Wednesday, February 22, 2012

الـــمـــروج الـــخـــضـــراء


لست من الشخصيات الحالمة والرومانسية

ولست من ذوات القلوب الطيبة والنفس السوية

كى اعشق الجنائن والمروج والورود


لا تستهوينى كثيرا المساحات الخضراء

ولا تثير فى نفسي شيئا من الــ " وااااااااااااااو " عند رؤيتى للزهور


عادى يعني

لا ارى بها جمال يأسرني

ولا أرى فيها دمامة تنفرني


واذا ما خيرت ما بين رحلة فى الهواء الطلق

فى المروج الخضراء

او في صحراء قاحلة

لاخترت على الفور الذهاب الى الصحراء


قد يكون اختيارى هذا دليل على نفس معطوبة غير سوية

فمن عاقل ذو نفسا نقية يختار الصحراء المكفهرة ويترك الحدائق الغناء ؟؟!!!!!!!!

ولكن لا يهمنى حقا ما دلالة اختياري

حتى ولو كانت دلالته تشير الى وجود روح شيطانية تكمن فيّ


واذا ما مررت على مروج خضراء فى سفراتي

وقال لى من يرافقني

الله بصي بصي ... بصي الخضرة جميلة ازاى

ارد عليه باقتضاب وابتسم ابتسامة باهتة تنم عن عدم اهتمام

واقول : اه جميلة فعلا


وقد ابالغ فى رد فعلي ... المزيف

وامد فى كلمة " أه " لتكون هكذا ... أااااااااااااااااااااااااه جميلة فعلا

ويزداد حرف الألف او ينقص في كلمة " أه"

حسب مدى معرفة من يرافقنى بطباعى

فإن كان شخص لا يعرفنى جيدا

وجب عليّ ان اجامله وازيد من حرف الألف اهتماما_مزيفا_منى بما لفت نظره

وان كان شخص يعرفنى جيدا

فلا داعى ان ازيد حرف الالف

وقد اكتفي بكلمة واحدة مقتضبة عابسة وهى ... طيب


اتذكر صديقتى الطيبة المحبة للورود

والتى تعلم تماما موقفى من الازهار

حين كنا نجلس فى مكان ما

و وجدتها تهم بالوقوف

فسالتها : رايحة فين ؟

فقالت لى بطفولية : ما انا لو قلتلك رايحة فين هتضحكى عليا

فقلت لها : لأ متخافيش مش هضحك عليكي ....قولي رايحة فين ؟

فقالت لى : فيه وردة برة فى الجنينة هاروح اشمها

فضحكت عليها وقلت لها ... طيب ماشي يا مسهوكة روحى شميها


لا اعرف من الذى زرع فينا نحن نون النسوة

ان المراة الطيبة ذات الاخلاق الحميدة

بنت الناس المحترمين القنوعة

هى التى تقبل ... وتفرح جدااااااا

بهدية عبارة عن وردة بلدى من حبيبها او زوجها


وان المراة التى تطلب هدية مادية

هى امراة شريرة جشعة مش متربية وبنت كلب


لا اعرف حقا لماذا كان هذا المفهوم

عالق فى عقلي الباطن لفترة طويلة

وعلى هذا الاساس

كنت اقنع نفسي فى سن مراهقتي

باننى احب الازهار والورود

وكنت اقول لصديقاتي بسذاجة حالمة

وبقدر كبير من " سهوكة البنات" تليق بمراهقتي حينها

وعلى طريقة ماجدة فى فيلم المراهقات

انا لما احب حد

مش مهم عندى انه يجبلي هدية

المهم انه يفتكرنى دايما ويجبلي انشالله حتى وردة بلدى


و اتذكر انني اكتشفت فجأة

اننى يوما لم احب الازهار

ولم اقتنع بها ابدا كهدية من محب لمحبوبته

و وجدت نفسي اعترف بصوت عالى

ايه الهبل ده

ورد ايه ده اللى الواحد يجيبه لحبيبته


اتذكر الان قبل زواجى بأيام قلائل

من زوجى الثانى سابقا ... طليقي حاليا

وعند مهاتفته لي طلبت منه ببجاحة

هاتلى معاك هدية

فضحك قائلا ... حاضر

وقلت له مستطردة ببجاحة اكثر

عارف لو جبتلى ورد و الكلام الفارغ ده ... هيبقى نهارك اسود

انا ماليش في نظام الرومانسية ده

فقال لى ضاحكا

عارف عارف ... انا عارف انك عملية وبتحبي الهدايا اللي ليها معنى

قلت له بس متجبليش هدية دهب برضه لانى مبحبش الدهب

فقال لي ... حاضر عارف والله

واستطردت فى كلامى دون توقف وقلت له

و متجبليش هدوم لانى مش بثق فى ذوق حد فى الهدوم

ومتجبليش برفانات لانها بتخلص وانا عايزة هدية تعيش العمر كله

ومتجبليش شكولاتة لان الشكولاتات مرطرطة فى كل حتة

واياك متجبش حاجة وتدينى فلوس وتقولى اشترى اللى انتى عايزاه

انا عايزاك تتعب فى انك تجبلى هدية بنفسك على ذوقك

ومش شرط انها تكون غالية ... لكن المهم انها تعجبني

اتذكر انه قاطعني بضحكه الكثير والقوى وقال لى

انا عارف انك هتطلعي عيني


اتذكر هذا اليوم جيدا واحزن كثيرا

احزن كثيرا لانى ....... ملحقتش اطلع عينه بالقدر الكافي

نيهاهاهاهاهاهاهاهاهاهاهاهاهاهاع


مقتنعة انا تماما بموقف الفنان خالد صالح فى فيلم احلى الاوقات

واستنكاره لموقف زوجته في الفيلم هند صبري

لما تطلب منه بتأثر وانفعالية انثوية ... هاتلى ورد يا ابراهيم ... عايزة ورد

وهو فى الاخر برضه بعد ما يجبلها كام وردة بلدي

علشان يرضي رومنسيتها ويريح دماغه من زنها

يروح يشتري جنب الورد كيلو كباب وكفتة

فاضحك واقول فى عقل بالى

ايوة كدة ..... هو ده الصح .... ورد ايه بس وزفت ايه


بس خلاص

وكل الكلام اللى فوق ده

منطلعش منه بأي حاجة


واساسا انا كاتبة البوست ده كله

علشان كان نفسي جدا استخدم فى كتاباتي مصطلح" المروج الخضراء"

______

إنــتــهــى

25 comments:

Baskouta said...

مبسوطة اني اتطمنت عليكي
يارب دايما موجودة وبخير
وعلى فكرة البوست عجبني جدا
تحسي انه فضفضة مع نفسك وبس
:)

ابراهيم رزق said...

ازيك يا ام شريف

حسين السيد بيقول
قال جاى و جايب كم وردة
فاكر ده يرجع ليالينا
لو كان الورد يجيب فايدة
كان كل اتنين زرعوا جنينة

معاكى ان الاشياء تختلف فى مفهومها طبقا لاختلاف الاشخاص
و ده سر جمال الحياة الاختلاف
لو اراد سبحانه و تعالى ان يخاقنا متشابهين لفعل
و لكنه برحمته خلقنا مختلفين و خلق الاشياء المادية مختلفة
ارض و بحر خضرة و يابس عصافير و غربان
فمن الطبيعى ان تحب و ترتاح لما تريد

حمد الله على السلامة و عودا حميد بأذن الله

عمرو فكرى said...

ازيك يا ست نورة؟
التبرع الجاى امتى؟

بـت خـيـخـة وأي كـلام said...

بسكوتة

شكرا يا بسكوتة متحرمش منك يا حبيبتى
وانا مبسوطة انى معاكم

شكرا يا بسكوتة







ابراهيم زق

الله يسلمك يا ابراهيم
وشكرا على تعليقك الغير منشور






عمرو فكري

ازيك يا سي عمرو
ههههههههههههههههههه

التبرع الجاى اول جمعة فى مارس ان شاء الله
وهبقى اعلن عنه قبلها بكام يوم بإذن الله

شكرا ليك يا عمرو وسلملى على ريهام









فاتيما

طمطومة
مش عارفة طبعا انشر تعليقك يا حبيبتى
لانه كوكتيل تعليقات
بشكرك عليه جدااااا

وبشكر ستيتة على كلامها
وهاروح بنفسي اشكرها

مش عارفة اقولكم ايه
انا بعيط وبضحك دلوقتى

ربنا يديم المعروف

وانا اللى بعتذر يا فاتيما

اشوفك على خير دايما ان شاء الله

شكرا ليكي يا حبيبتى

P A S H A said...

حمداً لله على سلامتك يا نوران
:)

Anonymous said...

من حقك ان تكرهي الورد
لكن ليه الالفاظ دي
مره بنت كلب
ومره ورد ايه وزفت ايه
من فضلك ارتقي بألفاظك
الانثي انثي مش بحبها للورد
ولكن بأحساسها
وكلامها

بـت خـيـخـة وأي كـلام said...

pasha

الله يسلمك يا شريف

شكرا ليك








الغير معرف

حاضر... هحاول ارتقي بألفاظي

بس مقدرش اوعدك بكدة


شكرا ليك

فاتيما said...

طب انتى حبيبت يا خوختى

انشريها بقى

:)

masry said...

يعني اية مروج؟
صحيح الرومانسية ليها ناسها انا عن نفسي عمري ما اقتنعت بالورد والا حتي بالعطر والا بالسماء الصافية وكله كوم ولما حد يجيبلي هدية كرافته وانا اصلا مش بلبس بدل فعلا لو الواحد اتعزم علي اكلة حلوة الذ من الورد والكلام الفاضي ده وعمار يا رومانسية

بـت خـيـخـة وأي كـلام said...

فاتيما

وانتى حبيبتى يا طمطومة

:)

اشوفك على خير يارب











مصري

مروج يعنى المساحات الواسعة


انا برضه بقول كدة
اكلة حلوة احسن من مليون ودة

وانا فعلا يخنقنى جدا الهدايا اللى مالهاش فايدة او اللى متعبرش عن ذوق المهدى اليه

فيه حاجة اسمها فن شراء الهدايا
الهدية لازم تكون بتعبر عن ذوق اللى جايبها
وفى نفس الوقت لازم تكون هدية لايقة على شخصية المهدى اليه


شكرا ليك

nor said...

لو خيروني لاخترت الصحراء برضه..لكن بحب الورد وممكن اقتنع به كهديه يمكن لانه حلم مراهقه زي ما قلتي ويمكن لانه لغايه دلوقتي تخيلي عمر ما راجل جاب لي وردة ...مش تضحكي و انا وصلت لأرزل العمر ونحمدوه..سؤال خبيث جدا زوجك اللي هوه طليقك التاني عرف يجيب لك هديه ايه
خدي بالك من نفسك يا نوران !!!

مدونة رحلة حياه said...

السلام عليكم
لكل منا ما يروق له ولو الاختلاف الاذواق لبارت السلع
اسال الله ان تكونوا بخير
احلى حاجة فى القلم صراحته

بـت خـيـخـة وأي كـلام said...

نور

يارب يا نور ربنا يرزقك بزوج ذكي
يعرف ازاى يجبلك حاجة تسعدك بجد

شكرا ليكي







مدونة رحلة حياة

ازيك يا محمد

متفقة معاك طبعا فى حكاية اختلاف الاذواق دى

انا كويسة والحمد لله
يارب انت تكون بخير وافراد اسرتك كلم يكونوا بخير

شكرا ليك









الاخ الزميل المدون
اللى منشرتش تعليقه

لأ على فكرة انا مش مادية بقى
ومش بحب حد يتهمنى الاتهام ده

اولا مش معنى انى مش رومانسية يبقى اكون مادية

انا بس مبحبش الهدايا
اللى عمرها قصير
انا احب الهدية تستمر العمر كله علشان تفكرنى دايما باللى جابهالى

انا مرة جاتلى هدية عبارة عن بروش
وكانت باتنين جنيه ونص
ومازال البروش ده عندى
وبحبه جداااااااااا
وبستخدمه لحد دلوقتى
رغم مرور سنين عليه


فالموضوع عندى مش بقيمته المادية
ولكن بمدى احتياجى واستخدامى للشيء ده

لكن الورد يومين تلاتة وهيدبل ويترمى
وهازعل عليه
خصوصا لو اللى جابهولى حد غالى عندى

وحكاية الدهب دى
اه انا مبحبش الدهب
بس يعنى لو جوزى جابلى هدية دهب مش هارميها من الشباك
بالعكس هافرح بيها
و هافرح بيها جدا كمان

انا بتكلم عن لو حد خيرنى
عمرى ماهختار هدية دهب بصراحة

لكن لو جوزى جابلي هدية دهب من نفسه
من غير يعني مايسالنى اجبلك ايه
هبقى مبسوطة طبعا بالهدية


بس خلاص

شكرا ليك

نونو الرومانسية said...

كنتى فين
الحمد لله انك بخير
او يارب تكونى بخير

واحدة كدة said...

بلا مروج بلا بتاع
اعد أسبوع كل ماجى هنا يقفل فى وشى
دا كلام ؟ :'(
مكنش العشم يا أم شريف

الحمد لله إنى إطمنت عليكى
و يا رب متقفليش الباب فى وشى تانى :)

بـت خـيـخـة وأي كـلام said...

نونو الرومانسية


شكرا ليكي









واحدة كدة

معلش انا اسفة

بس انا مكونتش قفلاها فى وش حد والله


بس ساعات كدة بيعدي علينا وقت بنحتاج نقفل فيه على نفسنا ونبعد عن كل الناس

شكرا ليكي

بـت خـيـخـة وأي كـلام said...

البنوتة اللي منشرتش تعليقها


المرتبة بس يا حبيبتي اللى ناقصة
ولا فيه حاجة تانية ؟

بـت خـيـخـة وأي كـلام said...

استاذ مصطفى

محتاجة اسم المستشفى يا فندم
وفصيلة الدم المطلوبة بعد اذنك
وياريت تبعتلى رقم موبايلك
وهخلى حد من طرفي يتصل بحضرتك

وان شاء الله خير

شكرا ليك








سيف الدين

بصراحة مش فاهمة كلامك عن ايه

ممكن توضح اكتر؟

شكرا ليك

بـت خـيـخـة وأي كـلام said...

البنوتة اللي منشرتش تعليقها


طيب يا حبيبتى
اذا كان على كدة بس
دي حاجة بسيطة ومقدور عليها ان شاء الله

ابعتيلي بس بعد اذنك رقم تليفونك واستنى منى تليفون فى اقرب وقت

وربنا يتمملك على خير ان شاء الله

بـت خـيـخـة وأي كـلام said...

ريهام


بجد يا روما ؟؟؟

وش واحدة مبتسمة اوى

طب الحمد لله
ربنا يجبر بخاطرك يا بنتى

اصل انا قعدت تلات ساعات علشان النتيجة تكون كدة
رغم ان المفروض ساعة الا تلت بس

لكن انتى عارفة بقى انا مش متعودة على الحاجات دى
فعلشان الاقى نتيجة فضلت متعذبة تلات ساعات علشان احس ان فيه اى تغيير

بس انا عن نفسي مبسوطة والحمد لله

شكرا يا روما

جارة القمر said...

حمدا لله ع سلامتك يا نور

ربنا يحميكى و يرزقك من حيث لا تحتسبى

Anonymous said...

رائعة كالعادة

بـت خـيـخـة وأي كـلام said...

جارة القمر


الله يسلمك يا حبيبتى
ميرسي يا كميلة على الدعوة الحلوة دى

ربنا يكرمك يارب

شكرا ليكي











الغير معرف

ميرسي .. شكرا

الطائر الحزين said...

واضح ان تعليقى السابق لم يصل؟

دعوت بالرحمة لوالدك ولوالدى وجميع موتى المسلمين

=======
وقلت حمدا لله على السلامة
======
و اظن كنت كتبت
فرق كبير بين انكار الذات وهدمهما

بـت خـيـخـة وأي كـلام said...

الطائر الحزين

انا قريت تعليقك يا ايهاب الاولانى
والمفروض انى نشرته
بس مستغربة انى مش لاقياه


عموما
ربنا يرحم امواتنا جميعا

والله يسلمك

شكرا ليك يا ايهاب

users online