إني اعشق الشكولاتة عشق بلا حدود
فده شئ مايغضبش ربنا أبداً
ولا حاجة تدخلني النار بسببها
و إن بيتى يتحول لسوبر ماركت
او بمعنى أدق نظرا لمساحة الشقة
يتحول لكشك حلويات
بسبب كم الشكولاتة المتواجد فيه
فده شئ مقبول نوعا ما ومايزعلش حد
وكل واحد حر فى بيته
وأنى اتخن بسبب الشكولاتة
بعض الكيلو جرامات
مش كتير يعنى
يجى عشرة خمستاشر كيلو بس
فده شئ متوقع
ومايزعلنيش ولا يضايقنى
ولا يقهرني اطلاااااااااااااااقا
وإن شنطتى يتواجد فيها
انواع مختلفة من الشكولاتة على مدار الساعة
فده شئ طبيعى ومتوقع من واحدة
بتتخانق مع ابنها فلذة كبدها
وبتخطف منه الشكولاتة
وان الشكولاتة تسيح
من تعرضها لاشعة الشمس
فده شئ علمي بحت
ومنقدرش نفتح بقنا فيه
وانى اكل حتة من شكولاتاية معايا فى الشنطة
و اقفل الورقة كويس
واغطى بيها باقى الشكولاتاية
ده تصرف سليم جدا
ومحدش يقدر يغلطنى فيه
لكن لما اكل حتة شكولاتاية
واغطى الباقى كويس
واركب عربية واقعد جنب الشباك
واحط شنطتى على رجلى
والشمس تدخل من الشباك
واشعتها تتوغل لداخل الشنطة
ومنها الى حتة الشكولاتة اللى ورقتها مفتوحة
فالشكولاتة تتمدد بالحرارة
وتطلع من الورقة
وتنتشر وتتوغل الى محتويات الشنطة
فده شئ غير مقبول نوهائياً
لما احط ايدى فى شنطتى بمنتهى الثقة
علشان اطلع اقلم
والاقى القلم متلحوس بشكولاتة
وايدى اتلحوست هى كمان
فده شئ غير مقبول نوهائياً
لما اعتقد اعتقاد خاطئ
ان القلم بس هو اللى اتلحوس
واطلع الكتاب اللى بيكون معايا
واحطه على بنطلونى الجينز الفاتح
واذ فجأتن الاقى ان بنطلونى
بقى عليه اثار شيكولاتة
فده شئ غير مقبول نوهائيا برضه
لما شنطة ادوات النظافة اللى بشيلها معايا علطول
تتلحوس شكولاتة وتبقى فى منتهى القذارة
يبقى ماتستحقش انها تحمل لقب شنطة النظافة
لما كل حاجة تتلحوس بالشكولاتة
وافضل انا قاعدة زى خيختها
و يبقى منظرى كالأتى
قاعدة ومحتاسة
ودراعى مرفوع لفوق شوية
وصوابع ايدى الاتنين
مفتوحين على مصراعيهما
زى مايكون اول مرة أكتشف
انى عندى عشر صوابع
فده شئ مقبول نظرا انى ايدى متلحوسة
لكن اللى مش مقبول ابدا
ان يجى فسل من دور عيالى
يبصلى بإشمئزاز وإشمئناط
ويبص على إيدى المتلحوسة
ويقولى بمنتهى البجاحة والقرف
مامي أنتى إيدك بقت ديرتى خالص
ماتلعبيش معايا ولا تزغزغينى
الا لما تغسلى ايدك
ولما اطلب منه بمنتهى الرقة المزيفة اللى فى الدنيا
واقوله طب ممكن يا شريف تمد ايدك
تجيبلى المناديل المبلولة من الشنطة
علشان امسح إيدى
يقوم يبصلى بعيون خضراء ماكرة
ويقولى حضرتك عايزانى انا كمان تبقى ايدى ديرتى؟
لا طبعا يا مامى مش هاجيبلك حاجة
فده شئ يجعلنى اذبهل اذبهلال واضح
من رده عليا ويخلينى اقول فى عقل بالى
طب ايه لزوم حضرتك بقى
لما فى الاخر لا طبعا مش هاجيبلك حاجة
لما استبدل الرقة المزيفة
بالصوت العالى وصيغة الامر
واستخدم اسلوب القهر
كل ده فى جملة واحدة
بقولك ايه يا شريف
اسمع الكلام ومد ايدك هات المناديل
فده اسلوب تربوى قديم
كلنا مرينا بيه فى فترة من فترات حياتنا
لكن لما صوته يتخنق بالدموع
ويصعب عليه نفسه
وهو حاسس انه مجبر
على عمل غير اخلاقى بالمرة
ويقولى
ينفع كدة؟
ينفع كدة تزعقى لشريف حبيبك؟
ينفع كدة تخلى ايدى تبقى ديرتى؟
فده شئ غير مقبول
ويحتم عليا انى اتراجع فى طلبى
واعتذرله واقوله طب خلاص ماتزعلش انا اسفة
لكن لما يتجعص فى قاعدته
وياخد نفس ارتياح
ويقولى وهو مش معبرنى
و باصص من شباك العربية
بعد كدة ابقى هاتى كيس حطى فيه الشكولاتة
بدل ما توسخى شنطتك كدة يا مامى
يبقى ده شئ غير مقبول نوهائيا
ويحتم عليا انى اصرخ فى عقل بالى واقول
اما انك ابن خيخة صحيح
بس خلاص
وكل الكلام اللى فوق ده
نطلع منه بحاجة واحدة بس
ان الشكولاتة ساحت
وراحت مطرح ماراحت
انتهى
بت خيخة وأى كلام
43 comments:
هههههههههههههه رائعة مووووت انتى وشريف و الشوكلاتة, ما هو بردوا عندة حق , بتحطوا نفسكواا فى مواقف بايخةةةةةة , انتى مالكيش حل
معلش يا خيخة .. اعذرينى فى اللى هاقوله
بصراحة ... الولد إداكى درس
:-)
الحل بسيط جدا .. و هو قاله فى كلمتين .. و توصل إله بأقل مجهود .. حتى الشوكلاتة فى كيس
و نقطة و من اول السطر
الواد دة ما شاء الله عليه .. ربنا يكرمه يا رب
أنا اقصد أقول: حطى
مش: حتى
هههههههههههه
معلش ياجميله تعيشي وتسيحي :D:D
والله ابنك ده عسوووول اوي ماشاء الله
ربنا مايحرمكوا من بعض
بس ابقي جيبي كيس المره الجايه ههههههههه
سلام يا اجمل خيخه
هههههههههههههههههههههههههههههههههههههههههههههههههههههههههههههههههههه
كنت بتخيل ابني في نفس الموقف
يظهر ان الجيل ده كله كده
ممكن اعرف نوع الشيكولاته الي ساحت دييي عشان مجبش منها
ههههههههههههههههههههههههه
طيب والله الواد ده ذكي و بيفهم
و احرجك
ابقى حطي الشيكولاتة في كيس و بلاش تحطي نفسك في مواقف بايخة
ثم إيه ديرتي دي
ما تتكلمي معاه عربي
إسمها إيد وسخة
أو متعاصة شوكلاتة
:)
يا حبيبى قلبى
بس ده نطلع منه بحاجه تانيه خالص
ان البنت دى مش خيخه وانها ما شاء الله عرفت تربى
ربنا يخليه يا رب وتفرحى بيه
ههههههههههههههههههههههه
والله إنتي زي السكر بس تعرفي
شكل شريف هيطلع حكاااااااااية :)
وبعدين عاوزة ايه بس ياخوخه
الواد كان عنده حق ريلي يعني عنده حق
أنا لو مكااانه كنت كنت كنت
مديت إيدي وجبت المنديل ههههه
تحياتي ياقمرر
هههههههههههههههههههههههههه
عسل والله انتى وشريف
تطلعى من ده كله بحاجه واحده
انك تسمعى كلام شريف وتحطى الشيكولاته فى كيس بعد كده هههههههههه
عسول والله ربنا يخليهولك يارب
ربنا يحمية ويجعلة من الصالحين
بس انتى زعلانة منه لية.. طب مهو اقترح عليكى حل دبلوماسى اهو
الراجل عداه العيب يعنى
تحياتى يا قمر
الله اكبر عليه
مش بقولك يا خوخة الواد دا اجمل إنجاز عملتيه ف حياتك
ربنا يحرسه يا رب
ملحقتش أعلق فى بوست البؤجة
بس كويس إنك كتبتى انطباعاتك ...
مش عارفة ليه حسيت إنى مش لاقية حاجة أقولها و عشان كدا مكتبتش بوست عندى
مش عارفة ليه يظهر إنى بقيت كسلانة قوى أما بقى عن اللى ساحت دى
فأختك تشاطرك الحب و العشق لهذا الإعجاز الربانى اللى إسمه الشكولاتة
الشكولاتة دى اجمل إكتشاف عرفه الإنسان ف الكون
بوسة و حضونة ليكى و لشيكو
هههههههه
معلش ..
انا كنت بتعرض للموقف ده كتير وما كنتش بتعلم للاسف .. علشان عشقى الرهيب للشكولاتة ..
وكل شكولاتة وانتى بخير ..
هههههههههه
ههههههههه
بصراحة انا فرحان فيكى يا خيخة
وحاسس ان شريف جابلى حقى منك
فعلا عالم خيخة بصحيح
ما قالك تحطى الشيكولاته فى كيس
افهموها بقى
هههههههه
تحياتى
فاتيما
========
كويس إنك ظهرتي
بقى لك فترة ما كتبتيش في مدونتك و قلقتينا
إبقى إقرأي تعليقي في بوست البؤجة هنا عند خيخة
:)
هههههههههههههههههههه
ده انتى خيخة صحيح
ماحدش شافك لما بتزعقى لابنك و هوه بياكل الشيكولاته خوفا من انه يلحوس نفسه
و لا حد شافك و الولد يا حبة عيني بيقطم و انتى عامله زي المسرحية بتاعة محمد صبحي تخاريف تمسحيله بقه ورا كل قطمه
ما حدش شافك و انتى بتغسلى ايد ابنك بعد الشيكولاته 10 مرا و بقه 12
هههههههههههههههههههههههه
و بعد ده كله تزعقى للولد و عاوزاه يخلى ايديه ديرتي؟؟؟؟؟
خيخة بجد
ههههههههههههههههههههه
ربنا يخليهولك
زى العسل
وانتى من هنا ورايح لازم تحطى الشوكولاته
فى كيس
حزينه
أنا زعلان من شريف خالص
مفروض يتعلم أنه يساعدك
و يضحى بالحاجة الشخصية علشانك و علشان الاخرين
و افتكرى انك ياما اتبهدلتى بسببه و هو بيبى
لازم تربيه على التضحية مش حب ذاته لوحده دون الاخرين
بصراحة اللي جبني هنا هوه العنوان,
اصل انا من هواة الشكولاته,
عشقي وحبي وجنوني في الشكولاته,
تخيلتك بالمنظر الرهيب مع اللحوسه وتخيلت ابنك والموقف الظريف ده,
بس ربنا يحميلك ابنك هو قالك الحل بكل بساطة كيس في الشنطه تحطي فيه كفيل بعدم حدوث كل اللحوسه دي,
بس نحمد ربنا انها في الاول والاخر لحوسة الشكولاته حبيبتنا (:
حوارك مع شريف هو عبارة عن التجسيد الفعلي للمقولة الخالدة اللي بتقول
الأطفال هما اللي بيربوا أهاليهم مش العكس ... :) بس بيني و بينك
الولد منطقة صحيح في موضوع ان يبقى معاكي كيس تحطي فية الشيكولاتة
و بالهنا و الشفا أكلة الشوكولاتة
تسمحيلي يا خيخة هانم إني أقولك بنفس تعج بأعلى أحاسيس الشماتة و التشفي و بابتسامة تتسم بالطابع الأصفراوي : تستاهلي
أيون تستاهلي
و على فكرة بقى انت أصلا أصلا لو حتى ماسمحتيش فأنا قلت خلاص
ماشي ماشي
يلا سلام
هههههههههاااااى حلوة
بتحطي نفسك في مواقف بااايخةةة
ابقوا اسمعوا كلام عيالكو بقى و ما تعملوش في نفسكو كدا
قدوة ايه..بلا بتاع بقى
على فكرة وحشتيني:)
و ربنا يخلي لك شريف يا رب
هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
لا تعليق غير السخسخة من الضحك
ربنا يخليهولك
سلملمي علي شريف وقولي عمك احمد بيقولك ايوة كدة خليك راجل وعندك مبدأ
ربنا يخليهولك
ربنا يخلي ويحمي وتشوفيه عريس ياخيخه يارب
وعلي رأي الواد ابقي حطي في كيس ياختي
الشيكولاته دى اجمل شئ خلقه ربنا
هاتى حته
هههههههههههههههههههههه
هههههههههههههه
بصى حضرتك
شريف عنده حق
يعنى مينفعش يجيب هو المنديل من الشنطة
و تبقى ايديه ديرتى
قوم انتوا الإثنين تبقى ايديكوا ديرتى
ساعتها مين بقى حيجيب منديل ليكوه
ها قوليلى
و بعدين لازم منديل من الشنطة قوليله يا شريف هات باكت منديل من المحل اللى هناك
و بعدين طالما انتوا مش اد اكل الشيكولاته بتأكلوها ليه
هههههههههههههههههههههههه
انا بعشق الشيكولاته
حكايتك مع الشيكولاته تستحق اعلان شوكولاته
عندما تعشق الشوكولاته
جلاكسى
اه يا حوستى
حملة التبرع الشهرية بالدم
التفاصيل هنا
http://elroh.blogspot.com/2009/05/blog-post.html
لكن لما يتجعص فى قاعدته
وياخد نفس ارتياح
ويقولى وهو مش معبرنى
و باصص من شباك العربية
بعد كدة ابقى هاتى كيس حطى فيه الشكولاتة
بدل ما توسخى شنطتك كدة يا مامى
يبقى ده شئ غير مقبول نوهائيا
ويحتم عليا انى اصرخ فى عقل بالى واقول
اما انك ابن خيخة صحيح
هههههههههههههههههههههههههههههههههه
ربنا يخليهولك يارب ويفرحك بيه
شيكو ده سكر
قال ابن خيخة قال
ههههههههههههههههههههه
ما شاءالله ربنا يحفظة الواد اذكى من امه يظهر الجيل ده كله كده اللهم صلي على النبي
وهكذا يتولد الصراع بين الجيل الجديد والجيل القديم
صراع ابدي دائم
هل يقتنع شريف ويمد ايده في الشنطه
هل تتراجع خيخه وتقوم هي تجيبلها مناديل من اي حته
هل يلتفت السائق ليحل المشكله ويديها مناديل من معاه
كلها اسرار لن نعرفها
فقط على قناة الفريكيكوووووو
سلاااااااااااااااااااااااااام
اخوكي ايهاب
:)))
بسم الله ماشاء الله ربنا يباركلك في شريف
المهم بس تسمعي الكلام وتجيبي كيس للشكولاته
:))))))))))
تحياتي
ودة بالضبط الفارق بين الجيل الاثري امثالك والجيل الحديث امثال شريف
ههههههههههههههههههههههههه
ربنا يبارك لك فيه وابقي هاتي شنطة حطي فيها الشيكولاتة ايه دة
عسل يا خيخة
اولا
الله اكبر ماشاء الله
شيكو ده حكايه ولما هيكبر هتفتخري بيه وان شاء الله احنا كمان نقول الراجل ده ابن واحده صحبتنا كنا بنعلق عندها زمان ايام المدونات
ربنا ما يحرمكيش منه ولا من الشيكولاته
بس مش خساره الشيكولاته الي ساحت دي
مني ليكي ولشيكوا عدد 2 شيكولاته بالاكياس بتاعتهم في حال حبيتي تشيلي حته تاكليها بعدين;)
من شابه امهاه فما ظلم ههههههههه
خيخي خيخي يعني
كويس ضمنتي ان المبدئ الخيخي يسمر في الحياه و تطلع اجيال مناصره للخيخه
مش فاهم
يعني هي المشكلة في الشيكولاته
ولا في شريف لما مرضيش يجيب المناديل
بجد انا حسيت انك بتحكي قصة المتاهه
وفي الاخر اكتشفت انك حكيتي قصة ظريفة بسرعه وخطف
فحسيت اني فعلا مش فاهم لكن حاليا بدات افهم
بجد موضوع لذيذ
تحياتي
احس احسن احسن انتي طبعا عارفة ليه علشان قلتلك تجبيلي شيكو معاكي وجيتي يوم البؤجة أخر خيخنة خالص واسالك فين الشيكو تقوللي مش جبتي ولولا ان القدر رحمك مني ومشيت ومش كملت معاكم كنت عملتك دوشة في دماغك وكنت هتجيبي شيكو غصب غصب يالا دمتي بكل الحب والنشاط والتفائل سلامي لشيكو
هههههههههههههههههههههههه
ربنا يخليلك ابنك يارب
وابقى سبيلى حته شيكولاته :$:$
معلش يا شيرى بقى دى مامى بردو ربنا يخليهالك
وابقى على راى شيرى حطى الشيكولاته يا خيخه فى كيس علشان مش تتبهدلى كده هههههههه
هههههههههه
ربنا يخليهولك يارب
أنا قريت البوست أكتر من مرة وكل ما أقراه أضحك .. متخيل المنظر
ومتخيلك كمان وشريف بيقوللك : ايدك بقت ديرتى
أكيد قلتى فى عقل بالك : اسكت يالا جتك خيبة على امك
دمتى بود ..
بجد ماشاء الله عليكى زى السكر وبجد مونتدك جميله والموضوع ده تحفه وكلمه سكر شويه عليكى انا اسمى نوران
بس استسمحك عايزه اعرف ايه سبب تسميتك بنت خيخه واى كلام
وابنك بصراحه خلى منظرك وحححححححححش بجد يعنى
تسلم ايدك بجد
Post a Comment