غاب عنها يجى اسبوع وزيادة
مافيش ولا تليفون ولا زيارة
ولا اى حاجة تقدر بيها تطمنها عليه
واللى زاد وغطى انها لازم تسافر مع الاسرة خارج القاهرة
ورحلتها مع الاسرة هتخليها تغيب اسبوع تاني
قبل ما تسافر واثناء السفر
حاولت تتصل اكتر من مرة
وتليفونه على طول مرفوع مؤقتا من الخدمة
كان كل قلقها ان يكون جراله حاجة
او يظهر فجأة ويعرف انها سافرت من غير ما تقوله
بعد مارجعت من رحلتها
وبعد محاولات عديدة للاتصال بيه
قررت انها تروح لحد باب بيته
وتشوف ايه الحكاية
عند مدخل العمارة
شافت عربيته بيغسلها البواب
سالته
هو فوق
قالها اه
ده لسة راجع من اسكندرية امبارح هو والمدام
لو تحبى تطلعيلهم هما فوق دلوقتى
فى طريقها للاسانسير كانت ماشية وهى شبه مغيبة عن الواقع
استغربت الكلمة وقعدت تكررها اكتر من مليون مرة
المدام
المدام
المدام
!!!!!!!!!!!!!!!!!
وتقنع نفسها انها اكيد سمعت البواب غلط
وانه اكيد قال كلمة تانية تشبه المدام
يمكن قال ده لسة راجع امبارح هو و هشام
اه معقول كدة
على الاقل هشام يبقى اخوه
لكن المدام دى كلمة مش مفهومة
وبعدين يعنى ايه المدام؟
مدام ازاى يعنى؟
امال دبلتي اللى فى ايدى اليمين دى معناها ايه؟
ماينفعش يبقى فيه مدام
انا خطيبته انا لسة هابقى المدام كمان كام شهر
اكيد قال هشام مش المدام
وعند باب الاسانسير لقت ورقة كبيرة متعلقة مكتوب عليها
عذرا الاسانسير عطلان
وقفت عند اول درجة من السلم
وبصت لفووووووووووق
وقالت مش مهم
هاطلع 13 دور واللى يحصل يحصل
انشالله نفسي يتقطع
بعد طلوع السلالم
وبعد قطع الانفاس
وبعد ما قعدت على اخر درجة على السلم علشان تاخد نفسها
قامت وخبطت على الباب
سمعت صوت حد ورا الباب
حد بيتحرك
بصت على العين السحرية
لاقت ان النور وراها اختفى
عرفت ان حد بيبص عليها من العين السحرية
تأهبت للدخول وانه هايفتحلها الباب دلوقتى
بس محدش فتح الباب
استغربت و خبطت تانى على الجرس
سمعت اصوات و همهمات
واصوات حد بيمشى
اتنرفزت
اتعصبت
ايد على الجرس
وايد على الباب
الجرس اتحرق من كتر الضرب عليه
استخدمت ايديها الاتنين فى التخبيط على الباب
محدش فتح
التخبيط اتحول لهجوم
واستخدمت رجليها فى التخبيط
بدات تعيط
بدات تسمع فى عقل بالها صوت البواب
وهو بيقول لسة راجع مع المدام
بدأت تصدق بوجود المدام
بدات تحس بوجود المدام
بدات تشوف المدام وهى قاعدة فى حضنه
بدات تشم ريحة المدام
بدات تضم ايديها الاتنين وتخبط بقبضتيها
بدات تنهار
وقعت قدام عتبة الباب
قعدت على الارض
تفتح شنطتها
تطلع منديلها
تمسح مناخيرها
تاخد بعضها وتروح بيتها
وتقرر انها عايزة
تنااااااام
تناااااااام
تنااااااااااام
تصحى على صوت اخوها
بيقولها
جه وقاعد برة
تبص لاخوها ومتنطقش ولا كلمة
تلبس شبشبها
تقابله ببجامتها
يقابلها بابتسامة بيدارى وراها جريمة
تقابله بفتور
تقعد جانبه
وتقوله حمدلله على سلامتك
ياترى اسكندرية كانت حلوة
يسكت ويتجهم
تساله وعلى شفايفها ملمح سخرية
واخبار المدام ايه
يقولها افهمينى بس
ده وضع مؤقت علشان
تقاطع كلامه
و تتنرفز وتقوله كفاية كدب بقى
حياتك كلها كدبة كبيرة
غرقت نفسك وغرقتنى فيها
انا زهقت
يعلى صوته من مبدأ خدوهم بالصوت لا يغلبوكم
لا لا لا مش كدة
ماكنش بيعلى صوته علشان المبدا ده
كان بيعلى صوته
من مبدأ انها بتحبه وبتخاف على زعله
وانه لما يزعق لازم هى هتكش وهتسمع الكلام
وهتقوله خلاص طيب انا اسفة ماتزعلش
من مبدا انها مجرد خيخة
راحت ولا جت
هى خيخة
راحت ولا جت
هى يويو
راحت ولا جت
هى عروسة ماريونت
يحركها زى ماهو عايز
من اعتقاده ده
كان بيزعق ويعلى صوته
ويقولها
انتى قرفتينى
انا هالاقيها منك ولا منها
تبصله وهى وشها جامد
مافيهوش اى تعبير
وتتكلم بهدوء
وتقوله
وانت ماتهونش عليا تكون قرفان منى
انا هاريحك
تقلع دبلتها وتديهاله
وتقوله خلاص انتهينا
اشوف وشك بخير
تقف علامة على انتهاء اللقاء
يقف ويتسمر فى مكانه
تمشى لحد باب الشقة وتفتحه
يمشى فى اتجاه باب الشقة فى بطء فظيييييييييييع
يقف على السلم ويفضل بصصلها وهى تبص فى الارض
وبصوت هامس بتحاول تدارى دموعها المستخبية جواه
تقوله مع السلامة
وتقصد انها ماتقولش لا اله الا الله
يفضل ساكت متسمر على السلم
وهى تقفل الباب بشوييييييييييييييش
اخر الكلام
مش كل حب بينتهى تبقى انتهت بعده الحياة
انتهى
بت خيخة وأي كلام
57 comments:
Alsalam Allaykom, Dear Noran,
i liked your post soooo much.
I'm your reader from Winston Salem USA.. I think i read most of your posts during the last five month. I liked your ideas about life and people.. I hope you don't mind a new friend. I feel like I've known you for years.Thanks
AZZA Atwan
عزة
اهلا بيكى
ومنورانى
وانا يشرفنى معرفتك
شكرا ليكى
عندك حق والحياه ما بتقفش ابداااااااا عند حد
مش كل حب بينتهى
تبقى انتهت بعده الحياة
على قد ما الجملة دى صح
و موافقاكى عليها
بس للأسف و الشديد
مش كل قلب بينكسر
بيعرف ينجبر تانى
كسرة النفس دى
تتصلح إزاى ؟
بغض النظر عن البنى آدم
اللى وجعك و دبحك دا
و راح فى ستين الف ....تييييييت
أثاره بقى
تنمحى إزاى ؟
تتنسى إزاى ؟
إزاى الواحد ينسى
إنه كان مستهان بيه
و متبعترة كرامته
و منداس على قلبه
و إزاى لما حد يعلم فى قلبك
بعلامة تتحول بعدها
لعاهة
ازاى إنك تعمليها عملية تجميل
و تصلحيها عشان مش كل مرة تبصى فى المراية تلاقيها
و تفتكرى ؟!!
متجاوبيش على حاجة
أنا ببعبع بس معاكى
بس انا عارفة
إن الأجابات لوحدها
عاوزة عمر فوق العمر
عشان الواحد يوصلها
و يقنع
و يرتاح
بحبك يا خوختى
و ووصفك للموقف كالعادة
مبدع من اول لحظة
لآخرها و بتبهرينى بقفلاتك لأى موضوع ..نفسى أتعلم منك المهارة دى لأنى مبعرفش أقفل أى بوست بقوة كدا
بحبك و بوسس لشيكو كتييييير
عشان وحشنى
و وحشتنى
إنتى كمان وحشتينى يا طنط
رائعة جدا هذه القصة
والسياق ممتاز
بس صادمه
وحزينه
بالتوفيق دائما
مش كل حب بينتهي بتنتهي معاه الحياه
حب البنوته اللي جنبك في فصلك في ابتدائي بينتهي ومبتموتش
حبك للبنوته الحلوه بتاعة مدرسة اعدادي اللي جنب بيتك بينتهي ومبتموتش
حبك للبنوته العسل اللي معاك في درس ثانوي عند مدرس الأنجليزي بيتدمر وبرده مبتموتش
حبك في الجامعه اللي رسمته وحلمته وعشت سنين الجامعه تحلم معاه بينتهي برده ومبتموتش
الغريب انك بعد كل ده وبعد ما بتقرر ان كده كفايه حب وشطبنا بتروح واقع على بوزك من جديد وعندك امل معرفش جايبه منين ان المره دي هتبقى احسن كتيييييييير
صح او غلط مش مهم
كل مره بنقع ونقف محدش بيموت لكن الجروح بتسيب علامات زي البلطجيه ما بيبقى وشهم كله علامات خناقات قديمه احنا كمان قلوبنا بتبقى مليانه خربشات وعلامات من قصص قديمه وعلى حسب قوة كل قصه بيكبر اثرها
جايز في قصص سمعناها كانت كبيره لدرجة ان جرحها قتل اصحابها
لكن ده مش كتير
ربنا يعدي ايامنا لعى خير
جميله القصه يا خوخه تسلم ايدك
سلااااااااااااااااام
اخوكي ايهاب
السلام عليكم
و هى كانت فين لما اتجوز
كانت عملت حاجة.
و هى ليه استسلمت لواحدة لو هى كانت بتحبه كانت حاربت علشان يرجعلها تانى
اكييد عزيزتى فع مع كل انكسار و جرح يتولد قوة جديدة وحياة افضل بخبرة من الانكسارات والاحزان, بس بجد ربنا بيحبها
قصه اكتر من رائعه و فعلا مش كل حب بينتهى تبقى انتهت بعده الحياة
تقبلى تحياتى
قصة كل يوم مش بس الامس
بس بجح بجح يعني
عندك حق ياخوخة "مش كل حب بينتهى يبقى انتهت بعده الحياة".. كمان مهم اوى نعرف امتى نقف علشان مايتحولش التسامح والحب الى هبل واهدار للكرامة لأن ساعتها الواحد بيكره نفسه اوى لأنه فرط فى حقه زيادة عن اللزوم ولأن الآخر ماكانش يستحق التعب ده كله .. بجد الواحد وقتها بيصعب عليه نفسه اوى لانها كانت تستحق افضل من اللى بيوصلها ليه الافراط فى التسامح بدعوى الحب
احييكى على البوست الجميل ده.. فكرتينى بجرحى الذى لايندمل (قوية يندمل دى مش كده).. صباحك زى العسل يانورا
جميل اوي اوي البوست ده
واقدر اقولك انه واقعي جدا وانا شوفت حالات زي كدة بالظبط
حب + كدب + مدام خفية + ظهور مفاجيء+ + غضب وغصة تملاء القلب + قرار حاسم لا رجعة فيه .... قرار بالفراق
عندك حق مش كل حب بينتهي بتنتهي بعده الحياة بس اقدر اقول ان مع كل حب بينتهي في حاجة جوانا بتتجرح حرج لا تدوايه الايام
تحياتي
موش كل حب بينتهي بيبقا يستاهل انه يكسرنا
تحياتي
ماببتمحيش يا فاتيما
الاثار مابتتمحيش
تفضل معلمة بشكل او باخر جوانا
فى اول الامر
بتاخدى كام يوم كدة مش مصدقة انك بايدك قطعتى حبل الوصل بينكم
وبتعيطى كتيييييير اوى
وبتخسى جامد
اصله كمان ده مش اى حب
ده الحب الاولي
الحب اللى بيعلمك يعنى ايه مشاعر بتحسى بيها بتاكلك فى بطنك
الحب اللى بيخليكى تحبى ام كلثوم وانتى قبلها بيومين ماكونتيش بتطيقيها
الحب اللى يخليكى تقرى اشعار نزار
وكانها قران
الحب اللى يخليكى تسقطى فى الثانوية العامة
الحب اللى استمر كله على بعضه كدة سنة وشوية
وعلشان تقدرى تسمحى لحد تانى انه يدق على باب قلبك بتاخدى بعديها سنتين
الحب اللى بيكون فى النور
مش ماشين مع بعض انتى وهو
وعاشقين بعض فى الضلمة
لااااا
انتى مخطوبة
يعنى بابا وماما عارفين
صحابى عارفين
الجيران عارفين
المدرسين عارفين
الاهل والاقارب عارفين
الحب اللى يخليكى تتبسطى من نظرات الغيرة فى عيون قرايبك البنات اللى اكبر منك ولسة ماتخطبوش
الحب اللى يخليكى فرحانة بالدبلة وتصرى انك ماتلبسيش فوقيها المحبس علشان تبان للبنات فى المدرسة ويعرفوا انك مخطوبة
الحب اللى تعتقدى انك مش هتحبى حد تانى فى منتهى القوة دى
الحب اللى كان مقياس لاى علاقة عاطفية تانية
لما واحدة تحكى وتقول انا بحب فلان زى ما نورا بتحب خالد
فيفتحوا بقهم ويقولوا وااااااااو
مش معقول طبعا
محدش بيحب حد زى مانورا بتحب خالد
بس عارفة اجمل حاجة ايه
اجمل حاجة
انك تقابلى حبك الاولي ده بعد مرور حوالى عشر سنين وزيادة
تقابليه صدفة
وتقفى تسلمى عليه
وتضحكى اوى
وكانه فى يوم ماجرحكيش
وكانك فى يوم ماحبيتهوش بجنون
ولما كل واحد يمشى فى طريقه
بتقفى لحظات
وتسالى نفسك
هو احنا كنا سبنا بعض ليه؟
ولما تفتكرى
تقعدى تضحكى اوى على هبلك وعلى عياطك وقت الفراق
وتلتفتى تانى وراكى
وتبصى على قفاه وهو ماشى
وتقررى يوميها
انك لازم ترمى طفى السجاير بتاعته
ولازم ترمى شوية الشعر اللى انتى قصتيهم من راسه
ولازم ترمى اعقاب السجاير
ولازم تقطعى جواباته اللى بعتهالك وانتى فى الغربة
ولازم تتخلصى من الشكولاتة اللى جابهالك يوم الوداع
واللى زمانها اتنخورت من جوة
ولازم ترمى قزايز المية البلاستيك
ولازم تتصلى برسالة علشان تديهم القميص اللى جابهولك هدية
ولازم تروحى للصايغ علشان تبيعى الدلاية الدهب اللى جبهالك
وبفلوسها تديها لجمعية رسالة
واهم حاجة انك بتشيله من المكانة اللى كنتى حاطاه فيها
بتشيليه من مكانة
اغلى الناس
وبتحطيه فى مكانة
احدهم مر من هنا
ولما بتعملى كدة
بتلاقى نفسك مبسوطة اوى
مبسوطة جدا
مرتاحة بطريقة غريبة
تخلصتى من اوهامك اللى فضلتى عايشة فيها وفاكرة ان الحب الاولى مافيش حب بيجى فى قوته
يمكن اللى يخليكى حزينة شوية
ان حبك التانى
اللى كان فى النور برضه
واللى اثمر عن اجمل حاجة فى دنيتك
استمر حداشر سنة
وانتهى بالطلاق
انتهى بالطلاق كعلاقة
لكن المشاعر مش بتنتهى لا بطلاق
ولا بتستمر بجواز
طب ده علشان تنسيه وعلشان تسمحى لحد غيره يدق باب قلبك
محتاجة حداشر سنة تانية
يا مين يعيش بقى
ساعتها هنكون داخلنا فى سن اليأس من كل حاجة
الا بقى لو قابلتى واحد سره بااااااتع
قادر على انه ينسيكى اسمك وحياتك اللى فاتت كلها
فى اقل من حداشر سنة
وقادر على انه ياكلك البغاشة فى بؤك
الا يا فاتيما هو احنا كنا توصلنا لمعنى البغاشة ولا لسة؟
نيهاهاهاهاهاهاهاهاهاهاع
وش واحدة بتغمز
تحياتى ليكى
خيخه
ام شريف
قصه رائعه ووجعتنى اوى
تحياتى لفكرك وقلمك وليكى اكتر
موش لاقيه كلام اقولهولك
بس وجعتينى وقلبتى المواجع
الشنكوتى الكبير
فاكر البوست اللى اسمه اصنع بنفسك
عن مكعب الصلصال
فاكر كلامك اللى انت كتبتهولى وقتها
افتكرته دلوقتى لما قريت تعليقاتكم
geba
اممممممممممممم
علشان اجاوب على تساؤلاتك
محتاجة ارجع بالذاكرة اربعتاشر خمستاشر سنة لورا
ومحتاجة انى اقولك تفاصيل ماحبش انى افتكرها
لانها هتبين مدى خيخنتى فى ذلك التوقيت
عليكم انكم تقبلوا بالقصة المكتوبة دون السؤال عن اى تفاصيل
وافهموها زى ما تفهموها
صدقينى حتى لو فيكم فهم غلط
مش هياثر على البطلة فى حاجة فهكمكم الغلط
تحياتى ليكى
المجهول اللى مانشرتش تعليقه
اولا بشكرك انك طلبت منى انى مانشرش تعليقك
لانى كنت هانشره وانا ممتعضة
هجاوبك على سؤال من اسئلتك
انا وقت كتابة البوست ده
كنت محتاجةاكتب عن انفصالى عن هانى
كنت محتاجة اكتب وادلق كل حاجة تتعلق بانفصالى عن هانى
ولكن علاقتى بهانى رغم الطلاق
فهى مازالت قائمة
بسبب وجود شريف بينا
وبسبب ان احنا مش بنكره بعض
فبالتالى الكتابة عن طلاقى منه
هيوجعنا احنا الاتنين
وممكن فى يوم يوجع شريف لما يكبر
فبالتالى قررت انى اكتب عن اى تجربة انفصال
لان حالتى النفسية كانت تسمح بكدة
فبالتالى مالقتش تجربة انفصال اكتب عنها غير تجربة انفصالى انا برضه بس عن خطيبى الاولانى
نظرا لان الكتابة عنها مش هتوجعنى ومش هتوجع الطرف التانى
ومش هتسيء الى اى حد مننا
لكن انا وهانى
رغم طلاقنا مازلنا مرتبطين بشكل او باخر
فبالتالى الكتابة عن انفصالنا كانه الكتابة عن خصوصيات واسرار بيوت
ودى حاجة ماتصحش
وكمان الانفصال الناتج عن فسخ خطوبة
اخف وطأة من الانفصال الناتج عن طلاق زوجة من زوجها
الطلاق بيكون انفصال من نوع العيار التقيل
وانا غير مستعدة حاليا انى اكتب عن انفصال من العيار التقيل
شكرا ليك
واسفة لعدم ردى على كل اسئلتك
هو يمكن الحياه ما بتقفش عند حد
ولكن ساعات أو كتير بنكمل حياتنا وأحنا شبه عايشين وبنبقى من جوانا ميتين وماتت جوانا الفرحة وحاجات كتيرة حلوة بسبب أى حاجة شفناها قبل كده
ومش سهل ابدا نحب تانى ولما بنحب تانى بنبقى خايفين قوى على نفسنا وعلى حبنا ده ليضيع وننجرح جرح أكتر من الأولانى
بوس بوس
بنحب تانى عادى
لكن بنكون اجمد
بنكون احرص
بنكون متنبهين اكتر
بنفكر اكتر
بندى فرصة لعقلنا انه يقول رايه
ومش بناخد براى القلب بس
وبرضه ممكن نتوجع لكن عادى بنقوم تانى
والحياة بتستمر
تنهيدة
كمان تنهيدة
كمان تنهيدة
/،
/،
يُصيبُكَ الاستغراب وأنتَ تسترجعُ أفكارك ..
أحقاً ..بهذا كنتُ أفكر !!
يالي من تافه .....!!
تافه ؟! ...لا ....لا....
أنا أفكر ، ليس أكثر !
نعم..قد تكون أفكار غبية ..
لكن ليس إلى درجة أن أتهمَ نفسي !!
على أيّةِ حال..إنها مُحاولة لإعدام الوقت !!
ودونَ أن تدري..
تجِدُكَ قطعتَ آلاف المترات وأنت لم تبرح النقطة التي تقف عليها..
فقط جيئةً وذهاباً ماراً بتلك النقطة ..!
/،
/،
تنهدية كمان
لو المغزي من كلامي وصل
يبقي الحمد لله
لو ما وصلش يبقي الحمد لله برده
وعديه ولا أكنكـ شفتي حاجة
مواطن شوجااع
تنهيدة
كمان تنهيدة
وعندك تلاتة تنهيدة مظبوطييييين وصلحه
المغزى وصل
وتنهيداتك حارقة يا ولدي
تحياتى ليك
تحياتي ليكي يا خيخه
انا بحب طريقتك لدرجه استحاله تصدقيها
مواضيعيك مختلفه واسلوبك مختلف انتي جواكي كنز هو نفسك
انا قلبي وجعني وانا بتخيل المهانه دي, معقول حد يوصلها بسبب الحب؟؟
بحبك قوي يا خيخه
ونفسي اتعرف عليكي بجد
ينفع ابعتلك رقمي علي الميل؟؟
لو ينفع قوليلي واكلم معاكي لو تسمحيلي
سومة
شكرا ليكى
ومعنديش مانع انك تبعتى رقمك
ده شئ يشرفنى انى اتعرف عليكى
تحياتى ليكى
الناس اللى انا مارديتش على تعليقاتهم
ده معناه انى متفقة على كلامهم
وشكرا لكل واحد مدح فى الاسلوب
شكرا ليكم كلكم على تواصلكم معايا
اختكم خيخة
مع انها بت خيخه واي كلام
وانا عايزه اعضها واقطلع لها نص لسانه كفايه عليها النص التاني
ههههههههههههههههه
بس بتقول كلام حكم يا ولاد
انا كمان باؤمن جدااااااا بالمبدأ ده الحب مش بيجى مره واحده
ولا الكلام البتنجان ده
ابدا نقدر نحب مره واثنين وثلاثه
بس المهم نكون ماشيين صح
والدنيا فعلا ما بتقفش على حد ولا على حب
هاتفضل ماشيه ماشيه ماشيه لو مش مشينا احنا كمان هاتدوسنا
اختيار اكثر من موفق لعنوان التدوينة
مهو أصل هي كده ...الناس كده ...والقدر مكتوب فيه كده...إزاي عرفتي تكتبي كل الأحاسيس دي .. بجد انا صدقت انها قصتك..لولا بس ان قلت لا لا اكيد دي حكايه بي هي دخلت جواها اوي...بجد كتابتك تحفه..تحياتي ليكي
ما فيش أسوأمن الاحساس بقدان الأمان
فقدان الثقة بالناس بالقريبيين
بالحبايب
بالناس اللي مش ممكن يكون يكده
بس على رأي فاتيما الجرح بيعلم
وحليني عبان ما تعرفي تداويه
إلا يا ناس جرح الحبيب ما يتنسيش
وانا بقرأ القصة كنت بفكر فى أخر كلمة مش كل حبى بينتهى تبقى انتهت بعده الحياة اه فعلا حتى لو بتحبه وبتموت فيه اللى يجرحها بالطريقة دى وويخليها تنزل دموعها عليه وهوا ولا هنا يبقى ملوش لازمة يبقى فى حياتها
القصة فيها حاجة غريبة اوى يا خيخة تحسى انها تقيلة وكلامها صادم وحزين اوى مع انا للى يشوفها عامة يقول دى خفيفة اسلوب متميز تقبلى احترامى وتحياتى
الغدر و الخيانة مش قصة للأمس فقط ، هى قصة كل يوم و تتكرر كل لحظة ، و الحياة فعلا مش بتقف على حب راح ، بتستمر و لكن وهى سايبة اثرها و معلمة فينا ، يمكن بتعلمنا و ناخد منها خبرة أننا ما نسلم قلوبنا إلا للى يستحقها ، و لكنه خداع الحب ، يمكن نقع مرة تانية فى نفس الفخ ، فخ الحب و نخرج منه و أحنا مكسورين اكتر ، لكن بردوا بنستمر فى الحياة ، و يبقى امل أن نقابل يوما ما من يمحو هذة ألثار يعنى يعمل لها عملية تجميل و يشيل التشوهات الى حصلت فى قلوبنا ، يمكن و قتها ننسى الألم الى مرينا بيه ، و نقدر نستعيد من تانى ثقتنا فى الناس و أن الدنيا لسة بخير .
نورا بجد بجد أنتى رائعة و بحبك قوى
ايون يا خيخه فعلا
مش كل حب بينتهى تبقى انتهت بعده الحياة
المشكله ان احنا بناخد وقت عما بنوصل للنتجيه دى وبنستنزف كتير من عواطفنا ومشاعرنا
بس عجبتنى القصه بصراحة جدا
رجاله هم يا اوختى حاجه قرف
هههههههه
تحياتى
مفيش حب ولا حد ولا تجربه الدنيا بتقف عندها ولازم نعرف كده ونكمل عادي من غير مانفضل نبكي ع الاطلال اللي بيروح مبيرجعش ونصيبك هيصيبك
بتفضل شويه بصمات للشخص شويه اثار وذكريات ومواقف ولما بنحب تاني بننسي اصلا التجربه الاولانيه بيكون احساسنا اتجاه الشخص لا حب ولا كراهيه
بس في جمله يا خيخه دايما بتيجي ع دماغي لما بتحصل حاجة "ابشع شئ ليس الحزن وانما هو اختفاء الحزن"
يارب تكوني بخير ومودك عال العال
:(
بيوجع اوي وبيفضل سايب تأثير مش بيتنسي غير بحد تاني يقدر ينسيك كل اللي مريت بيه... مش بيمسحه بس بيخلي تأثيره اقل شوية فتقدر تكمل وانت بتبص للي فات من عمرك على انه حاجة عادية واقل من العادية كمان ويقلل ألمك شوية منه
بس لما اللي نساك اللي فات يعمل معاك موقف زي الاولاني بتوجع اكتر
ولو اتكرر مع حد تالت بتوجع اكتر واكتر
وادينا عايشين نتألم شوية ونخف شوية ونتعلم على طول ازاي نستفيد من اللي بيحصلنا يمكن نقدر نتجنب الالم ده لو واجهنا بأي صورة مرة تانية
تسلم ايدك أسلوبك بيوصل بسرعة اوي
يمكن اللى عاجبنى اكتر من البوست نفسه ردك على تعليق فاتيما
انتى زى البحر ياخيخه
مليانه اسرار
واوقات غامضه
واوقات واضحه قوى
متقلبه جدا
جريئه جدا
مرحه جدا
حزينه جدا
انتى شخصيه مثيره جدا جدا
لانك مليانه متناقضات
انتى برج ايه؟
بدات تسمع فى عقل بالها صوت البواب
وهو بيقول لسة راجع مع المدام
بدأت تصدق بوجود المدام
بدات تحس بوجود المدام
بدات تشوف المدام وهى قاعدة فى حضنه
بدات تشم ريحة المدام
!!!!!
المدام دى موجود فى كل بيت مخدوعه بتقشر بصل مستينه من برة تحضرلله غداء بتربى فى العيال
ع قد ماهى مخدوعة ومصدومة فى مش ليه انا حسيت المدام اكتر
كنتى سميتها المدام!!!
عاجبنى اوى ردك على فاتيما
وخصوصا الحتة اللى قايلة فيها
بتشيليه من مكانة
اغلى الناس
وبتحطيه فى مكانة
احدهم مر من هنا
جميل اوى تعبير
احدهم مر من هنا
عارفة يا خيخة
انا بقرالك من زمان
وكل مرة اكتشف فيكى حاجة غريبة
انتى صريحة جدا و واضحة جدا
ومع ذلك بحس انك غامضة جدا وان جواكى تجارب اكتر بكتير من اللى انتى بتكتبى عنها
اكتر حاجة عجبانى هو احساسى بيكى
كنت دايما بحس انك من النوع الى ماكنش له تجارب عاطفية كتير فى حياته
وفرحت لما احساسى بيكى طلع صح وان حياتك العاطفية
مافيهاش غير شخصين
والاحلى انهم كانوا فى النور
على عكس بنات تانية تلاقيهم عندهم تجارب بعدد شعر راسهم وكلهم فى الخفاء
ويجوا يتجوزوا يمثلوا قدام العريس انه اول راجل فى حياتهم
وهما مداوبينهم الف
تسلم ايديكى ويسلم اسلوبك السلس
اللى بيوصل لقلوب بسرعة
واسفة اذا كنت طولت عليكى
بحبك يا خيخة
واتمنى انى اتعرف عليكى
ونفسى جدا اشوف فاتيما
ربنا يباركلكم فى ولادكم يوسف وشريف
خيخة اسمحيلى هابعتلك ايميل اقولك فيه
على موضوع
اختك فى الله
آمة الله
الحب غلطه الحياه التى لا تغتفر
حزينه اوى
كلامك صح
وبس خلاص
يعلى صوته من مبدأ خدوهم بالصوت لا يغلبوكم
لا لا لا مش كدة
ماكنش بيعلى صوته علشان المبدا ده
كان بيعلى صوته
من مبدأ انها بتحبه وبتخاف على زعله
وانه لما يزعق لازم هى هتكش وهتسمع الكلام
وهتقوله خلاص طيب انا اسفة ماتزعلش
من مبدا انها مجرد خيخة
راحت ولا جت
هى خيخة
راحت ولا جت
هى يويو
راحت ولا جت
هى عروسة ماريونت
يحركها زى ماهو عايز
من اعتقاده ده
كان بيزعق ويعلى صوته
ويقولها
انتى قرفتينى
بجد انتي كده جيتي ع الجرح من غير ما تقصدي
هو مش حب انتهي لأنو اساسا مش كان موجود
وجهة نظري
الأتنين مش كانوا بيحبوا بعض
حتي فصل النهاية اللي اتكلمتي عليه مش يدي انطباع ان كان حاجة بينهم
تامر
ممكن افهم ان الأنثي تحب حتي دي مش كتيرة
اقصد حب حقيقي
لكن الراجل اذا حب تبقئ كارثة لأن عقله بيقف بتشل
عيونه بتعجز عن الرؤية من الغيرة
درجة التملك بتوصل عنده لأعلي نقطة
والغريب يجي معها الشك
افتكر
الحب انعطاف خطير في حياة الراجل
انثي بتقهر حواسه وتخترق قلبه
تامر
بصي يا خيخه انا دخلت من شويه عندك وقريت البوست كله وعلقت عليه باني عملت كوبي من كام سطر عندك وقلتلك ان انتي كده جيتي ع الجرح بالظبط
بس التعليق ده لسه منزلش عشان انتي لسه مفتحتيش
المهم اني علقت كده من شويه قبل ما جه معينه تحصل يعني
لكن دلوقتي بما انها حصلت فانا حبيت اكتب تعليق تاني
اللي انا عايزه اقوله ان الواحد لما بيبقي عايز يقنع نفسه انه مبسوط مع حد وانه بيحيه اوي وميقدرش يستغني عنه ولا يتخيل حياته من غيره بيعمل اي حاجه عشان يوصل للاحساس ده ويصدقه كمان
وطبعا بيكون خد ف سكته للاحساس ده كام تنازل عن حاجات اساسيه طبعا لارضاء الطرف التاني
والطرف التاني ده بقي بياخد التنازل اللي اتنازله الاولاني ده علي اساس انه حق مكتسب يعني وبيبتدي يوصل لاحساس ان هو الآمر الناهي اللي يطلب يطاع
وبعد ما الموضوع يزيد عن حده ويبتدي يفوق علي الكدبه الكبيره اللي هو عايشها ويكتشف انه مش حب ولا حاجه ده كان استنزاف بيكون خسر كتير اوي
بصي معلش انا لخبطك ولخبط اي حد هيقرا
انتي بس بوستك ده اللي جه ف وقته بالظبط لدرجه اني فعلا حسيت اني لازم اتكلم دلوقتي واقول اي حاجه بدل ما يحصلي انا اي حاجه
طبعاً الناس قالت ما فيه الكفاية بخصوص الأسلوب
فهركز أنا علي الحكمة المستفادة من ما سبق
دايماً بقول
لكلم ن هم في مثل هذه المواقف يعني
المرور بالموقف ده معناه إن ربنا بيحبني
لأنه كشفلي الوجه الحقيقي للعملة بدري أوي
بدري مقارنة باللي كان ممكن يتقضي مع مثل هذه الأشكال الضالة من القطيع الآدمي
فبالتالي
زي ما قلتي هتفتكري وتضحكي
وما تنسيش تشكري ربنا لأنه أنقذك قبل فوات الأوان
قبل ما يبقي في أطفال تخجلي من إن الشخص ده أبوهم
ويبصولك نظرة عتاب إنك اختارتيه هو دوناً عن البقية
تسلم إيدك يا أستاذة :)
والسلام ختام
ومعلش معلقتش علي البوست بتاع التجمع عشان عايز أمسك نفسي شوية
عشان مقولش رأيي الغير مرغوب فيه غالباً
بس لو لقيتك علي الميل في صدفة مليونية كده ..أكيد هوصله بإذن الله
مع إحترامى الشديد لمشاعر حضرتك..بس أنا ليا رأى مغاير خالص وده نتيجة لتجربتى الشخصية...الحب الحقيقى ما ينتهيش..ده مخلوق من عند ربنا ...إمتى..إزاى...ليه..إرادة إلهية أكبر من إرادة المحبين نفسهم..أكبر من الظروف..واللى عايزه ربنا بيكون..هو سبحانه اللى بيسبب الأسباب و يخلق الحب فى قلوب المحبين...الحب الحقيقى ما ينفعش يبقى من طرف واحد...أنا بتكلم على الحب اللى ربنا بيرزقنا بيه عشان هو خلقنا أساسا عشان بيحبنا ويخلينا نحب بعض...الحب مشاعر بتقوى مع الزمن و تكبر فى أحلك الظروف...حتى مع البعد..يفضل الحنين و الشوق يحرق قلوبهم...ليه مش بيتعودوا على البعد؟ مش البعد بيولد الجفاء؟ إرادة ربنا ...فعال لما يريد..و ربنا بيحبنا وخلق لكل واحد النص التانى اللى يتكامل معاه ويحس قد إيه ربنا بيحبه إنه خلق له الشخص ده عشان يسعد معاه
تحياتى وإحترامى
وربنا يرزقك اللى يأكلك البغاشة بحق ربنا
أختك شيرين
اولا مبسوطة انه بقى احدهم مر من هنا
المشكلة اننا لما حاجه بتنهى بنحس ان الدنيا وقفت وانها عمرها مش هتتحرك لقدام ابدا ان كل حاجه وحشه هى الى هتحصل بعد كده
انه الموضوع هيفضل معلم جواكى وهتتعبى اى حد بعد كده مش لاى ذنب غير انه جه فى الوقت ده
بجد كلامك معبر اوى انا بحبك اوى كان نفسى تكونى اختى الكبيرة بجد
معلش تعليق مالهوش اى علاقة بالموضوع
انا بس عايزة اطمن كل الناس اللى كانت بتسال عن عسقول وصحة عسقول
احب اطمنكم انه بخير واتحسن وبقى كويس والحمد لله
بالنسبة لاحمد سكر دراعه متجبس
وهو تقريبا فى بيته مش فى مستسفى ولا حاجة
بس العربية هى اللى اتبهدلت
بالنسبة لوالدة احمد الصباغ الحمد لله صحتها بتتحسن
ربنا يارب يتمم شفائه على كل الناس
شكرا ليكم
اختكم خيخة
معلش يا جماعة نظرا انى ورايا شوية حاجات عايزة اعملها
فاهارد على التعليقات الجديدة بعدين
شكرا ليكم على تواصلكم معايا
اختكم خيخة
نورا
بعت لك كام ايميل مش بتردى عليا...انتى مخاصمانى ولا ايه؟
عموما فيه بوست جديد عندى....ابقى عدى كده وانتى مروحة
بت يا خوخة
انا بحبك قوى بجد
تعرفى امبارح قابلت حد محترم قوى
نص كلامى معاه
كان عليكى
كنت بجيب سيرتك
بشكل غير مباشر
لأنى بحس اننا شبه بعض شوية
بس انتى على اجمل
و انقى ميت مرة عنى
لو كنت شبه كذلوك يعنى
اكتشفت من كلام الشخص دا
و على حد تعبيره
إنى انا و انتى
غيرنا عنده مفهوم الام
و شكلها و تماسكها
و قدرتها على التفكير
فى اطفالها أكتر
ما بتفكر فى نفسها
عجبنى إن حد واخد باله
مع اننا مش منتظرين
تسقيفة
من حد
بس اتصور لما حد مراقب
و من بعيد
يحس بدا
طب ما كدا
ممكن عيالنا هما كمان يحسوه
صحيح مش عاوزين تقدير
بس كمان مش عاوزين ملامة
الحب اللى انتى اتكلمتى عليه دا
تصورى انا كمان مريت بيه
بس بصورة أكثر ميلودرامية عن ذلك
و يمكن اكتب عنها بوست قدام ...الواحد كان ساذج قوى قوى
و مخلص فى حبه لأقصى حد
انا كمان بعت الدبلة و تخلصت من كل ذكرياتى واحدة واحدة
لما تخلصت من مشاعرى واحدة واحدة دلوقتى برضو لو حبينا
هنكون بنقس القوة و الاخلاص
بس مش بالسذاجة دى
لأن فيه روح متعلقة فى رقبتنا
و قبلها قلوبنا
و ارواحنا
لازم نفكر فيها
بس دا لا يمنع
إن المسألة مش مقترنة بتوقيت
و مش لازم الحداشر سنة
يحتاجو لحداشر قدهم
و اللى سره باتع
ممكن يفاجئك زى نزار قبانى ما بيقول كعطر إمراءة فور دخولها مصعد ...
بس تعرفى حتى لو جه
ابو سر باتع دا
تفتكرى الواحد ممكن يكون عنده
شجاعة الأقدام على
دخول تجربة من تانى؟؟
مظنش
بس هيبطل يحب ؟
مظنش
و يبطل يندلق و يهيم ؟
مظنش
و يتجنب يسمع ام كلثوم ؟
مظنش
و يفضل يقرى شعر
و يتلهف على اخبار حبيبه
و يتحاشى يبص فى عينيه لو قابله صدفة عشان مينكشفشى ستره ؟؟
و يبقى عامل زى العيال الصغيرين؟؟
مظنش
الخلاصة عاوزة اقولك
غالباً اللى بيخرج
بهوليلة من قلبك
مبيرجعشى تانى
و القلب الحى اللى زى قلبك ممكن يدهشك و جدااااا كمان
شكرا لأنك طمنيتينى على عسقول
لأنى كنت متوغوشة عليه
و سلامة سكر الف سلامة
و سلامة والدة الصباغ
و ربنا يشفيهم جميعاً
شكر بس اخير لآمة الله
و اتمنى نشوفها على خير
و بفرح قووووووى لما ينكتب اسمى
جنب إسمك يا خوختى
شرف لا يدانيه أى فرحة لو تعرفى
و قطعت البغاشة
على اللى عاوز ياكلها
انا أصلاً مبحبهاااااش
و خلينا فى غزل البنات بتاعك
و الشكولاتة بتاعتى
قالوا لأ يعنى ؟؟
بحبك بجد
و بوسس لشكشوكة حبيبى الطعامة دا
كنت عاوزة اسمع تفسية للوضع المؤقت :D
يلا مع السلامة
خير
سلامٌ عليكِ
انا بالعكس
بحس ان نهاية حب نهاية العالم وخصوصا لو انتهى بجرح كبير والسنين مش بتقدر تنسينى الالم
....
وحشتينى يا نوران
ميرسي علي التوبيك الفانتاستيك ده
ممكن بقا موضوع عن منتخب مصر لان ده مش وقت قصص وحواديت
m5m
مخصماك؟
!!!!!!!!!!!!!!!!!!!
لا طبعا يا محمد مش مخصماك ولا حاجة
انا بس فعلا بقالى كام يوم مش بفتح الايميل بتاع بت خيخة واى كلام
هاروح حالا افتحه وارد عليك
معلش بقى ماليش مزاج اكتب اى ردود على اى حد
شكرا على تواصلكم معايا
اختكم خيخة
مش باتخيل وجود ناس غبيه كده يا شيخه
لكن للاسف انا عارفه انهم موجودين
تحياتي ليكى
لو مش عايزة تنشري التعليق دي بلااش
==========
سؤال رفيع بس
سيادتكـ يا خالتي الحاجة أم شريف نكدية بطبعكـ ؟ ولا بطابع معظم الستات المصريات نكديين ؟
مواطن شجاع
قولى ليه بتسال السؤال ده وانا اجاوبك؟
خلاااااااااص والله حرمت
النت عندي بيقطع وكل أما أجي أبعت السؤال النت يقطع
حمدت ربنا
بس طلع وصل برده
خلاااااااااص أنا بسحب السؤال يا سيادة الريس
إمسحها في المرة دي ؟
سلام عليكي يا ام شريف
علي الاقل مش بتكون الحياه زي ما كنت قبل كده .. و لا احنا بنكون نفسنا .. للاسف بتتغير فينا و في ملامحنا حاجات كتير لدرجة ان ممكن منعرفناش .. قاسي اوي لما اللي متاكده انه هو اللس ساندك يكون اول واحد يقتلك بخنجر في ضهرك
..
مها
Post a Comment