هي طلبت منه يبعد
علشان ترتاح ... في حياتها
وبثقة شديدة منه
وافق هو على طلبها
بعد ماسابها ونزل من البيت
شالت فيشة التليفون
وقفلت الموبايل
دخلت الحمام تستمتع بدش بالمية الساقعة
واحساس السيراميك الساقع تحت رجلها
بيدغدها ويحسسها براحة الحرية
تلبس برنسها
وتسيب شعرها مبلول
من غير ما تنشفه بالفوطة
تفتح المروحة وتقف قدامها
تغمض عنيها فى نشوة
أصلها بتعشق الهوا الساقع
تبص للمروحة وتردد كلمات
شجرة _ بير_زرار
بتحب تسمع صوت الكلام
اللي فيه حرف ر
وهى بتنطقه قدام المروحة
روحها بتتزغزغ لما تسمع الصوت ده
علشان بيعمل صوت لذيذ
صوت زي تكسير بسكويت
او قرقشة خيارياية صابحة
شعرها يبطل ينقط مية
لكن مازال مبلول
تكح كحة صغنونة
نفسها الكبيرة العاقلة تقولها هيجيلك برد
نفسها الصغنونة الشقية تهز اكتافها
و تقولها مش مشكلة
تقرر انها تفضل لابسة برنسها
ومش هتقيد جسمها
بأساتك أندر وير ولا حمالات برا
ومش هتسرح شعرها
هتسيبه ينشف بجنونه
مجرد لمسة من زبدة الكاكاو على شفايفها
ولحسة صغنونة من كريم مرطب على خدودها
ولوشن بريحة الورد على باقى جسمها
وخلاص على كدة
تعمل لنفسها مج كاكاو سخن ملهلب
وتشغل الكمبيوتر على أغنية
بتعشق الأغنية دى
بتسحر روحها وبتدوبها
وبتاخدها لعالم فى خيالها
مافيهوش غيرها وغيره
تقعد فى سريرها
و تطفى نور الاباجورة
وتحضن مج الكاكاو بايديها الاتنين
وتمزمز فيه بروقان بال
وبإستمتاع بوحدتها
يخلص الكاكاو وتتعاد الاغنية
تحط المج على الكمودينو
وتقلع برنسها
وتحت الكوفيرتة تغطي جسمها
المتحرر من كل الأساتك
ورغم تحرر جسمها
اللى خلاها تروح فى النوم
إلا انها كانت محتاجة
بوسة منه فوق جبينها
علشان ترتاح ... فى النوم
إنتهى
بت خيخة وأى كلام
43 comments:
طيب ما كان ممكن تعمل كدا وهو موجود
مش عارفة اية المانع
الحرية من وجهة نظرى مش بس اننا نكون مع الذات بالعكس احيانا بتكون مع وجود شخص ما نرمى همومنا علية ونسبح معه بلا تفكير نكون بجانبة او معه اطفال
نتنفس الحرية من خلاله
وان كان وصفك للقصة رائع كعادتك فى القصص دى واحيانا كل انسان بيحتاج الانفراد ودا حقيقى
بس انا اختلف معاكى فى المضمون وليس الشكل :)
تقبلى مرورى
جميل الاحساس بالتحرر فعلا وخصوصا و انتى وحيدة فا انا اعشقة, جميل وصفك وهى قداام المروحة وبتنطق الكبمات فكرتينا يايام الطفولة, كلنا بنحتاج الاحساس دة كتيير علشان نطلع من واقعنا شوية, تحياتى
السلام عليكم
اما النهارده الخياخة جميلة اوي
ورحنا معاكي فالمشهد
بوست جميل
تقبلي تحياتي ومروري
حلوة بجد تسلم إيدك :)
لا أحبك ولا اطيق بعادك
و الراحة يبدو إنها فى ..عدم الراحة
البنى آدم مخلوق عجيب بجد
حلو قوى البوست دا
wow ya nouran 2eh dah ya bnty
3arfa
ana keter banam mn 3'eer hodom
ba7esaha mot3a
bravo bgad abda3ty fel post dah
رقيق اوي البوست ده
انتى فيكي حاجة غريبة اوي ومميزة جدا
لما بتحكي عن حاجة او توصفي حاجة بتقدري تخلي القاريء يعيش الحاجة اللى بتوصفيها ويحسها كانك بتوصفي القاريء نفسه
انا بحس انك بتاخديني من قدام الجهاز والاقي نفسي وسط الحكاية او الموقف اللى بتحكيه
تحياااااااااااتي بجد على اسلوبك
وتمنياتي بالسعادة
احساس قمه ف المتعه
عرفتي تنقليه بالملي ياخيخه
بجد انا نفسي حسيت بالراحه مع طريقة سردك دي
وعندك حق دايما بنحتاج البوسه دي :)
احساس جميييييل اوي
تسلم ايدك
..
ادي الشرح الي وعدتك بيه
http://monyelshreef.blogspot.com/
:)
شكرا خلتيني افوق من كسلي
حلوة قوى ، فهى طلبت منه يبعد عنها علشان ترتاح ، و فى النهاية تمنت أنه يأتى علشان ترتاح أيضا ، فكرة حلوة و معالجتها بأسلوب سهل و جميل و جرئ كمان .
خيخة خوخة مش عارفة هتفتكرينى ولا لاء عاااااااا
انا قلت اعمل مدونة عشان ازهق الناس منى
موضوعك حلو اوى عارفة ياخيخة ساعات بنبعد عن ناس بنحبهم وبتكون دى رغبتنا احنا بس بنبقى فى اشد الحاجة ليهم بس بيكون ليه اسباب ممكن الخوف عليهم او عشان منجرحش مشاعرهم
ملحوظة . بوسيلى الواد شيكو
رهيبه
وكل يوم بعجب بيكي اكتر
عجبني اسلوبك اوي
رغم انه مش فصحي
بس عبرتي بالعاميه بطريقه تهبل :)
هالوون خيخة
يعنى عايزة تقولى : اذا كان البعد يغشى البصر ولكنه يجلى البصيرة
وهاتى ربع جنيه ههههههه
احساس طفلة
ماكنش ينفع تعمل ده وهو موجود
علشان السيناريو كان هيبقى كدة
وهو موجود ماكنتش هاتقدر
تمارس طفولتها قدام المروحة
وتقول كلمة بير وشجرة وشريف وزرار
كان هايقولها كدة تاخدى برد ولو ماسمعتش كلامه كان هاينفخ فى قلة صبر من مراته اللى مابتسمعش الكلام
ماكنتش هاتقدر تفضل قاعدة
بالبرنس طول الوقت
لانه هايعتقد اعتقاد خاطئ
انها قاصدة انها تفضل
شبه عريانة قدامه
علشان تثيره جنسيا
فبالتالى كان هايتمحلس ويتدحلب
علشان يعمل هونجا بونجا معها
وهى مش عايزة ده
هى مش رافضة ده
لانها بتحبه
لكن هى مش عايزة هونجا بونجا
ومش عايزة يتفهم عري جسمها
بانها عايزة سيكو سيكو
وكانت لانها بتحبه كانت هتستجيب لمحاولاته فى الدحلبة و المحلسة
وكان هايحصل هونجا بونجا
وبعد ماتاخد دش وتغتسل كانت هتطلع
وتضطر انها تلبس بيجامتها خوفا من انها لو فضلت بالبرنش تتكرر الهونجا بونجا
وساعتها مش هانخلص بقى
وبعد ما تلبس بيجامتها وتقيد نفسها وجسمها بأساتك لا حصر لها
تلاقيه بيقولها يا سلام بقى لو عملتيلى فنجان قهوة مظبوط
وهى لانها عايزة ترضيه
ومش عايزة ترخم عليه
هاتعمله فنجان القهوة
وبعد فنجان القهوة
ماكنتش هاتعرف تنفرد بنفسها وتسمع الاغنية اللى بتحبها
لان صوت ماتش الكورة اللى بيتذاع على التلفزيون كان عالى ومغلوش على اغنيتها وعلى احساسها بالاغنية
ولو كانت فضلت خمس دقايق لوحدها
كان فى الدقيقة السادسة هايندهلها ويقولها ماتيجى تقعدى تتفرجى معايا ع على الماتش المزيكا ده
بدل اللى انتى بتسمعيه
او هايقولها هتغدينا ايه النهاردة
هى كانت هتبقى مبسوطة
او هتصدق انها مبسوطة
لكن فيه حاجة من جواها
هتكون مكسورة ومخنوقة
ولو كانت نامت ماكنتش هتشتاق
ولا هتحتاج للبوسة اللى فوق الجبين
بالعكس كانت هتتمنى انها تنام على كنبة الانتريه علشان ترتاح من صوت شخيره
علشان كدة يا طفلة
هى كانت لازم تفضل لوحدها مع ذاتها
هى كانت محتاجة انها تفضل لوحدها علشان تحتاجتحس باحتياجها ليه وباشتياقها لبوسة اللى فوق الجبين
تحياتى ليكى
كريم وسمسم وماث
وفاتيما وسولا وبسكوتة
ومونى الشريف وام بتول
ومى وميوية ودريم
شكرا ليكم كلكم على كلامكم الحلو
وعايزة اقول لدريم ان جملتك دى
رائعة
اذا كان البعد يغشى البصر
فإنه يجلى البصيرة
بعد إذنك
احتمال أخدها وأعمل تحديث للبوست
وأكتبها تحت بند أخر الكلام
وليكى عندى نص جنيه بحاله
شكرا ليكم كلكم على تواصلكم معايا
اختكم خيخة
ممممممممممممممممممممممممم
احيانا الاحساس بالوحده بيكون مفيد جداااااااا
كتير باحتاج له
وقليل لما بالاقيه
البوست بتاعك تحفه ياخوخه
روعه بجد
مش بقولك انتى من ادق التفاصيل بتعرفى تعملى حدوته جميييييييييله
يمكن هى كده اترحت بس برضه مش الراحه اللى هى كانت عايزه
توقعت تلك النهاية
لية توقعتها :S
يلا خير
سلام عليكِ
واحدة مفروسة
اممممممممممم ايه؟
عاشقة الرومانسية
شكرا ليكى
حلم كان
مافيش حد ابدا مرتاح
الراحة اللى عايزها
كل واحد عنده همه اللى مشغول بيه
نعكشة
مش فاهمة يعنى ايه ليه توقعتها؟
انتى مضايقة انك توقعتى النهاية؟
انتى كنتى عايزة ماتتوقعيش النهاية؟
طب ايه اللى مضايقك؟
ممكن تفهمينى؟
قبل ما امشى عايزة اقول
اني ملاحظة حاجة غريبة
عدد التعليقات على البوست ده قليل
لكن عدد الايميلات اللى جاتلى تعليقا عليه كتييييييييييييير جدا
انا يا جماعة جالى سبعة وتلاتين ايميل
وجالى هنا ستاشر تعليق
غريبة دى اول مرة تحصل بصراحة
رغم انى بحس ان كتابة تعليق اسهل
من ارسال ايميل
انتوا ليه اغلبكم
بعت قال رأيه فى ايميل؟
اللى مضايقنى بس ان الايميلات فيها مناقشة اكتر من التعليقات
وكان نفسى تبقى روح التفاعل والمناقشة موجودة هنا فى صفحة التعليقات مش على الايميلات فى السكرتة
والغريبة كمان ان كل الايميلات اللى جاتلى كانوا من رجالة
هنا التعليقات اغلبها من بنات
مافيش غير تعليقين بس
من رجالة هما كريم وسمسم
ياترى ايه السر
إن الرجالة خايفة
تقول رأيها فى العلن؟
شكرا ليكم كلكم على تواصلكم معايا
اختكم خيخة
خيخه انتى ايميلك ياهو ولا هوت؟
عايزه ابعت لك الميل بتاع شرح الموسيقى
لان طريقتى سهله جدااااااااا
لو ممكن ومفيش مانع اكتبى الايميل تانى فى الرد
هو عندى بس بيطلع لى رساله ان الايميل غلط
معلش ياخوخه هاتعبك
اموووووووووووووه
وااااااااو
بموت فى الكاكاو على فكرة :D
بس لازم الاساتك مينفعش ابقي من غيرها
إيميلاتي
h_nona2000@yahoo.com
nouranelshamly@hotmail.com
bet_khikha_we_ay_kalam@yahoo.com
اهو عندكم تلات ايميلات علشان ماتقولوش انى حرماكم من اى حاجة
في ساعات كتير بنبقا عايزين لحظات وحدة وصمت وبتفدنا جدا وبتدينا طاقة اننا نكمل. مدونتك رائعة واسلوبك حلو وياريت تنوري وتزوري مدونتي
احيانا بنحتاج للحظات من الوحدة والصمت بتلخينا نرجع بطاقة اكبر بجد مدونتك تحفة واسلوبك هايل واتمني تنوري وتزوري مدونتي
لذيذ جدا وصفك الواقعى للتصرفات التلقائية هى بدون قيود لا جسدية و لا معنوية، بس شوفتى إزاى فى الآخر هى كانت محتاجة لبوسة منه...
خوخه
انا بعت لك الايميل بتاع الشرح
على ال3 ايميلات
يااااارب يوصل
ولو وصل قوليلى ياقمر
ولو فيه اى استفسار بلغينى
ب ح ب ك
تعرفى احساس الحرية هو دا لو كلنا بنتعامل مع اهالينا مع زوجاتنا (ان حصل يعنى) مع اصحابنا بمنطقة الحرية دا ان كل واحد يبقى حر فى تصرفاته انه يستمتع بوقته من حقها تعمل كل اللى عملته طالما مبسوطة ومستمتعة
انتى بد اسلوبك ملوش حل ياخيخة هموت واعرف المغزى بتاعه الى الان معرفتش بس شكلها خلطة سحرية
تقبلى تحياتى اقولك بقى على المفاجأة
(عازب وأفتخر)
اوقات بيتهيالنا ان البعد بيريح وده فعلا يمكن صح بس لفتره وبتكون صغيره قوي وبعدها بيبدا يتعب وبنحتاج للقرب تاني و هكذا دي الحياه
نحتاج البعد علشان كل واحد يرتب افكاره لا اكتر
يالهوي عـ الجمال ..
انتي فنااااااااانه ..
انا عشت جدا فـ الحدوته الروووعه دي ..
مع اني معرفش حاجات كتير فيها يعني ايه ..
زي البرنس ده انا مش عارفه هو ايه بس شغال اعتبرته روب كده ههههههههه..
حقيقي حلوة اوي ..
وفعلا لازم يبعد شوبه عشان الصحه والزهق وكده ههههههه..
وحشتيني يا نونا وان شاء الله هحاول اكلمك قريب .. ادبرها بس ..
سلامزات يا احلى ماما لاجمل شريف ..
مش عارفة ليه بس حسيت انى عاوزة اعلق عندك من امبارح لان الموضوع ف بالى من ساعة مقريته
أولاً الموضوع انتى كتباه حلو قوى وفعلا فيه تفاصيل تحسسك بتعه وانك فعلا اللى بتمرى بالموقف ده ولما كتبتى التعليق بالتفصيل عن الرغبة ف عدم وجوده زاد الاحساس بالاستمتاع
من حين لآخر الواحد بيبقى نفسه ف لحظات فاصلة تبقى ملكه لوحده يبقى فيها حاسس انه حر جد يعمل اللى هو عاوزه من غير نفس لوامه تلومه او ام او زوج او اخ او اب يقولو كده كخ وعيب
الست لما بتتجوز بيجبروها تعتقد انها بقت ملك للآخرين وحريتهم وراحتهم ولكن بالعكس المفروض انها دايما تحافظ على مساحة ليها لوحدها تقدر تستمتع فيها بالحاجات اللى بتحبها علشان فعلا تقدر تدى اللى قدامها اللى هو عاوزه او تريحهم بالقدر المطلوب
المحافظة على لحظات المتعة الخاصة دى بتدى طاقة ممتازة علشان نقدر نعيش يومنا الجاى
اقعدى بالعافية بقى
سلام
هبة
السلام عليكم
ايه يا بنتي متخلي عندك نظر
روحي البروفيل وشوفي اذا بنت ولا راجل
..............
انت بجد خيخة يا خيخة
بجد روعة أوي التدوينة دي ..
مش عارفة
تقريبا بقت كل حاجة شبه بعضها عندي
لا أقصد والله اني اقول حاجة عن اسلوبك انا قولت لحضرتك من زمان انه بيعجبني
بس بقى كل حاجة حاسة انها حصلت
سيبك من تعليقاتي
اعتبريني باجي هنا افضفض و خلاص
سلام عليكِ
طب يا جماعة نظرا انى عند ماما
واللاب توب بتاع ماما
انا مش واخدة عليه
فامش عارفة اكتب براحتى
اصبروا عليا لحد مارجع اكتوبر اللعينة وهابقى ارد عليكم
شكرا ليكم كلكم على تواصلكم معايا
اختكم خيخة
اية الجمال دة يا خيخة
بوست رائع بجد
(كم افتقد هذة اللحظات ولا أعلم هل اجدها يوما ما ؟؟ !
اتمنى ذلك)
اية الجمال دة
بجد تحفة ماشاء الله ( وان كان فيها بعض الجُمل المفروض مش تتكتب ) بس برضو رائعة ماشاء الله
(كم افتقد هذة اللحظات
ولا ادرى هل سأجدها يوم ما ؟؟! ..
اية الجمال دة
بجد تحفة ماشاء الله ( وان كان فيها بعض الجُمل المفروض مش تتكتب ) بس برضو رائعة ماشاء الله
(كم افتقد هذة اللحظات
ولا ادرى هل سأجدها يوم ما ؟؟! ..
اية الجمال دة يا خيخة بجد تحفة ماشاء الله
اسلوبك جميل وجريئ ( وان كان فى شوية كلمات خارجة .. ماينفع تتكتب اقصد)
بس بجد احيكِ على اسلوبك
( كم اشتاق لمثل هذة اللحظات ... !)
احساس جميل اوي وبالذات للي بيشتغل في هيئات حكوميه زي السجل المدني او الشئون الاجتماعيه
يطلع من مكتب لمكتب وينزل يصور ورق من المكتبه ويقف عن اي محل يضرب ازازه بيبس في عز الحر اللي احنا فيه ده
والاحساس هيبقي اجمل لو كانو اتنين متجوزين وبيحبو بعض
امممممممممممممم
تعرفى ان البحث المستمر عن الحرية ممكن يفقدنا حريتنا
ممكن يخلي تصارفتنا كلها اسيرة لفكرة واحدة هل لما عملنا كدا عملناه بحرية او لا
الحرية فى انك تشعري بالراحة
ممكن الحرية نلاقيها انشالله فى غياهب السجون
الحرية فكرة مش لازم تاسرنا
جميلة حالة المصارحة والبساطة والتلقائية ليس فقط فى تدوينتك ولكن ايضاً فى الحوار خلال التعليقات
عموما أسجل اعجابى بالمعانى والأحاسيس الواردة فى كتاباتك ولو انى متحفظ "شوية" على الأسلوب لأنه عامى زيادة عن اللزوم مع انى مؤمن بأنك حرة تكتبى بالطريقة اللى تعجبك طالما على مدونتك الخاصة لكن لأنى معجب بأفكارك لذا أتمنى تتكتب بأسلوب أكثر احترافية
لك تحياتى وأمنياتى الطيبة
زورينى هنا
http://www.7arfwaw.blogspot.com/
سلام عليكم
اما انك خيخه يعنى انتى من التمنيه وعشرين حرف ملقتيش غير ال ر خلاص زنقت معاكى هههههههههههه
عبرتى بصدق يا خوخه
تحياتى
روعه روعه روعه
البوست ده
معرفش ليه جالى عليه طلبات كتير جدا انى اعيد نشره تانى
رغم انى نشرته اول مرة من شهرين
يعنى من فترة صغنونة واى حد ممكن يرجع للارشيف ويقراه براحته
ولكن خلال الشهرين دول جاتلى ايميلات انى اعيد نشره تانى
واسيبه شوية مانشرش بعديه حاجة تاني لفترة
وانا نزولا على رغبة الجماهير
بعيد نشره تانى
شكرا ليكم
Post a Comment