Monday, December 21, 2009

بت خيخة في ذمة الله




-->
لا اتذكر السويعات القليلة السابقة لعملية موتي
ولا اعرف كيف وصلت هذه السكين الى فراشى
كل ما اتذكره
هو تململي فى الفراش وحيدة
خائفة لاول مرة
مفتقدة انفاس طفلي

لا اتذكر هل استغرقت فى التفكير فى طفلى الغائب
ام استغرقت فى التفكير فى طليقى
ام استغرقت فى التفكير فى اصدقائي
لا اعرف فى اى شئ استغرقت فى التفكير
حتى نمت او قتلت او انتحرت

انظر لجثتى ممدة على الفراش امامي
واستعجب شكلي وانا نائمة
وكأني لست انا
انظر فى محتويات الغرفة
واخرج فى بهو المنزل
واستعجب اكثر
كيف استغرقت فى النوم دون ان ارتب منزلى؟
انا لا احب الاهمال
فكيف لى الموت
ومنزلى على هذه الحال من الكركبة وعدم النظام؟
وما هذه الصحون المتراكمة فى حوض المطبخ؟
لماذا لم انظفها وقتها؟

ادخل مرة ثانية الى غرفة النوم
و اتذكر ان الله هاتفنى وبلغني باننى سوف اموت اليوم
واتذكر انى توترت لفكرة اننى علمت ساعة موتى
واتذكر اننى قررت الاغتسال
وتوضيب المنزل
واحضرت سجادة الصلاة واسدالى
ووضعتهم على طرف الفراش
حتى اتهيأ للقاء ربي
ولكن اتذكر ايضا ان اليأس تملك منى وقلت فى داخلى
مش هالحق استغفر ربنا عن كل ذنوبى
معنديش وقت
يادوبك انام علشان الحق اموت
ولكن لا اعرف كيف مت
هل نمت اولا وتم السطو على منزلى من احد المجرمين
وقام بفعل موتي؟
هل هو من طعننى فى قلبي؟
اما ان اليأس تملك منى وقمت بفعل موتى
ونهيت حياتى بمحاولة انتحار ناجحة؟
يا الله
!!!!!!!!!!
هل تملكنى الياس الى هذه الدرجة؟... لدرجة الانتحار؟

لا اعرف و لا اتذكر
هل قتلت ام انتحرت
ولكنى غير راضية عن شكلى
كيف ساقابل ربى هكذا؟
انا لا احب هذه المنامة
كنت اريد ان اموت وانا مرتدية منامتى الزرقاء
كنت اريد ان اموت وانا منزلى مرتب ونظيف
كنت اريد ان اموت
وانا اداعب بيدي حبات مسبحتى الصغيرة بذكر الله واستغفاره

محاولة فاشلة منى ان ارتب منزلى
وان اقوم بتهيئة شكلى خارجيا للقاء ربى
فانا روح
لا اقو على ان احرك الاشياء
لا استطيع حمل كوب
او رفع رأسي وادخالها فى منامتى الزرقاء
اذن فلا يوجد حل
سوى الانتظار

انتظرت ساعات وقد ظهر نور الصباح
و وجهى تحول الى لون ابيض شاحب جدا
والدم المنبعث من قلبى تجلط بفعل برودة الشتاء
رائحة كريهة بدات فى الظهور
لا ادرى ماذا انتظر
ولكن اريد ان ابلغ احد بخبر وفاتى
ولكنى لا استطيع فتح الباب او الضغط على ازرار الهاتف
فانا لست سوى روح تنتظر لقاء ربها

اسعد كثيرا لغياب طفلي عنى وذهابه الى والده
فلا استطيع ان اعرف كيف سيواجه هذا الموقف لو كان معي
احمد الله كثيرا ان لحظة موتي جاءت وهو غير موجود
افتقده بشدة
اعلم اننى لن اراه ثانية
ولكن ارتاح لفكرة وجوده عند والده حتى لا يرانى ميتة امامه


عدى النهاااااااار والمغربية جاية
تلقيت اتصالا من والدتى
ومن طليقى
ومن شاهى ومن دعاء ومن عسقول
لم ارد على اى من الاتصالات
لم استطع الرد

مر على وفاتي يومان
ومكالمات لم ارد عليها ملأت هاتفي المحمول
ورائحة جثتى ملأت المكان
لا اعرف هل رائحتى نتنة هكذا بفعل ذنوبي
ام هى مسالة علمية بحتة فى موضوع تحلل الجسد
وهل من كان صالحا فى حياته
ستنبعث منه هذه الرائحة ايضا عند وفاته؟


مر على وفاتى ثلاث ايام
انتفض من مكانى
على كسر باب الشقة
يدخل هانى طليقي
يسد انفه
يقف عند باب الغرفة
يرانى ممدة على الفراش
تحمر وجنتاه
لا يستطيع الاقتراب من الفراش
يقوم بعدة اتصالات
على اثرها
يذهب جسدي الى قبرى
واصعد انا الى ربي
بعد مرور يومان من دفني
تجدون بوست عند الصباغ بعنوان
بت خيخة فى ذمة الله

هل اطلب منكم شيئا ؟
استمحيكم ان تقرؤوا لى الفاتحة
و تدعوا لى بالرحمة
واوعوا تنسوا يا أندال الحملة الخيخية للتبرع بالدم
يمكن دى الحاجة الوحيدة اللى تشفعلى عند ربنا يوم الحساب



انتهى
بت خيخة واى كلام

Monday, November 16, 2009

حُضنك حبيبي




-->
المفروض يكون حضني انا
لكن لما بنحضن بعض
ورغم انك بتكون غرقان جوايا
ورغم انك ماتقدرش تحاوط ضهري كله بايدك
الا انى بحس انى في حضنك انت
ولو فيه حد غرقان فى التاني
بكون انا الغرقانة جواك
كفوف ايدك وانت حاضني مابيلمسوش بعض
فيه بينهم مسافة شبر او اكتر
لكن مجرد انك تحضني
بحس فجأة إني مستورة
وايدك طلع منها توب قماش
اتلف حواليا وسترني
من غدر الايام والناس
بحس بالامان وبطمن
وبزعل
بزعل اوى
بزعل من نفسى انى زعلتك يوم
او انى قرصتك فى لباليبك يوم
ما انت برضه بتنرفزنى
لأ ... أنا بكدب
أنت مش بتنرفزني ولا حاجة
أنا اللى عصبية شوية ومعنديش صبر
واللى يغظني اكتر
كرم اخلاقك فى عقابي
وبدل ما ترفض حضني
بتجرى عليه
وتقولى بحبك اوى
صدقنى ساعتها بكره نفسي
واندم على صوتى العالى معاك
وبندم على الكارتون اللى منعتك عنه
وبتمنى انك تقلب وشك
وبتمنى ساعتها انك تهز اكتافك
وتقولى لأ مش جاى انا زعلان منك
لكن عمرك ما رفضت الحضن
بتجرى عليه وبتغرق جوايا
لكن لو جينا للحق
تلاقينى انا اللى بغرق جواك
بغرق فى حنانك
وبحس بطبطة ايدك على ضهرى
بتشيل هموم سنيني
واللى يتعبني انى الاقيك بتقولي
معلش يا مامى
انا مش زعلان منك
ولما ابوسك بوسة فى خدك
تمسك ايدى وتبوسها
وتقولى ربنا يخليكى ليا
انتي حبيبة قلبي
واغرق اكتر جوة فى حضنك
واسال نفسي
ياترى وانت فى حضني بتحس بايه
حاسس زيي انك غرقان وانك جوايا اوى؟
يا ترى عارفة احميك واطمنك واديك الامان؟
ولا انا خيخة معاك انت كمان؟


شريف ... حُضنك حبيبى
مليان أمان

انتهى

بت خيخة وأي كلام

Friday, November 13, 2009

اكتب اسمى من فضلك


اكتشفت ان وجود اسمى فى ايميل
او ماسيدج مبعوتالى
شيئ بيفرحنى جدا

واكتشفت ان عدم ذكر الاسم شئ مش لطيف

علشان تفهموا وجهة نظرى اكتر
تخيلوا معايا الاتى

فتحت ايميلك لاقيت ايميل من فلان
ولنفترض ان فلان ده اسمه حسين

حسين بعتلك ماسيدج بمناسبة العيد
وبيقولك فيها كل سنة انت طيب
وبس على كدة

طب لنتخيل انك فتحت الايميلات بتاعتك
ولاقيت فيها ايميل من حسين
بيقولك فيه
كل سنة وانت طيب يا فلان

مش بذمتكم الايمل اللى مكتوب فيه اسمك
خلاك تحس انك مميز
خلاك تحس ان حسين بذل جهد
وخصك انت بالايميل ده
ومابعتهوش لكل الناس

طب ولنفترض انك هترد عليه
هاتقوله ايه يا ترى؟
هاتقوله شكرا
ولا هتقوله شكرا يا حسين؟

حتى لو كان الايميل خاص بيك انت فقط
ومش ايميل عام لتهنئة فى عيد قومى
هتحس برضه بحاجة كدة لذيذة من جواك انه ذكر اسمك

انا ماعرفش اوى فى علم النفس
لكن اعتقد ان ذكر اسم الشخص فى رسالة مبعوتاله
او حتى وانت بتكلمه
بيؤثر عليه بالإيجاب


ومتهيالى لو عايز تضايق شخص
او تحسسه انه كائن مجهول
هتكلمه بدون اى محاولة منك انك تنطق اسمه

جربوا كدة وقولولى انا صح ولا غلط

لما تسلموا على حد ماتقولوش
هاااااااى ازيك

قولوا هاى ازيك يا ..... وقولوا الاسم

لما تبعتوا ايميل خلوا دايما اول سطر
ازيك يا .... او حتى بلاش ازيك
مجرد انكم تبدأوا الإيميل
باسم الشخص اللى هتبعتولوا الايميل حاجة كويسة


لو جوزك قالك تصبحى على خير يا حبيبتى
ماترديش عليه بـــ وانت من اهل الخير
وخلاص على كدة
قوليله وانت من اهل الخير يا حبيبى
او وانت من اهل الخير
وقوليله اسم الدلع اللى بتدلعيه بيه

لما حد يبعتلك ماسيدج يقولك كل سنة وانت طيب يا فلان
ماتقولهوش وانت طيب وخلاص على كدة
قوله وانت طيب يا فلان
واشكره على الماسيدج



بس خلاص
وكل الكلام اللي فوق ده
نطلع منه بحاجة واحدة بس
بإني بوجه شكري لكل الناس
اللى بتبعتلي ايميلات
او ماسيدجات او تعليقات
وبيكتبوا اسمي اياً كان
نورا ... نوران... نور
خيخة ... خوخة ... خوختي ... خوخز
ام شريف ... نونا ... نونو ... نوناية ...نانا

لكم مني الف تحية
وانحناءة تقدير
وبوسة على الجبين


انتهى

بت خيخة وأي كلام

Friday, October 23, 2009

يا جمال .... ايش عرفك انت؟



تضامنا مني مع حملة نوارة نجم
اكتب هذا البوست


ايش عرفك انت بواحد مؤهل عالى بيشتغل شغلتين فى قطاع خاص
ومجموع مرتبه من الوظيفتين لا يتعدى ال 900 جنيه شهريا

ايش عرفك انت بمحمد مدرس العلوم
اللى بياخد 350جنيه شهريا
ومتجوز وعنده عيلين
وكل طموحاته انه يقدر يقي عياله من شر الجوع

ايش عرفك انت بفاطمة خريجة الاعلام
اللى اشتغلت فى صيدلية
بتكنسها وتمسحها وترتب علب الادوية
علشان تاخد 100 جنيه اول كل شهر

ايش عرفك انت بمنى خريجة التجارة
اللى بتشتغل فى محل جزم
وبتضطر انها تطنش تحسيس مديرها على صدرها فى الرايحة والجاية
علشان خاطر 300 جنيه شهريا بتساعد بيهم امها الارملة وباقى اخواتها الاربعة

ايش عرفك انت بمروة اللى على وش جواز
و راحت تصرف شيك من وزارة الشؤن الاجتماعية
تضامنا من الدولة فى تيسير مصاريف الزواج
عارف الشيك بكام؟
بخمسين جنيه
اشترت بيهم طشت وكنكة
اه صحيح وانت تعرف منين
تلاقيك متعرفش يعنى ايه طشت

ايش عرفك انت بأم محمد الكفيفة والكسيحة
اللى ابنها محمد عائلها الوحيد
مات فى حادثة
واللى قتله ابن واحد من كبارات البلد عنده نفوذ
ومارضيش حتى يدفع دية لام محمد
وقالها بالحرف الواحد
مالكيش عندى دية
واخبطى راسك فى الحيط


ايش عرفك انت بيا
تعرفنى منين انت ولا ابوك
علشان تبعتولنا تلغرافات تعزية في والدي

حسيت بيا يوم

جيت معايا يوم وانا فرحانة بنفسى وفخورة
بمؤهلى العالي
اعلام قسم صحافة
ورايحة اقدم على وظيفة فى مكتب محامى
الاقيه بيقولي
هتكتبى المذكرات على الكمبيوتر
وهتكنسى وهتمسحى المكتب وهتقدمى شاى للعملا
وهتاخدى 150 جنيه شهريا

مسحت دموعى يوميها؟
حسيت معايا بالاهانة يوميها؟
لعنت اليوم اللى اتعلمت فيه يوميها؟

ايش عرفك انت بيا
جيت معايا لمكتب توظيف
وشوفت صاحب المكتب الوسخ ابن الوسخة
وهو بيغتصبنى بعيونه
وبيعرينى بنظراته من راسى لرجلى
ويقولى انا مستخسرك فى بهدلة الوظايف اللى عندى
انتى هتبقى ليا انا؟
ولو عايزة من الف جنيه لخمستلاف انا مستعد ادفعهم؟
تفيت معايا على وشه يوميها؟
بطنك وجعتك يوميها من حقارة العرض؟
نفسك راح منك من الخضة وانت بيتعرض عليك عرض وسخ كدة؟
مشيت فى الشارع يوميها وانت عيونك مزغللة من دموعك؟

ايش عرفك انت بيا
اشتغلت فى يوم بيبي سيتر لبت عندها ست سنين
من ورا اهلك
علشان متجرحش مشاعرهم
و علشان متهينش مستواهم الاجتماعى
وعلشان مايستنكروش فعلتك
وانك ازاى تشتغل كدة وانت مؤهلك اعلام قسم صحافة؟
وان عيلتك مراكزها حساسة؟

سمعت بودنك اهانة ام البت
وهى بتقولك من طراطيف مناخيرها
ازاى بتقولى لبنتي تجيب القلم من على الارض
امال انا جايباكى هنا ليه
ده انا مابطلبش منك انك تشطفيها بعد ما تعمل تواليت
دى البنت بتندهلى انا و بتقولى يا مامى تعالى شطفينى لانها مابتعرفش تشطف نفسها

ايش عرفك بيا وقتها
حسيت بيا وقتها
قلت فى سرك معايا وقتها وانت بتلم حاجاتك و بتمشى من عندهم وبترزع الباب وراك
احا يا بنت الكلب انتى كمان عايزانى اشطف طيز المحروسة بنتك بعد ما تشخ خرا
صعبت عليك نفسك يوميها
عيطت يوميها
روحت بيتك و كنت عايز تحرق ام الشهادة اللى خدتها
ومش عارف تعمل بيها ايه غير انك تلفها وتلبسها فى طيزك زى الخازوق
بصيت فى عيون اهلك ولومتهم لوم صامت
انهم استجابوا لرغبتك ودفعوا دم قلبهم فى تعليم خاص
علشان تتعلم الحاجة اللى بتحبها
واخرتك بيبى سيتر عند عيلة
امها عايزاك تشطف طيظ المحروسة


ايش عرفك انت بيا
اتطردت فى يوم من مكتب
مدير مكتب مدير جامعة
علشان مارضيتش انك تتمرقع معاه فى الكلام
علشان يوافق انه يدخلك تعمل انترفيو مع مدير الجامعة


ايش عرفك انت بيا
كنت معايا فى المعادى
لما بنت وقفتنى وطلبت منى انى امشى
معاها شوية لحد محل الكوافير اللى بتشتغل فيه
علشان ادارى جيبتها المقطوعة
وفى وسط دردشتنا
شهقت بالصوت الحياني فى الشارع
وقالتلى يا نهار ابيض
لما عرفت انى جاية من اكتوبر لحد المعادى
علشان ادور على شغل وانا معايا بكالوريوس اعلام قسم صحافة؟
وهي ساقطة ثانوية عامة وبتشتغل وبتاخد مرتب كويس
كنت معايا يوميها وهى بتعرض عليا انى اشتغل معاها
في نتف الحواجب وعمل الوش بالفتلة
واخد الف جنيه فى الشهر غير البقشيش؟


ايش عرفك انت بيا
ايش عرفك انت بذل بنت الأكرمين علشان تعتمد على نفسها
دون اللجوء لواسطة عيلتها ام مراكز حساسة

ايش عرفك انت بيا
لما الاقى نفسى محطوطة بين خيارين
ياما اشتغل شرموطة او خدامة علشان اخد مرتب كويس
او اشتغل شغلانة محترمة واخد مرتب لا يقينى ذل السؤال ولا يقينى شر الحاجة

هى البلد دى مافيهاش وظائف محترمة بمرتب محترم؟
مافيهاش وظيفة لا تهين شرفى ولا كبريائى ولا مستوايا الاجتماعى ولا تعليمى؟

ليه الوظائف المحترمة مرتباتها تكسف
وليه الوظائف الوسخة والمهينة مرتباتها عالية
وليه علشان اشتغل شغلانة محترمة بمرتب محترم اضطر انى الجأ لواسطة؟
طب والناس اللى معندهومش واسطة يعملوا ايه؟

ايش عرفك انت بيا دلوقتى
يتعيط معايا معايا دلوقتى
مناخيرك ساحت منك دلوقتى
حاسس بقهرتى دلوقتي
صوتى وصلك دلوقتى
سامعنى يا جمال
طب ابوك سامعنى؟


ايش عرفك انت بواحدة بنت ناس و متعلمة ومتربية
تتحول لمجرد بت خيخة
عارف يعنى ايه خيخة
تلاقيك مش عارف


بص يا اسمك ايه
الوحيد اللى كان ممكن اخاف عليه من كلمة طظ هاقولهالك هو ابويا
وابويا مات
فبالتالى دلوقتى بس اقدر اقولهالك بعلو صوتى
يا جمال طظ فيك
وطظ فى ابوك
وطظ فى امك
وطظ فى عيلتي ام مراكز حساسة
اللى خايفين على مراكزهم الحساسة من كلمة طظ هاقولهالك


اخر الكلام
يا جمال
لو عايز تحكمنا ... اعرفنا



اخيخ كلام
يا جمال عنداً فيك وفي ابوك
انا لسة قادرة اضحك من قلبي
وايش عرفك انت بالضحك من القلب؟



انتهى
بت خيخة وأي كلام

Wednesday, July 15, 2009

علشان ترتاح


هي طلبت منه يبعد

علشان ترتاح ... في حياتها

وبثقة شديدة منه

وافق هو على طلبها


بعد ماسابها ونزل من البيت

شالت فيشة التليفون

وقفلت الموبايل


دخلت الحمام تستمتع بدش بالمية الساقعة

واحساس السيراميك الساقع تحت رجلها

بيدغدها ويحسسها براحة الحرية


تلبس برنسها

وتسيب شعرها مبلول

من غير ما تنشفه بالفوطة


تفتح المروحة وتقف قدامها

تغمض عنيها فى نشوة

أصلها بتعشق الهوا الساقع


تبص للمروحة وتردد كلمات

شجرة _ بير_زرار


بتحب تسمع صوت الكلام

اللي فيه حرف ر

وهى بتنطقه قدام المروحة

روحها بتتزغزغ لما تسمع الصوت ده

علشان بيعمل صوت لذيذ

صوت زي تكسير بسكويت

او قرقشة خيارياية صابحة


شعرها يبطل ينقط مية

لكن مازال مبلول


تكح كحة صغنونة

نفسها الكبيرة العاقلة تقولها هيجيلك برد

نفسها الصغنونة الشقية تهز اكتافها

و تقولها مش مشكلة


تقرر انها تفضل لابسة برنسها

ومش هتقيد جسمها

بأساتك أندر وير ولا حمالات برا

ومش هتسرح شعرها

هتسيبه ينشف بجنونه


مجرد لمسة من زبدة الكاكاو على شفايفها

ولحسة صغنونة من كريم مرطب على خدودها

ولوشن بريحة الورد على باقى جسمها

وخلاص على كدة


تعمل لنفسها مج كاكاو سخن ملهلب

وتشغل الكمبيوتر على أغنية

Bang bang

بتعشق الأغنية دى

بتسحر روحها وبتدوبها

وبتاخدها لعالم فى خيالها

مافيهوش غيرها وغيره


تقعد فى سريرها

و تطفى نور الاباجورة

وتحضن مج الكاكاو بايديها الاتنين

وتمزمز فيه بروقان بال

وبإستمتاع بوحدتها


يخلص الكاكاو وتتعاد الاغنية

تحط المج على الكمودينو

وتقلع برنسها

وتحت الكوفيرتة تغطي جسمها

المتحرر من كل الأساتك


ورغم تحرر جسمها

اللى خلاها تروح فى النوم

إلا انها كانت محتاجة

بوسة منه فوق جبينها

علشان ترتاح ... فى النوم



إنتهى


بت خيخة وأى كلام

users online