Friday, November 13, 2009

اكتب اسمى من فضلك


اكتشفت ان وجود اسمى فى ايميل
او ماسيدج مبعوتالى
شيئ بيفرحنى جدا

واكتشفت ان عدم ذكر الاسم شئ مش لطيف

علشان تفهموا وجهة نظرى اكتر
تخيلوا معايا الاتى

فتحت ايميلك لاقيت ايميل من فلان
ولنفترض ان فلان ده اسمه حسين

حسين بعتلك ماسيدج بمناسبة العيد
وبيقولك فيها كل سنة انت طيب
وبس على كدة

طب لنتخيل انك فتحت الايميلات بتاعتك
ولاقيت فيها ايميل من حسين
بيقولك فيه
كل سنة وانت طيب يا فلان

مش بذمتكم الايمل اللى مكتوب فيه اسمك
خلاك تحس انك مميز
خلاك تحس ان حسين بذل جهد
وخصك انت بالايميل ده
ومابعتهوش لكل الناس

طب ولنفترض انك هترد عليه
هاتقوله ايه يا ترى؟
هاتقوله شكرا
ولا هتقوله شكرا يا حسين؟

حتى لو كان الايميل خاص بيك انت فقط
ومش ايميل عام لتهنئة فى عيد قومى
هتحس برضه بحاجة كدة لذيذة من جواك انه ذكر اسمك

انا ماعرفش اوى فى علم النفس
لكن اعتقد ان ذكر اسم الشخص فى رسالة مبعوتاله
او حتى وانت بتكلمه
بيؤثر عليه بالإيجاب


ومتهيالى لو عايز تضايق شخص
او تحسسه انه كائن مجهول
هتكلمه بدون اى محاولة منك انك تنطق اسمه

جربوا كدة وقولولى انا صح ولا غلط

لما تسلموا على حد ماتقولوش
هاااااااى ازيك

قولوا هاى ازيك يا ..... وقولوا الاسم

لما تبعتوا ايميل خلوا دايما اول سطر
ازيك يا .... او حتى بلاش ازيك
مجرد انكم تبدأوا الإيميل
باسم الشخص اللى هتبعتولوا الايميل حاجة كويسة


لو جوزك قالك تصبحى على خير يا حبيبتى
ماترديش عليه بـــ وانت من اهل الخير
وخلاص على كدة
قوليله وانت من اهل الخير يا حبيبى
او وانت من اهل الخير
وقوليله اسم الدلع اللى بتدلعيه بيه

لما حد يبعتلك ماسيدج يقولك كل سنة وانت طيب يا فلان
ماتقولهوش وانت طيب وخلاص على كدة
قوله وانت طيب يا فلان
واشكره على الماسيدج



بس خلاص
وكل الكلام اللي فوق ده
نطلع منه بحاجة واحدة بس
بإني بوجه شكري لكل الناس
اللى بتبعتلي ايميلات
او ماسيدجات او تعليقات
وبيكتبوا اسمي اياً كان
نورا ... نوران... نور
خيخة ... خوخة ... خوختي ... خوخز
ام شريف ... نونا ... نونو ... نوناية ...نانا

لكم مني الف تحية
وانحناءة تقدير
وبوسة على الجبين


انتهى

بت خيخة وأي كلام

31 comments:

مواطن شووجااع said...

حلو البوست يا أم شريف

//
يندرج تحت الذوقيات


//
الذوق سلوكـ الروح


،،،،،

أنا بقول خالتي الحاجة أم شريف


وكمان شوية كدا

هبقي أقول تيتا الحاجة أم شريف

أميرة علي كوكب مهجور said...

ع فكرة ليها علاقه بعلم النفس قراءت مرة ان نطق اسم الشخص واحنا بنتكلم معاه بينم ع عايزين نقرب من الشخص ده بنتودد ليه والله اعلم

يارب تكوني بخير يا نورا

بدراوى said...

طب انا عيد ميلادى انهارده
ابقى ابعتيلى ماسيج فى رسالة بإسمى
هههههههههه
بس ده حسب نتيجة الماتش
يا اخت خيخة

Anonymous said...

فعلا عندك حق
الأسم دليل علي الأحترام
انتي صح



تامر

Dr. Kafy said...

السلام عليكم
إزيك يا نوران

فعلا كلامك صح و ده بيدرس فى العلوم المتعلقة بالتنمية البشرية و طرق التواصل و البرمجة اللغوية العصبية.

حتى أنهم قالوا أنه لكى توقظ النائم ناده بإسمه ليتنبه بسرعة، و كانت لنا تجربة حقيقية مع أحد زملائنا و كنا متفقين على موعد و مررنا عليه لنأخذه معنا و لكنه كان نائما فأخذنا نطرق عليه الباب بعنف حتى خرج لنا الجيران و هو لم يستيقظ ... ثم قررنا الرحيل بدونه و لكن و نحن نغادر قلنا خليك نايم يا فلان... و كانت المفاجأة أنه استيقظ و فتح لنا الباب عند سماع إسمه.

صبرني يارب said...

انتى عارفه يا بت يا خيخه ان الكلام الى انتى قولتيه ده علمي

انا قريته مره انك لو حبيت تاثر فى نفسية شخص خصوصا لو بتتعرف عليه لاول مره
تخاطبه باسمه دايما

بمعنى تقوله عارف يا فلاااان كذا كذا كذا

لان ده بيكون له وقع خاص على نفسه وممكن يتسبب فى نجاح علاقتك به من اساسها

يعنى انتى بتفتكسي كويس اهو شغاله يعنى
هههههههههههههههههههه

صباااااااح الخير يا جميل

Anonymous said...

اكيد معك حق يا خيخة عذرا لا أعرف اسم غير هذا لكي قلب الأسد
صاحب مدونة أحوال سجون مصر
http://kulbalasd.blogspot.com

دموع كابر said...

صباح الخير
يانوران

blackshwak said...

السلام عليكم
لذيذ المقال ده يا...نورا ... نوران... نور.....خيخة ... خوخة ... خوختي ... خوخز...ام شريف ... نونا ... نونو ... نوناية ...نانا

وأعتقد رأي حضرتك صحيح
لما تذكر إسم الشخص ده بيحسسه أنك مهتم بيه
بالتوفيق دائما
سلااااااااام

نعكشة said...

شوفي حضرتك

قريت قبل كدةفي مجلة يونانية
بهرج
قريت قبل كدة مش عارفة فين
ان ذكر الاسم بيعبر عن الاهتمام
او زيادةالحب درجة
مش فاكرةالنص والله

ومن ساعتها لما ببقى عاوزة او بتحصل تلقائيا لما اكون مهتمة بحد بقول اسمه
وبعدين بقة بفضل انوع في اسمه بداخلي

........

عندي مشكلة فظيعة مشفي حكاية اليملات ولا الماسجت
لا في الحية العادية
الاسماء عندي تقريبا مش موجودة
ذاكرتي في الضياع

زمان كانكل الناس عندي زعبلة
ومن فترة سوسن
ولما اجي ادلع حد أيان كان اسمه بيقى كوكو او كوكي

عشان كدة لما حد بينسى اسمي مبتضايقش
لإني ببقى مفترضة انهم مش هيتضايقوا لاني نسيت اسمهم
عشان انا زاكرتي خربانه
............

على صعيد آخر
مش اي كلام لازم يحتوي على الاسم
زي ما حضرتك ذكرتي
في مناسبةمعينة
لو حابة الفت انتباهك
لو حابة اقولك انك قريبة مني
لو حابة اقولك الف مبروك
او كل سنةوانتي طيبة
مش عمال على بطال يعني

.........

مذكرتش اسمك برضو صح
عشان انا بتكلم عام
وساعات صراحة بتكسف

بس نظراً لإن حضرتك بتحبي ذكر اسمك فانا باذن الله في المرات القدمة سأراعي ذلك
قولي ليه في المرات القادمة
عشان مبقاش نسيت
عشان انا عارفة ان زكرتي فجلة
بس اقولك
نبدأ من دلوقتي يا عزيزتي نوران

المهم بقة
خلاص انا رغاية
سلامٌ عليكِ

عاشقه الرومانسيه said...

صباح الحب يانورا
انا عارفه ان ده اكتر اسم بتحبيه
(:
تعرفى بقى انى باطبق الكلام ده فعليا
لانى فى اعدادى كان عندى درس فى اللغه العربيه بيتكلم على ارتباط الاسم بصاحبه واد ايه بيكون شئ جميل وبيأثر بالايجاب على صاحب الاسم
تعرفى ؟
انا كده
احب اللى يكلمنى ينادينى باسمى
وكمان لمعلوماتك لو عايزه تكسبى حب واهتمام شخص بيكلمك انطقى اسمه اكتر من مره خلال الحديث معاه
وشوفى الفرق

صباح الحب يااجمل نورا فى الدنيا
اموووووه

دكتور حر said...

ازيك يا نوران الشاملي
كل سنة وانتي طيبة يا أم شريف
ربنا يوفقك يا خيخة

كده تمام

:)

أم بتول said...

كلامك صح 100% نورا ، أولا نطق السم بيجعل فى ألفة بين الناس المتعامله بين بعضها ، لما أكلمك و اقول نورا فى وسط الكلام و انت تنادينى بأسمى و بدون القاب لأنى أكره الألقاب جدا إلا بين الغرباء و فى العمل فقط ، لكن فى العادى بحب قوى أن الى ينادينى ينادى بأسمى بدون مدام أو أم بتول حتى بالرغم من حبى الشديد جدا لأسم أبنتى ووجود و لدين عندى إلا أننى افضل أن أنادى بأم بتول ، وكمان فى موضوع تانى بمناسبة الأسم ، وهو أن الكثير منا يرى أنه من العيب مناده السيدة بأسمها و أنا أرى أنه لا عيب فى ذلك أبدا ، و إلا كان أولى بنساء النبى ألا نعرف أسمائهم ، و ألا يناديهم الصحابة بأسمائهم ، فما العيب أن يعرف الغريب أو الجيران السيدة ؟؟؟؟ ياريت تردى على أحسن النقطة دة بتجننى و الله .
و صباح الفل يا أحلى نوران فى الدنيا

بت خيخة وأي كلام said...

مواطن شوجاع

يا هيمة قول اى حاجة
كله منك حلو ومقبول







اميرة على كوكب مهجور

انا بخير يا اميرة
والغزالة رايقة وعال العال





بدراوى

كل سنة وانت طيب يا بدراوى
وعقبال 100 سنة

ومالناش دعوة بنتيجة الماتش









تامر

شكرا ليك يا تامر






د كافى

انا عملت التجربة دى حالا يا كافي
جيت اصحى شريف
قلتله بصوت عالى
شرييييييييف
الواد صحى مفزوع

نيهاهاهاهاهاهاهاهاهاع










مروة الزارع


انتى عارفة كويس اوى انى واخدة منك موقف

وانى مش عايزاكى ولا تتصلى بيا ولا تعلقى عندى

فلو سمحتى ماتتصرفيش معايا
وكان شئاً لم يكن

انا مش برتحالك

لو كتبتى اى تعليق على اى موضوع انا مش هانشرهولك










صبرنى يارب

صباح الفل يا ام مريم







قلب الاسد

بتعتذر ليه يا قلب الاسد
انا بحب اسم خيخة
لا داعى للاعتذار







دموع كابر

صباح الفل يا كابر







blackshwak

شكرا ليك يا ... يا ايه؟
قولى اسم اعرف اندهلك بيه







نعكشة
ولا يهمك يا نعكشة
ابقى قوليلى زعبلة
انا يجى منى على زعبلة برضه







عاشقة الرومانسية
ايوة صح انا بحب اسم نورا
انتى شطورة

صباح الفل يا ارق عاشقة فى الدنيا







دكتور حر

صباح الخير يا محمد ابو زيد

كدة تمام التمام








ام بتول

صباح الفل يا ام بتول

بصي يا ستو انا
حكاية ان مافيش حد يعرف اسم السيدة

دى بتلاقيها حسب التربية
فيه رجالة مايحبوش يقولوا اسم مراتتهم

بيحسوا انها من ضمن العورات ان حد يعرف اسم الزوجة او الابنة او الام

هى حسب التربية يا ام بتول
لو ربيتى ابنك انه عادى انه يقول اسمك هتلاقيه بيكبر متربى انه عادى انه يستخدم اسم زوجته
وهكذا





صباح الفل على عيونم كلكم
وشكرا على تواصلكم معايا
اختكم خيخة

m5m said...

نورا

دلوقتى بس فهمت معنى شكرك ليا فى الايميل اللى فات..أصلى بصراحة تنحت شوية وماكنتش فاهم قوى

عموما الحمدلله انى كنت باعمل كده من نفسى

سلامى لشريف باشا

samamasr said...

أم الفارس الصغير بإذن الله :)

حزينه said...

عندك حق

كل سنه وانتى طيبه يا احلى خيخه

حزينه

كلمات من نور said...

كلامك صح الصح يا نور..ربي يزيدك نورا

anollipian said...

الله يا نوران
دي حاجة حلوة جداً
أنا كان نفسي صحبتي تقرا الكلام ده
احنا طول عمرنا متعودين
الو ، ازيك يا قطقوطة عامله ايه
الحمد لله ازيك ياكتكوتة ايه اخبارك
(و تختلف الاسامي من وقت لاخر )
و اذ فجأة الاقيها السنة اللي فاتت بتقوللي " الو .. ايوه ازيك "
في الاول حسين بحاجة غريبة ، حسينت ان فيه مشكلة بس أنا معرفهاش
بس بعد كده عرفت ان السبب هو الاسم
و قلتلها بجد بطلي ازيك لوحدها دي .. بتحسسني باني اي حد و خلاص قامت اتريقت علي : S
بس الحمدلله رجعت طبيعية تاني

و شكراً على البوست يا خوخة يا نونا يا جميلة يا عسولة :D

faissl said...

كان ديل كارينجي ذكر في كتابه الأشهر كيف تكسب الأصدقاء ان الإنسان بالفعل متعلق باسمه جدا
وانك عشان تكسب أي حد يكفي انك تظبطه من جهة اسمه وانت ح تكسبه على طول :)

Anonymous said...

مروة الزارع


انتى عارفة كويس اوى انى واخدة منك موقف

وانى مش عايزاكى ولا تتصلى بيا ولا تعلقى عندى

فلو سمحتى ماتتصرفيش معايا
وكان شئاً لم يكن

انا مش برتحالك

لو كتبتى اى تعليق على اى موضوع انا مش هانشرهولك
______________________
؟؟؟؟؟؟؟؟

ليه كده يا نورا مع ان مزاجك كان رايق يعنى مكنتيش متعصبة و لا حاجة
و بعدين لما دخلت عند مروة حسيت انها طيبة لدرجة السذاجة يعنى مبنفعش يتاخد منها موقف حاد كده

نهى

بت خيخة وأي كلام said...

m5m

انا الى خلانى اشكرك
ان كان فيه ايميل مبعوتلى
قريته قبل ما اقرا ايميلك
والايميل ماكنش فيه اسمى
وكنت حاسة بحاجة غلط

لما قريت ايميلك
اكتشفت ان وجود الاسم مهم جدا ويخليك تحس بانبساط

شكرا ليك يا محمد










سما مصر
ياااااارب

ربنا يخليك يا ايمان







حزينة
وانتى طيبة يا حزينة
ميرسى ليكى







كلمات من نور

ميرسى يا كلمات
ربنا يزيدك نور على نورك

تحياتى ليكى








anolipian

سبحان الله
حاجة بسيييييييييطة جدا
ممكن يكون ليها مفعول السحر

يعنى ترديد اسم الصديق حاجة بسيطة ومش هاتكلف حاجة
ومع ذلك عدم ترديده ممكن يعكنن المزاج ويخلى الواحد كئيب

ربنا يخليكم لبعض

تحياتى ليكى










فيصل

هههههههههههههههههههههههههه
انا عاجبتنى اوى حتة
كفاية انك تظبطه من ناحية اسمه
وانت تكسبه علطول

عندك حق يا فيصل
اهم حاجة التظبيط
لما كل حاجة تتظبط صح
يبقى الواحد صح الصح

تحياتى ليك










نهى

بصى يا نهى
مبدئا كدة
مش كل اللى بتقريلهم ولما تشوفيهم على الحقيقة هتلاقى نفس الانطباع اللى كنت واخداه عنهم صحيح

انا بتكلم بشكل عام
لا اقصد شخص بعينه



كون انك تاخدى انطباع عنها بانها ساذجة
دى حاجة ترجعلك

انا يكفينى الانطباع اللى انا خدته عنها لما اتعاملت معاها
وعلى اساس الانطباع ده انا بقول انى مش مرتحالها

ودى حاجة ترجعلى برضه

تحياتى ليكى



شكرا ليكم كلكم على تواصلكم معايا
اختكم خيخة

Soma said...

مواضيعيك كلها مختلفه وتجنن

فعلا الاسم بيعمل نوع من الالفه بين الناس خصوصا لو من حد بتحبيه

انتي مكلمتنيش ليه يا خوخه؟
انا بعتلك رقمي علي الايميل علي فكره

طب رساله طيب
طب رنه
اي حاجه

طيب ماشي

الشنكوتي الكبير said...

نورااااااااان

خووخه
اختاه

شاطره يا خوخه ملاحظه تمام التمام
انتي عارفه انهم في الدروس بتاعة تحسين علاقتك بالأخرين وكسب الثقه والحاجات اللي بيعلموها للناس دي في بلاد بره وبيقولك مهارات معرفش ايه دي من ضمن دروسها يقولك لو شخص اول مره تتعرف بيه خلي معظم حوارك معاه فيه اسمه يعني كل جملتين كلمه باسمه يا نوران ازيك انتي عامله ايه كده يعني بيقولك ده بيقربك منه اكتر وبسرعه وبيخليه يثق فيك لا شعوريا وفي نفس الوقت بيخليكي تحفظي اسمه اسرع ومتنسيهوش لو قابلتيه في مناسبه تانيه

الموضوع ده قريته من فتره كبيره وبحاول افتكره واستخدمه دايما في ناس بتعمله تلقائي كده هتلاقي نفسك مستريحه معاهم في الكلام اكتر
سبحان الله النفس دي ليها طباع غريبه قوي

كل لما نتعلمها اكتر كل لما نستغرب اكتر

عموما خدي بالك من نفسك ومن الواد شريف لسه كنت بقلب في الكمبيوتر من كام يوم قابلتني صورته اللي كنت صورتهاله يوم التبرع الأخراني اللي حضرته معاكم بالبلوفر الأحمر ده عسول خالص ربنا يخليهولك وتفرحي بيه
ومتنسيش معادنا ان شاء الله رابع يوم العيد في نادي ظباط النقل التقيل
خلف كلية الزراع بشبرا الخيمه على الكورنيش

سلااااااااااااااام
اخوكي ايهاب

فاتيما said...

دا حقيقى جداااايا نونو
و متهيألى لو مكنش اسم البنى آدم مهم جدا مكنش ربنا حضنا على حسن إختياره ..لنه الحاجة اللى هنتنادى بيها طول عمرنا و اكيد ليها وقع عند كل شخص
وعشان كدا انا مش بكتفى
إنى انده للناس اللى بحبها
بأسمائهم بس
لااااااااا
دنا بديهم القاب
و اسامى دلع كمان
و لما ابقى زعلانة من حد بنده
رسمى خالص زى
يا باشمهندس
يا فندم
حضرتك كدا
و لما ابقى زعلانة جدااااااا
بعاقبه بعدم منادته من أساسه
انا فى كل الاحوال
موافقاك يا زعيم
و بحبك يا نوران
يا نورا
يا نونو
يا خيخة
يا خوختى
يا ام شريف شيكو شكشوكة
و بوسة و حضونة يا حبيبتى

مواطن شووجااع said...

مبروكـ يا أم شريف فوز مصر إمبارح


ولا ملكيش في الكورة

Anonymous said...

مخنوق ومش طايق نفسي
وساعات كتير باجي على نفسي
انا قلت اصبر كله يهون
علشان عيونها وحنانها
لكن قولولي انا اعمل ايه
لو جمالها وحنانها
خنقني ومزهق اهلي

اعصابي مشدوده تملي
واعصابها مشدوده على اهلي
مبقولش اني انا كارهها
او اني عايز يوم اسيبها
انا بس عايز اقول مخنوق
كلمه وكلمه ونار بتقوم
لا قدرت انا اطول بالي
ولا هي عاد عندها صبر
انا جيت افضفض هنا حبه
علشان تومورو انا هقابلها
يا اما اصالحها وابوسها
يا اما اديها على بوزها
معرفش بكره هيحصل ايه
اهو كله حلو وراضي انا بيه



معلش يا خوخه بس كنت زهقان ومرضتش اكتبه في مدونتي علشان الناس متسالنيش ايه ده

سلااااااااااااااااااااااام

بت خيخة وأي كلام said...

سومة

معلش يا سومة
انا اصلي ماليش فى كلام التليفونات اوى

انا احب الحوار المباشر اكتر

وعلشان كدة تلاقينى اتاخرت عليكى فى الاتصال


قريب ان شاء الله هتلاقينى برن عليكى زى القضا المستعجل


تحياتى ليكى










الشنكوتى الكبير

كنت لسة جايبة سيرتك مع شاهى
وبسالها هتيجى فرحك ولا لا

وقعدنا نفكر هنسرب العيال فين يوميها
وهانروح ازاى

هنركب مترو
ولا هنتصل بحمادة
ولا هنغتت على البت ابى ونروح معاها لو كانت رايحة
ولا هانعمل ايه

وقلنا عليك جدع
يلا ادينا افتكرناك بكلمة

وانا قلتلها انا بحب الواد ايهاب ده وبحس انه اخويا بجد
وهى هزت راسها وقالت اه

شوفت
ادينا اهوه بنجيب سيرتك بكل ماهو جميل


ربنا يسعدك يارب يا هوبا

بس قولى هو فيه ايه؟

وش واحدة بتغمز وبتطلع لسانها

نيهاهاهاهاهاهاهاهاهاهاهاع

تحياتى ليك












فاتيما

انا بحبك يا طمطومة

وعايزة اقولك انى مانشرتش تعليقك التانى
لانى زيك حسيته بعبعة اكتر منه تعليق

انا بس عايزة اقول حاجة
انت شخصية قوية جدا يا طمطم

انت مشكلتك مش انك ضعيفة او خيخة
انتى مشكلتك انك قوية وعندك كبرياء فظيييييييييع


هتسالينى وايه المشكلة ان الواحد يكون شخصيته قويةوعنده كبرياء
المشكلة فى كدة دى
ماتنفعش هنا على الملاء
دى عايزلها تجمع حريمى على المستضيق بينى وبينك فى الايميلات

لذلك ترقبي وصول ايميل منى ليكى قريبا

يعنى بعد ساعتين كدة

تحياتى ليكى










مواطن شوجااع

ماليش فى الكورة
بس الله يبارك فيك برضه

تحياتى ليك يا هيمة










المجهول

انا مانشرتش تعليقك
لانى قفشتك وعرفت انت مين
وانت اساسا داخل بمجهول علشان تبعبع على طريقتك
وطريقتك يا معلمي مفقوسة
وهاتتقفش هاتتقفش
والناس هتعرف انك انت
فبالتالى مش هايسبوك فى حالك

ها
قلت ايه؟

عايزنى انشره برضه؟

لو قلت ذييييييع
هانذيييييييييييع


تحياتى ليك




شكرا على تواصلكم معايا
اختكم خيخة

همس الاحباب said...

ازيك يا خيخة
كل سنة وانتى طيبة
اخبارك ايه واخبار شريف
البوست جميل وليه هدف ومغزى بصراحة
تحياتى

بت خيخة وأي كلام said...

همس الاحباب

شكرا يا خالد
سلامى لهمس ولشابي

دعاء مواجهات said...

نوران

انتى صح جدا على فكرة
انا نفسى لما بسمع اسمى من الشخص اللى بيكلمنى بحس بطعم مختلف للكلام وبنتبه واركز اكتر بكتير كمان

انما مشكلتى الابدية بقى انى بعد دخولى مجال الصحافة بقيت اعرف ناس كتيير اوى اوى واللى جوا الشغل اكتر من الى برا

بقيت بنسى الاسماء جدا زهايمر تقريبا
فبقول حضرتك وخلاص وساعات بيطلع منى اسم تانى ودا كتير جدا

ببقى مكسوفة من نفسى اوى بس مش بمزاجى بجد

نوران تانى مرة انتى صح
وشوفيلى كدة ازازة علاج زهايمرى من عندك

سلام

users online