Saturday, December 27, 2008

عذراً غزة... فعائلتي مراكزها حساسة


انا مش هتكلم في السياسة
لأني مش بفهم فيها
ولأن عمر إبن خالتي بعد معرفته بوجود مدونة ليا
أقنعنى فى أخر زيارة له بمصر
إن السياسيين ليهم حسابات تانية خااااااااااالص
غيرنا إحنا كمواطنين عاديين
ولأن مختار جوز بنت خالي
أقنع ماما
إن فيه حاجة عندهم اسمها
علم ولم يبلغ
ولو رؤسائه شموا خبر
انه كان عارف ان قريبته البت خيخة
كتبت حاجة فى السياسة
وهو مابلغهومش
فده كدة خطر جدا على مركزه الحساس
ونظرا لان عيلتى كلها مراكزها حساسة اوى اوى
ونظراً لأني خيخة
وبسمع كلام بابا وماما
وبسمع كلام عمر إبن خالتي
وكل عائلتي المبجلة المحترمة بنت الاصول
واصحاب المراكز الحساسة
واللي خايفين على مراكزهم الحساسة أوى
انها تروح فى الرجلين
لو واحدة خيخة زيى اتكلمت فى السياسة
فأنا مش هاتكلم فى السياسة
أنا هاحط إيدى في جيوبي من البرد
وهاشرب مج الشاي بلبن
وهاقعد أتفرج على الاخبار
وهاضم حواجبي على بعض من شدة التأثر
ومع كل مشهد فيه قتيل فلسطيني
هاقعد هاقول ياحراااااااام
ومع مشهد للحصار
ومنع عبور قوافل محملة بالطعام
هاروح انا أتاكد إن فيه فى التلاجة
لبن علشان بكرة الصبح
شريف يشرب لبن بالعسل قبل ما ينزل
وهتأكد ان فيه لانشون حلواني
لان ابنى بيحب اللانشون جداااااااااا
وهتأكد ان مخزوني من الشكولاتة لم ينفد بعد
ومع اذاعة خبر ازدياد عدد القتلى الفلسطنيين
هاكون انا ساعتها بعمل بنصيحة أفراد عائلتى
اصحاب المراكز الحساسة
وهاشجب واندد وادين العدوان الاسرائلي
وهاعترض على سلبية الرؤساء العرب
فى عقل بالى طبعا
وطبعا مش هانسى وانا بشجب وادين
انى احط على وشي ماسك الفراولة لتقوية البشرة
وبعد نص ساعة وانا بزيل اثار الماسك من على وشى
بمية ورد
هيكون فيه خبر بإزالة جثث القتلى ودفنهم بمقبرة جماعية
ومع مشهد الفلسطنيين وهما بردانيين
ومش لاقيين بطانية تقيهم برد الشتا
هكون انا بتغطى بالبطانية
ام وشين التقيلة اللي بتدفي جامد
وبعد كدة هاصحى من النوم
وانا بربي فى ابنى
كيف تكون جبانا
وكيف تكون سلبيا
وكيف تكون متفرجا خيخيا
علشان افراد عائلتك
مراكزهم حساسة



إنتهى
بت خيخة وأى كلام

37 comments:

ماما أمولة said...

تسلم ايدك

والله انت اجدع بنت خيخة

~*§¦§ Appy §¦§*~ said...

كلامك مر اوي يا خيخه اوي حسيته من اول سطر وعارفه وفاهمه اللى بتقوليه بجد نقلتى واقع اليم بس ده زي القلم الجامد على الوش اللى بيخلي العين تنور

only spot said...

سلام عليكم
ازيك يا خوخه واخبارك ايه
المراره جامده اوى فى حلوقنا يا خوخه حتى لو اتظاهر البعض بالامبالاه فدمهم فى راقابينا بس اقولك ايه حسبنا الله ونعم الوكيل وحتى الدعا الواحد بقى يستحى يرفع ايده للسما عشان يدعى ليهم لاحساسه بالضعف والسلبيه بس زى مقولتى للسياسه حسابات اخرى
الخبر الى بجد حرق دمى هتلقيه فى اللينك ده تظاهر احمدى نجاد مع شعبه ضد المهازل الى بتحصل واحنا بنشجب ونستنكر مع احترامى لايران وشعبها بس احنا فين يا عرب
http://news.bbc.co.uk/hi/arabic/middle_east_news/newsid_7781000/7781016.stm

مع العلم الخبر ده بتاريخ 13 ديسمبر واحنا النهارده افتكرنا واتحركنا رغم ان القذف من مده كبيره بس الدنيا قامت لما الهجوم نتج عنه 195 قتيل طب ماهم كل يوم بيتصفو واحنا عاملين مش واخدين بالنا
ميكنش من كتر الظلم الى بقى عامل زى السحابه السودا ومخيمه على حياتنا؟؟ احتمال
سيبك اتمنالك سنه سعيده ليكى ولاسرتك
تحياتى

صبرني يارب said...

يا خيخه لزمتها ايه بس الكلمه دي ما كان البوست ماشي كويس

يا جايبالي الكلام ما بالحقش اقول فيكى بؤين حلوين يا بت

الى مركزه حساس يروح يبلغ يا ضنايا مش عايزين صداع

ما بقالش الى يحطوا اديهم على بؤنا بقىىىىىىىىىىىىىىىىى
حاجه تقرف

عموما عادي معلش ابويا كان ما بيخليناش نروح نصلي التراويح واحنا بنات وقال لما تبقوا تتجوزواا بقوا روحوا صلوا مع اجوازكم
ادين اتنيلنا ولا بنعرف نروح ولا نيجى

الحمد لله يا خيخه هما نجحوا فى خلق مجتمع جبان بيخاف من اي حاجه حتى لو كانت ما تستاهلش الخوف

الرومـيصاء said...

متى نصر الله
الا ان نصر الله قريب

لقد خلقنا الله احرارا said...

بوست رائع تصدقى انا كنت عمالة اقرا بوستات تانية ليكى وفوجئت بوجود البوست ده بس احب اطمنئك ان احنا برده هنطمن ان فى لبن فى التلاجة وهنقوم نشوف فى فيلم ايه على mbc2وهنسأل هناكل ايه بكره وهنعمل ايه فى اجازة يوم الاثنين من غير ماتكون عيلتنا مراكزها حساسة بصرف النظر عن سلبيتنا اللى ربنا هيحاسبنا عليها حكومتنا نجحت فى انها تخلينا بجد مش عارفين نعمل ايه المصيبة ان انا مدرسة وبقول للطلبة ان كل الثورات كان اهم سبب لقيامها زيادة الوعى الوطنى طيب احنا ناقصنا ايه -----ناقصنا بجد قيادة واعية تجمعنا وتحركنا فين السياسيين لا بلاش دول فين علمائنا الاجلاء هو تضامنا مع غزة مش من الدين مش النبى عليه الصلاة والسلام قال انصر اخاك ظالما اومظلوما خايفة اتكلم اكتر من كده اغلط فى ناس انا باحترمهم ----بس بجد من اسباب سلبيتنا وعدم تحركنا اننا للاسف خدنا على منظر الدم خدنا على وحشية اسرائيل خدنا على تهاون وضعف وعهر وانبطاح حكامنا ---حسبنا الله ونعم الوكيل

A.SAMIR said...

بصي يا خيخة
لو حد سألك عرفتي اللي حصل في غزة؟
ردي عليه وقولي له
علمت ولم ابلغ

عاشــــــ النقاب ـقــــة"نونو" said...

انا لله وانا اليه راجعون

عاشقه وغلبانه said...

عذرا شهداء عزه فكلنا جبنــــــــــاء
اقل حاجه تتقال علي شعوب كامله وحكوماتها واقفين يتفرجوا
رؤساء ربنا ينتقم منهم ماحدش بيفكر في الناس اللي مالهاش ذنب اللي بتموت دي ولا مين راح ولا مين عاش
حسبي الله ونعم الوكيل
مافضلش لينا غير الدعاء

التمنياوي طه said...

نحن نشجب و نستنكر و ندين

بحب كل الناس said...

هذه هى اول زيارة لمدونتك المحترمة


وياريت كل الناس تشوف البنت الخيخة بتعمل ايه

لكىم كل التحية والاحترام
على هذه الكلمات

mony said...

وجعتي قلوبنا يا خيخة

في قلبنا حصرة مش عارفين حتي نبينها


تسلم ايدك

جنّي said...

السلام عليكم

كان الله مع اهل غزة وليغفرالله لنا تقصيرنا معهم ..

لا للوقفات والاستنكارات ولكن اجمعوا المال والسلاح وليفعل كل منا ما يستطيع لايصال المال والسلاح لاهل غزة ..

ويارجال سيناء الشرفاء قوموا بايصال المال والسلاح لاخوانكم في غزة الصامدة..

ولعنة الله على الكلب الذي استقبل العاهرة اليهودية امس لاعطائها الضوء الاخضر لضرب غزة ..

وحسبنا الله ونعم الوكيل

كلبوزة لكن سمباتيك said...

حسبنا الله و نعم الوكيل

مهندس مصري said...

جدعة يا بت
:)
خشي شوفي تغطية مدونين غزة للي بيحصل هنا
http://newspalestina.blogspot.com/

سبهللة said...

قال صلى الله وعليه وسلم
من لم يهتم بأمر المسلمين فليس منهم
ازاى ما نهتمش وازاى نقعد نتفرج على النشرة وبس?
هم العرب والمسلمين عدموا رجالتهم خلاص؟؟
هانقول ايه
حسبنا الله ونعم الوكيل
وبما ان كلكم راع وكلكم مسئول عن رعيته
خلاص بقى يبقى كل واحد مسئول عن اللى احنا فيه دة يستنى دوره لما ربنا يسأله عن رعيته ومسئوليته

نعكشة said...

ليس لنا إلا الدعاء :(

الدكتور بتاع الباطنة قالنا ان نقابة الاطباء اللي في مصطفي النحاس او في حاجة الحكمة جمب القص العيني
بتجمع تبرعات
و المعونات بتاعتهم بتوصل فعلاً لهناك

لو حد عايز يتبرع ممكن يروح هناك في نقابة الاطباء



ربنا يسامحنا بقة :(

و للأسف هنكمل حياتنا عادي
و نحن ندين و نشجب و نندد

كان الله في عون غزة

اللهم اعزنا
اللهم استخدمنا ولا تستبدلنا
اللهم كن لنا ولا تكن علينا

اللهم اعزهم و ارفع درجاتهم في اعلى عليين
امين

سلام عليكِ

فاتيما said...

إنتى وصفتى حال أغلبنا يا خيخة
و بصراحة شديدة
أحييكى على شجاعتك
و جدعنتك دى

عُـــقـــد لُــــــــولِــــى said...

بجد مصدقش عنيا
ليه كده طيب ده انا كنت بصقفلك ع الكلارم اللى من تحت لتحت
ده

ما علينا كلمه وعدت بس اوعى شريف يقراها

بجد بقى الواحده مكسوفه تدعى حتى ربنا ورجالتنا مش فاضيين الا لحسام حسن عمل ايه امبارح فى الجزاير وهيفا ونانسى
بالله عليكى مش حاجه تكسف

اودى وشى فين ومصر كان عندها خبر بالضربه ؟اوزى ما بيقولوا

محدش هيصدق انها مكنتش تعرف

اروح فين ياربى

يادى الكسفه








انا تايهه

Diyaa' said...

عبرتي عن تناقضاتنا وسلبيتنا بجرأة تتحسدي عليها ..وأقل حاجة فعلاً نعملها إننا نبص لنفسنا ونرفع راسنا من الرمل اللي دافنين نفسنا فيه ونسأل
هنفضل بس نتخنق كل فين وفين ومنعملش حاجة تاني ؟ عموماً..باب التبرعات في نقابة الأطباء متاح..الدعاء أكيد
وتربية شريف أحسن تربية يمكن لما يكبر ويتجاوز مرحلة الطفولة والدلع يبقي بإيده شئ مقدرتيش إنتي عليه

مفيش بإيدك شئ غير كده

أما نزار..اختيار موفق.لأنه بيكون عبقري لما بيعبر عن الوجع العام وبيكتب شعر ثوري أو سياسي

خالص التحية :) وكويس إن لسه في ناس عندها دم..بس يا رب نفضل ندعي للمسلمين علي طول ..وميبقاش 200 قتيل هما اللي زعلونا شوية ..وبعد شوية ننسي..لأن في الأخر لما هيبقوا مليون قتيل..مش هنحس بحاجة لأننا اتعودنا

إنتي رجولة أوي يا نوران :)
ادعيلهم من قلبك
سلام عليكم

مسدس صغير said...

كلماتك على الرغم ان ملهاش اى علاقه بالسياسه نظرا لمركز جوز بنت خالتك الحساس الا انها معبرة جدا والاجمل فيها قصيدة نزار قبانى لكى التحية يا نوران

صدى الصمت said...

الحقيقة أنا أول مرة أدخل مدونتك وال قالى عليها أخويا المراكبى
ولما دخلت وقرأت أعجبت جداً بإسلوبك وآراءك القوية وأهدافك النبيلة أحييكى على مدونتك .... عاشقة الورد

Anonymous said...

عزيزتى
انتى عندك حق
ولو انى ملاحظة انك بتشجبى وتنددى وتعترضى على وضع غلط
وجيتى فى النص قومتى قولتى كلمة كده من بتوع الشارع


انا بستغرب بس ليه مفيش حاجة حلوة بتكمل
ليه مبقاش حد عنده خط ثابت ماشي عليه

لازم الانسان يغلط ويلغوص اى حاجة بنعملها

وعلى كل حال شكرا على مشاعرك مع اخواتك الفلسطنين

اوعى تفكر said...

حسبنا الله ونعم الوكيل

shayma said...

يظهر ان كل الحكومات العربيه ليها عائلات بمراكز حساسه

حسبنا الله ونعم الوكيل

عبدالله said...

مشاعر جياشه تجتاحنا جميعا ولكن ماذا نستطيع ان نفعل هذا هوا السؤال ولكن بعد ان وصمت حكومتنا الرشيده بالخيانه الرسميه اعتقد لن نستطيع قريبا ان نقول ان مصر هي بوابة الدفاع عن المسلمين

تحياتي

نيران said...

عذرا غزة..
نحن اجبن مما تتخيلي
فوراءنا اقواتنا
نخاف على ذرياتنا
نخاف على اهلنا
خاف السلطة و السلطان
عذرا غزة.. فحسب التوزيع الجغرافي
ينبغي لنا ان نموت ميتة يسيرة
على أسرة وثيرة
لا ان تسيل دماؤنا في الشوارع
ونموت مقتولين غدرا
ليس الان
فنحن في عهد السلام
نحن قبلنا التطبيع
والتهويد
والاستعباد
والذل
كل هذا ولا نموت على سرير؟
عذرا غزة
والله.. كان بودي ان اجاهد بالكلمة
لكننا جميعا فقدنا الأقلام
عذرا غزة..
نامي في الظلام
موتي صامتة
كي لا يستيقظ أطفالنا على اصوات النحيب

HERO said...

بصي هو ممكن تتكلمي عن المواطنة الاسرائيلية اللي ماتت وتزعلي عليها وتشجبي وتديني الفلسطينين وتدعي عليهم واحنا هنفهم

تخياتي

محمد ياسر said...

لا تكفي اي كلمات للتعليق و لا اعرف سوى الدعاء لهم و الدعاء على من هم السبب...

البوست مكتوب حلو

سنابل قمح said...

كلامك صح
تقريبا كلنا كدة راضعين الجبن والسلبية حتي لو ماكانتش عائلاتنا مراكزها حساسة
دمتي ودمنا جميعا تحت البطانية أم وشين

بس مين فينا يوم القيامة هايتحمل عقاب تهمة علم ولم يبلغ ؟؟؟؟؟؟؟؟؟
تحياتي

بت خيخة وأى كلام said...

بشكركم على تعليقاتكم
وبعتذرلكم على كلمتي الأبيحة اللى وردت فى البوست
بس اعذرونى
انا كنت مبئوئة أوي


سلام
اختكم خيخة

كيكى said...

كلام مش محتاجة علية تعليق
!!1
عووووووووووووووووو

نهر الحب said...

انا كمان اشجب واندد
وارفض


و و و و
صحيح
هنقضى رأس السنة فين ؟؟

نور said...

كلامك صعب اوي
بس بجد الكلمة دي .. مش ف مكانها .. حتى لو كنتي جايبة آخر
انا عارفة ان اللي بيحصل يخلي الواحد يفقد اعصابه جداااااااااا

لكن .. ارجوكي

كوني معارضة قدوة

لازم كلنا كمدونين نكون قدوة حسنة

احييكي على البوست .. والحمد لله ان عيلتي مفيهاش حد مركزه حساس

اوعي تزعلي مني .. دي اول مرة ارد عندك .. مع اني متعاكي من زمان
بس بجد مش اخر مرة

تقبلي تحياتي

koukawy said...

لا تعليق
بعد كلامك ينفع

ست البيت said...

الرد على مدونتي

همس said...

الله يحرق الشجب والتنديد فى دماغ ام الحكومة دى

بس تعرفى دا كلو برضو كلام

حاجه تقرف

انا عارفه نقل ادبنا اكتر منكدا نقول ايه

دول ولاد كلب اوساخ

users online