Wednesday, May 20, 2009

شاي العصاري


بعد العصر فى البلكونة
هى تجيب صنية الشاى
فوقيها كوبايتين شاى
وهو ياخد منها الكوبايتين
يسندهم على سور البلكونة
هى تروح تودى الصنية المطبخ
وهو يجيب كتاب ويقرا منه مقاطع متفرقة
النهاردة الكتاب عن النكت
لعبد العزيز البشرى
هو يقرا موقف كوميدى من الكتاب
ويضحكوا سوا
ويقرا موقف تانى وتالت و....... الخ
والنكت تجيب ذكريات لمواقف مضحكة
وفى وسط ضحكهم تقوله
فاكر يا جمال لما حصل
كذا وكذا وكذا
وهو يفتكر ويضحك
ويقولها طب فاكرة يازيزى
لما حصل وحصل وحصل
ويضحكوا سوا
مافيش حاجة بتقطع كلامهم وضحكهم
غير شقاوة العيال
لما جمال يشب براسه شوية
ويبص من فوق راسها ويقول
بلاش يا ولاد تشبوا على السور كدة
او زيزى تقولهم على مهلكم وانتوا بتجروا
علشان رجليكم ماتتخبطش فى الشيش
او جمال يقول بلاش تقفوا على السور بركبتكم
او زيزى تقول ما تصوتوش وانتوا بتضحكوا كدة
ويكملوا دردشتهم مع رشفات من كوباية الشاى
والدنيا تبتدى تليل
وصوت المؤذن يجلجل وهو بيقول ادان المغرب
وده معناه ان خلاص القاعدة على وشك الانتهاء
وانهم هيقوموا يصلوا المغرب
********
فى بعض الاحيان تتغير بعض التفاصيل
وجمال بدل ما يقرا من كتاب
كان ينطق بابيات من الشعر
هو لسة مألفها حالا
وتلاقيه بيتمتم بعبارات وجمل غير مفهومة
وده معناه انه بيحاول يظبط القافية فى سره
قبل ما يعلن عنها بصوته الرخيم
ويقوم جمال يجيب ورقة وقلم
ويبتدى يكتب اللى جه فى دماغه
ويبتدى يعلن عنه لزيزى
النهاردة القصيدة رومانسية فى حب زيزي
*********
نفس المشهد ده كان بيتكرر بصورة يومية تقريبا
مافيش حاجة بتتغير
غير السنتيمترات اللى بتضاف لأطوال العيال
وغير عنوان الكتاب اللى فى ايد جمال
او نوع القصيدة اللى مألفها
وبدل ما تكون رومانسية
تكون سياسية من العيار التقيل
********
هى كانت تقعد تراقبهم بقصد او بدون قصد
لكن الاكيد ان غصب عنها
كانت بتتحفر المشاهد دى جواها
وعلى اثر المشاهد دى كانت بتاخد قرارات
هى قررت انها لما تكبر
لازم تعيش فى شقة فيها بلكونة
لأنها اقتنعت ان البلكونة مهمة جدا لشرب الشاى
امال هتشرب شاى العصر فين؟
وكمان لازم تتجوز واحد
يعرف يقول كلام موزون
فيه عبارات فيها كلام حلو
وبيقشعرها من جوة
زى الكلام اللى جمال بيقوله لزيزى
ولما سألت زيزى ايه الكلام ده
زيزى قالتلها ده شعر
فقالت فى عقل بالها
اييييييييييييييييون
هو الشعر ده
انا عايزة أتجوز واحد يقول فيا شعر
********
السنين عدت
والعيال كبرت
وجمال شعره بقى رمادى فى ابيض
وزيزى قفلت البلكونة
********
السنين عدت تانى
وهى كبرت
وعاشت فى شقة مافيهاش بلكونة
واتجوزت واحد بتحبه
لكن مش بيقول فيها شعر
وجمال مات
وزيزى كتبت قصيدة فى حب جمال
اما البلكونة
فبقت زي مخزن محطوط فيه كراكيب
وشاى العصارى
بقى مجرد ذكرى من الزمن الجميل




إنتهى

بت خيخة وأى كلام

42 comments:

احساس طفلة محبة للرومانسية بس واقعية said...

الذكريات القرارات تحكم الدنيا فينا
مش كل حاجة عايزنها بنأخدها

تأثيرهم علينا الواقعية الشديدة اللى بداخل كل واحد فينا

اسلوبك السلس السهل الممتنع الخفى والواضح

اقولك اية يا خيخة
فى بوستات ليكى بجد فيها بصمتك
وبوضوح بتعجبنى جدا
وبحب اسلوبك فيها


تقبلى مرورى

Ahmed Talk said...

قصة حلوة وإن كان فيها شوي حزن في اﻵخر

رحله البحث said...

انا زرت مدونتك من زمان ولكن كويس ان ايدى جابتنى هنا تانى
باحييك على الفيلم القصير اللى انتى عاملاه فى البوست ده
جميل جدا

قوس قزح said...

دوام الحال من المحال يا خيخة

و يمكن الحلم متحققش علشان يفضل حلم جميل خاص بناس معينة قريبين لقلبها

ذكرى لها منهم

تحياتى

أبو حمزة said...

حلوة أوي يا نوران :)
بس الله يكرمك بلاش سيرة البلكونات
أحسن انتي كدة بتيجي على الجرح :)

بت خيخة وأي كلام said...

ابو حمزة

اه صحيح ده الحال من بعضه


والنبى يا علوة وحياة عيالك
لو لاقيت اى فرصة انت او دودو
انكم ترموا حتة لحمة مسمومة
للكلب بتاع امبارح
ابقى اعمل كدة
وليك عليا ابقى ادعيلك ان ربنا يكرمكم بشقة فيها بلكونة

77Math. said...

مسّتني قوي، وإن كنت حاسة انك بتحكي عن نفسك :-s

بت خيخة وأي كلام said...

على فكرة يا جماعة
دى مش قصة

دى سرد لاحداث واقعية
من ذكرياتى الخاصة

Appy said...

اول ما قريت العنوان من الريدر عندي كنت داخله اقولك تعالى اشربى معايا الشاي فى البلكونه المتر فى متر اللى عندي
واطلع لكي لساني

بس لما قريت عنيه دمعت عارفه ليه لانى اتمنيت ده مع شخص ومش عارفه هقدر ولا لا الخوف من الذكريات بيوجع الخوف من الحب فى حد ذاته بيوجع
وجعتينى

بت خيخة وأي كلام said...

بتنجانة هانم
ابى سابقا

يعنى ايه مش عارفة هتقدرى ولا لأ

روحى قومى اتصلى بالشخص المقصود
وقوليله انا عازماك على كوباية شاى عندى فى البلكونة

قومى اتلحلحى وبلاش تقعدى زى خيختها كدة

اتحركى بدل ما يجى يوم وتتمنى انك كنت عزمتيه على كوباية الشاى

ممكن اليوم ده يجى
وتكونى الظروف ساعتها مش نافعة انكم تقعدوا فى البلكونة وتشربوا الشاى مع بعض


قومى يا بت اتلحلحى

و ماتنرفزنيش

فاتيما said...

يا آصالة و رقة ذكرياتك يا خيخة
لما قريت إسم جمال و زيزى فهمت طوالى إننا هنقرى فصل
من فصول حكاية جميلة
و أصيلة لعائلة مصرية عادية
حقيقية
بتوصف حال الطبقة الوسطى فى مصر
و اللى قربوا ينقرضوا
بفعل التشويه و المهانة و مبقاش حد يتكلم عنهم بصدق
و الله المفروض كل البوستات دى
تتنشر ف كتاب و ليكن عنوانه
حكايات بت خيخة و أى كلام
إنتى بتحكى بلسان حال بنات جيلنا
يا خوخة و لازم اليوميات دى
تتوثق فى كتاب
بوسة و حضونة و أشوفك بكل خير يوم الجمعة الجااااااااااااى

شباك موارب said...

الله الله
جميله اوي بجد
حاسه اني كنت بقرا وشايفه المنظر قدامي وكاني بتفرج عليه او كانهم عندنا في البيت....

حاسه انك بتحكي حاجه بتحصل عند الكل


بمناسبه الشعر
انا بموت في الشعر
وبموت في اللي يعرف يقول شعر بجد


تقبلي مروري

منار فايد

حنين القلب said...

الله يا خيخه

الانسان حياته عبارة عن شويه ذكريات منها الحلوة ومنها المؤلمه بس انسان من غير ذكريات يبقى اكيد مش عاش

كنت اتمنى اكون معاكم فى اللقاء يوم الجمعه بس يا خسارة مش ليه نصيب بس انا معاكم بقلبى

تسلم ايدك يا خوخه ووحشانى والله

همس الاحباب said...

ذكريات
كل يوم مضى فهو ذكرى
ولكن ذكريات الطفولة والاسرة تظل عالقة بالاذهان
اجمل ما فى القصة انها واقعية وتمت بالفعل
وسردك لها جعلها درب من الخيال
تعيشى وتفتكرى يا خيخة
تحياتى

وومن said...

خوخة انا عرفت لوحدي انك بتتكلمي عن عمو الله يرحمة وطنط مش استاهل جايزة بقي
:)

بجد بجد الله عليكي وعلي ذكرياتك ماشاء الله ونعم الأب والأم

ربنا يكرمك يارب وتكوني احسن خلف لأحسن سلف

علي فكرة احتمال كبير اكون بهيس علشان لسه جاية من الإمتحان بس البوست ده بجد عاملي حالة إنبساط كأني اتفرجت علي فيلم أبيض وأسود
وعشت سحر اياااام زماااااان

ياااااااااااااااارب تجيبي شقة ببلكونة

ويكا said...

مش قلتلك انك فعلا بنت خيخه
على فكره
انا عايز اقلك حاجه وتقتنعى بيها لانى فعلا والحمد لله بفهم فى الشخصيات جدا
انا من زكان عايز اقلك تكتبى قصص رومانسيه قصيره
وانا باذن الله اضمنلك جايزه بجد كبيره
لحظات لا تنسى
ومشاعر لا ترد
وقلوب دافئة
وعائله من الزمن اجميل
وكلمات ليست كالكلمات
وامال واحلام
وانه الحب
وكلمات دافئه
كل هذه الكلمات اجدها عنواناً دافئاً لتلك المشاعر الدافئه الحانيه.
اجدها تعبر عما بداخلى تجاه تلك القصه.
فانها لا تكاد ان تختفى من هذه الحياه القاسيه ، المادية الجافه.

خيخه
مشكوره
على الاحاسيس التى وهبتيها لنا اليوم.
ملحوظه بسيطه نقديه : كان سيضاف للجمال جمال اذا جعلتى القصة رمزيه اى لم تسمى فيها اسماء حتى ولو كانت من الواقع .
فبدلاً من "جمال" كنتى كتبتى "هو" وبدلا من "زيزى" كنتى كتبتى "هى"
حاولى كده تقريها تانى باستبدال الكلمتين دووول وانتى هتحسى بالفرق.

ومع ذلك عايز اقولك حاجه مهمه:
انتى برده خيخه وهتفضلى طول عمرك خيخه واوعى تنسى الخمسه جنيه

بت خيخة وأي كلام said...

ويكا

اه هتبقى أجمل من غير أسامى
علشان هيكون فيها غموض

بس انا بشتاق انى اقول اسمه

مش عايزة اتكلم بضمير الغائب

بصراحه said...

ربنا يغفربه ويتغمده بواسع رحمته
وكفايه انه جبلنا واحده خيخه عسوله بنعزها خالص
ولو بتحبيه فعلا حاولى تعمليله صدقه جاريه
او على الاقل صلى بالليل وادعيله
فده احسن هديه ممكن يهديها انسان لاى انسان , هديه ابديه
عمره ما هيسعد ولا يفرح باحسن منها

سبهللة said...

هايلة
فكرتنى ببلكونة مامتى قبل الجواز
كنت لازم اشرب الشاى بلبن فى البكونة بس لوحدى وممكن ااعقد فى البكونة لحد صلاة العشاءاو بعدها كمان
حاولت اعمل كدة فى بيتى اللى فيه بكونة اكبر من بكونة مامتى الا انى ساكنة فى شارع رئيسى والعربيات رايحة جاية والدنيا دوشة دة غير دوشة العيال
بحن جدا ليوم من ايام ما قبل الجواز

الشنكوتي الكبير said...

يقعد عمو جمال يوميا
يقرى كتابه ويشرب شايه
في البلكونه ساعة عصريه
يمكن يحكي حكايه قديمه
يمكن يكتب حكتى حكايه جديده
يحكي ويوزن في الكلمات
علشان تبقى حكايته الحلوه
شعر وغنوه
تثبت جوه دماغ اولاده
اصل حكاوي جمال الغاليه
مش معموله علشان تتسلوا
دي خلاصة افكاره وعمره
حب يسيبها تبقى هدايه
تمشوا عليا وتبقى حكايه
زي ما كان بيخطط ليكم
تعملوا كل اللي يخليكم
احسن ناس في الدنيا بحالها
واد او بنت مهياش فارقه
عمو جمال بيحب الزحمه
كل ولاده عايزهم زيه
واد او بنت عايزهم يبقوا
اخلاق فرسان من المنقرضه
زيزي بتسمع منه وتضحك
عارفه القصه وفاكرة الذكرى
حضرت ويا بحكم العشره
كل حكايه شافوها بفرحه
او بعيون مخنوقه بدمعه
كده او كده كلها بتاعتهم
ذكرى جميله او ذكرى بتوجع
الموضوع مش بالبلكونه
عمو جمال او طنطك زيزي
لو مكانوش يملكوا بلكونه
كانت برده القعده الحلوه
راح تتنقل جوه الشقه
في اوضة النوم او فوق الكنبه
جنب دولاب او تحت السلم
اصل الصحبه هي الفارقه
لما هيقعدوا يشربوا شايهم
برده هيحكوا وياخدوم بالهم
من الوادهم لحسن يقعوا
او رجليهم تيجي تتعور
يعني القصه مهيش بلكونه
فاهمه يا سكر انتي وبعلك
اعملي شاي وخديه واترزعي
فوق الكنبه الزيتي الحلوه
ايوه هناك في الأوضه البحري
اقعدي جنبي وامسكي يالا
هاتي كتاب واقريه وانسجمي
واحكيله انتي على قفشاتك
ما هو مش شرط تكون كزيزي
ممكن برده يا بنت الطيب
تاخدي مكانه وتصبحي انتي
عمو جمال بعيونه العسلي
اكتبي انتي مادمتي بتقري
اكتبي فيه اشعار وانطلقي
خليه هو مشاعره تقشعر
وانا متأكد زي ما زيزي
كتبت عنه ابيات حلوه
بكره هيجي اليوم متأكد
وهيكتبلك ابيات هبله
مش منتظمه ولا منسجمه
بس جمالها في انها انتي
شبهك برده عبيطه وهابله
وادي يا اختي نصيحتي الساذجه
وابقى هاتيلي معاكي يا اختي
حبة شاي بس من ابو فتله

=============================


خوخه اختي الغاليه ربنا يسعد ايامك ويحفظك انتي وشريف وهاني يا رب

احبكم في الله بجد

اخوكي ايهاب

سلاااااااااااااااااااااااااااااااام

resho said...

انا متابعك من زمان ومش برضى اعلق عشان مش هلاقى كلام احلى من اللى انتى بتكتبيه
بس النهارده لازم اعلق واقولك كلامك اتحول لكاميرا سينما بتصور فيلم ليوسف شاهين انتى ليه مبتحاوليش تكتبى سيناريو فيلم بس يكون هابط ونجيبلك السبكى ينتجهولك وتبقى البطوله مطلقه لعماد بعرور ومروى اما نعيمه ( طبعا بهزر )
بجد انا معجب جدا بتفكيرك وارائك واسلوبك فى الكتابة ربنا يوفقك ويزيدك

resho said...

البوست ده ينفع فيلم سينما ممكن نكلمك احمد السبمى ينتجلك فيلم من تاليفك واخراجك وتمثيلك ويكون البطل قدامك عماد بعرور ايه رايك
انا اكيد بهزر محدش يضرب بجد اسلوبك فى الكتابه جميل جداا وانتى اصلا انسانة غاية فى الطيبه والجمال ربنا يوفقك ويزيدك

Soma said...

جميله ذكرياتك وجميل اسلوبك
احيك علي الكلمات الحلوه اللي تمس القلب وترجع بالسنين لورا


نفسي اجي معاكو يوم الجمعه بس مكسوفه عشان حاسه انكو مش هتبقو عارفيني

بت خيخة وأي كلام said...

الشنكوتى الكبير

وانا بقرا التعليق بتاعك وهو لسة جوة المودريشن
كنت عمالة اضحك واعيط

واقول فى عقل بالى
الواد ده فظيع يجنن
عايزة اديله حضن اخوى شكرانية منى

اصل لو اسر هو اللى عمل كدة
كنت هاقوم من مكانى
وهاديله حضن اخوى
وانت اخويا يا ايهاب


ربنا يخليك ليا يارب
شكرا يا هوبة










سوما
يعنى ايه عايزة تيجى بس مكسوفة؟

يا بنتى الناس اللى جاية مش كلنا نعرفها
فيه بنات اول مرة تيجى
وهو ده الهدف من اللقاءات الحريمية
اننا نتعرف على بعض
والى منعرفهوش نعرفه
واللى نعرفه نزود معرفتنا بيه

والله انا هازعل بجد لو واحدة عايزة تيجى ومكسوفة

تعالى يوم الجمعة وهنبقى عارفينك
انتى بس اسالى على خيخة
واول ماتشوفينى قدامك
قليلى انا سوما المكسوفة
وانا هاخلى الكسوف ده يروح منك نوهاااااااااااائى

الشنكوتي الكبير said...

والله يا ستي هو انا وآسر برده واحد يعني تقدري تروحي تدي آسر اخونا حضن جاااامد واعتبريه وصلي برده

هو لما يقابلني يبقى يدهوني بقى

اما الضحك والعياط فهو ده اللي كان مطلوب يا خوخه

قلت اضحكك وابكيكي
لازم تبكي علشان الضغط اللي جواكي يفك شويه
ولازم تضحكي علشان نفسيتك تبقى فله وتعرفي تروحي اللقاء منشكحه كده

الحمد لله يا ستي ان الكلام عجبك ولو اني اكتشفت اني عندي غلطات املائيه بالكوم وغيرت تلات اربع كلمات
ادي اخرة اللي يدوس انشر من غير ما يراجع التعليق
ربنا يسعد ايامك ويهنيكي

ومتنسيش الشاي الفتله بتاعي لو سمحتي


سلاااااااااااااااااااااام

اخوكي ايهاب

ست البيت said...

من ساعة ما قريتها عرفت انها لوالدك الله يرحمه ووالدتك
ربنا يخليهالك
ع باب البلكونة
أم وأب وولاد دايرين
لعب ف لعب
واخدين الددنيا هزار مش جد
وبنت صغيرة
قاعدة تفكر في ابوها واقف يكتب شعر
زاوها قاعدة بتتأمل
وخيالها يروح
لبعيد لبعيد
تحلم بحصان أبيض
وعليه
فارس مش زي بقيت الناس
فارس ف الكلمة وفي الاحساس

بس الايام مش زي ما كنا بنتمنا
كبر حكايتها قدامها
من غير شاعر
وفي يوم عدت قدام البيت
افتكر حواديت
هنا وهناك
وحشها البيت واللمة
ووحشها شاي العصرية
وكلمة احساس
وولاد حوالها وقدامها

معلش يا خيخة
حال الدنيا

Kareem Brakat said...

الله عليكي
الله
الله عليكي

MǿиY El-Shreef said...

فعلا مش كل حاجه بنبقى عايزنها واحنا صغيرين ينحققها

لكن هفرح اوي لو كان حلم زي ده اتحقق

القصه دي فيها من كل حاجه حته

تخليكي عايزه تتبسمي وتدمعي سوا

جميله اوي يا خيخه

تسلم اديكي

صاحب المضيفة said...

رحم الله الجميع وأسكنهم فسيح جناته

وبارك لك في عمر والدتك ورزقك برها يارب

ورزقك السعادة والهنا أينما وجدت يارب

Soma said...

بجد؟
ماشي اهو يبقي رايحه وفي حد اعرفه احسن ما ابقي مش عارفه حد خالص


ميرسي ليكي يا خيخه
بس ايه خيخه ده؟
شكلك اصلا جامده اخر حاجه

Adam said...

الذكريات الجميله ذائما وابدا

تحياتي لاسلوبك الجميل

اتمني مرورك علي مدونتي

ادم

Anonymous said...

التغير من سنن الحياةلابد ان نقبل بذلك
عبد الجليل

عبد من عباد الله said...

عجيبة انتي يا نوران ...

ربما كلامي ده حد قلهولك قبل كده بس حقيقي لازم اقولك انك رجعتيني سنين لورا و نفس منظر البلكونه و الشاي و و شمس الاصيل ( شمس المغربيه ) و صوت العربيات الخفيف مع بعض نسيم الهوا و الكلام اللي الواحد مش قادر بظبط يفتكر منه حاجه غير انه كان بصوت واطي و مفيهوش زعيق و لا اعتقد بالنسبه ليا انه كان فيه شعر بس كنت بحس في الجو ده ان كان في امان انا لحد دلوقتي بشتاق اليه .... الله يجازيكي يا استاذه نوران .

زي ما قولتلك يمكن يكون كلامي ده ميت واحد قالهولك بس حقيقي كنت لازم اقوله .

أنـــا حـــــــــرة said...

اى

حسيت انى اخدت قلم على وشى بس ده مينمنعش ان النهاية منطقية ، بس مش لازم تلاقى حد فيه مواصفات احلامك بالحنتوفة المهم تلاقى حد يحققلك سعادة ف الواقع حتى لو بطريقته هو

Soul.o0o.Whisper said...

السلام عليكم و رحمة الله و بركاته

خيخة

أحلى حاجة فى حياة الانسان الذكريات الجميلة اللى بتفضل محفورة جواه

و يفتكر ايام زمان


و أحلى حاجة فى الحب انك تلاقى التفاهم مع الانسان اللى تحبيه
و يحسسك بقيمتك فى حياته

و بردوا هتلاقو ذكرايت حلوة تضحكوا عليها

و يمكن مش بيقول شعر
بس أكيد بيقولك كلمة حلوة
أو بيعبر عن دا باسلوب جميل
أو هدية بسيطة فى تمنها لكن كبيرة فى قيمتها


ربنا يسعدك يارب يا خيخة




خالص ودى

hasona said...

السلام عليكم

الحياة عندما تكون لها منهج
عندما نستمع بها
ونكون بها ايجابين

نصنع منها ذكريات جميلة
وماقف ووقفات
نقف عندها طول الزمان

أحساس لسه حى...كلام من جوه روح لكل روح said...

عزيزتى

جميل اوى الروقان والهدوء فى الحياه

ويمكن الهدوء فى التعامل بين الرجل والمراه يولد حب

ومش مهم اننا نتجوز واحد بنحبه

الاهم ان الحب ده يكبر بعد الجوار ويعيش

ومش مهم نتجوز واحد مش بنحبه

المهم اننا ما الوقت نبتدى نحبه

تعليق بعيد عن الموضوع يمكن

بس التعليق جه كده

تحياتى

سلاااااام

Diyaa' said...

ما لا يؤخذ كله لا يترك كله :)
الحمد لله إنها لقت واحد بتحبها
وربنا يرزقها بالشقة اللي فيها البلكونة :))
وأحياناً الأحلام بتبقي أجمل في قالبها كده

المهم أنا عندي شقة ببلكونة :)) للبدل بأعلي سعر :)))))))))))

تأثير الفراشة said...

يااااه

بجد جميلة جدا و أسلوب كتابتك فيها حلو قوى، اتأثرت بها فعلا

ربنا يوفقك دايما و يكرمك

تقبلى مرورى، تحياتى لكٍ

ويكا said...

خيخه (0وش واحد بيعيط) الحقينى

واحد دخلى عندى على البوست ده
http://besara7aa.blogspot.com/2009/04/blog-post_9362.html
وعمال يسلخ فيه وف المونين كلهم.
اناا عايزك تضربهولى
لانك اخيخ منى بكتير
ولسانك ما يتوصاش
ياريت تيجى تديله وصلت خيخه عربى وافرنجى لما يبطل يدخل تانى

اللنك اهه تانى هتلاقى كلامه فى التعليقات

http://besara7aa.blogspot.com/2009/04/blog-post_9362.html

مستنى اشوف دم
بجد
لان انا حاسس لو رأيه ده ينفع يقى عليه
ما ينفعشى على مدونين كتير وانتى منهم بصراحه

بس على فكره
ده ما يخلينيش اغير رأى فيكى فى اهم نقطتين :
1. انك مش هتخسى برده.
2. انك خيخه واى كلام

سلام

صبرني يارب said...

الواحد جايز اوي يحلم احلام كتير

ممكن يحققها وممكن لا

ممكن ياخد جزأ منها ويتنازل عن الباقي بمزاجه
وبرضاه ويقول الحمد لله انى قدرت على الباقي


البلكونه مش هى الى خلتهم سعداء

والشعر مش هو الى يخلي الواحد جسمه يقشعر بس

وبعدين بتهيئلي يا اختي ما عادش فى رجاله فاضيين يشربوا شاي العصاري

هيييييييييييييييه دنيا

الله يرحمه جمال ويصبرها زيزي ويعوض علياه

ودوام الحال من المحال

جاجور ليدر said...

بلاش سيرة الشاى ياجدعان الشاى دا اقبح مشروب على وجهة الارض بيحرق اى طاقة فى جسم البنى ادم وخصوصا الحديد وحمض الفوليك خليكو فى عصير القصب كلة زى الفل ... حلو كلامك ياخيخة

users online