الموضوع كبير ومتشعب
ومش عارفة ادلق كل الكلام؟
ولا اتكلم عن كل نقطة فى بوست لوحده
علشان ماطولش عليكم؟
عموما انا هاكتب لحد ما اتعب
ولحد ما اثر الكيتوفان يروح ويرجع الصداع
مش كل العلاقات الزوجية فاشلة
ومش كل العلاقات الزوجية المستمرة ناجحة
ومش كل حالات الطلاق معناها كراهية من الطرفين لبعضهم
عايزين تنجحوا فى علاقتكم الزوجية
يبقى تعروا نفسكم قدام بعض
ماقصدش تقلعوا هدومكم
انا اقصد تقلعوا افكاركم
ومشاعركم ومخاوفكم واحلامكم
الراجل اللى بيتقدم لعروسة
ما تقولهاش شقتك كام اوضة
ولكن قلها انت بتشخر وانت نايم ولا لأ
قلها بيفرق معاك اذا كانت مراتك بتطبخ ولا لأ
اوعى تكون عايز مراتك بتعرف تطبخ
وتتقدم لواحدة جميلة ومابتعرفش تطبخ
فجمالها يخليك تعتقد
انك ممكن تقنعها انها هتطبخ بعد الجواز
اوعى تكون عايز مراتك محجبة
وتروح تتقدم لواحدة مش محجبة
باعتبار انك هتأمرها انها تلبس الحجاب بعد الجواز
انت واخدها مش محجبة اساسا
يبقى ماتفكرش انك تغيرها بعد الجواز
لو موسوس فى النضافة
اعرف مدى وسوسة البنت اللى بتتقدملها فى النضافة
هل هى على نفس قدر وسوستك ولا اقل منك
لو اقل منك واتجوزتها
ماتجيش بعد الجواز تشتكى
من انها مش نضيفة بالقدر اللى كنت متصوره
لو عينك زايغة وبصباص فهم خطيبتك النقطة دى
لو مابتحبش شغل المراة
يبقى فهم خطيبتك النقطة دى
لكن اوعى تعملها من البحر طحينة
وتوعدها انك هتسيبها تشتغل براحتها بعد الجواز
ولما تتجوزوا فعلا تغير كلامك معاها
لو مش هتديها مصروف شخصي ليها قولها كدة
قولها معنديش حريم ياخدوا فلوس خاصة بيهم
لو مش بتحب مراتك تروح سينمات
او تخرج مع اصحابها برضه فهمها كدة
لو مش ناوى تساعدها فى شغل البيت
ومش ناوى تشيل الطبق اللى طفحت فيه بعد ما كلت
يبقى تقولها كدة
مراتك غير امك
مراتك من جيل وامك من جيل تانى
مراتك متعلمة وممكن جدا تكون امك ما كملتش تعليم
والتعليم بيفرق جدا فى ثقافة وتفكير الانسان
يعنى دماغ مراتك غير دماغ امك
انا لا اقلل من شأن الست الوالدة
لكن لازم تفهم ان امك حاجة ومراتك حاجة تانية
مش معنى كلامى ان مراتك احسن من والدتك
ولكن معنى كلامى ان الفروق جوهرية
بين ام الزوج وبين الزوجة
ولازم تبقى حاطط ده فى اعتبارك
البنوتة اللى بيجيلها عريس
لو مش عايزة جوزك يكون من المدخنين
يبقى ما توافقيش من الاساس على عريس مدخن
وتعتقدى بانك هتقنعيه انه يبطل تدخين بعد الجواز
حياتك فى بيت ابوكى متخلهاش تاثر على حياتك فى بيت جوزك
لو عايزة جوزك يشتريلك دهب فى المناسبات المختلفة
يبقى فى اول يوم بعد مايحصل القبول بينكم
تقوليه انا مستنية من جوزى انه يجبلى دهب
انا مستنية من جوزى انه يفسحني كل اسبوع مرة
انا مستنية من جوزى انه يساعدنى فى شغل البيت
والله لو وافق على اللى انتى مستنياه
ومنتظراه من فارس احلامك وزوج المستقبل
يبقى خير وبركة
لكن لو مش موافق يبقى ماخسرتيش حاجة
لو حد فيكم عنده اى امراض
لازم يصارح الخطيب والخطيبة بيها
وياريت قبل ما تكون خطوية رسمى
يعنى فى البدايات خالص ياريت تصارحوا بعض
اكشفوا عن عيوبكم
وماتكشفوش عن مميزاتكم
خلوا المميزات مفاجأة لشريك الحياة
لو ناوية تحطي رجليه فى مية وملح
ماتقولهوش انك هتعملى ده بعد الجواز
ولكن صارحيه ان صوتك عالى ونرفوزة
ولو تقبلك على كدة يبقى اسمه عارف عيوبك
وخليه يتفاجئ ان ورا العيوب دى
فيه مميزات ومفاجأت جميلة فى انتظاره
لو ناوى تشتريلها عربية فى عيد ميلادها
ماتقولهاش ده
ولكن صارحها انك غيور لدرجة الشك
لو وافقت على كدة
يبقى كويس
ساعتها مش هاتقدر تقتح بقها معاك لما تدوق طعم الشك
لانها واخداك وهى عارفة عيبك
وخليها تتفاجئ ان ورا العيوب دى
فيه شخصية رومانسية وكريمة
الصداع رجع تاني ومش قادرة اكمل كتابة
محتاجة ادفن راسى فى المخدة
نكتفي بهذا القدر دلوقتى
وابقى اكمل معاكم بعدين
انتهى
بت خيخة وأى كلام
