Sunday, April 26, 2009

إقفش ... حالة رضا

على غير العادة

صاحية عندى حالة رضا

ومش عارفة ايه سببها

قعدت اقنع نفسى ان سبب الحالة دى

هى انى وضبت الشقة امبارح وغيرت نظامها

بس برضه لا

ما انا كتير بهد الشقة وابنيها واغير فى نظامها

وعمرى ماحسيت بحالة الرضا دى

اممممممممممممممم

يا ترى ايه يا بت يا خيخة اللى مخليكى راضية

مش مهم

واساسا انا معنديش حاجة اكتبها

انا عايزة ارغى وخلاص



عايزة اتكلم عن شريف

انا بحب اوى اتكلم عن شريف

شريف امبارح بعد ماوضبنا سوا الشقة

حميته ولبسته بيجامة جديدة

البيجامة على اده بس بنطلونها طويل شوية

وهو كان معجب بيها اوى لانها نص كم



النهاردة الصبح شريف صحى لوحده

هو كان نايم جانبى على السرير

سالنى مامى احنا مش هنقوم بقى ولا ايه؟

قلتله اه هنقوم بس كمان عشر دقايق كدة

قالى طب بصيلى انت ليه مديانى ضهرك

غيرت وضع جسمى وبصيتله

الشمس ماكنتش لسة طلعت اوى

وضوئها كان بسيط جوة اوضة النوم

لما ركزت فى عيون حبيبى

لاقيتها بتضحك

انا بحب عيون شريف

لونها كميل وشكلها كميل

وبحب كمان رسمة شفايفه

بسم الله ماشاء الله

ربنا يحميه ويخليهولى

ويحفظهولى من كل عين

بس مش بحب مناخيره

مناخيره مكعبرة حبتين

وبتتعبنى وقت تنضيفها من البرابير



شريف حفظ دعاء الخروج من المنزل

وبقى بيقوله لوحده

بسم الله توكلت على الله

ولا حول ولا قوة الا بالله

الهم أعوذ بك من أن

أضل أو أضل

او أذل أو أذل

أو أظلم أو أظلم

أو أجهل أو يجهل علي

معلش بقى مش عارفة احط التشكيل على الحروف



روحتله المدرسة من كام يوم

كنت ناوية اطلع تربنتين اللى خلفوهم

لأنى زعلت ان شريف ماشتركش

فى مسابقة القرأن الكريم

وعلى كلام محفظة القرأن

ان شريف كويس وانه حافظ اغلب السور

بس لما عملوا تصفية

ماختاروش شريف من ضمن المتسابقين

ودى حاجة احبطتنى جدا

بس لما روحت المدرسة

لاقيت شريف مع باقى زمايله

فى اوضة الموسيقى

ولاقيتهم بيغنوا أغنية بالإنجليزي

لما ركزت فيها لاقتها هى نفسها

أغنية محمد ثروت اللى غناها بالعربى

اللى هى جدو على عنده حمار ... إيا إيا أوه

دخلت الأوضة

وقعدت اغنى و أرقص واسقف معاه ومع باقى زمايله

وكان بيجيلى حماسة غريبة وانا بقول إيا إيا أوه

وكان صوتى بيعلى اوى فى الحتة دى بالذات

شريف كان مبسوط يوميها

وانا مشيت من المدرسة

ومطلعتش تربنتين اللى خلفوهم



شريف لسه فاكر بابا

من يومين لاقيت عينيه مرغرغة بالدموع

وبيسالنى

هو احنا مش هانطلع الجنة عند جدو بقى؟

ضحكت ضحكة مصطنعة

وقلتله وهو اللى عايز يطلع الجنة يعيط كدة



من فترة كدة

شريف جالى وقالى مامى

غمضى عنيكى

ولما غمضتها

قالى فتحى عنيكى

ولما فتحتها مالقتش حاجة

سالته فيه ايه؟

ضحك وقاللى

ولا حاجة ده انا بهرج معاكى

ساعتها قلت فى عقل بالى

هو الواد ده بيشتغلنى ولا ايه؟



شريف لما بيدعيلى

بيقول

يارب يا مامى

ربنا يحبك

والناس تحبك

والجنة تحبك



ايوة انا خلاص عرفت

ايه سبب حالة الرضا اللى عندى

ان ربنا رزقنى بحاجات حلوة كتييييييييييير

ومن اهمها شريف حبيب قلبي



انا بحب الواد ده أوى

ربنا يخليهولى يارب

ويباركلى فيه

ويجعله قرة عينى

ويكون انسان صالح

ومايتظلمش فى يوم

ولا يظلم حد

يارب باركلى فيه يارب



انتهى

بت خيخة وأى كلام

Saturday, April 11, 2009

إنكسار


شريف ... أرجوك
إسكت بأه
وبلاش كتر الاسئلة
مامى النهاردة مكسورة
ولو نطقت بكلام
كلامي هينقط إزاز
وخايفة من كلامي اجرحك
أرجوك حبيبى إبعد بعيد
وسيبنى فى كسرتي لوحدى
سيبنى ألملم فتافيتي
ولون انت فى كتابك
لون بألوان فاتحة
وارسم نخلة مرفوعة
وارسم بايدك جنتك
وابعد عنى حبيبى
عشان خايفة فى كسرتى اعديك
خليك انت لسة برئ
خليك انت لسة بتضحك
وابعد عن خيخنة مامى
وماتجيش فى حضنى دلوقتى
ده حضنى ممكن يوجعك
شريف .... ارجوك
إبعد بأه
انا النهاردة بجد بجد مكسورة


انتهى
بت خيخة وأى كلام

users online