Friday, May 15, 2009

كسارة البندق


صداع فظيع مسك راسى

عِند مع نفسى انى مش هاخد كيتوفان

وانى هانام وهاصحى اكون زى الفل

فى هذيان ما قبل النوم

وفى التفكير فى الصداع

كان نفسى اجيب حاجة

واضغط بيها على دماغى

علشان امنع احساس ان دماغى بتلق فى راسى

زى ما تكون لابس جزمة واسعة عليك

وبتلق فى رجلك ونتيجة اللقلقة دى

ان رجليك بتتكحت من ورا وبتعملك واوا

قعدت افكر ايه الحاجة اللى ممكن تمسك دماغى

غير فكرة الرباط الضاغط

اللى بابا الله يرحمه

كان بيتبعها عند شعوره بالصداع

مالقتش حاجة على اد دماغى

قعدت افكر واقول انهم المفروض يبتدوا يفكروا

لحد دلوقتى معرفش هما مين اللى المفروض يفكروا

بس عندى احساس ان مسؤلية التفكير دى

بتقع على عاتق ناس بعينها

انا معرفش عنهم حاجة

لكنى اشعر بوجودهم حولينا

المهم يعنى

ان الناس دى المفروض انهم

يعملوا حاجة شبه كسارة البندق

بس تكون مقاس كبير على اد راس البنى ادمين

واللى عنده صداع

يحط راسه بين فكي الكسارة الكبيرة دى

ويخلى حد من اهله يضغط عليها

لحد الصداع ما يروح او دماغه تنفجر

ايهما اقرب يا ترى؟

وقعدت اتخيل ان راسى بين فكي كسارة البندق

وان بابا ضغط على الكسارة

وان الصداع راح فى لحظة انفجار جمجمتى

ومخي تناثرت اشلائه

ودمي وسخ الاوضة

وطرطش على بابا وعلى سقف اوضة النوم

والدنيا اتزروطت تماما

وماما عملت مشكلة

علشان كانت لسة منضفة الشقة

وعمالة تزعق وتقول لبابا

ماكنت ضغطت علي دماغها

فى الحمام احسن

بدل ما توسخ الاوضة كدة

هو انا لسه هاقعد امسح تانى

وراحت زقانى من فوق السرير وانا من غير راس

وغيرت الملاية اللى عليها دم راسى وبقايا من مخى

يععععععععععععععع

ايه القرف ده؟

وفجأة الفكرة تلاشت من دماغى

وقلت يا سلام لو فيه كسارة البندق لكل حاجة توجعنا

يعنى لو صباع رجلى الكبير وجعنى

مش اعالجه

لااااااااااااا

انا اقطعه علطول

قصدى احطه بين كسارة البندق

المخصوصة لوجع الصوابع

واديها تكة واضغط وهوب

الصباع يا اما يخف يا اما يتفشفش

وفجاة برضه الفكرة تلاشت من دماغى

وفجاة لاقيت نفسى بقول

أأأأأأأأأأأأأأأأأأأأه

والفجر بيقول الله اكبر

وصوت الحنفية مفتوح

ومن صوت حركة انسياب المية

عرفت ان بابا هو اللى بيتوضى

ولا قيت نفسى بقول

ازاى يعنى بابا هو اللى بيتوضى

ورحت فى النوم تانى

امممممممممممممم

دى معناها

أأأأأأأأأأه بس مكتومة لجوة

وصوت الحنفية المرة دى

بيدل ان ماما هى اللى بتتوضى

دعبست فى الضلمة على شنطتى

فتحت سوستة الشنطة

مديت ايدى ودعبست

وقعدت ادورعلى شريط الكيتوفان

وساعتها كرهت ام الشنطة بتاعتى

اللى عاملة زى شوال الحاوى

اللى من غير اى جيوب

ومدلوق فيها كل حاجة على بعض

المهم

لاقيت شريط الكبسول

خدت كبسولتين كيتوفان

طلعت برة

لاقيت بابا بيصلى

سالته هو حضرتك موجود ازاى

ماردش عليا لانه كان بيصلى

وأنا فتحت التلاجة خدت ازازة مية

ودخلت الاوضة بلعت الكبسولتين

نمت على السرير

قعدت افكر فى كسارة البندق

وهل يا ترى ممكن بعد كدة

تتحول لاداة تعذيب فى المعتقلات السياسية

وبدل ما يقعدوا المسجون السياسى على الخازوق

يخدوه ويحطوه بين كسارة البندق

ولاقيت ماما فى وشى بتقولى

شقة اسر غرقت

ولاقتنى لسة فى سريرى

وعرفت انى بحلم

وتخيلت مواسير المية اللى فى شقة اخويا

محطوطة بين فكي كسارة البندق

وعادل السباك ابو عجلة

ضغط على دراعين الكسارة

وخلاها تنفجر فى شقة اسر

وشوفتنى وانا بطنى منفوخة

وجوة مستشفى

وبيقولولى هتولدى حالا

وحاطونى جوة كسارة بندق كبيرة

وضغطوا على بطنى

وبطني فرقعت وبيبيهات كتييييييييييرة جدا

طاروا فى كل حتة فى اوضة الولادة

وفجأة صحيت على صوت شريف وهو بيسالنى بيأس

مامى هو احنا مش هانطلع بقى عند جدو جمال فوق فى الجنة؟

بصتله وقلتله ان شاء الله


بس خلاص

وكل الكلام اللى فوق ده

نطلع منه بسؤال واحد بس

لما الروح توجعنا

ازاى نحطها جوة كسارة البندق؟




إنتهى

بت خيخة وأى كلام

36 comments:

Appy said...

وجع الروح اصعب وجع مينفعش نقرص عليه ولا نضغط لازم نطبطب وبنفسنا لاننا احنا اللى هنقدر عليها مش حد غيرنا

القدر و انا said...

خيخة
ايه الموضوع سلامتك الف سلامة
انت تعبانة من ايه
هو ده اللى جاب الصداع
روقى يا قمر
تعالى عندى غيرى حتلاقى مناظر جميلة

بدراوى said...

لا حول و لا قوة الا بالله
مكنتش اتصور ان حضرتك حالتك تبقى كدة
كسارة بندق
هو فيه كسارة الفول السودانى اللى بيكله السنجاب
تنفع
؟

بخصوص الكيتوفان احنا عيلة كيتوفانية
انا و بابا و ماما و اخويا بنبلبعه عمال على بطال زى البونبونى

ممكن اشحنلك كرتوتين كيتوفان

دعاء مواجهات said...

وها قد توصلت خيخة لكل مشاكلنا الحياتية والنفسية والجسمانية

هقولك كلمة واحدة ماكانش حد غلب ياستى

دة كان تعليقى ع البوست دة

اما البوستات السابقة فكالتالى

===================

اولا ربنا يخليلك شريف وتفرحى بيه يارب ويكون سبب فى دخولك الجنه

ثانيا الرضا دا احساس حلو اوى ياريت لما توصليلو تتشعبطى فية واوعى تسيبية يفلت من ا يدك

ثالثا ما احلى الشيكولاتة وادمانها بجد ملهاش حل

رابعا ربنا يجازيكى خير عن موضوع العمرة ولو انى اول مرة اعرف عن الان وربنا ييسر لنا الخير جميعا

خامسا وهو الاهم انتى وحشاانى اوى اوى اوى وواحشنى كلامك ورغيك وكل تفاصيلك مش انتى بس لا دا كل المدونات الجميلات واحشنى بجنوون

رجاء أخير

ياريت التجمع النسائى القادم يكون اى يوم غير الجمعه انشالله السبت حتى
عشان خاطرى

سلام بقى دوشتك ..

عاشقه الرومانسيه said...

ابقى اتغطى كويس ياخوخه
بس حلو السؤال ده
الروح توجعنا ازاى نحطها جوة كسارة البندق؟
والاجمل رد ابى عليه

my dream said...

الف سلامه عليك ياجميل
بس تعرفي هههههههههههه حلوة حكايه الكساره دي
بس بقى بالنسبه للروح فادي فعلا مش عايزه كساره ولا عايزه حد يضغط اصلا دي بتحتاج مننا نفش
هههههههههههههههه
ونطبطب زي ما بتقول ابي هانم كده
طبطبي على روحك ياخيخه او خلي شيكو يطبطبلك عليها
هتخف على طول
مع حبي
مروه

عبد من عباد الله said...

اممممممممممممممممممممم
اممممممممممممممممم
و كمان اممممممممممممم

انتي طبعاً نهيتي الموضوع بسؤال جامد

بس برده عايز اعرف هما كام يوم اللي فاتوا دول يعملوا فيكي كده ؟! لا لا لا حقيقي مكنتش اعرف انك بتتأثري اوي كده لما تسيبي المدونه ..... دماغ تفرقع ! و دم يطرطش ! و اوضه تتوسخ !يا مفتريه .. حرام عليكي يا شيخه بس .

اوعي تكوني بتحكي عن الاحلام و الابتكارات العظيمه دي للواد شريف الله يكون في عونه هههههههه

Dr.m said...

السلام عليكم

يارب يكون الصداع راح اللي اكيد كان بيتزايد بالتفكير العميق اللي انت فكرتيه ده
ولو كان فيه لينا قطع غيار كنا نفذنا موةضوع البندق ده
المهم علاج الروح ليس ماديا ((ويسئلونك عن الروح قل الروح من أمر ربي ))....
وعلاجها لن يكون الا بتحسين حالنا مع الله

تحياتي
سلام

بت خيخة وأي كلام said...

منذر وكريم وبندقة وويسووو

انا بعتذرلكم جدا جيت انشر تعليقاتكم بدل ما انشرها عملتلها رفض


انا اسفة جدا

غروب said...

هههههههههه

بطنك فرقعت وطله بيبهات كتير

ازاى يعنى

ههه

بجد البوست دمه خفيف اوى

لكن بررضه لسه سؤالك مش ليه اى اجابه ولا اعتقد ان في حل

karim said...

ولا يهمك ميرسيى لزوقك المهم انك قريتى التعليق اتمنى زيارتك لمدونتى, تحياتى

صمت المشاعر said...

الف سلامه عليكي من الصداع

وعجبتني الاستخدامات الجديده لكساره البندق اهو الواحد يبقي يستخدمها

مامة مازن said...

حقيقى اختى مش عارفة ارد على سؤالك
وجع الروح مشكلته انه بيبقى عامل زى السفينة الغرقانة فى عمق المحيط محدش عارف ينتشلها علشان بعيد قوى بتفضل موجودة بس بمرور الايام بتتنسى وتعدى من فوقها مراكب تانية
ياريتك تكونى فهمتى قصدى

نعكشة said...

اتفق مع آبي

بس عندي رد رخم بما اني طول عمري رخمة

هوه انتي صليتي الفجر ساعتها ولا الشيطان ضحك عليكي؟؟؟

أصل أنا ساعات بحس إني صحيت و أحلم إني صليت
ولما أقوم بعد كام ساعة بكتشف اني مصليتش و الشيطان ضحك عليا

بالنسبة بقة للناس المسؤولة عن التفكير

دة صح

فية علماء معينين أو غير معينين يعني
لما مثلا عايزين يخترعوا اداه او دوا او حاجة
يجمعوا كام عالم كدة من عدة مجالات و يقولولهم عايزين كذا في خلال كذا

دة طبعاً غير الاختراعات الفردية

اما بالنسبة للكسارة
بس انا حاساها هتوجعني لإن عندها سنان

مفيش كسارة بلانت إيند؟؟؟

و يبقوا يدوني مخدر قبل ما يستخدموها

خير خير

ربنا يهون عليكي يا رب

سلام عليكِ

بصراحه said...

والكلام اللى فات ده كله نطلع بيه بأيه؟!!
بأنك مخنوقه من الدنيا واللى فيها وخلاص جيبتى اخرك ، وما عندكيش استعداد تفكرى فى حلول للمشاكل فقررتى تقضى عليها قضاء سريع ونهائى ومفترى.
واما اختيارك لكسارة البندق لحبك الشديد للبندق وسيطرة الاكل عليكى .
علشان كده نطلع من الكلام بتاع حضرتى بحاجه واحده بس:
انت من الصعب تخسى ياباشا ، ههههههههه

كان معكم
الدكتور المفسانى حضرتى
الاستاذ المهندس ويكا

بت خيخة وأي كلام said...

هارد رد شامل على كل التعليقات اللى جاتلى المنشورة والغير منشورة واللى حذفتها بالغلط




اه كان عندى صداع فعلا واه خدت كيتوفان فعلا
واه شقة اخويا اسر غرقت بس ماغرقتش امبارح دى غرقت من كام شهر كدة وتقريباعقلى الباطن لسة محتفظ بهذه الذكرى وعلشان كدة انا حلمت بيها

وانا مش بحب البندق
بالعكس البندق الحاجة الوحيدة من المكسرات الى انا مش بحبها

وانا مش عارفة اخس لكن ده مش معناه انى فيلة صغنونة

انا اللى مايعرفنيش ولو شافنى مايقولش عليا كلبوظة
لكن علشان انا عارفة نفسى وعارفة انى كنت ارفع مما انا عليه حاليا فبالتالى انا شيفانى كلبوظة



اه صليت الفجر يوميها


ساعات الواحد بيبقى مش عايز حد يقوله روح صلى او اقرا قران وانت هترتاح

ساعات الواحد بيكون عايز يفضل غرقان شوية فى حالة الانكسار الى هو فيها

مش عايزة حد يقولى استعيذى باله من الشيطان
او روحى اتوضى وصلى واقرى قران
ساعات ببقى نفسى اصرخ وخلاص ومحدش يقولى اهدى

مش عايزة حد يطبطب

مش عايزة حد يضرب كف بكف
ويقول لاحول ولاقوة الا بالله
ما كانت عاقلة
مش عايزة حد يبصلى بصة انى مجنونة

ساعات الواحد بيبقى عايز يصرخ ويعيط ويضحك فى نفس الوقت
وفوق كل ده بيبقى مش عايز حد يستغربه او يستغرب رد فعله او حتى يعلق على تصرفاته

ساعات الواحد بيكون عايز ينفجر وخلاص وبعد كدة يمشى فى هدوء

ساعات الواحد بيكون محتاج كسارة بندق تضغط على دماغه علشان يرتاح من التفكير
ويحس اد ايه دماغه فاضية وخفيفة ومافيهاش اى حاجة


ساعات الواحد بيكون عايز يكفر لمدة ثوانى
وبعد ما الثوانى دى تعدى يرجع يؤمن تانى

وهو لوحده من غير اى حد ما يوجهه
هو اللى يروح يتوضى ويصلى ويقرا قران

ساعات لحظات الكفر بتكون مهمة علشان نحس بحلاوة لحظات الايمان

ساعات الواحد بيكون محتاج فعلا لوقت انه يحزن فيه وانه يدى للحزن ده وقت كافى انه يحزن براحته

فيه حاجات كدة ماينفعش فيها ان احنا نكروت فيها


ساعات الواحد بيكون محتاج يحس بوجع الروح ويتالم من وجعها فعلا
ومش عايز يعمل نفسه انه كويس وانه تمام وانه كل حاجة فى اللذيذ



حد فاهمنى؟

... amr said...

في ناس فس حياة الانسان بيبقوا عاملين زي كسارة البندق .. دوري عليهم

... amr said...

عاجبني ردك

و أزعم اني فهمتة ... نهارك أبيض و خليني أكمل الماتش

:P

فاتيما said...

يا نونو يا حبيبتى هقولك إيه ؟
إنتى يا بنتى من الناس اللى بيصابوا بالحزن المزمن
أصلى أزعم إنى من هولاء برضو
يعنى الحزن بييجى عندنا يعمل زى الأنفلونزا بتاعة الطيور
الحزن بييجى يستوطن ارواحنا
و يعقد يستربع فيها و ياخدله جنب يحط كراكيبه
و يبقى للأبد ...
إنتى مشتاقة لبابا
و مش قادرة لحد دلوقتى تتعايشى مع شعور الفقد دا
انتى راضية بحكم ربنا
و قضائه
و مشيئته
و قبلتى حقيقة إنه راح
و مش راجع تانى يضمك لحضن قلبه
مهما حصل
بس رغم كل الأيمان و الرضا دا
فيه جوانا إنسان ضعيف محتاج
للسكن و الإحساس بالظهر
اللى كان بيتسند عليه حتى و هوه مش واخد باله
باباكى كان الضهر و السكن و الملاذ
و عن شعور الضياع اللى روحك بتحسه دا يؤسفنى و يسعدنى فى نفس الوقت أقولك إنه مش هيزول بمرور الزمن
و مهما حاولتى
يؤسفنى لأنى مستشعرة نوعا ما
كم الالم الناتج عنه
و يسعدنى لأنى متأكدة جدا إن الالم دا هوه اللى هيخليكى مخلوقة اكثر شفافية و رهافة و شعور بالآخرين اكتر منتى بالفعل
كسارة الروح موجودة يا خيخة
و مشكلتك الحقيقة إنك كل شوية بتخديلك منها تكسيرة
بوسة و حضونااااااااات
لقلبك يا حبيبتى

مامة مازن said...

فهمتك اختى

بت خيخة وأي كلام said...

فاتيما

لما حد يموت
الناس بتشغل قران ليل ونهار
ويقعدوا يترحمه عليه
وممكن دموعهم تنزل وممكن لأ

الغريبة انى لما استقريت فى اكتوبر بعد وفاة بابا بفترة صغنونة
ماشغلتش قران فى البيت
عارفة كنت بشغل ايه؟

كنت بشغل اغنية حسك فى الدنيا يابا بتاعة انغام

كنت بشغلها وتقعد تتكرر مرارا وتكرارا
وانا اقعد اتقهر فى العياط

يمكن لو كنت شغلت سورة يس ماكنتش عيطت كدة
يمكن لو كنت شغلت القران كله ماكنتش عيطت كدة

ومع كل كوبليه فى الاغنية كنت بتخيل بابا فى مشاهد مختلفة

كانى بتفرج على فيلم باور بوينت
صوره متتابعة فى ذاكرتى ماشية مع كلمات الاغنية

كان يغيظنى اوى ان هانى يسالنى مالك لما يلاقينى بعيط
كنت ببصله وانا مذهولة
وعايزة اصرخ فى وشه
هو ايه اللى مالى
انت متعرفش مالى
بابا مااااااااااااااااات

وبعدين ارجع واقول هو ذنبه ايه

الحزن حزنى والجرح جرحى
والوجع فى روحى انا

واقعد احاول اتصور حال بابا وقت الوفاة
طب هو كان بيفكر فى ايه
كان خايف ولا كان مطمن
كان شايف حد قدامه ولا مش شايف حاجة
روحه فعلا بتكون حوالينا ولا بتكون فين؟

طب هو قال لماما ايه بالظبط

طب هو كان متعشم ان لسه قدامه ايام تانية فى الدنيا ولا كان حاسس ان اللحظة حانت

كان حاسس بايه
نفيسى اعرف كان حاسس بايه
كان موجوع ولا كان مرتاح

المفروض بالنسبالى انا انه كان يفضل شوية كمان
كان لسة مارحش مع شريف القرية الفرعونية
ولسة ماودهوش المتحف المصرى ولسة مارحش معاه الحسين والاوبرا
والقلعة
ولسة ماحفظهوش القران

انا كنت معتمدة على بابا انه هيربى شريف ثقافيا ودينيا وتاريخيا

لسة ماعلمش شريف شطرنج

لسة ماتكلمش مع شريف فى السياسة وفى الدين

غياب بابا عنى مش غريب
بابا كان بيسافر
وبيغيب عننا بالشهور

بس لما اكون عارفة ان ده غياب نهائى
باستغرب وبخاف والاسئلة تكتر فى دماغى


خايفة انسى ملامحه
رغم ان ماما عملت بوفيه السفرة متحف لصوره وبروزت صور كتير جدا

لكن انا مش بحاول ابص للصور دى
عنيا بتهرب من التركيز فيهم

مش عايزة اصدق انى فعلا ممكن انسى ملامحه

وخصوصا لما تلاقى الصورة بتاخدك ليوم الى اتصورت فيه
وتحسى انك دخلتى جوة الصورة وبابا بيتكلم وفاكرة كل كلمة قالها وقت التقاط الصورة دى
وفاكرة كل التفاتة منه وكل انحناءة
وتحسى بنفسه
وتحسى بالبوسة اللى خدتيها على خدك بعد ما الصورة اتصورت
وتسمعى الضحكة الى بتصاحب التعليق اللى بيقوله على الصورة

وبعد كل ده تفتكرى موقف زبالة منك عملتيه معاه
وتبقى مش عايزة تضربى نفسك بالجزمة
لاااااااا
بتبقى عايزة حد يلطمك على وشك

عارفة اللطمة
بتبقى ضربة مكتومة بس جامدة

عايزة تخبطى راسك فى حيطة مخربشة

بتبقى متغاظة من نفسك لدرجة انك بتبقى عايزة تكحتى قلبك بضوافرك

بتبقى حزينة اوى
لكن فى نفس الوقت مش عايزة حد يلاحظ الحزن ده
ولو حد لاحظه
مش عايزة حد يعلق على حزنك
مش عايز حد يطبطب عليكى ومش عايزة حد يصبرك ومش عايزة حد يقولك معلش

بتبقى عايزة الناس تسكت وتبطل كلام
وحتى اهتمامهم بيكى بتبقى مش عايزاه


مش عايزة حد حتى يسالك بتعيطى ليه او حتى يفكر انه يمسح دموعك

انتى بتبقى محتاجة انك تحزنى وبس

وتقنعى نفسك انها مرحلة وهتعدى




انا معرفش ايه علاقة كلامى بتعليقك يا فاتيما
بس عادى بقى
انا خيخة
وليس على الخيخة حرج فيما تكتبه

شكرا ليكى

مامة مازن said...

جعلتينى ابكى بحرقه من تعليقك الاخير وردك على اخت فاتيما وفهمتك والله وحسيت بيكى
قلبى معك اختى

عابر سبيل (عبدالرحمن محمود) said...

عارفة حسيت بأيه وانا بشوف البوست ده
حسيت ان دماغى جوة كسارة البندق
وقبل الصداع ما يروح او تنفجر دماغى ايهما اقرب
حسيت انى محتاج اقلب فى باقى مواضيعك
بجد موضوع جميل
وشفاك الله وعافاك

Anonymous said...

عزيزتي الأستاذة نوران

أولاً: من فضلك اقبلي مروري وتعليقي.

ثانيًا، اسمحي لي أقولك إن البوست أكتر من رائع. أسلوبك جديد على العالم العربي فلم أر مثله من قبل هنا. أسلوب الواقعية السحرية عندك – والتي ابتدعها الألماني "فرانز روه" – مستخدم بشكل سلس ومتواصل. وأحسن ما في الأمر أنك لا تفسرين ما تقولين. إذا أخذت في إثراء أسلوبك أكثر فأبشرك بجائزة أدبية هامة على غرار تلك التي حصل عليها "ماركيز" أو "لاورا اسكيبل" في مجال الواقعية السحرية. أحييك مرة أخرى وأشجعك على كتابة المزيد.

تحياتي

واحدة مفروسة said...

نورا يا قمرة
ازيك يا خوخة و حشتيني
اولا سلامتك من الصداع
مش عارفة ايه حكايته الصداع اللى ماشي اليومين دول على الناس كلها ربنا يعافيكي

على فكرة يا خوختي انا بحس ان الوجع بيكون وجع نفس مش روح مش عارفه ليه؟
النفس هيه اللى بتفضل تجيب من هنا و من هنا و مع التآمر اللعين مع المخ بيخلوا الواحد يجيب افكار من هنا و هناك و يصدع اكتر
و يفكر فى مليون حاجة
على العموم الموضوع ده عادى لا تقلقى منه
المهم وحشتيني
و بوسيلى شيكو

الشنكوتي الكبير said...

يا خراشي يا خيخه

انتي موجوعه قوي
كان نفسي اكون دارس علم نفس علشان اقولك الحل ايه
لكن اللي اعرفه ومش محتاج علم نفس
اني اقولك خلي بالك من نفسك وبالراحه عليها بلاش تضغطي على نفسك قوي
وبعد الشر عنك من الفرقعه يا ستي

ان شالله اللي يكرهك

سلاااااااااااااااااااااااام
اخوكي ايهاب

احلام جوليا said...

حمد لله على السلامة يا خيخة مالك انت حتبقي خيخة بصحيح ولا ايه في ايه مزعلك اوي كده كسارة البندق دي يا خيخة متنفعش في وجع الروح لانها لو ضغطت على الروح تطلع والعياذ بالله بصي لشريف وفكري فيه حتلاقي نفسك عندك احساس بالسكينة والراحة والرضا فكري بنعم الله عليك ومتفكريش في الي مزعلك علشان ترجع لك حالة الرضا تاني وخدي بالك متكتريش من الكيتوفان لان بعض الناس بيجيلهم منه قرح وسلامات يا خيخة

محمد عتلم said...

صباح الخير يا خيخه
انا جاى امسى عليكى

7BiBeT ABDO said...

ربنا يعافيكى يا خيخه

ويشفيكى ومتحطيش راسك جوه كساره البندق تانى


دومتى متميزه يارب يا حبيبتى

وصحيح عاوزه احط الاسامى دى فى الناس اللى يتعملها عمره بس مش عارفه احطهم ازاى

جنات عبد الغفار
وجيهه ابو مسلم

بصراحه said...

ياااااااااااااااااااااااه
دا انتى منفعله من جواكى اوى
عارفه
انتى كده اول مره تكتبى بجد ومن القلب
عارفه يا خيخه
انتى لا خيخه ولا حاجه
بس فيه حاجه مهمه جداً وقعتى فيها:
اوعى واياكى مهما كنتى مخنوقه او متضايقه او خلاص عايزه تكتبى وخلاص ، اوعى وحزارى واياكى ، انك تلغبطى فى حاجه لها علاقه بالدين
زى (ساعات بحب اكفر للحظه وارجع تانى ، او تقولى انك شغلتى اغنيه وكان تأثيرها احسن من القرآن )
اوعى اوعى اوعى.
فقد بقول المرء (الكلمه) لا يلقى بها بالا فيهوى بها فى النار سبعين خريفاً.
واوعى تطمعى حد من الكلاب اللى مش محترمين فيكى .
" يَاأَيُّهَا الَّذِينَ آمَنُوا لاَ تَتَّخِذُوا بِطَانَةً مِنْ دُونِكُمْ لاَ يَأْلُونَكُمْ خَبَالًا وَدُّوا مَا عَنِتُّمْ قَدْ بَدَتْ الْبَغْضَاءُ مِنْ أَفْوَاهِهِمْ وَمَا تُخْفِي صُدُورُهُمْ أَكْبَرُ قَدْ بَيَّنَّا لَكُمْ الآيَاتِ إِنْ كُنْتُمْ تَعْقِلُونَ "

اهو واحد منهم بشرك بالذى يسوء
""ماركيز" أو "لاورا اسكيبل"
ملحدين وعلمانيين
اوعى تنى ابداً ان ربنا اكرمك بقرأ كتير اوعى تبقى منبر للشر بينهم من غير ما تحسى او تخلى حد يطمع فيكى

عموما انا طولت اوى
بس ربنا يحفظك ويهديكى ويصلك ذات بينك
ووالله انا اتعاطفت معاكى خالص خالص من باب التفاعل مش شفقه طبعا ولا صعبتى عليه .
وهرج واقولك ان كلام فعلا طلع صح وانتى كنتى جايبه اخرك وانا كنت عارف فعلا بالظبط انتى حالتك ايه
واخيرا برده مش هتخسى يا باكبوزه

Anonymous said...

عزيزي الأستاذ صراحة:

أحترم رأيك وبشدة بخصوص خوفك على الأستاذة نوران من تحمل تبعات أمور وأوزار هي في غنى عنها ولا تقصدها. ولكني أختلف معك في الخلط بين العقائد الدينية والأدب. الأدب رقي، وأنا جل ما تمنيته للأستاذة نوران أن ترقى إلى أعلى مراتب الأدب في مجال الواقعية السحرية كما فعل "ماركيز" و "لاورا اسكيبل"، وخاصة وأنا أرى في نوران تربة خصبة يمكن أن تطرح زرع أدبي غني ووفير. وأخيرا يا أستاذ "صراحة" منذ متى ونحن كمؤمنين ومسلمين مخولين بقذف الناس جزافًا، أو حتى عن حق، بالإلحاد والكفر؟ استغفر الله يا أخي، فقد يقول المرء كلمة لا يلقى لها بالاً فيهوى بها في النار سبعين خريفاً.

ولك مني وافر الاحترام

فاتيما said...

الشجن النبيل يا نونو
الشجن
النبيل
هو دا اللى بقول عليه
انتى بتجسدى حنينك لبابا
فى كل حاجة حواليكى
تعرفى أبويا أساسا من إسماعيلية
و فيه موقع الكترونى هناك كتب عنه فى ذكرى وفاته مقالة ....
و بابا مات من سنتين
ومع هذا كل يومين تلاتة أروح للينك بتاعها أقراها رغم إنى عارفة كل اللى فيها و ممكن اسمعهولك حرف حرف
سبت تعليقين لبابا هناك يوم عيد ميلاده و ف يوم ذكرى وفاته الاولى
مع إن محدش غيرى بيعلق
و لا تقريبا بيقرى ...
بس بحس إنى عاوزة أكتبله و أقوله اى حاجة فى بالى
كتبتله كلام مشابه لكلامك
إنى مقدرتوش حق قدره
و كان نفسى يكون موجود عشان يوسف
و يبقاله الملاذ و الحضن ....
عارفة مأساة حياتنا إيه يا خوخة
و من الآخر
إن مفيش مثل أعلى مقارب لبهابهاتنا دول خالص ...
مفيش حد بعدهم ممكن الواحد يعتمد عليه و يحس إنه هيبقى ضهره و يستخبى وراه ساعة المصايب ....
حتى لو اخوتنا الرجالة
حاولوا مخلصين ...
برضو الأب له مكانة محدش يوصلها ...
تعرفى اوقات بحس إن بابا دا كان عملاق و الله ...
النهاردة مثلا روحنا نصلح الكاسيت عند الناس ف العتبة ...
الراجل اللى بيصلح طلع عينينا
و غلبنا على مدار تلات تيام كل مرة نروحله يقول تعالوا بكرة تعالوا بكرة و النهاردة
قعدنا جنبه تلات ساعات ف الشمس
و فى الآخر روحنا البيت
و الكاسيت برضو متصلحش كويس
إفتكرت ف فيمتو ثانية
بابا
قولت بكل ثقة لو بابا اللى كان راحله بالكاسيت كان زمانه إحترمه قوى و صلحه زى الألف و عمله ألف حساب
مش مسألة إستقواء و إن بابا كان مفترى ولا حاجة
لأ
إحساس إنك وراكى راااااااجل بجد
و إنتى مسنودة على حسه
حسه اللى محدش يعرف يبقى زيه مهما حصل
و مهما الواحد كبر و بقوا عياله طوله
عيشى الشجن النبيل يا خوخة كما شئتى
و اعذرى اللى بيصبرك مواسيا
و بيطلب منك تنسى
و تنشغلى لأنه معذور إنه بيحبك
و عاوز يجنبك الالم الدائم
و ميعرفش إن اللى إنتى فيه دا جزء من التركة اللى باباكى سابهالك
مع إسمه اللى بعد إسمك طوالى
جزء من التركة إسمه الذكريات
فيه ناس بتنطش الجزء دا اوقات
و تكبر دماغها
و فيه ناس بتتلقفه بكل حب و حنان
و تخده فى حضنها زى ما بتاخد طفل بيبكى و تحاول تهدهده
أنا من الآخر بحبك
و بحب شجنك النبيل
و كسارة روحك هيا روخرا
و متنسيش اللقاء الحريمى يا خوخة
لو سمحتى
و معلش لو طولت عليكى يا حبيبتى

7BiBeT ABDO said...

ميرسى يا خيخه انك حطيتى الاسامى بس فى تعديل بسيط انا الاسم التانى مش
وجيه ابو مسلم

ده اسم امرأه اسمها وجيها ابو مسلم

وميرسى ليكى اوى وربنا يديلك على اد نيتك انتى ومنذر ويجعلو فى ميزان حسناتكم

بت خيخة وأي كلام said...

انا كنت هانشر البوست الجديد دلوقتى

قلت بس اكتب كلمتين هنا لصراحة ولمجهول

قبل الدنيا ما تولع وتبقى خناقة والعياذ بالله


اولا
صراحة
مقدرة كل كلمة كتبتها
بس بصراحة ياصراحة
التعليق المجهول اللى بشرنى
انا اعتبرته تعليق كويس وحاجة حلوة
انا ماشوفتش فيه الجانب الى انت شوفته
انا شوفت فيه واحد بيتمناتلى انى اخد جايزة فى الادب زى فلان الى خدها


انا حسيت انك خدت تعليقه انه بيبشرنى انى هكون كافرة مثلا والعياذ بالله


لنفترض ان واحد بس الى خد جايزة عالمية فى مجال الادب
والى خدها ده واحد اسرائيلى ابن كلب

وجه واحد نيته سليمة وقالى يارب يا خيخة تاخدى جايزة فى الادب زى فلان الى خدها

هو هنا لا يقصد انى اكون زيه فى اسرائليته

هو هنا يقصد اكون زيه فى موهبته الادبية

فامعتقدش ابدا ان المجهول كان يقصد اى شر
لو حسيت كدة للحظة كنت مانشرتش تعليقه من الاساس

وعندا فيك هاخس برضه يا صراحة

ارجو ان كلامى مايكونش زعلك

وكلامك انا مقدراه وفهمها كويس





المجهول

شكرا ليك
وعلى توضيحك لرايك للاخ صراحة




فاتيما
لا تعليق على كلامك يا حبيبتى
والبوست بتاع اللقاء نازل حالا




حبيبة عبده
من عنيا
حالا هاعيد نشر الاسم صحيحا



شكرا ليكم كلكم والعبوا مع بعض ماتتخانقوش

Anonymous said...

بصراحه يقول:
بكل بساطه (وبصراحه)
انا مش عايز الموضوع يقلب بخناقه ، بس كل ما فى الموضوع انا كنت خايف على خيخه.
لان كل ما فى الموضوع ان فيه ناس كتير اخد جوايز فى الادب مش لازم يعنى مجال الواقعية السحرية كما فعل "ماركيز" و "لاورا اسكيبل"، يعنى الدنيا ما ضاقتشى يعنى الا على شيوعيين وملحدين ، اكمن الغلبانه طلع منها كلمتين ما تقصدهمشى استغفر الله لى ولها عليهما، يبقى خلاص يعنى.
وبصراحه اكتر عجبتنى كلمة مؤمنين ومسلمين فى:
"ستاذ "صراحة" منذ متى ونحن كمؤمنين ومسلمين مخولين بقذف الناس جزافًا"
مش مسلمين بس يعنى .
اتمنى اننا كلنا نبقى فهمنا.
عموماً حصل خير
ويارب يا خيخه تاخدى احلى واكبر جايزه فى الادب العربى اياً كان تخصصه اللى ترفعى بيه رايت الاسلام وعز المسلمين .

قولو امين

بصراحه said...

اه سورى
نسيت اقولك يا خيخه
برده مش هتخسى وابقى قبلينى ، ولو مش مصدقه اراهنك على 75 قرش

users online