Thursday, October 16, 2008

إن فاتك الألماني مش هيرجع تاني



من منطلق إني عايزة أكون لشريف الماما السوبر
وإلا ماما تجدر
إلا ماما تجدررررررر
إلا تجدرررررررررررررررررر


قررت إنى أخد كورس ألماني علشان أقدر أتابع شريف
لأنه بياخد فى المدرسة اللغة التانية ألمانى

و أنا كل علاقتى بالألماني ومعرفتي بيه
مأخوذة من فيلم النمر الاسود
لما وفاء سالم تدخل على أحمد زكى
وهى لابسة الشورت ومسحللة شعرها وبتقوله
صباه الهير يا مهمد

ونظرا لأنى برضه عارفة ومتأكدة إن الألمانى مش بس
صباه الهير يا مهمد
وإن اكيد فيه كلام تانى
زي مساه الهير يا مهمد

فقررت إنى معتمدش على طريقة فيلم النمر الاسود
فى تعلم اللغة الالمانية
اللى هى الدراسة فى البيت
واعتمد على معهد جوتة
وأتمشور وامرى لله
من أكتوبر للدقي ومن الدقى لاكتوبر
وكل حاجة تهون علشان خاطر عيون شريف
وخصوصا كمان انه ينقصنى للتعلم فى البيت
الشورت بتاع وفاء سالم

المهم إني إشتركت فى الكورس
ومن هنا كانت بدايتى مع طريق الاجرام
قصدى التعليم

الدرس الاول
الفراو يعنى المدام: جوتن تاج
انا فى عقلى بالى: احنا هنستهبل
هى مش كانت جوتن مورجن
مش وفاء سالم قالت لأحمد زكي
جوتن مورجن يا مهمد يعنى صباه الهير يا مهمد

الفراو: جوتن تاج أز جود افتر نون
انا فى عقل بالى: وانا اللى كنتى ظالماكى ياحبة عينى

الفراو موجهة كلامها ليا: شبرخن زي دويتش
انا رافعة راسى وببصلها بإذبهلال
وبؤي اتفتح حبة صغنانين: ها
الفراو مكررة كلامها: شبرخن زي دويتش
انا فاتحة بؤي وعلامات الغباء
تقطر قطاطير من على وشي : ها
وبعدين تداركت الموقف
وقلت اكيد بتسالنى عن إسمي
فاستدركت ورديت وقلت فجأة: نوران
الفراو: ناين , ناين. شبرخن زي دويتش
أز دو يو سبيك جيرمن؟
انا : وهو أنا لو كنت بتكلم ألماني إيه اللى يجيبنى هنا؟
الفراو هزت راسها وابتسمت
وسابتها منى وراحت على طالب تانى
وعدى باقى اليوم من غير اى حوادث

الدرس التانى
انا بسبق بالكلام وعاملة فيها البت العريفة وبقولها
جوتن تاج
الفراو: جوتن تاج
في جيت إس إينن؟
أنا نفس نظرة الاذبهلال والغباء
والقطاطير اللى بتقطر مني
ونفس فتحة البؤ البلهاء: ها
الفراو المرة دى تداركت هى الموقف
وعرفت إنها لو قعدت تكرر كلامها عشرين مرة
مش هتلاقى رد فعل مني غير: ها
فتلافيا لأى شلل ممكن يصيبها قالت
فى جيت إس إينن أز هاو ار يو؟
انا: فاين ثانك يو
هى: ناين, دانكي ..جوت
انا هزيت راسى وكلي ثقة
ما انا فهمت بقى يبقى أهز راسى براحتي
المهم هزيت راسى بثقة وقلت : دانكي ....جوت
و الحمد الله عدى اليوم
بدون ان أتسبب في اي حوادث شلل للفراو

والبقية تأتي


وكل الكلام اللى فوق ده نطلع منه بحاجة واحدة بس
إنى اتعلمت الأرقام من واحد لحد عشرة بالألمانى
هيييييييييييييييه


إنتهى
بت خيخة وأى كلام

53 comments:

الطائر الحزين said...

ربنا يوفقك

بت خيخة وأى كلام said...

طائري الحزين
شكرا
بس مالك بتقولها من غير نفس كدة؟

m5m said...

هههههههههه

انتى فظيعة يا نورا

بسم بسم الله تاتش وود يعنى عندك طاقة حلوة قوى و شكلك ممتازة فى تنظيم وقتك

ربنا يكرمك و يكرم هانى و شريف بيكى

بس أخبار السواقة ع المحور ايه معاكى؟

~*§¦§ Appy §¦§*~ said...

مبروك يا خوخه خطوه حلوة والله بجد ربنا معاكي يا قمر

Z_Diva said...

Zie muchten deutch gelernen, das ist zher gut meine freunden, das ist ein zehr shon shprace.

ich kann es spreche auch, aber mein deutch ist chlesht, ich mucho auch zur ghotte instituee gehen fur lheren :D

-wenby y5ty tb2y tsala7yly elkt3a elly fo2 de ynobek fya sawab, l7san shakly kda nst elklmten elly knt 7fzahm :D-

م/حسام القاضي said...

ماشاء الله ألماني حته واحده
انا برضو عايز ام فارس عندي تعمل كده عشان الواد فارس عنده دلوقتي سنه ماشاء الله ولازم نلحق :)

فعلا تاتش وود ازاي بتقدري تنظمي وقتك ده سؤال بجد وعايز اجابة عليه عشان انقلها لام فارس لانها لايصة مع الواد فارس مش عارفه حتى تعمل لنا اكل في البيت

وليكن شعار كل أم من دلوقتي

جش تاج دو طاخ بوم
يعني ماما تجدرررررررر بالألماني
:)

ست البيت said...

في هايست دو ياخوخة؟
زن زي ست البيت

من البرنامج الأوروبي
قدمنا لكم فقرة
كيف تتعلم لأمانية في 3 مرات يا سيد
كان معكم أمام السبورة العسل خوخة هانم
ومن وراء الاحداث ست البيت
خوخة مش انا كنت في المطبخ امبارح

only spot said...

سلام عليكم
ههههههههههههههه
بقى درسين يخلوكى كده متقلقيش خير ان شاء الله وبالشفا ان شاء الله
يا بنتى متقلقيش القادم احلى ههه
tschüs und ich wünsche dir alles gute

ملحوظه على الماشى

فعل شبرشن مش شبرخن اوك
خالص تحياتى لاحلى بت خيخه

ابن حـجـر الـعـسـقـلانـى said...

يا بنتى مش معقول .. أنا ضحكت ضحك

الفراو لما قالت لك كلمة: شبرخن زي دويتش

أنا افتكرتها بتقارن بين مصر و ألمانيا و بتقولك إن شبراخيت زى ألمانيا
بس أنا رجعت تساءلت .. إزاى تقارن بين شبراخيت و ألمانيا ؟؟ شبراخيت دى مقاطعة من مقاطعات الولايات المتحدة المصرية .. إزاى تقارن بينها و بين ألمانيا الدولة .. ثم هى هاتعرف شبراخيت منين ؟؟

ألا قوليلى صحيح .. أصل الشىء بالشىء يذكر ... بما إن الباشمهندسة اللى بتدرسلكم لقبها يبقى "فراو" .. هل دة معناه إنها اسم على مسمى ؟؟ فراولة يعنى ؟؟ و اوعى تفهمينى صح

خمسة فضفضة said...

السلام عليكم ورحمة الله وبركاته

الف مبروك
عقبال ما تاخدي دكتوراه في حتي ...اقصد في الالماني

ojg said...

مصيبة ياخواتي
كارثه يا ناس
ايه يا بنت انتي الحلاوة دي
مش ممكن
خلتيني أموت في الألماني مع اني مش بطيقه
انا عايزة اتعلم وخاصه فعل شبرخ يشبرخ إذا هو شبروخ ده
ألا تصريفاته ايه يا خيخة
صباحك زي الفل
ضحكتيني يا شيخة ربنا يجعل أيامك كلها سعادة
ربنا يوفقك في الألماني يا خوختي
ويخليلك شريف ويبقى مهندس أأأأأد الدنيا
قولي آمين
:))

أليس في بلاد العجائب said...

السلام عليكم

ضحكيني والله

علي فكرة مرات اخويا زميلتك اكيد علشان هي وقعت روحها في نفس الحدوتة دي و دخلت سليم باكورة انتاجها( اولي حضانة ) المدرسة الالمانية .. ابقوا اتعرفوا علي بعض وممكن ابقي ابعتلكم سليم يذاكرلكم ..

انا عن نفسي درسته لغة تانية في الكلية 4 سنين و اللي فاكراه منه حاجات بسيطة و قعدت معاها في الدرس الاول دا زي ما انتي بتحكي كده بالظبط بس بيتهيالي هي اللي بيديها Herr مش Frau ..

الله يعينك

اه علي فكرة لما تغلبي معاهاابقي قوليلها ايش فريشتيه نيشت :)

AboHamza said...

خير ما فعلتي والله يا أم شريف
ربنا يوفقك ويوفق شريف
واتفضلي الحتة الباقية دي من آثار الالماني اللي انا درسته
داس إيست نيشت آين بوخ زونديرن آين هيفت"

:)

الشنكوتي الكبير said...

ايش لبديش

اظن مفيش الماني اجدع من كده بقى
ههههههههههههههههه

مبروك يا استاذه

سلااااااااااااااااااااااااام
اخوكي ايهاب

الطالبة عفو الله said...

ربنا يوفقك يا خيخة
بس هو سؤال كدة قاعد يتنطط في دماغي
ازاي يعني تاني لغة لشريف الالماني مش الانجليزي هي تاني لغة و لا ايه النظام و لا المسالة اختيارية
انا مش فاهمة
ما علينا
المهم يا ستي لما تتعلمي ابقي علميني معاكي ادينا نكتسب لغة

طالب ثانوى said...

انا كنت باخد المانى فى تانية ثانوى ولسة هتخشى فى الغويط

اوف فيدر زين

Diyaa' said...

هاهاهاها
ربنا يوفق يا ستي ويخليكي لشريف ويخلي شريف ليكي
بس هو شريف مش بياخد إنجليزي ليه ؟

tarek alghnam said...

اختى الكريمه
يارب يوفقك يارب
وجميل ان الانسان يرتقى بنفسه وينميها
تقبلى تحياتى
ودمتى بود

نونو عاشقة النقاب said...

انجليزي دة يا مرسي

mohamed ghalia said...

نطلع من الكلام إلى فات ده بإيه
بكام كلمة ألمانى +الحروف
تحياتى ودمتى بود

حاتم عرفه said...

ها؟

شدي حيلك.. كله يهون عشان خاطر شريف

على فكرة أنابقالى مدة بحاول اتعلم ألماني.. بس لأني مش فاضي قررت أنى اتعلمه من خلال الأغاني الألماني
باجيب أغاني ألماني وأسمعها وأجيب الترجمة بتاعتها من على النت للإنجليزى

جربيها يمكن تساعدك أو تساعد شريف
هى أغاني غريبة شوية.. بس هاتستفيدي من الترجمة..
جربي وقوليلي رأيك
..

ده لينك كليب أغنية من أغانيهم

http://www.youtube.com/watch?v=Mm2eT-sTVys

و ده لينك للترجمة

http://www.sing365.com/music/lyric.nsf/Du-Hast-English-Lyrics-lyrics-Rammstein/FDFA3CCC2BA8B0CF48256CAF000ABDF1

هو مثال صغير بس مكن يفيد..

تحياتي

و جوت ناخت

مهندس مصري said...

مش عارف بأحس إن الألماني ده لغة زي الشتيمة كده
و حيث ان انا كنت ضعيف في الفرنساوي كلغة تانية في الثانوية العامة
فمأعرفش في الألماني غير
جوتن مورجن و جوتن تاجن
و في هايست محمد
و إيش لابضيش
ايش ليبي ديش آوخ
و فوهرر
و هر
و فراولاين
و فراو

يعني و شوية هرتلة تانية كده

بس برضه لما تتكلمي معاهم مش عارف ليه برضه بيدوني احساس بالشتيمة
:)
لغة عجب زي المدفع الرشاش تمام

ňįĝŗő said...

و الله ياختي يا نونا
إيه ياختي يا نونا دي ؟
مش لايقة .. صح ؟
و الله ياختي يا أم شريف أنا استجدعتك في حتة إنك تتعلمي الألماني علشان تواكبي آخر التطورات في حياة ابنك دي
انت أم حلوة قوي يا نوران
ربنا يباركلك في عقلك و في ابنك

ماي نامي ايست نوراااان
(*_^)


يلا سلام

صاحب المضيفة said...

ألماني

اهو هو ده اللي كان ناقص

شوية وتطلع تدوني بالألماني وتتريقي علينا واحنا ولا نعرف حاجه



:):):):):)

سلامي لشيكو باشا

كيارا said...

ههههههههههههههههههههههههههههه

تحفففففففففففففففففففه بجد

يالهوي

انا لما كانوا بيقولولي تاخدي انهي

الماني ولا فرنساوي

اختارت الفرنسي

وكنت متفوقه فيه جدا

الماني يالهوي


ربنا معاكي

ضد التيار said...

ههههههههههههههههههه

ربنا يكون فى عونك ألمانى مره واحده

اللغه الوحيده اللى بحس ان عندها الخاء والشين زياده شويتين

بس بجد خطوة جميله منك ربنا يوفقك فيها

ان شاء الله تبقى سوبر ماما لشريف

زهرة الياسمين said...

ايه التطور ده يا عسل
ربنا معاكى يارب

mohamed said...

جوتن نخ
بس نخ دى المانى مش مصرى
لان النخ المصرى ما ينفعش فى المانيا
تحياتى لكى ولابنك حفظه الله

a Dreamer with feet on the Floor said...

Dear.. I like what U did and Ur Courageous. U educate Urself 4 Ur son.. No age 2 start learning a new Thing..
I started Learning German just as U .. I was ought 2 . as I was going 2 write my theis,, and have my ph.D from Germany.. so I lived al that stage..
in the next Lecturers.. U will learn moreand U will enjoy learning new culture and Mentality...Deutsch sprache ist Nicht zu schver zu Lernen.. du wirst gut tun..take care

أنسانة-شوية وشوية said...

والله يا خيخة انت مالكبش حل. انا فطس علي روحى من الضحك. ونطلع من البوست ده بأيه ان
فى جيت إس إينن أز هاو ار يو؟
يعنى قريب كلنا هنتكلم المانى والبركة فيكي
ربنا يوفقك

واصطنعتك لنفسي said...

احترمت فيكي بشدة رغبتك في التعلم من اجل ابنك

ربنا يباركلك فيه ويجعله ولد صالح تقر عينك به إن شاء لله
-
إيمان

صبرني يارب said...

برافوا عليكى

انا لا ممكن كنت اعمل فى نفسي حركه زي دي وادخل ولادي مدرسه بياخدواالماني

انا بالعافيه ساده فىالانجليزى يا امي

وربنا يخليى ادوات اللغه فى جوجال مشبرقاني بصراحه

nona said...

اية دة المانيا مرة واحدة ياخوخة
كدة مش هنعرف نكلمك تانى و هنلاقى لسانك اتعوج و بتكلمينى المانى
دة خطر على صحتنا يا بنتى خلى شريف ياخد اعنجليزى احسن حتى لما نحب نكلم نعرف هو بيقول اية
ربنا يكون فى عونك و يوفقك يا خوخة بس اوعى فى يوم تقولننا صباخ الخير بالالمانيا لحسن ساعتها هنقول ها بفتح البوق عشرة متر مش حبة صغيرين زيك كدة هههههههههههههههههههههههههههه

ايام العمر said...

جود النخ
هى دة الكلمة الى جات فى بالى اول ما جبتى سيرة الالمانى
ومعناها صباح الخير
يلا اكيد هتنفعك
وبالتوفيق يا خيخة

حنين القلب said...

يا ربنا
دنا افتكرتك بتحضرى عفاريت
ده الالمانى ده صعب اوى يا خوخه
ربنا يوفقك وتتعلمى بسرعه وكويس انا كمان هحفظ معاكى

اهالينا زهقوا يربونا said...

ههههههههههههههه

بجد دمك شربات بس اية القدرة دى

ألماااااااااااانى مرة واحدة دة احنا

كدة مش هنعرف نكلمك

بس أحنا مثقفين بردة ومنعرفش من

الالمانى الا كلمة واحدة وياعالم اذاكانت

صح ولا لأ ابقى أسألى شريف وهية

سيندالالوس

متهيألى سمعتها كدة

على العموم نحجر أول دكة فى الدرس الخصوصى خمس مطارح بعد متخلصى

وسامو عليكو بقة

totaaaa said...

برافو عليكى يانوران
انا مبسوطة اوى منك انك بتتعلمى الالمانى عشان خاطر عيون شريف وعشان تكونى معاه فى دراسته
بجد هايلة وانتى اكيد ام سوبر


مبروك على الارقام من واحد لعشرة عقبال الحروف يارب
ربنا يوفقك

سنابل قمح said...

سكر يا خيخة
كويس انك ماافتكرتيهاش بتشتمك أصل شكل الكلام شتيمة الصراحة
بس بيقولوا الألماني أسهل لغة ف التعلم أبويا كان بيقول لي كدة لما كان بيقنعني أتعلمه وأدى النتيجة

وومن said...

يعني ماشاء الله يا خوخة انا شايفة المدونة كلها قلبت الماني

حضرة الماما السوبر فكرتيني بمامة صديق ليا عاشت في ألمانيا 13 سنه وبالتالي العيال كمان بيتكلموا الماني

لما كنت ابقي معاهم وتحب تقولهم حاجة كدة ولا كدة تقلب الماني

وانا اقعد اسأل صديقي اوعي ياواد تكون الوالده بتشتم

يقولي لا متخافيش كله في السليم

طمنتيتي يا شيخة

ربنا يخليلك شريف وتعيشي وتبقي سوبر يااااااااااارب

همس الاحباب said...

هههههههه
بجد
حاسس انك اتجيبى للفراو
شلل الرعاش
فى نهاية الكورس
بس بجد انتى مشكلة
ربنا يوفقك يا رب

آخر العنقود said...

ان شاء الله ما رجع يانونا
ايه يانونا الكلام ده
ولا فهمت
:)
بس بجد ربنا يوفقك فيه عشان خاطر شيكو
وبنيتك الحلوة دى ربنا هيكرمك ان شاء الله
يابختك ياعم شريف
انا مش بقر ولا حاجة ياخوخة
:))
ربنا يخليكوا لبعض

الرومـيصاء said...

ربنا يعينك
انا حتى الكلام الى بالعربى مفهمتهوش
مش عارفه العيب فى مخى
ولا فى الامانى
بس على كل حال
ربنا يوفقك
دمتى فى حفظ الله

mony said...

ههههههههههه



سكر يا خوخا



كالعادة طبعا



عموما اي خدمة يا فندم

انا دارسة الماني
اي مساعدة اطلبي يا فندم براحتك


بس مش عارفة هكون فاكرة ولا ناسية


ربنا معاكي يا جميل

mony said...

بس اهم حاجة الممارسة

يعني لازم تمارسي اللغة اللي بتاخديها ديه علشان تثبت في دماغك يا جميل

مش مع شريف بس


ياسلام بأه لو قدمتي و اشتغلتي في السفارة


بس ماتكسليش

Monzer said...

وأنا اتعلمت ماقراش مدونتك لما أكون فى اجتماع مع رؤسائي :(

حسبي الله ونعم الوكيل

Abeer Soliman said...

دمك شربات وسكر

أرجو من زوارك متابعة مدونتى يوميات عانس:
http://yawmiyat3aness.blogspot.com

3ala asm masr said...

مبررررررررررروك
يلا كله يهون عشان خاطر عيون شريف
وكمان دى حاجه كويسه انك تتعلمى لغه
انا كمان نفسى اتعلم المانى اوى وايطالى وعبرى
ههههههههههه
مش عارفه هتعلم كل ده ازاى

اهو ده عيبه said...

مبروك
عقبال الباقى ان شاء الله
وتبقى احسن من وفاء سالم واحمد زكى كمان
سلام

Medicine Break said...

وهو يعنى شريف لازم ياخد المانى
ماله الفرنساوى
نو و فو والزو واخر دلع
انما ربنا يوفقه
والموضوع ظريف طبعا واسلوب رائع

Tamer Alhosiny said...

ههههههههههههههههه

واضح انه بقي في طريقة جديدة لتعلم اللغة الالمانية

هههههههههههههه

بعد احمد زكي ووفاء سالم
ومعهد جوتة
في كمان البنت الخيخة

ههههههههههههههههههههه

في جيت إس إينن؟

تامر الحسيني
انسان عاشق حر

Nourhan Sirag said...

برافو عليكي بجد خطوه هايله

فكرتيني ايام الثانويه لما كان اخويا بياخد الماني وانا كنت بتخض من النطق ده

انا كنت باخد ايطالي وهو الماني
انا اقوله ايطاليانو
وهو قولي دويتش :|

انا اقوله بون جورنو
وهو يقولي جوتن ناخت :|

مدونتك حلوه اوي وانا متباعكي من زمان بس كنت بتحرج ادخل أرد بصراحه

بس قلت لازمن ولا بد اخد الخطوه دي :D

soft rose said...

هايل يا خوخة
بصراحة كدة مش خيخة خالص
انا زيك برضه باخد كورس الماني
بس مش في جوتا
خلي بالك من النطق كويس قوي
واحلى حاجة في الالماني ان اللي بننطقه هو اللي بنكتبه مع وجود بعض الشواذ الطفيفة
هتعرفيها بالممارسة
المهم مبروك
وربنا يوفقك
ويا بخت شريف الجميل بماما خيخة اللي علشانه بتتعذب من اكتوبر للدقي وبالعكس
ابنائنا فلذات اكبادنا
ربنا يخليه ليك ويحفظوا

كان معكي
soft rose
من امام الكمبيوتر

meshmesha said...

برافو عليكى، بجد هايلة
عاجبنى فيكى قوتك وطاقة الحياة والطموح والحب للدنيا ولشريف ، زى السكر ن ربنا يخليه لك يارب
على فكرة انا خريجة السن المانى .. ما اشتغلتش بيه ونسيته شوية بس اكيد اقدر افيدك كمبتدئة وبجد تحت امرك وتحت امر شريف الطعومة القمر ده، ربنا يحفظه يارب

users online