معملتش فرح
يوم 15 مارس 2003
معملتش فرح
وفرحي كان مجرد احتفال بسيط
فى مكاناً ما فى اكتوبر اللعينة
مافيهوش غير بابا وماما واخواتى
ووالد هانى ووالدته واخواته
وبعض الأصدقاء المقربين جداااااااااا
معملتش فرح
لأنى كنت ومازلت مقتنعة تماما
ان الفرح مش فى الفرح
و إن الفرح بيكون فى القلب
معملتش فرح
توفيراً للنفقات
لكن اصريت على عدم توفير
أى نفقات تتعلق بفستان الفرح
واصريت ان فستان فرحي مايكونش تأجير
ويا إما أشتريه جديد وجاهز أو يتم تفصيله
وتوفيرا للنفقات تم تفصيله
لأن الجاهز وقتها كان غالي برضه
ومازلت سعيدة بكيفية الاستفادة
من فستان الفرح بعد كدة
لان فستان الفرح بعد مرور سنتين من جوازى
اتحول لجزامة وجهاز اوربتراك عن طريق بيعه
معملتش فرح
رغم استغراب الكل
وانتقاد الكل لقراري
يعنى ايه مش هاتعملى فرح؟
يعنى ايه مافيش كوشة
ولا زفة ولا تورتة خمس ادوار؟
وكان ردى على أى استنكار
مش هانى هيكون موجود؟
يبقى خلاص مش ناقصنى حاجة تانية
مش اهلى واهله موافقين على جوازنا
ومش بنتجوز من وراهم
يبقى خلاص مش ناقصنى حاجة تانية
مش عيلتى وعيلته كلهم جم
فى يوم كتب الكتاب 7 يوليو 2001
يبقى خلاص محدش له عندى حاجة
واعمل فرحى بالشكل اللى يناسبنى انا وجوزى
وبالطريقة اللى تسعدنا
واللى بيحبنا هيفرحلنا
حتى لو كنا هانعمل الفرح فى محل كشري
معملتش فرح
واخترت انى اروح
شرم الشيخ مع هانى
بدل ما نعمل فرح
خصوصا انى ماكنتش
رحت شرم الشيخ قبل كدة
معملتش فرح
لكن مازلت لما بفتكر يوم فرحي
بقفش نفسى مبسوطة
مازلت فاكرة نظرة عيون هانى
لما شافنى طالعة من عند الكوافير
نظرة حلمت بيها طول عمرى
نظرة فيها جمالي فى عيونه
أصل انا كنت حاطة روووووووج
وفيها حبه ليا
وفيها خوفه وقلقه من مستقبل مجهول
وفيها فرح
معملتش فرح
لكن مازلت لحد النهاردة
فرحانة بيوم فرحي
اللى كان من غير فرح
انتهى
بت خيخة وأى كلام
