Wednesday, January 25, 2012

عن 25 يناير 2012 احدثكم


محبطة جداااااااا

وفي اعلى درجات الضيق

و مخنوقة ودموعي مكتومة

**

امبارح لحد الساعة 10 بليل

مكونتش ناوية انزل التحرير

لانى كنت حاسة انه هيكون مجرد كرنفال

ومفيش ولا استكمال للثورة ولا كلام من ده

لكن جاتلى مكالمة

وعلى اساسها غيرت رأي

وقلت خلاص هانزل

**

النهاردة صاحية الصبح بدري جدااا

رغم انى نايمة متأخر

و كنت عايزة انزل من بدري

بس قلت لما استنى لحد صلاة الجمعة تخلص

وبعد كدة ابقى انزل

**

بعد حوالى ساعة من صحياني

اكتشفت ان النهاردة مش الجمعة

وان النهاردة الأربع

ولكن اكتشافي ده مغيرش من خططي اى شيء

وقلت هانزل برضه بعد ما اصلي الضهر فى البيت

**

نزلت فعلا وربنا كان مسهلها

واول ما خرجت على الشارع الرئيسي

لقيت ميكروباص رايح رمسيس

ركبته و قلت اهى اى حاجة تنزلنى وسط البلد

**

حصلت خناقة بين اتنين ركاب

واحد معرفش كان بيعلق على ايه

وقال اهى دى روح 25 يناير

راح واحد رد عليه وقاله لأ ... دى روح الاسلام

راح رادد عليه وقاله

ماهي لولا 25 يناير مكنتش راية الاسلام اترفعت لفوق

راح التانى هب فيه وقاله راية الاسلام مرفوعة طول عمرها

وبلا بلا بلا بلا بلا بلا بلا

بلا بلا بلا دى معناها انى قررت

انى افصل نفسي ومسمعش هما بيقلوا ايه

**

نزلت عند حتة اسمها سلم التحرير

ومشيت لحد ميدان التحرير

وعند مدخل الميدان من ناحية عبد المنعم رياض

اللجان الشعبية كانت واقفة

وطلبوا تفتيش شنطتى

فتشوها وبعد كدة سالونى

معاكى قصافة او ملقاط او مقص؟

قلتلهم لأ ... قالولى معاكى اى حاجة حادة

قلتلهم اه ... معايا شوكة وسكينة

البنات بصولى بإستغراب وقالولى إيه ؟

قلتلهم معايا شوكة وسكينة

فضحكوا وخلونى اعدى

**

التحرير كان زحمة جدااااااااااااااااااااااااااااااااا

وبعد حوالى ربع ساعة من المشي تاتا تاتا

بدأت الكارثة بالنسبالى

هوب وحسيت بايد واحد بتلمسنى

اتلفت و وقفت وسكت ثوانى

و وشي ده كان احمرررررررر

وكل اللى عملته انى خبطته فى كتفه وقلتله اتلم

فراح لقيته هو كمان وقف وبلم زي اللي عامل عاملة

و وشه بقى اصفرررر

وبيقول والله العظيم انا .....

زعقت وقلتله متحلفش يا ابن الكلب واتلم

وخبطته فى كتفه تانى

راجل تانى قاللى خلاص يا انسة عدى اتفضلي عدى

وعديت

**

اعصابي خلاص كانت بتنهار و انا قربت اعيط

رحت بصيت على المكان اللى فاتيما قالتلى انها بتقعد عنده

قلت يمكن اشوفها وابقى معاها علشان مبقاش لوحدى

لكن ملقتهاش

وده شيء احبطنى جداااااااااااا

لانى كنت محتاجة امااااااااان

والامان كان بالنسبالى فى اللحظة دي

انى اشوف وش اى حد اعرفه

**

حاولت اقف فى مكان مش زحمة علشان اعرف اتنفس

فين وفين لما لقيت حتة كدة مفيهاش ناس كتير

يعنى يا دوبك بينى وبين اللى واقف جانبي 20 سنتى

ودى كانت مساحة راااااائعة علشان الواحد يقدر يتنفس فيها

**

الدنيا كانت زحمة جدااااااا

ومش حاسة بروح الثورة

كان فعلا كرنفال

**

لقيت اتنين بيتناقشوا بصوت عالى وكأنها خناقة

واحد بيقول للتانى خلاص الاخوان والسلفيين ركبوا الثورة ودلدلوا رجليهم

والتانى بيحاول يقنعه ان الاخوان والسلفيين معملوش كدة

وان الاخوان والسلفيين حاجة حلوة

لكن الأولاني كان مقتنع ان الاخوان والسلفيين حاجة وحشة

**

كان جانبي عربية بطاطا و واحد تانى بيشوى درة

والناس عادى بتضحك وفرحانة وكأنه يوم عيد

ومش شايفة حد زعلان على شهيد

وكأن الناس خدت حقها خلاص

**

مكنش فيه غيري تقريبا مكشر وضارب بوز

لانى لقيت واحدة بتسالنى فجأة انتى ماتلك حد فى الثورة

قلتلها : ايه؟

ولما استوعبت السؤال رديت وقلتلها لأ

قالتلى امال انتى حزينة اوى كدة ليه ؟

بصتلها اوى ومعرفتش ارد عليها

ومعرفتش حتى ابتسم

كنت حاسة ان انا هبلة اوى

وحاسة انى مش فاهمة أي حاجة

وتقريبا هي حست انها بتكلم واحدة هبلة فمشيت وسابتنى

**

فجأة افتكرت أيام سودا

ولقتنى خلاص هاعيط

لكن هوب ولقيت واحد بيتحرش بيا تاااااااااااااااااااااني

المرادى كنت على اخرى

رحت لفيت ورزعته قلم

ومسكته من رقبته بضوافري

ست كبيرة مسكتنى

و اتنين اتلموا

وشوية الناس اللى كانوا حوالينا قالولي

معلش معلش

خلى اليوم يعدى على خير

متشمتيش فينا العسكر

**

كنت بسمعم وانا حاسة ان اكيد الناس دى متخلفة

يا اما انا اللى بجد هبلة

زقيت الست اللى كانت مسكانى

وقلتلها ابعدى ابعدى

ابعدوا كلكم

يلعن ابوكم كلكم ولاد كلب

**

راجل منهم قعد يزعق ورايا

و يقولى طب بتشتمى ليه

يعنى ده جزاة ان احنا بعدناه عنك

لفيت راسي وبصتله باندهاش

وكنت عايزة ارفع ايدي واعمل بيها حركة يعاقب عليها القانون

بس مسكت نفسي

ومشيت

وقررت انى اروح

وفعلا معرفش انا كنت بشتمهم ليه

بس كنت حاسة ان مفيش حاجة اتغيرت

كنت حاسة انهم يستاهلوا الشتيمة

**

نزلت محطة المترو

وكأني نازلة قبري

كانت زحمة جداااااااااااااااااااااا

كنت ماشية فيها بالعافية

وعمالة افكر فى كل اللى حصل ومضايقة ومخنوقة

لحد فجأة مخدت بالى من اتنين صوتهم عالى بيتكلموا فى قفايا

واحد بيقول للتانى هي مش تبعي بس مسلمة

هي مش تبعى بس مسلمة

وقعد يكرر الجملة دى كتير

وانا مش فاهمة هي مين دى

بس لما ركزت لقيت ان الراجل اللي ورايا

عامل بإيده حاجز عنى وعن باقي الناس

علشان اعرف امشى ومحدش يخبط فيا

والتانى عمال يشكره ويقوله

الله يباركلك

اه طبعا امال ايه ما دول اخواتنا برضه

وربنا يهديهم ويلبسوا النقاب


انا لما سمعت كلامه وانا ماشية وقفت

بس موقفتش برجلى

ولكن وقفت بدماغي

فالراجل اللى حمل على عاتقه مهمة انه يحمينى من الزحمة

وعامل بينى وبين الناس حاجز

رد عليه وقاله

متقلقش كلها كام شهر والنقاب هيبقى فرض

الاخوان ان شاء الله هيفرضوه


كنت اتخنقت من الكلام

و كنت محتاجة انى اعيط

ومحدش يسالنى ليه

بس كنت بجد محتاجة انى اعيط

وكنت حاسة انى وحيدة جداااااااااا

وكنت خايفة

وكل اللى بفكر فيه انى عايزة اروح بيتى .... بسرعة


اول ما لقيت حتة واسعة

وقفت على جنب وبصيت للراجل اللى كان ورايا

وشكرته وشاورتله انه يعدى قدامي

**

المترو اتجاه الجيزة مكنش زحمة

وخصوصا عربية السيدات

قعدت ووطيت راسى كأنى ببص على الجزمة بتاعتى

وفضلت اعيط

نزلت محطة الجيزة

طلعت منها ومشيت شوية وركبت لحد اكتوبر

**

اول مدخلت بيتى

كتمت وشي فى المخدة وصرخت ... صرخت اوي


انا مخنوقة جدااااااااااااااا ... ومحتاجة أمان

_____

إنــتــهــى

50 comments:

اندروميدا said...

في الحقيقة بوست ملئ بالاحداث المؤسفة ... وارجو الا تكون هذه هي الصورة العامة ...ولكني بالفعل اري ان هنالك العديد من المشاهدات التي تدعو للتشاؤم منذ فترة ليست بالقليلة ... فيبدو اننا كمصريين كنا نتعامل مع مصر قبل الثورة علي انها رهينة ... اما بعد الثورة فقد اصبحنا نتعامل معها من منطلق التركة.. وهذا المنطق ينسحب علي كل فئات ومكونات الوطن !! ... علي اية حال .

اقدر احساسك المتألم ... وارجو ان تمر تبعات هذا اليوم بسلام ... وأسأل الله ان يمنحنا السكينة والأمان

دمتي بخير

أع ـقل مـ ج ـنـونــة said...

:((((((
قلبي واجعنى وحسيت بيكى اوووووى
مصر بتضيع بجد

انا لسة كاتبة فالبلوج عندي ان البلد حالها مش هيتعدل الا لما النفوس تتغير

http://a32l-magnona.blogspot.com/2012/01/blog-post_25.html

لو فاضية ياريت تشرفيني وتشوفيها
:(

نور الدين said...

فعلا كان يوم كئيب انا روحت التحرير نص ساعة ومشيت
حتى اتصلت بمينا جرجس قالى انه هو وفاتيما وازهرى على البورصة قلتلهم جايلكم لكن قرفت من المكان فقررت اروح
وروحت
بس معرفتش اعيط

مدونة رحلة حياه said...

السلام عليكم
يبدو ان تعليقاتى صارت واحدة
لعله خير
وفى الصبر على ما تكره خير كثير
سلامى لشريف
دومتى بخير

MOHAMED RASHED said...

وجعتلي قلبي والله بس معلش احنا لسه ماتغيرناش واحب اصدمك واقولك اننا مش هنتتغير ، ممكن نغير رئيس نغير حكم نغير اي حاجه في الدنيا لكن مابنغيرش نفسنا ومش هنغيرها والعيب مش في مبارك لوحده العيب فينا والعيب مش في العسكر لوحدهم العيب فينا والعيب مش في اي ظالم لوحده العيب فينا التربه فاسده
:(((
امضاء
واحد راجع من التحرير محبط ومش ناوي يكمل

ابراهيم رزق said...

ازيك يا نوران

اعتقد انك ذهبتى و معكى مود صعب و اثر عليكى هذا المود
باستثناء المكان الذى يوجد به منصة الاخوان اللى كان فاضل على راى وليد يجيبوا رقاصة
المكان طبعا كان منقسم و كان فيه اماكن فيها روح الثورة و بالذات بعد وصول المسيرات
طبعا مكان فاتيما عملوه منصة و فاتيما كانت فى مسيرة مسجد الاستقامة اللى بتقول كان بها اكثر من 120 الف
جو الثورة كان موجود لدرجة ان لاول مرة فى البورصة عملنا مظاهرة
فعلا انتى كان ينقصك فاتيما نصفك الثانى
اليوم كان حلو لكن اعترف ان الميدان كان ملىء بالمتطفلين
اما الاخ بتاع النقاب هيتفرض بالقانون
فساقول له كلمة واحدة
لما تشوف حلمة ودنك
سلام يا ام شريف و بأذن الله القادم احسن

فافى said...

:(
انا كمان مخنوقه وبلاحظ ان مودنا دايما زى بعض وبتكتبى بوست دايما تنكدى بيه على اهلى
بس متضايقه منك عشان كتبتلك كومنت انى عايزه اسألك على حاجه وماردتيش عليا
مش بحب اسأل على حاجه وماحدش يرد عليا

safa7_karmooz said...

البوست ده حسسنى بالعجز اوى اوى :S

safa7_karmooz said...

فيه حوار اغلب الناس على تويتر بيتكلموا عن واحده اجنبية هتكوا عرضها عند مجمع التحرير وناس بتقول حضرت الموقف وخلصوها بالعافية منهم على عربية اسعاف ...بس الفرق ان جوزها كان معاها :S

ميتين ابو دى فئة من الناس بتستغل ظروف عشان ترضى حاجه شهوانية جواهم بطريقة ااقل حاجه تتقال عليها قذرة ...عالم حقيرة بجد

زهرة الضحا said...

طب ليه بس يا خوخه مكلمتيش حد من أصحابك
فاتيما أو أي حد إنتي بتحبيه
علشان تحسي بالأمان

أنا للأسف منزلتش التحرير لظروف السفر
و قولت لنفسي حتي لو جاتلي فرصه السفر لن أسافر لأن سفري و وصولي للميدان هيكون للإحتفال و ليس لإستكمال الثوره
و ده أنا مش عايزاه

للأسف دايما بيكون في ناس بيتبوظ الحاجات الحلوه

كلمي حد إنتي بتحبيه , كلمي شريف
و قوليلوا وحشني حضنك قوي

يارب يا حبيبتي تكوني بخير

candy said...

:(((

على رأى عادل إمام فى طيور الظلام ..

اللى يشوف "التحرير" من فوق غير اللى يشوفه من تحت خالص

Sarah .. said...

:(

dahlia.. said...

ازيك يا نوران..يا رب تكوني أحسن دلوقتي.أنا عايزة أقولك حاجة..التحرش في التحرير بقى شيء مقصود و ممنهج..امبارح واحدة ست أجنبية فيه رجالة اتحرشوا بيها عند المجمع و قلعهوا هدومها قدام جوزها!بس غالباً التحرش ده بيكون من ناس مزقوقين على الميدان عشان يشوهوه..ده ميمنعش ان فيه ناس طبعاً نفوسها وحشة و الزحمة بتكون فرصتهم.و عايزة أقولك كمان ان روح الثورة امبارح مكنتش في الميدان..الميدان امبارح لحد وقت متأخر قوي كلن بتاع الأخوان و السلفيين اللي جايين يحتفلوا بمكاسبهم.. و للناس اللي جاية تتفرج..روح الثورة بجد كانت في كل شوارع مصر..في الألاف اللي كانوا بيهتفوامن قلبهم ضد الظلم و شايلين صور الشهدا اللي احنا مقهورين عليهم بجد..أمهات الشهدا و أهاليهم كانت في المسيرات دي و كانوا وسط الناس اللي مقدرين الدم اللي سال..امبارح يا نوران الشعب حبس الأخوان و السلفيين في الميدان و خد كل شوارع مصر..أنا مشيت ساعات في الشوارع و محسيتش بتعب..كنت فرحانة قوي بالشباب و البنات و الناس الكبيرة اللي بتهتف من قلبها..و كنت في نفس الوقت ببكي كل ماأشوف صورة لشهيد..الشعب ده فيه حاجات كتير قوي حلوة..بس كمان فيه حاجات كتير جواه اتشوهت نتيجة لسنسن طويلة من القهر و الفقر و الجهل..ربنا يكتب لمصر الخير و يصبر كل واحد فقد عزيز
معلش يا نوران متزعليش :)

Baskouta said...

متزعليش يا حبيبتي
والله حاسة نفسي اطبطب عليكي
بس مش عارفة
وده مزعلني اكتر

بليز طبطبي على روحك

مهندس مصري said...

ياه يا نوران
مش عارف اقول ايه
ربنا معاكي
أنا سمعت عن حالات تحرش بالأجانب إمبارح بس مكنتش متخيل الموضوع منتشر كده
:(

Anonymous said...

بصراحه بصراحه -- مدونه رائعه واجمل ما فيها انك صادقه 100%

Mohamed Amer said...

انا بصراحة احبطت اما شوفت كلامك
فيه ناس كدا خسيسة ومعفنه وتستاهل ضرب الجذمة والله وانا اسف اسف علي اللي حصلك ومش عارف اقولك ايه
انا نزلت بس اتجمعنا الاول في مصطفي محمود وعملنا مسيرة لغاية التحرير بس انا ماشوفت الكلام ده خالص وغير كدا احنا ما عرفناش ندخل الميدان لانه كان مليان اما وصلنا الساعه تلاته ونص تقريبا ودخلنا متفرقين وكانت الامور ماشيه معانا كويس وماكنش فيه مشاكل
انتي عملتي المفروض اللي تعمله ايه واحده محترمه ولو اللي كانوا وافقين دول رجالة ماكنوش سابوا الموضوع ده يحصل او علي الاقل كانوا موتوه من الضرب بس للاسف
وانا بخجل من نفسي وانا بسمع الكلام ده لاني مش عارف اتصرف
واما اللي بيقول حيفرضوه الحجاب اقوله اختشي علي عينك , احنا بفكر في المظهر وناسيين الجوهر
بس والله انتي غلطتي انك مش نزلتي لوحد لا علشان المفروض اما تنزلي تعرفي الناس اللي حتنزلي معاهم , يعني ائتلاف الثورة او حملة كاذبون او.... يعني حاجات كتيرة حتي لو ماتعرفيش منهم حد كنت عرفتي فين هما حيتجمعوا وتنزلي معاهم ....بس قدر الله وماشاء فعل
يعني انا اما نزلت نزلت مع مصرنا وحملة خالد سعيد وحملة كاذبون وحملة الدكتور عبد المنعم ابوالفتوح اللي انا واحد منهم واتجمعنا في مصطفي محمود ومشينا مع بعض ومع اني معرفش غير ناس قليلة
ماتزعليش نفسك
وارجوك سامحينا
وانا اسف بجد
وحقك عليا
بالله عليك ماتزعلي
خلاص بقي ماتزعليش

المتأسف
محمد عامر

Lady E said...

يا حبيبتي يا ام شريف

ربنا يطمن قلبك

احلى حاجة في اليوم انهم قالولك يا أنسة :)

http://www.albawaba.com/node/410471?utm_source=rss&utm_medium=buzz+manager&utm_campaign=Al+Bawaba+-+Arabic

الموقع ده اقتبسوا من البوست وكتبوا عنه من مدونتك

واحدة دماغها كدة said...

موش إنتي لوحدك اللي اتخنقتي من "عيد" الثورة . . كده بقينا اتنين
مين اللي قال ان ما ماتشي ليكي حد في الثورة . إحنا اتقتل مننا ألوف و اتسجن مننا ألوف . . الإحساس بكلمة مننا دي هيا الثورة . . و انا عارفة و متأكدة إنك حاسة بيها و يمكن أكتر مني كمان . .
الثورة موش مظاهرة و مطالب . . موش اعتصام و مواجهات مع أمن . . الثورة تغيير . . و قبل التغيير ده ما يحصل على الأرض لازم يحصل جوا نفسنا . .
فيه ناس حققت ثورتها و غيرت نفسها و بقى ليها موقف في كل حاجة . . موش مقضينها . . الناس دول بتلاقيهم في الصفوف الأولى . بتلاقيهم على تويتر و فيس . . بتلاقيهم في الأتوبيس و في كل حتة و بتعرفيهم برأيهم . . بأصالة رأيهم . .
و فيه ناس تانية مقضياها . . موش فارقة معاها . . حاجة تنقط . . بس هيا الدنيا كده . . ناس حقيقية و ناس فيك . . موش بني آدمين أصلا . . فما يتزعلش عليهم من أساسه . .
---
الناس اللي لسه جوا الماتريكس دي دماغها متفرمت على نمط تفكير غبي . . النمط ده موش مرتبط بالتحرش . . مرتبط بنظرة دونية للأضعف . . نفس الناس اللي بتتحرش هيا نفسها اللي بتضرب الأطفال و بتشتم الموظفين الاقل منها . . و بالجملة بتتكبّر على الناس . . ما باتكلمش عن الطبقة الوسطى .باتكلم عن ناس من كل الطبقات . . ناس بتضايق لمجرد المضايقة . .سايكوباتك .
--
المضايقة دي بسبب الكبت بتاخد شكل تحرش . لكن حتى من غير كبت ح يضايقوا . . المضايقة لمجرد المضايقة
--
ما تضايقيش انتي نفسك . . ما تضايقيش نفسك و افتكري من سنة زي اليومين دول لما ما كانش في الميدان حد غير الناس اللي حققت ثورتها . . أنا كنت هناك . . و كنت بانام و ما باخافش على نفسي . . و ياما نمت و قمت لقيت نفسي متغطية . . و دا يرجع بينا للكلام الأول عن الفرق بين الثورة و بين عيد الثورة . .
--
يومك سعيد

فاتيما said...

اولا

انا اسفة لإنى مكنتش موجودة ف مطرحى
بس ف تعليق موش للنشر
هسيبلك نمرة الموبايل
عشان أى وقت تنزلى التحرير تبعتيلى
وأجى انا او أى حد من الجدعان يجيبلك لحد عندنا ...


ثانياً

الأيام الزحمة اللى زى دى
بيبقى شبه متوقع انها مليانة غجر
وكلاب كتير
والمشى فيها لازم يكون بحرص شديد
وحتى الحرص مبينفعش قوى
انا امبارح كنت ماشية وسط 6 اسود يعنى
ومع ذلك حد ضايقنى
ورامى لما خد باله
قالى معلش
فقولتله ولا يهمك
التحرير أشبه بأتوبيس كبييييير
ولازم هتلاقى فيه المناظر دى
مهما الواحد كان حريص
فمعلش يا حبيبتى

التحرش ف بلادى أمر طبيعى
مرتبط بالأخلاق النيلة المنتشرة
ومرتبط كمان بالوضع السياسى
لو لاحظتى
التحرش هوه تقريبا كان السلاح الوحيد
اللى ممكن يطفشونا بيه ويقلبوا اليوم غم

بس اعتقد انه سبب اخلاقى بحت
مش اكتر


ثالثا
تخوفك من افكار المتأسلمين
وغيرهم ...
معرفش ليه انه هيتبدد قريب
احنا أقوى
منظرنا امبارح بيقول اننا أقوى
واكتر
وأبقى

جايز اكون متفائلة بزيادة
بس الايام بيننا وبينهم
وهتكشف حجمهم الحقيقى
بعيداً عن مساندة الحكام ليهم
ولازم هينقلبوا على بعض
التاريخ بيقول كدا
وغبائهم كمان
بيقول كدا


انا زعلانة قوى
ان اليوم مر عليكى
بالذكرى البايخة دى
واحنا ع البورصة الواد وليد الدوغرى
سألنى عليكى
قولتله بكل ثقة غبية
اكيد خوخة مع اصدقائها المتعودة تنزل معاهم دايما ..متقلقش

اتارى الواد كان قلبه دليله
بس احنا بكرة ف الميدان
ولو جاية او ناوية
تعالى
واحنا معاكى يا خوختى

أى وقت تقدرى تنزلى


معلش

علطول بقول معلش

علقة تفوت وانتى قدها
وياما دقت عالراس طبول
انتى اتحطيتى ف وضع غلط
طلع منه تصرف غلط ..مش اكتر

معلش

مش عارفة اقول ايه تانى

بس النمرة ف التعليق الجاى

مكنش العشم فيكى التمرد بغباء كدا said...

طبيعى يحصلك كدا انتى نزلة ميدان فى وسط ثورة فيها طرف ثالث ونزلة لوحدك ازاى يعنى
محنا عارفين اننا شعب رائع بس فى عند بعضنا امراض اجتماعية انتى نفسك تحملى بعض منها

مش بلومك بس يوم زى دا مفيش فيه تردد ينزل اقول صوتى يا انا عارفة ان صوتى مش هيفرق فقعد اتفرج احسن
يا اخطط له وانزل مع اصحاب فكر موحد زى ما كل شباب الميدان الرائعين اللى عرفنا بعضهم بيعمل يا اقعد فى بيتنا

انما اقرر غلط واتمرد وانفذ غلط وبدماغى واغير فى رأيي عشان مكالمة اعذرينى محنا عارفين ان فى مصر واليوم دا كل اللى انتى قلتية انتى بس اسائتى التصرف

صدقينى مش بنتقدك لكن يمكن تفوقى وتفكرى صح وتختارى صح وتنفذى صح وتعبرى عن رئيك صح بدل ما تتبهدلى كدا احنا لسة بنغير مصر مش غيرناها خلااااص

يمكن انتى اتحرش بيكى وسمعتى تعليقات سيئة
بس فى غيرك ١٠٠ بنت محصلهومش حاجة
مش عشان مكنش فى حوليهم تحرش
لا عشان امنو نفسهم امال لو مكناش عارفين وشايفين البنات بيحصلهم اية بعيونا كنا اتصرفنا ازاى يا خيخة بجد كسرتى كل توقعاتى بيكى فى البوست دا ازاى مش حسبتيها وفهمتيها واتعملتى معاها صح

ورغم كل شئ اليوم كان مشرف
وهيفضل مشرف فى نظرى ورغم زيادة عدد المحتفلين والمتحرشين والمتحرش بهم ( اعذرينى لاول مرة هشيلهم الذنب لان اللى ماشى فى طريق وعارف انه فيه شوك لازم يعمل حسابة )
الا ان تصرفات القلة الواعية تنظيمهم و صوتهم حتى لو كان عالى بهتاف بس هتخلى اليوم تاريخى للابد

فاتيما said...

صباح الخير يا خوختى

عاملة ايه ؟

النهاردة مسيرات وكدا

لو جيتى التحرير أى وقت
قبل ما تدخلى رنلى او ابعتى رسالة ..
لو الموبايلات رخمت ..


دعواتك يا حبيبتى

صباح الحرية

Anonymous said...

بوست فيه كمية مشاعر متلخبطه لكن صادقه
لكن بيجمعها كلها الاحساس بالصدمة و افتقاد الامان
لكن اللامور لاالجميله ظاهريا بتحمل جواها تناقضات غير الصورة من بره خالص
لكن الزمن كفيل بكشف الحقايق

حضرة الظابط said...

احم احم سلامو عليكو
انا مش متعود ارد علي بوستاتك بتابع بس
لكن المرة دي مش عارف ليه عايز ارد واقولك
خلي بالك من نفسك
وان شاء الله يكون المستقبل افضل من كده

سلامو عليكو

بـت خـيـخـة وأي كـلام said...

عارفين احساس المرارة
عارفين احساس الخيبة
عارفين احساس ال ..... احساس مالهوش اسم
بس هو احساس كدة زي الغثيان
زي متكونوا راكبين اتوبيس سوبر جيت ومسافرين بيه مكان بعيد
وضهر الكرسي اللى قدامكم عالي فمش شايفين الطريق
والمسافة بينكم وبين الكرسي اللي قدامكم قصيرة
ومسافة السفر طويلة
وكمان مش قاعدين جنب الشباك
لأ ..... انتوا قاعدين على الكرسي اللى على الممر
فمخنوقين
مش شايفين الطريق
لا فى وشكم ولا من الجنب
ومحتاجين هوا علشان تتنفسوا
والنور بتاع الاتوبيس مش منور
فقعدين فى الضلمة
وعايزين تكسروا ضهر الكرسي اللى فى وشكم
اللي سادد عليكم الشوف والهوا
فمخنوقين اوى
وحاسين ان مفيش اوكسجين
ومش مرتاحين فى القاعدة
وزهقانين من كتر مانتوا مش عارفين تحركوا جسمكم ومش حاسين بأبعاد جسمكم
مش حاسين برجليكم ولا بايديكم
وحاسين باحساس القيء
من هزهزة الاتوبيس
وصداع هيفرتك دماغكم
ومخنوقين
اوى
اوى
اوي
اوى
اوى
اوى

وكل اللى نفسكم فيه
انكم تنزلوا من الاتوبيس
وتمشوا على الطريق
فى الهوا
فى البراح
في النور
عايزين تمشوا علشان تحسوا بابعاد جسمكم

عارفين الاحساس ده ؟
ولا عمركم ماسافرتوا بسوبر جيت ؟


انا مخنوقة اوى

مش بس من موضوع التحرش

انا مخنوقة لانى مش شايفة الطريق ومفيش هوا
ومفيش نور

حاسة انى مسجونة و .......ومش عارفة اوصف اكتر من كدة

انا عندى صداع

انا عايزة انام

عايزة انام كتيييييييير



انا مش كويسة

ومش بخير

ومش عارفة اقول الرد المعتاد والتقليدي

"اه الحمد لله احسن"

مش قادرة اقوله

وعايزة اشتم
عايزة اشتم بألفاظ ابيحة
عايزة اصرخ اوي
بس حتى الصرخة مش قادرة اطلعها

انا مكتووووووومة


انا عايزة حضن

عايزة اتحضن جامد.... من بابا

وبابا مات

انا متغاظة من بابا انه مات

انا مضايقة جدااااااا


عندى صداع جامد

الطائر الحزين said...

لا حول ولا قوة الا بالله

==========
انا كنت هناك انا كمان يوم الاربعاء
و مشيت كثير فى الميدان فى كا ارجاءة تقريبا قعدت حوالى 4 ساعات امشى واقف يمكن الاقى وش حد اعرفة بحيث نتناقش نتكلم يشجعنى على انى استمر
=========
على الساعه 3
رجعت على طنطا
=======
نوراااان
وحدى الله
عاوز اسمع لا اله الا الله وانا هنا
=======
ربنا يحميكى ويبارك فيك
منتظر اسمع كلمة التوحيد

الا بذكر الله تطمئن القلوب
==============
اما بخصوص احداث الميدان انا بفضل انى احتفظ بوجهة نظرى فيها لنفسى

فالكل الآن يخون فى الجميع وحسبنا الله ونعم الوكيل

NAGWA said...

أنا بقى مفروسة من بابا أنه مات
ااااااااااااااااااااااااااااااااااااااااه بابا مات في عز احتياجى له ومحدش ملا مكانه
أسكتى بقى عيطتيني
يبت انتى يبت فوقى كدا واعقلي جواز وجوزناكى عيالو خلناكى جبتلنا شريف المز
أهدى كدا واحضنى ابنك هو راجلك

أجمدى كدا بقى انا اعرف انك رجلاية مهما ضعفتى

Tota said...

نوران .. مش عارفة اقولك ماتزعليش ولا حقك عليا ولا حاجة من دول خالص بس مش عاوزاكى تتشائمى اوى كده.. ماتسيبيش الضلمة تحرمك نور البصيرة وماتخليش كرسي الاتوبيس اللى كابس عليكى يحرمك من نعمة الامل.. مسيرنا هانكسر ضهر الكرسي ومسيرنا هاننزل من الاتوبيس الخنيئ ده مهما السكة طولت .. خلى املك فى الله كبير يا نورا النهارده الصبح كنت فتحت على سورة آل عمران ولقيت الآيات دى بتطبطب عليا اسمعى كده:
(وَلاَ تهِنُوا وَلاَ تحزَنُوا وَأَنتُمُ الأَعْلَوْنَ إِن كُنتُم مُّؤْمِنِينَ.إِن يمْسَسْكُمْ قَرْحٌ فَقَدْ مَسَّ الْقَوْمَ قَرْحٌ مِّثْلُهُ وَتِلْكَ الأَيَّامُ نُدَاوِلهَا بَيْنَ النَّاسِ وَلِيَعْلَمَ اللَّهُ الَّذِينَ آمَنُواْ وَيَتَّخِذَ مِنكُمْ شُهَدَاء وَاللَّهُ لاَ يحِبُّ الظَّالمِينَ.
وَلِيُمَحِّصَ اللَّهُ الَّذِينَ آمَنُواْ وَيمْحَقَ الْكَافِرِينَ.أَمْ حَسِبْتُمْ أَن تَدْخُلُواْ الجنَّةَ وَلمَّا يَعْلَمِ اللَّهُ الَّذِينَ جَاهَدُواْ مِنكُمْ وَيَعْلَمَ الصَّابِرِينَ)

وبيقول سبحانه وتعالى كمان فى نفس السورة:
(الَّذِينَ قَالَ لهُمُ النَّاسُ إِنَّ النَّاسَ قَدْ جَمَعُواْ لَكُمْ فَاخْشَوْهُمْ فَزَادَهُمْ إِيمَانًا وَقَالُواْ حَسْبُنَا اللَّهُ وَنِعْمَ الْوَكِيلُ.
فَانقَلَبُواْ بِنِعْمَةٍ مِّنَ اللَّهِ وَفَضْلٍ لَّمْ يمْسَسْهُمْ سُوءٌ وَاتَّبَعُواْ رِضْوَانَ اللَّهِ وَاللَّهُ ذُو فَضْلٍ عَظِيمٍ.إِنَّمَا ذَلِكُمُ الشَّيْطَانُ يخَوِّفُ أَوْلِيَاءهُ .فَلاَ تخَافُوهُمْ وَخَافُونِ إِن كُنتُم مُّؤْمِنِينَ
وَلاَ يحْزُنكَ الَّذِينَ يُسَارِعُونَ فِي الْكُفْرِ إِنَّهُمْ لَن يَضُرُّواْ اللَّهَ شَيْئًا يُرِيدُ اللَّهُ أَلاَّ يجْعَلَ لهُمْ حَظًّا في الآخِرَةِ وَلهُمْ عَذَابٌ عَظِيمٌ.إِنَّ الَّذِينَ اشْترَوُاْ الْكُفْرَ بِالإِيمَانِ لَن يَضُرُّواْ اللَّهَ شَيْئًا وَلهُمْ عَذَابٌ أَلِيمٌ.وَلاَ يحْسَبنَّ الَّذِينَ كَفَرُواْ أَنَّمَا نمْلِي لهُمْ خَيرٌ لِّأَنفُسِهِمْ إِنَّمَا نمْلِي لهُمْ لِيَزْدَادُواْ إِثمًا وَلهُمُ عَذَابٌ مُّهِينٌ.
مَّا كَانَ اللَّهُ لِيَذَرَ المُؤْمِنِينَ عَلَى مَا أَنتُمْ عَلَيْهِ حَتَّىَ يمِيزَ الخَبِيثَ مِنَ الطَّيِّبِ وَمَا كَانَ اللَّهُ لِيُطْلِعَكُمْ عَلَى الْغَيْبِ وَلَكِنَّ اللَّهَ يجْتَبي مِن رُّسُلِهِ مَن يَشَاء فَآمِنُواْ بِاللَّهِ وَرُسُلِهِ وَإِن تُؤْمِنُواْ وَتَتَّقُواْ فَلَكُمْ أَجْرٌ عَظِيمٌ)

هونى على نفسك يا خوخة وثقى بنصر الله القريب بإذن الله ( على فكرة انا ولا سلف ولا اخوان احسن تقلقي منى والا حاجة )

weka said...

لا حول ولا قوة إلا بالله

شعرت بالعجز والخجل وقتما قرات تدوينتك

وتأثرت اكثر بتعليقك

ارجو من الله عز وجل ان تكون حالتك النفسية قد اصبحت افضل الأن

لتطمئنينا عليكِ

تحياتي

بـت خـيـخـة وأي كـلام said...

بشكركم كلكم على تعليقاتكم
ومش عارفة اقول ايه غير انى ممتنة ليكم كلكم على كلماتكم ليا





محمد ممدوح

شكرا يا محمد على تعليقك ومعلش انا احتفظت بيه لنفسي





وشكرا للناس اللى بعتتلي تعليقات وطلبت انى منشرهاش



وبالنسبة للتعليقات المنشورة
ان شاء الله هارد عليكم واحد واحد

بس معلش اعذروني مش هاقدر ارد عليكم دلوقتي



شكرا ليكم كلكم وربنا ميحرمنيش منكم

بـت خـيـخـة وأي كـلام said...

اندروميدا

بعتذر اذا كان البوست سوداوي

لكن انا مقصدش انقل الصورة المؤسفة دى على اد ماكنت عايزة اكتب علشان اخرج اللي جوايا


بشكرك على كلامك
و تبعات اليوم ده عدت على خير ... أو هكذا أود أن أظن

شكرا ليك











اعقل مجنونة

شكرا ليكي يا حبيبتى على احساسك
بس مش لدرجة ان مصر بتضيع يعنى

ان شاء الله مصر بكرة تبقى أحلى
واى توتر موجود فى البلد
دى حاجة طبيبعية بعد الثورة
لان مفيش ثورة بتحصل وبتبقى الاحداث اللى بعديها بتكون مستقيمة
لازم هيمر علينا تعريجات كتير لحد منستقر

ويارب النفوس تتغير للأحسن
اللهم امين

وان شاء الله هابقى ابص على البوست بتاعك

شكرا ليكي








معلش يا جماعة اعذرونى
هاكمل باقي الردود بعدين

شكرا ليكم

Anonymous said...

تاكلي سفندي اصل انا زانق سفندايه بموتها دلوقتي بعيد عن جو البوست ده انا حابب ارسم علي وشك بسمه ليس الا

وان شاء الله ربنا قريب وكبير ويخفف عنك واذا كنتي زيي مش شايفه وخايفه وقلقانه علي مصر عصام صحبي قالي ياعبيط متخفش عليها هيه مرت بحجات اصعب من كده بكتير وبرضه فضلت مصر وقالي كمان ان مصر كنانه الله في ارضه من مسها بسوء قسم الله ظهره علي فكره بقالك كتير مضحكتيش ضحكتك الشوريره بتاعه نيااااهااااااااااااااع



عابر سبيل

فاتيما said...

يا رب
تكونى هديتى شوية يا خوختى

انا باجى اقرى التعليقات
واستنى ردك ..
لعلى اتلمس منه أى تحسن

مش مقتنعة
انك بقيتى أحسن خالص

بس بقول يا رب

قولى انتى كمان يا رب
فبذكره يطمئن القلب يا حبيبتى

ان شاء الله خير


بوسات وحضونات
بجد بجد

Anonymous said...

walahi same feeling...mafesh protection or peace....bas take care you have to be strong and get over this feeling very quick..before it leads to full depression.....and trust me u have to takecare of yourself mahdsh bystahml had now.....

Dr. Kafy said...

أظن إن الأحداث بعد كده كانت أفضل و أرجو أن تكون أزالت عنك بعض الحزن

لا أنكر أننا لم نجد ما نتمناه لكن مازال هناك بصيص أمل، صغير بس موجود

فاتيما said...

عاملة ايه يا خوخة

طمنيا عليكى يا حبيبتى
قولتى هتردى ومردتيش

يا رب تكونى أحسن

ولاإيه بس ...؟؟

P A S H A said...

السلام عليكم ورحمة الله وبركاته

- بصي ! .. فيه كلام الواحد بيخرس لما بيقراه ! .. ما بيبقاش عارف يرد عليه بإيه ؟ .. لإنه بيبقى عارف ومتأكد أوي من جواه إن اللي مكتوب قدامه من كتر ما هو حقيقي ومؤلم ، ما بيعبرش إلا بنسبة واحد على مليون من إحساس صاحبه ! .. أما الإحساس الحي الحقيقي بالوجع والألم والمرارة هو اللي ما اتكتبش ، لأن اللي بيكتب ما لقاش كلام كفاية يعبر عنه بيه ! .. وصدقيني ، اللي بيقرا الكلام ده بيقابل نفس المشكلة ! .. لأنه بيبقى حس بكل الوجع والألم والمرارة اللي ما اتكتبوش ، ومش لاقي كلام كفاية يرد عليه بيه !
الي فات ده مش تعليق ! .. لأني حقيقي مش لاقي تعليق !
أخوكي / شريف

بحبك يامصر said...

تلاقيكم نسيتو شكلى
ما علينا المهم انا حزين اكتر على اللى بيحصل لينا مننا اه والله بنعمل حاجات عجيبه ولا بنطلب الشئ وعكسه الثوره طلبت محاكمه عادله ودلوقتى يقولو عاجله ازاى عاجله وازاى عاجله؟ انا شهصيا من البدايه كان نفسى فى محاكم ثوريه من الاخر قطع رقبه عشان دم الشهداء والمصابين انا عايز اعرف الناس اللى شايفه الاخوان ناس وحشه اوى كده وناس انتهازيين وكده بجد ياجماعه انتو مصدقين نفسكم؟ بجد ياجماعه انتو كنتو فالميدان ايام الثوره؟طيب لو كنتو موجدين ايام الثوره ليه مش منصفين ليه بتعملوا كده؟مين قال من الاخوان انهم هيفرطوا فى دم ولادهم ودم الشهداء ده على اساس ان الاخوان محدش منهم اتصاب ولا استشهد مع انى واثق ان المصابين والشهداء من الاخوان اضعاف من اللى من غير الاخوان ما علينا من دى كمان يا جماعه يا اللى بتقولو مفيش شئ حصل مفيش شئ اتغير ببساطه كده انتو بتجلدو نفسكم بكده لا الثوره حققت مكاسب بس هى مقارنة باللى نفسنا فيه لا لسه فى حاجات كتير نفسنا فيها بس كل شئ لازم ياخد وقته احنا فعلا قمنا باعظم ثوره فى التاريخ وانا واثق انها ان شاء الله هتكمل بس انا عايز افكركم بالايه الكريمه وعلى فكره الايه دى كانت اول او تانى موضوع اكتبه عالمدونه اول ما عملتها ( ان الله لا يغير ما بقوم حتى يغييروا ما بأنفسهم)صدق الله العظيم احنا فعلا غيرنا ما بأنفسنا من جبن وخوف فربنا ساعدنا وخلصنا من الظاغيه مبارك لكن لسه مش هو ده التغيير الكافى عشان ربنا يغير كل الاوضاع الغلط اللى نفسنا منشوفهاش .. واخيرا ان تحليلى للى بيحصل ده ان بعض الناس اللى مش حابه الاخوان ولا التيار الاسلامى بيحاولو يقومو الناس عليهم ويعطلوهم عشان مينجحوش وانا فى رأيى ان دول ناس مش خايفين على البلد عشان كل شويه يعرضوها للخطر كده بمشاكل ومشاكسات
وليا عتاب بسيط للاخت فاتيما او ام يوسف زى ما كنا بنقولها زمان من حقك طبعا انك متحبيش الاخوان لكن بجد انا عاتب عليكى انك تقولى عليهم المتأسلمين لان اللفظ ده جارح جدا لانك لو فكرتى شويه فى معنى اللفظ هتلاقى معناه انهم بيظهروا نفسهم انهم مسلمين وهما مش كده
اسف جداااااااااا لانى طولت

فاتيما said...

يا بنتى طمنينى عليكى بأى تعليق
انشالله تشتمينا طيب
:/

Anonymous said...

يالله !!!!
كل ده جواكي !!!
فعلا حال البلد يوجع القلب
ربنا ينصرنا يارب ويعدي الاحداث دي على خير
يارب يهدينا جميعا :)

بـت خـيـخـة وأي كـلام said...

طب اسمحولى ارد الاول على تعليقات غير منشورة





محمد ممدوح

شكرا يا محمد
ومعلش احتفظت بتعليقك التاني لنفسي برضه








وائل

اسمه السجلابي
وفيه كمان واحد بعده بمحلين
بس مش فاكرة اسمه ايه

بعد اذنك روح انت واسأللي بقى عن الحاجة
لان انا مش هاعرف اسال عن الاسامي ولا اسعار ولا مواصفات


الف شكر ليك










ابو اسامة

تقدر تقول كدة انى بعمل بمبدأ

"لتقل خيراً او لتصمت"


شكرا ليك








ريهام

اه رحت خلاص لوحدي
بس رحت بدرى اوى فمكنش زحمة
وبعدين مقعدتش كتير
هما عشر دقايق رحت جبت الحاجة ومشيت علطول

شكرا يا روما

غريب said...

اول مرة اقرا كلام شخص اخر يحكي عن معناه للحظة عاشها بصورة بسيطة وسلسلة

وفقك الله لما يحب ويرضى وانار الله دربك

مش من الاخوان على فكرة خخخخ

شجن المشاعر said...

ازيك يا بنت يا خيخة
انتني وحشيني قوي رغم انك متعرفنيش بس انا متبعاكي من زمان بس مش علي طول
لاني مكنتش بدخل نت اللي فترة اللي فاتت
و من فترة كده حاولت ادخل البلوج عندك لقيته مقفول الحمد لله انك فتحتيه تاني
بالرغم الظروف اللي بتمر بيها البلاد بعد احداث بورسعيد
انا سعيدة اني شوفتك
سلامي ليكي و للجميع
وخصوصا حبيب قلبي شريف
رغم اني مشوفتهوش طبعا بس انا بحبه
مع تقديري
ام يوسف

بـت خـيـخـة وأي كـلام said...

نور الدين


انا اكتشفت ان الناس اللى راحوا لوحدهم التحرير
تقريبا اغلبهم عندهم انطباع ان اليوم كان سيء

يمكن غلطتنا فعلا اننا مروحناش مع حد نعرفه من اول اليوم

معلش يا نور
ان شاء الله بكرة يكون احلى

شكرا ليك











مدونة رحلة حياة

الحمد لله على كل حال

شكرا يا محمد











محمد راشد

اتمنى اننا نبتدى بنفسنا الاول ونغير اخلاقنا للاحسن


اما بالنسبة انك محبط ومش ناوى تكمل
ده احساس مؤقت
هيزول بمجرد اننا نلاقي تغير ولو طفيف للاحسن

شكرا ليك يا محمد










ابراهيم رزق

مش فاهمة مود صعب ايه اللي ذهبت وكان معايا ؟؟؟

!!!!!!!!!!!!!!


شكرا ليك

بـت خـيـخـة وأي كـلام said...

فافي

يا حبيبتي
انا كنت رديت عليكي قبل كدة وقلتلك اى حاجة عايزة تبعتيها او تسألينى عنها ابعتيها في تعليق مش للنشر
بس واضح انك ملحقتيش تقري ردى عليكي

شكرا ليكي









سفاح كرموز

مش عارفة اقولك ايه يا سفاح
بس تعليقك حسسنى انى اختك
شكرا ليك





زهرة الضحا

مكنش معايا رقم فاتيما
والناس اللى كان المفروض اقابلها فى التحرير معرفتش لان التحرير كان زحمة جدااااااااااااااا
فهما كانوا فى حتة وانا كنت فى حتة تانية خالص
ومعرفناش نوصل لبعض من الزحمة
وبعدين حصل اللي حصل
فانا مقدرتش استحمل وكنت قررت انى امشى

بس الحمد لله انا احسن والحمد لله دلوقتي

شكرا يا ضحا








كاندي

بالظبط كدة

اهو عادل امام لخص الموضوع كله فى جملة

شكرا ليكي كاندي







سارة

شكرا ليكي يا سارة

بـت خـيـخـة وأي كـلام said...

dahlia

اظن بعد مرور ما يقرب من اسبوعين على الواقعة
اقدر اقول انى مش زعلانة حاليا
والحمد لله على كل حاجة

شكرا يا داليا






بسكوتة

شكرا يا بسكوتة على رقتك
وانا الحمد لله احسن دلوقتى ... او هكذا اعتقد

شكرا ليكي يا حبيبتي







مهندس مصري


وانا بصراحة معرفش ان الموضوع كان منتتشر كدة

شكر ا يا محمد








الغير معرف

شكرا ليك







محمد عامر

يا خبر يا محمد
انت اللي بتتأسف؟؟؟


شكرا على شعورك الطيب ده

وربنا يبارك فيك وفى اخلاقك العالية

شكرا ليك

بـت خـيـخـة وأي كـلام said...

lade e

ههههههههههههههههههههههههههه

اه فعلا احلى حاجة انهم قالولى يا انسة

بس اوحش حاجة انهم اتحرشوا بيا

شكرا يا ليدي








واحدة دماغها كدة

شكرا ليكي

وربنا يسعد ايامك كلها

شكرا











فاتيما

طمطومة

شكرا على ثقتك الغالية فيا
وانك سبتيلى رقم تليفونك
ومتقلقيش انا اوعدك انى مستخدمهوش غير فى الشديد اوى اوى اوى اوى اوى


انا عارفة ومتاكدة ان اليوم مكنش وحش على الناس كلها

بس انا اعمل ايه ؟
هو حظي كان كدة فى اليوم ده

يمكن غلطتى انى منزلتش مع حد واعتقدت بغباء انى هاقدر اتجمع مع الناس اللى اعرفهم بسهولة جوة الميدان
مكنتش متخيلة ان الوضع هيكون كدة ولا الزحام هيكون كدة


يلا الحمد لله على كل حاجة

شكرا يا طمطومة على كل حاجة

بـت خـيـخـة وأي كـلام said...

مكنش العشم فيكي التمرد بغباء كدة




اتمرد بغباء ؟؟؟
!!!!!!!!!!!!


طيب غباء وماشي

لكن فين التمرد ؟

!!!!!!!!!!!!!



طبيعي يحصللي كدة
!!!!!!!!!!!!!!

طبيعي ان الناس تتحرش بيا ؟؟؟
!!!!!!!!!!!!!!!!!!!!!


هو انا اه مكنش يصح انى انزل لوحدي


بس يعنى فيه ستات نزلوا مع اجوزاتها واتحرش بيهم برضه


فهل غلطتى انى نزلت لوحدى؟

وهل المفروض بعد كدة ابقى أأجر حد انزل معاه فى حالة لو مالقتش حد ينزل معايا من الناس اللى اعرفهم ؟
!!!!!!!!!!!!!!!!!!!!



تردد ايه ؟

هو حضرتك لما تكون مثلا ماشي فى طريق سفر وقطعت مسافة لا بأس بها

وجيت لقيت زحمة فجاة او لقيت مشكلة على الطريق وقررت انك تركن على جنب شوية لحد ما تعرف ابعاد المشكلة


واتصل بيك احد معارفك سابق عنك فى المسافة

وقالك لا متركنش وكمل عادى لان المشكلة دى مشكلة واهية ولا اساس لها من الصحة
هتعمل ايه ؟

طبيعى انك تكمل طريقك اللى بداته

لان الطريق بتاعك مفيهوش لف وارجع تانى

يا اما تركن يا اما تكمل

والاعلم منك قالك كمل

هتكمل ولا لأ


هو انا لما اكون لحد قبل يوم 25 يناير 2012 بفترة لا باس بها اكون مقررة انى اشارك فى استكمال الثورة

وتحصل احداث واقاويل قبلها بيومين تلاتة ان لأ مفيش استكمال وان هيكون احتفالات
فاقرر انى منزلش لانى مش عايزة اشارك فى احتفالات

لكن لما تجيلى مكالمة من شخص اثق فى درجة وعيه السياسي
واكثر منى دراية بالامور المتعلقة بالثورة
ويقولى لا يا نورا كملى وانزلى ودى مش احتفالات ولا حاجة

يبقى ايه المانع انى اغير رأيي فى اخر لحظة واقرر انى انزل؟

لو ده اسمه تردد

يبقى ماشي اوك انا مترددة

بس انا عن نفسي مبحبش اعمل فيها ام العريف وانا لا افقه شيئا

فبالتالى مش شايفة ان فيها مشكلة خالص انى استقى معلوماتى من الاكثر منى دراية
وعلى الاساس ده اخد قراراتى



بالنسبة لل100 بنت اللى امنوا نفسهم كويس


ممكن اعرف امنوا نفسهم كويس ازاى ؟


هل مثلا كانوا لابسين هدوم من الحديد ؟



كون انى اكسر توقعاتك فيا

بصراحة مش فارق معايا اوى توقعاتك عنى او فيا

ومش فارق معايا برضه اذا كان ظنك فيا خاب


لانى معرفكش فبالتالى مش فارق معايا اى احساس بالخيبة حسيت بيه من جراء البوست بتاعى



اليوم يكون مشرف او لا يكون مشرف

دى بتبقى وجهات نظر فردية

انت شايفه مشرف مش لازم الكل يشفوه زيك


واعتقد لو كنت راجل وزوجتك او بنتك او اختك او والدتك اتحرش بيهم فى اليوم ده

اعتقد مكونتش هتقول عليه انه ان يوم مشرف

واعتقد لو كنتى واحدة ست وتم التحرش بيكى

اعتقد مكونتيش هتقولى ان اليوم كان مشرف


كل واحد بيشوف اليوم على حسب تجربته الشخصية


وانا تجربتى الشخصية فى اليوم ده تخلينى اقول انه يوم مكنش مشرف ولا نيلة

شكرا ليك او ليكي

بـت خـيـخـة وأي كـلام said...

الغير معرف

نعم اتفق معك فى ان الزمن كفيل في كشف الحقائق

شكرا ليك






حضرة الظابط


شكرا ليك يا حضرة الظابط

وحاضر هاخد بالى من نفسي

شكرا لمرورك









الطائر الحزين

ايهاب
بشكرك جدا على تعليقك

ويعلم الله ان تعليقك من التعليقات اللى خلتنى ارتاح شوية
واتذكر يوم ما قريت تعليقك
رديت عليك وانت بتطلب منى انى اوحد الله

وقلت بصوت عالى جدااااااااااا


لا اله الا الله


يارب صوتى يكون وصل عندك لغاية طنطا


ربنا يباركلك ويبارك فيك
شكرا ليك يا ايهاب







نجوى

بشكرك يا نوج على تعليقك اللى مكنش للنشر

ربنا يرحم باباكى وبابايا وامواتنا جميعا



وعايزة اقولك ان حتى الرجال ليهم لحظات ضعف

وانا مهما اقتبست دور الرجلاية فى بعض الاوقات

إلا انى فى الاول والاخر واحدة ست ولحظات ضعفي بتتشابه مع الكثير من الستات

شكرا يا نوووج








توتا

مش تشاؤوم يا توتا

انا بس كنت مخنوقة من اللى حصل

وعلى فكرة حتى لو كنتى اخوان او سلفيين مكونتش هاقلق منك

هي ليه الفكرة دى متاخدة عنى انى بقلق من الاخوان والسلفيين ؟؟؟؟

عموما انا مبقلقش من حد

انا بقلق من الناس اللى مبتعرفش ربنا ومبتخافش منه سبحانه وتعالى
ايا كان توجههم

شكرا ليكي يا حبيبتي






weka

الحمد لله انا احسن دلوقتي

شكرا ليك

بـت خـيـخـة وأي كـلام said...

عابر سبيل


احب اطمنك انك بالفعل رسمت على وشي ابتسامة

وعلشان محرمكش من حاجة ادي يا سيدى ضحكتي الشيطانية

نيهاهاهاهاهاهاهاهاهاهاهاهاهاهاهاهاع


شكرا ليك











الغير معرف

شكرا ليك على النصيحة

وشكرا لمرورك





د. كافي


مادام لسة عايشين يبقى اكيد لسة في امل ان بكرة يكون افضل

شكرا ليك






باشا

شكرا يا شريف على كلامك

وربنا ميحرمنيش منكم

الف شكر ليك







بحبك يا مصر

معلش انا فعلا مش متذكرة حضرتك خالص

عموما شكرا على تعليقك
وشكرا على زيارتك






noooor in my


اللهم امين

شكرا ليكي






غريب

ولو من الاخوان يعنى هتفرق معايا ايه ؟
!!!!!!!!!!!!!!


شكرا ليك








شجن المشاعر


اهلا بيكي ام يوسف
ودى حاجة تشرفنى ان حضرتك تكون من متابعينى

منورانى النهاردة

شكرا ليكي






شكرا ليكم كلكم على تواصلكم معايا وبعتذر انى اتاخرت عنكم فى الرد

شكرا ليكم

users online