Friday, June 24, 2011

الـــحـــــ


اخر مرة اتعاكست فيها

كان يوم الجمعة 28 يناير

كانت الساعة تقريبا 10 الصبح

وكنت رايحة مسجد الفتح

وهناك فى رمسيس عند الاشارة اللى قبل مسجد الفتح

لاقيت اتنين ظباط

واحد منهم قاللى : صغير انت على الثورة يا جميل


ودى كانت اخر مرة حد يعاكسنى فيها

ومن بعدها الرجالة انطسوا فى نواظرهم


وقبل ما ابدأ كلامى لازم اعرفكم

أهمية المعاكسة


فالمعاكسة يا اعزائى

ماهى الا مقياس لنا نحن نون النسوة

ان لسة فينا الرمأ

وان لسة فيه ناس بتشوفنا

حلوين

وصغيرين

ومُزز


ومهما اشمئزينا من السلوك الغير حضارى ده

واشتكينا ان اخلاق الرجالة بقت فى النازل

وان الواحدة مبقتش تعرف تمشي فى الشارع

من كتر المعاكسات

فاهتفضل المعاكسة لها عندنا اهمية كبرى


اصل مين فينا تكره انها تحس انها مزة وبتتعاكس؟ !!!


فبالتالي لما تعدى شهور من غير مانتعاكس

فده يدل على ان خلاص العضمة كبرت

واننا مش مُزز


ودى حاجة بتأثر فى نفسيتنا جدا نحن نون النسوة

لان احنا بنحب نتشاف

و بنحب نحس اننا قمرات


ولذلك لما عدت شهور من غير متعاكس

كنت بحاول اجبر بخاطرى

واتلكك بانى مش بتعاكس

علشان انا اساسا مش بنزل كتير من البيت

فهتشاف فين يعنى علشان اتعاكس


وخصوصا ان انا مش حاطة الموضوع ده فى دماغي اوى

بس لما الموضوع يجى في دماغى فجأة

والاقى نفسي انى متعاكستش بقالى شهور

دى كدة كارثة

وده معناه انى بفقد انوثتي يا جدعاااااان


طب ايه ... مش هتعاكس بقى ولا إيه؟

وده كان سؤال على الماشي كدة فى لحظة يأس


و تقريبا ابواب السما كانت مفتوحة وقتها

وربنا استجاب لدعائى وبعت اللي يعاكسني


وفي اول مرة انزل فيها بعد ما قلت بينى وبين نفسي

طب ايه بقى مش هتعاكس ولا إيه؟

وبعد ما خرجت من العمارة

ومشيت فى اتجاه الشارع الرئيسى

واذ الاقى واحد بيقول

يا صلاة النبي ايه الحــــ

فعرفت علطول انه هايعاكسنى

وبدات اشرئب بينى وبين نفسي

وبدات ابتسم لنفسي ابتسامة خفية

غير مرسومة على ملامح الوجه

ولكنها مرسومة فى قلبي

وبدأ قلبي يرقص طربا

وبدات اهتف بينى وبين نفسي

بنشيد فرحة المعاكسة

هيييييييييييييه

هتعاكس

هيييييييييه

هتعاكس

هيييييييييييييييه

ايجيبشن هيعاكسني

هيييييه

ايجبشن هيعاكسني

هييييييييه


ما انا فرحانة بقى ان اخيرا فيه حد بيعاكسني


اى نعم انا مش عارفة مين الحد ده

ولا شكله عامل ازاي اساسا

لانى لما بمشي

بحب اوى ابص على بوز جزمتى

فبالتالى مبشوفش مين اللى ماشى فى الشارع


المهم

انى بدات استعد انى اسمع جملة معاكسة كاملة مكتملة

بدأت بــ يا صلاة النبي إيه الحـــ

ولكن

فى غمرة غرقي فى مشاعري الجياشة

وفى وقت اقل من الفيمتو ثانية

وفى لحظة فاصلة فى حياتى كأنثي

ان لسة فيه حد شايفنى مُزة

لاقيت صوت جهورى جعورى

بيقول

اتلممممممممممممممم يااااااااااااااااااض

دي بنت "حيتشيتشيتنا"

عيييييييييييييييب كدة


فانا اذبهليت

لانى اولا معرفش مين صاحب الصوت

الجهورى الجعورى ده

ثانيا ان هذا الصوت

منع عنى المعاكسة

وان اللى كان ناوى يعاكس

اتلم فعلا واستجاب لصاحب الصوت الجعورى الجهورى

ومكملش المعاكسة

وانا كملت مسيرتى

وانا منكسة الرأس اكثر ماهى منكوسة

اعانى من حالة احباط شديد

فأنا كنت خلاااااااص

على شفا انى اتعاكس يا جدعااااان

يقوم يجى واحد ابن تييييت يمنع عنى المعاكسة؟!!!

والواد اللى كان هيعاكسنى

خلاص يعنى.... الاخلاق حبكت معاه اوى

وسمع الكلام علطول لما واحد لا اعرفه ولا يعرفنى

اتبلى عليا وقاله اني بنت "حيتشيتشهم"

وصاحب الصوت الجهورى ده

مش كان يصبر شوية لما صاحبه يكمل جملته

اللى وقفت عند الحــ

يعنى انا اخرتى ابقى حــــ

يعنى يارب يوم متعاكس ابقى حــــ


طبعا انا ماوقفتش قدام الموقف ده كتير

وعدى عادى

لكن مازال فى القلب وجيعة


ولذلك اناشد الاخوة الرجال

ان تزيدوا من جرعة المعاكسة شوية

احنا كدة نحن نون النسوة هنضيع منكم

وخصوصا المطلقات امثالى

اللى مالهومش رجالة يقولولهم كلام حلو

طب نسمع فين كلام حلو؟

انتوا ايه ؟ ... عايزيننا ننحرف؟

ونلجأ للشات والكلام الفارغ ده؟

احنا مش ابناء وطن واحد؟

وانتوا رجالتنا

يعنى احنا مسؤولين منكم؟

وبعدين لو مش انتوا اللى عاكستونا

مين يعنى اللى هيعاكسنا؟

هنستورد كمان رجالة من الصين

تيجى تعاكسنا باتنين جنيه ونص ؟

هو انتوا يا اما تتحرشوا يا بلاش؟

هو ماينفعش تعاكسوا من غير اى ملامسات جسدية؟


وبعدين اللى يعاكس بعد كدة يبقى ينزل يعاكس لوحده

ماهو مش معقول كل ما حد يجى يعاكس

يقوم واحد صاحبه عنده شوية اخلاق يمنعه من المعاكسة


يا إما اللى ينزل مع اصحابه يبقى هدفهم واحد

وكلهم يبقوا عارفين ان اللى هيعاكس فيهم

الباقيين هيساعدوه في المعاكسة

يا اما هايزودوا على معاكسته باللى احسن منها

يا إما اضعف الايمان يلتزموا الصمت

ويسيبوا صاحبهم اللي بيعاكس يعاكس براحته

وبلاش التشتت اللى انتوا فيه ده

ياتعاكسوا كلكم يا تسكتوا كلكم

لكن التشتت ده هو اللى جايبنا ورا


وانا من مزنقي هذا

اطالب الدكتور عصام شرف

رئيس الوزراء

ان يتم تعيين ذكور للمعاكسة

وتكون مهام وظيفتهم الاتى

المشي وراء الفتيات والنساء

والقاء كلمات الغزل على مسامعنا

دون خدش لحيائنا

مع مراعاة ان يكون اللى بيعاكس

اكبر من اللى بتتعاكس

ماهو مش معقول برضه

الاقي ان اللي بيعاكسني عيل في إعدادي


مع العلم

انه اذا لم يتم الالتفات لمطالبنا

فى توفير ذكر للمعاكسة لكل واحدة ست

سنقوم بمليونية حريمية في التحرير

وسيكون هتافاتنا هى الاتى:


مش بتعاكسنى ليه ؟

انا وحشة ولا إيه ؟


عاكسنى ومتخافشي

انا مش هازعق ولا هامشي


نظرتك لوحدها مش كفاية

عاكس ولو بكلمة


بس خلاص

فوتكم بعافية

وماجيلكمش فى معاكسة مبتورة ابداً

________

إنـتـهـى

users online