوع مش حياة أو موت عشان تخففيه بالسخرية اللاذعة دي
ما علينا

بتقولي الست يعتمد عليها وامرأة عاملة وبتاع..بذمتك المجتمع عديم الرباية اللي إحنا فيه ده بدأ امتي ؟
بمعني..
لما العيال بتنجح عشان تنسي..يجيب مجموع عشان يخش كلية وبس..يلبس عشان يعجب البنات والعكس..يستمد رجولته من سيجارة وتستمد أنوثتها من طقم جسمها هينط من الكتمة جواه
المخدرات وإنتشارها الرهيب..والبورنو في الطبقة المتوسطة علي الكمبيوترات والفيديو
الكدب والمظهرية والعادات الأستهلاكية المنتشرة كالنار في الهشيم..التشرد والعته اللي بيزيد انتشاره جيل بعد جيل
الجواز العرفي والبحث عن الحب علي النت..ولو إن الحب في حد ذاته قد يتحقق لكن بدون بحث ودي الغلطة
هممم إيه تاني..الأنبهار بتامر حسني ورشدي أباظة وشاكيرا وهيفاء وهبي والأمثلة اللي تقلب البطن دي
معلش..بذمتك ده جيل ندخل بيه منافسة مع مين من الدول ؟
السبب تراجع دور الأم بشكل كبير..والأم معلش دورها أكبر من الأب جوه البيت مش كماً ..لأ كيفاً...حنية وعطف عمر ما الأب هيدي نصهم..والأم مشغولة ومستهلكة وموهومة بطموحات الترقية والنميمة والشوبينج ومش ليها هواية فعلية تقضي بيها وقت فراغها وبتفيد المجتمع
الراجل عليه دور بس الأكتر علي الأم لأن فطرتها كأم أقوي من إنها تتمسح عكس الراجل اللي بيخرج ويروح وييجي من صغره ومجبر علي كده لأنه مش هييجي يتقدم لحضرتك من غير ما يكون جاهز
لو الراجل زي الست يبقي نلغي المهر واللي يعجبها واحد تتقدمله ويقضوها إنجليزي ..أكيد لكل حد دور وتشتيت الأنثي لنفسها بين العمل واللي أغلبه غر مجدي ومجرد إثبات وهمي للذات وطموحات قصيرة النظر..وبين الأسرة اللي لو جابت مليون دادة مش هيقوموا بدورها صح

خلصت وأسف للإطالة وللتشعب بس أسلوبك بيفتح باب النقاش ودي ميزة مش هتلومي نفسك عليها :)
تحياتي

Diyaa' said...

أخجلتيني بردك :)
بالمناسبة مالها أكتوبر ؟ لعينة ليه ؟ لو معاكي عربية تبقي مكان تحفة مقارنة بالعك المروري في كايرو والتلوث وإنعدام الخضرة والأمن المركزي والحبيبة اللي مبوظين منظر الكورنيش :(
أكتوبر فيها عيوب بس أنا بقالي 15 سنة منفي فيها ومقارنة بكايرو أو اسكندرية..علي الأقل لو شغلي فيها مش هضيع ساعتين رايح جاي في مشاور مش بياخد ربع ساعة
:))

forallah89 said...

مع اصرارى

كلامك استفزنى جدا وخصوصا كلمة "فداكى دى كماليات"
لو انت خطبت واحدة ولقيتها بتراعى ربنا فى كل تصرفتها صلاتها وصيامها ولبسها وتعاملها معاك بحدود قبل غيرك وحرصها على القرآن والتزامها بتعاليم دينها فى اكلها وشربها وخرجها وحركتها ومعاملاتها مع الناس وبرها لابوها وامها و.. و.. و.. كل حاجة الدين بيقولنا عليها
رد فعلك هيبقى ايه لو ملقتهاش بكرتونتها؟؟؟
ورد فعلك هيبقى ايه لو رحت معاها للدكتور وقالك ان كرتونتها من النوع المطاطى ؟؟؟
يبقى الاصل فى الاشياء اننا بنختار الزوجة غلط بنختار بمقاييس مختلفة غير الى ربنا امرنا بيها "الدين" مقاييس تخلينا نشك فى نفسنا قبل غيرنا

جاوب على سؤالى

users online