Thursday, December 04, 2008

الحياة بقى لونها بمبي


بقلب جامد
وثقة متناهية فى قدرتى
على غسل الغسيل
بدون اى خسائر فى الارواح او الشرابات

وهو الغسيل إيه غير ان الواحدة
تفصل الهدوم الملونة عن الهدوم البيضا
عن الهدوم اللى بتبهت
الموضوع مش محتاج عالمة ذرة يعنى
لو جبنا أى عيل صغير هيعرف يغسل الغسيل

بس تقولوا ايه فى واحدة خيخة

فاصل اعلانى وننزل بالبوست

رايحة فين يا خيخة
رايحة اجيب إيريال
راجعة منين يا خيخة
راجعة من عند بتاع الإيريال
**********

قررت انى اغسل
جاكت شريف الاحمر بتاع المدرسة
أظن مافيهاش حاجة دى
أم وقررت إنها تغسل جاكت إبنها
مافيهاش اى مشاكل او أى حاجة مريبة
ولكن تبقى المشكلة
الا وهى اللون الاحمر

انا بصراحة مش بفصل الهدوم البيضا
عن الهدوم الملونة
بغسلهم كلهم مع بعض
اهم حاجة عندى ان ماحطش حاجة بتبهت وسطهم

جاكت شريف لونه احمر يعنى ملون
ودى كانت اول مرة اغسل فيها جاكت شريف

ونظرا لانى معرفش ازاى الواحد
يعرف القماشة اللى بتبهت
من القماشة اللى مش بتبهت
فانا مسكت الجاكت وفحصته
بين صوابع ايدى الإبهام والسبابة والوسطى
وقلت فى عقل بالى لأ مش بيبهت
ومحدش يقولى ايه الأسباب والقرائن
اللى خلتنى اقرر ان الجاكت مش بيبهت
لأنى هاقولكم معرفش
فبلاش تحرجونى بالسؤال ده

المهم انى قررت إنى أحط الجاكت
اللى مش بيبهت من وجهة نظرى
مع الهدوم البيضا فى غسلة واحدة علشان اخلص

وبعد ساعة ونصف مدة دورة الغسيل
بفتح الغسالة بقلب جامد
وبدلق الغسيل فى الطشت
استعدادا لنشره
لاقيتلكم اييييييييييييييييييييييييه؟
لاقتلكم تى شيرت بتاعى لونه بمبى فاتح
مسكته وقولت اللاااااااااااه
حلو اوى التى شيرت ده
واستغربت اوى
لانى فاكرة ان معنديش حاجة باللون ده
فقلت فى عقل بالى هو التى شيرت ده جه منين
ولسة بكمل دلق الهدوم فى الطشت
لاقيت بنطلون لشريف شبه بنطلونه البيج
بس لونه بمبى مقلم فى بيج
فانا استغربت اوى بصراحة
وقلت فى عقل بالى
مش معقول اكون وصلت لمرحلة
ان الهنا مزغلل عنيا
ومش بشوف غير بمبى بمبىىىىىى
فدلقت الغسيل كله بسرعة
واذا فجأتن الاقى الغسيل اتحول بقدرة قادر
اللى اللون البينك بدرجاته
فشهقت شهقة عالية
تدل على مدى خضتى
مشوبة بقدر قليل من حالة استنكار لغبائي
لأن اكتشفت ان الجاكت الاحمر بيبهت
وشرابى الابيض اللى مرسوم عليه
دبدوب بياكل عسل
بقى لونه بينك والدبدوب بقى لونه احمر
وتحس انه لغمط وشه بالعسل اللى بياكله
اما فانلات شريف وكلوتاته فحدث ولا حرج
بقوا كلهم لونهم بينك
يعنى هاقسمهم نصين
نص لملك بنت شاهى
ونص تانى لرقية بنت دعاء
وبيجامتى اللى عليها خرفان بيضا
بقى فيها خرفان بمبى كتيير
يعنى أبى هانم هتصادر منى البيجامة
وهتسيب خرفانى البمبى عليا

وانا من هذا المزنق
بكتبلكم البوست ده وانا بغنى
بمبى بمبى بمبى
بمبىىىىىىىىىى
والهدوم بقى لونها بمبى
وانا بلطم وشيكو جنبى
والشراب بقى لونه بمبى
حتى بيجامتى بقى لونها بمبى
بمبى بمبى بمبى
بمبىىىىىىىىىىىى



وكل الكلام اللى فوق ده نطلع منه بتلات حاجات

ان مش كفاية ابدا انكم
تفحصوا الهدوم بصوابعكم
الإبهام والسبابة والوسطى
علشان تقرروا اذا كانت الهدوم بتبهت ولا لأ


وإن الحمد لله الحمد لله الحمد لله
جاكت شريف فضل ثابت على لونه الاحمر
ومتحولش للون البمبى هو كمان


وإن الهنا هيزغلل عنيا لفترة طويلة من الوقت
وهاشوف كل حاجة بمبي فى الأيام الجاية دى


انتهى
بت خيخة وأى كلام

81 comments:

بت خيخة وأى كلام said...

انا واثقة فيكم ان محدش هيكتب تعليق وحش
ولذلك لاغيت المودريشن

بت خيخة وأى كلام said...

لأ رجعت فى كلامى
مش واثقة فيكم اوى بصراحة
خصوصا انى هاغيب فترة فلو حد شتمنى مش هاعرف امسح التعليق
ولذلك رجعت المودريشن تانى

طالب ثانوى said...

طب لية رجعتى المودريشن بس بوست روعة كالعادة بسئ انا سألت امى وكل نساء العيلة هل من الممكن ان تعرف المرأة الهدوم اللى بتبهت بمسكها بالاصابع؟كلهم قلولى انت عبيط يالة وهى هتعرف منين

يعنى انتى ازاى قررتى انة مبيبهتش هة

------

طالب ثانوى said...

ونسيت صحيح كل سنة وانتى طيبة وعيد سعيد

Oussama achraf said...

اية التشتت دة
انا اول مرة اهلق هنا عندك و تانى مرة اعلق فى حياتى اصلهم مسمينى الساكت بتفرج من سكات بس انا بحب المدونة بتعتك و هى و شريف
استنى بقى حقرا البوست و راجع

Eng. Ahmed Abo El-Ella said...

الله بمبي
ايه الفن السريالي ده
اللهم شمااااااااته
هههههههههههههههههه

Oussama achraf said...

و كمان تستفيدى انك تغسلى الشربات لوحدها علشان انتى بتحبيهم و مش لازم تخاطرى بيهم ابدا ....come and visit me in my blog ana lessa gedid
happy feast

~*§¦§ Appy §¦§*~ said...

احمدك يا رب هاخد منها الخروف البمبى ان جاااااااااى جهزى البيجامه يا خوخه وحياتى هأخدها وبما انى خسيت بتاع اتنين كيلو عن يوم ما شوفتينى يبقى هتيجى على قدى وابقى كميله انا مبسوطه لقيت حاجه اعيد فيها هههههههههههههه

كل سنه وانتى طيبه والحياه بمبى فى عنيك
بس يا خوخه انا بعمل حركه حلوه علشان اعرف الحاجه هتعمل لون او لا وده فى لبس البيت او الحاجات العاديه لان الخروج عندى موثوق فيه
بحط الكم بتاعه او رجل البيجامه او اى ححاجه تحت ميه الحنفيه وعليها صابون اعرف اذا كانت هتبهت ولا لا
وتعيشى وتاخدى غيرها ههههههههه

أبو حمزة said...

ربنا يأجرك ويخلف لك خيراً منها
أحلى حاجة في الموضوع ده إن رقية هاتطلع لها بشوية حاجات :P

واحدة مفروسة said...

الحقى بسرعة لو انتى غاسلة الغسيل ده امبارح
دخلى الابيض و معاه مسحوق حتلاقيه فى هايبر و لا اي سوبر ماركت
يشيل اللون الدخيل اوام
اما عن الجاكت ابقى اغسليه لوحدة
انا كتير حصلت معايا المواضيع ديه
و لعلمك يظهر لسة مش اتلسعت من الشوربة

أليس في بلاد العجائب said...

شكلك جديدة في التلوين دا :)

ماما عملتها فيا كتير اوي

بس عندنا غير البمبي في لبني وفي بيج

ودايما الشرابات الضحية :)

اغسليهم تاني و حطي كلورس الوان هيتظبطوا :)

والجاكت حطيله خل وانقعيه شوية علشان اللون يثبت

كل سنة وانتي طيبة و تعيشي و تبوظي وايه يعني

فداكي :)

ست البيت said...

كل عام وانت بألف خيخة
أقصد بألف خير يا خوخة
وسلام كبييييييييييييييييير
قووووووووووووووووووي
لشيكو
وطبيعة اللون الحمر بيبهت كده لوحدة

koukawy said...

لأ و استفدتي كمان درس موسيقي و تمرين للأحبال الصوتيه و انتي بتغني بمبي
هههههههههههههههههههههه
انا عملت زيك مره بس كانت الحياه لونها كحليييييييييييي

Mohamed Hamdy said...

البوست روعه جدا . الاسلوب الرائع يخلى الواحد يضحك من اللحظه الاولى للاخيره من البوست .. واهو درس ليكى ازاى تفصلى الى بيبهت والى مش بيبهت والا فعلا الهدوم كلها هتبقا بمبى بمبى بمبى بمبى

:)

تحياتى

الطائر الحزين said...

الحمد لله ان هذا الحدث بعد سنين للزواج والا كنت رجعتى بكعك ساخن

meshmesha said...

حصلتلى الحادثة دى قبل كده، برضه مش بعرف افرق احط ايه مع ايه ف الغسالة ولم اوفق فى اختبارات السبابة والوسطى والابهام، فحطيت حاجة بتبهت لونها اسود مع حاجات لونها ابيض بيج وبمبى وكانت النتيجة ان كله بقى بنفسجى

ومن هنا نطلع بتلات حاجات
ان التنوع ف الألوان مطلوب واذا اردتى الحصول على درجة مميزة من اللون البنفسجى عليكى بغسل ملابسك الفاتحة مع حاجة بتبهت لونها اسود.

ان اختبارات السبابة والوسطى والابهام لا تفيد فى معرفة اذا كان القماس بيبهت والا لأ

ان اللى زينا يا اما تسأل حد بيفهم، يا اما تودى الهدوم للدراى كلين وتخلص.

زهرة الجنة said...

ماله اللون البمبي يا خوخه
ده حتي تحفة ويجنن
انا حصلت معايا مرة بس اللون كان كحلي مش بمبي
يعني انت ارحم هههه
وخلي بالك من خرفانك اللي بقي لونهم بمبي عشان آبي بتحوم حواليهم

عيدك سعيد

قلب ينبض بالحب said...

مش عارفة ااقولك ايه غير ربنا يسعد قلبك قوي وكل سنة وانتي بالف صحة وسلامة وربنا يخليك شريف يارب ويباركلك فيه وتبقى حياتك دايما بمبي وحاول اشوف يوم الجمعة في النادي بأذن الله

خمسة فضفضة said...

السلام عليكم ورحمة الله وبركاته

ههههههههههههه

حصلتلي قبل كده يا خيخه بس مش بالبشاعه دي مش كل الهدوم يعني بقي لونها بمبي

وحصلتلي عقده ماعدتش باغسل اي حاجه جديده الا لما اتأكد تماما انها مش بتبهت بابلها الاول واجيب حتة قماش ابيض واعصرهم مع بعض لو لون القماشه غير يبقي بتبهت لو مش كده يبقي الحمد لله

كمان عمري ما غسلت حاجه ملونه مع الابيض

يلا تعيشي وتاخدي غيرها


سلام يا خوخه وكل سنة وانت طيبه يا قمر

ماتكتريش في اللحمة

زوجه said...

معقوله حد يعمل كده برده
وايه حكايه الطشت
بصي انا هقولك علي طريقه
الهدوم اللي تجبيها جديده وهتغسيلها لاول مره لازم تتنقع في البانيو نص ساعه وتشيلها وتشوف بتنزل لو ولا لا
وكده تعرفي
وربنا يعوض عليكي
انا عملت الغلطه ديه
بس كانت غلطه غير مقصوده
كان بادي بتاعي قطن بني عارفه انه بيبهت نسيته في الغساله وجيت اغسل الابيض بقيت احط من غير مابص في الغساله وعلي 90
وحبت كلور محترمين
وشغال يامعلم
وهب
بعد سعتين او اقل شويه
القيلك الهدوم كلها بيج فانلات وجلبيات واندرات
وفوط وكلللللله
الحياه سعتها بيج بيج بيج
وجوزي بيكره البني بكل درجاته
وكل اللي طالع علي احمد " ده انتي معملتيش كده اول متجوزنا جايه تعملي كده دلوقتي "
والحمد الله فضلت انقع واغسل بالكلور لما زهقت كعبلتهم في بعض ورميتهم واشتريت غيرهم
ونعيش انا وانتي وناخد غيرها
كل سنه وانتي طيبه
وموضع المودريشن ده خليه احسن علشان ولاد اللذينه اللي بيعبطوا ونازلين شتيمه في خلق الله
وحسبي الله ونعم الوكيل

mony said...

هههههههههه

تعيشي و تاخدي غيرها يا جميل


انا عملت العمايل الحلوة ديه اول الجواز

و اول ما تامر فقد الامل فيا اتعدلت لوحدي



بس مش مشكلة اوي يا خيخة


اللون البمبي حلو برضه


خدي بالك بأه لا يحصل الموضوع ده مع لون تاني مش حلو



كل سنة و انت طيبة يا جميل

بت خيخة وأى كلام said...

طال ثانوى
قصدك تقول انى عبيطة
ههههههههههههه
ماشى يا عم فاروق مقبولة من نساء عائلتك كلهم
وكل سنة وانت طيب







اسامة اشرف
منورنى النهاردة
وابقى تعالى كتير







احمد ابو العلا
الله بمبى؟؟؟؟؟
انت بتحب البمبى اوى كدة
طب ابعتلى هدومك وانا هاخليهملك بمبى فى ثوانى
ههههههههههههههههههه







ابى
خروف واحد؟؟؟؟؟؟؟؟
ده انتى هتاخدى خرفان البيجامة كلها
عااااااااااااااااااااا
وبعدين انا نسيت اقولك انك خسيتى فعلا لما شوفتك فى البؤجة

حلوة الطريقة دى
هابقى اعملها بعد كدة
كل سنة وانتى طيبة يا ابى








ابو حمزة
انا قلت كدة برضه
قلت ابو حمزة هايفرح اوى لانه هيستفيد من الموضوع ده
خلاص ابعتلك نصيب رقية تاخده معاك وانت فى طريقك لاسكندرية
خلى دعاء تشوف خيبة صاحبتها
ههههههههههههههههههههههههه






واحدة مفروسة
متقلقيش يا مفروستى
انا انقذت ما يمكن انقاذه
والحمد الله ماكنتش غاسلة غسيل كتير اوى
فالحاجات اللى مافيش منها امل انها ترجع لطبيعتها مش حاجات كتير اوى
واهوه كله ينفع فى بؤجة الخير الجاية ان شاء الله
لما هاخلص رد تعليقات هاكلمك
علشان لما اتصلتى كنت انا نايمة








اليس فى بلاد العجايب
والله مش جديدة اوى
بس كان بقالى فترة خلاص الحوادث دى مش بتقع منى
بس معرفش ايه اللى صابنى امبارح

بس الحمد الله
انقذت شوية حاجات
والخساير مش كتير
تحياتى ليكى








ست البيت
انا كنت فاكرة زيك كدة
بس انا عندى حاجة حمرا مش بتبهت
وبغسلها مع الابيض وعادى
فعلشان كدة انا توقعت ان طبيعة القماشة هى اللى تحدد اذا كان اللون بيبهت ولا لأ
تحياتى ليكى وكل سنة وانتى طيبة










كوكاوى
لا يا عم البمبى ارحم كتير
لكن كحلى دى ده انا كنت عيطت مش غنيت
ههههههههههههههههههه
تحياتى ليك








محمد حمدى
شكرا ليك
انا حاسة برضه ان فيه ناس كتير متمزجين من البوست ده اكتر من البوست الكئيب اللى قبل ده
تحياتى ليك يا محمد










طائرى الحزين
مرة الموقف ده حصل فى هانى
فى اول جوازنا بس انا اقنعته ان الورقة الحمرا اللى بيبقى مكتوب عليها المقاس اللى بتكون فى قفا الفانلة الداخلية هى اللى بهتت على غياراته

قالى خلاص فى الغيارات الجديدة ابقى اقطعى الورقة
نيهاهاهاهاهاهاهاهاهاع

وبذلك تجنبت انى اارجع بيت ابويا بالكعك الساخن
تحياتى ليك يا طائرى الحزين









مشمشة
والله كنت ناوية اودى الجاكت لدراى كلين
بس كنت مستعجلة
تقولى ايه بقى
هو نصيب بمبى كان لازم اشوفه يعينى
تحياتى ليكى











زهرة الجنة
ابى هتصادر البيجامة كلها مش الخرفان الى عليها بس
يلا انا هاعتبر ان دى هدية عيد ميلادها
وبكدة اوفر فلوس التورتة
هههههههههههه
تحياتى ليك يا مروة












قلب ينبض بالحب
ميرسى ليكى
وحاول بجد تيجى يوم الجمعة
هتبسطى اوى
تحياتى ليكى










خمسة فضفضة

يعنى مش انا لوحدى اللى وقعت فى المشكلة دى
واضح ان كل واحدة مننا
عندها تجربة أليمة مع الالوان

كل سنة وانتى طيبة با فضفضة
ومتقلقيش انا مش باكل لحمة خرفان خالص
شكلى هاقضيها عسل وطحينة

تحياتى ليكى









زوجة
ايه حكاية الطشت؟

انا ماوجعنيش فى تعليقك غير الحتة بتاعة انقع الغسيل فى بانيو دى

علشان مانخسرش بعض يا زوجة
محدش يجيب قدامى سيرة البانيو والبلكونة

علشان انا ولا عندى بانيو ولا عندى بلكونة
احترموا مشاعرى الخيخية

عموما انا رايحة بيت اهلى هاقضى اسبوع هناك
هاقضيه ما بين البانيو والبلكونة
علشان اعوض النقص اللى بعانى منه هنا فى اكتوبر اللعينة



طب كويس ان احمد اكتفى بالكلمتين دول
ومعملش زى طائرى الحزين ما بيقول
كان رجعك بيت اهلك بكعك ساخن


انا اعيش اه
لكن ماخدش غيرها يا سيتى
هههههههههههههههههههه
تحياتى ليكى

انا حره said...

حصلت معايا والله وكل الهدوم طلعت بمبى وكان نهار اسوووود مش بمبى

تصورى ان فلحظه كل هدومك تبوظ وياسلام بقى لو فى لجوزك هدوم كمان ماهيصدق ويلاقى حاجه يتخانق بسببها ويفضل يعايرك بيها طول الوقت

بس ياريت الستات الشاطره تقولنا ازاى نقدر نعرف اذا كانت الهدوم بتبهت ولا لا قبل مالمصيبه تحصل

سبهللة said...

اول امرة اتشابه معاكى فى بوست
بس الشبه المرة دى بالمللى
نفس الموقف دة بتفاصيله البمبى حصل معايا بس ماكنش الجاكت الاحمر اللى عمل كدة
كان تى شيرت صغير لاسراء وهى عندنا سنة كان لونه احمر وكان جاى من لندن وتخيلت انه طالما جاى من برة فهو صناعة هايلة ولايمكن يبهت زى الهدوم المصرية
عقدة الخواجة بقى
واذا بكل الغيارات الداخلية لزوجى وابنى اصبحت لونها بمبى
بس ساعتها كان الموقف بينى وبين جوزى ماكنش بمبى خالص
كان لون اغمق من كدة بكتيييييير
========
كل سنة وانتى طيبة يا خوخة
تعيشى ةوتاخدى غيرها

همس الاحباب said...

ههههههههه
ههههههههه
بجد بجد انتى حدوتة
انا لسه دابب خناقة فى الشغل
دخلت على بوستك فطست على نفسى من الضحك
بس كويس انه بقى بمبى
ما قلبش الوان تانية
انا ام همس ربنا يكرمها
فى بداية الجواز كانت مطلعة عينى كلور فى الهدوم
اجيب الطقم الجديد البسه مرة وتانى مرة الله يرحمه عمل حادثة نتج عنها تغيير اللون وحاجات غريبة كده
المهم انا الهدوم القديمة تظل كما هى
والجديد يبوز
وهكذا لحد ما قررت منع دخول الكلور نهائى البيت
واخيرا زست
قصدى واخيرا ارتحت
كل سنة وانتى طيبة
وعيد سعيد عليكى وعلى اسرتك

طالب ثانوى said...

لا مش قصدى حاجة زى دى ابدا ربنا يسامحك فى كدة

وكل سنة وانتى طيبة وهدومك كلها بمبى

بت خيخة وأى كلام said...

مونى

اه البمبى ارحم برضه
وانتى جوزك اسمه تامر وانتى اسمك منى؟

يا سبحان لله
انا اعرف واحدة اسمها منى وجوزها اسمه تامر وانتى بتفكرينى بيها اوى

كل سنة وانتى طيبة يا مونى










انا حرة
انا عندى حل
الحاجة المشكوك فى امرها وعندنا احساس انها ممكن تبهت
نوديها دراى كلين
ونخلص من موضوع البهتان ده

تحياتى ليكى










سبهللة
ههههههههههههههههههه
اقرى ردى على طائرى الحزين
تعرفى انا ازاى تخلصت من اللون الغامق مع جوةزى لما غياراته اتبهت عليها
ههههههههههه
تحياتى ليكى يا سبهللة








همس الاحباب

الحمد لله انك ارتحت اخيرا
احنا لسة فى مرحلة الزفت
قصدى زست

هههههههههههههههههه
كل سنة وانت طيب يا خالد

بت خيخة وأى كلام said...

طالب ثانوى

عارفة ان مش قصدك
ده انا بهرج معاك يا فاروق

تحياتى ليك

m5m said...

هههههههههههههه

وهدوم هانى أخبارها ايه ؟
وقعد يلطم جنبك انت وشيكو ولا لأ؟
متهيألى حتى لو مالوش هدوم باظت المفروض حايلطم على هدومكم اللى باظت اللى المفروض يجيب غيرها

أكيد انتى قصدك تعملى كده عشان تزودى هدوم العيد شوية
.
.
.
كل سنة وانتى وشريف وهانى طيبين

بت خيخة وأى كلام said...

m5m

لا اطمن يا محمد
هدوم هانى ماكنتش فى الغسلة دى
وانا ماحاولتش انى ابلغه باللى حصل فى هدومى وهدوم شريف
علشان متبقاش وقعتى انا اللى بمبى
هههههههههههههه
تحياتى ليك وكل سنة وانت طيب

بت خيخة وأى كلام said...

طيب يا شباب استودعكم الله
انا مضطرة انى امشى دلوقتى بقى علشان احضر بؤجة الرحيل الى بيت الوالد والوالدة

كل سنة وانتوا طيبين

ومعلش بقى مش هاعرف انشر اى تعليقات جديدة تجيلى لحد مارجع من الهرم


اشوفكم على خير

واشوف حريم التدوين يوم الجمعة ان شاء الله


سلام
اختكم خيخة

مولان said...

هههههههههههههههههههههه


عسل ياخيخه

بتفكرني بنفسي هههههههههههههههه

انتي خلتيها بمبي وانا خلتها لبني

اشطه :)

Ahmed Al-Sabbagh said...

فيما يبدو إن خبرتك فى الغسيل تفوق خبرتى بكثير
:)

صبرني يارب said...

شوفي يا خوخه خليى المودريشن شويه عشان بجد فى عيل عبيط محروق منك اوي يا خيخه

بصي هو يظهر ان القلم على قفاه كان جامد اوي يا خيخه

ابقى خفي ايدك يا خيخه ههههههههههههههه
ولا اقولك ما تخفيش يا بت جو اون


بالنسبه بقى تعرفي ازااااااي

اولا من خلال تجرباتي البمبي الكتيييييير
اي حاجه جديده اغسليها الاول لواحدها حرصا واستحراصا

ثانيا ممكن حضرتك تجيب اي قماشه بيضا قديمه فنلة هاني المقطعه مثلا وتبليها ميه ويا حبذا ميه بمسحوق وتفركي بها الجاكت كان هايطلع لون احمر وتعرفي انه بيبهت

وبعدين يا ست الحسن والدلال اغسلي الابيض لواحده ايه الكسل ده يا ولاااااااد

الابيض يا اختي على راي ماما بيتعتم لما يتغسل مع الوان
ههههههههههههههههههه

بوسه كبيره يا خوخه

الرومـيصاء said...

هههههههههههههههههههههههههههه
ههههههههههههههههههههههه
فاكرتينى بنفسى
اما كنتش ابوظ الغسيل مبقاش
الروميصاء

اول ما اتزوجت جت
حماتى بعتتلى تشرت اخو زوجى بتاع العيد علشان اغسله مع الغسيل لانه محتاجه ضرورى
لحد هنا كويس ماشى
وطبعا التيشرت لونه ابيض زى الفل
انا رحت بقى حطيته فى الغساله وقلت هيحصله ايه يعنى
وبعد الساعه ونص
واذا بيه يتحول الى اللون البيج
ازاى معرفش
بس والله كان حلو يعنى متقوليش ان باهت عليه شىء
كانه هو ده لونه الاصلى
طبعا انا فضلت مسكاه وبتفرج عليه مش عارفه اعمل ايه
وتانى يوم جت حماتى تقولى فين التيشرت الراجل عاوز يمشى
هههههههههههههه
قولتلها بصراحه
حصل كذا كذا
وانا طبعا قولت هيزعلوا منى
قالتلى خلاص هتيه ونشوف هيقول ايه
راح التانى
لبسه ولا اخد باله
سبحان الله مش عارفه
جيت انا بعديها بكام اسبوع لقيته لبسه
قولتله لو سمحت هو التيشرت ده كنت شاريه لونه ايه
قالى مش عارف
ابيض باين
هو صحيح ايه الى عمل فييه كده

طبعا مش انا



سلام ياخيخه
ترجعى بالسلامه

رندا said...

أسعد الله أوقاتكـِ اينما كنتــِ
إنه العيد الذي يملأ الأيام والليالي بأقدس اللحظات
والقلوبـ بالبركة والصفاء والإيمان
الله يديم الاعياد، والافراح
وكل عام وانتم بخير

عيد سعيد عليكـِ وعلى اسرتكِ الكريمة

دمتى بود

Makine said...

بصي يا عكروتة ..

بما اني بقيت ست بيت ممتازة من كتر القعدة لوحدي
( أنا رجل والرجال قليل )

إنت تجبي الهدوم إلي أول مرة تتغسل و تحطي حتة منها تحت المية و تدعكيها شوية

لو ما نزلتش لون تبقى مش هتبهت و حطيها مع الغسيل عادي

لو نزلت اغسليها لوحدها ...

ممكن من تاني أو تالت غسلة تبطل تنزل لون و بعد كدة تقدري تغسليها مع بقيت الحاجة

و في حاجات هتفضل تنزل لون علطول

مكين

البت المشمشية حلوة بس شقية said...

كل سنة وانتى طيبة واكلى هانى وشريف كويس فى العيد واديها لحمة بس متاكليش انتى


بلنسبة بقه لموضوع الغسيل
وحياتك يااخوتىىىىىىى مبعرف اغسل ولا اطبخ ولا انيل اى هباب

بس كويس ان جاكت شيكو محصلوش حاجة

only spot said...

هههههههههههههههههههههههههههههههه
الاول خلينى اقولك كل سنه وانتى طيبه وعيد اضحى سعيدعليكى وعلى شيكو واهل بيتك جميعا
عادى يا خوخه كلنا لها واحمد ربنا انها جت فى هدوم البيت تعملى ايه فى واحده مش بتحرم تغسل هدومها فى الغساله رغم انها كل مره تعمل نفس العمله وتلم كل هدوم الخروج مره واحده وهب ارمى فى الغساله ولكى ان تتخيلى الكارثه والمصيبه واللطم الى بلطمه بعد ما الغساله تخلص دورتها الظريف العامله السوده دى مش بعملها الا مع هدوم خروجى بس وبتقهر قهره بعدها لانى ببقى خسرت بلوزه ولا تونيك بسبب البناطيل الى بتنزل وببقى عارفه وبرضه حماره بغلط نفس الغلطات دا الى ليا حق اغنى بس مش بمبى عادة بيبقى بنى بنى او اسود اسود او ازرق ازرق نظرا لان دى الوانى المفضلهههههههههههه
ارجع واقول فداكى يا قمر واهو برضه البنك لون جميل ورقيق اوى
يلى يا جميل الهرم منوره يا خوخه بيكى وبشيكو ويا رب اشوفك على خير وبخير يا قمر
خالص تحياتى

نعكشة said...

اعتقد والله اعلم

ان الهدوم اللي بتبهب بيتكتشوفها لما بيحطوا عليها ماية
انا فاكرة ماما قالتلي كدةب اين

عامتاً حصل خير

انا ناصحة شوية لما بغسل الابيض بغسلو لوحدوا
اما الولان فكلها مع بعض

بيطلع مزيج رهيب من الالوان متعرفيش ساعتها البلوزة بقة لونها اية
الحمد لله مامتي قررت اعفائي من هذه لمسؤولية

وكويس ان الجاكت ثبت علي الاحمر

حاجة طلعت سليمة في الموضوع

سلام عليكي


كل سنة وانتي طيبة
عيد سعيد

محمد ابراهيم said...

كان لازم تركزي يا خيخة هفضل انا اعلم فيكم لحد امتي ؟ :b
معلش هي جت معاكي كدة المرة دي
و ان شاء الله تظبط معاكي المرة الجاية
بس معلومة
اللون الاحمر بالذات اغسليه لوحدة

أنسانة-شوية وشوية said...

ههههههههههههههههههههههههههههه
والله يا خيخة يا اختنى حصلت معايا كتير متعديش هو فيه احسن من انك تغيري الالوان اهو انتى اخدتى جمال الوان الاول وعملتى له لون جديد

حنين القلب said...

هههههههههههههههههههه
ماشى يا سعاد حسنى
فيه حد فى الدنيا يعمل كده
وعلى فكرة اصلا الاريال بيبقى فيه مبيض يعنى لو عندك حاجه لونها فاتح ومش عايزاها تفتح اكتر من كده مش تغسليها باريال
والابيض لوحده يا خيخه
حد فى الدنيا يحط الابيض مع الالوان
المهم انا طمعانه فى التى شيرت بتاعك الابيض سابقاو البمبى حاليا والشراب اللى مرسوم عليه ارنوب
منكن اخدهم
مل سنه وانتى طيبه يا احلى خوخه
شيكو موووووووووووووووه

وومن said...

خيخة كل سنه وانتي وشريف وهاني طيببين

وتعيشي وتاخدي غيرها بصراحه اول مره اشوف حد بيغسل الأبيض مع الألوان

الموقف ده بالظبط اتعمل في مسلسل فريندز

بس سيبك هناااااك فرق جامد
أدعيلي بقي اشوفكم يوم الجمعه ان شاء الله

جنّي said...

جميل والله بنت حلال
اصل عندي تيشيرت ابض وكان نفسي البس واحد بمبي مكن استلف جاكيت شريف

تحيتي

Bo2Loz said...

lalala...ynfa3 keda..yamama 7`odeha menni 7ekma..tool ma feeh 7aga gdeda tet3`esel lewa7daha asln...en shalla ten2a3eha fe maya elawel.3`aselek 3enwanek..da 3`eer fan elnashr...7`e7`a ya 7`o7`a..yammo 3`aseel bambi hehehe

Bo2Loz said...

kol sana w enti tyba ya 7`e7`a 7`o7`a w o3bal el3eed elgay lama ba2a keda w n2ol heeh..w keda

مش عارفة الدنيا وخداني علي فين said...

السلام عليكم
علي فكرة انا اول مرة ادخل مدونتك
بس عايزة اقولك علي حاجة
ربنا يخللنا الكلور
لو كنتي استعملته علي طول كان شال الالوان
و الهدوم رجعت زي الاول

EmY said...

كل سنه و انتي طيبه و ماتنسيش تجيبيلي خروف نونو العب معاه

احمر يا مفتريه مع ان يعني ده لون مشكوك فيه دايما بس انتي قلبك جامد

المهم بقي ايه موقف هاني من البمبي ده كلو

Diyaa' said...

تيجي بالسلام وعيد سعيد وكده
ماما فعلاً بتعمل الإختبار اللي اقترحته آبي ..بتفهم آبي علي فكرة
مش تاخديها بشكل شخصي بقي يا خيخة
لول

بس في حاجة وقعت منك

الحاجة الرابعة
إن جاكت شريف لونه مش بيروح بعد ما بيبهت وإنه متلون بضمير وخامته كويسة...ودماغه ناشفة
سلام :)
وسلميلي علي شريف
وعيد سعيد :)

رندا said...

أسعد الله أوقاتكـِ اينما كنتــِ
إنه العيد الذي يملأ الأيام والليالي بأقدس اللحظات
والقلوبـ بالبركة والصفاء والإيمان
الله يديم الاعياد، والافراح
وكل عام وانتم بخير

عيد سعيد عليكـِ وعلى اسرتكِ الكريمة

دمتى بود

أميرة ويلز said...

يلا اهو طلعتي بشكل جديد للهدوم تغيير برده

ماله اللون البمبي وحش اللون البمبي

فكرتيني بموقف حصلي طبق الاصل يا أوختشي

بنت الغربة said...

انا حصلى ده برضه بس كان بنطلون جينس ازرق والغسيل انتهى على ان كل غيارات الاولاد وابوهم وتيشرتات المدرسه بقت كلها لبنى ودرجات الازرق الجميله -وماقولكيش على الى حصل من ابوهم لما شاف -حسبى الله ونعم الوكيل فيه -شرفينى فى مدونتى

صاحب المضيفة said...

حلوة الحياة اللي لونها بمبي دي

اوعي بس تحطي حاجه سمرا المرة الجاية

:):):):)


تحياتي وسلامي لشيكو باشا

بحبك يامصر said...

كل سنه وانتى طيبه

جعلوني مريض نفسيا said...

كل عام وأنت والأسرة والأمة الأسلامية بخير

Z_Diva said...

eh ya 5o5z elnas7a de :D

al 7tety bayn elibham walsbaba fa mabhtsh, yb2a mesh bybhat, 3la asas ino mdhoun masalan we hyban fe swab3enik :D

walahy inty 3asl ya 5o5z, yla fdakom el7gat elly alabet bamba7 de, we law knty btt5dmy tide super mama, maknsh da 7asal l3lmk :D

kol sana wenty we shifo we kol el3ila yrab tyben we b2lf 5er we s5a we salama yarb :)

ahmed_k said...

رفع الحجيج أكفهم
يرجون رحمة ربهم
ورفعت كفي أدعوه
يجعل ثوابك مثلهم
وكل عام وأنتم بخير

حزينه said...

السلام عليكم
ههههه
والله ديما ماما بتعمل معانا كدة تحط الغسيل كله ابيض وفى النص حاجه بتنزل لون
وهدومنا بتبوظ بس حنعمل ايه بنبوس ايديها ونقولها تسلمى يا اغلى الناس
ربنا يخيله ليكى ويخليكى ليه

حزينه

محمود الدوح said...

انا عندى سؤال صغير جدا جدا
بما اننا فى عيد الاضحى
الخروف البمبى ينفع نضحى بية
ولا لا يجوز الاضحية بخروف بمبى


كل سنة وانت طيبة يا خيخة

esraa said...

ههههههههههههههههه
مش ممكن بجد
ضحكتيني والله


كل سنة وانتي طيبه
وعيد سعيد عليكي ان شاء الله

بت خيخة وأى كلام said...

تعليق على السريع كدة

كل سنة وانتوا طيبيبن
انا بس كنت بجيب حاجة من اكتوبر وراجعة تانى الهرم
فقلت انشر تعليقاتكم بالمرة
واعيد عليكم


لما ارجع هابقى ارد على الناس اللى ملحقتش ارد عليها

سلام
اختكم خيخة

نعكشة said...

كل سنة وانتي طيبة
عيد سعيد عليكِ

نهر الحب said...

عيد سعيد
وكل عيد اضحى وانت بخير
وان شاء الله العام القادم على عرفات متجمعين

طوبة ذهب وطوبة فضة said...

ربنا يكرمك وكل سنه وانتى بالف خير وصحه وسعاده حبيبه قلبى

Sherif said...

البينك بدرجاته جميل اكيد

بس العوض على الله لو فيه ألوان مايتفعش تبقى لون تانى .. وعموما هو حظ البنات

كل سنة وانت الاسرة الكريمة بخير وسعادة

آه وكفى said...

طب كويس اهو تغيير
وبعدين ايه الاستغراب ده ايش حال انك انتي اللي حاطة الغسيل
هههههههههههههههههه
معلش ياخيخة كل بمبي وانتي طيبة

dreem said...

مش هتبطلى افتكاسات بقى يا خيخة
بصى يا ستى
لما تحبى تعرفى اى حاجة بتبهت ولا لا اعملى ايييييه ؟؟؟
خديها عالحوض ورغى حتة صغيرة منها بالصابونة العادية ودا طبعا بعد ما تبليها بالمية
وبعدين اعصريها فايدك ..
لو لقيتى الرغوة لونها مش ابيض يبقى البتاعة اللى انتى بتختبريها دى بتبهت واخدالى بالك يا شابة ؟
بس فالنهاية ولا يهمك فداكى وعلى قولتك : المهم ان الجاكيت الاحمر ما باظش كل سنة وانتى طيبة وعيدك سعيد ويارب حياتك كلها تبقى بمبى بس من غير ما تبوظى الهدوم

بلوجاتي said...

بشكل عام اللون الأحمر من الألوان المتعبة في الصباغة لأنها مش تثبت
يعني بصريح العبارة كل الأنسجة الحمراء بتبهت حتى الماركات المحترمة و حتى و لو كلنت الألوان التانية من نفس النوع مش بتبهت
كمان اللون الكحلي بيبهت و اللون الأسود - مهما كان ماركة
على استعداد لتقديم اي نصيحة بيتوتية !

my dream said...

كل سنه وانت طيبه ياام شريف

وانت وشريف وابو شريف كمان مبسوطين
ههههههههههه بالنسبه للبمبي بقى
انا كانت عندي كموني
ههههههههههههههه اه والله كموني والمصيبه انها حصلت بعد الفرح باربع ايام مصيبه وعلى التريقه الي سمعتها من الباشا ومن بابا اه والله الجواز يعمل كل ده والي يقولك انت كنت شاطره هو ابوو حميد واكل عقلك اوي كده
والله احنا غلابه
كل سنه وانت طيبه تاني
بتمنى اكون معاكوا يوم التجمع بحاول اضبط مواعيدي
مع حبي
مروه

Ahmed Al-Sabbagh said...

بمناسبة العيد انا قررت انى اتنكر فى صورة حتة لحمة جوة ساندوتش واجى اللقاء بتاعكم واستخبى ورا حتة سلطة واسمع انتوا بتقولو ايه

اووف خسارة افتكرت حاجة
هخبى الكاميرا ازاى
مش هينفع تدخل جوة الساندوتش
ياللا تتعوض

قوس قزح said...

كل سنة وانتى طيبة و بخير و سعيدة انت و اسرتك يا رب


و عيد سعيد عليكم


و على فكرة فى مترو ماركت فى حاجة بتتباع بتشيل بهتان لون على لون و خصوصا الابيض

اى خدمة :)

Searching said...

wa7shany mooooooooooooooooooot
kol sana wenty tayeba o shico tayeb
ana sola 3ala fekra
o ba3deen ana mamy kanet dayma2 beta3mel keda f kol el alwan ba2a
ya3ny kol el underwares beta3etna ana o mamy o soha o dady kanet sa3ab pink o sa3at blue o sa3at green 7asab ba2a el tasahel
salam ya bamby
o mean ya nouran

م/ الحسيني لزومي said...

تقبل الله منا ومنكم
وكل عام وانتم بخير

enjy said...

هههههههههههههههههههههههههههههه والنعمة الشريفة بقالى فترة مضحكتش كدة...ربنا يكرمك

nudy said...

سوفي يا ستي اقدر اقولك ان اختبار الحاجات اللي بتبهت بيكون بانك تبليها وطبعا هيبان من لون الميه ان كانت بتبهت ولا لا وعموما اللون البمبي لطيف جدا ومبروك علي التي شيرت والبيجامة الجديدة

سمو الأميرة سارة said...

ههههههههههههههههههههههههه
انتى مش بدل ما تكسي غسلتي بأوكسي
انتى بدل ما تكسي غسلتي كله على بعضه
ههههههههههههههههه
اقولك انتى نشفي الهدوم دي واكويها وحطيها في اكياس واعملي بيها جمايل عليهم في البيت
طلعي لكل واحد هدومه بالنيو لوك وقوليلهم شايفين يا حبايبي جبتلكم ايه هههههههههههههههههههه

سيكو said...

هههههههههههههههههههههههههه
أمانة عليكى والنبى ملكيش دعوة بالغسيل ووديه التنضيف
اوك
ومبروك عليكى الخروف البمبى

chatterbox said...

لووووووووووووووووووول

ماما أمولة said...

ههههههههههههههههههههه

متزعلسش بتحصل في احسن الغسالات

بمبي واحمر وازرق

الحمد لله اللي جت على قد كده

انا مرة نسيت المؤشر على الغلية

وغسلت قمصان زوجي

مقلكيش بقوا ايه كوريشة

الحمد لله الاصابات كانت اقل من 21 يوم

ههههههههههههههههههه

كل عام وانت بخير يارب

محمد عتلم said...

طبعا الحياه بقى لونها بمبى عشان انتى كشفتى على الجاكت بالسبابه والوسطى والابهام
انما لو شفتيه بالخنصر والبنصر كان الموضوع اختلف
يعنى المشكله فى الصوابع نفسها
انتى استعملتى الصوابع الغلط

users online