Friday, May 14, 2010

مـــطـــلـــقـــة..... ولا غـــضـــاضـــة


احب دوما ان اضع الامور فى نصابها

رغم انى لا اعلم حتى الان ماهذا النصاب لاضع فيه الامور

ولذلك ما ان انتهت فترة عدتي

حتى اتخذت من فوري

الاجراءات اللازمة

لتغير بند الحالة الاجتماعية

فى بطاقة الرقم القومي الخاصة بى

لتحويلها من زوجة الى مطلقة

وحذف اسم الزوج


*****


عند استلام البطاقة الجديدة

صوعقت ان حالتى الاجتماعية غير مذكورة فيها

سالت الموظفة المسؤلة عن تسليم البطاقات

عن سبب ذلك

قالت: الحكومة مانعة اننا نذكر الحالة الاجتماعية للسيدة

اذا كانت مطلقة


ملامح الدهشة والاحباط على وجهي

اثاروها لتسالنى باستنكار

هو انتي كنت عايزاهم يكتبوا انك مطلقة؟

قلت لها : وما المانع؟

هى بإستنكار اشد : انتى مبسوطة انك مطلقة؟

قلت لها : ليه ؟ هو الانبساط دلوقتى

بقى شرط اساسى علشان تذكروا الحالة الاجتماعية للفرد؟

لم ترد واكتفت برسم ملمح ليس له معنى على وجهها

فاخذت بعضي ورحلت


****


عازب وافتخر


انا مش مبسوطة انى مطلقة

لكن برضه مش مضايقة

ولا شايفة ان حالتي كمطلقة

تقلل من شانى علشان اخفيها عن الناس


وبعدين فيه سيدات متزوجات وغير سعيدات

ومع ذلك حالتهم الاجتماعية مذكورة فى الرقم القومى


يبقى الانبساط بحالتك الإجتماعية

مالهوش علاقة إذا كانت تذكر او لأ


ولو الحالة الشعورية للفرد شرط اساسى

علشان تذكر حالته الاجتماعية


يبقى ده معناه اننا هنلاقى بعد كدة فى الرقم القومى

مكتوب الحالة الاجتماعية وجنبها الحالة الشعورية


يعنى مثلا هنلاقى كدة:


مطلقة وافتخر


زوج ومش بطال


زوجة وندمانة


أرمل والحمد لله


أنسة ومستنية


عازب وافتخر


زوجة وسعيدة

وبين قوسين بنت المحظوظة



وأخيراً

أرملة والعاقبة عندكم فى المسرات


*******


الحالة الاجتماعية: ماشية على حل شعرها


بجد يعنى انا لحد هذه اللحظة

مش شايفة اى سبب مقنع

انهم مايذكروش الحالة الاجتماعية للمطلقة

إلا بقى لو الحكومة شايفة

ان المطلقة دى تندرج تحت بند

متراقبة

او ماشية على حل شعرها


ونظرا لانى لا ارى فى نفسى لا هذا ولا ذاك

فانا من مزنقي هذا

اطالب بحقي في اثبات حالتي الاجتماعية


نعم انا مطلقة


لا افتخر


ولكن ...... لا غضاضة



*****



زيـــــك كـــــدة


اتذكر يوما

كنت اجلس فيه مع امى

انا العب السودوكو

وامى تحكى لى عن مكالمتها الهاتفية

مع صديقة لها من ايام زمااااااان


فى اثناء سردها لى نص المكالمة

وجدت امى تقول بصوت خفيض على استحياء

طلع عندها بنت زيك كدة


نبرة صوت امى وطريقتها

والجملة اللتى نطقت بها

جعلونى ارفع عينى من على كتاب السودوكو

وانظر اليها باستغراب

واقول لها

زيــــي كدة؟

!!!!!!!!!!!!!!!!!!

زيــــي كدة ازاى يعنى؟

خيخة يعني ولا ايه؟


ضحكت امى وقالت بنبرة من يحاول تخفيف الامور

قصدى مطلقة يعنى يا نورا


قلت ببرود


ما انا عارفة يا ماما

انك تقصدى مطلقة

بس ايه زيك كدة دى؟

حسستينى انى من ذوى الاحتياجات الخاصة




وتذكرت صديقى عسقول

عندما قلت له يوما

والله انا ساعات بنسى

انى اتجوزت وخلفت واتطلقت


ورد علي قائلاً


انا فعلا ملاحظ يا اخت خيخة

انك واخدة الامر ببساطة شديدة جدا

رغم امر كهذا عند اغلب الناس

بيكون امر بالغ الاهمية

وبيكون له تاثير جانبى شديد على المطلقة


*****


فلسفة الطلاق


عزيزتى المطلقة او اللى على وش طلاق

اذا تعاملتى مع طلاقك وكأنه وصمة عار

وصرت دفاعية

تعتذرين طوال الوقت عن نفسك

وتحاولين اثبات برائتك

واذا اسلمت نفسك واذنك لكلام الناس

وصرت تستبقينهم

وتصنعين لنفسك قيودا اضافية دراءاً للشبهات

واحترازا من كلام ممكن ان يقال

اسمحى لى ان اقول لك

انك كدة بتخلي الناس تستقوى عليكى اكتر

ويستأسدوا عليكى

وهتبقى زى الدواسة اللى بنحطها على باب الشقة

"موطئ لكل قدم"



و لكن إذا آمنت في داخلك بأن هذا حقك

وان هذه حياتك التي لن يحمل أحد عنك شقاءها

فإن أحدا لن يجرؤ على الاقتراب منك


ولذلك عزيزتى اللى على وش طلاق

قبل ان تطلبى الطلاق

اختارى كيف تريدين ان تعيشى بعد الطلاق


*****


اخر الكلام


قال لها بغيظ مكتوم

انا اللى غايظني انى مش شايفك ندمانة

قالت له ببرود: واندم ليه ؟

إديني سبب واحد يخلينى اندم ؟


صمت رهيب من جانبه مسبوق بنظرة ألم

ثم نكس رأسه ورحل



*****

أخر كلامي

مـــش فـــارقـــة مـــعـــاي
خــــــــــــــــاااااااااااااااااالص




انتهى

بت خيخة وأي كلام

65 comments:

Anonymous said...

هقولك على حاجة
فى فرق دقيق جدا بين انك تكيفى نفسك ولو بالقوة مع حياتك وتعودى نفسك على الرضا
وبين انك تقولى للناس مش فارقة معاى خالص
انا فاهمة بجد وجهة نظرك
وعارفة الناس حتى اقربهم لك بيعملوا ايه وبيقولوا ايه فى المواقف دى
وبشجعك جدا على الوقوف بشجاعة وتحملك لمسئولية قراراتك
لكن انا خايفة عليك ياخدوا عنك فكرة انت مش هى
المطلقة مش ماشية على حل شعرها ولا الارملة ولا اللى مااتجوزتش اصلا
واللى بتمشى على حل شعرها ربنا يعافينا مش محتاجة غياب الزوج




معاك فى لا غضاضة
وحاسة بيها قوى
بس بلاش تقولى للناس مش فارقة معايا خالص

richardCatheart said...

ههههههههههههههههههههههههه

الظاهر الحكومه فى الحته دى قالت نقضيها ونمشى بالعرف الديكى والتقاليد الباليا ودى جايه اكيد من رقص الباليه علشان مانحرج الحريم المطلق ويحصلهم قلق بلاش نكتب حالتهم الاجتماعيه
قال ياعنى هما عايشين فى أومأوم ماهم كل اللى حاوليهم واشغلهم وحياتهم عارفين
يبقى انت مابتكتبهاش ليه مش دا قانون ولا ايه هما بهائين هههههههههه

تانى حاجه مطلقه بقى مش مطلقه ماحد ليه عند حد حاجه
واللى مش عجبه يخبط راسه فى الحيط
وعجبتنى يستأسدو عليها دى لانه فعلا وحقيقى
عندى وحده صحبتى حياتها زفت ومأساه كل يوم ووصلت انها خلاص مش فارق معها الحياه فعلا ومش عارفه تطلق برغم من قوتها الانها مش عارفه مش بس علشان هو مش عايز علشان الاهل رفضين طلاقها علشان كلام الناس ببقى فى قمه حزنى وانا شايفه شابه فى التلاتينات عز شببها بيضيع علشان كلام الناس والاهل مضحين بيها علشان كلام الناس كأنها قربان بيتقدم لنول رضا الناس
اللى اصلا كلهم مشاكل وبيتهم مقفله على هم بالهبل
معلش يا خيخه يمكن ان شاء الله على التجديد يغيرو وجه نظرهم ويكتو الحاله الاجتماعيه زى مالقانون قال
ههههههههههههاى ياقانون

سومه...مجنونه فى بلد عاقل said...

ولسه يا خيخه التقيل جاى قدام انا جربته بس كنت فى موضع الابنه خدى بالك من شريف قوى الحمد لله انه مش بنت زيى ربنا يباركلك فيه
ويسترها عليكم ومعاكم
احنا مجتمع لا ماشى بشريعه ربنا ولا ماشى بالتحرر مجتمعنا ماشى باعراف وتقاليد هو حطها لنفسه لا هى من الدين ولا هى من التحرر بتاع برا

Anonymous said...

السلام عليكم
ازيك يانوران عمنا جاهين بيقول
علم اللوع اضخم كتاب فى الارض
بس اللى يغلط فيه يجيبه الارض
اما الصراحة فامرها ساهل
لكن لاتجلب المال ولا تصون العرض
عجبى
هو ده المجتمع مش عايز البنى ادم الصريح عايز لكل حاجة يخاف ان يواجه بالحقيقة مع ان الحقيقة قد يكون الانسان غير مسئول عنها فما يضرنى ان كنت مطلقة او متزوجة ايه اللى يغير الشخصية حتى فى الافلام العربى القديمة راسمين صورة للمطلقة لا تتغير مثلما يرسمون للحماه كان الحموات شياطين مع انهم امى وامك ولكن لا يتوقف احد عند هذا والطلاق مرحلة مثل الزواج وقد يكون هو احسن الحلول فى مرحلة معينة والا ماكان الله شرعه ونقول الزواج قسمة ونصيب اما الطلاق فلا يقول احد ان الطلاق قسمة ونصيب فكونى كما انت فليست على راسك بطحة وانما البطحة
على كل من يدارى شىء فالانسان لايخفى غير مايخجل منه
تحياتى لشريف وتقبلى مرورى
ابراهيم رزق

همسات دافئه said...

اول مره اقرالك قد ايه ناقشتي حاله اتمني مجتمعنا ينظر لها نظره ناضجه
فعلا لقب مطلقه ليس معناه ان السيده مراقبه او سيئه السمعه دي حاله زي اي حاله
ومرحله زمنيه وعمريه ممكن يواجهها اي انسان رجل ام مرأة سيان
اشكرك بجد علي مدونتك الرائعه

أع ـقل مـ ج ـنـونــة said...

ميــــة ميـــــــة

مش لاقية كلام اقوله الا مية مية

ميرسي ع اغنية اليوم مش فارقة معاي

جاي ف الوقت المناسب ^_^

تحياتي

hassan said...

بسم الله الرحمن الرحيم

كلام جميل و ينم ..حلوه ينم دي ..عن احساس عميق بالحرية

لكن خدي بالك يا اختي انه حينما يريد الانسان منا التاكيد علي شيء انه مش فارق معاه فبيقع عن عمد و احيانا عن غير قصد في فخ الاهتمام الفعلي بالموضوع

حد فاهم حاجه ؟
طيب

عموما ... لا الزواج تجربة لابد و ان تكون رائعه و تبقي زي الجني بتاع المصباح اللي لازم يحققلنا كل امالنا

و لا الطلاق هو باب القفص المفتوح اللي منه تحسي بالحرية و السعاده

انما حياتنا هي اختياراتنا احنا..و مهما كان الاختيار فعلينا تحمل تبعاته بدون الحاجه للتبرير و لا حتي الدفاع عن اختيارنا ..فهي حياتنا نحن لا حياة الاخرين

والسلام

Anonymous said...

انا كمان مطلقه وفعلا شايفه ان كلامك صح جدا جدا جدا
علي فكره موضوع الطلاق زمان كان وصمة عار لانه كان نادر جدا وده قبل ما الرجاله تموت في حرب 73 لكن دلوقتي بقي حاجه عاديه جدا وكل شارع تلاقي فيه اعداد تتفاوت بين اصابع اليدين
يعني بقي حاجه متخضش
اللي يخض دلوقتي انك تلاقي زوجه سعيده مع زوجها وعايشه معه لانه مستريحه مش عايشه علشان العيال

رنونة حكومة ميخو said...

اول ما حد يقول فلانة مطلقة اول بتيجي فى ذهننا ليه هيه فيها ايه ..اتطلقت ليه ودايما الناس بتعتبر ان العيب فى الست محش ابدا يقول الراجل ماله كان فيه ايه لازم الست هيه اللى غلطانة وهيه اللى وحشه وهيه السبب وهيه اللى خلت الراجل يطلقها مبيحطوش احتمال ان الست ممكن تكون طلبت الطلاق لسبب ما

ونظرة المجتمع للمطلقة هيه اللى خلت الحكومة ترفض كتابة مطلقة وديه حاجة حلوة من الحكومة طبعا انا مش شايفة انها مش كويسة لانهم بيحموكي من نظرات الناس الوحشة لما تروحي تقمى بطاقتك فى اى مكان .. انتى فى غني عن النظرات دي حتى لو انتى مش متضايقة من كونك مطلقة بس اكيد هتتضايقى لما تحسي بقسوة نظرات الناس دي

فمفيش داعى الناس تعرف انك مطلقة الا بس لو حد جاي متقدملك غير كده ملوش لازمة التسييح :)

وفعلا زى ما قلتى لو كل مطلقة فضلت تدافعع ن نفسها لكل واحد مش هتخلص وهتبقى تلسية للناس فى قعداتهم

فى النهاية بقى (وعسى أن تكرهوا شيئا وهوه خير لكم وعسى أن تحبوا شيئا وهو شر لكم والله يعلم وانتم لا تعلمون)

احمدابوحجر said...

انتي للاسف لازم تتعالجي وتعرضي نفسك علي دكتور امراض نفسيه وعصبيه فورااااااااااااااااااااااااااااااااااااااااااااااااااااااااااااااااااااااااااااااااا
نفسي ترجعي تاني بالسلامه
لاتاسفن علي غدر الزمان
وتقوليلي الناس الرايقه
ههههههههههههههههههههههههههههه
مجانينووووووووووووووو

عبدالله said...

حاجه جميله اني بدات احس ان في اتجاه داخل عدد من الناس للتعامل الطبيعي مع حالة الطلاق ان دي من الحاجات الي كنت بستغربلها من زمان المهم بقي في موضوع الحالة الاجتماعية الراجل برضه مش بيكتبله مطلق ولا مش سالتي طيب المخلوع بيكتبوله ايه :)

ده مش معناه اني بتريق علي الخلع اه مش بتعجبني قضايا الخلع بس بحترم قوي فكره الطلاق علي الابراء الي هي نفس الفكره بس بالاتفاق يعني


تحياتي

عبدالله said...

اه نسيت اقولك اول ما قريت عنوان البوست قريته مطلقة ولا عضاضه قولت ايه الي دخل العض في الطلاق هل مثلا لاحظت ازدياد الرغبه في عض البشر بعد الطلاق
:)))))))


تحياتي

Nisreen Basiouny said...

عمرى ما شفت المطلقة اقل من غيرها
بالعكس هي في نظرى الشخصي مع الارملة بأحس انهم أقوي من غيرهم خاصه لو معاهم اطفال
الست اللي تكون صريحة مع نفسها و مع الطرف التاني و تعترف باستحاله استمرار العلاقه و تاخد قرار زي الانفصال بتكون ست قوية جدا
قوية في صدقها مع نفسها و قوية في انها شايفه نفسها كامله تقدر تعيش حياة كامله و مش محتاجه راجل يكملها الديكور و خلاص
معظم المتزوجات سايبين الراجل ديكور رغم سوء العلاقه و برودها بس بيحافظوا على المظهر الاجتماعي
ستات ضعيفة شايفين ان مظهرهم ميكملش الا براجل
لازم تكوني مطلقه و تفتخري انك اخترتي الاصح و الافضل رغم صعوبة القرار و لازم تفتخري لأنك بتربي ابنك في جو هادئ و صحي و لازم تفتخري لانك نورا الشاملي و ده مكفيكي و مش محتاجه تكوني حرم فلان
لازم تفتخري انك قدرتي تسيبي هاني و انتي محافظة على علاقه جميلة بينك و بين ابو ابنك و بينه و بين ابنه و بين الاهل و بعضهم و مستنيتيش لما تدبحوا في بعض قدام الولد
لازم تفتخري لانك قادره تمللي حياتك بحاجات كتير جميلة و بعمل خير و بصحبة طيبة و لازم تفتخري لانك ارتبطتي بالحلال و انفصلتي بالحلال و محدش يقدر يقول انك غلطي في اي حاجه
لازم تفتخري لانك مش مكسوفه من حالتك الأجتماعية و لأنك قد القرار اللي أخدتيه

بت خيخة وأي كلام said...

بسم الله نبدأ



رنونة حكومة ميخو

بتقولى ان الحكومة كدة بتحمى المطلقة من نظرات قسوة فى عيون الناس لو عرفوا انها مطلقة
فى حالة انها تقدم بطاقتها فى اى جهة

احب اقولك
ان فى كل الجهااااااااات الحكومية والغير حكومية
معروف ان عدم ذكر الحالة الاجتماعية للسيدة فى رقمها القومى
ده معناه انها مطلقة

هاحكيلك حكاية صغنونة

انا من حوالى اسبوع رحت علشان اطلع جواز السفر

وهناك امين الشرطة اللى بيبقى قاعد عند الباب
طلب منى البطاقة علشان يعرف هل
عنوانى تابع لمصلحة الجوازت اللى انا رحتها
ولا يحولنى على فرع تانى
ولما شاف البطاقة اللى مافيهاش حالتى الاجتماعية
بصلى وقاللى انتى مطلقة؟
قلتله اه
وبعدين استغربت
هو عرف ازاى؟
فسالته هو حضرتك عرفت ازاى
راح قاللى ماهو مش مكتوب فى البطاقة

والمطلقات بس اللى مش بنذكر حالتهم الاجتماعية


ها يا رنونة
عرفتى انا عايزة اقولك ايه؟

عايزة اقول ان كدة كدة مفهوم ان بطاقتى لواحدة مطلقة

فخلاص بقى
يبقى يكتبوا الكلمة

لان عدم ذكرها ما منعش الموظفين
انهم يعرفوا حالتى الاجتماعية

فبالتالى تأثير ذكرها زى عدم ذكرها

لو كانوا مش كاتبين كل الحالات الاجتماعية كنت هاقول ماشى
لكن لما يكتبوا كل الحالات الاجتماعية ومايكتبوش مطلقة
ماده كدة فيه لفت نظر برضه
لان البطاقة اللى مش مكتوب فيها بيتعرف انها لمطلقة

يبقى المساواة فى الظلم عدل

يا يكتبوا كل الحالات الاجتماعية
يا اما يحذفوا الحالة الاجتماعية
عند الناس كلها



الحاجة التانية
انا ماحستش ولا مرة ان فيه حد بيبصلى بصة غريبة لما يعرف انى مطلقة

انا اعتقد ان النظرات اللى بتقولى عليها دى
حاجة نفسية عند المطلقة
لو هى بتتعامل مع طلاقها بطريقة عادية
هتشوف نظرات الناس عادية
ولو هى بتتعامل مع طلاقها
انه وصمة عار
فاهتحس ان نظرات الناس اتهام ليها

شكرا ليكى






احمد ابو حجر

!!!!!!!!!!!!!!!!!!
!!!!!!!!!!!!!!!!!!!!!
!!!!!!!!!!!!!!!!!!!!!!!!

مش فاهمة تقصد ايه بكلامك












عبد الله

فكرتنى بهالة صدقى لما خلعت جوزها
وراحت تغير الحالةالاجتماعية
لاقت فى ورق البطاقة
انها لازم تختار حالة اجتماعية من اربعة

زوجة
ارملة
مطلقة
انسة
قالتلهم انا ولا واحدة من الاربعة دول
انا خالعة
ورفضت انها تستكمل اجراءات استخراج بطاقة رقم قومى
الا لو كتبوا انها خالعة

شكرا ليك







شكرا ليكم كلكم على تواصلكم معايا

اختكم خيخة

سمع هوص (Abo 3li) said...

أرمل والحمد لله
أنسة ومستنية
!!!!!!!!!!!!!!!!!!!!!!!!
مسخرة.. هههههههههههههههههههههههه....
والله انتي ملكيش حل يانورا...

انا بقي
أعزب رغم أنفه...

كويس انك تبقي قوية كده.. والاحسن انك بتبيني قوتك دي.. علشان ال طمعانين فيكي يتلمووو... وافتكر انهم كتير...

سلاماتي لشريف قاتل العنكبوت

بت خيخة وأي كلام said...

نسرين بسيونى

بصى بقى يا بنت انتى

تعليقك مش قادرة اوصفلك مخلينى مبسوطة اد ايه

انا بعترف انى فرحانة بكلامك
ورافع من روحى المعنوية بطريقة فظيعة



انا عارفة ان ممكن ناس تتهمك انك بتجاملينى
لما تقرا كلامك ده

وعارفة ان ممكن ناس
تدخل تقولى انتى ما بتحبيش غير اللى يصقفلك واللى يشكر فيكى ومعرفش ايه من الكلام بتاعهم ده

لكن مش فارق معايا كل ده

لان بجد كلامك عاجبنى
وجاى على هوايا
ومخلينى فى حالة مزاج عالية اوى


شكرا يا نسرينا اوى
خدى بالك من نفسك
وتحياتى ليكى

وسلميلى على بتجانة هانم
لو شوفتيها او كلمتيها

بت خيخة وأي كلام said...

يا جماعة معلش انا مش برد على التعليقات كلها

مش قلة ادب منى
ولكن لان الناس اللى ماردتش على تعليقاتهم
ده معناه ان تعليقاتهم انا متفقة معاهم فيها

ومش محتاجة منى توضيح زيادة
ولا كلامهم فيه حاجة مش قادرة افهمها علشان اسال عنها


ارجو ان وجهة نظرى تكون وصلت ليكم كلكم

وشكرا ليكم على تواصلكم معايا

Anonymous said...

انا من حوالى اسبوع رحت علشان اطلع جواز السفر

!!!!!!!!!!!!!!!!!!!!!!!!!!!!!!

انتى مسافرة يا خيخة؟

يعنى الكلام اللى سمعته صح؟

بت خيخة وأي كلام said...

المجهول

كلام ايه اللى سمعته وصح؟

karim said...

عزيزتى نورا فعلا البساطة مهمة جدا فى التعامل مع الحياة علشان الدنيا تمشى. بس انتى ساعات بتزوديها بتخلى الناس تبصليك باستغرراب و ساعات نظرات تانية, مهما حصل و اتفرنجنا فى كل شىء احنا فى مصر و دولة اسلامية وليها حدد فى كل شىء, انا عارف انك انسانة متزنة و محترمة جداا, بس مع الاسف الناس ليها الظاهر, ودية بجد مشكلتنا, طلبت منك زيارتك لى و لم تحدث

بت خيخة وأي كلام said...

كريم

ما انا رحت زرتك يا كريم يوميها
وقريت بوست كهربنى شكرا

بس ماكنش عندى تعليق اقوله على الموضوع

مش لان الموضوع وحش
ولكن لما فكرت فى الموضوع لاقيته هايغظنى من الحكومة اكتر ما انا متغاظة

ودمى هايتحرق اكتر ما هو محروق
يبقى ليه بقى اوجع قلبى

انا كل اللى فاكراه لما قريت البوست عندك
قررت انى اعمل زى النعامة وادفن راسى فى الرملة
واضحك على نفسى واقول ان الكلام ده ماحصلش

فبالتالى مشيت علطول

تحياتى ليك

wella said...

اهم حاجة فى الموضوع انو مش فارق معاكى خالص وانك مقتنعة بللى عملتية
المهم انتى حاسة بااية مش الناس والمجتمع

بجد نفسى اعرف ليةالمجتمع بيحكم على المطلقة كدة مع انها حاجة عادية انتين مش اتفقوا مع بعض وانفصلوا اية اللى فيها يعنى
سلام يانور

القدر و انا said...

خيخة
انا معاك انها ليست وصمة ولابد ان نتكيف مع حياتنا مهما كانت
ولكن ما تفرقش دى لا
لانها تفرق كتير قوى
تفرق فى ايام طويلة من حياتك عيشتيها ولن تعود وانحسبت عليك
تفرق فى احلام عريضة حلمتيها وفقت منها مفزوعة
تفرق فى امنيات غالية لمستقبل جميل نعيشه مع اللى اخترناه وبينا اولادنا سعداء ولم تتحقق
الطلاق عملية بتر لاحلام وايام جميلة لم تتحقق
عملية بتر لحياتنا اللى تعبنا منها
والبتر لازم لحياة المريض بلا الام
لكن اثاره تطل علينا من ان لاخر
تفرق واحنا بنختار من جديد بخوف من تكرار الفشل
تفرق واحنا بنشوف اولادنا تطل من اعينهم الحيرة
الطلاق تجربة مرة بكل المقاييس ولكن لابد من التغلب على مرارتها
تحياتى ودعواتى لك بالتوفيق

رحــــيـل said...

انا متفقة جدا معاكى
لان ده حق للست ربنا شرعه ليها
وللاسف المجمتع بيتعمل مع الحق ده على انه عار وكارثة
انا اول مره اعرف ان المطلقة مش بيكتب اسمها فى البطاقة
منطق غريب جدا فعلا

تحياتى ليكي

سمكه واحده said...

أنا إمرأة أيها الرجل




أنا من كرمني الله بالامومه


و جعل قلبي ملجاً للحنان و الحب كالطفوله


انا من وصى علي رسولنا الكريم بالرفق بي

و صورني بأجمل صوره


إن كنت آنسه...
أو متزوجه...
أو مطلقه....
أو كنت ارمله..
سأظل امرأه
لم يزدني الزواج كرامه
و لن ينقصني الطلاق أنوثه
و لن أخجل إن أصابتني العنوسه



فأنا امرأة....
بداخلي بحار من حنان و أحلام قرمزيه
و في الحب ضعيفه و رقيقه و رومانسيه
و في وجه الغدر جبل من صبر و قلاع فولاذيه


أنا امرأة...
أبكي من جرح شوكة صغيره إن لمست جلدي اللطيف
و أقف في وجه أي اعصار قد يقذف بقلبي الضعيف
و كلما زادت طعنات الزمن لي كلما تحدى عمري النزيف

أنا امرأة...
فرحتي بالحب كفرحة الطفل بلعبه جديده و لطيفه
في المشاعر و فيه و مخلصه و في وجه الغدر قاسيه ومخيفه
و وقت الجد أكون بمئة رجل و في المرح خفيفة الظل و لطيفه


انا امرأة...
لست أسيره أو رهينه في يد رجل يريد لي الدمار
إن أرادني شريكة دربه سأكون لطريقه المنار
سأكون له سكن و مأوى و سأغمره بحب كالأنهار
و إن أرادني كخادمة سأرحل عنه و أرفض بقوة الانكسار
و أرحل عن الحب بلا عودة فأنا أرفض أن يكون الحب طريقي للانهيار


أنا امرأة ....




سمكه
تحياتي
(:

احمدابوحجر said...

بس اوعي تكوني قولتي في سرك الكلمه المشهوره بتاعتك لاصحاب التعليقات



المقصود ان اي حد مختلف دلوقتي عن العادات والتقاليد حتي لو هو صح اصبح منبوذ من المجتمع ولازم عشان المجتمع يسامحه ويعفو عنه ويتقبله ان الشخص ده يغير المبدأ المتمسك بيه سواء كان صح او غلط عشان محدش يقدر يشذ عن العادات والتقاليد دي
الطلاق مثلا معروف ان البت هتمشي علي حل شعرها ومش هيبقي ليها حد يلمها
ده اللي بيقولوه الناس وان مكنتش تتعدل وتتجوز يبقي تستحمل
وصلت يارياسه ولا ايه؟

NaiRa said...

خيخه من اكتر بجد المدونات اللى بيكيفنى كلامك
بحس انك ست قويه جدا مفيش حاجه تهزمك اللهم لا حسد يعنى ربنا يزيدك
وبجد والله العظيم انتى لو فى منك كام واحده فى البلد البلد كانت اتظبطت بقولك ايه يا خيخه ما ترشحى نفسك فى انتخابات الرياسه
وعجبنى اوى الالقاب اللى قولتيها تتكتب فى البطاقه
زى
انسه ومستنيه ههههههههههههههه حلوه اوى بجد
ويارب دايما كده قويه ومش مهزومه

بت خيخة وأي كلام said...

بسم الله الرحمن الرحيم


القدر وانا

دى تالت مرة اكتبلك فيها تعليق
واتمنى انه يتنشر بقى

اول مرة الجهاز هنج
تانى مرة النور قطع

ربنا يستر بقى ويتنشر المرة دى على خير



بصى هو كلامك منطقى جدا

لكن مش قادرة احس بيه

كلامك مش لايق عليا

ممكن جدا يليق على واحدة اتطلقت بالشكل التقليدى المتعارف عليه


لكن انا طلاقى يختلف تمااااما عن اى طلاق ممكن تكونى سمعتى بيه

ابنى وقلت الكلام ده مليون مرة
ابنة شخصيته النفسية والاجتماعية الحمد لله كويسة ومستقرة وهو يمكن احسن من شخصيات اطفال كتير عايشين مع ابوهم وامهم تحت سقف واحد

انا مش هاطول فىالتعليق اكتر من كدة لانى كل ما اكتب ردى عليكى باستفاضة يحصل حاجة والتعليق مايتنشرش
فبالتالى هاكتفى بالكلام عند هذا الحد

شكرا ليكى








احمد ابو حجر

نعمممممممممممممم

بقى الطلاق معناه ان البنت هتمشى على حل شعرها؟
!!!!!!!!!!!!!!!!!!!

ايه الكلام اللى انت بتقوله ده؟

ولنفترض ان ده كلام
بعض الناس بيقولوا
تقوم انت تكرره

انت مقتنع بالكلام ده ولا ايه؟

يا عزيزى
اقرا اول تعليق على البوست ده

صاحبة التعليق مشكورة
قالت جملة مفيدة
اللى بتمشى على حل شعرها مش محتاجة غياب الزوج

وانا مقتنعة معاها تماما بالجملة دى

ممكن تكون واحدة ماتجوزتش اساسا وقاعدة وسط ابوها وامها واخواتها وتمشى على حل شعرها

الموضوع مش محتاج طلاق علشان الواحدة تنحرف

الانحراف موجود فى كل الطبقات وفى كل الحالات
مش فى الطلاق بس


وعلى فكرة تعليقك التانى
ماوضحش اى كلمة من اللى قلتها فى تعليقك الاولانى

شكرا ليك










سمكة واحدة
تسلم الايادة يا سمكاية

تحياتى ليكى




شكرا ليكم لكم على تواصلكم معايا
اختكم خيخة

Anonymous said...

ايه الكلام ماله الكلام انا مقولتش حاجه غلط ومبخفش اه هاتقولي ابن خالتك او ابن عمتك اللي هو 190 كيلو
ده لا انا مبيهمنيش بايعها
نرجع للموضوع
اولا انا لااؤيدك ولا اؤيد موقف المجتمع
من حل الشعر والخ
لكن دوري هو الوسيط والقيام بعمل مقارنه بين هذا وذاك واترك الحكم للقاريء
وقد احكم انا ايضا كحقي في ابداء رايي الشخصي والاختلاف في الراي لايفسد للود قضيه
شغلي دماغك معايا يانورا
مجتمع يعني عادات وتقاليد يعني قاعده والكل بيمشي عليها من قديم الازل
.................................
اتفقنا
فرد يشذ عن القاعده دي اذا يتبع منطق او سلوك او فكر معين ضد سلوك المجتمع
يعني حاله الطلاق الخاصه بيكي هي حاله استثنائيه لوجود التفاهم المشترك وبناء عليه قد تكوني اخترتي البدايه الصحيحه والتي لايعلمها اغلب المجتمع
الجاهل بقضيتك
واصدار الاحكام الغيابيه عليكي بدون معرفه السبب
لكن كمحاوله اصدار فرمان منكم بان المجتمع هو اللي مبيفهمش بسبب حالتك
ده بقي سوري يبقي ....
ولن يجدي نفعا محاوله تغيير المباديء التي تربي ونشأ عليها هذا المجتمع الصالح الطيب الديني والخ الخ
وارجو ان اكون قد وضحت جزءا من تعليقي الاولاني وسنكمل غدا باقي تفاصيل التعليق الاول
وشكرا
والسلام عليكم ورحمه الله وبركاته

فاتيما said...

ازيك يا خوخة

من قبل النور
ما يقطع
عندى أنا بقى

انا متفقة
قلباً و قالباً
و كلياً و جزئياً
و اولا و آخرا
و م الشمال و اليمين
و الشرق و الغرب
و من فوق و تحت
وكل حااااااجة
ممكن تتخيليها

مع نانو حبيبتى
القدر و أنا


كأنها كتبت
اللى جوايا



هوه لا غضاضة
فعلا وصحيح


لكن تفرق
و قوى كمان


بوسس لشريف
لو سمحتى

Anonymous said...

قعدة الحزانة ولاجوازة الندامة عندك شريف بالدنيا

safa7_karmooz said...

عجبنى اوى اوى البوست ده ..:)

الحمد الله لسه فيه ناس بتفكر صح فى البلد دى :D

الشنكوتي الكبير said...

بصي يا خوخه
عارفه ليه انتي مش فارقه معاكي


علشان انتي اتعودتي انك لو مغلطتيش تردي بقوه وبشجاعه
فأنتي شايفه انك مغلطتيش مع طليقك ولا اذيتيه ولا حاسه بالذنب ناحيته بالعكس لما حسيتي انك مش هتقدري تديله حقه في انه يكون حبيبك قبل ما يكون جوزك قررتي متعيشيش نظرية ادينا عايشين والمركب بتمشي وده في حد ذاته شجاعه ادبيه منك تستاهل التقدير مننا كلنا
علشان كده انتي بتتعاملي عادي ومش متضايقه
ساعات بحس ان المطلقات اللي عايشين حالة الم فزيعه دي بتكون لأن رد فعل الناس بيخليهم من كتر الزن يفكروا يا ترى احنا غلطنا فعلا ومقدرناش ناحافظ على اجوازنا وخربنا بيتنا بايدنا

يبقى الفرق بينك وبينهم مش انك مش فارق معاكي لا الفرق بينكم انك عارفه انتي عملتي ايه ومعملتيش ايه


تحياتي يا خوخ

سلاااااااااااااااام
اخوكي ايهاب

بت خيخة وأي كلام said...

صباح الخير عليكم

اسمحولى ارحب بفاتيما
اللى بقالها فترة غايبة عن صفحة التعليقات

اهلا يا طمطومة
منورة بيتك التانى

و وحشتينا كلنا

وحشتينى و وحشتى اى حد بيدخل هنا وبيقرا تعليقاتك


بالنسبة لكلام القدر وانا

انا مازلت عندى كلام كتير عايزة اقوله ردا عليها
بس فعلا مش قادرة اكتبه تانى

لانى امبارح كتبته اكتر من مرة

بس ممكن كمان شوية اجى تانى واكتبه تانى


المهم انى فرحانة بوجودك يا فاتيما النهاردة


شكرا ليكى

" يـ ألوناتك ! " said...

الناس غريبة
يعني لو 2 صحاب وبقالهم سنييييييييين
وبعدين بقا حصلت مشاكل و سابو بعض
بيبقا عادي يعني .. والناس لا بتتكلم ولاحاجة
مع ان الاصحاب ممكن يعرفو عن بعض اكتر من المتزوجين اصلا
انتي كدة تمام .. خلاص الحدوتة خلصت

وعارفة عن تجربة انا كنت قريت فاتحة زمان وبعدين محصلش نصيب .. انا اللي كسرت نفسي بعدها مش الناس .. لاني ضعفت جدا ولما انتبهت كل حاجة اختلفت وبقيت حاجة تانية واجبرت الكل انه يعاملني باسلوب جديد
:)

بت خيخة وأي كلام said...

anonymous


انونيموس
هو انت احمد ابو حجر؟

اعتقد انك انت هو


ما علينا


هاذممك ذمة

بذمتك يا شيخ
تعليقك اللى انت كتبته باكونت انونيموس

يشبه من بعيد او من قريب
اول تعليق ليك
كتبته باكونت احمد ابو حجر؟


تعليقك اللى بانونيموس

فيه وجهة نظر واضحة اقدر افهم انت تقصد منها ايه

لكن تعليقك الاول مش واضح


ما علينا
بتقول ان دورك هو الوسيط

مين اللى اداك الدور ده

انت هنا قارئ

محدش ادالك دور ان تقوم بدور الوسيط علشان فى الاخر القارئ يحكم

القارئ ده اللى هو حضرتك وباقى الناس اللى قرت البوست


فرد يشذ عن القاعدة مش معناه انه عمل حاجة غلط


ومش صح اساسا ان الواحد يمشى ورا المجتمع زى الخروف فى قطيع من غير ما يشغل دماغه

وانا اذا كنت سلكت سلوك شاذ من وجهة نظر بعضهم


ده مش معناه انى بطالب بقية المجتمع انه يسلك نفس سلوكى

يا عزيزى
كل واحد بيتصرف بناءا على قناعات شخصية ومبادئ
وتربيته وثقافته بتاثر على قراراته


فبالتالى لما انا اخد موقف مختلف عن باقى المجتمع

انا لا اطالب باقى المجتمع انه يمشى معايا

لانى عارفة ان كل واحد مختلف عن التانى


وانا ماقلتش او ماصدرتش فرمان ان المجتمع هو اللى جاهل

ولا هدفى من البوست انى اغير وجهة نظر المجتمع

وتجدى او ماتجديش دى مش فارقة معايا


انا واحدة بتكلم عن نفسى
وبقول انا مطلقة
ومش فارق معايا نظرة الناس للمطلقة او لطلاقى
ولا حاسة ان طلاقى شئ استعر منه او شئ ابيح المفروض انى اداريه عن الناس

انا لا افتخر بكونى مطلقة
ولا مبسوطة انى مطلقة
لان لو قلت انى مبسوطة ابقى بستهبل

مافيش واحدة تتمنى انها تتجوز وتتطلق اعتقد كل البشر بيبقوا نفسهم فى استقرار

لكن
برضه مش شخصيتى انا اللى تقبل انى اعيش عيشة والسلام علشان انشد استقرار وهمى مش موجود فى اطار الزواج


اه مش مبسوطة انى مطلقة
لكن برضه مش ندمانة انى مطلقة



انا مطلقة ولا غضاضة من طلاقى

مش حاسة انه جرم اداريه عن عيون البشر

الطلاق من وجهة نظرى زى الجواز زى الترمل زى الولادة


بعض الناس او بعض التعليقات وانا مانشرتهاش
كلامهم فى التعليق محاولة لاستفزازى علشان اقول اسباب الطلاق

مش علشان هما خايفين على مصلحة المجتمع الطيب المتدين
لاااااااااااااااااااا

هو مش فارق معاهم المجتمع

هو اللى فارق معاهم

ليه خيخة اطلفت
وازاى خيخة بتتعامل كدة مع طليقها

ايه السر يا ترى ورا ان خيخة وطليقها بيتعاملوا باحترام

عملتها ازاى بنت الايه؟

المعروف ان اللى بيتطلقوا
بيشتموا بعض
وبيهينوا بعض
وبيكرهوا بعض

هى بقى ازاى اتطلقت باحترام كدة


الناس مش فارق معاها مجتمع يا احمد

الناس فارق معاه التفاصيل المخفية عن عيونهم


ولذلك اقولهم

موتوا بغيظكم




واقولك انت يا احمد
شكرا ليك على وجهة نظرم الواضحة من اول مرة


واضح ان اكونت انونيموس وشه حلو عليك وبيخليك توضح وجهة نظرك من اول مرة

يا ريت تستمر كدة وتعلق بيه علطول علشان افهمك من اول مرة

تحياتى ليك

... amr said...

فاتيما هنا ... يا لهول المفاجأة
:))))))))))))))))))

بصي يا خوخ .. ارفعي قضية على الحكومة , لأن موضوع عدم ذكر الحالة الاجتماعية في البطاقة بالطريقة السخيفة دي - الا و هي عدم ذكر الحالة من أساسة ليكون مفهوم ضمنيا ان الحالة الاجتماعية مطلقة- حاجة بايخة بصراحة , و مالهاش معنى , بل ان ممكن توحي بأن صاحب الحالة مواطن درجة أدنى من نظرائة في المحتمع

مجتمع عندة شيزوفرينيا و الله
بس سيبك تنتي .. فاتيما منورة مش كدة :P

احمدابوحجر said...

هو للاسف طلع كده انويموس عشان كان فيه مشكله في اسم اليوزر والرابط
ومش عارف اكتب باسمي ونسيت اكتب اسمي في نهايه التعليق
وبالنسبه لي انا مش هقدر اقوللك تعملي او ماتعمليش عشان دي حريتك الشخصيه وماليش حق اتدخل فيها
لكن نفس الكلام معايا محبش حد يقولي اعمل وماتعملش عشان مالوش حق يدخل في خصوصوصويتي
اكتب انشر اتوسطن انا حر
اعمل اللي انا عايزه زي مانتي عايزه تعملي اللي انتي عايزاه
سواء رضيتي او العكس
عارف ان وجهه نظر المعارضه بتضايقك وبتنرفزك بالظبط زي الناس لما تشوفك كاتبه البوست ده
برضه بتتنرفذ وتتضايق
ونصيحه تاخدي بيها او متاخديش
خلي عندك روح رياضيه وتقبلي النقد
بصدر رحب
ومتكونيش انانيه في افكارك وف وجهات
النظر الاخري
انا كده وضحت كل التعليقات اللي
كتبتها وكنت اقصدها
واسف اني هكتفي بالمشاهده فقط بعد كده
سلام

هي وظروفها said...

صباح الفل يا نورا

الفكره اننا كمصريين

غالبا بنيجي نكحلها نعميها

في اغلب الامور

الحكومه خدت مننا نفس

طريقتنا

لأنها منا واحنا منها

وبتتصرف معانا علي اساس
اننا فاهمين وعدوها
مبنحبش الوضوح
ميكتبوا مطلقه
ولا هياثر في اي شيء في الخانه

طب منا اعرف

متزوجات خائنات
ولا ينقصهن شيء
عمر الطلاق ما كان
وصمه عار
ولا العنوسه
ولا حته المتزوجه وعايشه
عشان عيالها

العار الوحيد

اللي تكمل مع جوزها
كديكور ومنظر ليها

ادام المجتمع
وفي نفس الوقت

تاخد احتياجاتها

الاخري من حد تاني

تخون اللي علي زمته
طبعا جميل
قوي ان الانسان صريح مع نفسه

وياخد قراراه بقناعه وحريه

بس افتكر ان قرار زي كده
ميتقالش عليه مش فارقه معايا
لان شئنا ام ابينا
هيبقي في حنين مستخبي
جوا الشخصيه
بيحن حتي لايام الخناق وعدم
الوفاق ويفضلها علي
الوحده
ممكن وعارف حد يقول الوحده
خير من جليس 00000

ولكن الحب والعشره منقدرش نقول عليهم
ولا فارقه معانا

ده رايي
وبلاش شتيمه

سلامو عليكو

بت خيخة وأي كلام said...

القدر وانا

انا رجعت تانى

واتمنى ان تعليقى المرة دى يتنشر والنور مايتقطعش او الجهاز يهنج


بتقولى انه لازم يفرق معايا

وانا بقول ان لا مش فارق معايا

ليه مش فارق معايا

لان ايامى الجميلة معاه لسة موجودة بينا ولم تبتر

لسة مازال يوم جوازى منه هو اجمل يوم فى حياتى


احلام عريضة فوقت منها......ماحصلش

لان اساسا ماكنش عندى احلام عريضة

احلامى كلها كانت اغلبها لابنى

ومعتقدش ان طلاقى من والده هايخلى الاحلام دى ماتتحققش


مش فارقة معايا
لان انا وهانى طلاقنا مختلف

مطلقين لكن مرتبطين

اغلب الحاجات بنعملها سوا

تلات حاجات بس مش موجودة فى حياتنا
علاقة جسدية
بيات مع بعض فى بيت واحد
توقفنا نوعا ما عن الخلافات

لكن مازلنا بنكلم بعض يوميا
بنشوف بعض باستمرار
بزور اهله وبطمن عليهم
بيكلم ماما وبيسلم عليها
مازال علاقة صداقته باخويا كما هى ولم تتاثر بطلاقنا

مازال بيدفعلى فاتورة الانترنت وبيصلحلى الكمبيوتر

مازال بيقلق عليا وبقلق عليه
لو حد فينا تعبان

مازلنا بنضحك مع بعض

لسة فيه بينا اسرار محدش يعرفها غيرنا

مازال بيغير عليا

مازلت مهتمة بامور شغله

مازلت بقوم عنه ببعض الواجبات الاجتماعية

مازال بيؤدى واجبات اجتماعية تجاه اسرتى

زى وقت وفاة خالتى
حضر هو و والده و والدته و عزوا ماما وباقى افراد عيلتى


مازلت الجأ له
فى حالة لو الكهربا عندى حصلتلها قافلة
هو اللى بيجى يشوف ايه الموضوع ده
لو قدر يصلحه كان بها

ماقدرش
يبقى هو اللى هايجيب كهربائى
ويقف على ايده

لانه مازال بيخاف عليا
ومازال رافض ان صنايعى يدخل البيت وانا لوحدى

مازلت استقبل تليفونات فى البيت
من بعض الشركات اللى مرتبطين بشغل مع هانى
وبيطلبوا انهم يكلموا مستر هانى

ولما اقولهم مش موجود
باخد منهم رسائلهم وببلغها لهانى


مش فارقة معايا
لانى بطلاقى اصبحت مستقرة نفسيا اكتر

مش بنختلف دلوقتى

اه ممكن كلامنا مع بعض يروح تانى للحتة بتاعة كل مرة
الحتة اللى خلاص بنجيب فيها
اخرنا من بعض وبنتخنق من بعض
لكن ساعتها بعمل استوب
واقوله وانا بضحك
هانى خلااااااص
احنا اتطلقنا
بنتناقش فى ايه بقى
هاتفرق ايه اذا كنا مختلفين او متفقين
خلاص كل واحد دلوقتى عايش بدماغه
ونايم على الجنب اللى يريحه
مش هاتفرق معايا ولا معاك اننا نقنع بعض بوجهات نظرنا

مش فارقة معايا
لانى ماخسرتش حاجة


وكلمة خسارة لازم تكون بعد كلمة مكسب

انا ماكسبتش حاجة علشان اخسرها

جوازى لم يضف لى شئ
علشان طلاقى يخلينى اخسر هذا الشئ


فبالتالى مش فارقة معايا

يمكن اكون خسرت بضعة جنيهات
لان طلاقى فرق معايا فقط فى الحالة المادية

ولكن لانى عمرى ماحسيت ان خسارةالفلوس تعتبر خسارة
فبالتالى مش فارقة معايا


مش فارقة معايا
لانى عملت اللى عليا
وكنت مخلصة فى اللى عملته

ولما ما قدرتش اعمل اللى عليا
قلتله كفاية كدة
لانى بعد كدة هاكون مقصرة
وانا مابحبش اكون مقصرة



مش فارقةمعايا
لانى مابحبحش اكون عبء على حد
وخصوصا لما الحد ده يكون عندى غالى


مش فارقة معايا
لانه يستاهل انه يرتاح
من المناهدة معايا
لانى عرفانى
لما ماكونش مقتنعة بحاجة
عمرى ما هاعملها
مهمها كانت وسائل الاقناع

فبالتالى لما ابعد عنه
هيرتاح على حد قوله
من دماغي الوسخة
اللى عايزة كسرها


مش فارقة معايا
لانى بعدت وانا مازلت محتفظة بحبه ليا جوة فى قلبه

بت خيخة وأي كلام said...

باقى ردى على القدر وانا

قوليلى هاتفرق معايا ايه
اذا كنت تقريبا ماخسرتش حاجة

ايامى الحلوة معاه
لسة موجودة فى ذاكرتى

تعاملاتنا المحترمة مع بعض
لسة متواجدة بينا

خوفنا على بعض لسة موجود

اسرارنا لسة موجودة

اهالينا لسة فيه بينهم علاقة طيبة

ابننا لسة بيحبنا
ولسة احنا فى نظره بابا وماما
اللى بيحبوا بعض وبيحترموا بعض وبيضحوا مع بعض وبيسالوا على بعض


يبقى هاتفرق معايا ليه؟

لو فرقت مع حد تفرق معاه هو
مش معايا انا

مش لانه هو وحش وانا حلوة

لااااااااااااااا

ولكن لان حياته بعد الجواز
حصلها اضافات

ولكن حياتى انا بعد الجواز
لم يحدث لها اى اضافات

فبالتالى لما نتطلق

يبقى مش هاتفرق معايا انا

تفرق معاه هو

لان الاضافات اللى كسبها من جوازه

خسرها بعد الطلاق


فبالتالى مش فارقة معايا



ملخص كلامى

لما تكونى بتحبي حد اوى اوى اوى اوى
بتعملى حاجات كتير حلوة اوى

لكن لما الحد ده ما يكونش بيحبك اوى
فبالتالى مش هايقدملك حاجات كتير حلوة اوى


ولما تسيبوا بعض
انتى مش هاتخسرى حاجة
لانك مخدتيش منه حاجة
فبالتالى مش هاتفرق معاكى


لكن هو اللى هايخسر حاجات كتير حلوة

اقل ما فيها هو خسران حبك الكبير اوى

لانك ساعتها بتوقفى خط انتاج حبك ليه

مش بتكرهيه
ولكن حبك له بيتوقف عند حد معين

فبالتالى هتفرق معاه هو




اخر الكلام

من خاننى لم يقتلنى
من خسرنى قتل نفسه



تحياتى ليكى
واسفة على الاطالة
فى ردى عليكى

ابو فارس said...

تقبل مروري

تحياتي

بت خيخة وأي كلام said...

المجهول اللى سالنى اذا كنت مسافرة


!!!!!!!!!!!!!!!!!!!!!


معلش تعليقك التانى مش هانشره


بس ممكن لو سمحت اذا قريت تعليقى ده تقولى انت جبت الخبر ده منين


خبر ايه

ده مش خبر واحد
دى مجموعة اخبار


هههههههههههههههههههههههه
هههههههههههههههههههههههه
هههههههههههههههههههههههه


انا مش قادرة اقولك
انا بعد ما فوقت من حالة التناحة
من قراءة تعليقك

قعدت اضحك اد ايه

انا مش قادرة اتصور
انتوا ازاى قادرين تألفوا إشاعة وتصدقوها
وكل تصرف منى بيصدر بعفوية
انتوا بترجموه على هواكم وتزودا بيه اثباتكم ان قصتكم حقيقية

يا خرابى عليكم
اتوا فظاع جدااااااااااااا


انا اللى فطسنى على روحى من الضحك

السبب اللى انت ذكرته لعدم حضورى بؤجة الخير الاخيرة

ههههههههههههههههههههههههههههههههه

بجد انا فطست على روحى من الضحك بسببه


السؤال بقى اللى بيطرح نفسه هنا

طيب لما اروح التبرع بالدم
ان شاء الله اللى جاى
وتشوفونى وماتلاقوش حاجة
كنتوا هاتفسروا ده بايه؟

هههههههههههههههههههه




السؤال التانى

اشمعنى الاسم ده اللى انت قلته فى تعليقك

مع ان صاحب الاسم
بعيد تماما عن دائرتى المعرفية

وعلاقتى بيه سطحية جداااااااااااا

على اى اساس انت او انتوا ربطتوه بيا؟


بص لو جيت تانى وقريت تعليقى

لو مش عايز تجاوب على اسئلتى مش لازم

انا كنت عايزاك تجاوب علشان بس اقعد اضحك اكتر


وعموما علشان اريحك

كل الاخبار اللى انت قلتها فى تعليقك
غير صحيحة بالمرة

مافيهاش حتى اى تشابه لا من بعيد ولا من قريب

واذا كان صدر منى اى تصرف او كلمة خلتك او خلتكم تنسجوا هذه الحكايات
يبقى انا اللى غلطانة


بس عموما كل الكلام ده مش صح خالص

وحكاية سفرى
ماعتقدش انها تخص حضرتك
او تخص اى انسان تانى فى اى شئ

اسافر
اقعد
اهاجر
اتنيل
دى حاجة ترجعلى انا
ومحدش له دعوة بيها


شكرا ليك

و نصيحة اخيرة
بلاش تتفرج على افلام عربى كتير

Anonymous said...

محسوبتك بقى..ربنا يجعلها آخر الأحزان..أرملة..مع الألم مع الأسف مكتوبة على الرقم القومى..كل ما حد يقراها فى أى مكان أوجهة حكومية أو غير حكومية..بأتمنى يكون مكتوب مطلقة..مانا كنت فاكرة إنهم بيكتبوا مطلقة..قبل الحادثة طبعا
ليه بقى بأتمنى إنها تكون مطلقة ومش أرملة..عشان المجتمع الغبى اللى إحنا فيه بيخاف من المطلقة لإنه طبعا بيتصور إنها ولية لبط وبتاعة مشاكل..إنما الأرملة بقى..مكسورة الجناح وعايزة اللى يحن عليها ويطبطب عليها..و يتسافل عليها..إلخ إلخ
ربنا ما يوريكى الإنحطاط والإبتذال ولازم أوريلهم العين الحمرا عشان كل واحد يعرف حدوده
والغريبة بقى إنهم بيبقوا مستغربين قوى لما بيلاقونى بتضايق من المجاملات اللى فى غير محلها أو التلميحات القبيحة..المفترض إنى أفرح إن أى بنطلون فاضى بيتسافل عليا؟؟؟؟
المهم إنى بقولك يا بختك إنهم بيعرفوا إنك مطلقة...بطريقة أو بأخرى..و ياريت ما كانتش كلمة أرملة تتكتب خالص

تحياتى وإحترامى

شهيرة

بت خيخة وأي كلام said...

شهيرة


ايه ده بجد؟
بقوا بيتسافلوا على الارامل كمان؟

تلاقيكى لسة صغنونة وفى عز شبابك


لو كنتى فى سن امهاتنا ماعتقدش ان حد كان اتسافل عليكى


عموما ربنا يجعلها اخر الاحزان

ويبعد عنك وعنا اى حد سافل

تحياتى ليك

بت خيخة وأي كلام said...

اكرم


انت هتشلنى قريب يا اكرم

المفروض يعنى انى ارد على كلامك ازاى هنا فى صفحة التعليقات؟


مش هاعرف ارد عليك هنا طبعا

اتصل بيا علشان مش معايا رصيد اكلمك

بت خيخة وأي كلام said...

اكرم

يا لهوى على الذكاء

يا ابنى وانت تكلمنى ليه
على تليفون التجمعات؟

انا قافلة الرقم ده دلوقتى

اتصل بيا على الرقم التانى بتاعى الاصلى

بت خيخة وأي كلام said...

صفاء

معلش يا صفاء ما نشرتش تعليقك
مش علشان فيه اى حاجة وحشة
بس علشان وانتى بتكتبى
واضح انك كنتى متنرفزة اوى
وماخدتيش بالك انك كتبتى كلمة قوية وسط تعليقك

ولو نشرت التعليق ممكن حد سخيف يعلق بكلام سخيف عليكى


بصى يا ستى

انا مش عارفة اطبطب عليكى
ولا اخدك قلمين

فى الكوبليه الاول من قصتك
انا متفقة معاكى تماما ومقدرة اللى انتى عاملتيه

وعلشان كدة عايزة اطبطب عليكى


لكن ليييييييييه بقى؟
لييييييييييه تيجى فى الاخر وتعكى الدنيا؟

احنا مش قلنا لا تدع سفالة الاخرين تكشف عن سفالتك؟

انت فرحانة دلوقتى باللى عملتيه؟

انتى كدة اللى خسرانة
خسرانة من نواحي كتير جدا

خسرتى نفسك و زعلتى ربنا منك

انتى كدة مخدتيش حقك يا عبيطة

انت كدة زودتى وجعك

ومافيش حل غير كثرة الاستغفار
انا معرفش الحالات اللى زى دى الواحد يصلح الموضوع ازاى غير انه يستغفر ربنا كتير
وربنا يقبل انشاء الله

نيجى لموضوع البنات
انا مش معاكى خالص فى اللى بتعمليه معاهم ده

ده ابوهم
مهما حصل بينكم
البنات مالهومش دعوة بكل الحوارت دى

انا معاكى انهم مايباتوش لانهم بنات ومحتاجينلك انتى اكتر
لكن ده مايمنعش انهم يشوفوه باستمرار

على الاقل يوم فى الاسبوع
يروحولوا يقعدوا معاه ويقضوا معاه اليوم

وبعدين احنا فى اجازة دلوقتى
يعنى ممكن يشوفهم اكتر من مرة فى الاسبوع الواحد
وماتبقاش محددة
لما يوحشوه ويحب يشوفهم
من حقه طبعا انه يشوفهم فى اى وقت

ماينفعش تعملى مواعيد للزيارة علشان يشوف عياله
حرام عليكى كدة


وبعدين ليه انتى قلتى لاصحابه وقرايبه؟

التصرف ده مش صح خالص
ازاى تكسرى ابو بناتك قدام الناس كدة؟


ابنك الصغير ده هدية من ربنا ليكى

ولو طليقك مش راضى باللى ربنا قسمهولكم

بكرة يندم

لان الاطفال دول
بيبقوا نعمة ورحمة من عند ربنا

خدى بالك انتى منه
واعملى كل اللى فى وسعك علشان يتحسن

وخليه معاكى يا صفاء
وبلاش المدارس الداخلية دى

معلش هاتتعبى فى الاول
بس تعبك انتى معاه غير تعب المدرسات

وانتى بتقولى مدرسة داخلية متخصصة يعنى اكيد فلوسها كتير

يبقى خلاص خليه معاكى فى البيت يحس بحضنك

وممكن تستعينى بدادة تساعدك فى شغل البيت

يعنى اعتقد انك هاتبقى قادرة ماديا تجيبى دادة

واكيد اجرة الدادة هتبقى اقل من مصاريف مدرسة داخلية


بس خلى ابنك معاكى قدام عنيكى فى حضنك


مممممممممممممممممم

مش فاكرة هل فيه حاجة تانية فى تعليقك ارد عليها ولا كدة خلاص

عموما انا هاروح اقراه تانى لو فيه حاجة عايزة اقولها هارجع اقولهالك


تحياتى ليكى

بت خيخة وأي كلام said...

دافيدوف

انت خلاص خلصت موضوعك؟
ولا هتسافر وانت مخلى كل حاجة معلقة كدة؟

عموما لما تنزل كايرو
كلمنى علشان اشوفك قبل ما تسافر

تيجى بالسلامة يا جميل

شريف كويس والحمد لله

أنيس شريم said...

(بدي احتفظ بنسخة من الرد تحسبا للقادم).ليست المطلقة وحدها في المجتمع العربي من تركز عليها النظرات,بل ايضا الاعزب,ومن لم يرزق بالأطفال,ومن رزق ببنات دون البنين, والقائمة طويلة....ويصبح جميع فئات الشعب مختصين نفسيين واجتماعيين وحلالين مشاكل,ويبدأوا بسردالوصفات والنصائح وكل ذلك بسبب اننا مجتمع حشري,متفرغ اغلب وقته لا يجد ما يملأ به اهتمامه,وجب على كل منا ان ينشغل بشؤونه,ومن ناحية أخرى وجب عليّ قبل ان آخذ حكما مسبقا عن الناس(المطلقين وغيرهم)أن اتخيل نفسي مكانهم,وأسأل نفسي هل كانوا يحبون ان يصلوا الى هذه الحالة ام ان هناك ظروفا دفعتهم لذلك؟ولو كنت مكانهم هل سافعل مثلهم؟الصحيح من ضمن ظلم المجتمع العربي للمرأة انه يوصمها بالعار إن تطلقت ولا يلقون اللوم على زوجها.فهو يعيد تجربة الزواج,ولكن هي تحرم من فرصة أخرى او إن حصل وتزوجت تكون بظروف سيئة.

مزاجنجي said...

قالت له ببرود: واندم ليه ؟
إديني سبب واحد يخلينى اندم ؟

اختي خيخ
ة
هسالك نفس السؤال اللي وينونا رايدر سالتة لي ريتشارد جير في فيلم خريف في نيويورك وهي بتعيط
(what about love)

Anonymous said...

مش انتى قبل كدة كنتى كاتبة ان طلاق بنات الناس مسئولية اية اللى غير كلامك
ودلوقتى بتناقضى نفسك و تقولى مش
فارقة معايا ولكن انتى بتوهمى نفسك وخلاص انتى عايزة تبينى ان كل مطلقة سعيدة ومبسوطة مع ان اللى بتقولية دة ميينطبقش على كل مطلقة لان كل مطلقة بتختلف عن التانية حسب ظروفها وحسب حالتها الاجتماعية والاقتصادية يمكن انتى عندك الطلاق سهل لكن عندغيرك مش سهل خلاص حاولى انك تعيشى الناس فى الواقع مش مجرد كلمات على الكيبورد بتتكتب حسب الحالة المزاجية

ارجو منك نشر تعليقى

بت خيخة وأي كلام said...

اخر مجهول


اه قلت ان طلاق بنات الناس مسؤلية
ومازلت عند رايى
ومش شايفة انى ناقضت نفسى بالبوست ده


وكون ان مش فارق معايا انى مطلقة ده مش معناه ان طلاقى مش مسؤلية

انا مش قادرة افهم انت ليه خالط الامرين ببعض
ده حاجة وده حاجة


وبعدين انا متفقة معاك جدااااا
ان كل حالة طلاق وليها ظروفها

لان ممكن نفس اسباب طلاقى تكون هى نفسها اسباب طلاق اتنين تانيين
لكن حالتهم تختلف برضه
لان ردود افعالهم كانت مختلفة عن ردود افعالى انا وهانى



وبعدين انا مش مطالبة ان اعيش الناس فى الواقع

انا مش مسؤلة عن واقع البشر

كل واحد المفروض يعيش فى الواقع بتاعه بنفسه

وانا فى البوست ده بتكلم عن الواقع بتاعى انا

وماطلبتش حد انه يعيش زيي او يتقبل اللى انا بتقبله

كل واحد حر









مزاجنجى

what about love?
!!!!!!!!!!!!!!!!!!








محمد طلعت

الخيانة مش جسدية فقط يا استاذ طلعت

الخيانة عندى اكبر من انها تكون جسدية

لما تكون مدى لحد الامان انه هايحافظ عليك
والحد ده يفرط فيك
مش دى تبقى خيانة برضه؟


ردى على سؤالك الاول
لا مش خسرانة

ردى على سؤالك التانى
لا مش ندمانة

ردى على سؤالك التالت
لا مش هازعل
بالعكس
انا بتمنى ده يحصل النهاردة قبل بكرة
وبصراحة انا بتمنى ده يحصل علشان
حاجة فى نفس يعقوب

نيهاهاهاهاهاهاهاهاهاهاع


ردى على سؤالك الرابع
اه عصبية جداااااااااااااا

ربنا ما يوريك ساعة غضبى
ولا ساعة عصبيتى

والاهم من ده كله
ربنا ما يوريك ساعة الانفجااااار

بتبقى ساعة منيلة بنيلة مقطرنة بقطران متزفتة بزفت


ردى على سؤالك الخامس
لا
خالص
خالص
خالص


اه كسبت شريف
والحمد لله ماخسرتهوش
يبقى مش خسرانة برضه

بس هى الفكرة
شريف مش محطوط من ضمن حسابات المكسب والخسارة

ولنفترض ان هانى خد شريف لاى سبب

ده مش معناه انى خسرت ابنى

لان ساعتها ابنى هايكون مع باباه

مش مع حد غريب

يبقى هنا مافيش اى وجه للخسارة

وانا لو حسيت لحظة انى
غير قادرة على تحمل مسؤلية ابنى

مش شايفة انى لو تنازلت عنه لوالده يبقى انا كدة خسرته

لان والده انسان محترم وهيحافظ عليه بنفس القدر اللى انا كنت هحافظ عليه

فبالتالى شريف معايا او مع باباه
هنا وهناك واحد


ردى على سؤالك السادس

لا تعليق



ردى على سؤالك السابع


وفاة بابا

ولحد هذه اللحظة مافيش حدث حصل فى حياتى هزنى اد وفاة بابا


ردى على سؤالك التامن

تقريبا


هييييييييييييييييه

خلاص خلصت الاجابات
هاتبعتلى نتيجة التحليل امتى بقى؟

لو طلعت مجنونة ما تشردليش علشان
احمد ابو حجر ما يشمتش فيا

نيهاهاهاهاهاهاهاهاهاهاهااااع

شكرا ليك يا طلعت

Doba said...

ليس لدى أى تعقيب على ما ذكرتيه من محتويات


ولكن

كل ما أريد أن أضيفه ويلح على بشده هو أننى



صديقتك وأفتخر


وبشدة

بحبك



على ايه



معرفش


ههههههههههههه



انا عارفة ليه
انتى تعرفى ليه

سؤال يطرح نفسه

؟


هبة

مزاجنجي said...

يعني ياخيخة الحب اللي خلاكي توافقي متعمليش فرح وقلتي كفاية اني كفاية عليكي هاني ...فين راح الحب دا. يعني ااقول زي مامحمود سعد قال يوم مانور الشريف طلق بوسي قال ان معدش امان في البيوت المصرية .ولما خيخة تطلق من شريف يبقي قصة الحب الجميلة فشلت طيب الناس تتجوز بعد كدا علي اساس اية ..

سمع هوص (Abo 3li) said...

لقيتك صاحية...
قولت اصبح
صباحك سكر زيادة

hamma said...

الطلاق هو حل أو مشكل ؟
هنا كل واحد حر في إختياره
يعني حياته ينتقي ما يريد بمسؤولية
و لا دخل للمحيط فيه خاصة إذا كان عوض الإصلاح يفسد
يجب أن يعيش المرء حياته كما يريد هو لا كما يريدون له
أما عن الصعوبات التي تعترض المطلقة فهي كثيرة
و مطموع فيها بكل جرأة
و لكن بالعزيمة تتخطى كل المراحل
و تستمر الحياة
تمنياتي بالتوفيق

بت خيخة وأي كلام said...

دوبا

يا نافخة بلالينى
يا رافعة من معنوياتى
يا مفسية من خنقاتى
يا عدلالى مزاجي
يا جابرالى خاطرى
يا مضحكة عيوني

بحبك يا بت يا اروبة









مزاجنجى

الحب موجود يا مزاج

وحفاظا على الحب ده انا اتطلقت

عارفة انك هاتستغرب وغيرك يستغرب
لان الناس عادة بتطلق لما الحب يروح

لكن انا اتطلقت علشان الحب مايروحش

كنت عايزة احافظ على البقية الباقية من حبى لهانى

خلافاتنا واختلافاتنا كانت بمرور الوقت هاتقضى على المشاعر الحلوة اللى بينا
وكنا كلنا بلا استثناء هننهار نفسيا فى المستقبل

وشريف ابنى كان اول واحد فينا يتعب نفسيا

حفاظا على صحة ابنى النفسية
وحفاظا على اعصابى واعصاب هانى وحفاظا على المشاعر الحلوة والاحترام اللى بيربطنا ببعض قبل اى حاجة تانية
احنا اتطلقنا





ابو على

وش واحدة منشكحة
صباحك قشطة بالعسل يا ابو على
تسلملى يارب
ويسلملى صباحك السكر

تحياتى ليك









محمد طلعت

مممممممممممممم

انا شايفة ان كل واحد فينا متناقض بشكل ما
وانامش شايفة انى غريبة
ما اناقلت قبل كدة
انا انسانة فيا خير الملايكة وشر الشياطين
كون انكم عايزين تشوفوا جانب واحد فيا بس ومش قابلين انكم تشوفوا الجانب التانى
دى مشكلتكم انتوا مش مشكلتى انا

فيه اللى بيقرا
وشايف نورا ملاك وبيرفض اى حاجة تكتبها تبين شرها

وفيه اللى شايف ان نورا دى زبالة ومش بيتقبل انها تكتب اى حاجة كويسة
ولو كتبت يبقى هى كدة بتمثل وبتنافق


بس سيبك انت
انا عجبتنى الحتة فى تعليقك
بتاعة
ما اروع ان تشملك بنورها
وما اهلكك اذا مستك نارها

حلوة صحيح يعنى

شكرا يا طلعت


شكرا ليكم كلكم على تواصلكم معايا
اختكم خيخة

Anonymous said...

هو فين محمد طلعت ده اللى بتردى عليه؟

انتى بتغنى وتردى على روحك؟

بت خيخة وأي كلام said...

المجهول

ههههههههههههههههههههههههه

معلش اصل محمد طلعت ده كاتب حاجات ممنوعة من النشر


وبعدين اشمعنى محمد طلعت بالذات
اللى انت مركز معاه
ماانا رديت على ناس تانيين ومانشرتش تعليقاتهم اساسا؟

احمدابوحجر said...

استغفر الله العظيم يارب
اللهم لاشماته
بس انا مقصدش الاساءه ليكي
القصد ...نسيت
ربنا يهديكي

مهندس مصري said...

الفكرة يا خيخة إنك مش المفروض تكوني مستسلمة لشر الشياطين و تتعاملي معاه على إنه جزء عادي جداً من شخصيتك زيه زي خير الملايكة
لأ
المفروض إنك طول الوقت بتحاولي تخلي الخير جواكي يغلب الشر
و لو الشر غلب مرة ترجعي تستغفري و تتوبي و تحاولي تخلي الخير يغلب
يبقى يقينك من جوه إن الخير هو الصح و الاصل المفروض دوام وجوده فيكي و الشر هو العارض الطارئ اللي المفروض تنقي نفسك منه

و علشان كده ربنا قال في القرأن الكريم عن النفس
( قد أفلح من زكاها و قد خاب من دساها )
يبقى المفروض نحاول نزكي نفسنا بعمل الخير و البعد عن الشر
مش بإعتبار الشر جزء عادي مننا و لا غضاضة فيه
:)

يا متناقضة يا خيخة

بت خيخة وأي كلام said...

مهندس مصرى

والله بحاول يا محمد على اد ما اقدر

وربنا يهدينا يجميعا

شكرا ليك

Anonymous said...

السلام عليكم
أنا عرفت مدونتك من ( البوست ) اللى طلع فى السى إن إن
من حين لآخر كنت بدخل عليها وبشوف مواضيعك
المواضيع كلها مشتركة فى شيئ واحد , أسلوب الكتابة الساخر الصريح الجذاب.

أنا بجد فوجئت بموضوع طلاقك , بس لما قعدت وفكرت , لقيت إنه كان هيبقى شيئ طبيعى لأن انت ما تنفعيش زوجة انت تنفعى زوج.
أو بمعنى أصح يعنى انت الوحيد اللى يرضى وينفع ويكمل معاكى يكون راجل عديم الشخصية ومعندوش دم , وبم إنك مستحيل تقبلى واحد كدة , فمش هينفع تتجوزى.
اللى فات ده كان أولاً
أما ثانياً , أنا بصراحة محتار فيكى ساعات أحترمك أوى وساعات احس إنك إنسانة مش محترمة.
ممكن ده يكون راجع لأن انت معترفة إن نصك ملاك ونصك شيطان.
بس السؤال : هو انت عايزة تبقى كدة , نص ونص ؟
عشان أنا عايز أعرف أحترمك وللا لأ ؟
شكرا يا أم شريف

بت خيخة وأي كلام said...

المجهول


عايز تعرف تحترمنى ولا لأ؟
!!!!!!!!!!!!!!!!!!!!!!!

اجابتى هى الاتى

عاملنى كما تحب ان يعاملك الاخرون
فاذا اردت ان يحترمك الاخرون احترمهم

ولاتجعل خيخنة الاخرين تكشف عن خيخنتك


شكرا ليك

users online