Friday, October 23, 2009

يا جمال .... ايش عرفك انت؟



تضامنا مني مع حملة نوارة نجم
اكتب هذا البوست


ايش عرفك انت بواحد مؤهل عالى بيشتغل شغلتين فى قطاع خاص
ومجموع مرتبه من الوظيفتين لا يتعدى ال 900 جنيه شهريا

ايش عرفك انت بمحمد مدرس العلوم
اللى بياخد 350جنيه شهريا
ومتجوز وعنده عيلين
وكل طموحاته انه يقدر يقي عياله من شر الجوع

ايش عرفك انت بفاطمة خريجة الاعلام
اللى اشتغلت فى صيدلية
بتكنسها وتمسحها وترتب علب الادوية
علشان تاخد 100 جنيه اول كل شهر

ايش عرفك انت بمنى خريجة التجارة
اللى بتشتغل فى محل جزم
وبتضطر انها تطنش تحسيس مديرها على صدرها فى الرايحة والجاية
علشان خاطر 300 جنيه شهريا بتساعد بيهم امها الارملة وباقى اخواتها الاربعة

ايش عرفك انت بمروة اللى على وش جواز
و راحت تصرف شيك من وزارة الشؤن الاجتماعية
تضامنا من الدولة فى تيسير مصاريف الزواج
عارف الشيك بكام؟
بخمسين جنيه
اشترت بيهم طشت وكنكة
اه صحيح وانت تعرف منين
تلاقيك متعرفش يعنى ايه طشت

ايش عرفك انت بأم محمد الكفيفة والكسيحة
اللى ابنها محمد عائلها الوحيد
مات فى حادثة
واللى قتله ابن واحد من كبارات البلد عنده نفوذ
ومارضيش حتى يدفع دية لام محمد
وقالها بالحرف الواحد
مالكيش عندى دية
واخبطى راسك فى الحيط


ايش عرفك انت بيا
تعرفنى منين انت ولا ابوك
علشان تبعتولنا تلغرافات تعزية في والدي

حسيت بيا يوم

جيت معايا يوم وانا فرحانة بنفسى وفخورة
بمؤهلى العالي
اعلام قسم صحافة
ورايحة اقدم على وظيفة فى مكتب محامى
الاقيه بيقولي
هتكتبى المذكرات على الكمبيوتر
وهتكنسى وهتمسحى المكتب وهتقدمى شاى للعملا
وهتاخدى 150 جنيه شهريا

مسحت دموعى يوميها؟
حسيت معايا بالاهانة يوميها؟
لعنت اليوم اللى اتعلمت فيه يوميها؟

ايش عرفك انت بيا
جيت معايا لمكتب توظيف
وشوفت صاحب المكتب الوسخ ابن الوسخة
وهو بيغتصبنى بعيونه
وبيعرينى بنظراته من راسى لرجلى
ويقولى انا مستخسرك فى بهدلة الوظايف اللى عندى
انتى هتبقى ليا انا؟
ولو عايزة من الف جنيه لخمستلاف انا مستعد ادفعهم؟
تفيت معايا على وشه يوميها؟
بطنك وجعتك يوميها من حقارة العرض؟
نفسك راح منك من الخضة وانت بيتعرض عليك عرض وسخ كدة؟
مشيت فى الشارع يوميها وانت عيونك مزغللة من دموعك؟

ايش عرفك انت بيا
اشتغلت فى يوم بيبي سيتر لبت عندها ست سنين
من ورا اهلك
علشان متجرحش مشاعرهم
و علشان متهينش مستواهم الاجتماعى
وعلشان مايستنكروش فعلتك
وانك ازاى تشتغل كدة وانت مؤهلك اعلام قسم صحافة؟
وان عيلتك مراكزها حساسة؟

سمعت بودنك اهانة ام البت
وهى بتقولك من طراطيف مناخيرها
ازاى بتقولى لبنتي تجيب القلم من على الارض
امال انا جايباكى هنا ليه
ده انا مابطلبش منك انك تشطفيها بعد ما تعمل تواليت
دى البنت بتندهلى انا و بتقولى يا مامى تعالى شطفينى لانها مابتعرفش تشطف نفسها

ايش عرفك بيا وقتها
حسيت بيا وقتها
قلت فى سرك معايا وقتها وانت بتلم حاجاتك و بتمشى من عندهم وبترزع الباب وراك
احا يا بنت الكلب انتى كمان عايزانى اشطف طيز المحروسة بنتك بعد ما تشخ خرا
صعبت عليك نفسك يوميها
عيطت يوميها
روحت بيتك و كنت عايز تحرق ام الشهادة اللى خدتها
ومش عارف تعمل بيها ايه غير انك تلفها وتلبسها فى طيزك زى الخازوق
بصيت فى عيون اهلك ولومتهم لوم صامت
انهم استجابوا لرغبتك ودفعوا دم قلبهم فى تعليم خاص
علشان تتعلم الحاجة اللى بتحبها
واخرتك بيبى سيتر عند عيلة
امها عايزاك تشطف طيظ المحروسة


ايش عرفك انت بيا
اتطردت فى يوم من مكتب
مدير مكتب مدير جامعة
علشان مارضيتش انك تتمرقع معاه فى الكلام
علشان يوافق انه يدخلك تعمل انترفيو مع مدير الجامعة


ايش عرفك انت بيا
كنت معايا فى المعادى
لما بنت وقفتنى وطلبت منى انى امشى
معاها شوية لحد محل الكوافير اللى بتشتغل فيه
علشان ادارى جيبتها المقطوعة
وفى وسط دردشتنا
شهقت بالصوت الحياني فى الشارع
وقالتلى يا نهار ابيض
لما عرفت انى جاية من اكتوبر لحد المعادى
علشان ادور على شغل وانا معايا بكالوريوس اعلام قسم صحافة؟
وهي ساقطة ثانوية عامة وبتشتغل وبتاخد مرتب كويس
كنت معايا يوميها وهى بتعرض عليا انى اشتغل معاها
في نتف الحواجب وعمل الوش بالفتلة
واخد الف جنيه فى الشهر غير البقشيش؟


ايش عرفك انت بيا
ايش عرفك انت بذل بنت الأكرمين علشان تعتمد على نفسها
دون اللجوء لواسطة عيلتها ام مراكز حساسة

ايش عرفك انت بيا
لما الاقى نفسى محطوطة بين خيارين
ياما اشتغل شرموطة او خدامة علشان اخد مرتب كويس
او اشتغل شغلانة محترمة واخد مرتب لا يقينى ذل السؤال ولا يقينى شر الحاجة

هى البلد دى مافيهاش وظائف محترمة بمرتب محترم؟
مافيهاش وظيفة لا تهين شرفى ولا كبريائى ولا مستوايا الاجتماعى ولا تعليمى؟

ليه الوظائف المحترمة مرتباتها تكسف
وليه الوظائف الوسخة والمهينة مرتباتها عالية
وليه علشان اشتغل شغلانة محترمة بمرتب محترم اضطر انى الجأ لواسطة؟
طب والناس اللى معندهومش واسطة يعملوا ايه؟

ايش عرفك انت بيا دلوقتى
يتعيط معايا معايا دلوقتى
مناخيرك ساحت منك دلوقتى
حاسس بقهرتى دلوقتي
صوتى وصلك دلوقتى
سامعنى يا جمال
طب ابوك سامعنى؟


ايش عرفك انت بواحدة بنت ناس و متعلمة ومتربية
تتحول لمجرد بت خيخة
عارف يعنى ايه خيخة
تلاقيك مش عارف


بص يا اسمك ايه
الوحيد اللى كان ممكن اخاف عليه من كلمة طظ هاقولهالك هو ابويا
وابويا مات
فبالتالى دلوقتى بس اقدر اقولهالك بعلو صوتى
يا جمال طظ فيك
وطظ فى ابوك
وطظ فى امك
وطظ فى عيلتي ام مراكز حساسة
اللى خايفين على مراكزهم الحساسة من كلمة طظ هاقولهالك


اخر الكلام
يا جمال
لو عايز تحكمنا ... اعرفنا



اخيخ كلام
يا جمال عنداً فيك وفي ابوك
انا لسة قادرة اضحك من قلبي
وايش عرفك انت بالضحك من القلب؟



انتهى
بت خيخة وأي كلام

59 comments:

خواطر شابة said...

لا بجد انتي مستبيعة وقلبك جامد

واحده من الناس said...

يااااااااااااااااااه
معاكى حق والله ف كل كلمه قلتيها
احنا اتقهرنا كتير واتظلمنا كتير ومش عارفه ليه البلد دى لسه فيها خير بيتنهب..
حياتى شبهك كتير سبت كام شغله بحبها بسبب قلة الادب والسفاله بس انا مش زيك قدرت اتحمل كتير..اخرها ربنا بعتلى شغلانه بالصدفه ف مكان كله وسايط وانا مالبيش ضهر وعشان كده عماله انضرب على بطنى لما شبعت
متفرقش معايا مين ياخد الحكم
اقولك نكته تبكيكى
ولاد بلدى هنا ف سوهاج بيقولوا كلام على القهاوى
واحد بيقول لواحد صاحبه انا هقلب الدنيا عشان جمال مبارك ماياخدش الحكم
التانى قالله يبقا هتضيع نفسك
المحموق قالله لا ابدا البلد دى فيها ديمقراطيه ولا للتوريث
التانى قالله انت مش عرفت اللى حصل لايمن نور بتاع حزب الغد لما اترشح قصاد الريس السنه اللى فاتت
مش اعتقلوه بعدها بتهم قديمه
ولا بتاع حزب الوفد اللى لفقوله كام تهمه شيك ولسه محبوس
ولا عندك اللى مات بعدها بكام يوم وقالوا قضاء وقدر
هنا الراجل المحموق بص لصاحبه وسكت وبعدها قالله معقول كل ده حصل
صاحبه قاله اومال ايه انت مش عايش ف البلد دى ولا ايه؟
المحموق قاله وعلى ايه
نعم للتوريث
ويعيش جمال مبارك
ههههههههههههههههه

Anonymous said...

يا لهوي يا خيخة

shahy said...

منك لله ياحمادة ياللي كنت السبب في البوست المنيل دة
يالهوي انا حسيت ان الشاشة هاتنفجر في وشي استهدي بالله يابنتي مش كدة

لا حول ولا قوة الإ بالله وحسبي الله ونعم الوكيل

... amr said...

ايش عرفك انة يستاهل كل النرفزة اللي انتي فيها دي ؟
ايش عرفك انة اذا قرا اخر جملة في البوست انة هيحس و يعرف ان الله حق
بالله عليكي
محدش في الدنيا يستاهل تقلبي مواجعك كدة وتتقهري كدة
قومي العبي مع شريف و انسي الدنيا بقرفها وجمال واللي عايزينة
استهدي بالله كدة وروقي

Ahmed Essawy said...

متفق معاكي في كلام كتير و لكن معترض علي كل كلمه مش مهذبه قولتيها
لان عمر ما كان الرد علي قله الادب بقله ادب .

رئيس جمهوريه نفسى said...

صعب قوي البوست دة يا خيخه وحسيت بيه قوي والمشكلة انه محسش ولا حايحس ولا يعرفنا ولا حيعرفنا زي ما ابوه لا عرفنا ولا حيعرفنا
زي ما لجنة السياسات ورجالها لا حتعرفنا ولا عرفتنا
زي ما كل حاجة فى البلد نكرتنا وبقيت مش ملكنا ومش عرفانا
حسيت بالبوست بتاعك لانى افتكرت وانا رايح اقدم فى وظيفة أمن فى مصنع ولما مدير الامن فى المصنع شاف المؤهل طردني وقالى ازاى اسيب واحد مؤهل متوسط يتحكم فيك ويمكن يعاقبك وكنت موافق بس هو اللى قطع السي فى بتاعى
افتكرتها بعد ما قوانين البلد الوسخة وجبايتها اللى على شكل ضرايب اجبرتني اقفل المكتب بتاعى لما لقيت نفسي مطالب انى ادفع ضرايب قد اللى بدخلها فى السنه اضعاف وكان المعروض عليه انى اشتغل فى الغردقة امسك صاله بلياردو ب 450 جنيه مش حتكفي سجاير ومياة معدنية طبعا لانى ميه الغردقة ما تشربش وطارت علشان واحد معاه واسطة
افتكرتها وانا وظيفة محامي فى قرية سياحية فى شرم بتطير مني لمجرد انى صعيدي من قنا وكان صعب يتجاب ليه تصريح من آمن الدولة
افتكرتها وانا قاعد فى الصحراء متغرب عن أهلى بشوفهم كل شهر 4 ايام بس مالحقش اخد فيهم نفسي وارتاح واكتشف انى اللى بيقدم لينا العشاء فى المطعم بتاع السكن معاه بكارليوس تجارة وانى اللى بيعمل لينا الشاي خدمة اجتماعية
افتكرت وانا بشوف نظرة حزن فى عين بابا لما ظهرت نتيجة النابة العامة واترفضت علشان الواسطة أولا وعلشان رفضت ادفع رشوة ثانيا
الناس دى مش مننا ولا حتكون مننا يا خيخه بس للاسف حتحكمنا علشان احنا شعب أجبن من أنه يطلع كله مع بعضة ويقول كلمة لا
علشان الثقافة السايدة امشي تحت الحيطة وربي ولادك وهما مش عارفين انهم بسكوتهم بيقتلوا بكرة اللى مش بتاعهم لا بتاع ولادهم

Dr. Kafy said...

طبعا أنا متفق معاك فى كل اللى قلتيه و حاسس بحرقتك اللى طلعت كلام ماكانش لازم يطلع. و الأهم هو السؤال اللى طرحتيه "
ليه الوظائف المحترمة مرتباتها تكسف وليه الوظائف الوسخة والمهينة مرتباتها عالية؟"
دى فعلا أصبحت طبيعة الحال فى بلدنا و علشان كده دايما أقول "ربنا يحرقهم اللى وصلونا لكده"
حسبنا الله و نعم الوكيل

عمرو فكرى said...

speechless

Abu ShoSho said...

لا تجعل سفالة الأخرين تكشف عن




ضعفك الإنساني

عمرو فكرى said...

speechless

Founoon said...

وجعتي قلبي ومناخيري ساحت
مش عارفه اقول حاجة
ربنا يصلح الحال
احنا مانستاهلش كدا

Saso said...

ايه كميه القرف والحزن دا
ايه كل اليأس دا
ياخيخه اوعى تتنازلى عن كونك بنت خيخه ومايهمهاش حد
تحياتى للكلام اللى بيوجع اوى دا ويجرح قلوبنا اوى لاننا بنتعرضله زيك كمان
تحياتى

همس الاحباب said...

امممممممممم
ده حال واحدة من 80 مليون
يا ترى الباقى هيقول ايه ولا ايه
الموضوع كبير عليك يا جيمى
انفد بجلدك احسن

ماجد said...

ايش عرفة هو بالست الناظرة اللى قضيت 40 سنة فى التربية والتعليم وخرجت الاف الدكاترة والمحامين والمهتدسين واللى كانت بينضرب بيها المثل فى الرجولة والجدعنة والنظام والادارة والتربية وفى اخر ايامعا اتبهدلت فى المستشفيات الحكومية ووحدات غسيل الكلى وكانت لما يحيلها غيبوبة نبوس ايد الدكاترة علشان حد بحى يشوفها علشان معلمتش فلوس من شغلها يخليها تتعالج فى مستشفى خاص او او ماكنتش فنانة او رقاصة تتعالج على نفقة الدولة وهى كانت كمان بنت اكرمين

يا بنت الاكرمين (انت مش خيخة وعممرك ما حتكونى خيخة انت فعلا بنت الاكرمين )

وجعتى قلبى

Che said...

مش لاقى اى حاجه اعلق بيها غير انى اقول يا وجع قلبى

نور محمد said...

احترامي وتقديري لست البنات
اسأل الله ان تكون معاناتك مع هؤلاء البهائم في سجل حساناتك
ولا عزاء لرجال يسمعون ويرون مايجري على كرائمهن ويتلفعون بالجبن وشاحاً
ولا خير في حياة لا تسعد فيها امثالك بحياتهن بدون ان يكدر صفوها من لا يخاف الله

Dr Nemo said...

تضامنا معاكى بوستك عندى فى المدونة

وجمال مش هيعيط ولا هيتأثر .... هيمصمص شفايفه ويقول" اما بت خيخه صحيح" طبعا هيسال عن معنى خيخه الاول

Abu ShoSho said...

أم شريف
أنا مجدر وجيعتك وني موجوع زييكي و زي ملايين في مصر بس حضرتك بالذات ماينفعشى يطلع من خشمك العيبة

موش تزعلي من كلامي الاولاني

ربنا يباركلك في شريف و يجعل علي إيده صلاح البلد دي

هتشوفوا said...

هايل والله, أهي الحاجات الصعبة اللي تعرضتلها هي اللي خليتك تكتبي البوست الجميل , ماتزعليش

maman de said...

و النبى يا حبيبتى ما يستاهل سى جيمى منك تضايقى نفسك ربنا يخلصنا منهم ومن كل الظلمة
انا حاسة بيكى و الله و شفت انا واختى (على فكرة احنا فقدنا ابونا من 13 سنة و ما ادراكى الاسرة المتوسطة اللى تفقد الحيطة اللى بتتسند عليها اظن دى عايزة مدونة كاملة عشان احكيلك هههه) معظم اللى انتى حكيتيه غير الفشل فى الحصول على زوج رجل تتحمى فيه
انت اسلوبك حلو اوى فى الكتابة يا رب تلاقة شغل يقدر موهبتك و يحفظك من كل سوء

maman de said...

و النبى يا حبيبتى ما يستاهل سى جيمى منك تضايقى نفسك ربنا يخلصنا منهم ومن كل الظلمة
انا حاسة بيكى و الله و شفت انا واختى (على فكرة احنا فقدنا ابونا من 13 سنة و ما ادراكى الاسرة المتوسطة اللى تفقد الحيطة اللى بتتسند عليها اظن دى عايزة مدونة كاملة عشان احكيلك هههه) معظم اللى انتى حكيتيه غير الفشل فى الحصول على زوج رجل تتحمى فيه
انت اسلوبك حلو اوى فى الكتابة يا رب تلاقة شغل يقدر موهبتك و يحفظك من كل سوء

Anonymous said...

معلش بس كدا مينفعش اه في المفروض عبري و براحتك بس مش لدرجة تدني الالفاظ داه
انا بجد اتصدمت من الكلمات دي ازاي زاحدة محترمة حتى لو خيخة تقولها عشان خاطر شريف لمي لسانك
معلش بس دي الحقيقية معتقدتش شريف هينبسط اوي اما يلاقي مامته لسانها كدا

حسبى الله said...

"تحسيس - أحا - طيز -خرا-شرموطة

هى دى لغة بنات الأكرمين وبنت العائلة المرموقة؟

ياشيخة جتك القرف

esraa said...

وجعتيلي قلبي بجد

بت خيخة وأي كلام said...

انا تعبانة وعايزة انام

تصبحوا على خير

نعكشة said...

may Allah be with u and all those who suffer

Amen

.....

يمكن عشان لسة مشتغلتش؟؟
اصل انا مش حاسة بفداحة المشكلة والله
عامة

ربنا يتولانا برحمته

كان الله فى عون من يحتاج العون
وكلنا يحتاج العون
كان الله فى عوننا

سلام عليكِ

Anonymous said...

احنا اتفقنا معدش فى أباحة

رجعتى تانى للاباحة على فكرة انتى بتوقفينا عن القراية وبتؤذى عنينا قولى اللى انتى عايزاه من غير اباحة

انا بقيت بتكسف افتح صفحتك من الفافورتس

أبــــــو آيــــــــــه said...

مش هقول غير حسبى الله ونعم الوكيل

محاسب/ محمد الجريدي said...

حسيت أني مكسور بجد ومخنوق حسيت أني مش من حقي أتنفس ومش قادر أتنفس أقول لك علي حاجه زمان أيام الحجاج إبن يوسف الثقفي
(عليه من الله مايستحقه )
كان في واحد أسمه سـعـيـد إبـن جـبـيـر عالم جليل ومن رموز الإسلام وآيه في الزهد معجبش الحجاج الكلام ده وكطبيعة الطغاة كلما رأي شئ جميل أحب أن يفسده
المهم تم القبض علي سعيد وأمام الطاغيه دارت المجادله طويله جدا وفيها من الآيات مايستحق الدراسة ولكن هذكر لك أهم جزء فيها في آخر المجادلة

قال الحجاج : إقتلوه

فوجـّه سعيد وجه تجاه القبلة وقال

( وجهتُ وجهي للذي فطر السماوات والأرض حنيفا وما أنا من المشركين )

قال الحجاج : حـوّلُهُ عن القبله

فقال سعيد

( فأين ما تولوا فثم وجه الله )

فقال غاضبا : إطرحوه علي الأرض

فقال سعيد

( منها خلقناكم وفيها نعيدكم ومنها نخرجكم تارة أخري )

فقال الحجاج : إذبحوه

فضحك سعيد

فقال له الحجاج : مم تضحك .. ؟

فقال سعيد قولـتـه الخـالـدة

أعـجـب مـن جـرأتـك علـي الله وصـبر الله عنـك
ثم قال حسبي الله ونعم الوكيل

فـذبـحـوه

وفي آخر الزمان إبتلي الله الحجاج بمرض غريب فصار يقول

مـالي ودعاء سـعـيـدإبن جـبـيـر

--------------

أعتقد فهمتي أنا أقصد إيه
خلينا نقول حسبي الله ونعم الوكيل
وننتظر النتائج
حتي لو لم نري هذه النتائج فيجب أن نتيقن من أن الله لا يرضي بالظلم
أسف علي الإطالة

karim said...

واللة من كتر اعجابى بكلامك الصح جدااااااا وقفت قدام مدوتنك وسقفتلييك فعلالا, احسنتى سيدتى, ياريت تدخل البلوج عندى وانتى تشوفى شىء مشابة لكلامك فى كليب ظريف ارجوكى منتظر تعليقك المفيد دائما, اطيب تحيات لييكى من كل قلبى

أم بتول said...

بصى يا خيخة مش هاقول و جعتى قلبى لأنه موجوع خلقة من الى شايفة و عايش فيه ، ومش ها قول لك عيب الألفاظ الى قلتيها ، لأننا ساعة أحباطاتنا و فقدنا الأمل و نلاقى نفسنا عملنا الى علينا ومش لاقين ممكن أعصابنا تفلت و نقول كلام من غير ما نحس بيه ، الى ها قوله لك قولى حسبنا الله و نعم الوكيل و لن يضيعنا الله ، أبنى قبل فى الشرطة و عدى أمتحان الهيئة لكن لأننا بدون واسطة ولم ندفع رشوة قالوا فى النتيجة بعد طل التحريات و جرى هنا و هناك ومصاريف وهده حيل فى طلبات أوراق الكل أكد أنها مادام بتتطلب يعنى خلاص قبل ، و النتيجة غير لائق ، عارفة قالوا لى أيه قالوا شرطة أيه دى بيندفع فيها 200000 جنية المبلغ بجد مش غلطانة فيه ولا حاجة ،

ادهم سعيد said...

من يسمى نفسه حسبي الله

جاتك القرف يااحول، تستخدم نفس المصطلحات بدون تحرج وبدون مناسبة،وتلوم مظلومة فاض بها الكيل على مصطلحات خرجت في لحظة ثورة؟
تتحرج من كلمات تصف بدقة مقصدها، ولا تتحرج من كل هذا الكم من الظلم الذي تتعرض له الحرائر؟
جاتك القرف

لماضة said...

بجد انتي جدعه يا خيخه
كان نفسي اقول الكلمتين دول
لا جدعه جدعه يعني
بوسه يابنتي

سهيل ولى الدين علام said...

يسلم بقك.. ويسلم قلمك.. ويسلم اصدق بوست
قرأته السنه دى..ى

حسبى الله said...

الأخ أدهم سعيد
.............

حضرتك تعرفنى منين عشان تقول انى باستخدم نفس المصطلحات بدون تحرج ودون مناسبة؟

وحضرتك بتشتمنى بالقذارة دى ليه؟

كان من الأفضل أن تكون ناصحا لى ولها ان كنت تريد الخير

عموما حسبى الله ونعم الوكيل فيك

Anonymous said...

كلامك صح وحقيقى وهو دا اللى بيحصل مع اى حد عايز ياكل لقمتة بشرف فى البلد دية فللى باصص على الالفاظ ياريت يبص على المواقف المخزية وعدم التقدير والاحترام اللى بيتعرض لية البنى ادم وكاننا عبيد

والمحترم وعندة علم مبيعش فى البلد دية والدليل احمد زويل ومجدى يعقوب اما اللى عايز يبقا حاجة عظيمة وليها تقدير فى البلد دية يروح يشتغل ممثل او راقصة او حرامى او اى حاجة

Anonymous said...

لو قلنا ايش عرفك من هنا لبكرة هنقول كتير كتير كتيييييييييييييييييييير


ويا ما فى الجعاب من القرف اللى شايفينة

وقال متدينين بلا قرف

Che said...

اسف يا خيخه بس مش قادر امسك نفسى و معلقش تانى
الاخ او الاخت حسبى الله .... انت قلت المشكله نفسها ... احنا على الاقل لما بنكتب حاجه على مدوناتنا او حتى بنعلق ، بنعلق بالاكونت بتاعنا ... يعنى كل الناس شايفه احنا مين و بنقول ايه و ممكن يدخلوا على مدوناتنا و يشوفوا اللى احنا بنقوله فيها
على النقيض حضرتك داخل من غير اكونت ... مجهول ... يبقى دى حلها واحد من تلاته ... يا اما انت اجبن من المواجهه المباشره .. يا اما انت منافق بتقول هنا حاجه و حقيقتك حاجه تانيه ... يا اما انت مش مقتنع أوى باللى انت بتقوله
لو فيه سبب تانى يخليك تدخل و تسيب تعليقات كمجهول يا ريت تقولنا عليه عشان نتنور كلنا
مسأله بأه انى انصح حد او اهدى حد فانا شايف انه من الافضل انصح نفسى و اهدى نفسى لانى اكيد ليا غلطات و غلطات كتير ... و اكيد حضرتك زى و زينا كلنا .... انما بأه لو انت نبى جديد او ان ربنا مثلا عاصمك من الغلط او مديك كارت بلانش تقول و تعمل اللى انت عايزه .... او يمكن ملاك من الرب عايش وسطينا ... فده حاجه تانيه
اسف مره تانيه يا خيخه على التعليق

بت خيخة وأي كلام said...

شكرا ليكم كلكم على تواصلكم معايا

ويا جماعة محدش يعتذر عن تعليق كاتبه

خدوا راحتكم

اللى عايز يكتب تعليق طويل يكتب
اللى عايز يشتمني يشتم براحته
واللى عايز يرد غيبتى يرد
واللى عايز يكتب بدل التعليق عشرة ياخد راحته

عيشوا حياتكم فى صفحة تعليقاتي زى ما انتوا عايزين

لكن فى بوستاتي سيبونى اعيش حياتى زى ما انا عايزة


وبالنسبة لاى مجهول
قرفان او مكسوف من كلمة بكتبها
الحل بسيط جداااااااااااا
ماتجيش هنا تاني

لان قرفكم او كسوفكم من كلامي وتعليقاتكم السخيفة والمهينة
مش هاتمنعنى انى اكتب اللى انا عايزة اكتبه

وده ان دل على شئ فهو يدل
على انى كلامي انا
له تأثير كبير على امثالكم
بدليل انكم بتقرفوا وبتتكسفوا
ولكن كلامكم انتوا مالهوش اى تاثير عليا
بدليل انى مش هابطل اكتب اللى انا عايزة اكتبه


تحياتى ليكم كلكم

اختكم خيخة

MaNoO said...

خيخة اسمحيلى انضم ونزلت بوست عندى فى نفس السياق ومقتبس الفكرة وحقوق الحفظ لنوارة وليكى

Anonymous said...

شوفى بأه ياخوخة
اولا انا معنديش مدونة ومش موهوبة زيك ومش دمى خفيف فى الكتابة زيك "دمى خفيف فى الكلام وبس "

ومتابعاكى من أول بوست نزلتيه كل بوستاتك تقريبا قارياها وحافظاها وبحبها
وبحب شيكو ربنا يخليهولك ويباركلك فيه

عارفة انك داخلة بشخصيتك الحقيقية وعارفة انك بتعتبرى نفسك كاتبة جريئة وبتعبرى عننا

كل ده كلام جميل وحقيقى فى نفس الوقت

لكن انا عايزة افكرك بحاجة كنت قرأتها عندك زمان وكنت حاسة انها طالعة من قلبك

مرة زمااان قلتى "ده موقع مصطفى حسنى " يارب اشوف شيكو زيه ..

وانا بقول وراكى (يارب تشوفى شريف ابنك احسن منه )

لكن انا عندى تساؤل او استفسار حابة انك تشاركينى فيه

هل لو اكتشفتى ان والدة الاستاذ مصطفى حسنى عندها مدونة على الانترنت عليها الفاظ من شاكلة

(أحـ......& طيــ....& شــ’’’’ة
هتكونى مقتنعة ان هى دى الام اللى ربت أ. مصطفى ؟؟؟؟

مااظنش ياخوخة


مااظنش ان اللى ربت انسان بالاخلاق العالية دى والادب والذوق والاخلاق الظاهرة لينا دى وحب الناس اللى ربنا زرعه فى قلوبنا ليه
مااظن ان اللى ربته بتقول الالفاظ دى !!
ولو قالتها مااظنش انها قالتها على الملأ ولو قالتها على الملأ مااظنش انها قالتها والناس كلها عارفة شخصيتها وعارفة هى مين


خوخة حبيبة قلبى
عايزاكى تفكرى فى حاجة مرت على عقلى

الالفاظ اللى بتكتبيها دى طبعا مستحيل باى حال من الاحوال انها تتكتب فى جريدة او تتكتب فى منتدى من المنتديات
عارفة ليه ؟
عشان هناك رقابة ومراقبين

طب واشمعنى بنكتب براحتنا على المدونات ؟؟؟
عشان هى مساحة حرة ؟!!!!



يعنى اول ماجتلنا فرصة الحرية

بقينا بنقبح فى الكلام ونقول كلام عييب هو لكام عيب والناس كلها عارفة انو عيب

خوخة
ربنا رقيب علينا
مش لازم يكون فى رقابة ومراقبين ومشرفين

ماتاخديش الموضوع بتحدى مع الناس اللى بتقولك بنقرف من الكتابات
احنا مش بنقرف من الكتابات ياخوخة احنا بنقرف من الالفاظ

ياحبيبة قلبى انا عارفة انك متدينة وعارفة ربنا وبتحب الدين وبتحبى كمان النبى

حبيبى وحبيبك وسيدى وسيدك النبى عليه الصلاة والسلام قال

(ليس المؤمن بظعان ولا لعان و لا فاحش ولا بذىء )

يبقى المؤمن مينفعش يكون كلامه فيه فحش ولا الفاظه فيها بذاءة
وطبعا انتى ان شاء الله مسلمة مؤمنة موحدة
بتحب النبى وبتسمع كلامه

النبى بيقولك بلاش قباحة يانوران

بلاش تقعدى تقرى صحيفتك يوم الدين تلاقي فيها كلام مكنتيش تتمنى تقريه وانتى امام رب العالمين !

تفتكرى هتحبى تقرى صحيفتك امام الله عزوجل وفيها الكلمات اللى بتنشريها فى البوستات دى ؟؟!!!

مااظنش

انا عارفةانك بتكونى محروقة وعايزة تطلعى اللى جواكى لكن عندى نصيحة ليكى خديها من اختك اللى بجد فعلا بتحبك وممكن تعتبريها مدمنة لمدونتك



خوخة ....

بلاش تكتبى حاجة ييجى شريف بعد عشرين سنة ربنا يخليهولك وتفرحى بيه
ييجى بعد عشرين سنة يتكسف منك
او يتكسف من اللى بتكتبيه

متحطيش ابنك وحيدك حبيبك اللى بتموتى فيه فى موقف احراج او خجل لو اى حد قالوا انت مامتك اللى كانت بتتكلم فى ......... بمنتهى الحرية

اوعى تجرحى ابنك فى كرامته كرجل وتخلى اصحابه فى الجامعة يتريقوا عليه او يعايروه بان أمه كانت نوران الشامى اللى كانت بتكتب الفاظ زى (((.............))))
فى بوستاتها

اوعى تنزليه من نظر اصحابو ولا من نظر خطيبته او حبيبته

كنتى قبل كده قلتى مااعدش فى اباحة .. فوجئت انك رجعتيلها تانى !!!
رجعتى ليه ؟؟


بلاش ياخوخة

انا بحب مدونتك وبحب اتابعها بس بصراحة ومش هخبى عليكى لما بيكون بابا موجود مش بحب افتحها على البوستات الجديدة لانى مش ضامنة البوست الجديدة هيكون فى كلمات ايه ؟؟ او بيتكلم عن ايه

اخاف عينو تقع على كلمة من اياهم يقولى هو فى ايه ؟؟؟
انتى بتقرى ايه ؟؟؟؟


انا اسفة انى طولت عليكى واسفة لو كنت ضايقتك بس بجد اتمنى من كل قلبى اننا لما نتقابل يوم القيامة واتعرف عليكى تكونى راجعة من عند ربنا بعد مناقشة الاعمال (من المحاضرة المباشرة اللى ربنا هيكلم فيها كل واحد مننا على حده ولوحدة )


اتمنى اشوفك راجعة مبسوطة وسعيدة وبتضحكى وتقوليلى كل ذنوبى اتمسحت لانى استغفرت وتبت وسمعت كلام حبيبى النبى ومعدتش بقول الفاظ بذيئة ولا بشتم
لانى مسلمة مؤمنة والمؤمن ليس بفاحش ولا بذىء

تصبحى على خير ياخوخة

اختك اللى بتتمنالك الخير

"طبيبة مسلمة "

أدهم سعيد said...

حسبي الله

انظر الى مااقتبسته من التدوينة ستجد انك استخدمت نفس المصطلحات واعدت نشرها من جديد، والفرق بينك وبين كاتبة التدوينة انها صاحبة سلطان تصف ماحدث معها، وانا وانت علينا ان نخجل انها مرت بما مرت فيه في بلد نسكنه نحن، لا ان نترك القاتل ونمسك بالمقتولة على اه اطلقتها وجرحت مسامعك الكريمة
عز عليك ان استخدم ضدك نفس اهانتك للسيدةالمحترمة ؟
لا عليك
تقبل اعتذاري منك فور اعتذارك لها

بت خيخة وأي كلام said...

المجهولة او طبيبة مسلمة

أحرجتيني بأسلوبك المحترم
وكلامك المقنع

معنديش حاجة تانية أقولها

شكرا ليكي

حسبى الله said...

مدام خيخة

حجة العاجز هى كلمة ماتجوش هنا تانى...نفس الكلمة اللى ممكن تقولها بنات الليل لمن ينصحها بالتوبة والطهارة

انتى مصممة انك تعيشى فى مستنقع ترمى فيه قاذوراتك اللى بيصقف لها عاشقى القاذورات من أمثال أدهم سعيد..لكن كل اللى بينصحك بيقى عدو للتنوير والجرأة والصدق.. وماهو بصدق ولكنه تنيين الشيطان لأوليائه

كلمة أخيرة للرائعة"طبيبة مسلمة" أكثر الله من أمثالك يارب ومعلش اذا كنتى متخيلة ان كلامك حايجيب نتيجة مع واحدة زى دى...بتقوللك شكرا وأحرجتينى وفى الأخر استكبرت تمسح كلمة من كلامها الزبالة...انه غرور أولياء الشيطان يا مسلمة يا طاهرة..وابنه اللى انتى بتكلميها عليه مش بعيد تبيعه زى ماباعت أبوه

وحسبى الله

بت خيخة وأي كلام said...

حسبي الله

اللهم إني تصدقت
بعِرضي على الناس
وعفوت عمن ظلمني
فمن شتمني أو ظلمني فهو في حِل
اللهم إني سامحت كل من إغتابني
أو ذكرني بسوء في غيبتي
وأسألك في ذلك الأجر والمغفرة
وبلوغ مراتب المحسنين


شكرا ليك

سمسمه said...

جزاك الله خيرا طبيبه مسلمه
وانتى كمان يانورا ربنا يكرمك ويهدينا جميعا
بس علشان خاطرنا على الاقل شيلى الالفاظ الجارحه (اقصد اللى جرحت نظرنا ) وماتزعليش من كلامنا لاننا بجد بنحبك فى الله

سمسمه

ادهم سعيد said...

حسب الله


حسب الله ، صغر السن والتجربة والعلم والفهم لا يشكل بحد ذاته جريمة يمكن لي معاقبتك عليها
الا انك تمارس جريمة اسمها التنطع بغير علم والافتاء بغير فهم، ولو سكت من لا يعلملسقط الاختلاف
ياناصح اول شروط الامر بالمعروف والنهى عن المنكر، هو معرفة المعروف ومعرفة المنكر وانت والرقيقة المهذبة طبيبة مسلمة لا تعرفان المعروف اوالمنكر كلاكما تصدان عن السبيل وتظنان انكما تحسنان عملاً.
واذا كان عذر طبيبة مسلمة ان محبتها للسيدة الفاضلة نورا قد دفعها لنصيحتها بما تراه الافضل لها، وفعلت ذلك بشكل مهذب برغم احتواءه على مغالطات فقهية ودينية واستعانة بالرسول الاكرم لترهيب من هو راهب وخائف من الله فعلاً
على كل حال
تريد مني النصح؟ انا لم اتعود تقديمه الى غير طالبيه او من لهم الاهلية لفهمه اذا سمعوه
ومن يخالف هاتين القاعدتين بالنصح يسمى فضولي ثقيل سخيف العقل بليد الذهن متحجر الفهم ولا شيء يدعو للسرور فيه الا رؤية مؤخرته الثقافية وهو يغادر

حسب الله
قبلك تنطعت الخوارج وطلبت من المسلمين ان يشهدوا على انفسهم بالكفر لحقن دمائهم، وانت تطلب من مجاهدة صابرة عاملة لا تخشى في الله لومة لائم ان تقر انها من اولياء الشيطان لانه وصفت ماتتعرض له سيدات مصر من امتهان في عهد الطغيان؟
ماذا تريده ان تقول يازمخشري؟ غائط في مقابل الخرا؟
دبر في مقابل الطيز ؟
ماذا تقترح ياجبرتي لكلمةاحااااااا؟ شيت مثلاً؟
يااسخف من مشى على اديم الارض، هل سيتوقف امتهان الناس في وطنك اذا غابت الطيز عن مدونات الناس؟
يا اهبل بريالة هل كانت السيدة الفاضلة والدتك تنصحك بان تنظف مؤخرتك او قاعدتك او دبرك او كانت تقول لا تخرج من الحمام الا بعد تنظيف طيزك يالا؟
يااسؤ تزوير للجنس البشري هل تستحق الطيز والخرا ان تصرف النظر عن كل ماورد في التدوينة من شجون كفيلة بان يتمنى الحر الموت على انه يعيش في زمن كهذا؟
حسب الله
خصيمك الله

Anonymous said...

أدهم سعيد

بجد إنت إنسان مستفز

و كلامك كله تخريف و تُرهات

أنا واحدة مش فاضية مليش فى التعليقات خااااالص لكن كلامك نجح فى إنه يستفزنى للتعليق

معاك نصيحة لصاحبة المدونة

التى نقدر معانتها لكن هذا لا يجعلنا نقرها أبداً أبداً فى بذاءة الألفاظ

يعنى أشياء زى اللى إنت إستشهدت بيها فى ردك

أنا بخلى أولادى يعملوها لكن بألفاظ مهذبة

زى ها إستنجينا
أو حافظنا على نظافتنا الشخصية

و لإنهم إتعودوا على كده من صغرهم فبيبقوا فاهمين المعنى
و بدون ألفاظ سيئة

يا أدهم بك

كل إناء ينضح بما فيه

و المفروض الإنسان الصح
إما يقول الصح أو يسكت أحسنله و أحسن للناس اللى حواليه

ادهم سعيد said...

Anonymous

ان استفزك للتبرع بتعليق لا يطال اصل التدوينة، بل القشور التي نجح احد البلهاء في جرنا اليها، امر لا استشعر فيه الاجر

وان كان تصديك لتقويمي يتطلب مني لفت نظرك الكريم، الى واقع ان الفحش هو مااستخدمتيه في ردك على الفحش الذي افترضتي وجوده في ردي على خصيم الله.

اذا كان مستواك يسمح بمباشرة الامر بالمعروف والنهي عن المنكر، تكرمي بتذكر القاعدة الاولى في تطبيق الامر بالمعروف والنهي عن المنكر
وهي ان تكون النية خالصة لله،والاستفزاز الذي شعرت به يخرج بك عن هذه النية.
القاعدة الثانية هي معرفة المعروف ومعرفة المنكر، وردك يؤكد انك ممن اختلطت عليه المفاهيم واصبح يظن المنكر معروفاً والمعروف منكر، وليست وظيفتي ان الزمك بالتفقه في الدين قبل التنطع لنصيحة لم تطلب منك
القاعدة الثالثة احتمال التأثير في الشخص الذي تنوين هدايته الى المعروف ورده عن المنكر، وقولك ان كلامي تخريف وترهات، يجعلني فاقداً للاهلية ويضعك في خانة السفهاء لكونك تحاولين اصلاح ما لا يصلح
القاعدة الثالثة الاولويات، ووصف سيدة محصنة محترمة مجاهدة بالفاظ تسيء ال شرفها وكرامتها اولى بالتصدى والردع من القبض على يد من حاول نصرتها بما يستطيع.
القاعدة الرابعة الامن من الضرر
وهي القاعدة الاولى التي تحرزين وجودها، بدخولك بغير اسمك واكتفاءك بالتعليق على القشور دون الجوهر

تحياتي وشكرا لتهذيبك مع اولادك وتربيتهم على لفظ الاستنجاء، وارجو ان يعم التهذيب للتريث قبل وصف كلام الناس بانه تخريف وترهات لمجرد مخالفته لمزاجك

ادهم سعيد said...

ملاحظة : الحكم الشرعي في البذاءة المكتوبة غيره في البذاءة المتلفظ بها امام الناس بدون ضرورة وغيرها في التلفظ بها لضرورة وغيرها في التلفظ بها بين الزوجين في مخدع الزوجية


والرابط ادناه يغطى بعض الحالات صراحة ويغطى الحالات الاخرى كناية:
http://www.islamonline.net/servlet/Satellite?pagename=IslamOnline-Arabic-Ask_Scholar/FatwaA/FatwaA&cid=1122528621654

وكل اعتراضي على خصيم الله: هو تجرؤه على وصف الكاتبة بماهو اولى به من الفاظ فاحشة، واتهامها زوراً بارتكاب مايخالف الدين في تدوينتها وهذا غير صحيح وكذب على الله وشريعته
.

على طبيبة مسلمة لا يتخطى لفت نظرها الى واقع انها تجهل المعروف الذي يحتم عليها الدفاع عن كاتبة التدوينة تجاه من بادر بشتمها واتهامها بما لم تجاهر به او يعرف عنها على وجه اليقين
وتجهل المنكر لونها تصف ماليس منكراً ولا محرماً بغير ماوصفته الشريعة.

وانت ياسيدة مجهولة كررت نفس الخطأ الذي ارتكبته طبيبة مسلمة بدون ان تملكي لياقتها وتهذيبها في ردها الاول، ويكره ان تكون الاخلاق ظرفية تظهر في مكان وتختفي في آخر

Anonymous said...

يا خساره
تعرفي يا خيخه
انتي مره كنتي بتتكلمي تقريبا عن المخطوبين حاجه زي كده وقولتي انه خطيبك مينفعش يمسك ايدك مسك ايدن لا مش فاكره البوست بالظبط
بس تعرفي انا اما اتخطبت كل ما اخرج مع خطيبي افتكر اوي الجمله ديه واقول خيخه قالت مسك ايدين لا
افتكرك وانتي بتكلمي عن الجديه في التعامل
وادعيلك
بعد البوست ده مش عارفه
رغم الحرقه اللي اتكلمتي بيها
الا اني اتصدمت من الكلام اللي قريته
خيخه
انتي كنتي صوت ضميري في حاجه معينه
تفتكيري بعد كده هينفع افتكرك مع اللي قريته
حرام عليكي يا شيخه والله

بت خيخة وأي كلام said...

اخر تعليق

المجهولة

بتقولى يا خسارة

زى ما اكون قبل كدة كنت رافضة ان حد يمسك ايدى
وبعد كدة وافقت انى اتمسك من اى حد


بتقولى يا خسارة علشان محروق دمى من ناس كانوا بيساومونى على شرفى
!!!!!!!!!!!!!!!!!!!!!!!!!!


انا ماطلبتش منك انك تعتبرينى صوت ضميرك

لكن انا فى البوست ده ماغيرتش مبادئى علشان تقولى يا خسارة


كلمة يا خسارة تتقال
لما تلاقينى بكتب انى اضطريت انى ابيع نفسى علشان خاطر القرش

ساعتها يبقى معاكى الف حق تقولى يا خسارة


كلمة خسارة ماتتقليش انا

تتقال لناس تانية اتنيلوا على عينهم واختاروا انهم يتنازلوا عن شرفهم وكبريائهم
علشان خاطر الفلوس

Anonymous said...

أدهم سعيد

بنيت كل ردك على أساس خاطئ ألا و هو أننى أسدى لك النصح
!
و لإن الأساس غير سليم فأتى البنيان معوج

لم أقصد و لم أهدف أبداً نصيحتك لسبب بسيط و هو من خلال كلامك يتضح لى على الأقل أنك شخص قد ركبك الغرور فأنت ممن لن ينفع معهم نصح و لا إرشاد منى على الأقل أيضاً

إنما دعاء إلى الله أن يهديك سبل الرشاد

أما عن النية الصادقة يا أدهم بك و التى تتحدث عنها
فنيتى كانت غضبة فى الله

ألم تسمع أن رسول الله صلى الله عليه و سلم كان يغضب لله و الأمثلة على ذلك كثيرة قد لا يتسع المجال لذكرها

غضبت لظلم حاق بإنسان كل ذنبه أن ذكرنا بضرورة ترك الألفاظ الغير مهذبة

غضبت لضياع البديهيات المتمثلة فى ضرورة التمسك باللفظ المحترم تماماً كما نتمسك بالسلوك المحترم

فالضيق من أمر أو المعاناة لا تعطينا الحق أبداً فى أن نكون غير مكترثين لكيفية التعبير عن هذا الضيق

و إلا كان من حق أكثر من نصف الشعب المصرى إستخدام بذئ الألفاظ للتعبير عن عذاباتهم

و الفحش يظل فحشاً مكتوباً أو مقرؤاً أو مرئياً


أخيراً لم أفهم ما تعنيه هنا
____________
الى واقع ان الفحش هو مااستخدمتيه في ردك !!!!على الفحش الذي افترضتي
_________

أين الفحش الذى إستخدمته فى ردى

اللهم إلا كانت تأتيك خيالات فتتحدث عنها و كأنها حقائق
و فى هذه الحالة أكيد كان سيكون ردى عليك مختلف
من قبيل مثلاً
ربنا يشفى و شدة و تزول

و الحال فعلاً يجنن العاقل فاصبر و احتسب

Anonymous said...

أدهم سعيد

رجعت إلى الرابط الذى ذكدرته
لعلى أجد لك حجة
http://www.islamonline.net/servlet/Satellite?pagename=IslamOnline-Arabic-

Ask_Scholar/FatwaA/FatwaA&cid=1122528621654

و لكنى لم أدرى ما علاقته بالموضوع
!!!!!!!!!!!!!!

الفتوى لم تأت على ذكر الفحش المكتوب و المقرؤ و المسموع و المرأى

مش عارفة إنت بتستشهد بإيه بجد
!

مش لاقىة أى علاقة لها و بما نتحدث بخصوصة

يعنى أنا ممكن أستشهد بألف فتوى تحرم الأفطار فى نهار رمضان لغير المضطر
ده إيه علاقته بموضوعنا

أى كلام و خلاص
؟؟؟

ادهم سعيد said...

يامجهولة

الفحش في اللغة :هو القبيح من القول و الفعل، و تستعمل بشكل أكثر في القول ، و من تكلّف سب الناس و التعمّد في ذلك سمي متفحش.
وآخر معرفتي بكلمتي تخريف وترهات انهما سب وفحش في الكلام وقد ورد في ردك على ردي بالحرف : كلامك كله تخريف و تُرهات
واذا كنت تعتقدين ان هاتين الكلمتين ليستا كذلك وتنفعان للوصف،اسمحي لي ان اقول على سبيل الاستفزاز: امك خرفت في تربيتك وابوك لم يعلمك الا ترهات
ووضعت والديك الكريمين في هذا الموضع لتشعري قليلاً بوقع هاتين الكلمتين على من سنه من سنهما.
افتراض انك تسعين الى نصحي كان خاطيء؟ وهدفك الوحيد هو الدفاع عن خصيم الله؟ اليس الدفاع عن رمي محصنة محترمة مجاهدة بما ليس فيها وهي على كل حال لم تبادر الى شتم احد كما فعل خصيم الله اولى واحق؟
تكلم الكل عن ضرورة ان تبادر صاحبة التدوينة الى عدم استعمال كلمات خارجة عن الذوق العام، ولم يتهجم عليهم احد بمن فيهم انا، حتى اتى خصيم الله الاحول ونسخ كل الكلمات المتفرقة بالتدوينة واعاد نشرها مجدداً في تعليقه وشتم صاحبتها بالقول جاتك القرف
وكل مافعلته انا هو تذكيره بانه اعاد نشر كلمات الفحش بدون ان يكون مضطراً كصاحبة التدوينة التي تصف واقعاً لا يصلح معه استخدام الكلام المنمق. وشتمته بنفس الشتيمة: جاتك القرف، بدون زيادة او نقصان
فغضب لنفسه وسألني عن المبرر واوضحته له وقلت اني جاهز ان اعتذر له فور اعتذاره لصاحبة التدوينة، فماذا فعل ؟ استغل حديث طبيبة مسلمة ليشتمها مجدداً بما يعاقب عليه الشرع والقانون وشبهها ببنات الليل وبمن لا يحب العيش الا في القذارة، وردت عليه صاحبة التدوينة بما يدل على طهر منبتها وسامحته على فعله
وبما ان المذكور شتمني ايضاً في نفس التعليق رددت عليه بما يدل على واقع اني لم اصل الى مستوى مسامحة من يشتمني فتركت الاولى وفعلت مايحق لي
وتدخلت انت غير مشكورة للدفاع عن القاتل ضد المقتول
مجهولة هانم انا اعتذر على حسن ظني بك، احتملت ان لك عقلاً لم يكتمل بدراسة الفقه ويتضح الآن انك معتوهة تماماً وتتكلمين لمجرد التكلم
وطبعاً وصفك بالمعتوهة هو فحش في الكلام يجيزه لي مبادرتك اليه وانا لست كصاحبة المدونة ولم اصل الى مستوى مسامحة من يتجرأ علي بدون حق كما سبق وذكرت
الرابط الذي وضعته وفيه تصريح وتلميح حول موضوع النقاش، ورد فيه ذكر لحديث ماعز ابحثي عنه فمن البلاء ان يجتمع الكسل مع البلاهة
وبما انك مشغولة عن التعليقات كما صرحت آنفاً واني اضن بوقتي ان يضيع مع من يناقش تنعتاً ويؤذي محادثه
فسلاماً عليك وشكرا على دعاءك ومردود لك ولمن رباك بنفس النص والنية

moka said...

حسسسسسسسسسسسسسسسسسسبنا الله ونعم الوكيل

الراجل رئيس الجمهوريه الله ينتقم منه مش عارفه يوم القيامه هيقف قدام ربنا يقول ايه لما يساله عنك وعنى وعن المصريين كلهم من ساعه ما مسك الحكم لحد ما هيموت

فى رب اسمه الكريم حسسسسسبنا الله ونعم الوكيل

Anonymous said...

moka





حسبنا الله ونعم الوكيل

الراجل رئيس الجمهوريه الله ينتقم منه مش عارفه يوم القيامه هيقف قدام ربنا يقول ايه لما يساله عنك وعنى وعن المصريين كلهم من ساعه ما مسك الحكم لحد ما هيموت

فى رب اسمه الكريم حسسسسسبنا الله ونعم الوكيل

nabil said...

مع اني مع حضرتك في كل كلمه قولتيها
الا انا فيه افلااااااااظ كتيير مينفعش تطلع بسووله كده
ومينفعش تتقال

ممكن تعبري عن كل اللي انتي عاوزاه بس باسلوب كويس

users online