أول ما دخلت عالم التدوين
لما كنت بدعبس فى باقى المدونات
كنت لمحت اكتر من مرة
جملة كلنا ليلى
ووقتها ما فهمتش ايه كلنا مع ليلى دى
افتكرت ساعتها ان دى مدونة اسمها ليلى
وحصلها موقف وحش والمدونين متضامنين معاها
لحد من أسبوع تقريبا كنت عند لماضة فى مدونتها
ولاقيتها حاطة صورة ومكتوب عليها كلنا ليلى
وفيه لينك مع الصورة
لما عملت عليه كليك فتحتلى صفحة فيها لينكات كتيرة جدا
وشرح لفكرة كلنا ليلى أو مع ليلى
وفهمت انها عن قهر المرأة فى المجتمع الشرقى
واللينكات الموجودة عبارة عن مشاركات للمدونات
وكل واحدة تقريبا بتكتب عن وجهة نظرها فى قهر المرأة
المهم إن النهاردة الصبح بفتح الايميلات بتاعتى
لاقيت ايميل من مجموعة كلنا ليلي
عرض عليا إنى اشترك معاهم فى الفكرة
وهى إن كل المدونات تكتب بوست
يوم 19 اكتوبر
عن وجهة نظرها فى قهر المرأة والمساواة الحقيقية
إذا كان عن طريق تجربة شخصية أو تجربة سمعت عنها
ونظرا لأنى كاتبة عنوان البوست
أنا مش ليلى
لذلك أنا هاكتب عن وجهة نظري فى الموضوع ده النهاردة
ومش هاستنى لحد يوم 19 اكتوبر
أصل أنا بصراحة مش ضامنة عمري لحد 19 اكتوبر
المهم ندخل فى الموضوع
أيوة أنا مش ليلى
وعمرى ما حسيت إني كنت ليلي فى يوم من الأيام
عمري ما حسيت إني مقهورة بشكل من الأشكال
خوف اهلي عليا
كان مساوي لخوفهم على اخويا الولد
مش فاكرة إن أخويا كان ليه امتيازات اكتر مني
ولا أفتكر يوم إن أخويا أمرني مثلا إني أعمله خدمة من منطلق
إنه راجل و أنا بنت ولازم أخدمه
مش فاكرة إن أهلي منعوني من الخروج مع أصحابي بحجة إني بنت
تعليمي أنا اللى اخترته
جوزي أنا الي اخترته
حتى لما سواق التاكسي إبن التيييييييييت قلع بنطلونه
أنا ماحستش إنى مقهورة
أنا كنت مخضوضة بصراحة لكن ماكنتش مقهورة
يمكن المرة الوحيدة اللى حسيت فيها إني مقهورة
لما ماما غصبت عليا وأنا في أولى ثانوي ألبس الحجاب
بس هل تعتقدوا إنى عدتهلها كدة؟
أبدا وحياتكم
وأنا فى تانية جامعة قلعت الحجاب
ومالبستش الحجاب إلا بعد الجواز لما أنا قررت إني ألبسه
أنا مش ليلى
بدليل
إن صاحبتى وإحنا فى ثانوي لما عرفت إني بقرا أشعار نزار قباني
إستغربت جدا إزاي أهلي سمحولي إني أقرا الأشعار دي
أنا مش ليلى
بدليل إني أقدر أتكلم مع أهلي ومع أى حد
فى الثالوث المحرم
الدين _ الجنس _ السياسة
ومعنديش مبدأ إن الكلام فى المواضيع دى
عيب وحرام ومايصحش بنت تتكلم فيهم
أنا مش ليلى
بدليل كدة
أنا: هاني أنا رايحة بكرة معرض الكتاب مع ناريمان وبابلو
هاني : أوففففففففففف نفسي مرة تستأذينيني مش تبلغيني خبر
أنا : وأستأذنك ليه؟ طالما أنا عايزة أروح يبقى إيه لزوم الإستإذان
هانى: صمت رهييييييييييييب
أنا مش ليلى
بدليل
حصولي فى ثانوي على لقب ريتشارد قلب الأسد
أنا مش ليلى
بدليل وجود المدونة دي بما تحتويه على مواضيع بجحة
أنا مش ليلى
بدليل إصراري وقت طلاقي من هاني
إني هاقعد لوحدي فى الشقة ومش هاقعد مع أهلي
انا مش ليلى
بدليل احساسي الداخلي
بأمنية ماما وهاني إنهم يشفوني في يوم وأنا ليلى
أيوة يا جماعة
أنا مش ليلى
ولا عمري حسيت بالقهر اللى حست بيه ليلى
والمساواة الحقيقية اللى بحلم بيها
هي إني مش عايزةالست تكون زي الراجل
أنا عايزة الراجل هو اللى يكون زي الست
بمعنى
انا مش عايزة البنت تاخد مصروف كبير من اهلها
لكن عايزة الولد ياخد مصروف أد أخته
أنا مش عايزة البنت تسهر لحد الساعة تلاتة الفجر فى الشارع
لكن عايزة الراجل هو اللى يكون أخره لحد الساعة عشرة فى الشارع
أنا مش عايزة البنت تشرب سجاير أو شيشة
لكن عايزة الراجل هو اللى يبطل تدخين
أنا مش عايزة البنت يكون ليها علاقات مع شباب كتير
لكن عايزة الراجل هو اللى يرتبط بإنسانة واحدة بس
أنا مش عايزة الست تخون جوزها
لكن عايزة الراجل يخلص لمراته
أنا مش عايزة الست تضرب جوزها
لكن عايزة الراجل مايمدش إيده على مراته
انا مش عايزة الست تهمل فى نفسها
لكن عايزة الراجل يهتم بنفسه
أنا مش عايزة الست تخنصر من فلوس جوزها
لكن عايزة الراجل مايخبيش على مراته هو بيقبض كام بالظبط
انا مش عايزة الست تقعد حاطة رجل على رجل
وماتعملش حاجة فى بيتها
لكن عايزة الراجل يغسل طبقه بعد ما ياكل
انا مش عايزة الست تسترجل
لكن عايزة الراجل يكون راجل بجد
لما كنت بدعبس فى باقى المدونات
كنت لمحت اكتر من مرة
جملة كلنا ليلى
ووقتها ما فهمتش ايه كلنا مع ليلى دى
افتكرت ساعتها ان دى مدونة اسمها ليلى
وحصلها موقف وحش والمدونين متضامنين معاها
لحد من أسبوع تقريبا كنت عند لماضة فى مدونتها
ولاقيتها حاطة صورة ومكتوب عليها كلنا ليلى
وفيه لينك مع الصورة
لما عملت عليه كليك فتحتلى صفحة فيها لينكات كتيرة جدا
وشرح لفكرة كلنا ليلى أو مع ليلى
وفهمت انها عن قهر المرأة فى المجتمع الشرقى
واللينكات الموجودة عبارة عن مشاركات للمدونات
وكل واحدة تقريبا بتكتب عن وجهة نظرها فى قهر المرأة
المهم إن النهاردة الصبح بفتح الايميلات بتاعتى
لاقيت ايميل من مجموعة كلنا ليلي
عرض عليا إنى اشترك معاهم فى الفكرة
وهى إن كل المدونات تكتب بوست
يوم 19 اكتوبر
عن وجهة نظرها فى قهر المرأة والمساواة الحقيقية
إذا كان عن طريق تجربة شخصية أو تجربة سمعت عنها
ونظرا لأنى كاتبة عنوان البوست
أنا مش ليلى
لذلك أنا هاكتب عن وجهة نظري فى الموضوع ده النهاردة
ومش هاستنى لحد يوم 19 اكتوبر
أصل أنا بصراحة مش ضامنة عمري لحد 19 اكتوبر
المهم ندخل فى الموضوع
أيوة أنا مش ليلى
وعمرى ما حسيت إني كنت ليلي فى يوم من الأيام
عمري ما حسيت إني مقهورة بشكل من الأشكال
خوف اهلي عليا
كان مساوي لخوفهم على اخويا الولد
مش فاكرة إن أخويا كان ليه امتيازات اكتر مني
ولا أفتكر يوم إن أخويا أمرني مثلا إني أعمله خدمة من منطلق
إنه راجل و أنا بنت ولازم أخدمه
مش فاكرة إن أهلي منعوني من الخروج مع أصحابي بحجة إني بنت
تعليمي أنا اللى اخترته
جوزي أنا الي اخترته
حتى لما سواق التاكسي إبن التيييييييييت قلع بنطلونه
أنا ماحستش إنى مقهورة
أنا كنت مخضوضة بصراحة لكن ماكنتش مقهورة
يمكن المرة الوحيدة اللى حسيت فيها إني مقهورة
لما ماما غصبت عليا وأنا في أولى ثانوي ألبس الحجاب
بس هل تعتقدوا إنى عدتهلها كدة؟
أبدا وحياتكم
وأنا فى تانية جامعة قلعت الحجاب
ومالبستش الحجاب إلا بعد الجواز لما أنا قررت إني ألبسه
أنا مش ليلى
بدليل
إن صاحبتى وإحنا فى ثانوي لما عرفت إني بقرا أشعار نزار قباني
إستغربت جدا إزاي أهلي سمحولي إني أقرا الأشعار دي
أنا مش ليلى
بدليل إني أقدر أتكلم مع أهلي ومع أى حد
فى الثالوث المحرم
الدين _ الجنس _ السياسة
ومعنديش مبدأ إن الكلام فى المواضيع دى
عيب وحرام ومايصحش بنت تتكلم فيهم
أنا مش ليلى
بدليل كدة
أنا: هاني أنا رايحة بكرة معرض الكتاب مع ناريمان وبابلو
هاني : أوففففففففففف نفسي مرة تستأذينيني مش تبلغيني خبر
أنا : وأستأذنك ليه؟ طالما أنا عايزة أروح يبقى إيه لزوم الإستإذان
هانى: صمت رهييييييييييييب
أنا مش ليلى
بدليل
حصولي فى ثانوي على لقب ريتشارد قلب الأسد
أنا مش ليلى
بدليل وجود المدونة دي بما تحتويه على مواضيع بجحة
أنا مش ليلى
بدليل إصراري وقت طلاقي من هاني
إني هاقعد لوحدي فى الشقة ومش هاقعد مع أهلي
انا مش ليلى
بدليل احساسي الداخلي
بأمنية ماما وهاني إنهم يشفوني في يوم وأنا ليلى
أيوة يا جماعة
أنا مش ليلى
ولا عمري حسيت بالقهر اللى حست بيه ليلى
والمساواة الحقيقية اللى بحلم بيها
هي إني مش عايزةالست تكون زي الراجل
أنا عايزة الراجل هو اللى يكون زي الست
بمعنى
انا مش عايزة البنت تاخد مصروف كبير من اهلها
لكن عايزة الولد ياخد مصروف أد أخته
أنا مش عايزة البنت تسهر لحد الساعة تلاتة الفجر فى الشارع
لكن عايزة الراجل هو اللى يكون أخره لحد الساعة عشرة فى الشارع
أنا مش عايزة البنت تشرب سجاير أو شيشة
لكن عايزة الراجل هو اللى يبطل تدخين
أنا مش عايزة البنت يكون ليها علاقات مع شباب كتير
لكن عايزة الراجل هو اللى يرتبط بإنسانة واحدة بس
أنا مش عايزة الست تخون جوزها
لكن عايزة الراجل يخلص لمراته
أنا مش عايزة الست تضرب جوزها
لكن عايزة الراجل مايمدش إيده على مراته
انا مش عايزة الست تهمل فى نفسها
لكن عايزة الراجل يهتم بنفسه
أنا مش عايزة الست تخنصر من فلوس جوزها
لكن عايزة الراجل مايخبيش على مراته هو بيقبض كام بالظبط
انا مش عايزة الست تقعد حاطة رجل على رجل
وماتعملش حاجة فى بيتها
لكن عايزة الراجل يغسل طبقه بعد ما ياكل
انا مش عايزة الست تسترجل
لكن عايزة الراجل يكون راجل بجد
أنا معنديش مانع إني انفذ الواجبات اللى عليا كوني إمرأة
لكن محتاجة أشوف الراجل هو كمان بينفذ الواجبات اللى عليه
انا ليلى أو انا مش ليلى
الفكرة نفسها عميقة جدا
وممكن يتشعب منها الف قضية محتاجة تتناقش
زى طريقة تربية الاهل لعيالهم
طريقة معاملة الزوج لزوجته والعكس
مفهوم الصراحة والخيانة والشرف
مفهوم الحرية والفرق بينه وبين التحرر
هل التحرر معناها انحراف
ولا التحرر مكن يؤدى الى الانحراف
وهل كل الانحراف نتيجة تحرر
ام الانحراف ممكن يكون موجود مع انغلاق
جملة انا ليلى معناها
انا مقهورة
وبما انى شايفة ان القهر مش مقصور على المرأة
لأن ممكن جدا ألاقي رجل مقهور
فهل ممكن ألاقي راجل يقبل إنه يقول على نفسه أنا ليلى؟
ولا هيكتفي بأنه يقول على نفسه
انا ليلى أو انا مش ليلى
الفكرة نفسها عميقة جدا
وممكن يتشعب منها الف قضية محتاجة تتناقش
زى طريقة تربية الاهل لعيالهم
طريقة معاملة الزوج لزوجته والعكس
مفهوم الصراحة والخيانة والشرف
مفهوم الحرية والفرق بينه وبين التحرر
هل التحرر معناها انحراف
ولا التحرر مكن يؤدى الى الانحراف
وهل كل الانحراف نتيجة تحرر
ام الانحراف ممكن يكون موجود مع انغلاق
جملة انا ليلى معناها
انا مقهورة
وبما انى شايفة ان القهر مش مقصور على المرأة
لأن ممكن جدا ألاقي رجل مقهور
فهل ممكن ألاقي راجل يقبل إنه يقول على نفسه أنا ليلى؟
ولا هيكتفي بأنه يقول على نفسه
أنا مدحت
مدحت خااااالص
مدحت جدا
راجع فيلم الإرهاب والكباب
فى إعتقادي ان كتير منكم
جه فى باله ان جملة انا مش ليلي
مش هتتناسب مع كونى بت خيخة وأى كلام
إلاإني أحب اقولكم
خيخنتي لا تتعارض إطلاقا مع عدم ليلنتى
انا مش ليلى ربما
لكن أنا خيخة أكيد
ولنا في هذا بوست أخر
إنتهى
أختكم
بت خيخة وأى كلام
89 comments:
يا واد يا ثقة عجبتنى ثقتك بنفسك قوى بسم اللة ما شاء الله
مش عارفه يا خوخه انا موافقاكي في نص الكلام
بصراحه
انا شايفه ليلى دي حاجه تانيه خالص
هبقى اقولك عليها لما اتكلم عن ليلى باذن الله
سيدي يا سيدي على الثقة بالنفس
اهو هو ده الكلام ولابلاش وياريت كل بناتنا يبقوا كده
سلامي لشيكو باشا
اية الثقة دى كلها عجبتنى الثقة دى مع ان فى حاجات معترض عليها بمنطق ان ربنا خلق الست بعد لما خلق ادم
علشان هو محتاجها فلو مساواة هيبقى جنس واحد انا ضد ظلم المرأة طبعا باى شكل من الاشكال بس فى حاجات كدة لازم الست تعملها
انا فتحت مدونة جديدة اتمنى منك انك تخشى تشوفيها وتقوليلى اية رايك
حودة
يعنى كل اللى شوفته
هى الثقة بس
مافيش حاجة تانية شدتك نتكلم فيها
شكرا لمرورك
لماضة
يانهار ابيض
وانا لسه هاستنى لحد يوم 19 اكتوبر علشان اعرف رأيك
طب قولي أى حاجة
انا كدة الفضول هيقتلني
صاحب المضيفة
برضه ثقة بالنفس؟؟؟؟؟؟؟؟؟؟
انا مش شايفة أى ثقة
انتوا شفتوا الثقة دي فى أنهي حتة من البوست
تحياتى ليك يا انس
طالب ثانوي
يا خراااااااااابييييييييي
انتوا هتسيبوا فكرة البوست الاصلية وتمسكوا فى نقطة تانية خالص ليه
والنبى حد يشاورلى على حتة الثقة دي
وبعدين حكاية ان ربنا خلق حوا بعد ادم علشان ادم محتاجلها
طب ماهي حوا برضه فى الزمن ده محتاجة لادم رغم انها اتخلقت بعده
فبالتالى انا مش فاهمة
ايه علاقة ان حوا تخلق قبل ادم او بعد ادم بالمساواة وبإحتياج كل منهم للاخر
طب ما هو لو ربنا خلق حوا فى الاول
اعتقد انه كان هيخلقلها ادم علشان هى كمان هتحتاجه
وياريت اعرف ايه هى الحاجات اللى كدة
اللى الست لازم تعملها
سعيدة بمرورك
ومستنية توضحلى وجهة نظرك اكتر
شكرا ليكم
اختكم خيخة
يالهوووووووى
دانا كتبت توضيح اد كدة ومرضاش ينزل
هكتبة تانى
انا اقصد ان ربنا خلق اللست علشان تكمل الراجل الراجل هو اللى المسئول عن الست
فى معظم القبائل الافريقية الست بتشتغل نفس شغل الراجل بس دة بيسموة همجية وازاى والبنات اجمل الكائنات والحاجات دى
مساواة تبقى مساواة كاملة
يعنى لما تخشى المترو وراجل يقولك اتفضلى اعدى متقوليلهوش ميرسى تقوليلة لية اعد مكانك هو انا اضعف منك انا زيى زيك ياما انتى لما راجل يخش تقوميلة انتى كمان
هتقوليلى انت لو مقمتش للست متبقاش مرجلة هقولك طب مالراجل زية زى الست مرجلة اية بقى
ولا التحضر اسمة همجية
ولا الهمجية معناها مساواة!!!!!
طبعا الاختلاف فى الراى لايفسد للود قضية
وياريت تزورى مدونتى
بصى يا خوخة
ثقتك في نفسك ده في مجمل البوست حد تانى غيرك والظروف اللى مر بيها من فرض لبس الحجاب مثلا كان تشدق وقال قهر ليلى وحالة الطلاق اللى اتعرضتى ليها ربنا ما يعودها تانى برضة واحدة غيرك كانت قالت القانون اللى ظالم ليلى
بس ثقتك فى نفسك دى جاية من فين اولا من تربيتك اللى كانت صح وسابت ليكى حيز للتحرك تعملى فية اللى انتى عايزاة تقرى نزار قبانى تقلعى الحجاب اللى كنتى مجبرة علية اسرة عودتك انك تختارى دراستك جوزك تخططى لحياتك
واثقه من نفسك وعارفة حدود نفسك وعندك استعداد تناقشى الثالثوث المحرم بكل ابعاده مع اى حد وقدام اى حد لانك عارفة حتوقفى اللى قدامك ازاى عند الخط الاحمر اللى ما يتعدهوش فى المناقشة
ثقتك فى نفسك نتائج تربية سليمة من اسرة بسم اللة ما شاء اللة عليها ربنا يحفظ افرادها ويكون شيكو امتداد لخوخة ان شاء اللة
طالب ثانوى
كلامك منطقى
بس مش من المرجلة
ان الراجل يقعد فى عربية المترو المخصصة للسيدات
ويرفض حتى انه ينزل منها
لما حد يفهمه انه ركب عربية غلط
ومالهاش علاقة بالمساواة ان الراجل لو قاملى علشان انا اقعد اقوم اقوله لا اقعد مكانك انا مش اضعف منك
دى حاجة اسمها ذوقيات عامة
زى ما انا بقف للست الكبيرة والراجل الكبير والست الحامل
يبقى مافيهاش مانع ابدا ان الراجل يقف للست اذا كانت كبيرة او حامل او واخد مكانها فى عربية السيدات
ومعاك ان الهمجية مش معناها مساواة
لما كل واحد يعرف حقوقه وواجباته ويلتزم بيها
هنعرف ان احنا متساويين
فى الحقوق والواجبات
وبالتالى هنعيش كلنا فى تحضر
واكيد طبعا اختلاف الاراء لا يفسد للود قضية
انا سعيدة ان اخيرا فيه مناقشة بتحصل
شكرا ليك
حودة
نيهاهاهاهاهاهاع
انا مبسوطة من تعليقك ده بصراحة
لدرجة ان تعليقك ده ادانى ثقة بنفسي جامدة جدااااااا
وخلانى منشكحة اوى
بجد مش عارفة ارد عليك اقولك ايه
ابقى تعالى كل يوم
وهاشوفك بربع جنيه
الف شكر ليك
شكرا ليكم
اختكم خيخة
أسمحى لى
أن أعبر عن أحترامى وتقديرى لهذا المستوى الراقى والانسانى والصادق
فى التعبير عن ذاتك
أفكارك تدفق كالفيضان و كقطرات المطرورائقه وواضحه
أتفق مع أفكارك الناضجه
بارك الله فيكى وأبناك وكل من تحبى
هى فعلا مش مرجلة
ان الراجل يقعد فى عربية المترو المخصصة للسيدات
ويرفض حتى انه ينزل منها
لما حد يفهمه انه ركب عربية غلط
بس المساواة مساواة ومزرتيش المدونة
نورتى المدونة بجد وياريت تزورينى دايما
سلام عليكم
خوخه ازيك وخشانى كتير والله
عارفه يا خوخه المشكله هو الازدواجيه الى كتير عايش فيها وحاله التوهان الى الناس مش لقيالها حل وعدم الصدق مع النفس
انا متفقه معاكى المساواه مش انى اقلد الوحش لمجرد التقليد والمساواه مش اننا نعمل عنتر ويبقى لينا عضلات ونبقى زى الرجاله لكن اعتقد ان المساواه هو انى احس انى بنى ادمه زى زى الراجل الى هرتبط بيه فى يوم من الايام ويربط بينا الاحترام والود والتفاهم والثقه
عمر ماكان خروج الست للعمل فى حد ذاته مساواه لكن الدور الى بتلعبه الست دى فى حياه المحيطين بيها وثمره العمل ده الى
هتعود على المحيطين بيها هو ده المغزى
مش ان الست تبقى راجل لكن اعتقد المساواه ان الست تقف جنب الراجل وهو كمان يشجعها ويحترمها هى دى فى وجهة نظرى المتواضعه قمه المساواه اننا نطبق حديث الرسول صلى الله عليه وسلم النساء شقائق الرجال يعنى مينفعش نقف انداد لبعض لكن بنكمل بعض
مبدا القهر معتقدش انى عايشته فى حياته لانى برضه بختار الطريق الى بمشى فيه بارادتى ويمكن كتير بندم بس بستمر لحد النهايه يا اما بعلن خيبه املى يا اما بعلن نجاحى وفى الحالتين بيبقى عندى القناعه الخاصه بان النتيجه الى وصلت لها قمه العدل وببقى راضيه بيها
مايداكى يا خوخه فى كتير من كلامك ان التابوهات الغريبه الى بنعانى منها فى حياتنا محتاجين نقف قدمهاوده على الاقل اننا نغير طريقه تربيه ولادنا واننا نكون اكتر ايجابيه والى بيقبل يكون ليلى من البدايه يشرب بقى وميعيطش بعد كده
خالص مودتى واحترامى ليكى يا خوخه ويا رب كده دايما ربنا يحقق لك الى تتمنيه فى حياتك يا خوخه وسلامى لشيكو وبوسه كبيره منى ليه
تحياتى
a7ebak wernta 3a2l we rasy ya 5o5z, wa7shany wallahy :)
we ana aydan mm3aky, ana mesh layla :)
علشان لما احلف لك ان هاني له الجنة تصدقيني
ربنا يجازيه جزاء الصابرين الراضيين بقضاء الله و قدره
:)
ههههههههههههههه
بصي يا نوران هما اهلك بجد ربوكي تربية متوازنة
بس كويس انك عندك الثقة الجامدة في النفس دي
و كويس انك لبستي الحجاب عن اقتناع و فهم و حب
و كويس ان كل ده حينعكس على تربيتك لشريف
:)
انا معاكي جداً في الكلمة دي
انا مش عايزة الست تسترجل
لكن عايزة الراجل يكون راجل بجد
و انا كمان نفسي الست تكون ست بجد
:)
و ما تكونش خيخة
بس انا متهيالى ان بردو لسه جوانا حتة من ليلى
استمتعت فعلا بكتاباتك الاساس هو الاسرة والتربيه السليمه
تحياااااااااتي
انا نشرت الصورة خشى وشوفيها
جميل ياليلي اسف اقصد ياخيخه
بس اعتقد ان هناك فروق سيكولوجيه بين الرجل والمرأة لازم نحترمها
عبد الجليل
نوران
كلامك عجبنى أوى , حسيت انك بنت جدعة
بس مختلف معاك فى الجزء الخاص بالاستئذان
مش عارف ايه المشكلة لما الست نستأذن جوزها قبل ماتعمل حاجة هو مايعرفاهش والزوج يستأذن مراته فى نفس المواقف دى .المشكلة ان احنا حطين فى دماغنا دايما نظرية سى السيد و الست أمينة
مش عارف ليه فى مدونات بنات كتير مطلقات و عايزين يطلقوا؟
:))
محمد
ميرسى شكرا
بس انا كنت حاسة ان البوست مليان افكار كتيرة ممكن ننقاشها مع بعض
مش عايزة حد يقولى حلو جميل وخلاص على كدة
كنت احب اعرف وجهة نظرك فى الموضوع
شكرا على مرورك
طالب ثانوى
ده نورك انت
وان شاء الله التواصل يكون موجود دايما
شكرا ليك
ONLY SPOT
ازيك يا شيماء
وحشاني جدا
عارفة يا شيماء وانا صغيرة شوية
فكرة المساواة عندي
كانت عبارة
ان احنا نعمل كل حاجة مع بعض
يعنى مش مجرد تقليد على اد ما هى مشاركة
وكل طرف يحس بما يعانيه الطرف التانى
فبالتالى الطرفين هيقدروا بعض اكتر
معتقدش ان حد بيختار يكون ليلى
هى التربية اللى بتفرض عليكى ده
بدرجات معينة
انا من وجهة نظرى ان الاهل يعملوا اللى عليهم فعلا فى تربيتهم لولادهم
ويسيبوهم بعد كدة
يختاروا طريقة حياتهم
وربنا يقدرني واربي ابنى صح
تحياتى ليك يا شيماء
ديفا
وانتي وحشانى اكتر يا قمر
رمضان عامل فيكي ايه يا ترى؟
انا متأكدة من زمان انك مش ليلى
انتى اكيد عنتر
تحياتي ليكى يا حبيبتى
مهندس مصرى
هههههههههههههههههههههههههههه
اه هو فعلا ليه الجنة
بس مين قالك اني لبست الحجاب عن حب؟
اطلاقا مطلقا
انا لبسته علشان مصدقة انه هو فرض
غير كدة وحياتك ما كنت حطيته على راسي ابدا
لو طلعت فتوى من حد موثوق فيه
انه مش فرض
هاقلعه علطول
مش بقولك خيخة
تحياتى ليك يا محمد
وربنا يرزقك بست بجد
متكونش خيخة
على اسم مصر
والله يا هندودة
انا مش جوايا حاجة
وممكن اعمل سونار علشان اثبتلك
ههههههههههههه
بصي يا هند
هو ممكن يكون جوايا حتة من ليلى
بس اعتقد ان الحتة دى كانت فيا زمان
يعنى مثلا
لما ماما غصبت عليا الحجاب
وانا زى العبيطة مخدتش موقف وخوفت منها
واضطريت انى البسه
ما وقتها اكيد كنت ليلى
بس لما كبرت شوية وشخصيتى نوعا ما اكتملت واتشكلت خلاص
خدت موقف وقلت هاقلع الحجاب
ماما ساعتها وسط تهزيقها ليا
قالتلى والناس هتقول عليكي ايه دلوقتى
رديت عليها بجملة واحدة بس
وفضلت ماسكة فى الجملة دي
قلتلها يعنى انا هخاف من الناس ومش هخاف من ربنا
اصل كون ان انا وصلت لقرار انى هاقلع الحجاب
وعارفة ان ربنا هيكون زعلان متى ومع ذلك مصممة على انى هاقلعه
يبقى كلام الناس هنا مالهوش اى معنى ولا هاعمله اى حساب
ومن ساعتها قررت ان محدش يفرض عليا اى شيئ
مش هاسمح لحد انه يعاملني على إني ليلى
وقراراتي هاخدها بنفسي
ومحدش هيتدخل فيها
وخدت عهد على نفسي
اني ماخافش من ردود افعال بشر زيي زيهم لأن كلنا عبيد عند الله
اللى يهمني هو ربنا وبس
فأعتقد ان لو كان جوايا حتة ليلى
فليلى دي ماتت من زمان
تحياتي ليكي يا هندودة
عزيز عيني
شكرا ليك
طالب ثانوي
حاضر
عبد الجليل
فروق سيكولوجية بينهم ماشى
بس نحترمها ازاي يعنى؟
ميدو
انا معنديش مشكلة إني استأذن
بس انا بحس ان الاستإذان نوع من انواع اللف والدوران مع جوزي
اصل انا لما بعوز اعمل حاجة هاعملها
اصل لنفترض ان استأذنت هانى وقلتله ممكن اروح معرض الكتاب
وهو قالي لأ
ايه اللى هيحصل تفتكر؟
كنت هاروح برضه معرض الكتاب
فبالتالى يبقى ماكنش له لزوم من الاول الاستإذان طالما انا مبيتة النية بإنى هاروح فى جميح الحالات
وبعدين هاتلى راجل واحد بيستإذن مراته فى أى حاجة
انا كنت مطلقة من هانى
لكن رجعنا لبعض
وانا مقلتش فى البوست اى حاجة تشير بإني عايزة أطلق
فبالتالى الجملة الاخيرة فى تعليقك لا تخصني
تحياتى ليك
شكرا ليكم كلكم على تواصلكم معايا
اختكم خيخة
ممكن سؤال لاني بمر بتجربه مُشابهه
بدون الخوض في تفاصيل شخصيه بس انا فهمت انك اطلقتوا وبعدين رجعتوا واكيد الطلاق سبب جرح كبير لكن لما رجعتوا ممكن بسهوله كده النسيان وفتح صفحه جديده؟
لا لا قصدى على مدونة عايزة اطلق
مش عليك يا ست الكل
بخصوص الاستئذان
عندك حق الراجل مش بيستأذن
بس والله انا سمعت من شيخ ان مافيهاش حاجة لما ابلغ مراتى هاعمل ايه
بس حكاية انه لو مارضيش
حتروحى برضه فى رأيى مش صح
اة كدة اطلقتوا ورجعتوا لبعض انا زعلت لما قولتى انك اطلقتى وشكرا لمرورك
نوران هو مفيش لقاء تدوينى قريب علشان نفسى اقابل المدونين قبل زنقة المدارس.وهو هانى بيشوف المدونة
بئة انا صغنن طيب ماشى مانتى بنت خيخة بئة
عزيز عيني
امممممممممممم
والله يا عزيز
انا متجرحتش
على اد ما انا استغربت
اكتر من كدة مش هاعرف اشرح وجهة نظري
لان هاضطر ادخل فى تفاصيل مش عايزة ادخل فيها
فكرة النسيان وفتح صفحة جديدة
ممكن تحصل لو الطرفين عايزين
ان الحياة تستمر بينهم
ربنا يكتبلك الخير كله ان شاء الله
تحياتي ليك
ميدو
انا عارفة انه مش صح
وعارفة انه غلط كبير كمان
بس تعمل ايه بقى فى الدماغ الجزمة اللى عندي
ربنا ما يوريك الدماغ دي ابدا
تحياتي ليك
طال ثانوي
لقاء تدوينى قريب
اممممممممممممم
اللى انا اعرفه ان هيكون فيه فطار للمدونين يوم 26 رمضان فى ساقية الصاوى
التفاصيل عند مدونة اسمها عاليا حليم
والفنان خالد الصاوى هيكون موجود
بس للاسف انا معنديش لينك لمدونة عاليا حليم
ممن تروح عند مدونة احمد الصباغ
وتدعبس هناك فى لينكات المدونين
وتدخل عند عاليا وتعرف التفاصيل اكتر
هانى عارف ان عندي مدونة
واسمها بت خيخة وأى كلام
بس هو مابيحبش القراية
ولذلك هو مابيقراش المدونة
بس ليه السؤال؟
تحياتي ليك
السلام عليكم
كلامك بيعبر عن وجهة نظرك ولها احترامها واتفق معاكي في اغلبها
لكن مبدئيا ممكن حد يعرفنا ويفهمنا ايه هو القهر اللي المراة بتتعرض له؟؟؟
يعني خلاص يعني الناس كلها والرجالة كلهم تمام التمام وعمالين يتسلوا على الست ويقهروها ويبهدلوها ؟؟؟
طيب بنظرة عامة شاملة كدة انا شايفة ان كلنا مقهورين
ستات ورجالة واطفال
انا شايفة ان مش الراجل هو اللي قهر المرأة اد ما الظروف هي اللي بتقهرها وبتقهره معاها
انا واحدة بشوف ان طاعتي لزوجي وحبي له نابع من حبه ليا ومحاولته برضه ارضائي
دة بيخليني ببقى في منتهى السعادة وانا بستأذن منه اخرج وابقى عارفة انه هينفذ رغبتي دي لانه عارف اني بتقي ربنا فيه وبستاذنه لرضا ربنا والنتيجة اي حاجة موافق لدرجة وصلتنا للثقة في بعض وتفويض بانجاز اي اعمال شايفاها صح حتى قبل ما اقوله واستاذن ليه
لان القاعدة العريضة بينا انا بتقي الله فيك وانت بتتقي الله فيا
حتى لما جيت البس النقاب ومن قبله الحجاب نبع من راحة نفسية ورغبة في التقرب الاكبر لربنا حتى باقل الاعمال
لو كل ست بصت لنفسها انها تملك من الحنكة ما يجعلها تأسر الرجل دة وبكل حب ومودة بينهم طلباتها بالنسبة له حلم يتمنى يحققه لها
مش هتشوف ابدا انها مقهورة
يارب اكون قدرت اوصلك انا عاوزة اكتب ايه
وان كان قريب اكتب في دة
دمتي بخير وسعادة يا ام شريف
رمضان كريم
شفتي أهي عاشقة النقاب قالت كلمتين درر مكنتش عارف اقولهم
:)
دماغك بجد دماغ عجب
ربنا يلين لك دماغك الناشفة
نوران
ليلى زي ما جسدتها فاتن حمامة في الفيلم
هي حياة البنت او الست جوة دايرة الجملة اللي مامتها كانت دايما بتقولها " اللي يمشي عالاصول مايتعبش"
والاصول المقصوده هي الاطار اللي رسمه المجتمع اللي كانت عايشه فيه ليلى
مش المجتمع ككل طبعا
ولكن المجتمع القريب جدا منها باباها مامتها عيلتها اصحابها
حتى اخوها نفسه كان متمرد على الاصول دي لكن مادقوش معاه قوي عشان هو ولد
ومش كلنا قدرنا نكسر دايرة الاصول دي اللي مش شرط يكون ليها مرجعية دينية وانما هي تفصيل على مزاج اللي حطها
زي الراجل اللي ما يحبش ياكل اكل بايت او مايحبش مراته تتفرج على المسلسل العربي او ماتكلمش فلانه او علانه لمجرد انه شايف كده
كتير قوي مننا ليلى
وكونك قدرتي تكوني مش ليلى فاعتقد ان الفضل في ده يرجع لباباك ومامتك
لان هم ماربوش جواك الخوف وزرعوا فيي الثقة بالنفس انك تختاري حياتك
ادوكي حبهم وودنهم وصبرهم
وشافوا ان ده حقك حتى لو مش على مزاجهم
يعني هما اللي كونوا شخصيتك بالطريقة دي
والعكس طبعا حصل مع كل الليلات التانيين
وده انا هاكتبه يوم 19 اكتوبر
بس برضه انا مبسوطة قوي من التلت الاخراني للتدوينة
هو ده بالظبط المطلوب
مش الست تبقى زي الراجل
لن الراجل يبقى راجل بجد
لا عادى دة مجرد سؤال خطر على بالى بس بص لقاء الصاوى دة شكلة هيبقى كتير وهيبقى شكلى صغير وسط الموجودين معرفش ربنا يسهل هو انمتى هتبقى هناك
انا روحت مدونة عاليا وعاوز اقول يالهووووووووووى
دانا طالب ثانوى يعنى لسة عايش على قلب امى وابويا ومش هينفع اقولهم هاتوا اربعين جنية كدة علشان اروح لقاء تدوينى انا قصدى لقاء جدعنة كدة
عاشقة النقاب
هاقول زي محمد مهندس مصري ما قال
انتى قلتي كلمتين درر
وانا وصلني اللى انتي عايزة تقوليه
ربنا يسهل واقدر اعمل اللى عليا بجد
تحياتى ليكي
وربنا يسعدك يارب
مهندس مصري
انتوا لسة شفتوا حاجة
مع خيخة مش هاتقدروا تغمضوا عنيكم
تحياتى ليك
وشكرا على متابعتك معايا
سها السباعي
اولا وحشاني جدا
ثانيا انا متشوقة جدا انى اعرف هتكتبى ايه فى مشاركتك لكلنا ليلي
وبعدين انا قلت فى البوست
ان فكرة كلنا ليلى
بتفتح مواضيع كتير اوى
زى طريقة التربية وعلاقة الست بالراجل ومعنى الحرية والتحرر
وحاجات تانية كتير
محتاجة اعرف وجهة نظركم فيها
بس تقريبا محدش واخد باله اوى
انا حاسة فعلا ان الموضوع كبير
وعايزة الكل يشترك فى المناقشة ويعرض وجهة نظره
تحياتى ليكى يا سها
طال ثانوي
بصراحة انا مش هابقى موجودة فى لقاء الصاوى ده
عموما هو فيه تجمع للتبرع بالدم يوم 5 ديسمبر
ممكن جدا تبقى تيجى يوميها ونتعرف عليك
هاقولك على تفاصيل اليوم قبلها بكام يوم
ولو هيحصل لقاء قريب
هابلغك بيه ان شاء الله
تحياتى ليك
وشكرا على متابعتك
شكرا لتواصلكم معايا
ومستنية مشاركتكم فى المناقشة وعرض وجهة نظركم
اختكم خيخة
طالب ثانوي
لقاء جدعنة كدة
يبقى تستنى شوية فعلا لحد ما نعمل لقاء مش هيكلفنا كتير
واوعدك اول ما اعرف بمعاد اى لقاء هابلغك علطول واسيبلك تعليق
تحياتى ليك
خيخه
أ،ا معاكي ف كل الكلام ده جدا خصوصا آخر فقره
لكن ليلي هي البنت اللي بتحلم و تلاقي حد بيقولها لا متنفذيش انتي انتي بنت !!
هي البنت اللي لما تعمل شيء عادي جدا يتقالها عيب .. تسأل ليه متلاقيش إجابه ..
ليلي هي اللي تتعب جدا في إقناع اللي حواليها بأهدافها أكتر ما تتعب علي هدفها
تحياتي لثقتك جدا
و يا رب كلنا منبقاش ليلي
:)
ياسمين
لا اصل الكلام بتاع الحرية و التحرر و الإنغلاق و التسيب ده عايز كلام كتير قوي
و الواحد مش فايق دلوقتي
صبرك عليا و حأرص لك تعليق طويل قوي في لموضوع او ممكن انشره بوست عندي بعد رمضان
:)
عاقلة على ارض الجنون
لو هى دى ليلى
فا انا مش ليلى برضه
انا لو عايزة انفذ حلمي هانفذه ومش هاسمح لحد انه يقولي لأ
لو عايزة اعمل حاجة بدال هى مش غلط
يبقى اقدر احط صوابعي العشرة فى عين اتخن تخين
وعمرى ما هاتعب نفسي ولا هاضيع وقتي فى اقناع غيرى بأهدافي
انا هاتعب نفسي فى تحقيق اهدافي دي
ومش هاشغل بالى بحد
تحياتي ليكي
شفاكم الله وعافاكم يا أستاذ مدحت
يا أستاذ مدحت
:))
بجد الكلمتيندول تستاهلي عليهم أي حاجة حلوة أنتي عايزاها
****
نا مش عايزة البنت تاخد مصروف كبير من اهلها
لكن عايزة الولد ياخد مصروف أد أخته
أنا مش عايزة البنت تسهر لحد الساعة تلاتة الفجر فى الشارع
لكن عايزة الراجل هو اللى يكون أخره لحد الساعة عشرة فى الشارع
أنا مش عايزة البنت تشرب سجاير أو شيشة
لكن عايزة الراجل هو اللى يبطل تدخين
أنا مش عايزة البنت يكون ليها علاقات مع شباب كتير
لكن عايزة الراجل هو اللى يرتبط بإنسانة واحدة بس
أنا مش عايزة الست تخون جوزها
لكن عايزة الراجل يخلص لمراته
أنا مش عايزة الست تضرب جوزها
لكن عايزة الراجل مايمدش إيده على مراته
انا مش عايزة الست تهمل فى نفسها
لكن عايزة الراجل يهتم بنفسه
أنا مش عايزة الست تخنصر من فلوس جوزها
لكن عايزة الراجل مايخبيش على مراته هو بيقبض كام بالظبط
انا مش عايزة الست تقعد حاطة رجل على رجل
وماتعملش حاجة فى بيتها
لكن عايزة الراجل يغسل طبقه بعد ما ياكل
انا مش عايزة الست تسترجل
لكن عايزة الراجل يكون راجل بجد
**
بس هنشيل بسحوار يغسل الطبق بعد الأكل
:))
بالنسبه لجزئية المساواة
فعمرها مينفع ولا هيكون في مساواة
الراجل كائن حي ليه خصائصه
والمرأة كائن حي ليه خصائصه
مهماش مثيلين أبدا عشان يتقارنو ببعض ويتساو أو لا يتساو
الراجل ليه حقوق وعليه واجبات
الست ليها حقوق وعليها واجبات
كل ميسر لما خلق له
الراجل لو تنازل عن جزء من رجولته وأخد من واجبات المرأة أو من حقوقها فده غلط
والست لو أنتقصت من أنوثتها وأخدت من واجبات الرجل وحقوقه فده غلط
لكن في حالات بتجبر الراجل يؤدي مهام المرأة والمرأة مهام الراجل لكنها جحالات شاذة عن القاعدة
أن الست ست والراجل راجل
كل حد فيهم كيان مستقل بذاته لا بيتقارنو ببعض ولا بيتساوى ببعض
أه يمكن في مجتمعنا بقى من حق الراجل أنو يكون قليل الأدب وعديم الرباية حبتيين عن المرأة
بس ده مش لأنو حق للرجل
ده لقلة تربية ولجهل وتخلف عقلي
...
مهندس مصري
وانا فى انتظار تعليقك يا محمد
او البوست اللى بعد رمضان
ايهما اقرب يا ترى؟
تحياتي ليك
محدود الدخل
وليه الراجل مايغسلش طبقه
ودي هتنتقص من رجولته فى ايه؟
مش مراته بتغسله هدومه
وبتكوهاله
وبتنضف البيت الى بيقعد ويبرطع فيه
ايه المشكلة انه يغسل طبقه وكوبايته
ايه المشكلة انه يشيل طبقه ويحطه فى المطبخ
ما انتوا لما بتسافروا وتعيشوا لوحدكم
بتعتمدوا على نفسكم
وبتطبخوا وبتغسلوا المواعين والهدوم
ليه اول ما بتتجزوا
تعملوا نفسكم على اديكم نقش الحنة
وترفضوا مساعدة مراتتكم
طب بلاش دي
مش العيال دوول مسؤلية ذوييهم
هي ذويهم دي معناها الام وبس؟
ولا معناها الاب والام
ايه المشكلة
ان الاب يقعد يهشك ابنه لحد الست ما تقلي البطاطس او تاخد دش
ولا دي كمان هتنتقص من رجولته
واذا كنت شايف ان من حق الراجل يكون قليل الادب حبتين نتيجةلقلة التربية والجهل
فأعتقد
ان الاهل اللى مابيربوش ابنهم الولد كويس
يبقى اكيد مش بيربوا بنتهم كويس برضه
وفى الحالة دى
هنلاقى البنت والولد الاتنين
مش متربيين وان الاتنين قلالة الادب
يعنى الموضوع مالهوش دعوة بحقوق الراجل خالص
تحياتى ليك
وفين الحاجة الحلوة
عارفة يا خيخة لما قريت الموضوع دة و الكام موضوع اللى قبله حسين إنك رجعتى لنشاطك اللى كنت حاسس انك مفتقداه بقالك كتير
حسيت كأن واحد كان قاعد مكسل على السرير ... و فجأة قام يغسل وشه و يتنطط فى كل حتة .. خصوصا إنك رجعتى تردى على تعليقات الناس تانى
و النبى يا خيخة ... ماتخليش الدنيا تدخلك فى حالة الكسل دى تانى .. انت كدة أفضل بكتير
وأيه الي يمنع الست أنها تقوم تغسل طبقها وطبق جوزها الي لسه جاي من الشغل
؟؟؟
ممكن تقوليلي أنها هي كمان لسه جايه من الشغل
جميل
بس هل هي مطلوب منها تشتغل ؟؟
لأ هي بتشتغل عشان هي عايزة كده
والشغل مش عيب ولا حرام
فأتفضلي يا ست الكل أشتغلي
لكن الراجل مجبر يشتغل عشان هو ملزوم بالبيت وبمراته وبأولاده
الست مسؤوليتها الأولى البيت لو شغلها هيقصر على البيت يبقى الأولى بيها تقعد من شغلها مش تقول لجوزها قوم أغسل وأطبخ ورضع العيال أصلي تعبانه من الشغل
:))
كل ميسر لما خلق له
شغل البيت مسؤولية الست وده حق أصيل ليها
الراجل كان عنده الوقت والمقدرة أنو يساعد زي الفل
أيد على أيد تنجز ونهيص سوى
وغير كده وكده أنا بكره غسيل المواعين
يمكن لأني عشت 6 سنين غربة وكنت بغسل مواعين ياااما :)
وبعدين مين قال أن الرجالة مبيساعدوش مراتاتهم
في ناس كتييييير جدااا أعرفهم ومنهم صحابي فترة الحمل بتاعت مراته ولا كانت بتطبخ ولا بتغسل ولا مواعين ولا هدوم وكانت بتتخانق معاه عشان تنشر الهدوم عشان مش حابه الجيران يشوفوه بينشر وبيروح شغله وكان عامل زي راجل وست في بعض شغله الصبح واليت بلليل
لكن ده لأنو حاسس بمراته وبيحبها
مش لأنو المفروض يعمل كده
لأنو لو على المفروض فهو مش مطالب بيه يعمل كل ده
ممكن يساعدها لكن مش يشل كلو عنها
حتى أنا ممكن بعد ما أتجوز أرفض اشيل أبرة من على الأرض وممكن أشيل البيت كلو على دمغاغي لو حسيت أن مراتي في يوم تعبانه
الحكاية كلها حكاية أختيار وحب وسستمه
الي يلحق يسستم التاني هيترحم من شغل البيت
:))
ابن حجر العسقلاني
ياااااااااااااه
اخيرا يا عسقول
انا عمالة اقول فين تعليق عسقول
لدرجة كنت هابعت منادى بحمار ينده عليك ويقول عسقول متأخر يا ولاد الحلال
الف شكر ليك
وعايزة اعرف وجهة نظرك فى الموضوع
ومتخافش قول رايك بحرية تاااااامة
انت عارف انا ديمقراطية جدا
تحياتى ليك
وعليك غرامة تاخير خمسة وتلاتين قرش
عجبني قوي انك مخدتيش سكة
ظلموني وباين في عينيهم
اللي معظم السيدات واخدينها
وكل واحده يحصلها موقف في حياتها
تقول أنا ليلى
أنا كمان محستش بمشكلة أو إني محرومة من حاجات لمجرد كوني بنت في أي شيء تقريبا
بس فعلا زي ماقلتي
تريدني أنثى؟
إذا فلتكن أنت رجلا
:)
محدود الدخل
وافرض ان الراجل
هو اللى طلب من مراته انها تشتغل علشان تساعد فى مصروف البيت
يبقى هو كمان ملزم انه يساعدها فى شغل البيت
بس بقى ها
انا بقى بحب اغسل المواعين وارفض ان اى حد يغسل مواعيني
ومعنديش مانع انى اغسل مواعين الناس كلها
انا فى وقت حملى محدش ساعدنى
ايه ده هو المفروض ان حد يساعدني؟
تصدق ما كنتش اعرف
انا لحد اخر نفس
قصدى لحد اخر حملى
كنت بنضف الشقة
وافتكر انى مرة استعانت بكبر حجم بطني وقت الحمل
فى انى ازق بوفيه السفرة ببطني
هو جوزي عرض عليا مساعدته
بانه يجيب شغالة
وانا على كلمة واحدة ماخدوش يا بابا ماخدوش يابابا
قصدى وانا اللى رفضت هذا المبدا
من منطلق انى اقدر انضف شقتى بنفسى
وان حالتى لا تمنع انى اعمل كل حاجة بنفسي
ومرة سالته قلتله افرض تعبت وبقيت طريحة الفراش
مش هتعمل حاجة فى البيت
قالى لأ
يا اما هاوديكى عند اهلك
يا اما هاجيب حد يقعد معاكي
يا اما هاجيبلك شغالة
لكن انسي انى اعمل حاجة فى شغل البيت
بس عجبتنى فكرة اللى يلحق يسستم التانى هيترحم من شغل البيت دى
انت بتجيب الافكار دى منين
تحياتى ليك
oje
وزة الجميلة
جبتى من الاخر يا بنت والله
تريدنى انثى
إذن فلتكن رجلا
عليكى نوووووووور
تحياتى ليكى
براااااااااااااافووو
مش اكتر من برافو
بجد هايله المقاله دي يا خيخه
ويارب شريف باشا عم الناس دي كلها يبقي حاجه كبيرررررررررررره اوووى في البلد دي
شادى
ميرسى يا شادى
شكرا ليك
شايفة الجملة الجاية دى
بدليل احساسي الداخلي
بأمنية ماما وهاني إنهم يشفوني في يوم وأنا ليلى
كل "ماما" و كل "هانى" و كل "بابا" بيتعاملوا مع البنت على إنها ليلى
و كأنه ورث يجب أو يتوارثه الخلف عن السلف
يا خيخة انت مختلفة عن ناس كتير .. انت متمردة .. و فى نفس الوقت بتحترمى الآخرين و مش بتتعدى على حقوقهم
لكن مش كل الناس بتقاوم انهم يكونوا "ليلى" .. كثير منهم بيستجيبوا للنداء الـ"ليلى" و بيبقوا ليلى
الجميل جدا بقى فى التدوينة هو
أنا مش عايزة البنت تسهر لحد الساعة تلاتة الفجر فى الشارع
لكن عايزة الراجل هو اللى يكون أخره لحد الساعة عشرة فى الشارع
.
.
.
انا مش عايزة الست تسترجل
لكن عايزة الراجل يكون راجل بجد
انت هنا ماخليتيش الراجل هو محور الكون كالمعتاد ... لأ ... و دى الفلسفة اللى لازم نتعامل مع بعض على أساسها
و أحب أذكر بالآية اللى بتقول: ولهن مثل الذى عليهن بالمعروف
يا شيخه يخرب بيت ليلى اللى زعلتك الزعل دا كله
يانهار ابيض
كل دا موضووووع
انا هقتل ليلى
اللا صح
هو فى ليلى دوقتى
اشك
موضوعك جميل جدا ياخيخه
لو كل واحد وواحده عرف هو عاوز ايه
لو الست عرفت حقوقها وحقوق جوزها عليها
لو الراجل عرف حقوق مراته وحقوقه
دا هيستريح ودا هيستريح
عارفا المصيبه ايه ؟
انهم عارفين وبيستهبلو
اه والله
تحياتى اختى الفاضله
اخيكى
احمد سكر
ابن حجر العسقلاني
عسقول
كويس انك خدت بالك من الجملة دى
وانت تقريبا شرحت معناها اللى انا عايزة اوصله للناس
الاهل فيهم حتة غريبة كدة
يعنى شوف ازاى يا اخى
رغم ان اهلى هما اللى مربينى على انى اتحمل نتيجة قراراتي
الا انى بحس برضه
انهم
بيتمنوا انى اكون ليلى
طب ماكنتوا ربتوني من الاول بقى على اني ليلى
ولا اييييييييه؟
جميلة اوى الاية
و لهن مثل الذي عليهن بالمعروف
تحياتى ليك
احمد سكر
فيه ليلى كتيييير اوى
انا اغلب اصحابى ليلى
تحب اوريهملك
ماهى دى المصيبة فعلا
انهم عارفين وبيستهبلوا
كل واحد مستنى التانى يعمل اللى عليه
محدش عايز يبتدي بنفسه
تحياتى ليك
هههههههههه
والله لو كنتى قولتى انك ليلى كنت إفتكرت إنك غيرتى إسمك ولا إنى دخلت على مدونه غلط.
وبعدين إنتى أساسا ماتنفعيش ليلى دا إنتى واحد صحبى فى البيت إنتى وأحمد (أختنا الصغيره)
بصراحه ميه ميه ويارب عمرك ماتبقى ليلى(لو ليلى معناها مقهوره بس)
إنتى نورا أو نوران أختى حبيبتى وعرفتك على كده بلماضتك وعندك وطيبتك وحتى قلة أدبك.
سلام يا أحلى خيخه
أخوكى
آسر الشاملى
انا حاتناقش معاكي في نقطة
مش عارف انت مش واخده بالك منها ولا
متجاهلها بحجة المساواة
وهي المساواة التي معظم الحريم في هذا العصر يطلبونها
وكانها لبانة اخدنها من الغرب
بحكم المساواة في الغرب
ولكن الغرب شيئ واخلاقهم ودينهم
ونحن شيئ اخر بديننا واخلاقنا
واذا امرنا ديننا الحنيف بشئ فلابد من اتباعه
واتباع رسوله ( ص ) قال تعالى :
قل ان كنتم تحبون الله فاتبعوني يحببكم الله ويغفر لكم ذنوبكم والله غفور رحيم
صدق الله العظيم
وقال رسول الله ( ص ) ان كنت امرا احدا ان يسجد لغير الله
لامرت الزوجة ان تسجد لزوجها
ويجب على الزوجة ان تطيع زوجها دائما ابدا فيما عدا ما يغضب الله سبحانه وتعالى
فيجب على الزوجة ان تستأذن زوجها عند خروجها من البيت وهذا ليس بعيب كما تدعي انت
بان ذلك تحصيل حاصل وانه حتى لو رفض زوجك خروجك سوف تخرجين ايضا
كيف ذلك؟
ارجو ان تتدبري كلامي هذا جيدا ,
بجد بجد
اقف احتراما لحضرتك لعدم ركوبك موجه الاضطهاد والحاجات دى
وبجد بوست جامد دى مش ثقه
دى قدره
:d
كل سنه و حضرتك طيبه
آسر
الف مبروك يا سيدي على المدونة الجديدة
وربنا يجعلها عتبة سعد عليك ان شاء الله
مصري بالغربة
أنا لا أقصد من المثل اللي أنا ذكرته
المساواة
أنا أقصد
أوضح إني مش بسمع الكلام
ومافيش ليلى مش بتسمع الكلام
وعلشان كدة انا قلت أنا مش ليلى
وبعدين الحديث ده معناه خطير جدااااا
متهيألي لو كنا فى عصر الرسول صلى الله عليه وسلم
وكنا فعلا بنسجد للأزواج
وواحدة راحت اشتكتله من جوزها
وقالتله ده بيضربني وبيهني ومش بيصلي
ومابيصرفش عليا
تفتكر سيدنا محمد
كان هيقولها اسجديله برضه؟؟؟؟؟
وبعدين انا ماقلتش ان لو استأذنت ان ده يعيبني
كل الفكرة إني عايزة أوضح مدى جبروتي
واني مش ليلى
مافيش ليلى جبارة كدة
أرجو إني أكون قدرت أوضح وجهة نظري
تحياتي ليك
حسام يحيى
شكرا ليك
وكل سنة وانت طيب
شكرا على تواصلكم معايا
اختكم خيخة
طيب ماشى يا نوران
انا متابع التعليقات بس مش عارف اعلق
علشان انا مش بنت اتقهرت
ولا لحقت اظلم رايى اللى فوق كدة هو احسن حاجة
شوفي يا ستي:
أناشخصيا عن نفسي
بقول انو فكره المساواه هاي فكره كتير غلط
المرأه يجب أن لا تبحث عن المساواه بل عن العداله و الفرق بين المعنيين شاسع جدا
و اذا يا نوران انتي كان حظك حلو و الله رزقك بعيله فهمانه؛ فرجاء شوفي الملايين من ليلى اللي كل يوم ربنا مبتليهم
يعني بصراحه يا عزيزتي؛ ما نجيش نحكي من منطق المرتاح و بعدين نقول ما فيش من ده:)
تحياتي ليكي و بتمنى يكون كلامي واضح
طالب ثانوي
كفاية نورك عليا
لو حسيت انك عايز تضيف حاجة
ماتترددش
اكتبها علطول
مياسي
وانازي ما قلت انا مش عايزةالست تبقى زي الراجل
انا عايزة الراجل هو اللى زي الست
ومتهيالى هى دى العدالة
لو ليها مفهوم تانى من وجهة نظرك
احب انى اعرفه
انا مقلتش فى تعليقي
ان مافيش ليلى
انا كنت بتكلم عن نفسى
انا بقول انا مش ليلى
لكن مش معنى كدة اني اقول كلنا مش ليلى
بالعكس انا عارفة ان انا واللى زيي حالات شاذة يعنى احنا اقلية
لكن الاغلب والاعم فى المجتمع الشرقى
ان اغلب الستات ليلى
يعنى الجملة دي اللى انتى كتباها
ما نجيش نحكي من منطق المرتاح و بعدين نقول ما فيش من ده
الجملة دى لا تخصني انا
لانى فعلا كتبت من منطق المرتاح
لكن ماقلتش مافيش من ده
لانى عارفة ان فيه ليلااااااات كتير جدا
ولا انتى بالجملة دي كنتى تقصدي حاجة تانية وانا فهمتك غلط؟
تحياتى ليكى
شكرا دة نورك انتى ديسمبر يعنى شهر اتناشر صح
ياااااااااااااااااة بعيد اوى يلا بقى عندك ايميل على الياهو
لو عندك وعاوزة تضيفينى دة ايميلى
farokdel@yahoo.com
شفتى صورتى اخضر اة بس مش باستك صغنن وبيبى يلا مانتى خيخة بئة
ان بداية القهر تكمن فى ليلى نفسها
و هناك فرق بين ما اريدة من عدل وما يفهمه غيرى على انه تمرد
متهيألي لو كنا فى عصر الرسول صلى الله عليه وسلم
وكنا فعلا بنسجد للأزواج
وواحدة راحت اشتكتله من جوزها
وقالتله ده بيضربني وبيهني ومش بيصلي
ومابيصرفش عليا
تفتكر سيدنا محمد
كان هيقولها اسجديله برضه؟؟؟؟؟
ده كلامك طبعا
وردي عليكي
هل تفتكري ان الرسول عليه الصلاة والسلام
اللي ربنا اعطاه موجز الكلم
وما ينطق عن الهوى
تفتكري باحاديثه كلها اللي بتساعد كل مسلم وتهديه على مر العصور
من اول بعثه بالاسلام الى قيام الساعة
تفتكري احاديثه ديه للناس اللي كانوا في عهده بس
للصحابة بس يعني
سنة الرسول واحاديثه للمسلمين اجمعين الى يوم الدين
يا ريت تفهمي النقطة ديه كويس عشان الواضح انك مش فهماها
تركت فيكم ما ان تمسكتم به لن تضلوا بعدي ابدا كتاب الله وسنتي
وبتقولي كمان
وبعدين انا ماقلتش ان لو استأذنت ان ده يعيبني
كل الفكرة إني عايزة أوضح مدى جبروتي
واني مش ليلى
مافيش ليلى جبارة كدة
يعني في راي انا
ده انتي لو كنتي قلتي عيب افضل من الكلام اللي انت قولتيه ده
جبروت ايه بس
ربنا على الظالم والمفتري والمتجبر
هو احنا داخلين حرب ولا ايه؟
اما بخصوص حسبة برما
بما انها قرية جنب طنطا
قاليك التفسير
مقولة دارجة تقال عندما يحتار الأمر في حساب شئ ما. ورد في موسوعة حلوة بلادي للكاتب ابراهيم خليل ابراهيم : المقولة الشهيرة حسبة برما ترجع لاحدى القري التابعة لمركز طنطا بمحافظة الغربية وهي قرية ( برما ) التي تبعد عن طنطا بحوالي 12 كيلو متر ، وقد جاءت هذه المقولة ( حسبة برما ) عندما اصطدم أحد الاشخاص بسيدة كانت تحمل قفصا محملا بالبيض فأرادو تعويضها عما فقدته من البيض وقالوا لها : كم بيضه كانت بالقفص ؟ فقالت : لو احصيتم البيض بالثلاثة لتبقي بيضة ، وبالاربعة تبقي بيضة ، وبالخمسة تبقي بيضة ، وبالستة تبقي بيضة ، ولو احصيتموه بالسبعة فلا تبقي شيئا ، وهنا عرفوا انه كان بالقفص 301 بيضة ومن هنا جاءت المقولة ( حسبة برما ).
منفول
يا سلااااااااااااااام
ياطائر هو دة التفسير مع انى مش فاهم ازاى وصلوا 301بس عجايب
مفهوم العداله وصل صح:) تقريبا نفسه لأنو المساواه ما بتنفع و ربنا خلق الرجل و المرأه مختلفين
بالنسبه للجمله التانيه يمكن انتي ما قلتيش انو ما فيش ليلى صحيح بس أنا هيك حسيت فيها من أول البوست لآخره
هاد هو الشعور اللي وصلني بغض النظر عن كونه صح أو غلط:)
طالب ثانوي
لو فيه معاد قبل كدة
هابلغك
طائرى الحزين
اوجزت واوضحت
افادكم الله
وشكرا على شرحك لحسبة بيرما
تحياتى ليك
مصرى بالغربة
عارفة طبعا ان احاديث الرسول تتماشى مع كل العصور
انا اقصد
ان برضه مش كل الازواج يستاهلوا ان الزوجات تسجدلهم
فيه رجالة بتبقى عايزة الحرق
يعنى ازاى واحد مش بيصلى ومش بيصوم
وبيضرب مراته وعياله
وبيهينها قدام الناس
انسان مؤذي من جميع النواحي
وبعدين مطلوب من الست انها تسجدله
علشان كدة قلت اكيد سيدنا محمد لو كان موجود فى عصرنا دلوقتى او حتى لو واحدة ايام الرسول
قالتله انا جوزي فيه كل العبر دي
اسجدله ولا لأ
هيقولها لأ طبعا
عارف الاية اللى بتقول ولا تقربوا الصلاة
بقيتها ايه؟
وانتم سكارى
يعنى مش ماصليش وخلاص
لا ده ربنا حط شروط ان محدش يصلى وهو سكران
يعنى اعتقد ان لازم يكون فيه شروط موجودة فى الزوج اللى يستحق ان مراته تسجدله
مش كل الازواج تستحق عظمة السجود
هو ده اللى انا اقصده من كلامي
وبعدين فى تعليقك التانى بتقول
ده انتي لو كنتي قلتي عيب افضل من الكلام اللي انت قولتيه ده
افضل لمين بالظبط؟
افضل ليك انت
ولا افضل ليا انا
ولا افضل لاى حد هيقرا التعليقات
هو انا ابقى وحشة لما اقول اللى بيدور جوايا بصراحة
هو انتوا عايزنى اقول الى بيدور جواكم انتوا
انا بعترف انى جبارة
ومش هيعبنى انى استأذن من جوزي
لكن انا واحدة بطبعيتى مش بسمع الكلام
وبعمل اللى انا عايزاه
انا مش بتباهى بكدة
لكن بعترف بغلطي
ربنا يهديني
وربنا على الظالم والمفتري
تحياتى ليك
مياسي
ما هو ده اللى انا مستغرباله
انى انا بتكلم عن نفسي
مش بتكلم باسم كل الستات
فبالتالى انا مافيش حاجة فى كلامى تشير خالص
ان انا انكرت وجود ليلى فى المجتمع
انا بس انكرت وجود ليلى جوايا
تحياتى ليكى
وشكرا على متابعتك
طيب يا خوخه بما انى حودة اللى علقت افتكرى انى ليه ربع جنيه حاخده فى اول تجمعه حاخدة يا تكملى عليه وتجيبى واحده كادبورى كبيرة
اخوكى
حودة
بصى يا بنت خيخة.. مش بكلمك دلوقتى على إنى صاحبة فكرة "كلنا ليلى"، ومن المشاركيين فى تنظيمها، عشان كدة بدافع عنها
إنما بكلمك من إنسان لإنسان
جايز تكون حياتك مرفهة بعدالة فى التعامل.. لكن فى كتير غيرك لأ
وكل واحدة حقها إنها تعبر عن نفسها.. حقها إنها تتكلم.. وحقها إنها تاخد نفس ثقتك فى نفسك وتقول لأ
مش بالضرورة يوم ليلى لشكوى المستضعفين فى الأرض..
يوم ليلى يمكن لإلتئام الروح
للحوار الداخلى
يمكن لتعريف الآخر إن فى مشاكل ربما يكون هو/هى سبب فيها؟
إنتى مش ليلى.. ربنا يزيدك ويبارك..
بس إعطى فرصة لغيرك تشفى من أوجاعها، وتبقى فى يوم ما فى المستقبل "مش ليلى" زيك.. بس بدون تعنييف لعدم قدرتها التخلص من واقعها بالسهولة دى
:)
ياريت عندي ثقه في نفسي زيك يمكن انا كمان مش مقهوره بس برضو مش بثق في نفسي كتير وخايفه ده ينعكس على حياتي بعد كده ربنا يستر بحب بجد كل كلامك
خيخه انا عندي بوست اسمه هو وهي وعايزه رايك انتي بالزات فيه ياريت لو سمحتي تشرفيني بالزياره دي هكون مبسوطه قوي
معظم كلاممك عجبنى
بس معجبنيش
ان اى حاجه انا عايزاه اعملها كدا وخلاص وما يهمنيش حد
هى دى حاجه فيكى
بس مش ميزه فى ليلى
خيخة
خدي بالك من اللى حواليكي
فيه مدونين ومدونات كل همهم انهم يقطعوا فى فروتك
وانا عندى تسجيلات لماسينجر تثبتلك كلامي
هابعتهالك على الايميل
الناس مش كويسة زي ما انتى متصورة
ربنا يحفظك
على فكره لو ناويه تروحى ابو الريش الجمعه مينفعش علشان الصيدليه قافله لو هتدى ادويه وعلشان حد يساعدك هناك لازم تروحى السبت ابقى اتصلى وانا اقولك روحى لمين او ابعت ميل وانا اقولك
مش هتبطلي الحركات القارعة بتاعتك دي بقي
وتشوفي بيت وابنك
وتبطلي حججك دي وعايزة الجدع يغسل اطباقة
هو طفش من وشك من شوية
ما هو من عمايلك
خوخه
اللى تحت ده appy من غير صورتى مش انا
يا حبيبتى اضغطى عليه وانتى تعرفى مين اللى صح
حسبى الله ونعم الوكيل بجد فى الاشكال دى ربنا ينتقم منهم
بصراحة تسلم ايدك
وانا متفق معاكى فى حاجات كتير
وبغض النظر عن الثقة بالنفس من عدمه
الاسلوب والتعبير الحقيقة شدنى وعجبنى اكتر
تحياتى
ادام الله عليكى عدم ليليتك يا خيخة
و ابعد عنا مدحت و ما شابه ذلك
ههههههههههههههه
تحياتى
اسلام
appy اما بقى الخبؤ اللى واخد اسم
بعد اذنك يا ابى حرد انا كمان
احب اقول ان كلنا عارفين اسلوب ابى
و عارفين الطريقة بتاعتها فالكلام
و كمان البروفايل بتاعك
منذ 2008 سبتمبر
عدد مرات العرض 28
appy اما بقى
فالبروفايل بتاعها قديم يا خبؤ
و عدد مرات العرض كتير يا خبؤ
منذ 2007 ديسمبر
عدد مرات العرض 14,097
ابقى استغطى كويس قبل ما تنام
على فكرة احنا مبسوطين ان حد خبؤ زيك متغاظ مننا كلنا و ده دليل على نجاح حد زى ابى
و بقولك
حمرا
الطاحونة على فكرة
(فيلم ظرف طارق)
واخد بالك من اسم الفيلم
رئيس جمهورية نفسي
حودة الغالى
ربع جنيه بس
يا سيدى علشان خاطر البقين الحلوين
هاديلك خمسة وستين قرش
تحياتي ليك يا حودة
لست ادري
لأ حياتى ماكنتش مرفهة
انا ماكنتش ليلى فعلا
لكن مش معنى كدة
انى نفذت اللى فى دماغى بمنتهى السلاسة
كنتى تيجى تشوفى خناقاتي مع اهلى أو جوزي فى كل مرة اصر فيها على وجهة نظري
وبعدين ليه معتقدة ان انا بالبوست ده
مش هادى لليلى حقها انها تقول وجهة نظرها
انا البوست ده
وجهة نظرى انا كمان من فكرة كلنا ليلى
كون ان وجهة نظري بتتمحور حول جملة انا مش ليلى
لكن ده مايمنعش غيرى انه يقول وجهة نظره برضه
وبالعكس بقى
ده انا مستنية يوم 19 اكتوبر ده بفارغ الصبر
محتاج اعرف اكتر وجهة نظر المدونين من كلنا ليلى
تحياتى ليكى
ومشكورة على تبني الفكرة دى
حاسوباتية
الغريب فى الموضوع
انى ماكنتش بحس بالثقة فى نفسى دى مع كل خناقة بعملها علشان اثبت وجهة نظرى
عايزة اقولك انى ماحستش بالثقة دي غير من خلالكم انتوا
تعليقاتكم على الموضوع ده
خلتنى اشوف نفسى بصورة تانية
واقول
اه صحيح ده انا عندى حبة ثقة بالنفس أهه
بالنسبة للبوست بتاعك
حاضر من عنيا الاتنين
هاروح اقراه بعد ما خلص رد على التعليقات
تحياتى ليكى
حنين
وانا كمان مش عجبانى الحتة دي
وعارفة انها عيب
وانا ماقلتش انها ميزة فى ليلى
منورانى يا حنين
المجهول
رغم اقتناعي بجملة
ما شتمك الا من بلغك
الا ان فضولى هيقتلني علشان اعرف انت تقصد مين بالظبط
ولذلك معنديش مانع ابدا انك تبعتلى تسجيلات الماسينجر اللى عندك
appy
انا كنت ناوية فعلا اروح يوم الجمعة
كدة كل ترتيباتي هاتتغير
لانى مش هاقدر اروح يوم السبت قبل الساعة واحدة
على العموم اليوم اللى هاروح فيه هاتصل بيكى الصبح تقوليلى اروح اقابل مين هناك
شكرا ليكى يا أبي على اهتمامك
تحياتى ليكى يا جميل
أبي المزيف
لا بصراحة الراجل ماطفشش من شوية
ده طفش من كتير
بس اساسا مين اللى قالك ان الراجل طفش؟
هو لسة ماطفشش
واوعدك لو طفش
هابلغكم علطول
بس هو هل من الذوق والادب والامانة
انك تاخد اسم واحدة مدونة وتدخل تعلق باسمها
ايه المشكلة لو يبقى عندك شخصية مستقلة
وتدخل تعلق باسمك انت
عموما شكرا على متابعتك
وتحياتي ليك
appy
يا ابى هو انا لسه هاعرفك
ربنا يهدي الجميع
ويسامحهم
تحياتى ليكى
همس الاحباب
شكرا ليك يا خالد
تحياتى ليك
مواطن مصرى نائم
شكرا ليك
وماكنش له لزوم انك ترد على أبي المزيف
كون ان احنا نضيع من وقتنا ثواني للرد على الناس دى
يبقى احنا كدة
اديناله اهتمام اكتر من حقه
تحياتى ليك
شكرا على تواصلكم معايا
اختكم خيخة
مدونتك دى اخترااااع على فكرة
انا قاعدة عمالة اقرا و اقول مين
الشخصية الثورية دى؟
انا عاجبنى اوى البوست بس مش لاقية رد..بيتهيألى المشكلة هى انفصام الشخصية..الراجل الشرقى راجل منفصم بامتياز فواحد منفصم فى مجتمع ما بيعترفش غير بالرجالة..
فاكيد النتيجة مش هتكون فى صالح الست
الست فيه درجة تانية..مواطن مالوش حقوق مواطنة..و ليه مواطن اصلا دى مجرد وعاء شغلته يخلف و ينضف و يغسل و يكوى و ينشر الغسيل لكن يفكر و يشتغل و يبقى ليه كيان و شخصية؟حاشا
لله
بس ده ما يمنعش ان ستات كتير نظرتهم لنفسهم غلط من اولها لاخرها..ترسبات و موروثات و كلام فاضى بيتقالهم و بيخليهم يقتنعوا انهم مش بنى ادمين اساسا الست فى ايدها تقرر تكون و فى ايدها تقرر انها ما تكونش
اسفة على الرغى ده كله بس فعلا مبسوطة بمدونتك اوى:)
والله يا خوخه انتى مش ليلى نوهائى
بس عجبانى اوى ثقتك فى نفسك
تسلم ايدك يا خوخه
بس على فكرة انا ليلى خالص
الموضوع زى ما انتى قولتى
كبير كبير كبير
عجبنى جدا بل وشرفنى انك لم تكونى ليلى
يوما ما
تعرفى انا نفسى بسألنى الوقتى هو انا كنت ليلى؟؟
لا تصدقى فعلا الحكايه محتاجه بوست
عجبانى اوى قوتك وثقتك بعدم قهرك يوما ما شئ جميل طبعا ومهم اوى
انك مبتحبيش الاستشهاد وممشيتيش مع موجة ليلى كمان شئ عجبنى جدا
حاجات كتير عجبتنى
لو حصل واتقابلنا قريب لازم نتكلم فيها
سلام ياقمر
بوست حلو
عارفه يا خيخه
موضوعك ده من اقوى المواضيع اللي الواحد يقراها ويقف متنح بتاع ساعتين تلاته مش عارف يعلق يقول ايه
وفي الاخر يقوم يعمل كوباية نيسكافيه بلاك عشان يعرف يكتبلك تعليق اللي هو .. وهو راجع من المطبخ يشوف في التلفزيون حلقه من برنامج يعجبه يقوم يتفرج عليها ويكسل يجي يعلق لانه مش هايضيف حاجه
بعد اذنك هقوم اكمل فرجه عالبورنامج
سلامي لشرفنطح
سلامووووووووووووز
ازيك يا خيخة واحشانى اوى
كل سنة وانت طيبة ورمضان كريم
انا رجعت التدوين تانى وحبيت اجى ادحرج السلام عليكى
وانا كمان عمرى ماكنت ليلى
بس دة لا يمنع انها موجودة وبقوة
يمكن مش فى القاهرة
بس هى موجودة وبغزارة فى الارياف
كلما قل مستوى التعليم كلما زادت نسبة ليلى فى المجتمع
بنوتة مصرية
ستات كتير نظرتهم لنفسهم غلط من اولها لاخرها..ترسبات و موروثات و كلام فاضى بيتقالهم و بيخليهم يقتنعوا انهم مش بنى ادمين اساسا الست فى ايدها تقرر تكون و فى ايدها تقرر انها ما تكونش
كلامك ده حلو
بس برضه حتى لو الست قررت انها متكونش حاجة
فهى برضه كدة تعتبر مش ليلى
كفاية انها خدت قرار
اى كان القرار ده فى مصلحتها ولا لأ
لكن فيه ستات مالهمش حتى الحق فى انهم ياخدوا قرار
لأن المجتمع اللى حواليهم اذا كان بيتمثل فى الاهل او الزوج او الظروف المحيطة
منعهم من الحق ده
اعتبري البلوج بلوجك
وارغي براحتك
وشكرا على زيارتك
حنين القلب
الف شكرا ليكي يا حنين
ومستنية اعرف تجربتك ووجهة نظرك في فكرة كلنا ليلى
تحياتي ليكى وواحشاني جدا
دعاء مواجهات
خلاص يا سيتي احنا فيها
يوم 10 اكتوبر هيكون تجمع حريمي فى الخير
تعالي يوميها وبعد ما نعمل الخير نقعد كلنا قاعدة حريم ونتناقش فى الموضوع ده مع بعضينا
تحياتي ليكي
عبده باشا
شكرا ليك
سوووو
البورنامج اهم طبعا
هههههههههههههههه
كفاية زيارتك يا سوووو
انت منورني
سيمبل جيرل
يااااااااااااااااااااااه
اخيرا يا شاهندة
فينك يا بنتي
الجيزاوي خدك مننا خالص
ربنا يتمملكم على خير
منورة البلوج كله
تحياتي ليكي
شكرا ليكم كلكم على تواصلكم معايا
اختكم خيخة
كلام موزون جدا جدا
:)
سلاسة في التعبير وشرح وجهة نظر رائعة بلا خلاف
انا مبسوط جدا من اللي كتبتيه
بالفعل مش لازم الناس وخاصة البنات يكونوا زي بعض
بس ده ميمنعشي ان اكثر البنات لسة مش واخدين حقهم
وانا شخصيا وان كنت بعتبر بيتنا فيه قدر كبير من العدالة الا انه كنت انا كولد واخد حقوق اكثر من اخواتي البنات الاتنين
بحجة انهم بنات ويتخاف عليهم
عجبني مجموعة الحاجات اللي عاوزاها
منها مثلا
مش عاوزة البنت تسهر لوش الفجر
بس عاوزة الولد يبقي زي البنت ويرجع 10 بالليل
اهي دي في الجون جدا
انا مقتنع ان الرجالة لازم يبقوا مسئولين ويتحملوا المسئولية كما يطالبون بالولاية والوصاية والقوامة
لان الامر مش وان واي
لأ
ده تو واي
بالفعل
لازلت اؤمن ان المرأة العربية بشكل عام مظلومة في كثير من الاشياء
واؤمن ان بعض النساء اسأن استخدام الحرية ولكن الرجال هكذا فعلوا ايضا
واؤمن ان حياتك في انكي كنتي حرة ولقيتي كثيرا من المساواة مع اخوكي الولد ان هذا امر ليس شائعا وليس كذلك نادرا
لقد كنتي ربما من المحظوظين وهذا خير عظيم
:)
ربنا يحميكي دائما
اشكر علي البوست الرائع ده
جزاكم الله خيرا
أنا كان نفسي أقولك و أنا كمان مش ليلى بس يعنى على قد السن و الأحوال متهيألى أنا ممكن اقولك انا مش أم محمد ( طبعا لانى أم هبة )
أنا قريت البوست و كل التعليقات ، وفعلا الجزء الأخير فى البوست ده رائع ، المشكلة عندنا ان الناس مش بس عايزيين يكتموا على نفس ليلى لكن برضه عايزين يسيبوا الرجالة براحتهم شويتين زيادة ،
يعن أنتى رفضت تلبسي الحجاب غصب عنك ، طب ايه رأيك فاللى بيفرضوا النقاب.
المشكلة فعلا فى التربيه ، أنا أهلى ربونى بطريقة فعلا أعتقد انها كانت متوازنة جدا مع أخويا ، يمكن و انا صغيرة عمرى ما حسيت انى ليلى ، لكن كل ما كنت بأكبر كان الموضوع بيختلف ، وخصوصا لما بدأت أدخل فى الشغل و الجواز و مشاكلهم ، لغاية ما مرة قلت لبابايا انت مش دايما كنت بتقوللى ان المجتمع لازم يمشى على رجلين ، و ان توزيع العمل فى البيت يعنى تورزيع وقت الفراغ ، و الحاجات اللى دايما كنت تقولها لى ،
فرد عليا و قال لى المجتمع فعلا بيمشى على رجلين بس رجل منهم عرجاء ،وطبعا انتى عارفة ان بعد الجواز الواحدة لازم تتنازل علشان تحافظ على بيتها ، أنا آسفة طولت عليك كتير أوى بس أصلك جيتى على الجرح ، كل سنة و انت طيبة ، و اوعى تبقى ليلى أو أى حد غير نفسك ولو انى نفسي أعرف طب خيخة ليه باه انا شايفاك جدعة و زى الفل
خوجة انا حبيت ارد واعلق لقيت ان التعليق محتاج بوست لوحدة لو مهتمية
هو على انا اهتم
Post a Comment