Sunday, January 04, 2009

إغتصاب الروح



هى كانت نايمة ومستغرقة فى نومها
إحساس غريب إنتابها
وخلاها تقلق من نومها

وهى بين النوم والصحيان
حست إن فيه حاجة بتدعبس فى جسمها

مع التركيز العقلى
فى محاولة منها لمعرفة ايه ده؟
وايه الحاجة دى اللى بتدعبس فى جسمها؟
ومع تفتيح عنيها
فى دلالة على انها خلاص فاقت تماما
صرخت

ايوة فتحت عنيها وصرخت
صرخت لما وجدت شخص
عريان تماما بدون الحد الادنى من الهدوم
والشخص ده بيحاول يقضى منها وطرا
هى حاولت جاهدة انها تمنعه
صرخت ولما الصراخ ماجبش فايدة معاه
بل بالعكس واضح ان صراخها كان بيزيد من إثارته
قررت انها تتكلم

قالتله لأ
طب نتكلم الأول
ماينفعش كدة
حرام عليك
ومع كل جملة بتنطق بيها
كان بيستخدم قوته الجسمانية بشكل واضح
لانها لاقت نفسها فى لحظات
ايديها الاتنين ممسكوين بايد واحدة منه
و محطوطين فوق راسها
وايده التانية
بتحاول تفك زراير البيجامة

عيطت وصرخت
وحاولت تضربه بالشلوت
بس رجله كانت اقوى
من انها تعرف تحرك رجليها
اللى مدفونين تحته

قالتله نتكلم الاول
وكل واحد يقول اللى عنده
طب نتخانق .. نتخاصم
طب نتعاتب ونتصالح
ماينفعش اللى بتعمله ده
ماينفعش ترجع بالشكل ده
واحنا بنا مشاكل

لكن للاسف
مع كل جملة بتقولها
كان هو بيحرز انتصار جديد
فى التغلب على حواجز منيعة
زى جاكت البيجامة وبنطلونها
وتي شيرت تانى لمزيد من التدفئة
وحاجتين كمان يمثلوا الأساسيات فى اللبس

وهى بسبب عنصر المفجأة
والصراخ والكلام اللى غرقان عياط
اعصابها سابت
وكل اللى قدرت تعمله انها تركز اوى
وتخلى عقلها يعمل حاجز
بين نفسها وبين جسمها
هو بيبوسها لكنها مش بتتباس
هو بيقضي منها وطر
لكنها لم يقضى منها وطر
هى مش حاسة باللى بيحصل
هى قررت انها متحسش
هى عايزة انها متحسش

هى سابت نفسها لغيبوبة عقلية
هى صنعتها بنفسها
محاولة منها انها تلاقى حاجة
تلجأ ليها وتحسسها بالأمان
حاجة تخليها متصدقش اللى بيحصل

مافقتش الا لما حست ان ايديها حرة
وانها تقدر تنزل ايديها من فوق راسها
وتستر صدرها العريان
وتشد البطانية على جسمها
الملوث بعرقه ولعابه ومنيه
اما هو فصدرت منه تنهيدة ارتياح
ومافيش ثوانى
وكان صوت شخيره بيعلى على صوت السكوت

وهى قامت من مكانها
بجسد عارى
وبعيون دامعة
ومناخير سايبة
ورجلين بتترعش
وصداع فى الرأس
ووجع فى الزور
واحساس بالقيئ

دخلت الحمام
قعدت في أرضية البانيو القدم
وفتحت المية الساقعة
واللي من هول الموقف
هي مش حاسة بسقوعيتها
كانت قاعدة منكمشة على نفسها
ودافنة راسها فى ركبتها
وبتترعش
بتترعش اوى
جسمها كله بيترعش
صوت عياطها مغطى على صوت المية
والصداع اصبح مدمر
واحساس القيئ اتحول من احساس لواقع
خلاها تقوم من ارضية البانيو
وتسند على ارضية الحمام بركبتها
وتميل راسها فى التواليت
واستسلمت لمعدتها الرافضة لما في جوفها
وبعد ما انتهت
زحفت لحد البانيو وقعدت تانى فى ارضيته
ساعتها بس حست بسقوعية المية
وقررت انها توسطن دراع الحنفية
وتخليها دافية

وبعد فترة من الوقت فى استيعاب الاحداث
الحقيقة ظهرت واضحة قدامها
وانها اتعرضت لمحاولة اغتصاب
وقررت انها تلم اشلاء روحها المتبعترة
وتقوم تنضف نفسها
مسكت الشاور جل
واترددت لحظات وسابته
مسكت ازازة الديتول
ودلقتها كلها فى ايديها وعلى جسمها
ومستخدمتش الليفة
استخدمت ضوافرها فى تنضيف جسمها
كانت بتحفر فى جسمها
بتحفر خطوط عرضية وطولية حمراء اللون
بسسب احتكاك ضوافرها بجسمها
كانت بتنهش جسمها بنفسها
زى ما تكون عايزة تقلع جلدها
وبعد ما انتهت
لبست برنسها وخرجت
واتوجهت لمكان الجريمة

لاقته لسة نايم
إيه البجاحة دى
جملة نطت فى عقل بالها
لما لاقت مغتصبها
نايم فى سريرها ومحاولش يهرب
قربت منه اوى للتدقيق فى ملامحه
ولما تبينت ملامحه واتأكدت منها
ساعتها اتمنت ان يكون مغتصبها
حد تانى غير جوزها

وساعتها
الصدمة كانت بمثابة صدمتين
صدمة الاغتصاب
وصدمة ان المغتصب اقرب انسان ليها
وساعتها بس قررت
انها تخبط على كتفه وتصحيه من نومه
وتقوله من فضلك طلقني

أخر الكلام

القلب هو الأرض الوحيدة
التى لا يمكن ان تطئها قدم مغتصب



إنتهى

بت خيخة وأى كلام

87 comments:

Eng. Ahmed Abo El-Ella said...

حيوان في غابه

محمد عتلم said...

القلب هو الأرض الوحيدة
التى لا يمكن ان تطئها قدم مغتصب
هاى خيخه...
الجمله دى فعلا رائعه بجد
والبوست كله حلو
بس نفسى بجد اعرف حاجه واحده بس..بس من غير زعل .. ايه حكاية توسطن دراع الحنفيه دى؟؟؟ انتى فيه حاجه بينك وبين الحنفيه ام دراع واحد دى ؟؟

محمد عتلم said...

خلونا نتفق إن البطلة فى قصتنا النهاردة مش انا
وخليكم مقتنعين تماما انى ساعات بكون كدابة
ــــــــــــــــــــــــــــــ
طبعا انا متفق تماما معاكى ان البطله مش انتى
وكمان مقتنع انك ساعات بتكونى كدابه

نيران said...

مؤلمة..
بس حقيقية
و تحمد ربها ان عندها فرصة تطلب الطلاق
بدون ما تفكر في العيال والمجتمع

انا باحيها على شجاعتها!

abdo said...

ممكن سؤال واحد فقط
هو الكلام ده حقيقى ؟

ِِAdem El-Mahdy said...

بجد

شبعنا كلام عن الجنس و الكلام ده

كل ما ادخل الاقى
هونجا بونجا

بجد

استأذن حضرتك تفتحى الجزيرة و لو ربع ساعة و انتى تشوفى هونجا بونجا لاخوانا فى غزة

عزرا على تبجحى

و لكن

الوضع جد خطير

الطائر الحزين said...

اكيد لازم يكون زوجها
لانى لا اعتقد ان يقوم شخص واحد بإغتصاب امرأة وهى واعية مهما كانت قوتة

========

Oussama achraf said...

طب اية ...مش فاهم اية دة واية الفكرة واية الهدف المرجو ؟

وومن said...

ااااااااه يا وجع قلبي

حرام عليكي انا كنت هاعيط وكمان حسيت بقرف قوي كاني عاوزة ارجع زيها

ايه ده

مش لاقية كلام

سلام بقي

kareem said...

ايه القرف ده
هو لسه في حيوانات بالشكل ده

آه وكفى said...

ياسلام

آه وكفى said...

على فكرة ياخيخة انا روحت اقرأ تاني ورجعتلك
خيخة ابئي ابعتيلي توضيح بعد كل بوست الله يخليكي لحسن انتي بئالك بوستين كده ولا حاجة مش فاهمة عيزة تقولي ايه
راعي اصحاب الععقول الضيقة اللي زيي الله يخليكي لحسن تعبتيلي تفكيري جامد
يابنتي ليه كده دانا عندي استمحانات ومش نقصاكي

تحياتي ياعثل

البت المشمشية حلوة بس شقية said...

ياااااااااااااااا
ايه القرف ده
للدرجادى فى راجل ممكن يبقى قذر لللدرجة دى مع مراتو

ويعاملها وهو ياخد حقو
بلوحشية والهمجية دى
بس قرار الطلاق مش عارفه
حلو ولا وحش
فهمينى ياخوخة الحتة دى

همس الاحباب said...

القلب هو الأرض الوحيدة
التى لا يمكن ان تطئها قدم مغتصب
لا تعليق

ňįĝŗő said...

مش
تحسي كده إن
مفيهاش كده اللي اسمه إيه ده
يعني أول لما تيجي تلاقي
لألألألألأ
مش حلوة على فكرة

يا شريرة برده



يلا سلام

dreem said...

خيخة
واضح ان بطلة القصة لسة صغيرة فالسن
لما تكبر شوية واعتقد انها هتبوظ عيشتها لو فضلت تدقق بالطريقة دى .. بس لما هتقعد مع نفسها وهتفهم او احتمال تفهم ان تربية معظم الرجالة كده !!
حقهم الشرعى واللى شايفين انهم ياخدوه فاى وقت وبأى طريقة وحتى لو كانوا متدينين هيتغاضوا عن مقولة الرسول الكريم عليه الصلاة والسلام : ولا تقعوا عليها كالبهيمة
لو صاحبة القصة كبرت شوية ممكن تفهم ان حتى لو فيه مشكلة وخناقة
فان كتير من الرجالة بيعتقدوا ان دى طريقة للصلح زى ما فيه كتير من الستات بيلجأوا للطريقة دى برضه للصلح !
قولى لصاحبتك تكبر شوية او تنزل على ارض الواقع والمرة الجاية تتفاعل وتحول الموضوع اللى حصل ده لصالحها واهى عيشة !
وبلاش نبص للحكاية على انها اغتصاب مع انى عارفة هى قد ايه مؤلمة ومقرفة وبتحس فيها الست انها فقدت ادميتها .. بس كل حاجة وليها حل وتعويض
مش عارفة انتى فهمتينى ولا لا
تحياتى لك وحضن لصاحبة القصة

dreem said...

عايزة اقول لصاحبة القصة حاجة تانية يا خيخة
ممكن تبص للموضوع من ناحية تانية
بما اننا عارفين ان الرجالة ما عندهمش صبر وما يقدروش يستغنوا عن السيكو سيكو
وبما ان جوزها عمل كده معاها وبالطريقة دى
فمعنى كده انه ما بيخونهاش او بيعمل حاجة غلط ودى حاجة لازم تقدرها
عارفة ان كلامى مش هيعجبك بس اهو نوع من الطبطبة واللى ممكن تعجب ستات كتيرة
وسلاموز

بت خيخة وأى كلام said...

احمد ابو العلا
المشكلة ان هو واللى زيه
مش بيعتبروا نفسهم حيوانات
بيعتبروا ان ده حقهم
تحياتى ليك











محمد عتلم
كويس ان البوست عجبك
اما حكاية الحنفية ام دراع واحد
فده لانى حنفيتى بدراع واحد
ولما باجى اكتب قصة فيها سيرة الحنفية
بتخيلها حنفيتى انا
وكويس انك مقتنع ان بطلة القصة مش انا
وكويس انك متقبل انى ساعات بكون كدابة
تحياتى ليك










نيران
دى واحدة عندها الشجاعة انها تطلب الطلاق
شوفى كام واحدة زيها فى مجتمعنا
معندهاش الشجاعة انها تطلب الطلاق
وبتعمل حساب لكلام الناس
وعاملة خاطر لعيالها ولاسرتها على حساب نفسها
هتلاقى كتييييييراوى يا نيران
تحياتى ليكى











عبده
اه حقيقى
ايه عمرك ماسمعت عن واحدة جوزها اغتصبها؟










ادم المهدى
أحا
ولا مؤاخذة يعني
هو ايه اللى كل ما ادخل الاقى هونجا بونجا
والله انا مدونتى مش كلها هونجا بونجا
ولا كلها كلام عن الجنس
وكون ان مافيش حاجة تعلق فى دماغك من مدونتى
غير الهونجا بونجا والجنس
يبقى انت ما بتفكرش غير فى الهونجا بونجا والجنس
وانصحك انك تقراها كويس
قبل ما تسيب تعليق زي ده
وانا مش محتاجة ان افتح الجزيرة ولا ربع ساعة ولا نص ساعة
علشان اشحن مشاعرى الوطنية
انا مشاعرى الوطنية مشحونة من غير قناة الجزيرة

وعذرك على تبجحك معاك
واعذرنى على تبجحى انا كمان
تحياتى ليك












الطائر الحزين
ما انا قايلة انه جوزها
والفكرة مش شخص واحد ولا اكتر
الفكرة فى ان ساعات الطعنة اللى تجيلك من غريب
ممكن تكون اخف الف مرة من طعنة بتجيلك من حبيب
ولما بتاخد ضربة من الحبيب
بتتمنى ان الحبيب ده يكون غريب
فى اللحظة اللى وجهلك فيها الضربة
لان الالم بيكون مضاعف عشرات المرات
عن الالم اللى بتسسبه نفس الضربة من حد متعرفهوش
تحياتى ليك














اسامة اشرف
ده ولا حاجة ومافيش منه فكرة ومافيش منه اى هدف مرجو
دي مجرد قصة من واقعنا الأليم
تحياتى ليك










وومن
اعتذر عن القرف اللى سببتهولك بقصتى
تحياتى ليكى يا ميرا
















كريم
لسة فيه حيوانات بالشكل ده
؟؟؟؟؟؟؟؟؟؟؟؟؟؟؟؟؟؟؟؟؟
!!!!!!!!!!!!!!!!!!!!!
اه طبعا فيه
امال انت كنت فاكر
انك عايش فى مجتمع محترم لا قدر الله
تحياتى ليك
















اه وكفى
توضيح ايه يا نورا؟
واحدة جوزها اغتصبها
عايزة توضيح اكتر من كدة ايه؟
طب اقرى ردى على الطائر الحزين
يمكن تفهمى انا عايزة اقول ايه
تحياتى ليكى






















البت مشمشية
والله يا مشمشية
حسب حالة كل واحدة
ساعات الطلاق بيكون حل
وساعات بيكون بداية المشاكل
وانا ليا راى فى الطلاق
وخصوصا مع ازدياد نسبة الطلاق مؤخرا
ان الست بتاعة الايام دى غير الست بتاعة جيل امهاتنا وجداتنا
الايام دى تقريبا كل البنات متعلمات
ومعاهم شهادات وبيشتغلوا
ومعاهم قرش يتسندوا عليه
فبالتالى البنت لما بتتجوز
ولو حصل اهانة من اى نوع من جوزها
هى شايفة انها مش مجبرة انها تستحمل الاهانات دى
فبالتالى بتطلب الطلاق وتصر عليه
والى بيشجعها على كدة تعليمها وشغلها
لانها مش محتاجة راجل يصرف عليها
هى تقدر تصرف على نفسها
او يكونوا اهلها قادرين ماديا انهم يصرفوا على بنتهم
لكن امهاتنا وجداتنا كنتى هتلاقى نسبة الطلاق قليلة جدا
لان الجيل ده ماكنوش كلهم متعلمات
وكانوا معتمدين بشكل اساسى
على الراجل فى الصرف عليهم
وعلى سكن الزوجية فى مأواهم
وخصوصا كمان ان الاهل نفسهم
كانوا بيربوا فى البنت
انها تخرج من بيت جوزها على التربة علطول
ومهما عمل فيها حاجة
عليها انها تستحمل ومتقولش بم
فبالتالى الست ايام زمان
كانت بتخاف تطلب الطلاق
لان مافيش فى ايدها شهادة تشتغل بيها
ولو متعلمة وبتشتغل ففكرة انها تتطلق دى
كانت فكرة مستبعدة من دماغها تماما نتيجة التربية
اما جيلنا دلوقتى
البنت بقت مستقوية بشهادتها وتعليمها
وعندها انها تعيش مطلقة بكرامتها
على انها تعيش مهانة فى بيت جوزها
وبطلقة القصة هنا اهينت بشكل فادح
اهينت فى مشاعرها وجسمها وكرامتها
وهى مش متقبلة الاهانة دى
فمن حقها انها تطلب الطلاق
ممكن واحدة تانية تتعرض لنفس موقفها
ومتقدرش تتطلب الطلاق لاسباب عائلية او مادية
بس هو ده رأي
تحياتى ليكى
















همس الاحباب
ماشى
انا كمان مش هعلق
تحياتى ليك يا خالد






















نيجرو
ههههههههههههههههه
يا حول الله يارب
الواد نيجرو اتعدى منى يا رجالة
وبقى مهيس زى حالاتى
معلش يا نيجرو حقك عليا يا صغنوني
مش هاعمل فيكم كدة تاني
تحياتى ليك

















دريم
بصراحة ومن غير زعل منى
انا قريت تعليقك اكتر من مرة
ومش لاقية منه اى حتة امسك فيها واعلق عليها
فبالتالى هاكتفى بقراءة تعليقك
دون الرد عليه
مش علشان تعليقك وحش ومايستهلش الرد عليه
ولكن علشان تعليقك ناتج عن فهم شديد احييكي عليه
وإلمام بكل جوانب القصة
ومعنديش كلام يتقال بعديه
تحياتى ليكى يا دريم

abdo said...

انا مكنتش أعرف وأول مرة أسمع عن حاجة زى كده
ومكنتش أتوقع ان فى حاجة زى كده

... amr said...

احم ... معلش ... بس هو حاجة من اتنين
يا اماالراجل دة شرقان

يا اما الراجل دة قذر

........
معلش .. سامحيني على البذاءة

الطائر الحزين said...

انا مش قصدى يا خيخة
هذا شخص غير مؤتمن عليها ومريض
اما تتحمل مرضة او تحاول علاجة او تسيبة
بس الموضوع حساس وفيه كلام مش عارف اصيغة صياغة محترمة متأسف

بنوته مصرية said...

القلب هو الأرض الوحيدة
التى لا يمكن ان تطئها قدم مغتصب

الكلمه دي مشكله فعلا

القصة كلها بصراحه

رائي لما اشوفك هقولهولك لان معنديش الشجاعه الكافية زيك

احيكي علي شجعتك يا نورا واسلوبك المتميز

كلمه في سرك اصل كلامي متراقب اليومين دول ههههههههههههههه

Anonymous said...

طيب والله العظيم كلام محترم جدا جدا
ولكن للاسف كتير مش بيفهموا اهميته لانهم
لم يصلوا لقيمه واهميه وجود الرضا والاستعداد لهذا الامر
وبالرغم انني اعترف بان معظم الرجال
يتميزون بالجهل في التعامل
وان هذه الحاله التي نجن بصددها
بطلها جاهل وارتكب الجريمه بالخطا
الا ان المصيبه ان كثيرون من الرجال لا يكلف نفسه بمحاوبله الفهم والاطلاع
واريد ان اسجل تاييدي الكامل للفظ وهو الاغتصاب نعم هو اغتصاب
وخاصه عندما تكون المراه ممن يتميزون بالاحساس المرهف
فالمساله نسبيه تماما
عموما اعتذر للاطاله ولكني اردت ان اسجل تقديري واعجابي بجراتك اتناول هذا الموضوع
دمتي بكل خير
اردت ان انبهك فقط ان ابنتي 8 سنوات تستمتع بقراءه مدونتك
تحت اشرافي طبعا
وبتحب البت خيخه اوي
احمد

Tamer Diab said...

أنا مش مبسوط لأن المضمون كويس والهدف برضه ممكن يكون كويس بس الطريقة فجة اوي أوي أوي
ليه كده
وبعدين واحد بيعبر عن رأيه وقلك افتحي الجزيرة هو حر في رايه
مكنش في داعي لأحا دي خالص بصراحة وبدون زعل

بت خيخة وأى كلام said...

عبده
اديك عرفت
تحياتى ليك










عمرو
بذاءة ايه؟
انا مش فاهمة اساسا؟
هو انت كلامك فيه بذاءة وانا مش واخدة بالى
وش واحدة مستغربة ومندهشة
تحياتى ليك















طائرى الحزين
اوك وجهة نظرك وصلت
تحياتى ليك









بنوتة مصرية
لما اشوفك هاقررك علشان اعرف رايك
تحياتى ليكى يا رودى










احمد
والله استغربت جدا
وفرحت جدا لما عرفت ان بنتك
8 سنين بتقرا مدونتى
بس هى بتفهم الكلام اللى بقوله
متهيألى ده كلام كبير عليها
وكويس انه تحت اشرافك
علشان متفتحش عين البنت على الاسلوب الخيخى فى تناول الموضوعات
تحياتى ليك










تامر دياب
طريقة ايه اللى فجة؟
طريقة عرض القصة
ولا طريقة ردى على ادم المهدى؟
ياريت توضح

والله احا دي طلعت منى علشان اتنرفزت من كلامه
هو ايه اللى كل ما يفتح المدونة يلاقى هونجا بونجا وكفايةكلام عن الجنس

اللى متابع مدونتى كويس هيعرف ان انا مش كل بوستاتى عن الجنس
واكيد يعنى اللى نرفزنى مش جملة انى افتح قناة الجزيرة
اللى نرفزنى
انه كاتب تعليق زى ما تكون مدونتى مصنفة تحت بند المدونات الجنسية

ولو كنت مش مبسوط
دى حاجة ترجعلك

انا مش مطالبة انى اطبطب على القراء اللى مش مبسوطين منى

وكدب عليك اللى قال ان فيه حد يقدر يرضى الناس كلها

اذا كنت انت مش مبسوط
فانا متأكدة ان فيه كتير زيك مش مبسوطين

بس انا شغلتى مش انى ابسطكم

و لو اتبسطتوا منى فى يوم من الايام
فلازم تكون واثق ان دى بتكون حاجة على سبيل الصدفة وليس عن قصد مني

تحياتى ليك

... amr said...

لا انا اقصد لو ف كلامي انا فية بذاءة

اصلي بصراحة كان جوايا كلام كتير بس مش كويس يعني بس شيلتة و نسيت الجملة الاخيرة بتاعت الاسف

بس مش عارف لية حسيت لوهلة ان الكلام عبارة عن اسقاط سياسي مثلا ... ممكن
ممكن تفسيري غلط

عموما متندهشيش .. يمكن انا معرفتش اوصل اللي جة في بالي

معلش على الازعاج دة
تحياتي

البت المشمشية حلوة بس شقية said...

فهمت
بس ارجع واقولك اكيد
اختيارها من الاؤل غلط
مش عارفه
بس انا معاكى فى كلامك كلو
نفس راى بلظبط
شكرا ياخوخة
وسلامى لشيكو اخبارك ايه
بقالك كتير مش بتكلمى عنو ليه فى بوستاتك

ستيته حسب الله الحمش said...

انتي تحفه سا ست انتي
ومش عارفه سميتي نفسك خيخة لييييييييه؟
امال ستيته تبقى ايه؟
ناوية اكون صاحبتك بالقوة حتى لو رفضتي وقلتي فارق السن كبير يا طنطي
يعني ها ادور عليكي اكيد غتاتة بقى
تعبيرك عن الوضع في القصة رائع يمكن صعب علي تخيله جدا
بس هو شبيه بما اقرأه عند علاء الأسواني في شيكاغو
وبما ان الناس بيقوله يبقى مؤكد بيحصل
طظ في العيال
طظ في الناس
هو حتى بيت الأنسان اللي هو امانه وملاذه الوحيد يتحول لجوانتانمو وتقولوا للست عيشي
ايوه عيشي بكرامة في مكان تاني فيه الأنسان لسه انسان عايش للتاني

فاتيما said...

نونو
مش عارفة أقولك إيه !!
اللى قولتيه عاااااااادى جدا
و بيحصل كتير لستات كتير وقعهم حظهم التعس فى مخلوق ناقص
عنده إحساس بالدونية
و بيتصور إن دى طريقته الوحيدة المتبقية لفرض قوته
خصوصا لما يتاكد
أن الست اللى قصاده مرهفة الحس
و التهجم عليها بالطريقة دى
منتهى الاهانة ليها
يمكن لأنه مش قادر يهينها
بشكل تانى
لا بالفلوس و لا غيرها
فمبقاش فاضل غير أنه ينتهك روحها
و مشاعرها
و كله تحت بند الحقوق الشرعية
و أتكلمى بقى و امنعينى من حقى
و ربنا هيغضب عليكى و الكلام اياه دا المراد به باطل و ظاهره حق
كل دا انا مش مستغرباه
اللى مستغرباله حقيقى
التعليقات اللى مستغربة إنه بيحصل كدا
و كأننا نحيا فى عالم الملائكة
تعليق دريم فضفضة ع السريع
واقعى جدا و عقلانى
لأن هدفه الحفاظ على البيت
بس من ناحية التنفيذ يكاد يكون مستحيل ...
أزاى الواحدة تندبح
و تحط راسها كل ليلة على مخدة واحدة مع الجزار ؟!!
دى مش عيشة بنى آدمين
دى حاجة تانية معرفش اوصفها
كلام الطائر الحزين
و خصوصا ما لم يقله ..
يبدو مقارب للى عاوزة أقوله شوية
و هوه أن الزوج من عينة الذكور دول و مش هقول راجل لأنه مش راجل
دا ذكر بيولوجيا و فقط
النوع دا عنده مركب نقص
و قاصد الاهانة النفسية قبل الجسدية
أو مريض بالحكاية دى
كلمة اخيرة
لو أنا مكان بطلة قصتك
هطلب الطلاق و معقدش معاه
ثانية واحدة بعد كدا لأنه هيتعود على أنى بقيت ضحية و مستسلمة
و كما فقدت عفة روحى بوحشية
هفقد كرامتىهفقد رغبتى فى الحياة بعدها
و الله يكون فى عون بطلة قصتك
اللى أتمنى تكون حد تانى
و متبقيش بتكدبى
و نفسى اخدك فى حضنى دلوقتى
عشان البوست دا دبحنى بجد
و متخيلة ممكن يكون إحساسك و إنتى كاتباه إيه
أو قريب شوية من كدا
حبى و تعاطفى
و قبلهم إحتراماتى
يا حبيبتى

بت خيخة وأى كلام said...

عمرو
طب ما انا بقولك
هو كلامك انت فى التعليق الاولاني فيه بذاءة وانا مش واخدة بالى؟
اصل كلامك كان عادى
وانت اعتذرت لو فيه بذاءة
فأنا مش عارفة هل انت كاتب كلمة عادية من وجهة نظرى
و بذيئة من وجهة نظرك
ولذلك انت اعتذرت عنها؟

تحياتى ليك
















البت مشمشية
بصراحة معنديش اى فكرة عن اختيارات البطلة
؟
فبالتالى مقدرش احكم اذا كان اختيارها غلط
ولا صح

ومتقلقيش هاجيب سيرة شريف قريب
تحياتى ليكى











ستيتة
اولا انا بحب اسم طنطى دى
اصل انا بقول لكل قرايبى الستات
طنطى
وانا يشرفنى ان حضرتك تكونى صاحبتى
اهلا بيكى









فاتيما
اسفة يا فاتيما
اذا كان البوست وجعك اوى كدة

لو أنا مكان بطلة قصتك
هطلب الطلاق و معقدش معاه
ثانية واحدة بعد كدا لأنه هيتعود على أنى بقيت ضحية و مستسلمة
و كما فقدت عفة روحى بوحشية
هفقد كرامتى
وهفقد رغبتى فى الحياة بعدها

انا بتفق معاكى فى الكوبليه ده جداااااااااا

تحياتى ليكى

Anonymous said...

ارفع لك القبعة لاسباب كتير:
منها شخصيتك الواضحة والجرئية اللى فاهمة نفسها وبتعبر عنها بمنتهى الحرية ومش بتخافى من حاجة، لا مجتمع ولا ناس ولا زوج ولا اهل
وكمان بتعرفى تاخدى حقك وتوقفى كل حد عن حده وده دليل على شخصيتك القوية
وكمان جواكى انثى ذكية جدا وفنانة وعندها طريقة شيقة جدا وممتعة فى السرد
بس باتفاقنا انك مش البطلة فى القصة دى مش انتى ومع اقتناعنا انك ساعات بتكونى كدابة ، ففى هذه الساعة .. ياترى جوزك بيشوف المدونة وبيقراها ...؟ يا ترى لو كان فى فرصة واحد ف المية انكو تكملو مع بعض هتقدروا تكملو بعد ما شاف الكلام والتعليقات دى ...؟ ياترى فى شخصية ذكورية فى مجتمعنا الذكورى المتخلف تقدر تستوعب ان الزوجة تكون بالتحرر ده ...؟ يا ترى لما ابنك يكبر شوية ويقرا مدونتك هيكون مبسوط بالكلام ده وقادر يستوعبه ...؟؟ يا ترى انتى كمان كام سنة هتفضلى حاسة بالصمود ده والقوة دى والا هتتخيخنى وتحسى ان ليلى ومحتاجة راجل ...؟؟ يا ترى الشخصية اللى بتعمل خير ورحلات تطوعية ومشاوير تبرع ينفع تقول كلام خارج كده .. .. مش ده تناقض برضه ؟؟؟
لو مكنتيش مبدعة وشخصية جذابة ومدونة جميلة مكنش بقى ليها اصدقاء كتير كده ومكنتش كتبت تعليق طويل كده، لانى فعلا بحترمك وهحترمك اكتر لو مامسحتيش تعليقى...
تحياتى

بت خيخة وأى كلام said...

المجهول

نيجى لحاجة حاجة
اولا بشكرك على كل الكلام الجميل اللى انت قايله فى اول كام سطر

نيجى للأسئلة اللى انت بتطرحها عليا


اول سؤال
لا جوزى مش بيقرا المدونة
لكن عارف ان عندى مدونة وعارف ان مدونتى اسمها بت خيخة واى كلام
مش بيقراها ليه
لانه مش بيحب القراية
زى انا كدة مابحبش كورة القدم
ولو قالى تعالى اتفرجى على ماتش مش هالتفت لطلبه ومش هاتفرج على الماتش
فبالتالى مش هاجبره برضه انه يقرا مدونتى


انت سألت سؤال عجيب اللى هو
يا ترى لو كان فى فرصة واحد ف المية انكو تكملو مع بعض هتقدروا تكملو بعد ما شاف الكلام والتعليقات دى

هو حد قالك ان احنا مش هنكمل مع بعض؟
انا بصراحة مش فاهمة سؤالك ده بناءً على ايه
هو انت تعرف عنى حاجة انا معرفهاش؟
؟؟؟؟؟؟؟؟؟؟؟؟؟؟؟؟
عموما لو جوزى قرا المدونة وقرا التعليقات ولو حاجة معجبتهوش
هتعامل مع رأيه كرأى قارئ عادى
لكن لو هو مش هيكون مرتاح انه يكون زوج لواحدة خيخة
فأنا مش هاجبره على حاجة
هو حر
عايز يكمل معايا الحياة
وانا خيخة خير وبركة
مش عايز مش هاضربه على ايده واقوله لازم تعيش معايا




انا متحررة من قبل ما اتجوز
وافكارى المتحررة دى جوزى على علم بيها قبل ما نتجوز
يعنى معملتلهوش مفجأة فى يوم جوازنا وقلتله
بخ
اسكت
مش انا متحررة
كون انه يستوعب شخصيتى دى او مايستوعبهاش
دى مشكلته هو وليست مشكلتى انا

وهو حر يتقبل او لا يتقبل
دى حاجة ترجعله

انا عن نفسى مستوعبة شخصيتى
فبالتالى معنديش مشاكل انى اعيش مع نفسى بشخصيتى المتحررة دى




بصراحة معرفش ابنى هيتقبل كلامى ده ولا لأ
فبالتالى السؤال ده تجاوب عليه السنين الجاية






حكاية الصمود والاحساس بليلنتى واحتياجى لرجل
دى حاجة مقدرش احكم فيها
لان الانسان بيتغير دايما بمرور الوقت







الشخصية اللى بتعمل خير
دى شخصية بشرية يعنى انسانة
ومافيش انسان مافيهوش متناقضات

ما انت محترم جدا معايا اهوه وكاتب كلام كويس
هل معنى ده انك عمرك ما قلت نكتة خارجة مع اصحابك وانت قاعد على القهوة
هل معنى ده انك عمرك ما اتنرفزت وخرجت منك كلمة ابيحة فى لحظة نرفزة

وعموما انا قايلة من زمان انا مش ملاك
انا خيخة
وخيخة دى يعنى قوسين
وجواهم صفات كتيييييييييير
منيلة بستين نيلة


يلا احترمنى اكتر بقى
انا عايزة اشوف الاحترام اللى بجد
مش نشرت تعليقك اهوه
ورينى بقى هتحترمنى اكتر ازاى


سلام يا مجهول
والف شكر على تعليقك
اختك خيخة

tamer.sala7 said...

طيب مش انتي في البوست اللي فات طلبتي من الستات ان لو جوزها طلب منها تريحه وتيجي علي نفسها 10 دقايق مش ح تخسر حاجة ؟؟

يعني انتي عارفة ان الموضوع ده للراجل بيشغل حيز كبير ومساحة اكبر من تفكيره

مع العلم ان جوزها ده كان ممكن بدل ما يغتصبها علشان ينام مرتاح كان ح يكلف نفسه 50 جنيه ويروح يقضي ليلة حمراء في اي مصيبة بعيد عن البيت

تصيحة خليها تفكر في الموضوع تاني

انا حرة said...

يا لهوى على وجع القلب..انا ناقصة
فكرتينى بفيلم النعامة و الطاووس و ان ما كانش بيتكلم عن نفس الفكرة بالظبط لكن فكرة الفيلم الاساسية هى الجهل من الطرفين
جهل الراجل اللى بيصورله ان مفهوم الرجولة كله منصب فى علاقته الزوجية بمراته
و جهل الست اللى بيصورلها ان كل دورها فى الحياة انها تكون وعاء لافراغ رغبات جوزها دون ادنى حقوق ليها
و المصيبة الاكبر لو كانت مش بس جاهلة بحقوقها لكن لو كانت كمان محتاجة جوزها ماديا فبالتالى هتضطر تفقد روحها عشان تعرف تامل عيش فى بيت الحيوان ده
موضوعك وجعنى اوى على فكرة لانى مقتنعة جدا ان بطلته بتشكل نسبة مش قليلة من الستات المتجوزين فى مصر

my dream said...

قصه مالهاش حل يانورا
انا وصلت لاكتر من حاجه مش قصه واحده واغتصبها افرب حد ليها وبس لا انا حسيت حاجات كتير بتغتصب من اول الانسانه لحد الدول ومين الي بيعمل كده دي هي النكبه الجميل بقى انتصارها في انها اخدت قررها لانه ماكنش ينفع غير ده
مع وافر حبي
مروه

بت خيخة وأى كلام said...

تامر صلاح
يا سيدى الفاضل
البوست هنا بيتكلم عن واحدة ست منفصلة عن جوزها لوجود خلافات بينهم
فايمنفعش ابدا
الراجل يعمل اللى عمله ده
وهما لسة مش متفاهمين
وهما لسة ماقلوش اللى جواهم
وكل واحد قال رايه وزعقوا مع بعض واتخاصموا واتعاتبوا واتصالحوا
ماينفعش كدة
خصوصا انها طلبت منه
انهم يتكلموا الاول

اما البوست التانى بتاع هونجا بونجا
ايوة انا كنت بقول الستات تراعى حقوق جوزها وتيجى على نفسها شوية
ده فى حالة الارهاق الجسدى للست
لكن لو فيه مشكلة كبيرة بينهم
ماينفعش حلها يكون بالطريقة دى
ماينفعش اطلااااااااااااقا


وبعدين يعنى ايه جوزها كان هيروح يقضى ليلة حمرا مع واحدة من الشارع

هو انت بتهدد البطلة مثلا؟
هو انت فكرك بطلة زى اللى انا كاتبة عنها دى
ممكن ترتجع عن قرارها برفض ممارسة الجنس مع جوزها وهما فيه بينهم مشاكل لمجرد ان جوزها ممكن يخونها مع واحدة من الشارع؟
طب ما يقضى ليلى حمرا
ولا هتفرق مع البطلة اطلاقا
لأن فى الحالة دى مش الست اللى خسرانة
الراجل برضه هو اللى خسران
لان هيرتكب جريمة الزنا اللى نهانا عنها ربنا
فباتالى انسان مقدرش يتحكم فى شهوته
وخلى شهوته هى اللى تتحكم فيه لدرجة انه يغضب ربنا
يبقى الانسان ده مايسواش فى عين البطلة تعريفة
وساعتها يبقى معاها الف حق انها تطلب الطلاق


تحياتى ليك
















انا حرة
متفقة تماما مع كلامك
وهنا البطلة رغم الامها الا انها احسن من ستات كتير فعلا مش قادرين ياخدوا قرار الانفصال بسبب الاحتياج المادى اللى بيوفره الزوج

تحياتى ليكى

بت خيخة وأى كلام said...

ماى دريم

تقريبا عمرو
اللى ربط القصة بالاحداث السياسية زيك كدة

والله ممكن جدا
خصوصا انى كاتباها وانا متأثرة بالاحداث اللى بتحصل فى غزة

خلاص تعالوا نمشيها انها دولة مغتصبة
وليست إنسانة
ايه رأيكم
ونقلب البوست سياسة

تحياتى ليكى يا مروة

Karim Ibrahim said...

يخرب بيت دماغك
بجد أحاااااااااااا
برافو عليكى
انا بقالى كتير مقريتش بوست بالحلاوة دى
بجد دموعى نزلت
قلبتى عليا المواجع
الى الامام و استمرى

بت خيخة وأى كلام said...

كريم ابراهيم

لا انت فهمتنى غلط

مش معنى انى قلت لفظة اعتراض فى لحظة نرفزة من تعليق جالى
يبقى ده معناه انك تقول لفظة الاعتراض فى وقت المفروض انك تطلق صيحة اعجاب
خصوصا انك قايل بعديها برافوا
ازاى يعنى
تيييييييييت
تيجى بعديها برافو


واسفة ان دموعك نزلت

بس ده يدل على انك مرهف الحس


تحياتى ليك

Anonymous said...

مع كل الحب اللي جوايا ليكي

الا انك بتصدميني يا خيخه بردودك

وخصوصا ردك علي ادم المهدي

وخصوصا خصوصا بعد ما نزلتي بوست بتاع هبطل اباحه
طيب تيجي ازاي
يبقي الواحد منشكح كده من البوست وفجأه يقوم قاري كلمه عندك تقوم عملاله صدمه في النفوخ وخصوصا انه مش لايق عليكي خالص مالص
ربنا يخليلك شريف وتفرحي بيه وتبقي قدوه بجد ليه
______________
وحياة النبي يا شيخه
لوماعجبك كلامي ماتشتميني
امسحي التعليق وخلاص

Anonymous said...

اكيد احترمتك زيادة
بس فى توضيح، انا قصدت ان جوزك يشوف المدونة كان قصدى على البوست ده تحديداً لانه فيه سرد لموقف مش عادى انه يتحكى كده ع الملآ ولا عادى انه يتقبل التعليقات اللى فيه لانها كلها رفض واهانة ليه ولموقفه

احب اعرفك ان مدونتك واسلوبك وطريقتك وتفكيرك وشخصيتك متفردة جدا وجذابة جداومفيش منك كتير

بت خيخة وأى كلام said...

المجهول

سؤال بس
هو انت نفس المجهول اللى فوق اللى قعد يسألنى شوية اسئلة؟

ولا انت مجهول جديد

المهم
انا ايوة هابطل اباحة
وهحاول جاهدة انى ماكتبش حاجات خارجة
بس انتوا برضه اعملوا اللى عليكم وبلاش تستفزونى فى تعليقاتكم
علشان انا لما بتنرفز بأبح
مش دايما يعنى

بس لما بتنرفز اوى والكلام يغيظنى
بتطلع منى كدة كلمات مش ولابد

اعتذر عنها علشان خاطرك

بس قولى
هو انت نفس المجهول ولا مجهول تانى

تحياتى ليك

نعكشة said...

قال صلى الله عليه وسلم: "لا يقعن أحدكم على امرأته، كما تقع البهيمة، وليكن بينهما رسول. قيل: وما الرسول يا رسول الله؟ قال: القبلة والكلام".

سلام عليكِ

بت خيخة وأى كلام said...

المجهول

اه انتوا كدة بقى بقيتوا اتنين مجاهيل

اوك

معلش بس جوزى ماله ومال الموضوع

ولو جوزى قرا الموضوع
والتعليقات
اهانة ايه اللى هتتوجه ليه ولموقفه
وموقف ايه بالظبط؟

انا مش فاهمة حاجة؟


ممكن تفهمنى اكتر

تحياتى ليك

بت خيخة وأى كلام said...

نعكشة
وقال الله تعالى
وقدموا لأنفسكم
صدق الله العظيم

تحياتى ليكى

بت خيخة وأى كلام said...

طلب صغير اللى هيدخل بمجهول ياريت بس يمضى فى الاخر باى اسم علشان اعرف اميز المجاهيل من بعض

شكرا ليكم

يوميات عيل مصري said...

عزيزتي مدام نوران
القصة جميلة جدا، طبعا اقصد الأسلوب مش المحتوى، يمكن المحتوى متعب جدا، بس كالعادة، لما بتكتبي حاجة من جواكي بتطلع رائعة كده
كعادتك دائما، تتحدثين من داخل قلبك، متميزة، وواضحة، بغض النظر عن الرأي حول المحتوى، والذي تكلم فيه الأخوة المعلقين أفضل مما سأتكلم فيه، أحييك على نشاطك هذه الأيام، يبدو ان البرد له عامل في ذلك
ويبدو ان الفريق الذي بدأ معا هذه المدونات الرائعة، كله تميز، فأنت والصباغ وآبي والطائر الحزين وخمسة فضفضة وفرنسا ودوبا ولماضة وسارة وعسقول ودكتور حر، والجميع أصبحتم علامة على العمق
دمتم جميعا بكل خير
أحمد
خالص تحياتي لقلمك المبدع.
دمتي بكل خير
أحمد

Anonymous said...

السلام عليكم

يا جماااااااعه الدعااااء الدعاااء الدعاء ....

الأخبار من فلسطين بتقول ان محمد دحلان كان في مصر واتقابل مع مبارك وبيتعاونوا هما الاتنين عاوزين يحاصروا المقاومة من بره هيدخلوا قوة تابعة للعملاء عن طريق العريش ومعبر رفح ...


ياجماعه ادعوا على الظالم ..
هدف مبارك القضاء على حماس أيا كانت النتائج لانه خايف من الحركة الاسلامية في مصر لو حماس انتصرت ... يا جماعه ده مش هامه مين يموت ومين يعيش ...

يا جماعه اخواننا بيقاوموا اليهود هناك وفي ناس بيفكروا بس ان المقاومين فيهم حماس ولازم القضاء عليهم و بيتعاون معاهم خونة من فلسطين هدفهم السلطة ...

يا جماعه اخواننا بيناشدونا الدعاء ليهم ربنا يحفظهم من العملاء ...

يا جماعه ادعوا ان ربنا مايخدناش بذنبهم .. يا جماعه تبرأوا لله في دعائكم من أي ظلم نتجر ليه واحنا لا بنفهم في السياسة ولا غيره بس حاكمنا عمل كده واحنا عاجزين نعمل لاخواتنا حاجه غير الدعاء ...

بس طالما ن مفيش في ايدينا دلوقتي غير الدعاء يبقى لااااااااااازم ندعي ..

لو تقدروا نوحد الدعاء و نصلي قيام و صلاة الحاجه ان ربنا يحمي المقاومين من اليهود والعملاء و ينصرهم ياااااااااارب!

أختكم

بت خيخة وأى كلام said...

يوميات عيل مصرى

ايه
مين
ده بجد
ولا حلم
ولا انا عنيا مزغللة ولا ايه بالظبط

معقول
احمد على هنا
احمد بجلالة قدره هنا


طب ايه
هو انا لازم اكتب بوست محتواه متعب علشان تيجى تسيب بصمتك الغالية

ياااااااااااه
ده انت ليك وحشة بشكل وحش

انا متهيالى ان لما الناس تقرا تعليقك عندى
هيحسدونى على التعليق ده

بجد بجد بجد
انا مبسوطة
ومنور دائما
وكلنا مفتقدينك جداااااااا


تحياتى ليك ولاسرتك الغالية

لقد خلقنا الله احرارا said...

من غير زعل البوست بتاع الهونجا بونجا كان اسلوبه اكتر من رائع لكن المرة دى فى كلام مباشر قوى هو اللى صحانى من وهمى ان البوست سياسى يمكن علشان المود بتاعنا الايام دى كده بس عارفة المشكلة اننا بنتعامل مع بوستاتك كقطع فنية وادبية وعلشان كده يمكن انت بتزعلى لنك بتبقى واخده الموضوع على اعصابك اوى انا سعيدة انى عرفتك من خلال مدونتك بجد من المدونات الممتعة جدا

Anonymous said...

enty mosh 2olty enk htbtly el2ba7a???

آه وكفى said...

ياشييييييييييييييخه
انتي عايزة تقولي كده
اصل انا استغربت ازاي جوزها واغتصابها
مكنتش راكبة معايا
معرفش بئى انتي ادرى
بس صح تصدقي فعلا ألم الغريب اهون من ألم الحبيب

آه وكفى said...

اااااااااه خيخة
طب بصي ليا اقتراح .. احتمال يكون هو بيعاني من السادية
جايز برضك

كلام لوجيك said...

بغض النظر عن محتوي البوست
وبغض النظر عن اللغة العامية المستخدمة فى الكتابة
أود ان اعبر عن اعجابى بطريقة كتابتك وسردك للأحداث ووصفك التفصيلى للحالة النفسية التى كانت عليها الضحية (أقصد الزوجة) وطريقة تصرف الضحية بعد الموقف العصيب ومحاولتها نزع كل اثار فعلته من على جسدها
تصويرك للنزاع النفسي الداخلى ، بس اكتر حاجه عجبتنى الجملة التالية
كل اللى قدرت تعمله انها تركز اوى
وتخلى عقلها يعمل حاجز
بين نفسها وبين جسمها
هو بيبوسها لكنها مش بتتباس
ودي كمان
انت قاعدة منكمشة على نفسها
ودافنة راسها فى ركبتها
وبتترعش

أنا قرأت كل التعليقات ولى تعقيب او يمكنك ان تقولى انه رجاء
ارجو ان تنتبهى بعض الشيء لألفاظك حتى لا تفسدي ابداعك بكلمات قد لا تفيد

تقبلى تحياتى

صبرني يارب said...

مش عارفه ارد عليكى هنا


لكن من الاساس فى حاجه غلط

وهو غبي غبي غبي تحت اي ظرف من الظروف

هابعتلك رساله اول لمااخد نفسي عشان عندي العنابر كلها شغاله انفلونزا حاده

EmY said...

ايه الجمال ده يا خيخه

ختام البوست كان جميل و الوصف جمي جدآ ده انا كنت هاعيط

صعب اوي ان حد يتاخد منه حاجه غصب عنه و يستباح جسمه

و الانسان لمجرد شهوه يجرح مشاعر شخص تاني

بوست جميل جميل جميل

تحياتي يا خيخه

مهندس مصري said...

يوميات عيل مصري
================
لا بقى انا كنت عايزك تقول رأيك في المحتوى

إسلوب خيخة المميز الجميل بقى عامل زي بصمتها كده
و صعب نختلف عليه

لكن المحتوى صادم و انا شايف إن مش دي الطريقة اللي يتقال بيها

طبعاً كل واحد حر في مدونته

بس بصراحة بصراحة انا مصدوم

يا ام شريف فيه حديث شريف بيقول : ما كان الحياء في شئ الا زانه و ما نزع الحياء من شئ الا شانه

زانه = زينه و جمًله
صدق رسول الله صلى الله عليه و سلم

كلمه من القلب said...

خيخه

شوفي انا مش عارفه هو انتى صاحبة القصه فعلا ولا بس شكلها كده يعنى

مش موضوعنا

لصاحبة القصه

اقولها ان جوزها ده لا يخرج عن كونه واحد ما يعرفش دينه وكمان ما عندوش مخ خاااااالص وجايز يكون له صاحب حمار بياخد رايه فى حياته وجايز يكون الصاحب ده هو دماغه المتخلف اساسا

لكن فى حاجه

ممكن تكون الزوجه هناغلطانه
لان ياخيخه المغالاه فى تأديب الزوج بالانقطاع جنسيا عنه ممكن يعمل منه شخص مجنون

ويحدثه شيطانه او نفسه الاماره بالسوء
ياعم انت تنام تتعذب وانت تعبان ليه ما هى قدامك اهي مش عايزه تديلك حقك بالادب خده انت بقلة الادب


ويمكن تكون هى مش بتبعد عنه جنسيا عشان تأدبه ولكن لانها مش قادره تعاشره وهى مضايقه منه وهى على طووووول مضايقه منه

وهنا بقى تيجى نقطة تطويل فتره الخصام والزعل والى المفروض ما تكونش كده ابدا

الرجل يا خيخه مختلف عن الست شويه فى موضوع الجنس الا انها فروق فرديه اولا واخيرا

لكن عموما حتى لو كان هو مالوش في الجنس اوي الا انه بيفكر فيه كتير اوي

وصدقينى الموضوع بالنسبه لهم مهم اكتر مما تتخيلى

لكن فى ناس بتتغاااابي فى اتخاذ حقوقها

تفتكري يعنى هو لما عمل كده استمتع يعنى ؟؟؟

يعنى بما انه ما عملش كده معاها قبل يعنى مش مريض نفسي ولا سادي ولا حاجه

يبقى هو عمل كده فى نظري لسببين مجتمعين مع بعض

اولا لانه مزنوق بعدي عنك يعنى وكمان ليثبت لها انه يقدر ياخد حقه عافيه

وده لانه حمار فى تفكيره يعنى

وبما انى مش من انصار العيشه الهباب

فطبعااااااا لو هما مش مبسوطين مع بعض يبقى احسن انهم يسيبوا بعض

بدل ما هي تدور على حد تحبه ويسنسن لها ويقولها البؤين الى مش سمعتهم منه

وهو يروح يدور على حد يقضي معاه ليله حمرا ب 50

يبقى ليه يعنى ؟؟؟

لكن انا شايفه انه مافش علاقه توصل للفشل ده الا لو كانت غلط اصلا من الاول

غلط عموما

وغلط خصوصا بالنسبه للعلاقه الجنسيه بينهم
وده محتاج قاعده طوووووووووويله اوي عشان نتكلم فيه


وبما ا الفشل ده مسؤل عنه الطرفين دايما يبقى ممكن لو الطرفين دول فهموا وعقلوا واعترفوا باخطائهم كل شيء يتصلح تاني بس محتاج شويه مجهود

خيخه هابقى اقولك انا ميين بينى وبينك مش عايزه وجع دماغ بس مش وقته

77Math. said...

"هو كله شتيمة شتيمة
مافيش ضرب"

هههههههههههههه

لأ مفيش عشان القلب هو المكان الوحيد الذي لا تطؤه قدم الغاصبين الغاشمين !

أولا: الصورة معبّرة جدًا جدًا
اختيار موفّق جدًا

ثانيًا: الموضوع مؤلم جدًا جدًا
بس أنا عندي سؤال نفسي بما إنك متزوجة تردي علي:

هو ممكن الحب يفضل بعد الزواج ؟ ولا أكيد مصيره يترمي في البلاعة؟

ثالثًا بقى: الناس اللي بتهدد وبتقول: مش أحسن ما يروح يعمل كدا مع غيرها ولا دليل إنه مش بيخونها

دا أكبر دليل إنهم بيفكروا زي المغتصب دا بالضبط وأفكارهم شرقية سبع نجوم


تحياتي لكِ

قوس قزح said...

البوست ده فكرنى بالبوست القديم بتاع الرجل اللى قتل مراته بسبب امتناعها عنه

تفتكرى الاغتصاب ارحم ولا القتل ؟؟
و السؤال هنا للطرفين .. الزوج و الزوجة

مينفعش نضغط على حد اوى لحد ما يبقى ضهره للحيطة و لما يمد ايده يهجم علينا نقول عليه غلطان
لازم يكون فى رحمة لو جزء بسيط منها
ممكن يكون الهدف هنا مش الاغتصاب و لكن مجرد محاولة لكسر حاجز موجود و لكن اختياره للطريقة كان غلط

الموضوع مش محتاج طلاق .. الموضوع محتاج تفاهم و احترام و تقدير

سلام

الشنكوتي الكبير said...

ولو ان انا عادة بحب اكمل القصص بتاعتك بنهايه تبوظ القصه خالص واغلس عليكي كعادتي بس القصه كئيبه اصلا والعمليه مش ناقصه ذكاء مني

القصه مؤلمه بقدر ما هي دعوه للتفكير في حاجات كتير بنعملها بمنطلق انها حق مشروع
لكن لما تبصي للحقيقه تشوفي ذل وقرف

ربنا يهدي نفوسنا جميعا
ومنكونش مغتصبين ولا نغتصب حد
مش بس بالصوره الجسديه الحسيه لكن في كل نواحي الحياه

تسلم ايدك على القصه اللي زي اللوحه معبره وصارخه بالف معنى
كل سنه وانتي طيبه
سامحيني على غياب الفتره اللي فاتت

سلااااااااااااااااااااام
اخوكي ايهاب

عالمي اطفالي said...

انتي مش بنت خيخه انت بنت مبدعه
بس فعلا فعلا هنيالها قدرت تطلب الطلاق احيانا يكون اعلى امنيات الوحده اللي زي حالات دي انها تحصل على الطلاق
:( :(

البت المشمشية حلوة بس شقية said...

خوخة
ليكى تاج عندى
روحى خودية

ابن حـجـر الـعـسـقـلانـى said...

يبدو يا خيخة إننا كرجالة محتاجين جوارى .. زى ما صاحب السؤال اللى فى اللينك دى نبهنى

http://islamqa.com/ar/ref/128160


متهيألى ساعتها المفروض إنها ماتشتكيش لو الراجل دة اغتصبها بهذا الشكل اللى وضحتيه فى المدونة .. ماهى جارية بقى

بت خيخة وأى كلام said...

لقد خلقنا الله احرار
كلام ايه اللى مباشر اوى؟
وياترى الكلام المباشر ده عمرك ما سمعتيه او قريتيه غير عندى هنا

عموما هحاول بعد كدة انى مقولش كلام مباشر
بس متاخدوش على كدة
انتوا كدة بتقيدونى اوى فى طريقة الكتابة
وانا قربت اتخنق بصراحة

تحياتى ليك













المجهول
انا شايفة انى كدة بطلت اباحة
لو حضرتك شايف ان انا لسة مبطلتش اباحة
يبقى المشكلة عندك انت فى فهمك معنى الاباحة
تحياتى ليك












اه وكفى
اه جوزها واغتصبها
هو ده اللى انا اقصده
ولو انتى حسيتى من البوست ان الراجل هنا بيعانى من السادية
يبقى انتى مفهمتيش البوست
اقريه كمان مرة يا نورا علشان تفهميه

تحياتى ليكى













كلام لوجيك
حاضر هاخد بالى بعد كدة من ردودى على الناس اللى بتنرفزنى بتعليقاتها
حااااااااااااضر
وشكرا ليك على كل الكلام الجميل اللى فى اول التعليق
تحياتى ليك















صبرنى يارب
اوك يا ام مريم هاستنى رسالتك
والف سلامة على العنابر بتاعتك
تحياتى ليكى











ايمى
شكرا ليكى يا ايمى
هييييه
اخيرا تعليق يبل الريق
تحياتى ليكى








مهندس مصرى
وايه اللى فى كلامى مافيهوش حياء؟
والبوست صادم
لانه فعلا بيمثل صدمة
انا كاتبة بوست عن اغتصاب
عايزينه يكون مش صادم ازاى
هو انت لو سمعت عن واحدة قريبتك لا قدر الله اتعرضت لمحاولة اغتصاب
هتبقى مصدوم ولا هتبقى عادى؟
ومابالك بقى ان اللى إغتصبها هو جوزها
الصدمة هنا مضاعفة يا محمد
لان احنا البشر بطبعنا بندى الامان لاهل بيتنا
فلما حد من اهل البيت هو الى يهد الامان ده
بتكون صدمتنا كبيرة
وبنفقد الثقة فى نفسنا وفى اهل بيتنا وفى العالم الخارجى كله
لما مصدر امانك يكون هو مصدر تهديدك
هتتصرف ازاى
لما اب يعتدى على ابنه
تفتكر الابن ده ممكن يثق فى حد غريب
لما القريب ماحفظش عليه
مابالك الغريب هايعمل فيه ايه
لما زوجة تغتصب على يد زوجها
تفتكر هى كدة هتحس بالامان لحظة واحدة معاه
طبعا البوست صادم
انا مش بتكلم هنا عن بيجامة اتبهت عليها لون بمبى
انا بتكلم عن واقعة اغتصاب
فامتتوقعوش انكم هتضحكوا
لو متصدمتوش يبقى انا معرفتش اوصل الفكرة
تحياتى ليك











كلمة من القلب
انا قايلة فى اول البوست
جملة طويلة عريضة لونها فوشيا
ان مش انا صاحبة القصة

هو انتوا ثقافتكم ايه علشان ابقى اكتب باللغة اللى تعرفوا تفهموها

اولا انا مش كاتبة فى البوست اى خلفيات عن ظروف الزوجة والزوج
ومحدش يعرف اذا كانت هى بتأدبه ولا لأ

حضرتك برضه بتتكلمى زى ماتكونى تعرفى بطلة القصة شخصيا
واللى انا اعرفه
ان محدش يعرف بطلة القصة دى غيرى انا
لانا انا اللى صناعها من خيالى

ومش عايزة اعرف انتى مين
علشان حاسة انى هادب معاكى خناقة لو عرفت شخصيتك الحقيقية
تحياتى ليكى

بت خيخة وأى كلام said...

77 ماث
اه طبعا الحب ممكن يفضل بعد الجواز بس شكله بيختلف
اتفق معاك فى الجزء الاخير
يتاع الناس اللى بتهدد ده
تحياتى ليك













قوس قزح
البوست بتاع القتل
انا شايفة ان الست اتصرفت بغباء والراجل اتصرف بتهور
لان الست فى البوست بتاع القتل حياتها مع جوزها مستمرة وهى منعت نفيها عنه لانها تعبانة
وكان ممكن تيجى على نفسها شوية
والموضوع يتحل
لكن البوست ده
فيه مشاكل بين الزوج والزوجة
ةالمساكل دى هى الى خلتهم يبعدوا عن بعض لفترة من الوقت
ماينفعش بقى الراجل يجى ياخد حقه الشرعى من قبل ما يتكلموا ويتصافوا ويحلوا المشاكل دى

كسر الحاجز بالطريقة دى
بتخلق حاجز اكبر يا داليا
بتخلق حاجز من عدم الامان
وعدم الثقة فى شريك الحياة

يمكن الموضوع مش محتاج طلاق
لكن البوست بتاعى نهايته مفتوحة
هى البطلة فعلا طلبت الطلاق
لكن مش واضح هلى حصلت عليه
ولا البطل رفض طلبها
الله اعلم

هاسيبكم انتوا بقى تخيلوا الجزء التانى من البوست

تحياتى ليكى













الشنكوتى الكبير
ولا يهمك على الغياب المعم يكون
غياب خير
مش تعب ولا حاجة وحشة
تحياتى ليك










عالمى اطفالى
شكرا ليكى
وتحياتى






البت مشمشية
حاضر يا مشمشة
هاشوف التاج حالا








ابن حجر العسقلانى

اه صحيح جارية
ليس لها حقوق وعليها كل الواجبات
يبقى تتنيل على عين اهلها وتستحمل بقى


تحياتى ليك

واحدة مفروسة said...

ازيك يا خيخة
ايه يا بنتى القصص ديه
اسمعى بقا
قولى لصحبتك هيه الى غلطانة
اه طبعا هيه اللى غلطانه
قوليلي ليه؟؟ قولى
بصي واضح ان صحبتك دماغها ناشفه و عندية
و فاهمه انها لما تمتنع عن جوزها نوع من انواع العقاب
و ان جوزها حيتربى و يحس انها زعلانه و قرفانه منه
بس صدقيني فيه رجاله مش بتفهم الدرس اللى بتحاول الست توصله
و بالتالى انها زعلانه منه و مختلفه معاه ديه حاجه و حقوقة الزوجية حاجه تانيه
يعنى ممكن صحبتك تكون زعلانه مع جوزها بس بتغسل الغسيل
ممكن تكون زعلانه منه بس بتحضر الاكل
فاهمه اقصد ايه؟؟؟
ديه غريزة
هوه بيتقى الله و مش بيغضبة انه يروح يزنى بس بيخونه التصرف و بيغضبة بطريقة تانية
و بعدين زي ما قالولك فوق
فيه رجاله بتفتكر ان المواضيع ديه وسيلة من وسائل الاعتذار و المصالحة
بس برضة صحبتك مخها طوبة
و فهمهيا مش لازم الدنيا تمشي دايما زي ما هيه عاوزة
كان فيه مدونة اسمها زوجة عاشقة
المدونة ديه كانت بتقول انها جربت كل الوسائل للعيش فى سعادة و لكنها فشلت
و هداها تفكيرها انها تكون عاشقة لجوزها
خلى صحبتك تجرب انها تكون عاشقة
او صديقة لجوزها
بلاش تبقى قاعداله على الواحدة


فى بلاد برة لو الزوج اغتصب الزوجة ممكن ترفع ليه دعوى اغتصاب
و بيدخل السجن

الكلام الى انا قلته فوق ده لنصيحة الست
لكن برضه الزوج محتاج نصيحة
لو تعرفى الزوج قوليلي و انا انصحه بكلمتين
سلام يا خوخة

كلمه من القلب said...

كده يا نوران ههههههههههههههههههه

ماشي يا ستى مش هاقولك انا مين

بس ليه هاتدبي معايا خناقه

على فكره انا بجد اتكلمت بشكل عام وانا ما اعرفش مني صاحبة القصه
اصل انتى قلتى كمان انك ساعات كذابه

عشان كده باقولك مش عارفه هو انتى ولا لا

انا عملتلك حاجه يا بت ناس تجر شكل وخلاص

نييييهااهاهاها

بس ايه يعنى الى مضايقك من كلامي بجد

بت خيخة وأى كلام said...

واحدة مفروسة

حاضر هابلغها
ومعتقدش انك تعرفى جوزها

تحياتى ليكى













كلام من القلب
لا انا بهرج والله
ههههههههههههههههههه
اصل تقريبا كدة
خمنت انتى مين
فقلت اغتت عليكى شوية
هههههههههههههههههههههههه
مافيش حاجة فى كلامك ضايقتنى
بس انا اكتشفت انى برد بعصبية لما بكون تعبانة
وانا دلوقتى تعبانة
فامش عايزة ارد على حد وانا متعصبة

تحياتى ليكى

بس قوليلى
هو انتى مين بقى

وومن said...

لا انا اللي اعتذر علي سوء تعبيري انا بس علقت وانا في حالة صدمة من القصة

واحساسي دة سببة اني تفاعلت جداً مع قصتك وحسيتها قوي

والبطلة صعبت عليا قوي

لكن في النهاية استجمعت قواها وشجاعتها وطلبت الطلاق

القلب هو الأرض الوحيدة التي لا يمكن ان تطئها قدم مغتصب

بجد بقرا الجملة دي وانا عنيا بتدمع عندك حق والله

انا ... said...

سامحينى مقدرتش امشى غير لما

اقولك شكرااااا على كل حاجة

على سردك للموضوع وعلى

تعليقاتك وردودك على

انك اصلا فكرتى فينا احنا القوارير

دمتى بكل خير

اختك لحن الفرح

نهر الحب said...

صح القلب هو المكان الوحيد الذى يمكن ان يطأه مغتصب
لكن الجسد يلوث بلمسة قذرة من قذر لا يعرف غير السادية
بوست هايل لى معك نقاش طويل فيه بس على جنب
تحياتى لك خيخة

عاشقه وغلبانه said...

الاول نرجع ونتفق علي الكلام اللي قولناه في موضوع هونجا بونجا لو انتي فاكره
موضوع العلاقه الوظيفيه والرومانسيه
اتمني تكوني فاكراه
ثانيا وده المهم اسمحيلي اتدخل في راي البعض
دي مدونتك وبتعبر عن رأيك انتي عملاها علشان كده مش علشان ترضي حد معين او تغضبي البعض الاخر
اللي عاجبه يقرا ويرد كان بها مش عاجبه برضو حر
بس مش من حق حد يسيطر علي افكار حد
وبعدين موضوع ان غزه تحت الحصار وان الناس بتتكلم في ده فدي حياتنا مستمره حتي وغزه تحت الحصار
مايمنعش اننا ندعي ونعمل اللي علينا وقلبنا مقهور عليهم بس الحمد لله لسه بنتنفس وعايشين
انتي او غيرك مش مجبرين نحول المدونانت لساحه حرب
المواقع السياسيه كتير واللي داخل هنا عارف انه مش داخل موقع العربيه دوت نت فلكل مقام مقال
اه قلبك وقلبي واجعنا علي غزه بس كمان لسه عايشين بدليل اننا بناكل ونشرب وننام لسه فوق الارض
كنت هاقول تشبيه قبيح بس مسحته

عموما بالنسبه لموضوع البوست هايفضل نص الشعب ان لم يكن اكثر يفقد الثقافه الجنسيه وشايفها شئ عيب التحدث فيه مع ان التليفزيون بقي بيت دعاره علني ولو الناس العاقله ماتكلمتش المصايب هاتزيد اكتر ماهي زايده
اعذريني اتكلمت في حاجات يمكن ماتخصنيش بس ماعجبنيش ابدا هجوم البعض

وكلمه اخيره
طالما مش عاجبك البوست قريته ليه وتعبت صوابعينك وانت بترد ومش عارفه ليه ماعلقش في دماغك غير البوست ده وهونجا بونجا
يمكن علشان ده اهتمامك الوحيد في الحياه
والله اعلم

وعجبي

بت خيخة وأى كلام said...

وومن
تعتذرى عن ايه يا بنتى
مافيش سوء استخدام فى التعبير ولا حاجة
ده انا اللى اسفة اذا كان ردى عليكى خلاكى تفتكرى انى زعلانة
تحياتى ليكى











انا

لا شكر على واجب
وشكرا على حضورك تانى وشكرك ليا
تحياتى ليكى












نهر الحب
خلاص لما اشوفك
نبقى نتناقش براحتنا
تحياتى ليكى يا ايناس












عاشقة وغلبانة

غلبانة ايه بقى
ده انا اللى غلبانة جنبك
ربنا يخليكى ليا ويجعلك نصير
للغلبانين والمستخيخين فى الارض
اللى زي حالاتى
تحياتى ليكى
والف شكر

مهندس مصري said...

هيا نفس المشكلة الازلية
بين التلميح و التصريح
بين الإجمال و التفصيل

انا شايف ان التعمق في شرح الجوانب النفسية الداخلية جميل و مفيهوش مشكلة

لكن وصف الأحوال و الافعال الجسدية صادم و انا شايف إنه بدون حياء

و ممكن يتم إختصاره و التلميح إليه

ناس حتقول إن ده تخلف

بس انا قرفت من المشاهد الجنسية الصريحة المكتوبة مثلاً في رواية شيكاغو لعلاء الأسواني مثلاً و شايف إن أغلبها ملوش لازمة و ممكن يتم التلميح اليه بصورة لا تخدش حياء القارئ

الرسول عليه الصلاة و السلام كان أشد حياء من العذراء في خدرها

و لما الستات كانت بتسأله في مسائل شرعية كان بيجاوب بالتلميح و بدون الفاظ صريحة
و فيه حديث شريف معناه التالي
واحدة كانت بتسأل عن كيفية الطهارة من الحيض فجاوبها النبي عليه الصلاة و السلام بشرح كيفية الطهارة حتى وصل الى ان قال لها انها و هي ماسكة قطنة مبلولة يجب ان تتبع الدم
فقالت كيف يا رسول الله
فإحمر وجهه صلى الله عليه و سلم من الحياء و قال لها سبحان الله تتبعي الدم

فأخذتها السيدة عائشة جانباً و افهمتها مراد رسول الله صلى الله عليه و سلم

يعني فيه حاجات ما ينفعش الراجل يقولها لست غريبة عنه - مش من محارمه -و لكن ممكن الرجالة يقولوها لبعض
و برضه فيه حاجات ما ينفعش الست تقولها لرجالة غريبة عنها و لكن ممكن تتكلم فيها ببساطة مع الستات زيها

هو ده مفهومي للحياء

البوست بتاعك ده بصورته دي كان ممكن يبقى طبيعي لو هو للستات بس
يعني ستات و بنات بيحكوا مع بعضيهم حيبقى طبيعي خالص
لكن طبعاً ده ما تقدريش تتحكمي فيه في المدونة

لو راجعتي جميع أحاديث الطهارة من الجنابة و آداب الجماع و ما يحدث بين الزوج و الزوجة مش حتلاقي أي لفظ صادم
و كانت بتستخدم تلميحات واضحة يفهمها الجميع و لا تخدش حياؤهم

و نفس الشئ حدث عندما تكلم القرآن عن إتيان الزوج لزوجته
فلا تجدي لفظاً صادماً واحداً في الآيات رغم وضوحها

هو ده رأيي يا خيخة

لو بيضايقك إني بأقول رأيي بصراحة قولي و انا اوعدك اي بوست أختلف فيه معاكي بعد كده مش حأعلق عليه

ثم الصحابة رضى الله عنهم كانوا ماشيين على هدي النبي عليه الصلاة و السلام و هو عدم الحديث عما جرى في فراش الزوجية

و لما بعض اصحاب سلمان الفارسي سألوه بعد دخلته و هو كان تزوج من قبيلة خارج المدينة المنورة
سالوه في الصباحية كيف وجدت أهلك يا ابا عبد الله ؟ فتحول بوجهه عنهم
فقالوا ثانية كيف وجدت اهلك ؟
فإحمر وجهه غضباً و قال إنما جعلت الستور و الأبواب لتداري ما خلفها فلا يسألن أحدكم عما اخفي عنه

و هو ده كان هدي الصحابة رضي الله عنهم

لكن لو حصلت مشكلة المفروض يحلوها الزوجين بالنقاش مع بعض
و لو فشلوا يبقى حكم من اهله و حكم من اهلها
و لو فشلوا يبقى زي ما دخلوا بالمعروف يخرجوا بالمعروف

انما الكلام عن فراش الزوجية للأغراب لازم يكون في اضيق الحدود و للضرورة زي الكشف عند الدكاترة او القواضي في المحاكم
و يكون بالتلميح مش بالتصريح و كل لبيب بالإشارة يفهم

و حتى لو دي قصة خيالية
برضه مخالفة للحياء اللي أمرنا بيه النبي عليه الصلاة و السلام

و الحديث بيقول : الإيمان بضع و سبعون شعبة اعلاها لا اله الا الله و ادناها إماطة الأذى عن الطريق و الحياء شعبة من شعب الإيمان
صدق رسول الله صلى الله عليه و سلم

انا بأنصحك لله بدون غرض و لا مصلحة

لو ضايقتك قولي و مش حاعلق بعدها ابدا على اي بوست اختلف معاكي فيه

بت خيخة وأى كلام said...

مهندس مصرى

لا طبعا مش مضايقة يا محمد
بالعكس انا بشكرك على توضيحك لبعض الامور كانت غايبة عن ذهنى
ربنا يباركلك يارب
واوعى تعتقد ان مهما اختلفنا فى الاراء ده معناه انك متعلقش وتقول رايك بصراحة
هو احنا مش اخوات ولا ايه؟
يبقى لازم تقول رايك
علشان لو حاجة غايبة عن ذهنى احطها فى بالى بعد كدة

شكرا ليك

آه وكفى said...

انا كمان ياخيخة رأيي من رأي مهندس مصري
فعلا المشاهد الصريحة بتنرفز فعلا وانا برضو لما قريت شيكاغو حسيتها قذرة جدا جدا جدا وفيها حاجات ملهاش اي لزمة ولا معنى

متزعليش مني بس ده رأيي

مهندس مصري said...

العفو
:)
ما هو انا لولا الأخوة ما كنتش قلت الكلام ده كله
دا انا كاتب لك بوست في التعليق يا بنتي
:)
ربنا يكرمك و يهديكي و ييسر لك كل ما فيه الخير

و يبارك لك في جوزك و إبنك

MaNoOoSh said...

انتى عبرتى فعلا فى القصة عن ألم الست لما بتحس بإنتهاك جسدها, وأنا شخصيا كأنثى حسيت بالاحساس دة كتير صحيح مش فى الموقف دة تحديدا لكن بحسة لما شخص سافل يمد إيده النجسة على جسمى فى أى مواصلة أو فى الطريق بحس فعلا انى عايزة أغسل جسمى بمية نار مش ديتول بس, وبحسة لما شخص سافل يبصلى بمنتهى البجاحة من فوق لتحت وهو منشكح قوى وقاصد يورينى انه بيبصلى بشهوة أو واحد تييييت ميسكتش غير لما يقرب من ودن الواحد ويقول لفظ تييييت فى الشارع علشان عقد النقص والحرمان اللى عندة بتخرج بالشكل دة, انا بحييكى على الموضوع لانى شفت ستات كتيييير مروا بموضوع البوست دة واغلبهم بيفتكروا انه حق الزوج رغم احساسهم بانتهاك الجسد.

Tamer Diab said...

طلبتي مني التوضيح بس يا خيخة وبعدها كتبت السمك .. السمك ..السمك
بس أنا قلت برضه هوضح
أنا يا ستي مش بطالبك أني كل ما أدخل مدونتك أنبسط ! هو أنا داخل مقلة لب ! أكيد لأ طبعا الكلمة كانت علي سبيل التهريج بس يمكن ردي عشان كان بيتكتب بسرعه الانفعال المقصود مكنش باين
أما بالنسبة لموضوع فجة ده
كان علي الرد علي الاستاذ بتاع الهونجا بونجا
وعلي بعض الجمل في وسط القصة كده
وأنتي مدونتك مش كلها طبعا هونجا بونجا وجنس لا طبعا
أنا قريت قبل كده كذا موضوع ليكي وكانوا تمام
بس لازم تقبلي راي الآخر ومش معني تقبليه أنك متشيليش التعليق مثلا لا طبعا
يعني الرد يضايقك فيخرجك عن اللغة والدنيا حتي لو الرد يخنق جدا يفضل يكون ردك دبلوماسي شوية عشان متزعليش حد منك
ولا انتي مش فارق معاكي حد يزعل ولا يولع :)

kareem said...

البوست جميييل جدا واسلوبك رائع ودمه خفيف انا أول مرة أعلق بس متابع المدونة من زمان واستفزني الاخ أحمد المهدي بتاع الهونجا بونجا ده وبصراحة يستاهل الرد اللي انتي رديتيه عليه ولو مش عاجباه المدونه ميدخلش تاني عليها ويريحنا
أرجو انك تقبليني ضيف على مدونتك
تحياتي

koukawy said...

يا ساتر
هو فعلا اغتصب جسمها بس معرفش يمسها من جوه
هي لسه محتفظه بروحها عذراء
هي دي غزه؟؟؟؟؟؟؟؟؟؟

رئيس جمهوريه نفسى said...

انا قارى البوست من زمان بس استنيت لما تنتهى الاراء كلها المويدة والرافضة لفكرة البوست عموما وحتفق اولا انى العمل عمل ابداعى مجرد عن شخصية كاتبه فا انتى مش بطلة القصه فبالتالى الموضوع وان كان صادم للبعض فهو مكرر للاسف الشديد وبيحصل فى الواقع من منطلق انى بعض الذكور بيتخيلوا انى جسد الزوجة حق شرعى ليهم فى كل وقت ولما يحبوا ينالوا الوطر بيعملوا كدة بدون النظر للحالة النفسية للزوجة ودة راجع لفهم خاطى للعملية نفسها وعدم فهم لطبيعة الزوجة وهى وان كانت زوجة فلا يمنع من اطلاق لفظ اغتصاب على الحالة التى بتحكى عليها القصة لانى قانون العقوبات فى تعريف جريمة الاغتصاب قال كل من واقع انثى بدون رضاها مفرقش ان كانت الانثي دى زوجة او غريبة عنه وعلى فكرة القوانين الاجنبية بتطبق على الحالة دى جريمة الاغتصاب وطالب من قبل البعض بتطبيق نفس القاعدة فى مصر

ثانيا: التعبيرات اللى صدمت البعض خاصة فى موضوع استخدام الضوافر والديتول واللى اخرة احنا اتفقنا على انى دى جريمة اغتصاب وقعت على جسد انثى فبالتالى الانثى اول ما يتبادر ليها نفسيا عملية ايقاط على جسدها وبتبتدى يحصل ما بينها وبينه انعزال بل بتوصل فى بعض الاحيان بيحصل كرة للجسد دة لانه كان السبب فى وقوع عملية الاغتصاب دى

ثالثا: حالة الصدمة اللى كانت فيها الانثى دى شى عادى جدا وبتحصل نتيجة فداحة التجربة اللى مرت بيها ورعبه فبتكون تحت تاثير صدمه عصبيه بتفقد فيها الشعور

اخير اجمالا لما سبق خوخة انتى اجدتى التعبير عن الموقف وتصويرة

الباز افندى said...

إن حسن معاشرة الزوجين لكليهما في الفراش جاءت به السنة المطهرة ومن ذلك قوله صلى الله عليه وسلم : ( لا يأتي أحدكم امرأته كما يأتي البعير الناقة وليكن بينهم رسول الكلام والقبلة )

أو كما قال أيضا قوله صلى الله عليه وسلم (إذاجاء أحدكم امرأته فلا يعجل عيهاحتى تقضي حاجتها ) .

ملحوظه ارجو التحقق من النص تماما لانى كتبتها من الذاكره


***
ثم

لم نتعلم ديننا فجرحنا وانجرحنا

عاقلة علي ارض الجنون said...

وجعتيني أوي يا خيخه .. ربنا يسامحك

Anonymous said...

انا علطول بمر على مدونتك بس عمرى ماكتبت تعليق وده مش لانها مش عجبانى لا ده كفايه انى اقولك انها المدونة الوحيده الى بحب ادخلها دايما بس نصيحه ياريت بلاش الكلام الخادش للحياء ده ومن غير زعل كان ممكن تعبرى عن الموضوع بكلام ابسط وكنا هنفهم من غير تفصيل بالطريقة الى زعلتنى منك دى وميسرى ليكى

الدمياطية

Anonymous said...

انا علطول بمر على مدونتك بس عمرى ماكتبت تعليق وده مش لانها مش عجبانى لا ده كفايه انى اقولك انها المدونة الوحيده الى بحب ادخلها دايما بس نصيحه ياريت بلاش الكلام الخادش للحياء ده ومن غير زعل كان ممكن تعبرى عن الموضوع بكلام ابسط وكنا هنفهم من غير تفصيل بالطريقة الى زعلتنى منك دى وميرسى ليكى

الدمياطية

users online