Monday, February 14, 2011

إســـتـــفـــســـار

ليجاوبني أهل الحكمة منكم كيف تكون الحرية مؤلمة هكذا؟

29 comments:

Noha Saleh said...

ماعنديش اجابة على السؤال
يمكن لانى مش من اهل الحكمة

الكلمة نور said...

على قدر تجربتى..فناء ذاتك المنفردة فى جموع المحتشدين مؤلم قليلا
ولكن الحرية تجربة لم تأتى بعد
انتظرى المتعه قادمة بعدما يهدأ غبار المعركة وتصفو كل نفس وتحسب مكسبها وما تستطيع ان تشارك به العالم بمنتهى الحرية
....
الحرية قادمة

Anonymous said...

نورا
انا اول مرة هاتكلم جد معاكي وهابطل هزار

الاول يارب تكوني بطلتي عياط
علشان انا فى اخر المكالمة ماكونتش فاهم منك ولا كلمة لانك كنتى بتتكلمى بسرعة جدا واتعصبتى وعيطتى فامعرفتش اركز فى كلامك

هو انتي كنتي قلتي ايه بعد الو ؟
هههههههههههههههه
:D

بهزر والله


بصي يانونة

الحرية بتكون مؤلمة علشان الواحد بيكون خد على وضع وعاش فيه كتير
وخلاص اتاقلم على الوضع ده مهما كان مهين
فلما الواحد يفقد الوضع ده بيحس بالألم

وبعدين الحرية مسؤلية
مش ده كلامك يا نونة؟
والمسؤلية دايما متعبة وصعبة فلازم تكون مؤلمة

انا عارف طبعا ان سؤالك ده له معنى خفي
بس انا حابب انى اجاوب على المعنى الظاهر ليه


وعلى فكرة لو مابطلتيش عياط وضحكتى حالا
انا هابلغ عنك وهاقول انك المحرضة الاولى لثورة 25 يناير
والدليل
البوست بتاعك
"هو يعنى لازم نحرقها"

انا لما قريت البوست ده دلوقتى تانى
بقول لو اصحابنا ربنا يجعل كلامنا خفيف عليهم
قرو البوست ده هاياخدوكى المحرضة الاولى للثورة
الكلام لايق اوى زى ما يكون مكتوب علشان ثورة يناير


نورا
افتكرى دايما لو كان عمو جمال عايش كان قاللك ايه؟

اقولك على حاجة
عارفة فيه فيلم ايه دلوقتى؟
كتيبة الاعدام
انا اول ما لاقيته اتخضيت
وقلت البت نونة دى لا يمكن تكون بشرية دى اكيد عفريتة
ههههههههههههههههههههههههههههه

اضحكى بقى
الحاجة بتقولك اضحكى

بت خيخة وأي كلام said...

نهى صالح

ولا يهمك يا نهى
مسير اهل الحكمة يجاوبوا عليه في يوم من الايام

شكرا ليكي









الكلمة نور

انا مش فاهمة يعنى ايه فناء ذاتي المنفردة فى جموع المحتشدين مؤلم فليلا

اعتقد ان الحرية
تجربة خاصة لكل فرد
قد لم يختبرها شخص ما
وربما اتت للكثيرين

ولكنى اقدر اقول وابصم بالعشرة انى اختبرتها حق الاختبار
واقدر اقول من موقع تجربتى
انها مؤلمة جداااااااا

شكرا ليك









وائل

انا مقهورة فى العياط دلوقتى

اقولك بابا كان هايقول ايه لو كان عايش؟

كان خدنى فى حضنه وطبطب عليا
ومسح بايده على شعرى وضهرى
ويقولى ولا يهمك يا مرمر
انا عارف بنتي كويس بميت راجل
تقع بس تقوم اقوى من الاول

أااااااااااااااااااه

انا مفتقداه اوي يا وائل
واحشنى اوى فعلا

عارف لما شريف جالى
اول ما هانى نزل من عندنا
لاقيت شريف ده جاى فى حضنى وقعد يعيط بطريقة غريبة
انا اتخضيت ساعتها وقلتله مالك يا شريف فيه ايه
انا قلت زعلان علشان هانى نزل ولا حاجة

لاقيته بيقولى جدو جمال واحشنى اوى يا مامى

فجأة كدة ومن غير اى مقدمات

انا ماعرفتش اقوله ايه
انا نفسي ماكونتش متوقعة كدة

الله يسامحك يا وائل
انا مش عارفة ابطل عياط








موناليزا

مش عارفة اقولك ايه على تعليقك
ولا تأثيره عليا

شكرا يا موناليزا








اكرم نضال

كلمنى يوم الاربع بعد اتناشر الضهر

اكون قدرت احدد ايه ظروفي ساعتها

MaNoO said...

طبعى المتفائل بيخلينى ابص للجزء الحلو من الشىء لكن لو يصيت لالم الحريه هقولك لانه تغيير جذرى فى كل شىء بس برده معتقدش التغيير يبقى مؤلم
كلام نهائى الحريه عمرها ما هتكون مؤلمه الا للى مش عايزها او مش عارف معناها وقيمتها
وبرده انا مش من اهل الحكمه
هو انا مش عارف انتى بتعيطى ليه ولا عارف بابا كان ليه هيقلك يانورا انتى بميت راجل بس انا رخم ومحبش اشوف حد مضايق لازم اشارك لو حتى بكلمه

الزعل قررى انه يبقى جزء منك واوعى تكونى جزء منه ومعرفتك بكلمه باباكى دى تخليكى تهزى الكون وتتحدى اى حاجه تخليكى تدمعى وافتقادك لبابكى دا ممكن يكون دافع بانك تحسى بحنانه والحنان دا يبقى سبب فى عزتك وقوة ارادتك وسبب ثبات تقتك فى نفسك بل زيادتها
بقوا اكتر من كلمه معلشى طولت
وعلى اى حال نحن على استعداد لتحمل الحريه بكل ما فيها

احلام جوليا said...

اجمدي يانورا وبعدين انت اشجع واحسن من كده فكري بشكل ايجابي زي ما عودتينا يالله انضمي للاصلاح اعرضي مقترحات دوري وحاولي تعملي حاجة لمصر للحرية تمن بس طعمها حلو قوي قومي يا نور انا عايزة اشوف دعوة منك جديدة تنادي الكل علشان يروحوا يزوروا اهالي الشهداء ولا يجمعوا معلومات عن الحرامية من الشركات القطاع العام الي اتباعت عايزة اشوفك صحفية عمله فريق عمل بيساعد في تنظيف مصر
يالله يا نور انا مستنية بوست نورا مش بوست خيخة انت عمرك ما كنت خيخة ابدا قومي احنا خلاص طلقنا الفساد وخايفين شوية علشان اول مرة نعيش من غيره بس في داهية يالله قومي

ابراهيم رزق said...

البط شال عدى الجبال و البحور
ياما نفسى اهج..احج ويا الطيور
اوصيك ياربى لما اموت .. والنبى
متودنيش الجنة للجنة سور
عجبى؟؟؟؟

الحرية مؤلمة لان للحرية ثمن و للحرية مسئولية و من ذاق حلاوتها ادمنها لم يستطع ان يتشافى منها حتى فى اكبر مصحات الادمان وانتى ممن ذاق حلاوة الحرية و دفعتى ثمنها ومازلتى تدفعى لذلك المها بالنسبة لكى فى خوفك عليها و ماتدفعيه من اجلها قد يكون صعب مثل من يبع اثاث منزله من اجل جرعة من المخدرات

نقطة ثانية يا نوران عايز اكلمك فيها من زمان يعلم الله انى اعتبرك اخت لى و مدونتك من اكثر المدونات التى اتابعها و اتأثر بالحالة النفسية التى انتى فيها و احس بالعجز لعدم التواصل معك و المساعدة تلك مقدمة و اليك الموضوع بايجاز او بالتفاصيل الله اعلم
شئتى ام ابيتى انتى مبدعة فى مدونتك و افكارك ملك لكى طالما فى داخلك لكن طالما خرجت من داخلك على الورق او الكيبورد لم تصبح ملكك وانما ملكنا نحن جميعا مثل الشاعر او الاديب او المخرج السينمائى لا يملك العمل طالما خرج للناس و انما مايملكه انه يقول انه يخلى مسئوليته عن هذا العمل او انه اخطا فى هذا العمل و لهذا و من منبرى هذا اطالبك انا ابراهيم رزق بأن ترجعى ما حذفتيه من بوستات على ان تتبرئى مما تشائى منها هذا ما اراه و الرزق على الله
سلامى لعريس بنتى شريف وان كنت خايف عليها من حماتها اللى بتقول انها خيخة و هى مش خيخة خالص و جدعة وست الجدعات
تحياتى ابراهيم رزق

خالد said...

إنه قانون الحياة ، فإن التحولات في تاريخ المجتمعات لا تحدث مجانا و إنما يجب أن يدفع أفراده ضريبة ذلك التحول ، تماما مثلما ينتقل الجنين من ضيق الرحم الى رحابة الحياة والحرية فتدفع أمه ضريبة الألم الشديد الذي تعانيه، و في بعض الأحيان تدفع الام حياتها ضريبة لهذه المرحلة
أن ثورة الشعب في مصر أدت الى حدوث عمليات قتل و ترويع ، ولولاها لما ولدت الحرية

عبدالله said...

مش محتاجه حكمه ولا حاجه دي سنة ربنا في الكون زي ما ربنا قال
يؤتي الملك من يشاء وينزع الملك ممن يشاء ويعز من يشاء ويذل من يشاء بيده الخير وهو على كل شئ قدير
النزع يعني الالم الشديد مش مجرد ازاحه لا كلمة نزع تعني الاخذ بالقوه مع التشبث و الالم وربنا برضه قال
ان تكونوا تألمون فأنهم يألمون كما تألمون وترجون من الله مالا يرجون

ده الفرق الوحيد ان الالم متساوي للطرفين بس طرف الحق رجاءه عند ربنا غير علشان كده بيقدر يستحمل
واخيرا
إن يمسسكم قرح فقد مس القوم قرح مثله وتلك الأيام نداولها بين الناس وليعلم الله الذين آمنوا ويتخذ منكم شهداء والله لا يحب الظالمين

لازم مع تداول الايام ربنا يصطفي شهداء مننا دي كده سنن ربانيه في الكون

مفيش حاجه بالساهل علشان نقدر نبني مستقبل لازم نتعب شويه مالو مكنش في الم كان اسهل حاجه الناس تطلب بمستقبل كله حريه وللاسف الحريه فيها تشغيل دماغ و تفكير غير راحه فتره الاستعباد وده الم اكبر في حد ذاته

اتمني تكوني في احسن حال بقالي فتره مش شوفتك اون لاين كنت عاوز اطمن عليكي

تحياتي

أم بتول said...

لأن ثمن الحرية غالى قوى
بيكون ثمنها الدم دائما

فاتيما said...

بتسألى اهل الحكمة ؟

يبقى اسكت انا


يا نونو
اقولك ايه بس !!

ماهو زمان قالوا
المعرفة لها ثمن غال

وغالى دى
تمشى ع الوشين
بتعرفى حاجات تميزك عن غيرك
بس بتدفعى لقاء ذلك شىء
مفيش حاجة ببلاش
فما بالك لما تكون الحرية
او الحب
او الكرامة
او الأمان
أو أى معنى من المعانى الكبيرة دى اللى مبتتحققش بالساهل

عارفة اللى يفرح قوى فيقول اللهم اجعله خير
او هاه وبعدين
ايه اللى جاى ف السكة مقابله ؟

دى سنة الحياة

بس جنب التمن الغالى
انتى مدركة تماماُ أن ربنا ساندك ومعاكى ..فخلاص بقى

كل الهم والحزن الذى يصاحب ذلك
ان شاء الله يزول

دا اكتئاب ما بعد الثورة يا بت
زى اكتئاب ما بعد الولادة كدا

والله مفيش فرق
مولود جديد وغالى عليكى
خايفة عليه وخايفة متتحمليش مسئوليته ومحدش يسادعك فيجراله حاجة وتكونى مقصرة وفى نفس الوقت انتى كل حتة فيكى بتوجعك ومش عارفة تنامى ولا تاكلى وخايفة متعرفيش تعتنى بالوليد كما ينبغى وتضريه ..الخ الخ


عاوزة ايه يا ست ؟!!!

عتناضلوا بلا وجع
امال البطولة التى خلعناها عليكم
دى تيجى ببساطة كدا ؟!!

انتم عملتم شىء عظيم
وقدره عظيم
وألمه كمان يا نون عظيم

اتحملى بقى
ولا هتستخيخى ف المواقف التاريخية دى وتطلعى خيخة بجد
:)

لاااااااااا
لست انتى هذه البت
بوتيتاااااا


خلى بالك من نفسك
وبلاش قسوة عليها
ممكن ؟

طيب


بوسس لشريف
وحضونات ليكى

nor said...

مش هرد علي السؤال لاني مش من اهل الحكمه بس ممكن تطمننا عليكي مالك بجد؟؟مخضوضه عليكي صحيح يا نورا احنا مش اصدقاء بس بحبك و ربنا العالم

بت خيخة وأي كلام said...

مانوو

اولا بعد كدة
انت هاتنضم لقائمة اخواتي الصغنانيين
وانت عارف كويس من غير ما اشرح
انا هاضمك ليه للقائمة دى



ثانيا
انا لن اعلق على ارائكم عن الحرية
لانها لو اختلفت مع بعضها البعض فهى كلها صحيحة
لانها تعبر عن وجهات نظر شخصية لكل منا


ثالثا
انا كمان معرفش بابا كان هايقولي كدة ليه؟
ههههههههههههههههه

بس هو ده بابا ودى احدى عباراته المشهورة والمتكررة ليا فى كل وقعة
وانا حاليا امر بوقعة منيلة بنيلة
فبالتالى لو كان موجود كان قاللي كدة


رابعا
موضوع الزعل ده
فترة وتعدى
بس هو انا كدة
احب اعمل كل حاجة باتقان
وقت ما ازعل
احب ازعل اوى كما لو لم ازعل من قبل
و وقت ما افرح احب افرح اوى
و وقت ما اتعصب احب اتعصب بعزم ما فيا
وهكذا دواليك
فامتقلقش الزعل مسيره يروح لحاله ويتبدل لفرحة إن شاء الله

شكرا ليك يا مانوو

بت خيخة وأي كلام said...

احلام جوليا

حلوة فكرة زيارة اهالى الشهداء دي

مممممممممممممممممم

طب ما حد يجبلنا عناوينهم يا جماعة


بالنسبة للإصلاح
انا ما بعرفش اقود جماعة اصلاحية

فبالتالى انا معنديش مانع انى اكون من ضمن منظومة اصلاحية بس حد يقولنا نعمل إيه واحنا نعمله

انا لو الدولة احتاجتنى انى ابنى بايدى بيوت للمشردين
هابنى فعلا ومش هاتردد لحظة

ولو احتاجتنى اكنس شوارع مصر بنفسي هاعمل كدة برضه ومش هاتردد لحظة


انا ماليش فى الكلام النظرى
انا احب الحياة العملية

احب اعمل بنفسي الاشياء

وبعدين خلينا واقعيين
احنا افراد ولسنا مؤسسات

المؤسسات هى القادرة انها تنفذ خطتنا لو عندنا خطة

بعنى مثلا لو قلتلكم احنا محتاجين نسفلت الشوارع
هل دى حاجة هايقوم بيها افراد؟


دى محتاجة مؤسسات تشرف على حاجة زى دى


يا جوليا
هاديلك مثل بسيط جدا

العمارة اللى انا ساكنة فيها

فيها اربع محابس مية رئيسية

محبس منهم عمال يخر مية من زمااان
والمفروض اصحاب الشقق اللى بيستفيدوا من المحبس ده
يلموا فلوس ويصلحوه

محدش منهم عمل اى حاجة

ورغم ان المحبس مش تبع القسم اللى انا ساكنة فيه
الا انى معنديش اى مانع انى اصلحه على حسابي
بس المشكلة عندى دائما بتكون فى التكلفة المادية
كل ما يبقى معايا فلوس واقول اجيب سباك ويصلح هو المحبس على حسابى
الاقى طلعلى حاجة شخصية محتاجة فلوس
فطبعا بطبيعة الحال وبطبيعة المنطق الاناني

بقول لنفسي وانا مالى
هو انا اصلح حاجة مش بتاعتى على حسابى ليه؟
و الفلوس دى ابنى اولى بيها واحتياجاتى اولى بيها

وانا بصراحة معنديش موهبة انى اتكلم مع الجيران واقنعهم بضرورة اصلاح المحبس

لان انا مش بتاعة كلام
انا بتاعة فعل
لو اقدر اعمل هاعمل من غير ما اتكلم

وانا فعلا لحد هذه اللحظة
لو معايا فائض مادى كبير انا كنت صلحت من غير ما اقولهم

كانوا هايصحوا فى يوم يلاقوا المحبس اخيرا مابقاش يخر مية

والناس مش حكاية مش عايزة تلم الفلوس
ولكن الناس فعلا مش معاهم فلوس

يعنى لو الاصلاح هايتكلف الف جنيه مثلا
وهما اربع شقق

فيه شقق فعلا ماتقدرش تدبر 250 جنيه


اى اصلاح محتاج ميزانية مادية

انتى حتى لو قلتى انك هاتكنسي الشارع
محتاجة اقل ما فيها انك تشترى مقشة لكنس الشارع

انتى بالنسبالك المقشة دى ممكن لا تكلفك الكثير
لكن بالنسبة لناس تانية هاتكلفهم كتير

فبالتالى ماتطلبيش منى مقترحات اصلاحية
لانها هاتكون على سبيل حبر على ورق وخلاص على كدة

وانا ما بحبش الحبر اللى على ورق
احب الحاجة اللى نقدر نعملها فعلا

يوم ما اقولكم على مقترح
ابقى عارفة بجد ان احنا مش هاتقف قدامنا عراقيل بيروقراطية او مادية علشان ننفذه

وعلشان كدة انا مازلت بحب تجمع التبرع بالدم
مش محتاج مننا اى عراقيل
احنا بنتلم ونروح نتبرع بدمنا
ولا بقى محتاجين موافقة من جهة علشان نروح نتبرع بدمنا
ولا محتاجين نلم من بعض فلوس علشان نتبرع


يتبع .....

بت خيخة وأي كلام said...

استكمال ردى على جوليا

لكن لو قلتلكم يلا نتجمع ونروح ننضف مجمع التحرير

اكيد طبعا مش هاندخل عليهم كدة ومعانا مقشاتنا ونكنس بهدوء
اكيد فيه ناس هايمنعونا
ويقولولنا انتوا تبع ايه
ولازم موافقة من ادارة المجمع انها تدخل شباب تكنس المجمع وتنضفه

وممكن جدا يستغربوا من تجمعنا اللى من غير اى غرض
وممكن جدا يقولولونا كبروا دماغكم وروحوا بيوتكم
ويحبطوا محاولتنا فى تنظيف صرح مهم فى مصر

ولو قلتلكم يلا نبنى بيوت للناس اللى مش لاقية مكان

دى محتاجة _غير التكلفة المادية المهولة_محتاجة اتفاق مع مؤسسات علشان توردلنا الخامات اللى احنا محتاجينها فى عملية البناء
ومحتاجة موافقة من الدولة علشان تدينا حتة ارض نبنى عليها البيوت دى
اللى احنا مش عايزين منا حاجة لنفسنا
احنا بنبنى للغلابة
مش لينا احنا


هاتقوليلى هو انا ليه شاطحة فى مقترحاتى الاصلاحية كدة
هاقولك هو انا كدة

اصل محدش يجى يقولى اعملى دعوة ان الواحد ما يرميش ورقة فى الشارع
وانه مايكسرش الاشارة
وانه مايشتريش اكتر من حاجاته

انا بالنسبالى الحاجات دى كلها ليس ذات معنى

وانا لا اقلل من شانها
بس انا هنا بخاطب مجتمع معين
على درجة من الثقافة والوعى
ولو عملت الدعوات دى

هتلاقى كل اللى بيقرالى
بيحلف برقيه وتحضره
وانه عمره ما رمى ورقة
وانه عمره ما كسر اشارة
وكلهم هايقولولى بس برافو عليكى يا خيخة
وربنا يجازيكى خير
والله دعوة مهمة

طب ها وبعدين
وتيجى تنزلى الشارع
تلاقى لسة وسخ
وتلاقى لسة الناس بتف وتبربر فى الشوارع
وتلاقى لسة الناس بتكسر الاشارات

علشان الاصلاح يتم من جوة اوى كدة
محتاجين نغير اخلاق مجتمع بحاله

وبما اننا مش هانقدر نعمل ده
فبالتالى يبقى خلى افكارنا فى المقترحات عملية
زى التنضيف والبناء

واللى احنا برضه مش هانقدر نعمل منها حاجة
لان زى ما قلتلك دى محتاجة مؤسسات تشرف عليها


انا مش عايزة احبط حد
بس انا احب ان احنا نكون واقعيين فى مقترحاتنا
علشان ماتبقاش مجرد شعارات وخلاص


وعموما انا اساسا مش شاطرة فى التخطيط
فاللي عنده فكرة كويسة وقابلة للتنفيذ بدون اى عراقيل
يبلغنا بيها
وانا مستعدة انفذها فورا
لان انا شاطرة جدااااا فى التنفيذ العملي


شكرا ليكى يا جوليا

بت خيخة وأي كلام said...

ابراهيم رزق

زى ما قلت لمانوو
انا مش هاعلق على ارائكم عن الحرية

مش علشان انا مش مقتنعة بيها
ولكن لانى متاكدة انى هاقتنع بارائكم كلها
حتى ولو اختلفت وتناقضت


نيجى للنقطة التانية

اولا انا بشكرك جدا يا ابراهيم على كلامك
وربنا وحده اللى يعلم انكم كلكم فعلا اخواتى وبحبكم فى الله

بالنسبة لتدويناتى السابقة
اولا احب اقول
ان انا عمرى ما تبرأت من اى تدوينة كتبتها حتى ولو كانت ساذجة او فجة او ابيحة او جريئة او مؤلمة

انا بحب كل ما خطته يداى
وبعشق كتاباتى وبعشق مدونتى

اعتبره غرور
اعتبره اى حاجة

لكن انا فعلا بلاقي نفسي فى كتاباتى وبلاقي نفسي فى مدونتى
وبحب الوقت اللى بقضيه فى الكتابة وفى قراءة تعليقاتكم


ولما برفع بوست
ده مش معناه انى بتبرأ منه او ندمانة انى كتبته او نشرته
ولكن هى بتبقى حالة كدة بتسيطر عليا
وتلاقينى عمالة ارفع بوستات
واعيد نشر بوستات

ساعات مابحبش اشوف الالم متجسد قدامى اوى كدة فى بوست كتبته وكان مؤلم فى احداثه

فبالتالى برفع البوست حتى تمر فترة الالم واقدر لما اعيد نشر البوست
ما حسش بحاجة وانا بقراه تانى

لكن عمرى ما هتبرأ من حاجة كتبتها

واوعدك انى اعيد نشر البوستات اللى تم رفعها
بس ادينى وقت اطلع من المود الكئيب اللى انا فيه الايام دى


شكرا ليك ياابراهيم

وبوسلي ساليناز وزياد

بت خيخة وأي كلام said...

خالد

للأسف ... قانون مؤلم أوي

شكرا ليك







عبدالله

برضه مش هاعلق على رايك عن الحرية

وانا كويسة يا عبدالله والحمد لله

شكرا ليك








ام بتول

والله لو جت على الدم
ما كانت هاتبقى مؤلمة كدة
المشكلة انها ساعات تمنها قتل الروح

وما ادراكى بانسان يكون عايش وروحه مقتولة

شكرا ليكى








نور

انا كويسة والحمد لله
ولا داعى ان حد يتخض عليا
شكرا ليكى يا حبيبتى

بت خيخة وأي كلام said...

فاتيما

اولا
وحشانى جدااااااااااااااااااا
يا طمطومة

ثانيا
لو مش انتى اهل الحكمة
امال مين اهل الحكمة

ده انتى الحكمة بذات نفسها يا طماطم


ثالثا
انا عاجبنى اوى تعبير اكتئاب مابعد الثورة
وفاهمة اوى ما تقصدينه بهذا التعبير

اصل محسوبتك من المصابين القدامى باكتئاب ما بعد الولادة
فانا فاهمة يعنى ايه اكتئاب ما بعد حدث جلل



تانى حاجة
ايه انتم دى؟
!!!!!!!!!!!!!!

اسمها احنا يا فاتيما
احنا
انتى كنتى معانا
المصريين كلهم كانوا معانا
حتى ولو كان فيهم حد متغرب وبعيد عن الارض
بس كلنا كنا مع بعض

محدش يعتقد ان اللى نزل بس هو اللى عمل


لو حد كان فضل قاعد فى بيته لاى ظرف
وكان مجرد انه بيدعلنا بالنصر فهو كدة اشترك معانا


ماتقلليش من مجهودك يا طمطومة
واوعى فى يوم تحسي انك ماشتركتيش فى الثورة دى


الموضوع مش انى هاستخيخ
ولكن الموضوع ان حتى القدرة على الخيخنة مش قادرة عليها

انا مش عارفة اشرح الحالة اللى عندي

بس عشمى انك هتفهمى انا عايزة اقول ايه



وبعدين ارجوكم
ارجوكم ارجوكم
صدقوا انى خيخة
لان ثقتم الغالية فيا دى
وثقتكم على قدرتى فى تخطى الالام
بتحملنى فوق طاقتى
وبتحملنى مسؤلية كبيرة
وانا يا جماعة خيخة
والله العظيم خيخة

قد اظهر قوية فى لحظات
وده اللي بيخليكم تنخدعوا فيا
وتفتكروا انى ادها وادود

لكن والله انا خيخة
و وقت ما يتملك منى الضعف
بكون اضعف من الضعف نفسه

والضعف مش معناه الوهن بس
الضعف متمثل فى حاجات كتير اوى
زي الجبن والخوف والقلق والكذب وعدم الثقة فى النفس او فى الاخرين
وقلة الايمان بالله او قلة الايمان بمبدأ بتحاربي علشانه
او قلة الايمان بانسان بتحبيه


فهمانى يا فاتيما ... مش كدة ؟




بوسس لشريف و وصلت

حضونات ليا
دى هاستنى لما اشوفك واخدها منك مباشرة

شكرا يا طمطومة

نور الدين said...

هقولك حاجة ببساطة وواثق انك هتفهمى قصدى :
جربتى رجلك تنمل قبل كدة ؟
منملة يعنى متخدرة .. صح ؟
اثناء التخدير مش حاسةوكمان مش بتمشى .

جربى بقى تحركى رجلك بعنف وقت التنميل
اعتقد هتكون مؤلمة جدا
لكن كمان اعتقد انك هتقدرى تمشى بعدها وتجرى
...
تحياتى لك نوران

بت خيخة وأي كلام said...

نور الدين

وش واحدة مبتسمة علشان فاهمة انت تقصد إيه

شكرا ليك يا نور

! أم مصرية said...

أنا طبعا مش من أهل الحكمة ، بس أكثر ما يؤلم فى الحرية هو اكتشافك انه لا توجد حرية مطلقة ، و ان المعضلة الكبرى هى كيف تستخدمين هذه الحرية دون أن تتعارض مع حرية الآخرين

بت خيخة وأي كلام said...

ام مصرية

أوبااااااااااا

طب ليه كدة يا مصرية ؟

ما كنتي تسيبينا نعتقد ان فيه حرية مطلقة ولا يمنعها شيء

كلامك صح فعلا

ومع القليل من التفكير
هنلاقى فعلا ان مافيش حرية مطلقة ودائمة
لاننا لو حاولنا نمارس مطلق حريتنا
هانبقى انانيين جداااا
لاننا غصب عننا هنلاقينا بنجور على حق الاخرين

فبالتالي
الحرية دائما لها اسوار تمنعها من التحليق بعيدا

بس ليه تفوقينا كدة
ماكنتى تخلينا نايمين فى العسل شوية

مش كفاية انها مؤلمة.... كمان هاتبقى مش مطلقة


تحياتي ليكي

bushhab said...

الحرية كالعطر ... رائحتها زكية وطعمها مر

واحد من الناس said...

وان كنت مش من اهل الحكمة بس اشمعنى انا يعني اللي مش حفتي
كل حاجة في الدنيا ليها تمن وكل ما غلت قيمة الشيء كل ما غلا تمنه , بس احنا مبنحسش بغلا التمن الا اذا حسينا انه ميستهلش التمن ده
********************
بالنسبة للبوستات اللي فاتت واتشالت
مفيش نصايح فيه الام اكبر من قدرتنا على تحملها ودي اذا مقدرناش ننساها بسرعة بتسيب ندوب مبترحش واحسن وسيلة علششان ننساها ان احنا نعيش في وسط الزحمة ومش اي زحمة لازم الناس اللي في الزحمة دي تكون بتعزك وبتحبك وعارفة انتي مين اكيد ليك صحبات خليكي في وسطهم على طول خليكي في وسط الناس اللي بتحسسك بالامان من غير شفقة وبالحب من غير احسان
والطريقة التانية ان اللي اذانا يدفع تمن اذيته قدامنا و ده بيذهب غيظ القلب والضيق من الحياة , بالنسبة لمواقف معينة ممكن مجرد القدرة على الانتقام بتشعرك بالارتياح حتى في عدم حدوث الانتقام لان القدرة في حد ذاتها بتخلينا مش مضايقين

بت خيخة وأي كلام said...

bushhab

اتفق معك

شكرا ليك








واحد من الناس

بص يا إسلام
انا كنت كتبالك رد طويل جدا
وفيه فقرات منه كتبتها وانا مقهورة من العياط

وبعد كدة قريته على بعضه
فقررت انى مانشرهوش لأسباب كثيرة

وبستأذنك انك تتغاضى على عدم ردى عليك
وترفع عنى حرج ذكر الاسباب

شكرا ليك

واحد من الناس said...

حقك ,
العياط حاجة جميلة وبيريح الناس وعلى فكرة فيه ناس محرومة من النعمة دي ,نعمة انها تقدر تبكي

بت خيخة وأي كلام said...

واحد من الناس

الحمد لله اني اتمتع بنعمة القدرة على البكاء
وإلا كنت انفجرت من ألم كتمان البكاء

شكرا ليك يا إسلام

just sarah said...

يمكن هاقول حاجة ملهاش علاقة بالسؤال بعيد عن السياسة وإحساس الحرية والفخر والخوف النهاردة لقيت على كل محطة ترام إسكندرية شباب بينضفوا وبيبضوا المحطات والمنظر ده وهو واقعى بختلف 100 مرة عن أى حد ممكن يشوفه عالتلفزيون المشهد ده بعيد عن أى شىء كفيل انه يخلى الواحد فى حالة غريبة من الأمل أنا بس حبيت انقلهولك

انيس شريم said...

السلام عليكم
لا ادعي اني من اهل الحكمة ,ولكن لمعرفتي بسعة صدرك وقرائك تجرأت ان ادلي بدلوي في هذا الموضوع.
حين تكون الحرية ضياع تكون مؤلمة,هل عرفت يوما شعور الزرع السائب في الماء؟ويحن إلى اي تراب؟نحن نحن ونشتهي ما ا تطيقه ايدينا,دون التفكير اذا كان امتلاك ذلك سيسعدنا ام يشقيناوتحن الكراة للحرية من اغلالزوجها والمجتمع,فتجد ان(بعض قيودها) قيودهاكانت اساورا في ايديها,صحيح ان بعض ما يسوقه المجتمع كأساور للمرأة هو من ابشع اشكال الاستعباد,ولكن المسالة نسبية في كلا الاتجاهين.

users online