Thursday, April 28, 2011

عـــن الـــنـــقـــاب أحـــدثـــكـــم


النقاب فضل

النقاب فرض

النقاب بدعة

النقاب ستر

النقاب حلو

النقاب يع

النقاب دح

النقاب كخ


النقاب ... النقاب ... النقاب ... النقاب .. النقاب


وكأن لا يوجد ما يشغلنا سوى النقاب والمنقبات

وكأننا نعاني من إفلاس فى القضايا الهامة

وانعدمت المشاكل

ولم يتبقى سوى النقاب كى نحاربه

ونحارب من ترتديه

وكأنها ترتكب مفسدة بنقابها


وقبل ان استرسل في كلامي

اسمحوا لى ان اوضح وجهة نظري


مبدئيا انا غير منقبة

ولا أميل لإرتداء النقاب

رغم تفكيري في إرتدائه في بعض الأحيان


وتفكيري فى إرتداء النقاب

ليس بسبب تدين شديد _ للأسف _

ولكنه مجرد رغبة مني في تجربة شعور

ان أكون مخفية عن الأنظار ولا يعرفني أحد


ومن وجهة نظري

وحسب ما أعرف _ حتى الأن _

ان النقاب ليس بفرض

وانا أرتاح أكثر في ان اتعامل مع النساء المكشوفات الوجه

فأنا كإنسانة احب ان ارى

تعابير وجه من يحادثني او من يتعامل معي


ولكن .... برغم وجهة نظري وقناعاتي الشخصية

ورغم إني بضايق جداااااااا

من اولياء الامور

اللي بيفرضوا على بناتهم الصغيرين إرتداء الحجاب


إلا إني أشعر بغيظ وحنق شديدين

كلما رأيت أو سمعت أو قرأت

علماء او مشايخ او _ أى حد _

يهاجمون النقاب والمنقبات


واحد يطلعلي زى البتاعة كدة ويقولي

ما ليهم حق يحاربوه

اصله مش فرض


اقوم انا هنا بقى تخرج منى لفظة اعتراض عفوية

واقوله يا سلااااااااااااااااااام

بقى علشان النقاب مش فرض يقوموا يحاربوه

طب ما الاولى بدل ما يوجهوا طاقتهم فى محاربة النقاب

ما يحاربوا الناس اللى بيتركوا الفروض التي ليس عليها خلاف


يعنى مثلا ً الصلاة فرض

وكتير بنشوف وقت الصلاة شبابنا قاعد على القهاوى

ومحدش فيهم فكر يسيب مكانه ويروح يصلي ما فرضه الله

ومع ذلك لم ارى اى بني ادم هاجم الشباب اللي مابيصليش


نقوم علشان ما هو النقاب مش فرض

_ ودى حاجة عليها خلاف _

نحاربه؟

ده إيه المنطق العجيب ده؟


طب هو إحنا ليه مش بنحارب البنات اللي بتلبس مايوهات؟

مش بنحارب ليه من بلغت ولم ترتدى الحجاب حتى الان ؟

ماهو الحجاب فرض على المرأة المسلمة من وقت بلوغها المحيض

ليه بقى مش بنحارب البنات اللى ماتحجبوش لحد دلوقتى؟

ليه بنتشطر على البنت اللى بتستر نفسها بزيادة

ليه بنقف عند البنت الغير محجبة

او المحجبة وترتدى لبس غير لائق بالحجاب

وبنقول دى حرية شخصية

وماينفعش نتدخل فى علاقتها بربنا

وهى حرة

تلبس حجاب

تلبس مايوه

تلبس من غير هدوم

هى حرة

وليه عند المنقبة

بنقول لأ مش حرة

ولازم تكشف وشها


بقى بدل ما ندعيلها

ان ربنا يعينها على اختيارها ونقولها برافو ... نحاربها ؟


ماهو لو عايزين نحارب

ما الاولى نحارب من يترك الفروض الاساسية

والمعروفة والتى ليس عليها اى جدال


يعنى الصلاة فرض ومافيش جدال على كدة

الحجاب فرض ومافيش جدال على كدة

وحتى المسلمات الغير محجبات

عارفين من جواهم ان الحجاب فرض برغم عدم ارتدائهم إياه

يبقى الاولى بقى اننا نحارب تارك الفروض

مش نتشطر على اللي بتعمل الأحوط


يعنى لو النقاب عليه خلاف إذا كان فرض ولا فضل

و واحدة عملت الأحوط وارتدت النقاب ... ما ينفعش نحاربها

نحاربها علشسان بتستر نفسها ؟

!!!!!!!!!!!!!!!!!!!!!

واللي بتلبس من غير هدوم

وبتاخد ذنب وبتخلي اللى بشوفها ياخد ذنب معاها

مانحاربهاش ونقول دى حرية شخصية ؟

ده إيه الهم ده ياربي؟

!!!!!!!!!!!!!!!!!


ياريت على اهل العلم والمشايخ والفقهاء

وكل اللى قادر انه يحارب النقاب

ياريت مايبقاش فيه خيار وفاقوس


ولو هاتمشوها حرية شخصية

يبقى المنقبة تاخد حريتها وتلبس نقابها

من غير ما حد يتعرضلها بأذى

ومن غير ما حد يهاجم نقابها

زيها زى اللى بتلبس مايوه بالظبط


ولو هانمشيها دينيا ... و اصل النقاب مش فرض

يبقى خلاص الاولى برضه انكم زى ما بتحاربوا النقاب

تحاربوا كمان اللى بتترك فرض

واللي مش لابسة حجابها من وقت ما بلغت

او المحجبة التى ترتدى ما لايليق مع الحجاب


ولو اللي بيحاربوا النقاب بيحاربوه

وبيتحججوا من الناحية الأمنية

ممكن جدا فى اى مكان

زي النادى او الجامعة او المطار

او اى مكان فيه امن ومحتاجين يتأكدوا من هوية المنقبة

يبقى فيه موظفة هى اللى تتعامل مع المنقبات


وفى امتحانات الجامعة

لو خايفين من حالات حدوث غش من وراء النقاب

ممكن جدا يعملوا لجنة خاصة للمنقبات

واللى يراقب عليهم سيدات مسلمات


انا خلصت كلامى

وبرضه بأكد

انا لا ادافع عن النقاب والمنقبات

ولا احارب الغير محجبات

انا هنا بدافع عن حرية شخصية


وزي ما بشوف واحدة مش لابسة لبس يسترها

وبقول عليها هى حرة


يبقى برضه المنقبة ليها عليا حق

انى أؤمن بحريتها فى اختيارها للنقاب ولستر نفسها

وبرضه هى حرة


اصل ماينفعش نقول على اللى ما بتسترش نفسها هى حرة

ونيجى عند اللى بتستر نفسها_ أوى_ ونحاربها

مش كدة ولا إييييييييه؟


*****

اخر الكلام

اتركوهن يسترن انفسهن ..... يرحمكم الله

__________


إنتهى

46 comments:

ابراهيم رزق said...

فوق تحت ورا يمين شمال
فى الجو تحت المية او فى الرمال
طلب الكمال يحرم على الممكن
و الممكنات دول محرومين من الكمال
عجبى ؟؟؟

يا عينى عليك يا عم جاهين طلب الكمال يحرم على الممكن

دخلتينى فى منطقة مبحبش اتكلم فيها لكن اعمل ايه

الحرية الشخصية لاى فرد مقدسة بشرط الا تتعارض مع مصالح و حرية الاخرين

البسى ما تريدين لكن لو اللبس خليع يبقى جريمة فعل فاضح طالما فى الشارع الاماكن المغلقة حرة ترتدى ما تريد

ناتى للطرف الثانى مع اعتراضى على النقاب و ليه فى الغالب اسود كئيب مش عارف الحكمة الدينية من اللون الاسود لكن عارف الحكمة التاريخية لدرجة ابنى و هو صغير كان بيخاف من المنقبات
هم حرين فيما يرتدوا ترتدى لبس يصل الى الارض و تجمع مخلفات الشارع خلفها هى حرة

لكنها ليست حرة ان تقود سيارتها و هى منقبة و قد تعرض حياة الاخرين للخطر
ليست حرة ان تدرس لابنى فى المدرسة وهى منقبة و تفقده اهم صفة فى التعليم التواصل
ليست حرة فى ان تكشف على و هى منقبة و تفقدنى ايضا التواصل
ليست حرة فى ان تفرض امن معين او لجنة خاصة لسيادتها لانها منقبة بينما الاخرين يؤدون الامتحانات فى لجان عادية
اتنقب و اوقر فى بيوتى اما لو خرجت الى المجتمع فتخرج بشروط المكان و لاتفرض عليه شروطه
مثال صديقة لى ليست محجبة عرض عليها العمل فى اوتيل بمبلغ كبير و نجحت فى جميع الاختبارات و عندما تسلمت العمل رفضت استلام العمل لان الينوفورم لم يناسبها فتركت العمل بهدوء لم تدعى الظلم و تطلب التعديل
هذا هو المطلوب
الكمال لله وحده
خالص تحياتى و سلامى لشريف
على فكرة الشاى بالفانليا برد

ENG./ELSAYED,PMP said...

الموضوع رائع ... ويفند ادعاءات مدعى الحرية ... وطرق التفكير الملتوية وبطريقة سلسة بسيطة منطقية ...تحياتى

فاتيما said...

دا للنشر بقى

:)

انا متفقة معاكى الف ف المية يا خوخة

الحرية لا تتجزأ
و بالتالى
يا تُطبق على الجميع وإلا فلا ...


كنت عازية اعلق ع البوست اللى فات
بس جالى حالة خرس
خرس عاطفى يمكن اكتر

بس كنت مبسوطة
وكنت متوقعة كدا
انتى الشخص دا يا خوخة
انتى الست دى بالمللى يا حبيبتى

بوسيلى شريف ..واميرتك كمان

Days and Nights said...

الأخت الغاليه / نوران

أتكلمتى عن النقاب من وجهة النظر الدينيه... والحمد لله متفقين على إنه مش فرض

وأتكلمتى على النقاب من ناحية الحريات وسألتى سؤال عن الذين لا يتبعون فرض الله وأنا معاكى فى كل اللى قلتيه بس أنا مش ح أكفر الناس عشان مبتصلين مثلا ، أمرهم يرجع إلى الله وعشان كده ربنا خلق الجنه والنار .

النقاب عادة قبليه وأنا من المعارضين له ... يعنى مش عشان بنشوف البدو بيعملوا كده نقلدهم

وبعدين فيها أيه يعنى لما المرأة تكشف عن وجهها فقط ... أيه المشكله فى كده ؟؟؟ أحنا ح نآكلها مثلا!!!! أنا مستغرب جدا

وبصراحة كده أنا حاسس إنها بتسلبنى جزء من حريتى فى معرفة الشخص الذى أتحدث معه ودا من حقى طالما هناك مجال للتعامل ... طالما بتطلع الشارع وبتتعامل مع البشر يبقى تتعامل زى الناس ما بيعاملوها

كم من الفواحش بترتكب فى ظل النقاب عشان مخفيه عن الآخرين وحاسه إن مفيش حد شايفها وطبعا كلامى عن المرأه وليس الرجل المتخفى فى النقاب ودى قصه تانيه

حاسة أنك فوق البشر وعاوزه تتنقبى ومتخليش حد يشوفك أبقى أتنقبى فى بيتك... عاوزه تتعاملى مع الناس يبقى زى ما بتشوفيهم لازم يشوفوا مين اللى بيتعاملوامعاه ودى برضه حريه

عارفه المتنقبات أيام الجاهليه كانوا مين؟؟؟؟

حاولى ترجعى لكتب التاريخ وأنتى ح تعرفى كلامى

على العموم أشكرك على الطرح وإختلاف الرأى لا يفسد للود قضيه ودمتى سعيده

تامر

الحــب الجميـــل said...

أحسنتى الكلام يا نورا

مدونة رحلة حياه said...

السلام عليكم
مع ما ذكرتى لا استطيع سوى ان اوافقك
نالرأى فليتنا قبل أن نتحدث عن الحرية نتعلم ان نحترم حرية غيرنا كمل لا نسمح له فى التدخل فى شأننا
اتركوهن يستترن يرحمكم الله

مصطفى أبوزيد said...

أتفق مع حضرتك جدا

الحجج الامنيه حجج واهيه و ممكن يلاقولها حل بمنتهى السهوله

مفيش كلام اقوله بعد اللي قولتيه

تحياتي

Shaimaa said...

طب مين قالك ان اللى لابسة حجاب عادى محدش بينتقدها؟ ... مين اللى قالك ان المنقبة بس هيه اللى بتنتقد؟
بالعكس ده اللى لابسسة حجاب عادى هيه اللى بتتسلخ كل يوم

طب أنا عندى سؤال تانى
هوه ليه احنا بنختزل ديننا فى اللبس وبس؟ سواء نقاب أو حجاب عادى أو حتى واحدة بشعرها مش محجبة خالص
مين اللى قال ان اللى مش محجبة فاسقة ولازم نرجمها بالطوب
ومين اللى قال ان المنقبة أو المحجبة طاهرة الشريفة ؟؟؟؟؟!!!!

ديننا سلوك ...مش لبس وبس ياما منقبات عايزين ضرب الجزمة
وياما رجال بلحية وعلامة صلاة هتخرم جباهم وهما شوية كلاب ميعرفوش ربنا

أقولك على حاجة كمان ...شيخ وامام الجامع اللى فى الشارع اللى ورا بيتنا مراته انفصلت عنه عشان طول الليل قاعد أدام المواقع الاباحية "الجنس"- على فكرة مراته دى صاحبتى يعنى مش بنفترى عليه ولا حاجة

أكبر حرامى على مستوى الشركة اللى بشتغل فيها "ملتحى" وقال تعالى وقالى الرسول

الدين سلوك
الحب سلوك
الصدق سلوك
الأمانة سلوك
حتى الكفر سلوك
مش كلام ولبس ومظاهر وبس

وبالمناسبة الناس اللى حاطة صورة واحدة محجبة ولزقاها فى كل مكان فى الشوارع وكاتبين تحتها "الحجاب قبل الحساب" عايزين ضرب النار ..عارفة ليه ..عشان هما كدة بيصادروا على حق ربنا فى "المغفرة" مين اللى قالك ان ربنا هيحاسبها وهتخش النار ... ما تسيب ربنا يدخلها الجنة أو النار زى ما هوه عايز انت مالك ... ومين اللى قال ان عمل سيادتك هيدخلك الجنة

تقبلى مرورى

ماجد القاضي said...

السلام عليكم

تأييد.. تأييد.. تأييد..

أحييكِ أختي الكريمة على أسلوبك الموضوعي في العرض (الحجة بالحجة)..

بالمناسبة جزء كبير مما قلتيه قلتُه في تعليقي على آخر بوست لأختنا مجداوية..

عاوزين حرية (ليبرالية) يبقى على الكل!!!!!!

.............
اسمخي لي بملحوظة رفيعة: أعتقد أن الصورة لا تعبر عن وجهة نظرك؛ فهي توحي بأنك ترين النقاب حبسا لحرية صاحبتها.. فماذا لو تم استبدالها بصورة منقبة عادية (بدون قضبان يعني)؟! (مجرد رأي).

تحياتي أختي الكريمة.

صفا سارة said...

بصى يا خيخة انا واحده من اللى معترضين على النقاب نفسه مش البنى آدمة المنقبة هى حرة تعمل اللى هى عايزاه
انما النقاب فى حد ذاته وكذا حادثة حصلت بيه فى المنطقة الصغيرة اللى انا عايشة فيها ولا حد عرف مين عملها بسبب ان اللى عملها لابس نقاب محدش عرف يدى اوصاف

الرد المعتاد اللى بيتقال طيب محتى لبس البوليس بيعمل بيه جرايم هنقول نمنع لبس البوليس
الفرق بين الحالتين انك هتكونى شايفة وش اللى قدامك هيكون فى فرصة انه يتمسك
دى الاسباب اللى انا مقتنعة بيها جدا عشان كده انا فعلا واحدة من الناس اللى ضد النقاب او اخفاء الهوية باى شكل من الاشكال ومش ضد الست المنقبة نفسها

تقبلى مرورى :)

!! a7mad sala7 !! said...

كنت هزعل لو كان رأيك غير كده :D

*الطالبة عفو الله *زوزو said...

كلام منطقي الف بالمية يسلم عقلك يا خيخة ربنا يهدينا و اياهم

Abu ShoSho said...

الحمد لله
الحمد لله على السلامة
شكرا شكرا بجد

د/دودى said...

اول زيارتى لمدونتك ...الاول خلينى ابدى اعجابى بالتصميم و الجو العام و الانطباع الاول و اعلمك انى مااظنش انها هتكون زيارتى الاخيره

خلينى برضه اعبرلك عن شجاعتك فى فتح موضوع خطر الناس بتخاف تخش فيه لانه حقل الغام فكرى

هو صحيح النقاب مش فرض و صحيح هو مشكله امنيه لكنى دائما موقفى الشخصى من المتقبات انهم بيصعبوا عليا جدا بحسهم محبوسين فى الزى ده خاصه من اصدقائى ..بفكر ازاى تقدر تبقى دكتوره و هى مش عارفه تلمس العيان حتى او العيان يستريح ازاى و هو مش شايف تعابير وش دكتوره ..هى وجهه نظر محدوده طبعا لكن ده اللى بلمسه

صحيح مش هاحاربه لكن ما اظنش هنصح بيه حد غيرى

تحياتى و عذرا للاطاله

فراشة said...

ياه لا بجد بجد أحييكي وأرفعلك القبعة كمان

كنت لسه بتناقش مناقشه عقيمة مع شويه ناس غريبه الاطوار بتتريق على اللي لابسين نقاب مستغربين جدا نها بتتصور جنب البحر بالنقاب :(

مع اني عادي مش منقبه ولا حاجه
بس دافعت عن المنقبات طبعا

انتي قلتي كل اللي ف قلبي بجد

متشكره ليكي جدا
انا بحبك قوي اصلا ونادرا لما بعلق
بس متبعاكي على طول على طول :)

يوميات عيل مصري said...

كلام موزون جدا أحسنتي يا أم شريف

الشاب الفاهم said...

جميلة جدا التدوينة دي .. ربنا يباركلك

الطائر الحزين said...

لا فض فوك

R-H-S said...

انا اول مره اقرا وجهه النظر دي انا مش عارف هي ليه غايبه عننا الفكره دي

تلاقي الناس مقطعه نفسها النقاب مش فرض
و..ووو..
ياجدعان ملكوش دعوه اذا كان فرض ولا لا في حين لو قولت لواحده سايبه شعرها انتي سايبه شعرك ليه هتقول دي حريه شخصيه خلاص يبقي النقاب حريه شخصيه

عجبني اوي كلامك ويارب الناس تسيب النقاب في حالة

بت خيخة وأي كلام said...

ابراهيم رزق


ممممممممممممممم

ايه علاقة حوادث السيارات بالمنقبات؟

انا بشوف رجالة _ غير منتقبين _ وبيعملوا حوادث بعربيتهم

يعنى المنقبة اللى بتعمل حادثة بعربيتها زيها زي الراجل اللى بيعمل حادثة بعربيته


و ماينفعش نقول ان النقاب هو السبب فى الحوادث

ثانيا
اللون الاسود شيك جدااااااا
لكن انا معاك ان فى بعض الاحيان بيكون فيه اسود كئيب وانا ارجع ذلك لنوع القماش المستخدم فى التفصيل

ودى حاجة ترجع للحالة المادية لكل منقبة
لو منقبة متيسرة الحال هتلاقي لبسها فى منتهى الشياكة

ورغم ان اغلب المنقبات بيلبسوا العباءات السوداء
لكن سبحان الله فعلا بتختلف من واحدة لتانية ومن موديل للتانى
وتلاقى عباية شيك جدا
وعباية مش شيك خالص
فبالتالى مقدرش اعمم واقول ان لبس المنقبات كئيب
لان فيه ناس مش منقبات وبيعشقوا اللون الاسود وبيلبسوه دايما

واساسا هو انت عايز المنقبة تلبس الوان فاتحة ليه ؟

ماهو طبيعي انها تلبس اسود لان هدفها عدم لفت النظر ليها
ومش من حق اى راجل انه يستمتع باى شكل من اشكال الاستمتاع بأي إمرأة لا تحل له
مش كدة ولا إيييييييييييييه؟


ثالثا
وانت تروح عند دكتورة منقبة ليه؟
من قلة الدكاترة الرجالة يعنى؟
لو انت بتعانى ان طبيبتك منقبة
الحل انك تروح لدكتور راجل او دكتورة تانية غير منقبة
لكن مش الحل ان المنقبة تتنازل عن نقابها علشان خاطر مريض مضايق من النقاب
احنا كدة برضه بنحجر على حريتها ومعتقداتها


رابعا
لأ ... سيادتها مش عايزة لجنة خاصة بيها فى ايام الامتحانات

بالعكس بقى سيادتها عايزة تتعامل عادى زي باقى البشر
وبلاش يعملوها على اساس انها جربة

انا بقول على حكاية اللجان الخاصة دى
للناس اللى بيتحججوا بالدواعى الامنية
وبيتحججوا ان ممكن تحصل عمليات غش فالحل عندهم ان المنقبة ترفع نقابها

و طبعا مش الحل ان المنقبة ترفع نقابها
الحل ممكن يكون بأن موظفة تفتش الطالبة المنقبة قبل دخولها لجنة الامتحان
او انهم يعملوا لجنة خاصة للمنقبات

لكن اذا كان على المنقبة فهى من جواها بتضايق لما تحس ان نقابها مسببلها مشكلة
واكيد بيصعب عليها نفسها لما تلاقى ان اللى ما سمعتش كلام ربنا ولبست الحجاب
بتتعامل معاملة اسهل وفيها من السلاسة اكتر من المعاملة اللى بتتعاملها هى كمنقبة


انا مكونتش ناوية ادافع عن النقاب
بس تعليقك يا ابراهيم خدنى غصب عني للحتة دى
وانا مكونتش عايزة كدة
لان الهدف من البوست ليس دفاع عن النقاب او محاربة من لا يرتدونه

ولكن البوست دفاع عن الحرية الشخصية للمنقبة


شكرا ليك

بت خيخة وأي كلام said...

شيماء

اولا انا ما بتكلمش فى البوست ده عن سلوك الناس

ثانيا
كلامك فيه تعميم بشكل خفي
ان الملتزمين فى لبسهم هما دول السيئين السلوك

وان الغير ملتزمين فى مظهرهم هما دول اللى جوهرهم فلة شمعة منورة

وده مش صحيح

السلوكيات ملهاش علاقة باللبس

وانا اساسا مستغربة تعصبك ضد الملتزمين فى مظهرهم


شكرا ليكى

بت خيخة وأي كلام said...

ماجد القاضي

انا وجهة نظرى فى الصورة يا استاذ ماجد

ان الاخرين _ اللى بيحاربوا النقاب _ هما اللى بيحاولوا يسجنوا المنقبة بسبب نقابها

شكرا لحضرتك

بت خيخة وأي كلام said...

days and nights

الاخ تامر

إذا قرأت ردى على ابراهيم رزق
وشيماء
ستعرف ردى عليك

شكرا ليك

بت خيخة وأي كلام said...

عدم ردى على باقي التعليقات
بسبب اتفاقى معها او اتفاقهم معي

ولا تحتاج الى توضيح وجهة نظرى اكثر مما كتبت

شكرا ليكم كلكم على تواصلكم معي

ويكا said...

بغض النظر عن استغرابى الشديد على الاخوه اللى بيستغربوا من ازاى الست تتنقب واننا نتحرم من رأية وجهها وشكلها ورسمها
وكأن الست دى مخلوق علشان نتفرج عليها فى الشارع

انا بصراحه معصبنى اوى اوى اوى اوى اوى
تعليق الاخت شيماء ده

الست المحترمه صاحبتها اللى جوزها الشيخ ليل نهار بيتفرج على مواقع اباحيه دى ، ما مفتشى جوزها ليه ؟ ويا ستى جوزها راجل واطى ومش هيقتنع مراته مهما عملتله ، المفروض بقى الهانم المحترمه اللى اتطلقت منه دى مش من باب اولى تستره وما تفضحوش ؟؟
ولا عادى بقى تفضح مسلم وجرسه وتحكى لاصحابها الستات عنه؟؟؟

انا شايف انك تنصحى صاحبتك بدل ما تقول انها هى اللى طلبت الطلاق منه علشان بيتفرج على مواقع اباحيه ، تتقى الله وحرام عليها تقول على حد كده حتى ولو بيعمل كده فعلا ، والافضل انها تقولك ليه هو طلقها مادام انتى صاحبتها بقى وما تخحقفظشى ماء وجهها عن طريق زمه واتهامه بتهمه زى دى

اما الراجل الملتحى الحرامى ده ، بما انك عارفه انه حرامى وما بلغتيش عنه ليه ؟؟؟

وبعدين مين قال ان الملتحى ده نبى ؟ ومين قال ان اللحيه موجبه للدخول للجنه اصلا ، لكنها فرض واللى يقول غير كده هو اللى عايز يقرأ تانى كويس

اما النقاب فرض ام فضل فده اختلف فيه العلماء

اما بقى ان المنقبات والملتحين كلهم ولاد ستين فى تلاتين فأنا بصراحه شايف ان ده كلام ضيق الافق ، وبصراحه ما كنتش عايز ارد على اللى قاله اصلا الا انى فعلا مستفذ جدا جدا ان فيه حد بيفكر بالحجر والتشدد والتعصب ده لسه فعلاً

حقيقى قمة التعصب والتشدد للرأى

هنتكلم عن حريه يبقى حريه خلاص

هنتكلم عن حكم شرعى يبقى نجيب اراء العلماء وماحدش يقعد ينصبلى نفسه ربنا
وان دول هيدخلوا الجنه ودول هيدخلوا النار


الاخت خيخه

انا اسف على عنف الرد الا انى بصراحه
ووالله وتالله وبالله
اتخنقت واتعصبت وركبنى مليون عفريت من الكلام
واسلوب الحجر على حريات الناس ، اللى بتسعى للتقرب من الله للاسف مش العريانين ولا للى بيشربوا مخدرات

انا اتخنق حقيقى

لكن عموما تحياتى الحاره على البوست وحكمته واسأل الله العظيم رب العرش العظيم ان يجعله فى ميزان حسناتك وان يكون عده وقربه الى الله فيكون سبباً وموجباً لتوفيق الله لكى بعد قبولك لديه ان شاء الله

ويكا said...

خيخه
انا اسف على تنازلى عن دبلوماسية الحوار الا انى

للمره المليون لسه متغاظ بصراحه

ابراهيم رزق said...

نوران

و انا مع الحرية الشخصية للمنقبة لكن الى حدود لا تتعارض مع حرية الاخرين

الحوادث فى رجالة لكن الرجل ملامحمه معروفة يمكن لو ماشى مخالف هيقله الرخص هيطلع الرخصة لكن المنقبة اقترح فى كل لجنة او بجوار كل شرطى تبقى موجودة موظفة

لا علاقة بالاسود بالشياكة او بغيرها بالعكس اللون الاسود ساعات بيلفت النظر لكن لان هم اخذوا العادة بدون التفكير فى اصل اللبس ده منين و هو طبعا الزى الشعبى انا بقول الشعبى و ليس الدينى فى السعودية و ايران

هى متتطوعة يعنى تستحمل لان ربنا لم يقل النقاب هى تريد ان تزيد درجة يعنى لا تفرض شروطها على الغير يعنى ايه اجيب لها موظفة مخصوص ليه هى تريد النقاب تتحمل تبعات النقاب النسية و التنظمية عندما ادخل مكان اقول اجيب موظفة افرض مفيش موظفة واحدة فى البنك فرع صغير فى مسطرد لا يوجد به موظفات طلب الموظف و ده من حقه ان يرى وجهها خرجت فى وجهه كالمدفع
موضوع الدكتورة المنقبة حدث معى و لم اختارها فرضت على فمن غير المعقول ان اقول لها اخلعى النقاب
لم يعجبنى لفظ الاستمتاع و اعتقد خانك التوفيق فيه لان من غير الطبيعى على المراة بمجرد ان يظهر وجهها ان تصبح لاستمتاع الرجل زى ما قلت ليكى طلب الكمال يحرم على الممكن
تحياتى و الشاى بالفانليا فى انتظارك

I.G.B said...

متفق مع كلامك !فقط أحببت ان القي التحية .. سلام

krkor said...

انقاب محارب بسبب شكله الغير مستساغ

شنو يعني انسان يتغطى من فوق لي تحت يوطلع بالشارع وهو مخفي ؟؟

الثاقفه السائده لمن خفي وجه هي اما ان يكون من الجن او من اللصوص

MǿиY El-Shreef said...

معاكس مليون ف الميه وعجبني ردك هنا كمان ورد الاستاذ ويكا جدااا لان انا حسيت باستفزاز غير طبيعي بالذات من رد شيماء !!!!!! بس استاذ ويكا قال كل اللي جوايا صراحه

مع اختلافي ف شئ واحد هي ان اللحية سنة مؤكده ومش حوارنا حاليا يعني

بجد يا خيخه حبيت البوست وفكرة ان كل واحد حررررر :)
دتسلمي

7dmo3yen said...

مممممم مع انه يعني موضوع شائك حبتين بس نقول برده
عيب الموضوعات دي انها تجذب عدد من الاراء مش شبه بعض خالص وعجبي
يعني تلاقي حد من هناك خالص يسقف وهيييه وحركات وده حسب الموضوع يا اما متشدد شديد يعني ياما من شباب بيس يا معلم
بالنوسبة لرايي المتواضع عايز تيوز اي موضوع عمم وهو هيبوز لوحده
طب والحل .... الحل ان كل واحد يتصرف زي ما هو عاوز بس بشرط اللي هو مالوش اي علاقة بالتاني مع ملاحظة بلاش نظرة الشفقة من المتديين ظاهريا او مظهرهم يعني يدل علي كده علي الزنادقة خوفا عليهم من اللسوعه في جنهم قولوا ان شاء الله
ولا التريقة علي الجانب الكول
ساعتها بس هتحصل الفلترة
لما نبطل نحكم من الغلاف

بت خيخة وأي كلام said...

ابراهيم رزق


اكيد المنقبة بتبقى عارفة انها ممكن تتعرض لاى موقف يتطلب منها انها تبرز اى حاجة تثبت شخصيتها

فبالتالى هى اكيد نفسيا مهيئة لو حد قالها الرخص مش هتمانع ومش هاترفض لانها عارفة ان ده قانون وعليها ان تلتزم به


ايا كان اللون الاسود بيلفت ولا مش بيلفت
بس اكيد فى بلدنا هنا اللى هايلفت نظرنا اكتر اننا نلاقي منقبة لابسة ابيض مثلا او او لون تانى

وده اللى بيحصل فعلا
انا لسة من كام يوم شايفة منقبة لابسة بنطلون وتونيك طويل وهدومها كانت من درجات البنى والبيج
وهى دى اللى لفتت نظرى

فبالتالى اللون الاسود فى عباءات المنقبات لا يلفت النظر بنفس الدرجة لو المنقبة تخلت عنه ولبست لون تانى

فبالتالى الاحوط ليها انها تلبس الاسود


مش كلهن متطوعات
فيهن مقتنعات ان النقاب فرض
فبالتالى فى قناعاتهن الشخصية هما شايفين ان ربنا امرهم بيه
ولازم يلتزموا بيه

واحنا عمرنا ماهانعرف نية كل منقبة
هل هى لابساه فرض ولا لابساه تطوع ولا لابساه اخفاء هوية ولا لابساه ايه بالظبط

فبالتالى ليس علينا الا ان نحترم اختيارهن


المنقبة عمرها مافرضت شروطها فى اى مكان

بس طبيعى ان البلاد المحترمة لما تلاقى ان فى نسبة زادت من طائفة معينة
المفروض انهم يعملوا حساب ليهم

لو امريكا زاد فيها عدد المسلمين
تفتكر مثلا الحكومة مش هاتزود عدد المساجد فى البلد؟

اكيد هايزودوا عدد المساجد علشان تستوعب نسبة المسلمين


فلو النقاب منتشر اوى كدة

البلد هاتخسر ايه لما تعين موظفات فى الاماكن العامة لتفتيش والتأكد من هوية المنقبة؟


احنا نفسنا جدا ان بلدنا تعمل حساب ان فيه معاقين بيعانوا من صعوبة فى التحرك بسبب ان البلد نفسها مش مجهزة ليهم
على عكس برة
تلاقي في الشوارع والارصفة والمبانى والسلالم و وسائل المواصلات بيبقوا عاملين حسابهم ان ممكن معاق قاعد على كرسي بعجل يروح اى مشوار فبالتالى مسهلين عليه حياته

فما بالك بالمنقبة عندنا اللى هى ليست معاقة
ولكن الاعلام بيحاول يخلق من نقابها اعاقة

ايه المشكلة لما نيسر على المنقبة حياتها
ايه المشكلة لما نعين موظفات

ماهو تعيين الموظفات ده فيه فتح بيوت واكل عيش
وحل ولو جزء بسيط من مشكلة بطالة

موقف المنقبة اللى فى البنك
مش سليم
فبالتالى مانقدرش نعمم ان كل المنقبات بيتصرفوا كدة

وبعدين انا لو من مدير البنك
ومعنديش ولا موظفة ست
كان ممكن جدا اطلب من عميلة اخرى متواجدة فى البنك هى اللى تقوم بمهمة التاكد من هوية المنقبة وهل هى نفسها اللى فى البطاقة ولا مختلفة

يعنى الموضوع كان ممكن يتحل بقليل من الكياسة وحسن التصرف


مش فاهمة يعنى ايه دكتورة فرضت عليك
ولنفترض انها فرضت عليك مرة
وانت اضايقت انها منقبة كان ممكن جدا ماتروحلهاش تانى

بس برضه انا مستغربة من انك اضايقت انها منقبة


لفظ الاستمتاع لغويا صح

ثانيا
ايوة ممكن جدا وجه المراة فقط يخلي الراجل يستمتع

فيه ستات وشهم بيبقى زى القمر
ومجرد انك تبص ليهم بتستمتع بالنظر اليهم

وبعدين اساسا الجمال ده نسبي وبيختلف من واحد للتاني

انت ممكن جدا تشوف واحدة وتحس انها وحشة جدا
وواحد تانى يشوفها يلاقيها امورة جدا

فبالتالى انا من وجهة نظرى ان مافيش ست وحشة

يا بني احنا كلنا زى القمر
نيهاهاهاهاهاهاهاع


شكرا ليك يا ابراهيم

وارجوك ما تعارضش النقاب اوى كدة

لان انا غصب عنى هادافع عنه اوى

وانا مش عايزة كدة

لان انا مش هدفى الدفاع عن النقاب
ولكن انا بدافع عن حرية شخصية للمنقبة



تحياتى ليك

بت خيخة وأي كلام said...

شكرا ليكم كلكم على تواصلكم معايا

أرنوب said...

معاكي حق في كلامك .. لكني أعتقد أن مهاجمة النقاب تتم لأسباب (أمنية) وده عشان مسألة إخفاء الوجه دي مسألة في غاية الخطورة لأن ممكن واحد مجرم مثلاً يتنكر في زي منقبة ويتحرك هنا وهناك بكل حرية .. لهذا أعتقد أن أكثر الأزياء إحتراماً ومابتديش فرصة لحد يهاجمها هو زي المخمره .. مش المحجبة ولا المنقبة .. المخمره لأنها بتلبس واسع ومحترم وفي نفس الوقت بتكشف وشها فلا تشكل خطورة من الناحية الأمنية

Shaimaa said...

على فكرة انتى مفهمتيش حاجة خاااااااااااااااالص من تعليقى

بالتوفيق

مش لازم تنشرى تعليقى ده مش هتفرق

بت خيخة وأي كلام said...

شيماء

طيب ياريت تفهميني

شكرا ليكي

أم هريرة (lolocat) said...

السلام عليكم

تعرفى انت بت مش خيخة

انت بنوتة بألف راجل وراجل
بارك الله فيك ورزقك الرضا منه وثبتك على الحق وزين اخلاقك بالايمان وزرع بقلبك منهاج الحق وشرعه القويم

بووووووووووووووووركت بااجدع بنوته
لك تحيااااااااااااتى
ثبتك ربى بنصر من عنده

Anonymous said...

مبدئيا انا غير منقبة

ولا أميل لإرتداء النقاب

رغم تفكيري في إرتدائه في بعض الأحيان




وتفكيري فى إرتداء النقاب

ليس بسبب تدين شديد _ للأسف _


ولكنه مجرد رغبة مني في تجربة شعور

ان أكون مخفية عن الأنظار ولا يعرفني أحد

النقاب اقدس من انك تتكلمى عنة

شوهتية اكتر

بت خيخة وأي كلام said...

المجهول



اسمها شوهتيه

وليس شوهتية

تكتب بالهاء وليس بالتاء المربوطة

Anonymous said...

لا اله الا الله

جلا من لايسهوا

Anonymous said...

جل من لايسهوا

تانى مرة

لا حول ولا قوة الا بالله

Anonymous said...

معلش ياقمر اصل كنت بحضر الفطار لجوزى وابنى تاعبنى فمش عارفة اكتب

بت خيخة وأي كلام said...

الغير معرفة


اسمها يسهو
وليس يسهوا


تكتب بدون الالف التابعة لواو الجماعة

maf2ou3a said...

عايزانا نقول للمنتقبات مبروك!!!!!
مبروك علي أية ؟؟؟؟؟
علي أعتزالهم الحياة و أختيارهم التنازل طواعية عن حقهم الشرعي في أن يكونوا معرفات؟؟؟؟؟
و لا علي انصياعهم بدون تحكيم عقلهم لترهات مشايخ بيقبضوا دولارات من مصادر هما عارفينها علشان مصر ماتتقدمش
ونفضل نتجادل فالنقاب و لا الحجاب ثم الجدال اللي جاي يبقي عمل المرأة و لا تعليمها و التخلف يزيد أكثر و أكثر
انا معنديش مانع ان اللي عايزة تتنقب هي حرة لكن حريتك تقف عندما تبدأ حرية الاخرين... و أنا من حقي أشوف أنا بكلم مين و لهذا أنا لا أتعامل أبدا مع المنقبات......
كيف أتعامل مع من لا أراة كيف أثق فيما من لا أستطيع تحديد هويتة
لبسها للنقاب تعدي علي حقيفي أن أعرف مع من أتحدث
و بالمناسبة علشان ومحدش يتهمني و يقول دي مسيحية
أنا مسلمة و أشهد أن لا إلة ألا اللة و أن سيدنا محمد رسول اللة نبينا و خاتم المرسلين ...
و أعوذ باللة فيمن أسأوا للدين باسم الدين

❤.● Šąℛą ●.❤ said...

احسنتـــي ...

Anonymous said...

السلام عليكم

الموضوع دا فعلا مهم جدا

انا مش هتكلم عن وجوب النقاب من عدمه لكن هتكلم عن ملاحظات شخصية

بنت , محترمة , ماشية في حالها و لابسة جيبة جينز واسعة سنة (مش زي البنطلون طبعا) و حجاب فضفاض و وشها باين

ابص يمين الاقي سواق عينيه هتطلع عليها
ابص شمال الاقي واحد بيصفر ليها
ابص قدامي الاقي واحد بيعملها فحص شامل من راسها لصوابع رجليها***

ولا بقي لما واحدة بنفس التفاصيل دي و تمشي في الموقف ولا حتة زحمة , ابقوا ركزو كدا في عيون الناس و وشوشهم و هتعرفو قصدي

انا مش عايز اتجوز واحدة و الناس يبصوا ليها كدا , لاسباب كتير

* الغيرة
* عدم الارتياح
* كدا مش عارف احمي مراتي
* العروبة و الرجولة و العقل, كل دا ضد كدا !

عموما انا لسه طالب لكن حبيت اوضح *حقيقة* علي ارض الواقع مش في مصر بس بل في كل انحاء العالم :D

***المدام تبقي ليا و بس و العكس صحيح, مش للشارع المصري .

و احب اوضح ان البنت اللي بتتنقب دي بنت شجاعة و مش بيهمها الناس , ما دام مقتنعة ان دا الصح او علي الاقل بتعمل كدا علشان ترضي ربنا و علشان ربنا يرزقها بابن الحلال الصح.

بالنسبة للامن و الامان , النقاب بيتيح رؤية واضحة للمنقبة, و النقاب الاسود دا بيوقف الافكار السودة اللي بتيجي لبعض الرجالة لما بيبصوا للبنات.

الخلاصة علشان الواحد تعب :D

النقاب حرية شخصية , اعتبرها عادة عن البدو , اعتبرها عدو عن الغرب , ايا كان , , النقاب حرية شخصية !

users online