أه لساني طويل
أه بقول ألفاظ أبيحة
أه بهرج تهريج سافل
أه بتفرج على فيديو كليب
اه بسمع خالدة الذكر هيفاء وهبى
وهى بتشدو برائعتها
رجب حوش صاحبك عني
لكن
مع شريف
انا أم بقها مابيخرجش منه العيبة أبداااااااااااا
مع شريف
انا أم لسانها بينقط عسل
وبتنده لأبنها بتقوله يا حبيب قلبى
مع شريف
أنا أم بتتفرج على توم وجيرى وبتسمع فيروز
مع شريف
أنا أم بتصلي فرضها
وبتطلب من إبنها انه يقرا قرأن معاها
مع شريف
انا أم بتعتذر لو غلطت فى حق إبنها
مع شريف
انا أم بتستأذن قبل ما تلعب بالمكعبات بتاعته
مع شريف
أنا أم بتعتذر لو كسرت لعبة إبنها غصب عنها
مع شريف
أنا أم بتقول ممكن ولو سمحت لأبنها
لو عايزاه يجبلي إزازة مية
مع شريف
أنا أم لو زعلت من إبنها
بتقوله أنت وحش وأنا زعلانة منك
ومش بستخدم ألفاظ منيلة بنيلة
زي حيوان وكلب وحمار وسافل
مع شريف
أنا أم بتقرص لباليب ابنها لو كرر الغلطة
لكن مش بضربه بالشبشب ولا على وشه بالقلم
مع شريف
أنا أم بتمنع نفسها وبتمنع أى حد
إنه يقول أى لفظ مش مظبوط قدام إبنها
مع شريف
أنا أم بتمنع أى حد أنه يهرج مع إبنها
تهريج يحتوي على ألفاظ مش كويسة
مع شريف
أنا أم ماعلمتش إبني
إنه يتف على عمو وعلى طنط على سبيل التهريج
لحد هذه الحظة مش عارفة ايه وجه المتعة
فى ان الاب او الام يعلموا عيالهم حكاية التف دى
وتلاقى الاب من دول بيقول لابنه
تف على عمو يا حبيبى
وعمو ده ممكن يكون اخو الاب
مع شريف
أنا أم منعت الأب إنه يشرب سجاير قدام ابنه
علشان أنا أم مقتنعة إن الاب بيكون قدوة لأبنه
ولو الأب شرب سجاير قدام إبنه
ممكن فى يوم الإبن يحط القلم فى بقه
ويقولي بشرب سجاير زي بابي
وساعتها مش هابقى طايقة الأب
لو كان ده تاثيره على الإبن
مع شريف
أنا أم بتحترم خصوصيات إبنها
مع شريف
أنا أم بقول شكرا لإبني لما يساعدني في أي حاجة
والنتيجة كالأتي
شريف لما يندهلي بيقولي يا حبيبة قلبي
شريف لما بيغلط بيقولى انا اسف يا مامى ماتزعليش منى
شريف لما يزعل مني بيقولى مامي انتى وحشة
شريف لما بقول قدامه لفظ وحش غصب عني
بيقولى مامى الكلمة دى عيب
شريف لما بيدعيلي بيقولى
يارب الجنة تحبك وربنا يحبك والناس تحبك
شريف لما يشوفني قاعدة على الكنبة
ورافعة رجلي عليها وهي فيها الشبشب
بيقولي مامى ماتحطيش الشبشب على الكنبة علشان كدة غلط
شريف لما بيشوف حد بيشرب سجاير
بيهمس فى ودني وبيقولى
مامى الحقى عمو بيشرب سجارة يع
شريف لما بيغني بيقول
الله على حبك انت مابحبش غيرك انت
ويسكت شوية ويتمعن فى كلمات الاغنية
ويقولى بس انا بحب الناس كلها
شريف لما كسرتله لعبته غصب عنى
وقلتله أنا اسفة ماتزعلش منى
قاللى ولا يهمك يا مامى حصل خير
انا مش زعلان منك ... بس ابقى خدى بالك المرة الجاية
شريف لما يحب يفتح الدرج بتاعي بيستأذن مني الأول
شريف بيقول اتفضل لما يدى لحد حاجة
وبيقول شكرا لما ياخد من حد حاجة
شريف لما زعقتله بدون وجه حق
قالى انتى وحشة يا مامى
وبعد شويه لما لاقانى مطنشاه
قالى انتى مش هتقوليلى انا اسفة
ولما قلتله انا اسفة... انت لسة زعلان منى؟
قالى خلاص مش زعلان
بس ماتزعقليش تانى وماتزعلنيش منك تانى
شريف من كام يوم لما كان بياكل و طلبت منه
انه يفتح بقه و يقطم الخياراية
سألني وهو قلقان وقالي مامي
هى طنط دعاء هاتقطم رقبة رقية
زى ما انا بقطم الخياراية كدة برضه؟
انا أم بتحترم إبنها
والنتيجة إن شريف بقى طفل بيحترم الجميع
أصحابي بيتهموني إني بربي شريف بطريقة مثالية جدا
في زمن و مجتمع لا ينفع معهم المثالية
ورأيي إن تربيتى لإبني هى التربية الصح
وإن لو كل أم ربت إبنها كويس
مش هايبقى فيه مجتمع سافل
لأن بمرور الزمن
أطفالنا هيكونوا هما المجتمع
ولما إحنا نربي عيالنا صح
المجتمع كله هايطلع متربي صح
أنا ماطلبتش من حد إنه يربي إبنه بطريقتي
لكن ماتطلبوش مني إني أربي إبني بطريقتكم
لكم تربيتكم ولي تربيتى
بس خلاص
وكل الكلام اللى فوق ده
نطلع منه بحاجة واحدة بس
محدش يهرج مع إبنه ويعضه فى الأظؤظة
علشان اللى تعضوه النهاردة فى أظؤظته
هايجي بكرة وانتوا بتغسلوا المواعين
ويعضكم فى أظؤظتكم
وما ادراكم بعضة الأظؤظة
بتوجع جدااااااااااااااااااااا
إنتهى
