مش عارفة ابتدى كلامى بالشكر ولا بالعتاب
انا بقول ابتديه بالشكر
علشان الناس اللي استجابت للدعوة
تستحق انى ابتدى كلامى عنهم
واقولهم الف الف شكر
عدد الحضور لم يتعدى الــ 10 افراد
تقريبا تمانية او تسعة بس اللي حضروا
فاتيما
عمرو فكري
خالد همس الأحباب
اسامة الازهري
رامي
أبو حميد
ابراهيم رزق
شرين سامى
ومحمد عبد العاطى اتصل بيا وقال انه رايح
ومش عارفة بقى هو لحقهم ولا لأ
ومعرفش مين تاني راح
لما فاتيما ترجع هاعرف منها التفاصيل اكتر
اللى اتصل بيا عمرو فكرى الصبح
وقاللى انا مش شايف حد خالص
قلتله مش معقول اكيد فاتيما موجودة
قلتله روح بص جنب السور كدة
يمكن تلاقيهم واقفين فى الضل
وفعلا قاللى اه انا شايف اتنين
توقعت علطول انها فاتيما ومعاها حد من الحضور
وبعد كدة بخمس دقايق محمد عبد العاطى اتصل بيا
وقالى انه رايح
بس مش عارفة بقى لحق الجماعة ولا لأ
لان بعد حوالى ساعة ونص
لاقيت عمرو فكرى بيبعتلى ماسيدج بيقولى فيها
Done ya mama khikha
ففهمت منها انهم خلاص خلصوا
فاستغربت اوى
لانهم لو كانوا خلصوا فعلا فى الوقت ده
كان قبل الصلاة بحوالى نص ساعة
فده معناه ان العدد كان صغير جدا
فاتصلت بعمرو وقلتله انتوا خلصتوا بجد؟
قالى اه والله خلصنا احنا عددنا صغير
قلتله طيب اديني فاتيما اكلمها
وفاتيما قالتلى ان العدد تمانية فقط
وفهمت منها انها بعد كدة طالعة على التحرير
ولما ادتني عمرو تاني علشان اكلمه
فهمت من عمرو انهم هايروحوا معاها
فاتبسطت انهم مش هايسبوها تروح لوحدها
انا طبعا معرفش التفاصيل بالظبط
يعنى لما فاتيما ترجع هانعرف منها التفاصيل كلها
عن التبرع بالدم
وعن اخبار التحرير
انا بس حبيت
لحين حضور فاتيما ومعرفة منها كافة التفاصيل
اشكر اللى حضروا
واستجابوا لدعوة التبرع بالدم
وكان نفسي جدا اكون معاكم
واسعد برؤيتكم واتشرف بمعرفتكم
عايزة اشكر فاتيما جداااااااا
وعايزة انبهكم ان فاتيما ناويالكم على بوست تقريع وتأنيب
علشان بجد انتوا خذلتوها وخذلتوني
انا وفاتيما كنا متوقعين عدد كبير من الحضور
بس مش مشكلة
البركة فى اللى راحوا
و عموما انا فرحانة باللى حضروا
وبجد حضوركم ده تستحقوا عليه حاجة حلوة اوى
بس انا مش عارفة هي ايه
ربنا يارب يكتبه فى ميزان حسانتكم
بشكركم تانى على حضوركم
وبشكر اللى اشترك معانا بمجهوده ونشر الدعوة
وبعتذر تاني عن اني مقدرتش اجى واشارك معاكم النهاردة
ونحن فى انتظار بوست التغطية الشاملة بقلم فاتيما
بس لما ترجع إن شاء الله
وفي النهاية معنديش غير انى اقولكم ....
شكرا يا أعز الناس
***
ملحوظة خيخية
انا عجبتني اوي
كلمة "ماما خيخة"
اللي وردت فى الماسيدج
اللي بعتهالي عمرو فكري
الكلمة دى خلتني أحس _ على غير العادة_ إني طيبة
وعملتلي حالة من الفرفشة
شكرا يا عمرو
_______
انتهى
