Monday, November 16, 2009

حُضنك حبيبي




-->
المفروض يكون حضني انا
لكن لما بنحضن بعض
ورغم انك بتكون غرقان جوايا
ورغم انك ماتقدرش تحاوط ضهري كله بايدك
الا انى بحس انى في حضنك انت
ولو فيه حد غرقان فى التاني
بكون انا الغرقانة جواك
كفوف ايدك وانت حاضني مابيلمسوش بعض
فيه بينهم مسافة شبر او اكتر
لكن مجرد انك تحضني
بحس فجأة إني مستورة
وايدك طلع منها توب قماش
اتلف حواليا وسترني
من غدر الايام والناس
بحس بالامان وبطمن
وبزعل
بزعل اوى
بزعل من نفسى انى زعلتك يوم
او انى قرصتك فى لباليبك يوم
ما انت برضه بتنرفزنى
لأ ... أنا بكدب
أنت مش بتنرفزني ولا حاجة
أنا اللى عصبية شوية ومعنديش صبر
واللى يغظني اكتر
كرم اخلاقك فى عقابي
وبدل ما ترفض حضني
بتجرى عليه
وتقولى بحبك اوى
صدقنى ساعتها بكره نفسي
واندم على صوتى العالى معاك
وبندم على الكارتون اللى منعتك عنه
وبتمنى انك تقلب وشك
وبتمنى ساعتها انك تهز اكتافك
وتقولى لأ مش جاى انا زعلان منك
لكن عمرك ما رفضت الحضن
بتجرى عليه وبتغرق جوايا
لكن لو جينا للحق
تلاقينى انا اللى بغرق جواك
بغرق فى حنانك
وبحس بطبطة ايدك على ضهرى
بتشيل هموم سنيني
واللى يتعبني انى الاقيك بتقولي
معلش يا مامى
انا مش زعلان منك
ولما ابوسك بوسة فى خدك
تمسك ايدى وتبوسها
وتقولى ربنا يخليكى ليا
انتي حبيبة قلبي
واغرق اكتر جوة فى حضنك
واسال نفسي
ياترى وانت فى حضني بتحس بايه
حاسس زيي انك غرقان وانك جوايا اوى؟
يا ترى عارفة احميك واطمنك واديك الامان؟
ولا انا خيخة معاك انت كمان؟


شريف ... حُضنك حبيبى
مليان أمان

انتهى

بت خيخة وأي كلام

48 comments:

صيدلانيه طالعه نازله said...

مش عارفه اقول ايه
ربنا ما يحرمش ام من ضناها و لا ابن من امه
ربنا يخليكوا لبعض و يفرحك بيه
و يعوضك بيه خير عوض

عاشقه الرومانسيه said...

مش بقولك يانورا
بحب جدااااااا كتاباتك عن شريف
بحس انك ام مش عاديه
بحس بحنانك قوى
اللى عندها الحب ده كله عمرها ماتبقى خيخه مع ابنها
ربنا يبارك لك فيه
ب ح ب ك
ونفسى اشوف شريف جدااااا

حنين القلب said...

الللللللللللللللللللله يا نورة
ربنا يخليه ليكى ويحفظه ويجعله ستر ليكى طول عمرك
كلامك حسيته اوى لدرجة انى دمعت
جميل اوى لما تحسى ان الحته اللى كانت منك وجواكى سند ليكى وبتحميكى

ربنا ما يحرمكم من بعض ابداااااااا

Wanda said...

يارب يديم الحضن ده عليكى ديما

جميل جميل جميل

KING TOOOT said...

طول عمري بأحتار في إحساس الأمومة ده و مش بأعرف أفسره
يمكن لأني راجل و طبعا ماعنديش إحساس أمومة
ورغم إن عمر إبني و طبعاً إبن بوبو في نفس الوقت إلا إني بأحس إن أحساسنا بيه مختلف
هي حبته من أول لحظة عرفت فيها إنها حامل ، إنما أنا أحتجت وقت كتير علشان أحس بيه
بوست هايل جدا و إحساس صادق جداً جداً
تحياتي
وإحترامي للأستاذ شريف
KING TOOOT
الأم بحر كبير كبير بس مايغرّقش
وحضن يجمع مابيننا ويلم ما يفرّقش
الأم خير و وأمان و نعمة من الرحمن
وعشانها عين الزمان تضحك و ما تبرّقش
وعجبي
KING TOOOT

فاتيما said...

آاااااه يا خوخة
انا مجربة الحضن دا
لما روحتلكم عند دوبا
و شريف جرى عليا
و إدانى حضن على حين غرة
و من غير ما ألحق استعد
و لا اقول ازيك
و لا أقعد زى العادة
أشحت الاحضان من العيال
كبرتوكول قديم متبع
خلاااانى بعد فترة ...إتعقدت
و بقيت مطلبش من أى عيل بشوفه
اى حاجة تانى
لا بوسة
و لا حضن
و لا مفيش ازيك يا طنط
و لا أى حاجة خالص
عشان الإحراج ...
شريف إختصر كل هذه المذلات
و الأحراجات
و جنبهالى تماماً
و جرى عليا بكل براءة
و حضننى
و قالى وحشتينى يا طنط
انا اتكركبت من جوايا
و روحت فى ميت حتة و رجعت
ومكنتش متوقعة
دفقة الحنان الصافية
والمفاجئة دى
و بهذا الشكل
ربنا يحرسه يا رب
و أرجع و اقولك
انتى السبب
العيل بيطلع حنين
و حابب الناس لأن امه
بتعلمه الحكاية دى
من و هوه نونو ..
بيبقى ملتصق بيها
و بيتشرب طباعها
و يسمع كل كلامها
لو قالتله
حب الناس
خليك كويس معاهم
اجبر بخاطرهم
و كون حنون
هيسمع الكلام
و ينفذه
لو الأم باردة تجاه الناس
و جافة فى مشاعرها
هيطلع زيها
او يبقى ناشف شوية زى باباه
و باقى الرجالة عموما
و يا نونو معاكى قلباً
و قالبا
إن حضن حبيبك
هو أحصن مكان فى الكون
و ربنا ما يحرمك
من حضنه ابدااااا
يا حبيبتى
بوسس كتيييييييير عشان خاطره

Anonymous said...

السلام عليكم انا بجد مش عارف اقولك ايه ايه كمية المشاعر دى بجد ربنا يخليكوا لبعض لو سألتى نفسك سؤال واحد بس وجاوبتى عليه حتعرفى ان انت مش خيخه ولا اى حاجه حتعرفى انك اجدع ام فى الدنيا السؤال هو مين علم شريف يبقى كده يبقى حنين ويطبطب ويسامح وياخدك بالحضن ها عرفتى الاجابه اكيد الوقت عرفتى ان انت الاساس فى الحب ده انت اللى زرعتى وانت اللى حتحصدى ان شاء الله انا بجد باشكرك على انك ان شاء الله حتخرجى للمجتمع فرد صالح كده ربنا يخليه لكى يارب ويكبر ادام عنيكى يلا سلامووووووووز ياخيخه على راى سوووو

اسلام الحضرى said...

ربنا يخليهولك ويديم حبكم لبعض

مواطن شووجااع said...

ربنا يعينكـ يا أم شريف وتقومي بكل واجبكـ تجاه شريف كأم
وتكوني له نعم الأم
وبإذن الله يكون ليكي نعم الإبن
وربنا يرزقكـ بر شريف ليكي في حياتكـ
وبعد مماتكـ


//



شوفي دا كدا ع الماشي
http://www.youtube.com/watch?v=ZXAVOU6VoJc


ودا كمان بالمرة
http://www.youtube.com/watch?v=m7_K2KVm6tI



ودا كمان معلشي بقي رخامة
http://www.youtube.com/watch?v=H8ndXD0DpW4&feature=related

دمتي بخير وفي رعاية الله

خواطر شابة said...

رينا يخليكم لبعض

أم بتول said...

لأ طبعا عمرك ما كنت خيخة ابدا و دايما بقولها لك ، ومع شريف بالذات لا يمكن تكونى خيخة أنت أحسن أم فى الدنيا و حضنك بيدفيه فى عز البرد و يخلية يحس بأمان الدنيا كله فى عز الخوف ، هو كمان بيغرق فى حضنك ، عارفة علشان تعرفى أنك فى عيون ابنك أحلى و أحسن أم الدنيا و ما يقدر يستغنى عنك أبدا أبدا ، بصى لطفل مبهدل و حافى و يمكن عريان و أمه قاعدة بيه على الرصيف و يمكن بتشحت علية و هو قاعد جنبها بيلعب بأى حاجة يمكن كيس شيبى فاضى و بيملاه بالتراب و يفضيه ، حاولى تاخديه منها و قولى له ها حميك و البسك و أنظفك و أأكلك و تعيش فى بيت نضيف بس سيب مامتك و تعالى معاليا ، عمره ما ها يوافق أبدا حتى ولو كانت الأم البديلة دة ملكة جمال العالم و ها تعيشه فى قصر مش على الرصيف ، ها يرفض و يعيش مع أمه على الرصيف و أخر الليل يبات فى حضنها فى عيشه ولا يسيبها ابدا ، أنت أحسن أم و أحسن أم و أجمل أم ، ربنا يخلية لك و يدفيكى بحبه و حنانه و يعوضك بيه كل خير ، و يخليكى ليه و تغرقيه فى حبك و حنانك .
حضن كبير و بوسة كبير لشريف صاحب أكبر قلب بيحب ماما .

dreem said...

ربنا يمتعك بيه يا نورا
واطمنى العيال بينسوا الوحش اللى بنعمله فيهم بس ما بينسوك الحلو ابدا .. أو ممكن تقولى ان الحلو - الحنية والاهتمام والحب - بينسوا الزعيق والعقاب
ربنا يخليكم لبعض

Manamino said...

ربنا يخليكم لبعض

همس الاحباب said...

يااااااااه يا خيخة مشاعر رائعة واحساس جميل جدا
ربنا يخليكوا لبعض وتفرحى بشيكو وتشوفيه زى ما تحبى واكتر كماان
تحياتى

... amr said...

هو محدش قالك ان انتي عرفتي تربي الشاب الصغنون دة ؟
:)

Anonymous said...

حضن الامان ...... ف الجون التعبير ده .. محاتجه وحاسه قوي ........... بوسات واحضان لشريف وبالمره اديني رنه هتلاقي الدنيا جنه هتلاقي الاعمي فتح والاعرج قام وغني

حاجات جوايا said...

ايه الجمال ده يا نورا
احساس طاغى بالامومة
هو ده معنى الامومة الحقيقة
كلامك كأنه عنى انا ودودو
ربنا يخليهوملنا ويباركلنا فيهم يارب ويكرم كل ام فى ولادها

MaNoO said...

الا دا مستحيل تكونى معاه خيخة احساسك دا من أسمى الاحاسيس فى الوجود وشعورك اللى بحسى بيه أكيد بيوصله واكتر كمان والدليل انه هو كمان مش بيقدر يزعلك حتى لو انتى زعلتيه الكلام طالع من جواكى اوى بجد وانا عن نفسى ولا عندى اولاد ولا حاجة ولا عمرى جه فى بالى الموضوع بس اول مرة احس ان الحياة حلوة كدا مع ان برده احساس الاب عمره مايكون زى احساس الأم ربنا يخليهولك يارب وتشوفيه فى احسن مكانة انتى تحبيها ليه

البنفسج الحزين said...

ماشاء الله ربنا يخليهولك ويبارك لك فيه

lily said...

انا كنت هعيط وربنا ستر و معيطتش
وصفتي مشاعرك بطريقة بسيطة وخالية من الكلكعة
و في نفس الوقت معبرة جدا وصادقة اوي
السهل الممتنع
=)

Anonymous said...

ربنا يخليكو لبعض
وميحرمكوش ابدا ابدا من بعض

كيكى عوووووو said...

انا عايزة اجرى فى حضن امى وارفع حواجبى وابص بنص عين واقولها بنبرة مليانه شك: بتحبينى زى خيخة ما بتحب ابنها كدة!! مش عارفة ليه حاسه انى هطلتش الم وتقولى اه يا واطية مانتى زى..........احم احم
** والله واحنا كمان بنحبكم اوى هى المشاعر بينا متبادلة بس تحسى كدة ان احيانما مش بنصرح لبعض
انا بكلم بصفتى انا من الابناء وانتى من الامهات

eng.muslimah said...

السلام عليكم
بسم الله ما شاء الله علي شريف يا خيخه
ربنا يخليهولك ويباركلك فيه وما يحرمكيش من حضنه ابدا

بنت الغربة said...

حبيبتى خيخه
انا بقالى كتيير جدا مابروحش واعلق عند اى حد وده مش معناه انى مش باقرأ البوست لاخره ..بس مش باحس انى عايزة اقول حاجه..
لكن البوست ده مختلف قوى لأنك قلت حاجات كل ام تقريبا بتعملها وبعدين بترجع تندم عليها..
واحيانا ااقول لازم الشده علشان مايطلعش خيخه زى امه..واحيانا باكره نفسى من عصبيتى عليهم..
صدقينى ابنى الكبيير باحب احضنه قوى مع انه دلوقتى كبر قوى وبقى يخنقنى بحضنه.وبقى يتكسف احضنه قدام صحابه او فى المدرسه او فى الشارع..بقيت ازعل قوى على ايام زمان لما كنت باحضنه زى مانا عايزة وفى اى مكان..
صدقينى احلى ايام هى اللى بتعيشيها مع اولادك بحلوها ومرها ..وصدقينى لما ااقولك ماحدش فى الدنيا هيحبك بجد زى مانتى بعصبيتك ورقتك..حب حقيقى ..غير ولادك..
تحياتى ليك يا احلى خيخه
داليا

Dr. Kafy said...

ربنا يحميه و يكبر و يحميك كمان و كمان يا أم شريف

مجرد حلم... صغنتوت said...

اكيد هو كمان حاسس بالامان ده
واكيد هو كمان بيكون مبسوط اوي لما يحضنك
واكيد عارف انتي بتحبيه اد ايه
واكيد انتي بتعملي كل اللي تقدري عليه علشان تحميه وتطمنيه وتديله الامان

ربنا يخليهولك يا رب ويباركلك فيه وتفضلي تحسي بالامان ده في حضنه

Anonymous said...

ربنا يخليه لكي
يا
نورا
ويكبر ويبقئ راجل في افضل مراكز
ويعطيكي الصحة والعافية




تامر

Lady E said...

بحب جدا البوستات اللي بتحكي فيها عن شريف ربنا يخليهولك ويباركلك فيه بجد يا نوران يا أم شريف انتي ام جميلة اوي وانسانة رقيقة وجدعة بجد

قوس قزح said...

تصدقى بحس نفس احساسك ده لما باحضن الولاد
بحس ان انا المحتاجة للحضن ده
اصل لسه حضنهم اخضر
و مش بيحضنوا الا برضا و حب

ابنك جميل يا خيخة ما شاء الله عليه
و اكيد هو محتاج لكى اكتر
احتويه انتى كمان على اد ما تقدرى

تصدقى من كلامك نفسى احضنه
ربنا يخليه و يحفظه و يكون لكى دايما سند فى الدنيا

الشنكوتي الكبير said...

يااه يا خوخه

زمان كانوا بيقولولنا مش هتحسوا بحب اهلكم الا لما تخلفوا
بس انا عايز اضيف بقى انك بتحسي قوي بحنان اهلك عليكي قوي قوي لما تلاقي الدنيا كلها ماشيه بالفلوس والمصالح والدنيا بقت مقفله قوي وتحسي انك لوحدك قوي وتلاقي امك وسط الزحمه برغم ضعفها وبرغم تعبها واقفه عماله تشيل معاكي ماديا ومعنويا فاكره اللي انتي ناسياه وواخده بالها منك
في وقت ما الناس كلها بتقولك شيل بقى ما انت بقيت شحط وعايز تتجوز واستحمل بقى يا بقف
هتلاقيها هي لسه مصره انك الطفل اللي محتاجها تصحيك الصبح بكوباية اللبن وتطمن انك مبتنزلش الا لما تغير ريقك
وتهزر معايا وتكلمني
ونقعد نرغي لحد ما اتأخر عن الشغل كل يوم واعاكسها واقولها بس يا رغايه عايزه امشي مع ان انا اللي عمال ارغي مش هي تطبطب عليا وتقولي ما انا مبلحقش اقعد معاك غير الشويه دول

ربنا يحفظ كل ام ويبارك في امي وفي امك

ويبارك فيكي ويجعلك خير ام لخير ابن


سلاااااااااااااااااااام
يا ام شريف اخوكي ايهاب

فاتيما said...

انتى فين يا خوختى
غطستى كدا ..صباح القلق بقى
يا رب تكونى منشغلة فى خير
انا بس قولت اطمن
سلام مؤقتا يا حبيبتى

صبرني يارب said...

ربنا يخليهولك يا جميل ويخليكى له

بس ده ما يمنعش انك خيخه طبعا على جميع الاصعده
ههههههههههههههههههههههه

رجل تحت الصفر said...

خيخة معاه انتي كمان


أول تعليق

:)

احمد أبو العلا said...

يا بختك ياعم شريف

funky girl said...

ربنا يخليهولك على طول يا رب :):)
و يحفظهولك :):)

ساسو said...

الله....... جميل اوي كلامك والحساس الجميل
بجد رائع اوي
ربنا يخليلك شريف
انتي بجد خليتيني يبقي نفسي في حضن زي ده من طفل
ربنا ما يحرم حد منه ويرزقنا الذريه الصالحة..امين
(علي فكره خطيبي اسمه شريف برضه

سومه...مجنونه فى بلد عاقل said...

يا رب ربنا يحفظهولك ويحميهولك
بتفكرينى بنفسى انا وماما يا خيخه ربنا يخليكم لبعض ي رب

ameen said...

:)

فاتيما said...

بت يا خوخة انتى كويسة؟!!

ويكا said...

يخرب عقلك .

ربنا يباركلك فيه .

بت خيخة وأي كلام said...

فاتيما

انا بخير يا حبيبتى

بس كنت مشغولة بشريف وبالبيت شوية

المهم شكرا يا حبيبتى على سؤالك

ماتحرمش منك يا طمطومة


وشكراً لعاشقة الرومانسية على البوست بتاعها الاخير






والف شكر ليكم كلكم على تواصلكم معايا

وبعتذرلكم عن التاخير فى نشر التعليقات


شكرا ليكم
اختكم خيخة

nor said...

ما شا ءالله
احلي حاجه في الدنيا الاطفال ما بالك يكونوا اولادك
ربنا يحفظه ليكي حببتي
متابعه اوي مدونتك بس يمكن اول تعليق ليه مش عارفه ليه
تسمحيلي يا نور ه اقولك ان عشان اولادنا لازم نكون احسن ناس في الكون
وانتي انسانه جميله اويو ده وضاح من كتاباتك لكن محتاجه شويه ضبط بس في الالفاظ عشان شريف حببتي كمان
ربنا يخليه ليكي و يكون احلي انسان في الكون و يفرحك بيه و يفضل حضنه سندك وأمانك وتكون ام زي السكرة له وسند وعون له
اعانك الله علي تربيته حببتي
تحياتي

حزينه said...

احلى حضن
صحيح اللى قال
ان الامهات اللى محتاجه ابنائها مش العكس
ربنا يخليهولك



حزينه

احلام جوليا said...

ربنا يخليلك شريف يارب بجد بحس نفس احساسك ده مع ابني ونفس الشعور بالذنب اني عاقبته ربنا يحرص اولادنا اجمعين يارب امين

نعكشة said...

ربنا يخليكوا لبعض دايماً
ومايفرقكوا عن بعض
ولا دنيا ولا آخرة
في الجنة باذن الله
ويجعله ولد صالح
ويجعلك ام صالحة

سلامٌ عليكِ

Anonymous said...

واحد صاحبي بالصدفه كان قاعد جمبي وانا فاتح مدونتك فشاف العنوان بتاع اول بوست

كان تعليقه
حضن ايه يا ام حضن حضنك قطر

عذرااااا

مواطن شووجااع said...

فينكـ يا أم شريف ؟

Anonymous said...

بجد مش عارفة اقولك ايه انتى خلتينى ابكى واضحك فى وقت واحد انا مش مجنونة والله بس انتى جبتى الاحاسيس بتاعتى كلها واتكيتى عليها وقدرتى توصفيها بشكل بجد اكتر من رائع تسلمى غاليتى وربنا يخليهولك ياربومتتحرميش ابدا من حضنه ويجعله ابن بار امين يارب

users online