Sunday, April 01, 2012

الـــحـــكـــايـــة




وانت قاعد على الكافيه


محتار هتشرب قهوة تركى


ولا شاى اخضر سخيف


ابقى ركز فى الحكاية





والحكاية


مش حكاية


قهوة سادة


او زيادة


ومش حكاية


نسكافيه


او لاتيه





الحكاية .. حكايتك انت



مين يدوق الطعم بيك


مين يحس بجوعه فيك


مين بيعطش لما تبعد


مين بيشبع بلمسة منك


مين بينهش في لحمك


مين بيجيب سيرتك بحق


ومين بيجبها بألف باطل


مين بيحبك


مين بيخلصلك ليالي


ومين بيخونك سنين





امتى قلبك اتحرق


وامتى بالك كان بيغلي من القلق


امتى خوفت


وامتى اترعشت من الألم


امتى كلت حق حد


وامتى خونت الامانة


امتى بعت القضية


امتى نيمت الضمير نص ساعة


وامتى انهزمت


وامتى لملمت الشجاعة


وامتى شربت اول سيجارة


امتى قلت الله أحد


وامتى كفرت بالإله





حققت حلمك .. ولا ضاع ؟


حظك جميل .. ولا دايما لابس في حيط ؟


وحداني جدا... ولا معاك حد ماسك فى روحك ؟


متفائل ورايق ... ولا في عينيك الكوباية فاضية؟


اتشقيت زمان ... ولا طول عمرك مقضيها جد ؟





جربت تمشي برجل واحدة


جربت تمشي على الايدين


جربت تمشي وانت مبتمشيش اساسا


جربت تمشي وانت قلبك مش معاك





اضربت ؟


اتهانت كرامتك ؟


طب خدت حقك ؟


رقدت مرة تحت رحمة ربنا ودكتور وابرة ؟


اعترفت بذنب عمرك مارتكبته ؟


عملت واوا في قلب حد حبك بجد ؟


عمرك سقطت فى امتحان ؟





مممممممممممممممممممممممممممم


ولا اقولك ...


وانت قاعد على الكافية


بلاش تركز فى الحكاية


اشرب قهوتك و قوم


و وانت ماشي


ارسم ضحكة فوق شفايفك


وقابل كل الدنيا بيها


واستعبط على روحك وقول


انا الفرحان


__________



إنــتــهــى

23 comments:

فاتيما said...

تــحـــــفـــــة

بـت خـيـخـة وأي كـلام said...

الغير معرف اللى كتب تعليقين وطلب انهم ميتنشروش


اولا مش قادرة امنع نفسي من الاعتراف بانى عارفة انت مين

يمكن مش متأكدة
لكن حاسة بيك

وبتمنى انك تكون فعلا الشخص اللي بقصده ومتكونش حد تاني


بص
انا بثق فى ذكائك وانسانيتك

وعلشان كدة متاكدة انك هتفهمنى صح
لما اقولك
انى واخداك فى حضني دلوقتي

وبطبطب عليك

او بطبط على نفسي

معرفش

ومش عارفة اعمل حاجة تانية

يمكن بتمنى لو كنت اعرف تعويذة اهمس بيها فى ودانك واشيل بيها كل حاجة وحشة فى حياتك

بص انا اساسا مفلوقة من العياط دلوقتي
وحضناك جامد

ومش عارفة بجد ممكن اشيل عنك ازاى اى حزن واى وجع

بس تعليقك عامللي مليون احساس
ومش عارفة ارد عليك اكتبلك ايه
وبقالى ساعة بكتب كلام وامسحه
وامسح دموعى شوية وارجع اعيط تانى
وحالتى زى الزفت

يمكن مبسوطة انك وثقت فيا وفضفضت باللي وجعك

يمكن تكون بتعمل كدة علشان تشجعنى انى ارسم انا كمان حكايتى بايديا ومخليش حد يرسمهالى

بص
انا مش عارفة اقولك حاجة
غير انك انت لو انت فعلا الانسان اللى انا بقصده

فانا عايزة اقولك انك امبارح خدتنى بالحضن وطبطبت عليا

متستغربش
بس انا فعلا كنت حاسة بكدة


انا بحبك جدااااا

ومش محتاجة اقول انى بحبك حب الانسان لاخيه الانسان
لانى متاكدة من ذكائك وانك فاهم قصدي

بس علشان خاطرك
هاقولهالك بطريقة مهذبة شوية تليق بيك

انا بحبك فى الله

ربنا يكتبلك كل الخير

شكرا ليك
وخد بالك من نفسك

بـت خـيـخـة وأي كـلام said...

فاتيما

شكرا يا طمطومة

ابراهيم رزق said...

خيخة

هو ممكن بعد ما تشرب قهوتك
تقوم و تمشى و انت بتدندن غنوتك
قال ايه انك سعيد ده راى حضرتك
ممكن تنتشى شوية و تحس بعزتك

لكن بعد فترة راح تقف وقفة اكيد
تسأل الفرح مليك يعنى انت صحيح سعيد
و لا بتتعاطى سعادة صنف حلو يكون جديد
ايوة مدمن يعنى واهم وحزنك كان شديد

وانت ماشى منتشى دست على مين فى الطريق
مين مسح دمعتك و مين حاول يبقى رفيق
و مين غمى عنيك و حطك فى ظلام كان عتيق

فوق يا صاحبى و اتعاطى الحقيقة
مهما كانت صعبة او مرة و خنيقة
راح تفوق حتما و راح تطلع لفوق
مهماالشمس غابت لازم راح يجى شروق

جميلة قوى يا خيخة
و بجد مش عارف اديها حقها

تحياتى

riri said...

حلوة قوى

بس الاغلبية بتشرب القهوة وبتستهبل ع نفسها

ساعات كتير بيبقى ده الحل عشان الواحد بيبقى اصلا تعبان قوى ومش حمل انه يشيل اكتر من اللى شايله

فبيقضيها استهبال عوقبال امالتك كده

بـت خـيـخـة وأي كـلام said...

ابراهيم رزق

عاجبني اوى الكوبليه بتاع
دست على مين فى الطريق
الى اخر الكوبليه

اصله واقعي جدا

شكرا يا ابراهيم









ريري

بس مينفعش نقضيها استهبال علطول
لازم هتيجي علينا لحظة نواجه فيها كل اللى بنهرب منه

وما اصعبها من لحظة

شكرا ليكي يا ريري

بـت خـيـخـة وأي كـلام said...

المجهول اللي قال فى تعليقه انى سافلة


هو انا مش عارفة فين وجه السفالة فيما ذكرته انت

يعنى حتى لو اعتقادك انى اجلت التبرع بالدم الحريمي
من اجل لقاء الاسكندرية
وده غير صحيح بالمرة
ولكن يعنى اذا افترضنا ان ده صحيح
فما وجه السفالة فى ذلك ؟
!!!!!!!!!!!!!!


ثم اني قايلة فى بوست التبرع بالدم ان عندى التزامات خاصة بيا بتمنعنى انى اخلى التبرع بالدم فى ميعاده

فأكيد يعنى يتفهم انى التزاماتى دى بتمنعنى من حضور اى نشاط تدويني





اما باقي تعليق حضرتك
واللى كان سبب رئيسى انى منشرش تعليقك
لانك تطرقت فيه
لمواضيع لا يصح لانسان عنده ذرة احترام لنفسه انه يتطرق ليها


فانا بصراحة معنديش اى تعقيب عليه
غير
انه تعليق بيدل على اخلاقك واصلك
وعرفت من خلاله مدى تربيتك

وبشكرك جداااا
لان تعليقك خلانى اعرف انى بنت ناس أوى
مقارنة بأمثالك



وبخصوص الكوبليه اللى حضرتك استشهدت فيه بأية كريمة

احب اقول لحضرتك
ان الله سبحانه وتعالى قال لسيدنا محمد فى كتابه العزيز

فذكر انما انت مذكر
لست عليهم بمسيطر

صدق الله العظيم

يعنى
متهيألي كدة حضرتك محتاج تعيد حساباتك
في مرجعيتك الدينية

شكرا ليك

و تستمـ ـر الحيـ ـاه said...

أنتِ جميلــه
و لا شئ بعد

BanOta MeLa3'baTa :) said...

تُحفـــة بجد !!!!
هى فِعلا حكاية و طويييلة أوى
:)

بـت خـيـخـة وأي كـلام said...

وتستمر الحياة

:)

شكرا يا دكتورة حبيبة

وما رأيتينى جميلة
إلا لأنك انتي الأجمل


وقديما قال الشاعر
إيليا أبو ماضي
كن جميلاً ترى الوجود جميلا


شكرا ليكي

بـت خـيـخـة وأي كـلام said...

بنوتة من العتبة

كويس انها حكاية طويلة
فيه اللي بيعيش ويموت ومبيسبش وراه اى حكايات

انا بحس ان الحكايات دى بتكون ماانجزناه فى حياتنا
تجاربنا اللى عشناها
كل حاجة عملناها واتعاملت فينا

فمتزعليش ان الحكاية طويلة


شكرا ليكي يا بنوتة

Anonymous said...

THIS POST TOUCHES MY HEART
you are a great lady
hossam

بوبو said...

ازيك يا نورا.. وشيكو عامل ايه؟ وصلني سلامك من يوم التبرع بالدم ربنا يباركلك ويسلمك، واعذريني اني مقصرة، لكن الحمل تاعبني جدااااااااا.. ادعيلي
انا كنت عاوزة اقول حاجة بخصوص البوست بتاع الحملة النسائية للتبرع بالدم، لقيتك قافلة التعليقات فيه قلت اقول هنا
نصيحتك ان الناس تاخد كل يوم ملعقة عسل اسود.. يا ريت تضيفي عليها انه يكون بالليمون او يشربوا معاه او بعده عصير برتقال لان الحديد اللي في المصادر النباتية مركب وامتصاصه صعب الا بوجود فيتامين سي اللي بيساعد الجسم على امتصاصه
والحديد الحيواني على فكرة فيتامين سي بيساعد على امتصاصه اسرع.. وعشان كده بنعصر ليمون مع الكبدة وهي نية غالبا :)

بـت خـيـخـة وأي كـلام said...

الغير معرف اللي طلب انى منشرش تعليقه

وش واحدة مبتسمة

شكرا ليك







حسام

شكرا ليك يا حسام







بوبو

ازيك يا هبة
واحشانى جدا
الف سلامة عليكي
ويارب يتمم شهور الحمل على خير يا حبيبتى

شكرا على المعلومات المفيدة
وان شاء الله قبل التبرع بكام يوم هابقى اعمل بوست تانى وهابقى اكتب فيه المعلومات دى

سلميلي على وليد وبوسيلى عمر كتير
وخدى بالك من نفسك يا حبيبتى

شكرا يا هبة

بـت خـيـخـة وأي كـلام said...

الزميلة المدونة العزيزة جدااا
واللي طلبت انى منشرش تعليقها


اولا انا بشكرك على دعوتك ليا بالحضور الى الاسكندرية

بس بعتذرلك ان عندى التزامات فى نفس اليوم ده ومش هينفع اجي

واكيد انا الخسرانة انى مش هاشوفكم

بس البركة فيكم يا اهل اسكندرية
وفي اللي هيروحوا من عندنا من القاهرة
ومن باقي محافظات المحروسة

واليوم ان شاء الله هيكون جميل بيكم و بيهم



اما بقى بخصوص تعليقك على البوست
فردي عليه مش هينفع على الملأ كدة
ابعتيلي ايميلك وانا ابعتلك عليه ردي


شكرا ليكي يا حبيبتى

Romancia said...

وهميه بجد وحقيقى
بجد بجد وهميه

بـت خـيـخـة وأي كـلام said...

رومانسية

ارسيلك على بر يا ميرو

وهمية ولا حقيقية ؟
هههههههههههههههههههههههههه


شكرا يا مروة

Anonymous said...

اختيارك للصور فى كل بوست عبقرى وحاسس انك بتبذلى فيه مجهود كبير عشان تختارى صوره تلائم حاله البوست
hossam

بـت خـيـخـة وأي كـلام said...

حسام

وش واحدة مبتسمة

شكرا يا حسام

بـت خـيـخـة وأي كـلام said...

محمد ممدوح



يا خبر يا محمد

انا عيطت وضحكت فى نفس الوقت اول ما قريت تعليقك

انت كنت على بالي من شوية
وكنت قلقانةعليك
فرحت لما لقيت تعليقك

طمنى انت عليك يا محمد

يارب تكون بخير

خد بالك من نفسك

فافى said...

جميل جدا كالعاده
وفعلا كتير مننا بيفكر فى كده وزياده عليه شعور الناس هايكون ايه بعد مايموت وهل هايفتكروه بحاجه وحشه او حلوه

زهراء الفاطمية said...

الدنيا كلها
مش مهم بتعمل ايه
طول حياتك
المهم بتعمله مع مين
حتي لو بتعمل حاجة بتكرهها
المهم تعملها مع حد بتحبه و مبسوط باللي بيعمله

عشان كدة طعم ممارسة الهوايات مع الحبيب حلو حتي لو كنت بكره هوايته

اسفة علي احساسك بالحزن من التعليق المجهول
ربنا يقويكي

Hegazy Saad said...


عترت عليها بالصدفة :)
حلوة قوى :)

users online