و أخيرا ناموا

و لما كانت بطلتنا برغم الجو الساقع مش بردانة
الا انها اختارت انها تتغطى بالبطانية
نوع من انواع التقليد او الالتزام بعادات وقواعد شتوية
ان الدنيا لما تبقى برد لازم تتغطى
حتى ولو ماكنتش هى بردانة

التزمت هى بالقاعدة الشتوية
لكن البطانية مالتزمتش بوظيفتها
الا وهى التدفئة
ولكن البطانية زودت على وظيفتها
وظيفة اخرى الا وهى التعرقة
فبطلتنا وصلت بيها درجة الدفا تحت البطانية
الى مرحلة العرق

رمت هى البطانية عن جسمها
نفخت فى زهق من شدة الحر
رغم برودة الجو العام
قررت انها تغسل وشها بمية ساقعة

بعد غسيلها لوشها بالمية الساقعة
وبعد انتعاشها
قررت انها متنامش دلوقتى
و انها تقعد فى الفراندا شوية

لما دخلت الفراندا
حضنت نفسها
ايديها اليمين على كتفها الشمال
وايديها الشمال على كتفها اليمين
وبحركة اتوماتيكية ايديها الاتنين
كانوا بيتحركوا من فوق عند الكتف لحد الكوع
قالت لنفسها الجو هنا ساقع شوية
هاروح اجيب شال

راحت جابت شال حطته على كتفها
دخلت الفراندا
مالت على الكرسى البلاستيك الموجود فى الفراندا
ومسحت بصباعها السبابة الكرسى بخط مستقيم
وبصت على صباعها
ومسحت صباعها السبابة فى ابهامها
وقالت لنفسها
كويس الكرسى نضيف
الواحد يقعد وهو مطمن
وتقوقعت على نفسها فى الكرسى
قعدت تفكر وتقول لنفسها
معنديش حاجة افكر فيها
هافكر فى ايه دلوقتى
وفى الاخر قررت انها تعد النجوم

بعد ما وصلت لرقم 1852فى عد النجوم
سمعت ادان الفجر
مع ترديدها للادان
نزلت رجلها من على الكرسى وبتلبس شبشبها
متوجهة ناحية الحمام للوضوء

بعد ما خلصت صلاة
قررت انها مترجعش الفراندا تانى
ولكن بطلتنا لسة زهقانة
ولسة معندهاش حاجة تفكر فيها
ولسة ماجلهاش نوم

فى الاخر
قررت انها تدعبس فى المكتبة
على أى كتاب تقراه

*********************

بطلنا متغرب
بيفصله عن بطلتنا بلاد وبحور
الجو عنده برد جدا
والبطانية اللى عنده
مش بتؤدى وظيفتها على أكمل وجه
وعلشان كدة استعان ببطانيتين تانيين
واصبح مجموع مالديه من بطاطين تلاتة

تلات بطاطين فوق جسمه
ومع ذلك لسة بيترعش من البرد

قرر انه يقوم
يلبس بلوفر فوق البيجامة
وانه يشغل الدفاية
واقنع نفسه اللوامة اللى زنت على دماغه
وقالتله ان الدفاية بتستهلك كهربا كتير
وده ضد مبدأ التحويش
قال فى عقل باله
ان تشغيل الدفاية وما هيترتب عليه
من مصاريف كهربا كتير
هتكون ارحم من تكلفة ادوية
ممكن يشتريها لو جاله برد ورقد فى السرير

بعد خمس دقايق من تشغيله للدفاية
نفسه اللوامة كسبت الجولة الاولى
وقام من مكانه وطفى الدفاية

معرفش ينام
قرر انه يقوم ويشرب حاجة دافية
عمل لنفسه مج قرفة باللبن

حضن مج القرفة باللبن بإيده الاتنين
واصر انه يفضل فى ايده
قبل ما يرفعه ويشرب منه
محاولة منه انه يستشعر الدفا
الناتج من سخونية المج

راح ناحية الشباك
وماجرؤش انه يفتحه فى عز البرد
واكتفى بالنظر للشارع من ورا ازاز الشباك

على عكس بطلتنا
بطلنا كان عنده اللى يفكر فيه
ويشغل دماغه بيه

قعد يفكر فى الوظيفة الجديدة
ورئيسه فى العمل
اللى لسة هايقابله بكرة لاول مرة
وزملاء العمل اللى من جنسيات مختلفة
وياترى هيكونوا كويسين معاه ولا لأ

قعد يفكر فيها
وفى السنين الإتناشر
اللى جمعتهم سوا على الحلوة والمرة
قال فى عقل باله
احنا مالناش غير بعض

تفكيره خده لمنطقة تانية
وهى الرعب عليها من قعادها لوحدها
خوفه عليها بيوتره اكتر
وبيخلى النوم يهرب من عينه

قرر انه يروح يتوضى
ويصلى ركعتين لله
ويقرا شوية قرأن
علشان يقدر ينام وهو مطمن
ويطرد من دماغه كل الافكار المقلقة

*******************

رمت الكتاب بزهق من ايدها
قامت من مكانها
فضلت رايحة جاية فى الاوضة
زى الاسد المحبوس

ورغم محاولتها انها متفكرش فى اى حاجة
وهروبها من تفكيرها
الا ان الافكار توالت على دماغها
زى عيال بتجرى ورا بعضها
وكل عيل بيحاول يسبق صاحبه

وماكنش قدامها غير حل واحد بس علشان تقدر تنام

**********************************

ترررن ترررررررن
ترررررررررررن تررررررن

هو بصوت مخضوض: الو
هى بصوت باكى:ايوة يا بابا
هو بصوت مخضوض اكتر: ايوة يا ماما
مالك؟ ... انتى كويسة ؟ ... انتى بتعيطى ليه؟
هى بتبلع دموعها : انا كويسة بس انت واحشتنى جدا
هو يتنهد تنهيدة راحة: ويقولها انتى واحشانى اكتر والله
ايه اللى مصحيكى لحد دلوقتى؟
هى: مش جايلى نوم ... البيت كئيب من غيرك
هو: طب حزرى مين كمان مش جايله نوم؟
..............................
********************

مش مهم بالنسبالنا نعرف باقى احداث المكالمة
اللى تمت بين بطلتنا وبطلنا
ولا المهم نعرف انتهت ازاى او انتهت امتى
المهم نعرف
انهم اخيرا ناموا
وكل واحد فيهم مرسوم على وشه ابتسامة تجنن


انتهى
بت خيخة وأى كلام