مكتوب على قفاه

ريموت الريسيفر باظ

اشتريت ريموت شبهه بالظبط

من على الرصيف فى العتبة ب10جنيه

الريموت الاصلى بيتباع ب120 جنيه

الريموت ابو 10 جنيه مكتوب على قفاه

صنع فى الصين

فى هايبر وان

فى الدور الارضى

كشك جنب السلم

بيبيع صنادل بلاستيك

جميع المقاسات والالوان

وتنفع حريمى ورجالى واطفالى وشبابى

للنوادى وللبلاجات

الصندل الواحد بحوالى 150 جنيه

ولو حبيت تشترى اكسسورات بلاستيك

علشان تزوق الصندل بتاعك

شريط الاكسسوار ب20 جنيه

لما تطلع الدور التانى فى هايبر وان

هتلاقى نفس الصنادل دى

وسعرها 15 جنيه

ومعاها شريطين اكسسوار هدية

الصندل مكتوب على قفاه

صنع فى الصين

شبشبي الازرق اتقطع

اشتريت شبشب ازرق تانى

من عند التوحيد والنور

الشبشب ب9 جنيه

الشبشب مكتوب على قفاه

صنع فى الصين

فى كارفور المعادى

دخلت محل نظارات

لاقيت نضارة شمس شبه بتاعتى بالظبط

لما سالت على تمنها

البنت قالتلى بــ 1700جنيه

واستدركت فى كلامها

وقالتلى بس ليه حضرتك

تجيبى حاجة زى اللى عندك

ماتشوفى موديلات تانية

قلتلها اصل النضارة بتاعتى

عجبت واحدة صاحبتى

وعايزة اشتريلها واحدة زيها هدية

قالتلى لو حضرتك جايبة النضارة دى من عندنا

ممكن نعمل تخفيض على النضارة التانية

قلتلها لا ده انا جايباها

من عند محل تانى وبسعر تانى خاااااالص

قالتلى ليه هو حضرتك جايباها بكام

قلتلها الراجل كان طالب فيها 20 جنيه

خدتها منه بــــ 15 جنيه

البنت تنحت وبرقت عنيها

وقالتلى بس مش هاتكمل شهر وهتلاقيها اتكسرت

قلتلها النضارة دى بقالها معايا 3 سنين

النضارة مكتوب على قفاها

صنع فى الصين

مؤخرا خبر قريته فى الجرنال

الدهب الصينى يغزو الاسواق المصرية

باسعار خيالية

يعنى ممكن تشترى اسورة حلوة ومكلبظة

وعريضة وتملا عين المدام

وماتدفعش اكتر من 40 جنيه

ولو عايز تخطب

وتخلى اهل العروسة يتفشخروا بيك قدام الناس

وتغرق عروستك دهب

من شعرها لحد اخمص رجليها

دلوقتى تقدر تشترى الشبكة من الدهب الصينى

وماتدفعش اكتر من 500 جنيه

الدهب الصينى لونه لا يتغير

الا بعد مرور حوالى تلات او اربع سنين

الدهب الصينى

مكتوب على قفاه

صنع فى الصين

الكيبورد اللى انا بكتب عليها دلوقتى

مكتوب على قفاها

صنع فى الصين

بصيت على قفا الماوس

لاقيت مكتوب على قفاه

صنع فى الصين

بصيت على الجزمة والكبشة والحلة

وايشارباتى ومايوه شريف

وشنطة النادى وسجادة الصلاة

ولعب شريف واقلامي

وزمزمية شريف

لا قيت مكتوب على قفاهم

صنع فى الصين

بتصل بواحدة صاحبتى

بقولها عاملة ايه

قالتلى كويسة

قلتلها وجوزك عامل ايه

قالتلى زفت

قلتلها ليه كدة؟

قالتلى قاطع مية ونور

قلتلها طب ما تبصى على قفاه

وشوفيلى مكتوب ايه

غابت دقيقتين ورجعت

قالتلى مكتوب jil صناعة مصرية

قلتلها العيب مش فى جوزك

ده العيب فى الفانلة الداخلية

غيريها واشتري صنع فى الصين

هتلاقيه شغاااااااااااااااااال علطول

بس خلاص

أخر الكلام

الصين تنين نائم ... ويل للعالم إذا إستيقظ

إنتهى

بت خيخة وأى كلام

كلاً يبكى على ولداه

انا فلانة ام فلان

الولد الصغير اللى مات برصاصة

وهو واقف بيتفرج من بلكونته

على احداث الشغب اللى فى المحلة

وطلع مسؤل كبير

بدل ما يقولى البقاء لله

واحنا اسفين وليكم عند الحكومة دية

راح زود وجعى وزود حرقة قلبى وقالى

انتوا معندكوش ثقافة الوقوف فى البلونات

انا لسة قلبى محروق على ابنى

وفى كل ركعة بركعها بقول

حسبى الله ونعم الوكيل

حسبى الله ونعم الوكيل

حسبى الله ونعم الوكيل

النهاردة محمد علاء مبارك مات

انا ام الولد الصغير اللى مات برصاصة

انا بسمع الخبر ومذهولة

انا بعيط اوى

ومش عارفة انا بعيط ليه

معرفش عياطى ده معناه

ان خدت حقى

ولا معناه

ان حسنى وسوزان وعلاء وجمال وهايدى وخديجة

كلهم النهاردة

هيعرفوا يعنى ايه حرقة قلب

انا ام الولد الصغير الى مات برصاصة

انا النهاردة بعد صلاة الضهر

ماقلتش حسبى الله ونعم الوكيل

انا ام الولد الصغير الى مات برصاصة

انا النهاردة بعد صلاة الضهر

قلت يارب صبر قلبهم وارحم ابنهم

انا فلان والد فلان

اللى كان راجع على عبارة السلام

ابنى مات

ممدوح سالم خد براءة

انا قلبى محروق

انا مش عارف اخد حق ابنى

صرفولى تعويض مادى

انا مش عايز الفلوس

انا عايز ابنى الى مات فى فى عبارة السلام

انا عايز انهش ضوافرى فى وش ممدوح اسماعيل

انا عايز انهش ضوافرى فى قلب ممدوح اسماعيل

انا عايز انهش ضوافر فى اللى بيحمي ممدوح اسماعيل

انا عايز ابنى يرجعلى فى حضنى

انا فى كل سجدة بسجدها لربنابقول

حسبى الله ونعم الوكيل

حسبى الله ونعم الوكيل

حسبى الله ونعم الوكيل

النهاردة انا مستغرب

وبضرب كف بكف

وبقول لنفسى مافيش حد كبير على ربنا

انا النهاردة بعد صلاة الضهر

ماقلتش حسبى الله ونعم الوكيل

انا النهاردة اكتفيت بالعياط

وقلت ربنا يصبر قلبهم ويرحم فقيدهم

انا هايدي

والدة محمد علاء مبارك

ابنى مات النهاردة

ابنى الكبير قرة عينى انا وابوه وكل اهلنا

مات النهاردة

انا قلبى محروق

انا ماتصورتش ابدا

ان لحظة فراقه تيجى قبل لحظة فراقي

انا بعيط اوى

انا موجوعة اوى

انا محتاجة أحضانكم كلكم اعيط جواها

ومحتاجة ايديكم كلكم تطبطب عليا

انا عايزة حد يقولى صبرى قلبك

انا عايزة حد يقولى كلام يهدينى

انا محتاجة دعواتكم كلكم

عايزاكم تدعوا لابنى بالرحمة

وتدعولى بالصبر

انا حسنى مبارك

انا جد محمد علاء مبارك

محمد اول فرحة فى اسرتى

محمد هو اول واحد يقولى ياجدو

محمد كان نور عنيا اللى بشوف بيها

محمد الحاجة البريئة اللى فى حياتى

محمد مات النهاردة

انا بعيط اوى

انا مش قادر اقف على رجلى

انا مش عايز اى حاجة من الدنيا دى

انا عايز محمد يرجع لحضنى

انا مضطر انى امثل دور التماسك

لان الناس كلها شايفانى الكبير

انا محتاج فى اللحظة دى اكون صغير

محتاج اكون مواطن ومش رئيس

انا عايز اعيط على الملأ

انا عايز اعيط جوة حضن بيحبنى

انا عايز ايد تطبطب عليا

انا عايزكم تدعوا لمحمد بالرحمة

وتدعولى بالمغفرة

انا لله وانا اليه راجعون

انا لله وانا اليه راجعون

انا لله وانا اليه راجعون

انتهى

بت خيخة وأى كلام

كسارة البندق

صداع فظيع مسك راسى

عِند مع نفسى انى مش هاخد كيتوفان

وانى هانام وهاصحى اكون زى الفل

فى هذيان ما قبل النوم

وفى التفكير فى الصداع

كان نفسى اجيب حاجة

واضغط بيها على دماغى

علشان امنع احساس ان دماغى بتلق فى راسى

زى ما تكون لابس جزمة واسعة عليك

وبتلق فى رجلك ونتيجة اللقلقة دى

ان رجليك بتتكحت من ورا وبتعملك واوا

قعدت افكر ايه الحاجة اللى ممكن تمسك دماغى

غير فكرة الرباط الضاغط

اللى بابا الله يرحمه

كان بيتبعها عند شعوره بالصداع

مالقتش حاجة على اد دماغى

قعدت افكر واقول انهم المفروض يبتدوا يفكروا

لحد دلوقتى معرفش هما مين اللى المفروض يفكروا

بس عندى احساس ان مسؤلية التفكير دى

بتقع على عاتق ناس بعينها

انا معرفش عنهم حاجة

لكنى اشعر بوجودهم حولينا

المهم يعنى

ان الناس دى المفروض انهم

يعملوا حاجة شبه كسارة البندق

بس تكون مقاس كبير على اد راس البنى ادمين

واللى عنده صداع

يحط راسه بين فكي الكسارة الكبيرة دى

ويخلى حد من اهله يضغط عليها

لحد الصداع ما يروح او دماغه تنفجر

ايهما اقرب يا ترى؟

وقعدت اتخيل ان راسى بين فكي كسارة البندق

وان بابا ضغط على الكسارة

وان الصداع راح فى لحظة انفجار جمجمتى

ومخي تناثرت اشلائه

ودمي وسخ الاوضة

وطرطش على بابا وعلى سقف اوضة النوم

والدنيا اتزروطت تماما

وماما عملت مشكلة

علشان كانت لسة منضفة الشقة

وعمالة تزعق وتقول لبابا

ماكنت ضغطت علي دماغها

فى الحمام احسن

بدل ما توسخ الاوضة كدة

هو انا لسه هاقعد امسح تانى

وراحت زقانى من فوق السرير وانا من غير راس

وغيرت الملاية اللى عليها دم راسى وبقايا من مخى

يععععععععععععععع

ايه القرف ده؟

وفجأة الفكرة تلاشت من دماغى

وقلت يا سلام لو فيه كسارة البندق لكل حاجة توجعنا

يعنى لو صباع رجلى الكبير وجعنى

مش اعالجه

لااااااااااااا

انا اقطعه علطول

قصدى احطه بين كسارة البندق

المخصوصة لوجع الصوابع

واديها تكة واضغط وهوب

الصباع يا اما يخف يا اما يتفشفش

وفجاة برضه الفكرة تلاشت من دماغى

وفجاة لاقيت نفسى بقول

أأأأأأأأأأأأأأأأأأأأه

والفجر بيقول الله اكبر

وصوت الحنفية مفتوح

ومن صوت حركة انسياب المية

عرفت ان بابا هو اللى بيتوضى

ولا قيت نفسى بقول

ازاى يعنى بابا هو اللى بيتوضى

ورحت فى النوم تانى

امممممممممممممم

دى معناها

أأأأأأأأأأه بس مكتومة لجوة

وصوت الحنفية المرة دى

بيدل ان ماما هى اللى بتتوضى

دعبست فى الضلمة على شنطتى

فتحت سوستة الشنطة

مديت ايدى ودعبست

وقعدت ادورعلى شريط الكيتوفان

وساعتها كرهت ام الشنطة بتاعتى

اللى عاملة زى شوال الحاوى

اللى من غير اى جيوب

ومدلوق فيها كل حاجة على بعض

المهم

لاقيت شريط الكبسول

خدت كبسولتين كيتوفان

طلعت برة

لاقيت بابا بيصلى

سالته هو حضرتك موجود ازاى

ماردش عليا لانه كان بيصلى

وأنا فتحت التلاجة خدت ازازة مية

ودخلت الاوضة بلعت الكبسولتين

نمت على السرير

قعدت افكر فى كسارة البندق

وهل يا ترى ممكن بعد كدة

تتحول لاداة تعذيب فى المعتقلات السياسية

وبدل ما يقعدوا المسجون السياسى على الخازوق

يخدوه ويحطوه بين كسارة البندق

ولاقيت ماما فى وشى بتقولى

شقة اسر غرقت

ولاقتنى لسة فى سريرى

وعرفت انى بحلم

وتخيلت مواسير المية اللى فى شقة اخويا

محطوطة بين فكي كسارة البندق

وعادل السباك ابو عجلة

ضغط على دراعين الكسارة

وخلاها تنفجر فى شقة اسر

وشوفتنى وانا بطنى منفوخة

وجوة مستشفى

وبيقولولى هتولدى حالا

وحاطونى جوة كسارة بندق كبيرة

وضغطوا على بطنى

وبطني فرقعت وبيبيهات كتييييييييييرة جدا

طاروا فى كل حتة فى اوضة الولادة

وفجأة صحيت على صوت شريف وهو بيسالنى بيأس

مامى هو احنا مش هانطلع بقى عند جدو جمال فوق فى الجنة؟

بصتله وقلتله ان شاء الله

بس خلاص

وكل الكلام اللى فوق ده

نطلع منه بسؤال واحد بس

لما الروح توجعنا

ازاى نحطها جوة كسارة البندق؟

إنتهى

بت خيخة وأى كلام

الشكولاتة ساحت

إني اعشق الشكولاتة عشق بلا حدود

فده شئ مايغضبش ربنا أبداً

ولا حاجة تدخلني النار بسببها

و إن بيتى يتحول لسوبر ماركت

او بمعنى أدق نظرا لمساحة الشقة

يتحول لكشك حلويات

بسبب كم الشكولاتة المتواجد فيه

فده شئ مقبول نوعا ما ومايزعلش حد

وكل واحد حر فى بيته

وأنى اتخن بسبب الشكولاتة

بعض الكيلو جرامات

مش كتير يعنى

يجى عشرة خمستاشر كيلو بس

فده شئ متوقع

ومايزعلنيش ولا يضايقنى

ولا يقهرني اطلاااااااااااااااقا

وإن شنطتى يتواجد فيها

انواع مختلفة من الشكولاتة على مدار الساعة

فده شئ طبيعى ومتوقع من واحدة

بتتخانق مع ابنها فلذة كبدها

وبتخطف منه الشكولاتة

وان الشكولاتة تسيح

من تعرضها لاشعة الشمس

فده شئ علمي بحت

ومنقدرش نفتح بقنا فيه

وانى اكل حتة من شكولاتاية معايا فى الشنطة

و اقفل الورقة كويس

واغطى بيها باقى الشكولاتاية

ده تصرف سليم جدا

ومحدش يقدر يغلطنى فيه

لكن لما اكل حتة شكولاتاية

واغطى الباقى كويس

واركب عربية واقعد جنب الشباك

واحط شنطتى على رجلى

والشمس تدخل من الشباك

واشعتها تتوغل لداخل الشنطة

ومنها الى حتة الشكولاتة اللى ورقتها مفتوحة

فالشكولاتة تتمدد بالحرارة

وتطلع من الورقة

وتنتشر وتتوغل الى محتويات الشنطة

فده شئ غير مقبول نوهائياً

لما احط ايدى فى شنطتى بمنتهى الثقة

علشان اطلع اقلم

والاقى القلم متلحوس بشكولاتة

وايدى اتلحوست هى كمان

فده شئ غير مقبول نوهائياً

لما اعتقد اعتقاد خاطئ

ان القلم بس هو اللى اتلحوس

واطلع الكتاب اللى بيكون معايا

واحطه على بنطلونى الجينز الفاتح

واذ فجأتن الاقى ان بنطلونى

بقى عليه اثار شيكولاتة

فده شئ غير مقبول نوهائيا برضه

لما شنطة ادوات النظافة اللى بشيلها معايا علطول

تتلحوس شكولاتة وتبقى فى منتهى القذارة

يبقى ماتستحقش انها تحمل لقب شنطة النظافة

لما كل حاجة تتلحوس بالشكولاتة

وافضل انا قاعدة زى خيختها

و يبقى منظرى كالأتى

قاعدة ومحتاسة

ودراعى مرفوع لفوق شوية

وصوابع ايدى الاتنين

مفتوحين على مصراعيهما

زى مايكون اول مرة أكتشف

انى عندى عشر صوابع

فده شئ مقبول نظرا انى ايدى متلحوسة

لكن اللى مش مقبول ابدا

ان يجى فسل من دور عيالى

يبصلى بإشمئزاز وإشمئناط

ويبص على إيدى المتلحوسة

ويقولى بمنتهى البجاحة والقرف

مامي أنتى إيدك بقت ديرتى خالص

ماتلعبيش معايا ولا تزغزغينى

الا لما تغسلى ايدك

ولما اطلب منه بمنتهى الرقة المزيفة اللى فى الدنيا

واقوله طب ممكن يا شريف تمد ايدك

تجيبلى المناديل المبلولة من الشنطة

علشان امسح إيدى

يقوم يبصلى بعيون خضراء ماكرة

ويقولى حضرتك عايزانى انا كمان تبقى ايدى ديرتى؟

لا طبعا يا مامى مش هاجيبلك حاجة

فده شئ يجعلنى اذبهل اذبهلال واضح

من رده عليا ويخلينى اقول فى عقل بالى

طب ايه لزوم حضرتك بقى

لما فى الاخر لا طبعا مش هاجيبلك حاجة

لما استبدل الرقة المزيفة

بالصوت العالى وصيغة الامر

واستخدم اسلوب القهر

كل ده فى جملة واحدة

بقولك ايه يا شريف

اسمع الكلام ومد ايدك هات المناديل

فده اسلوب تربوى قديم

كلنا مرينا بيه فى فترة من فترات حياتنا

لكن لما صوته يتخنق بالدموع

ويصعب عليه نفسه

وهو حاسس انه مجبر

على عمل غير اخلاقى بالمرة

ويقولى

ينفع كدة؟

ينفع كدة تزعقى لشريف حبيبك؟

ينفع كدة تخلى ايدى تبقى ديرتى؟

فده شئ غير مقبول

ويحتم عليا انى اتراجع فى طلبى

واعتذرله واقوله طب خلاص ماتزعلش انا اسفة

لكن لما يتجعص فى قاعدته

وياخد نفس ارتياح

ويقولى وهو مش معبرنى

و باصص من شباك العربية

بعد كدة ابقى هاتى كيس حطى فيه الشكولاتة

بدل ما توسخى شنطتك كدة يا مامى

يبقى ده شئ غير مقبول نوهائيا

ويحتم عليا انى اصرخ فى عقل بالى واقول

اما انك ابن خيخة صحيح

بس خلاص

وكل الكلام اللى فوق ده

نطلع منه بحاجة واحدة بس

ان الشكولاتة ساحت

وراحت مطرح ماراحت

انتهى

بت خيخة وأى كلام