Sunday, April 26, 2009

إقفش ... حالة رضا

على غير العادة

صاحية عندى حالة رضا

ومش عارفة ايه سببها

قعدت اقنع نفسى ان سبب الحالة دى

هى انى وضبت الشقة امبارح وغيرت نظامها

بس برضه لا

ما انا كتير بهد الشقة وابنيها واغير فى نظامها

وعمرى ماحسيت بحالة الرضا دى

اممممممممممممممم

يا ترى ايه يا بت يا خيخة اللى مخليكى راضية

مش مهم

واساسا انا معنديش حاجة اكتبها

انا عايزة ارغى وخلاص



عايزة اتكلم عن شريف

انا بحب اوى اتكلم عن شريف

شريف امبارح بعد ماوضبنا سوا الشقة

حميته ولبسته بيجامة جديدة

البيجامة على اده بس بنطلونها طويل شوية

وهو كان معجب بيها اوى لانها نص كم



النهاردة الصبح شريف صحى لوحده

هو كان نايم جانبى على السرير

سالنى مامى احنا مش هنقوم بقى ولا ايه؟

قلتله اه هنقوم بس كمان عشر دقايق كدة

قالى طب بصيلى انت ليه مديانى ضهرك

غيرت وضع جسمى وبصيتله

الشمس ماكنتش لسة طلعت اوى

وضوئها كان بسيط جوة اوضة النوم

لما ركزت فى عيون حبيبى

لاقيتها بتضحك

انا بحب عيون شريف

لونها كميل وشكلها كميل

وبحب كمان رسمة شفايفه

بسم الله ماشاء الله

ربنا يحميه ويخليهولى

ويحفظهولى من كل عين

بس مش بحب مناخيره

مناخيره مكعبرة حبتين

وبتتعبنى وقت تنضيفها من البرابير



شريف حفظ دعاء الخروج من المنزل

وبقى بيقوله لوحده

بسم الله توكلت على الله

ولا حول ولا قوة الا بالله

الهم أعوذ بك من أن

أضل أو أضل

او أذل أو أذل

أو أظلم أو أظلم

أو أجهل أو يجهل علي

معلش بقى مش عارفة احط التشكيل على الحروف



روحتله المدرسة من كام يوم

كنت ناوية اطلع تربنتين اللى خلفوهم

لأنى زعلت ان شريف ماشتركش

فى مسابقة القرأن الكريم

وعلى كلام محفظة القرأن

ان شريف كويس وانه حافظ اغلب السور

بس لما عملوا تصفية

ماختاروش شريف من ضمن المتسابقين

ودى حاجة احبطتنى جدا

بس لما روحت المدرسة

لاقيت شريف مع باقى زمايله

فى اوضة الموسيقى

ولاقيتهم بيغنوا أغنية بالإنجليزي

لما ركزت فيها لاقتها هى نفسها

أغنية محمد ثروت اللى غناها بالعربى

اللى هى جدو على عنده حمار ... إيا إيا أوه

دخلت الأوضة

وقعدت اغنى و أرقص واسقف معاه ومع باقى زمايله

وكان بيجيلى حماسة غريبة وانا بقول إيا إيا أوه

وكان صوتى بيعلى اوى فى الحتة دى بالذات

شريف كان مبسوط يوميها

وانا مشيت من المدرسة

ومطلعتش تربنتين اللى خلفوهم



شريف لسه فاكر بابا

من يومين لاقيت عينيه مرغرغة بالدموع

وبيسالنى

هو احنا مش هانطلع الجنة عند جدو بقى؟

ضحكت ضحكة مصطنعة

وقلتله وهو اللى عايز يطلع الجنة يعيط كدة



من فترة كدة

شريف جالى وقالى مامى

غمضى عنيكى

ولما غمضتها

قالى فتحى عنيكى

ولما فتحتها مالقتش حاجة

سالته فيه ايه؟

ضحك وقاللى

ولا حاجة ده انا بهرج معاكى

ساعتها قلت فى عقل بالى

هو الواد ده بيشتغلنى ولا ايه؟



شريف لما بيدعيلى

بيقول

يارب يا مامى

ربنا يحبك

والناس تحبك

والجنة تحبك



ايوة انا خلاص عرفت

ايه سبب حالة الرضا اللى عندى

ان ربنا رزقنى بحاجات حلوة كتييييييييييير

ومن اهمها شريف حبيب قلبي



انا بحب الواد ده أوى

ربنا يخليهولى يارب

ويباركلى فيه

ويجعله قرة عينى

ويكون انسان صالح

ومايتظلمش فى يوم

ولا يظلم حد

يارب باركلى فيه يارب



انتهى

بت خيخة وأى كلام

65 comments:

Ahmed Al khashab said...

السلام عليكم
إزاى حضرتك ؟
بجد بوست جميل جدا
حقيقى أحلى بوستات الواحد يقرأها هنا لما بتتكلمى على شريف
بيبقى فيه كمية عاطفة أمومة و حنان أمومة فياضة بتظهر جدا فى كلامك
ربنا يبارك فيه يا رب و يخليها ليكى

و السلام عليكم

عبدالله said...

يا روقانك يا ام شريف لما تبقي رايقه
:)))

ربنا يديم عليكي حاله الرضا و الروقان دي ويباركلك في شريف ويخليكوا لبعض

بوست جميل قوي يا تري علشان تلقائي ولا علشان فيه عاطفة امومه زياده مش عارف بس هوا جميل و خلاص

تحياتي

أحمد سعيد بسيوني said...

بسم الله

ربنا يحفظه لك من كل عين ويبارك لك فيه

انا شايف فيه شوية لماظة مش مطمئنة في حتة اقفلي عنيك وفتحيها
ههههههههههه

دمتم بخير وسعادة

محمد عتلم said...

خالتى الحجه ام شريــــــف
هع هع هع هع
ازيك يا خيخه
ربنا يارب يخليهولك ويحميه ويكبر كده وتجوزيه وتربى عياله كمان
والله انتى هتبقى تيته خيخه اى نعم بس عسل
اوعى الواد يطلع خيخه هوا كمان
اخوكى عتلم

AhMeD RaDy said...

بصراحة .. انتى مالكيش حل .. هههههههههههه

ربنا يارب يخليلك ريف .. دا اكتر حاجة فى البوست كله .. بصراحة قريت البوست عشان اعرف المواقف اللى بيعملها .. الاطفال احباب الله

وحلوة البعت اللى عملها دى ههههههههههههه

برنس يا واد يا شريف .. استمر استمر .. بس يا خوفى بكرة يجى يرفعنا بسلاح

Anonymous said...

هههههههههههههههههههههههههههههه


خيخه انا بحبك قوووووي انتي وشريف ..

انا متيعاااكي من زماان قوي بس بتكثف اعلق عندك ..

ههههههههه..

والله انا ساعات بحس اني شريف ده ابني كده ..

مع اني مفعوووصه ولسه صغننه وف تانيه ثانوي ..

بس موش عارفه ليه بتبسط قوي وانتي بتتكلمي عنه ..

وبتتبسط قوي وانتي مبسوووطه ..

ربنا يسعدك ياااارب ويجعل ايامك كلها فرح ويخليلك شريف يااااارب ..

وتجوزيهولي بقى ههههههههه

ماسي يا حماااتي ..

اشوف وشك بخييييير ..

واول ما احس اني جريئه هاجي اعلق عندك ..

مع خالث مالث حبي ..

شقاوة مراهقه ..

mimi said...

إيا إيا إووه
وإإإإإإإإإإإيييييه ( اللي عند الشنكوتي )
ومواهب تانية كتير بدأت تظهر مع ظهور الربيع والجو البديع

dodda said...

الله يا بت يا خيخه

بقالى شويه بدخل اشوف البوستات ومش بعلق
بس المره دى كلامك حلو اوى

وشريف ماشاء لله عليه
ربنا يحميه ويبارك فيه

انا نفسى اشوفه اوى
ممكن تخليه يدعيلى زيك كده؟؟
دعوته حلوه اوى

تعرفى انا نفسى اوى لما يكبر تفضلوا اصحاب كده زى ما انتو..

م الاخر سيرة شريف فرحتنى ورفعت من معنوياتى

my dream said...

نورا
انا ببقى فرحانه قوي لما تتكلمي عن شريف
ربنا يصونه ويخليه
ويحفظه من كل شر يارب
ربنا يدم عليكي الرضا ان شاء الله

احساس طفلة محبة للرومانسية بس واقعية said...

ربنا يخليهولى يارب

ويباركلى فيه

ويجعله قرة عينى

ويكون انسان صالح

ومايتظلمش فى يوم

ولا يظلم حد

يارب باركلى فيه يارب


امين امين امين يا خيخة

انا حاسة بأحساسك ساعات كدا بنحس اننا بنحب اولادنا اوى وبنشوف بس البراءة اللى جواهم

ربنا يحميهولك ويباركلك فية وجائما تكونى راضية

تقبلى مرورى

صبرني يارب said...

ايه ده ؟؟

مين دي ؟؟؟

انتى خيخه ؟؟؟

اكيد ولا بتشتغلينا

طب استنى انا هاغمض عينى وافتحها كده واشوف انتى ولا ايه


ربنا يهديكى يا بنتى

وفوق ربنا يحبك والناس تحبك والجنه تحبك

يارب يا اختي العقل يحبك
ربنا يخليلك شريف يا جميل

يارب اعرف اجي البؤجه بقىىىىىىىىىىىىىىىىىىىىىىىىىىىىى

يا رخمه احنا ايام امتحانات

يعنى كنتم هاتنشكوا لو خليتهوها الجمعه الى بعد الى بعدها

طب تنشكوا وانا مالي

Tshandny said...

ايه الام الجميلة دي
بجد يا بنت يا خيخة انا بحبك كلك على بعضك
بحبك بكلامك وحركاتك
بحب حبك لشريف
بحب حبك لبابا الله يرحمه
بحب حبك لقاعدة الشلته مع صحباتك الخيخين زيك
بحب كمان تعليقاتك المخوخة
على اللي مش بيعجبك في الدنيا
من الاخر بحبك على بعضك بسلطاتك ببابا غنوجك

ونطلع من الككلام اللي فوق ده
وش مطلع لسانه
ان خيخة هي رئيسة وزراء المدونين

والله فكرة ما تعملوا انتخابات بينكم وبين بعض
وتنتخبوا رئيس جمهوريه وتشكلوا وزارة
ويبقى في حس ديموقراطي على بلوجر

واحدة مفروسة said...

يارب يا خوخة يارب

العجوز والبحر said...

الاخت خيخه
بوست صادق المشاعر يوحى بالامومه الحانيه واصدق ما فيه الكلمات البسيطه
واستخدامها السلس وتلقائيتها..وحفظك لشريف وحفظه لكى..و

soaad fakoory said...

خيخه
بكيت من الموضوع.. مش عارفه ليه؟
وانا لم اتزوج لسه لكن بكيت!!ووياربيخليكى له ويخليه لكى.. وحنان الام عندكزايد شويه وبينقط من كل كلمه
من كلامك!!و

Ahmed Talk said...

لما الواحد بيتفكر نعم ربنا عليه ويحس بمدي قيمته في حياته أكيد راح يحس برضا وهينسي الحاجات الثانية إلي مش راضي عنها

وأنت لما ركزتي مع ابنك وازاي هو جميل وذكي حسيته برضا

ايه رايك فيساغورس معاكي وﻻ فرويد

ربنا يخليلكي شريف يام شريف

إيه رايك نغير اسم المدونة إلي مدونة ام شريف

maioya said...

يارب يارب يارب
يخليهولك ويفرحك بيه
ويبقي فخر ليكي
بجد بتشدني اوي العواطف الصدقه دي
ومفيش اصدق من مشاعر ام
يارب اتجوز بقي وابقي
زيك كده :)

مامة مازن said...

السلام عليكم ورحمة الله وبركاته
اختى ام شريف
ربنا يبارك فى شريف ويجعله من احسن الناس والله عنيا دمعت لانى ام زيك وحاسة احساسك
ربنا يبارك فى اولادنا جميعا
تحياتى واحترامى

الشنكوتي الكبير said...

ربنا يذيدك رضا وسعاده

عايز اقولك ان من احبه ربه حبب فيه خلقه
ولأن ناس كتيييييييييييير قوي بتموت فيكي يا فقريه انتي وبيحبوكي فاكيد حب الناس ده علشان ربنا بيحبك
واللي ربنا بيحبه ميعرفش كرم ربنا عليه هيبقى قد ايه
ربنا يكرمك ويسعدك انتي وهاني وشريف

سلاااااااااااااااااااااااااااام
اخوكي ايهاب

رقاصه يا فوزيه
رقاصه
يا لهوي

MǿиY El-Shreef said...

ربنا يخليهولك يااااااارب

الاطفال دي زينه الحياة

ربنا مايحرمك منه ابدا وتكبريه وتجوزيه كمان

ويديم عليي حالة الرضى والروقان ان شاء الله

:)

Z_Diva said...

rbna y5aliholk ya 5o5a :)
yrab dayman kda tb2o mbsoutyn into eletnen... ana 7lmt beky embare7 3la fekra, 3adety kda fe west el7ilm inty we sherief we wa7da kman bas hya she was almost here bas not here yet :D
isa ykoun m3nah 5er 3shan ana mesh bfhm fela7lam elsara7a, bas howa kn e7sasy fel7lm koways mat2la2ish :D
yla b2a bosely shiko gamed :)

(أم البنين) said...
This comment has been removed by the author.
maha said...

سلام عليكي يا بنوتة
ربنا يخليهولك يارب
ويباركلك فيه
ويجعله قرة عينك
ويكون انسان صالح
ومايتظلمش فى يوم
ولا يظلم حد
و يكون بار بيكي و بوالده يا رب
سلام
مها

shahy said...

شريف هايحبك اوي لما تجيبي لة
اخ او اخت يلعب معاهم
وهايحبك اكتر لما يعرف انك رفضتي تسيبية وحيد في الدنيا - انا قصدي من غير اخوات -
وهافضل وراكي يابنت ام خيخة لغاية لما توافقي بس يارب ساعتها مايكونش فات الاوان

islamz said...

شريف لسه فاكر بابا

من يومين لاقيت عينيه مرغرغة بالدموع

وبيسالنى

هو احنا مش هانطلع الجنة عند جدو بقى؟

ضحكت ضحكة مصطنعة

وقلتله وهو اللى عايز يطلع الجنة يعيط كدة


بجد موقف مؤثر .. ربنا يخليهولك ويخليكى ليه وتشوفيه احسن الناس

Abu ShoSho said...

Om Sherif
You can still form your band with Sheeko and enjoy your favorite song.

http://www.8notes.com/scores/529.asp?ftype=gif

It's simple enough that any instrument will do.

Thanks for sharing these sincere feelings with us.

Re,

همس الاحباب said...

ربنا يسعدك كمان وكمان
وربنا يخليكو لبعض انتى وشريف
وتشوفيه احسن واحد فى الدنيا
نشوفك دايما على خير
تحياتى

فاتيما said...

يا رب يا خوخة
يا رب يستجيبلك
و كل ما تتمنيه يحصل
و احسن
شريف طفل جميل و رقيق
و مرهف و مميز
لانه إينك
صنيعتك
تشكيلك و تعبك
و حرصك
و اهتمامك
و قبل دا كله حبك
و حنانك
انا قولتلك زمان
و هقولها علطول
إنتى مربياه عشان يطلع راجل
بس مغرقاه حنان و شقاوة و حب
ربنا يكرمك فيه
لأنه أهم إنجاز عملتيه ف حياتك
يا نونو
و بعدين تيجى المدونة دى
فى المرتبة التالتة
و التانية ؟؟
إنك إبنة بارة يا خيخة
يعنى بالترتيب كدا هنقول
أهم تلت أنجازات حققتهم خيخة كونها أصبحت
1 اعظم ام
2 أعظم إبنه
3 أعظم مدونة خيخة
بحبك قوى و بوسس لشريف حبيبى

حنين القلب said...

ربنا يخليهولك يا حبيبتى

وتجيبى ليه اخت زى العسل شبهه كده

ربنا يكرمك بيه ويباركلك فيه

موووووووووووووووووووه دى لشريف حبيبى

شلاطة said...

ربنا يخليهولك ويحميه لكي ويجعله سند ليكي ولباباه برضه ماهو مش كل حاجه انتي
ههههههههههههه

نعكشة said...

اللهم آمين

انتي جميلة قوي
مش جميلة الجمال دة بتاع الشكل
لإني اصلا مشوفتكيش
بس انتي جميلة و عسولة
:)
ربنا يديم نعمة الرضا عليكي دايماً و يحفظها من الزوال

آمين

سلام عليكِ

only spot said...

الله يا خوخه عليكى وعلى كلامك
انا كمان بحب الواد شريف ده ربنا يحفظهولك ويبارك لك فيه ويجعله قره عينك يا رب ودايما هو سبب سعادتك دنيا واخرى

بحبك يا خوخه كتيييير

عبدالرحمن said...

ربنا يخليه لك يا فندم

ويحميه من كل شر يارب

مدونة تستحق الزيارة

تقبلوا مروري

مهندس مصري said...

طيب
فاتيما قالت اللي كنت عايز اقوله
ربنا يخليهولك و يبارك لك فيه و تخاويه
( وش مطلع لسانه ) هههههههه

عاشقه الرومانسيه said...

ربنا يبارك لك فيه ويخليهولك
بالله عليكى لازم ترقى الواد ده بعد البوست ده
ومش البوست بس
لأ
ده انتى كل ما تشوفيه ارقيه علشان انتى نفسك ماتحسديهوش
ربنا يخليهولك ويكون احسن الناس
ويكبر ويحفظ القران علشان انتى وهانى
تتكرموا
فى الجنه على حسه

قلب ارهقته الاحلام said...

اممممم جمييييييييل بوست جمييله

وخصوصا وصف لشوشو ال زي السكر

ربنا يخليهولك يارب ويباركلك فيه

كل حاجه جمييله وحتي وانتي بتقولي

ايا ايا اووو بصوت عالي لوكنت موجودة

كنت عملتها معاكي :)

بس أهم حاجة نبعد عن مناخير شريف

هههههههههه

تحياتي ليكي ياخوخة

ويارب يباركلك ف شريف ويجعله قرة عين

ليكي ولباباه

لجين أبو الدهب said...

ربنا يبارك لك فيه ويحفظه من كل ما يسوءه ..

ويجعله قرة عين لك والولد الصالح ..

ويرزقك الرضا دوما وابدا ..

دمتِ بخير ..

الشنكوتي الكبير said...

بتاعة مفاجأت انتي دايما

انا متشكر جدا جدا يا خوخه على نشرك للبوست بتاعي عندك كده
ده شرف ليا يا افندم

وبعدين كده هنتصيط على حسك يالا بقى تعيشي وتوجبي معانا

ربنا يسعد ايامك يارب
سلاااااااااااااااااااااااااااام
ايهاب اخوكي

ماجد said...

بسم اللة ما شاء اللة عليك ويا بخت كل اللى تحبية انت عندك قدر من العواطف والاحاسيس والحنية ممكن نقول من كترتها بترطش على كل اللى حواليك سواء وانت بتتكلمى وانت ام على ابنك او انت بنت على والدك اللة يرحمة اللى بجد حبيتة واتمنيت بناتى يحبونى كدة
بس هو انت كمان فى غضبك كدة لما بتفلبى يعنى بترطش كدة :)
ربنا يخليك

احلام جوليا said...

ربنا يديم عليك نعمه الرضا ويخلي لك شريف ويبارك لك فيه تعرفي يا بنت يا خيخة الواحد لما بيبص لنعمة وجود ولاده بيحس برضا وسعادة وصبر جميل على كل مصاعب الحياة دايما بصي لشريف كل ما تتضايقي من الدنيا حتلاقية باب مفتوح للجنة والسعادة ربنا يبارك لك فيه
من ام لام

لو بطـلـنا نـحـب نـمـووووت said...

السلام عليكم
ربنا يديم عليكى حالة الرضا يارب
وتفرحى بابنك الامور
ويخليه لك
اسلوبك حلو قوووى فى الفضفضة
حسيت انى باعيش كلامك بجد
تقبلى تحياتى

karim said...

ربنا يخليهوليك ويفرحك بية , ويارب يخليكى رايقة كدة على طول و تبسطينا, بجد بحب مدونتك جدا جدا, تحياتى

Lady E said...

ربنا يباركلك في شريف يارب

ويديم عليكي حالة الرضا

راجى said...

ربنا يخلى لك ابنك ويبارك فيه

قوس قزح said...

يارب دايما كده فى حالة رضا
و تشوفى دايما الحاجات الحلوة فى حياتك
و بصراحة الواد يتحب ما شاء الله عليه حتة سكر
ابقى هاتيه معاكى يا خيخة يوم البؤجة
ربنا يحفظه لكى و يحفظك له

Ahmed Al-Sabbagh said...

َ
فتحة
شيفت كيو

ً
فتحتين
شيفت دبليو

ُ
ضمة
شيفت إى

ٌ
ضمتين
شيفت آر

ِ
كسرة
شيفت شين

ٍ
كسرتين
شفت سين

ّ
شدة
شيفت ذال

ْ
سكون
شيفت إكس

القدر و انا said...

بنت خيخة
يا احلى ام شريف فى الدنيا
ربنا يبارك لك فيه ويخليهولك دايما فى احسن حال
دول هم نعمة ربنا وعوضها لينا
رب لا تحرم ام من ولدها ابدا واجمع بين يوسف وفاتيما عن قريب
تحياتى لامومتك الرائعة

ابن حـجـر الـعـسـقـلانـى said...

أكمل تعليق الصباغ

ريحى بالك
شيفت ديليت

:-)

ربنا يكرمك دايما و تكون روحك المعدنية مرفوعة

روح said...

السلام عليكم
سعيدة بزيارتي لمدونتك
وربنا يبارك لك في شريف
وتشوفي بره يارب
ويحفظه وحصنية دايما
تحياتي

MaNoO said...

طلو عمرك بيبقى البوست من القلب بس المرة دى كان من داخل الأعماق عشان كدا الكلام طالع بالجمال دا عارفة احلى حاجة انك فكرة ربنا فى حالةا لرضا دى وبتشكريه على كل شىء ومش هقدر اتكلم عن اللى قلتيه على شريف انتى قلتى كل حاجة ربنا يخليهولك وتشوفى فى احسن المراتب ويديم عليكى الرضا يارب

نهر الحب said...

ربنا يديم عليكى حالة الرضا يا نوران يارب
ويبارك لك فى شريف ويخليه لك ويحفظه من كل شر
وحشيتنا يا خيخة

بدراوى said...

ربنا يحميه و يبارك فيه
بس بلاش موضوع البرابير ده
خليه ينظف مناخيره لوحده
هههههههههههههههههه
ربنا يحميه يارب
و يباركلك فيه
:-)

حسن ارابيسك said...

الحقيقة بقدر بساطة التدوينة بقدر ما اقتحمتني معانيها الجميلة والقوية
حالة من الحب والحنان والأمومة عند كثير من الأمهات تجاه فلذات أكبادهن الجميلة
مش عارف التدوينة دي خلتني احس ان عاوز أهدي تحية لكل أمهات مصر أمهات مصر بحر من العطاء والحنان والحب
أدعو اله ان يخليكم لبعض وتشوفي شريف قد الدنيا ويكون ان شاء الله ابناً باراً بكي يا أم شريف
تحياتي
حسن أرابيسك

Essam said...

ماشاء الله لاقوة إلا بالله...حقا الرضا نعمة كبيرة جدا وكمان شريف نعمة كبيرةأوى...حفظكم الله ورعاكم

روئه مشاكل said...

بسم الله ما شاءالله
ربنا يخليهولك يا رب
ويحفظهولك من كل عين

أنفاس الرحيل said...

عزيزتي
اجمل مافيه موضوعك العفويه والحب الواضح , من الجميل ان تربي طفلك على الدعاء لان دعائه مستجاب فستغلى الفرصه ليدعي لذاته بالصلاح , الله يرحم والدك ويبارك لك فى ابنك
موضوعك شدنى
دمت بود

بنت الغربة said...

ربنا يخليهولك ياخيخه
انا عندى من شريف ده ..تلاته ..مطلعين عينى ..بس زيك باحب اتفرج عليهم وهم نايمين
ومعندكيش فكرة لما بيكبروا وبيصلوا جمبك ..احساسك بيبقى عامل ازاى ..
خصوصا لما ابنك يكبر كده ويبقى قد ابنى الكبير ويغير عليك ودايما يتصل بيكى لو اتاخرتى شويه ..ويقولك قلقتينى ..والصغير لما يبوسك وانت نايمه ويحضنك من غير سبب غير انك وحشتيه ..والاموورة اللي فى النص لما تيجى تسرحلك شعرك وتحطلك التوكه بتاعتها ..ساعتها بتنسى كل التعب والخنقه اللى انتى فيها ..وبتحمدى ربنا انه ادالك النعمه الجميله دى ..
ربنا يديمها علينا جميعا ..تحياتى

my dream said...

خيخه
فينك وحشتينا
ايه يابنتي مش وخدين على الغيبه دي
عودي ياخيخه
هههههههههههههههه
مروه

حزينه said...

ربنا يخليهولك
بجد انا كمان حبيت شريف
ربنا يحميه ليكى ويراضيكى فيه

حزينه

يوسف منصور said...

اللهم آمين اللهم آمين اللهم آمين

بويت رائع وهذه زيارتي الأولى

إدعيلي يأم شريف الله يرزقني بولد عسل زي شريف ابنك
بس بلاش حكاية المناخير المكعبرة دي
:)

سوبيا said...

ربنا يرضيكي كمان وكمان

ويخليلك شريف ويحفظه
ويكون أفضل مما تتمني
يارب

عاشقه الرومانسيه said...

فين البوست بتاع بؤجة الخير؟
على كل حال انا زيارتى النهارده شكر لمنذر
لانى عارفه انه بيدخل هنا وبيتابع
اخويا منذر
الف الف شكر ليك
انا نزل شكر لحضرتك فى بوست على مدونتى ربنا يعزك
ويجازيك عننا خير

Soul.o0o.Whisper said...

السلام عليكم و رحمة الله و بركاته

بسم الله ما شاء الله


ربنا يبارك لك يارب يا خيخة
و يخليلك شريف
و ما يحرمكو من بعض ابدا


و يكون قرة عين ليكى




دمتى بود

NeNo Bs MgaNeNo said...

اولا انا كتير كنت بمر على المدونه بس بصراحه مكنتش برد او بعمل كومنت

لانى كنت بمر بسرعه وامشى من غير ما اقرأ اى بوست

بس بجد مدونه جميله ومحترمه اكيد زى صاحبتها

ربنا يديم عليه الرضا عن نفسك وعن كل حاجه فى حياتك

ويخليلك ابنك وتشوفيه احسن الناس ويكبر حواليكى وقدام عنيكى

ومعلش طلب صغير انا والدى متوفى وانا مش عارفه اكتب اسمه فى اللى يتعملهم عمره ازاى

هو اسمه عصام عبد الغفار

واسمحيلى اضيف مدونتك عندى

دومتى بالتميز والاحترام

القلب الأخضراني said...

الحقيقة ان فيه واحدة تانيةبتحب شريف جدا لسببين السبب الأو ل إنه يستاهل يتحب والسبب التاني ان المثل بيقول حب الولد وضمه حب الولد من حب أمه...مع خالص دعواتي لك ولشريف بالصحة والسعادة والرضالإ

users online