ورشة اللحام

صوابعه لونها اسود بدرجاته

وكل ما تقرب من العقلة اللى فيها الضفر

يزداد اللون الاسود سوادا

وكعوب رجليه متشققة

شقوق غويطة

لدرجة تحس معاها

انك ممكن تخبى دبابيس ابرة

بشكل افقى فيها

هدومه متعرفلهاش لون

ومتقدرش تحدد اللون الاصلى كان ايه

كل اللى تشوفه قميص وبنطلون

عليهم بقع زيتية وشحمية سوداء

تتفاوت درجة سوادهم

وتقدر بسهولة تعرف ان البقعة الكبيرة دى

معناها انه كان ساند ماسورة لحام على فخذه

اما البقعة دى

معناها انه مسح ايده فى قميصه

*******

يرحب بصديقه اللى ماشفهوش من فترة

صديقه يمد ايده بالسلام

وهو يمد معصم ايده ويلف كف ايده

محاولة منه لابعاد كف ايده انه يلمس ايد صاحبه

ويقوله اعذرنى مش عارف اسلم عليك كويس

صديقه يعرفه على مراته اللى قاعدة فى العربية

يرفع ايده بالسلام من بعيد

ويعتذرلها انه مش قادر يجى يسلم بنفسه

ويفردلها كفوف ايده الإتنين ويقولها

زى ما حضرتك شايفة

تبتسم وتقوله سلامك وصل

يلتفت لصديقه

ويتبادلوا معرفة سريعة عن اخبار كل واحد

ويعزمه على كتب كتاب ابنه

المهندس فلان

صديقه يندهش ويقوله ياااااااه

بقى المفعوص ده كبر

وبقى مهندس وهيتجوز كمان

***********

في طريقهم لحفل كتب الكتاب

جوزها يحكيلها قصة كفاح صديقه

واد ايه تعب فى ورشة اللحام

اللى ورثها عن ابوه

وانه قدر يشتغل فيها بجانب تعليمه

وانه قدر يتجوز ويجوز اخواته البنات

وانه يربى عياله كويس

ويعلمهم احسن تعليم

وهى تسمع بإنصات وإعجاب

***********

صوابعه نضيفة

ورجليه جوة جزمة ايطالى

والبدلة تحفة

والكرافت بتكمل الاناقة

وريحة البرفان بتهفهف فى الجو

والمنظر العام يدل على انه النهاردة والد العريس

وانه مش الاسطى فلان صاحب الورشة

صديقه يمد ايده بالسلام

وهو يشده ناحيته

ويقوله دلوقتى اقدر اخدك فى حضني

وهى تمد ايدها بالسلام

يسلم عليها بايده النضيفة

ويقولها اعذريني ايدى خشنة عليكي

تحط كف ايدها الشمال فوق كف ايده اليمين

الموجود فى ايديها اليمين

وتربت على كف ايده وتقوله

هذه يد يحبها الله ورسوله

يبتسملها شكرا لذوقها

وتبتسمله معجبة بكفاحه

ويروحوا كلهم يتصوروا مع العريس والعروسة

إنتهى

بت خيخة وأي كلام

الكيس البمبي

معرفش من امتى بالظبط

بدأ حبي لغزل البنات

تلك الحلوى القطنية الهشة

اللى بتدوب بمجرد انها تلمس طراطيف لسانك

وفعلا انا فى صغرى

كنت معتقدة انها قطن

ومرشوش عليه سكر

وافتكر ماما زمان

كانت بتنجد المراتب والمخدات

فى مدخل العمارة

ونزلت انا اشوف المنجد وهو بيضرب القطن

وخدت حتة قطنة طايرة

وطلعت بيها البيت

ودخلت المطبخ حطيت عليها سكر

وحاولت انى اكلها

وطبعا عرفت وقتها

ان غزل البنات مالهوش علاقة بقطن المراتب

حبى لغزل البنات له اسباب كتيرة

اولا طعمه

ثانيا الوانه

او بمعنى اصح الوان الاكياس اللى بيتحط فيها

كنت معتقدة دايما ان كل كيس

بيحتوى على طعم مختلف من غزل البنات

وكان دايما عندى رغبة جامحة

انى اشترى كيس من كل لون

لكن المصروف وقتها

ماكنش يكفى الا لشراء كيس واحد

او ان بابا او ماما كانوا بيصروا

انى اشترى كيس واحد بس

وان مافيش اى مبرر انى اشترى اكتر من كيس

ولما كنت اقولهم علشان ادوق كل الالوان

كانوا بيقولولى كلهم نفس الطعم

وانا كنت اعتقد بداخلى انهم بيضحكوا عليا

علشان يخلونى اكتفى بشراء كيس واحد فقط

اللى عادة بيكون لون بمبى

وعمرى ما غيرت لون الكيس

كنت دايما بقول فى عقل بالى

بدل هاشترى كيس واحد بس

يبقى هاشترى الكيس البمبى

وكنت كل مرة اشترى فيها غزل البنات

اوعد نفسى انى هاحوش من مصروفى

والمرة الجاية هاشترى كل الالوان

وخصوصا انى عايزة اجرب طعم غزل البنات

اللى فى الكيس اللبنى والكيس الاصفر

ومش فارق معايا اوى الكيس الاخضر لانى مش بحب اللون ده

لكن مع كل مرة اسمع فيها زمارة غزل البنات

افرح واتحسر

افرح انى هاكل غزل البنات

واتحسر انى ماحوشتش من مصروفى

وانى هاكتفى دايما باللون البمبى

ولما كبرت ومصروفى بقى يسمح

انى اشترى العصايا كلها

اللى عليها عشرات الاكياس الملونة

كانت بتقابلنى مشكلة من نوع تانى

انى مكسوفة اوقف بتاع غزل البنات

وانا كبيرة وشاحطة كدة

علشان اشترى منه كيسين او اكتر

او انى انده عليه من البلكونة

وافرج عليا الناس فى الشارع

فبالتالى فرحت اوى لما ربنا رزقنى بشريف

ساعتها قلت ان من اهم مميزات وجود شريف فى حياتى

انى هاقدر اوقف بتاع غزل البنات فى الشارع

واشترى غزل البنات على حس شريف

او هاقدر ابعت شريف ينزل يشتريلى هو غزل البنات

باعتباره عيل

وده تصرف طبيعى من العيال

انهم يشتروا غزل البنات

من شوية سمعت الزمارة الشهيرة

وقفت على السلم وخليت شريف يوقف جانبى

باعتبار لو حد شافنى بنده على الراجل

يعرف ان معايا طفل

علشان انفى من عليا تهمة المعيلة

وندهت على بتاع غزل البنات

وقلتله عايزة اربع اكياس

واحد بمبى وواحد لبنى واتنين اصفر

لان شريف بيحب اللون الاصفر

ونزلت السبت وفيه الفلوس

والراجل مشكورا لبى طلبي بمتتهى الدقة

وانا دخلت البيت

واديت لشريف الكيس الاصفر

وحطيت التلات اكياس على تربيزة السفرة

فى انتظار ادان المغرب

علشان اكسر صيامى على غزل البنات

ولا سيما الكيس اللبني

اى نعم انا بقيت من النضوج دلوقتى

اللى يخلينى اعرف ان غزل البنات كله طعم واحد

لكن ده ما يمنعش انى عايزة اجرب طعم الكيس اللبنى

دخلت انام شوية

ولما صحيت مالقتش غير كيس واحد

سألت شريف

قاللى انه اكل الكيسين التانيين

قلتله بالهنا والشفا

لكن ده مايمنعش انى متغاظة منه

وعايزة امسكه اعضه فى اظؤظته

لانه سابلى برضه

الكيس البمبى

انتهى

بت خيخة وأى كلام